(الناس منتظرة الجنازة) كل واحد ماسك تلفونه: -تَللَلْ .. تَللَلْ .. تَللَلْ .. --الووو -كلمت فلان؟ --ناس فلان عرفو؟
(راكبين ماشين علي المقابر) علي ضهر البوكسي اي زول ماسك بيد وباليد التانية ماسك التلفون: -تَللَلْ .. تَللَلْ .. تَللَلْ .. --فلان عرف؟ -جايين؟ نحن تحركنا... --خلاس تعالوا في المقابر
(وحتي في المقابر) الدعاء بيد والتلفون بيد -تَللَلْ .. تَللَلْ .. تَللَلْ .. --مالكوم ما جيتو قاعدين ندفن حصلتو وين؟ ...الخ ...الخ ....الخ
كل الاقارب والاباعد جيران زملاء العمل زملاء الدراسة الاصحاب اخوان الاصحاب المصلين في المسجد الببيع ليهم ..البشتري منهم.. حتي ربما التقي اثنان واستغرب كل منهم مين اين يعرف الآخر اهل المرحوم!!!!
وبينما الناس في الدفن يكون البعض في الحِلة لنصب السرادق وتذبح الذبائح ..والشاي والقهوة ويأت الناس من كل حدب وصوب احيانا ما يدفعه المعزون يغطي نفقات الفراش ولكن احيانا يدخل اهل المرحوم في ديون لا يستطيعون سدادها فيكون الأمر بالنسبة لهم: "ميتة وخراب ديار"
ولكن قبل المرحوم ما يموت ربما لا احد يكون قد سأل عنه اللهم الا الجار الملاصق او المقابل قبل الموت اقرب الاقربين لا يهتم ولكن بعد الموت ابعد الابعدين يحضر ربما أتي بعضهم مسافة ساعتين او ثلاثة بالعربة ولكنه ربما جلس خمسة دقائق فقط واعتذر حتي عن شرب القهوة
المرحوم ممكن يكون راقد علي فراش المرض بالشهور ربما احتاج علاجا فلم يجد مساعدة من احد وربما كان اولاد المرحوم في حوجة للمساعدة بعد وفاة ابيهم قليلون من يساعدون ولكن عند الموت يأتون من كل فج عميق تكلفة الفراش كان ممكن تعين المرحوم علي المرض او اولاده في معيشتهم حتي المشاهير والفنانين يشكون من اهمال الناس لهم والاهتمام لا يكون الا بعد الموت اول ما يعلن خبر الوفاة حشود ..وجماهير.. وليالي تأبين ..وتكريم ولذلك ربما عاش احدهم طوال عمره في المهجر وعندما يموت يرسل رفاته ليحتفي به ويكرم علي ارض الوطن!!
ربما يقل قائل هذه عادات الناس منذ القدم وهذا شئ جيد لكن نقول ان الناس في الماضي كانت تحضر في السراء والضراء لو قال احدهم الآن انه يريد نفيرا مثلما كان في الماضي: -- "الناس تجي تبني معانا يوم الجمعة" كلهم سيعتذرون اي واحد حا يقول ليك: "عندنا عزاء" زميل او قريب او جار او صاحب او صاحب اخ ...الخ يومي الموت حاصل طبعا اول ما تقول عزاء تاني مافي كلام الأب لو زهج ساي من ناس بيتهم وداير يريح بالو يومين تلاتة ممكن يضرب يقوليهم: --انا مسافر لي عزاء.. احتمال اجي بعد بكرة - طيب والمصاريف وال ... طبعا ما في كلام تاني... عزاء ..خلاص اي عامل في الدولة ممكن فجأة يترك عمله ويعتذر بأن لديه عزاء مهندس ..مدرس.. طبيب.. سفير ..غفير
احد الزملاء كان يدعي ان اهله كثيرون وبالتالي كثير السفر من اجل العزاءات احيانا عندما احضر الي العمل يقولون لي امشي ادي فلان الفاتحة ولكني كنت انتظر حتي يذهب المدير و اسأله: --"صحي جِدك اتوفي ولا حركات منك؟" - "الزول ده ما بديني اذن كان ما قلت كده.. انا ياخي طولت من اولادي" --"طيب والفواتح اللدوك لي الناس دي؟" عندها كان "ينفقع" من الضحك!!!
احد الاصدقاء أتي من احدي القري في الريف قلت له: الناس ماشة عليكم انت تجي الخرطوم؟ قال لي والله بلدنا ما في زيها.. لكن فيها حاجات تكرِِّه وبدأ يحكي لي عن الفواتح والعزاءات قال انو حلتهم كبيرة وناس الحلّال الجمبهم كلهم بتعارفوا ...وبتصاهروا... قال يومي كان مافي عزاء الصباح معناها المسا يومي نحن نمشي نكوس في البكّوس --"اجروا امشوا ثبتوا بوكسي فلان ولا لوري فلان قبل ما يطلع" ويتلموا الرجال والعوين وقال قروشهم كلها ضايعة في ايجار العربات ومجاملات الفواتح -- "..ونخلي شغلنا ونجدّع اولادنا ونهمّل زراعتنا وبهايمنا.." قال يعني زاتو والله...... زهج عديل!!!!!!!
كنت دائما ما أسأل نفسي.. هل هذا الذي نحن منغمسون فيه يندرج تحت باب العبادات ام العادات؟؟؟!!! ... نواصل...
عناوين الاخبار بسودانيزاونلاينSudaneseOnline اليوم الموافق September, 26 2022
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
محمد الصادق
فيس بوك
تويتر
انستقرام
يوتيوب
بنتيريست