*قال الحاج (جلكة) لصاحبه (بنكوكي) : تعال نقعد بعيد شوية من (المخرفين) الملصقين جنب الدكان ديل عشان عندي موضوع مهم جداً عاوزك فيهو !!.. *نظر إليه بنكوكي بلا اكتراث ورد متمتماً : خخخخخير؟!.. *لم يمهله الحاج جلكة وجرجره من جلالبيته البيضاء مكوية وأخذ يحكي له : تعرف انا اخترتك انت بالذات لأنك (عبقري) !!.. المهم : اشتريت 3 جدادات بلديات و(ديك) عشان أقدر أمشي الحال و....... *قاطعه بنكوكي غاضباً : تمشي الحال بتلاتة جدادات وديك كيف يعني؟!.. إنت ديك ولا شنو؟!.. *فقال له جلكة وهو يكاد يغلى غيظاّ : خليني أتم كلامي ياخ .. اشتريت معاهم كمان غنمايتين (حبشيات) وتيس كاميروني !!.. *بنكوكي : لا حول ولا قوة إلا بالله .. إنت بتهضرب كدا أكيد حاشي بطنك بأقاشي (حصين) !!.. *جلكة : مقبولة منك .. بس عاوز أعرف أشتغل كيف وأمشي أموري بدون ما جبريل يفرض ضريبة على الغنم والتيس والجداد والديك؟!.. *تنحنح بنكوكي قليلاً ثم قال له : والله كلامك صاح .. الناس ديل ممكن يفرضوا ضريبة على كل (بيضة) !!.. يا حبيبي ديل أمبارح سلموا ورقة لبتاع بوتيك (جربان) فيها مطالبات كالآتي : رسوم خدمات 10/000 جنيه .. وتاني رسوم خدمات 6/600 نفسي أعرف الخدمات البقدموها شنو؟!.. رسوم هندسية 5/000 !!.. هندسة شنو ما معروف؟!.. إعلانات 5/000 !!.. رسوم إدارية 1/500 !!.. دمغة إجتماعية 200/00 !!.. انت يا مسكين لو لموا فيك حا يعملوا ليك دمغة (تيسية) !!.. دمغة معاملات 200/000 جابوها وارمة .. قالوا معاملات !!.. دعم طلاب 2/000 مع انه بتاع البوتيك ذاتو طالب !!.. دمغة ولائية 200/00 أخرى 3/000 !!.. أخري دي إبليس ذاتو حا يشررررد منها !!.. دمغة إعاقة 3/000 !!.. دي أكيد بدل دمغة الجريح !!.. رسوم ملاريا 1/000 !!!.. أي والله رسوم ملاريا !!.. غايتو أنا بقترح عليك (دس) هذه الأشياء بعيداً عن أعين جبرين ويادار ما دخلك (دفتردار) !!.. *فماذا كان رد جلكة؟!.. قال له : انت عبقري فالصو ولا شنو؟!.. ياخ عندي ديك اهبل بيكورك 24 ساعة وممكن يسمعوه من سقط لقط .. وكمان التيس اهبل منه .. تقول لي أدسهم؟!.. *بنكوكي : في الواقع حيرتني شدييييد .. ومع أني متعاطف معاك وعارف ناس جبرين صعبين لكن الحل صعب !!.. *جلكة : انت بتقول طوالي انك وارث الشطارة والعبقرية من جدك (الشافو خلو) هسة مالك اترخرخت ومصعبها؟!.. *كتم بنكوكي (انفجاره) في سره وقال له : جدي لا كان عنده شغلة بتيوس ولا ديوك .. وعموماً أنسب شيء تعمله تقول ل(كتائب) جبرين انه (حيواناتك) دي للإستعمال (الشخصي) .. ولو كتروا معاك أعمل فيها مجنون وشيل سكين واعمل نفسك عاوز تضبح التيس .. والله فد صرخة من التيس كلهم يجروا !!.. *جلكة وهو ينطط مسروراً : يا سلااااااااام عليك ياخ .. ايوا كدا .. خلاص كلنا نبقى تيوس ونكورك في وش (الجحمانين) ديل !!.. *بنكوكي : عفارم عليك .. عندي جاري بقى (أرنب) .. اليوم كله ينطط .. وشفعه وراه يكوركوا : أرنب نط .. تراني بنط .. أرنب نط !!.. *جلكة : *الله في ..
عناوين الاخبار بسودانيزاونلاينSudaneseOnline اليوم الموافق October, 10 2022
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
عادل هلال
فيس بوك
تويتر
انستقرام
يوتيوب
بنتيريست