انقطاع متكرر جدا للتيار الكهربي في الخرطوم عاصمة السودان الكهرباء عادت للقطع العشوائي ادارة الكهربا كانت ملتزمة بالقطع المبرمج لكن يبدو انها رأت ان الشعب السوداني .. البرمجة ذاتا ما بستاهلا!!!!! جملة القطوعات تصل في اثناء النهار الي 11 ساعة!!! مع انو النهار 12 ساعة!!! الكهربا تقطع 7 صباحا تجي 11 الناس يقولو خلاص تاني ما بتقطع يقوموا يقطعوها 11:30!!!!!!!!! ما يجيبوها الا بعد المغرب الممتحنين يقضوا النهار في قلق جري وهظار وحوامة وقعاد في الضللة ويمشوا و يجوا من شجرة ناس فلان لي مظلة ناس فلان ولما تجي الكهربا المغرب خلاص بكونو دايخين ما يقدروا يقرو ولا ساعة!!! مع انو اهاليهم دافعين دم قلبهم عشان يقروهم في احسن المدارس ده مش لعب باالشهادة السودانية؟؟؟؟ اللي بترتب عليها مستقبل اجيال ومستقبل البلد ذاتا؟؟؟!!! بعدين طبعا اكيد في ناس مقتدرين عندهم خيارات بديلة وهناك مناطق في السودان بها استقرار في التيار الا يقدح هذا في مصداقية وعدالة الشهادة الثانوية؟؟؟ اما الطامة الكبري فهي عدم اكمال المقررات بسبب الاضرابات المدرسة التي كانت اول من يخلص المقررات قالت لطلابها قبل حوالي شهر من الامتحانات امشو اقروا الباقي في البيت!!!!!!! بعض المقررات كان يادوب وصلت النصف كيف يعني.. الطالب يدرس لوحده اربعة او خمسة ابواب.. في الفيزياء او الكيمياء او الرياصيات؟؟؟!!!! هل سمعتم بهذا في ابائكم الاولين؟؟ يعني كدة المستوي الاكاديمي للطالب الناجح والفاشل يكون واحد هل تريد الوزارة تحقيق هكذا مساواة؟ واحتمال الفاشل ينجح عن طريق الغش او نحوه استهتار ما بعده استهتار ونخشي ان يسود قاعة الامتحان هذا الشعور من الاستهار نحن نعلم اننا لا يمكن ان نلوم احدا فالبلاد تمر بمنعرج سياسي خطير وليس هناك جهاز تنفيذي ولا تشريعي بالمعني المعروف هناك فقط ما يسمونه حكومة تسيير كل عملهم هو مراقبة العربة وهي تسير!! ولكن من بالداخل؟ ما هي احوالهم وظروفهم؟ وماهي الوجهة؟ والمسافة؟؟ والسرعة؟؟ ومتي تصل؟؟ اذا قدر لها الوصول لا احد يدري هذه هي السياسات العرجاء التي اخرتنا قرون عديدة وجعلت بلادنا.. الاولي في كل ما هو قبيح و (الطيش) في كل ما هو حسن
عناوين الاخبار بسودانيزاونلاينSudaneseOnline اليوم الموافق June, 07 2022
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة