*جاء احد (مراسيل) الإنقلاب التخريبي الغادر إلى قائد (الشغلانية) المهببة في (التدمير) وطرق باب بيته بعد أنصاص الليالي ثم دخل قبل أن يسأله (الزعيم) عن سبب زيارته (الفجائية) هذه !!.. *وقال له : جيب كرسيين خلينا نقعد في الطراوة دي امكن راسنا يروووووق شوية من دوشة (السعاليك) الماعاوزين يقيفوا ديل !!.. *وما أن توهط في الكرسي الوثير حتى زمجر قائلاً : *الليلة جبت ليك حل مزبط معاي .. واحتمال الأمور تروق شوية .. *ياخ العساكر راسهم بقى لافي من كترة البمبان اللي بيرجع ليهم .. وحتى عيالهم بقوا ما بيفرزوا فيهم (الضكر) من (الإنتاية) .. يعني طاشين شبكة تب .. وما ممكن أبداً نسكت على كدا!!.. *فسأله الزعيم وهو يتمتم : بتتتتتفكر في ششششنو؟!.. *سرح قليلاً ثم واصل حديثه: *بدل تمطر حصو والخواجات يزنقونا والدنيا تنقلب في وشنا أحسن نعمل حاجة كدا نهدي بيها البشر ديل .. *الزعيم الدموي : يلا أحكي شوقتني والله !!.. *المفكر (الخلوي) : قالوا البلد فيها فريق اسمه الهلال والتاني اسمه (النجيمة) و...... *الدموي مقاطعاً : اسمه المريخ .. المريخ !!.. *المفكر الخلوي : ما مشكلة المريخ .. الفسيخ .. في النهاية هم (تبعنا) وعندهم واحد متلصق فينا اسمه (الجاطومي) .. ونخليهم يلعبوا ضد بعض هناك في الجنينة ونقول عليها دافوري السلام !!.. *الدموي : اليد الواحدة ما بتصفق .. مالو لو وسعنا الحكاية شوية؟!.. *الخلوي : نوسعها كيف يعني؟!.. خلاص كويس نكلم (التوم كجو) يكون كابتن فريق (الدرقة) ويلعب ضد فريق الخبراء (الكضابين) !!.. الدموي : استراتيجيين ياخ .. استراتيجيين !! *الخلوي : كويس .. استراتيجيين .. بس أهم شيء الشباب الهايجين ديل يقعدوا في الواطة شوية .. *الدموي : كلام جميل .. لكن لو الجماهير قاطعت مباراة السلام دي حا تكون فضيحة لينا !!.. *الخلوي : ما تخاف .. حا (نشحن) ناسنا ويستفوا (الفسحة) !!.. *الدموي : فسحة شنو ياخ؟!.. الاستاد .. الاستاد !!.. *الخلوي : لا (تحكها) ياخ .. اهم حاجة بعد (اللعبة) تنتهي حا نعمل شنو؟!.. *الدموي : نصدر بيان نقول فيهو اننا حريصين علي الديمقراطية .. وحريصين علي استبتاب الأمن .. وحريصين على تكملة الفترة الإنتقالية .. وقيام الإنتخابات بدون مشاركة (كوزية) .. و........ *الخلوي مقاطعاً : ايوا .. ايوا .. موش ياهو كلامك القاعد تقولو كل مرة؟!.. *الدموي : ياهو ذااااااااتو .. وأنا غير (الكضب) عندي شنو !!.. *الخلوي ضاحكاً : ذكرتني غنية بتقول : كلنا كضابين .. كلنا كضابين .. وان شاء الله كمان دايماً كضابين !!.. *الدموي : نشيد أطفال .. نشيد ياخ !!.. *الخلوي : نشيد .. دوبيت .. كله جايز .. وخلاص نبقى على الكورة وتوزيع (الجوايز) !!.. *الدموي : مية المية وبالجد نحن محتاجين لأي (تمثيلية) نغطي بيها على (الخبت) و(الغمت) البنعمل فيهو دا .. *وهكذا تمت الحبكة الغبية من أسياد الأذية .. *وهكذا تستمر المهزلة العسكرية .. *وهكذا يريدون من الشعب السوداني أن يكون لديه (قنابير) عالمية .. *و *الله في ..
عناوين الاخبار بسودانيزاونلاينSudaneseOnline اليوم الموافق July, 23 2022
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة