عشرات الميكرفونات تجوب الحلة مئات المنشورات تسلم للمصلين عقب خروجهم من الصلاة ملصقات في كل مكان:
المدرسة الخاصة الفلانية (علينا جاي) كوكبة من اميز المعلمين اضمن لابنك المجد والتفوق كذا سنة من العطاء المتفرد نحن نعرف كيف نصتع النجاح لسنا الوحيدين ولكننا الافضل أكفأ المدرسين معلمين للموسيقي والتربية البدنية مرشدين نفسيين واجتماعيين مناشط وبيئة مدرسية مميزة مكيفات ومبردات للمياه تهوية وانارة ممتازة كل ما يحتاجه التلميذ ابنك في يد امينة --- دعايات ...دعايات ...دعايات انا ما عارف.. لكن... في زول ممكن اتغش بمجرد دعاية عابرة مثل هذه؟؟؟؟؟ اذا كان بتاع الطماطم والبطيخ انت الا تمشي تقلب و تفتش وتتفحص ويا حبذا لو شفت زول اشتري قدامك واتأكد قبل كدة جاء واحد بتاع بيض غش الحلة كلها ببيض قديم وشال قروش الناس وما جا تاني --- كتير جدا الناس دفعوا قروش للمدارس وبعد كدة اتفاجأوا بي أنو لا في مكيفات ولا في انارة زي الناس تقطع الكهرباء يفكوا الاولاد تقطع الموية تلقي الاولاد يتحاوموا بالبيوت والمناشط اصلا ما في ليها مكان بعض المدارس تستعين بي ميادين الحلة عشان تعمل فيها الطابور اما الغالبية فبدخلوا الفصول طوالي ضرب الجرس يعني اثبت في مكانك المرشدة النفسية اما يمشوها بعد الشهر الاول او يدوها مادة تدرسها بجانب عملها كمرشدة (قوون وباك) يعني --- ولذلك اقترح ان تكون هناك فترة سماح في البداية اسبوعين تلاتة لحد ما اولياء الامور يتأكدوا من انو الامور كلها تمام حتي بعداك يدفعوا --- انا غايتو من الشئ السمعتو من بعض المرشدات وما قرأته في الصحف والمواقع اعتقد ان فكرة السايكولوجست دي ما اظن تنجح عندنا هي تقريبا نجحت في دولتين او ثلاتة في كل العالم العربي نحن بعيدين جدا عن الدول دي و الافضل ان نجرب طريقة تانية --- المشكلة انو الادارات المدرسية غير مقتنعة بدور المرشد النفسي وفي الخاص.. دائما ما يكون المدير هو السيد .. مالك الملك.. الحكم الفرد.. يملك ويحكم وهذا ما (بوظ) عندنا المؤسسات الخاصة وربما العامة ايضا
اصلا الثقافة بتاعتنا ما فيها حاجة اسمها نفسيات حتي الاطباء في المستشفيات غير مقتنعين شنو يعني زول خاشي عملية حياة او موت يقابل اختصاصي نفسي قُبيل ان يدخل العملية وبُعيدها!!! حا يعمل شنو يعني؟؟؟؟؟؟ يكذب علي المريض وهو داخل يقول له عمليتك بسيطة جدا؟؟؟؟ وبعد العملية يكذب عليه ايضا ويقول له خلاص عمليتك نجحت ومافي حاجة تاني؟؟؟؟؟ دي ما ... المستر ممكن يعملها!!!!!!!!!!! --- في مصر القريبة دي تذهب الي مركز طبي تقول عايز اختصاصي كذا يقال لك انتظر .. رنينا للدكتور وهو جاي علي طول لانو مفيش حد غيرك!!!! اما العيادات النفسية فزحمة .. وحجز .. وصفوف!!!! لانو (بدت) تكون في ثقافتهم موجودة --- ذات مرة طُردت مرشدة نفسية من مدرسة فقط لانها ضيعت لناس المدرسة زبون من العيار التقيل عندما قابل والدي الطفل المرشدة نصحتهم بعد ان اجرت له اختبارا بان يذهبوا به الي احدي مراكز ذوي الاحتياجات الخاصة ثم بعد ان يؤهل الي درجة ما يمكن ان يؤتي به فيدمج في المدرسة. ومرة كان السبب ان المرشدة رفضت ان تفصح للادارة ببعض التفاصيل التي هي اسرار بيوت ويمكن ان تسبب احراج للاسر والمشكلة ان جزء من طبيعة عمل اي سايكولوجست ومن اخلاقيات مهنته ان لا يكشف اي معلومات عن زبائنه مهمة ام غير مهمة ومرة اضطرت مرشدة لتقديم استقالتها والسبب كان تافه جدا جدا فقد جاءت مدرسة جديدة وطلبت ان يكون لها مكتب لوحدها ولم يجدوا غير مكتب المرشدة النفسية التي طلبوا منها الجلوس مع المعلمات فقد كانت المدرسة الجديدة هي اخت سيد المدرسة --- ولذلك في رأيي ان الافضل ان لا يكون في المدرسة اي سايكولوجست اما اذا شعرت اي اسرة بانها في حاجة اليه فعندئذ تذهب الي سايكولوجست خارج المدرسة
--- ونفس الأمر ينطبق علي مسألة المناشط الافضل ان تكون هناك مراكز خارج المدرسة متخصصة في المناشط فقط ينضم اليها التلاميذ بعد انتهاء الدوام الدراسي او في عطلة نهاية الاسبوع
عناوين الاخبار بسودانيزاونلاينSudaneseOnline اليوم الموافق September, 15 2022
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة