تداولت وسائل الإعلام السودانية تصريحا للسيد نبيل اديب رئيس لجنة تبرئة العسكر من جريمة فض الاعتصام والمسؤول عن تمييع القضية.قال في تعليقه ان لحنة إزالة التمكين لم تكن دستورية!! كدي خلونا برواقة او زي ما بيقولوا الشباب روٌِق المنقة واحدين كمان من الشباب بيقولوا خُت الكورة واطة. تم اعتماد وثيقة دستورية حصل عليها شبه اجماع بموجب هذه الوثيقة تم اختيار رئيس الوزراء السابق دكتور حمدوك الذي جاء نتيجة للوثيقة الدستورية التي قلت انت ان لجنة ازالة التمكين غير دستورية كدي براحة يا نبيل القانوني الضليع، الخلا لجنة فض الاعتصام دستورية ولجنة ازالة التمكين غير دستورية شنو؟ ماهم الاتنين بموجب تلك الوثيقة. حسع انت منتظر تعيين رئيس وزراء جديد شديد ولضيد، علشان تديه نتيجة التحقيق هل يا ترى فض الاعتصام ده دائر ليه تحقيق. ماهو الغنماية في مراحها عارفه منو الفض الاعتصام اها يا اخونا نبيل نفترض ساكت زي ما بنقول نحن زمان نقترض جدلا انه التحقيقات طلعت حميتي والكباشي صاحب الإعتراف المسجل ومصور و(عبد الوهاب) البرهان مدانين ويجب تقديمهم لمحاكمة ياتو جهة مسئولة عن تنفيذ هذا القرار. ولو فرضنا جدلا انه رئيس الوزراء الجديد وشديد طلع كوز ابو تراكتر وللا ابو بت بتعرف الحاجات دي كويس. ممكن تديه نتيجة التحقيق؟ بعدين انت خليت مهمتك الأساسية ويقيت تجري يمين وشمال علشان تلقى حل يرضي طرفي النزاع الشعب السوداني والعسكر وجماعتهم الانت ذات نفسك بقيت منهم ودي مهمة مستحيلة الشعب عايز عسكر في السياسة زيرو. بكل اسف كمان دائر تطلع لينا شغل اخونا وجدي النضيف ده كلام فارغ والله ما فارغ الا انت. شوف نحن العدالة عندنا ما عندها قانون قانونها ان الكيزان ديل بنقلعوا من جذورهم. انت داير تبقى معاهم واصلك بقيت واحد منهم بنقلعك معاهم من جذورك. اخونا عادل امام الله يطول في عمره مرة قال اتوكل على الله واستغل رقاصة حسع انت اتوكل على الله وربي ليك دقن كبيرة وابقى كوز كبير. حتى نسمع منك تحفة جديدة لك تقديري.
عناوين الاخبار بسودانيزاونلاينSudaneseOnline اليوم الموافق September, 26 2022
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
عمر التجاني
فيس بوك
تويتر
انستقرام
يوتيوب
بنتيريست