لو قراءت للحلو مقابلاته الصحفية والتصريحات البقولها في الجرائد تقول دا ما ياهو عبد العزيز الحلو الكان ذي " الملاك النبيل"، طبعاً كل الجيش الشعبي والحركة الشعبية ما عندهم شي من 3 شهور مضت الا قراءة فضائح عقار والحلو وياسر عرمان، زكانهم دايرين يستعدوا للصيف القادم للعدو بفضائح عقار والحلو وعرمان، سالت جاي جاي لقيت كم مقال طائر الرفاق بيتبادلوها بيناتم ذي "البنقو والكاكويين"،. والفركش الحاجات كلها وطلعها السهلة كان مقال الانصاري الاخير، لانو فضح الحلو بالذات الكان مندثر بالصمت الفاحش وأنفضح في اول مقابلة مع جماهير الحركة الشعبية. في مقال عبدالوهاب الانصاري، الحلو قال في باريس انو الحركة ماعندها قروش عشان تعمل مؤتمر للحركة، وانو الاستجابة للضباط المحالون للمعاش بكون بارجاع الرتب الشالها منهم بعد أبداء حسن التصرف والسمعة الحسنة، والمعروف هم الان بدوا حملة جمع توقيعات لفصله هو عرمان وعقار، " طيب انت من زمان مصاحبهم مالك بالذات رمضان واحمد بلقة". يعني الشي يمكن فهم من كلام الحلو دا هو أن مشكلة الحركة في القروش، طيب لحدي هنا كويس الحركة ما عندها قروش عشان تعمل مؤتمر كبيييييييييير يضم كل الناس الفي الحركة "الجوه والبره". السؤال دكتور جون كان بيعمل مؤتمراتو بقروش أياك كانت الحركة حاجة واحدة؟، طبعاً لا ، دكتور جون عقد مؤتمرات الحركة الشعبية في الأحراش والخنادق يا عبد العزيز الحلو.
ال أنا شايفو الان حاجة واحدة وبس، الحلو وعرمان وعقار "القيادة الثلاثية" بتتهرب من مواجهة الواقع المرير وحالة الكذب والنفاق التي تعيشها، تتهرب من الأجابة عن أسئلة حقيقية وأنتقادات مباشرة وحقائق واضح ذي عين الشمس، كلام الحلو في باريس بان الحركة ما عندها قروش لتعقد مؤتمر عام كمال يطالب الأصلاحيين كذبة كبيرة. من متين الحركة الشعبية كان عندها قروش بعد يوم 6/6/2011م!. الحركة تمويلها من تلاته مصادر حكومة الجنوب/ ودهب التعدين العشوائي، وقروش الاصدقاء واللبط بتاعت القيادة الثلاثية، وفي كل الاحوال الثلاثة القيادة الثلاثية كانت هي البتاخد نصيب الاسد منها والباقي للطبالين بتاعين القيادة الثلاثية. والدليل لي يوم الليلة هناك العشرات والمئات من المصابين والجرحي مجدوعين في حوش المصابين في أيدا، والأخرون هائمون علي وجوههئم في جوبا وكمبالا التي وصلوها بشق الأنفس.
أموال الحركة الشعبية الان هي اموال الفساد، وأغلبها في يد ياسر عرمان والحلو وعقار، اما بنك الجبال فقد نهب ماله بتصاديق الدولارات الشخصية بالحرفنه، وكمان لقبائل محددة، واشخاص محددين، وفي فترة محددة "ودا بجي ليهو في يوم تاني " طيب انا عندي سوال لعبد العزيز الحلو دا، وهو كالاتي :-
قروش ارباح بنك الجبال للتجارة منذ تاسيسه الي اليوم فتاتت وين ومن وين مديرو جاب قروش وعامل ليهو كم من البارات، غريبة هو في الاساس اسلامي وشغلتوا بالمريسة شنو، وما نباوي علاقتو ببنك الجبال شنو عشان يبقي مديرو وينهبو كمان.
ارباح الدقيق الفاسد والادوية المنتهية الصلاحية الباعها الجيش الشعبي وسماسرتوا للأجئين في ايدا والمواطنيين في الجبال راحت وين؟.
أموال تغيير العملة ال أتجمعت منهم وتركوها في بنك الجبال وفي النهاية جمعوا عليه قروش واتسجنوا ناس وراها فاتت وين، ويالحلو انت شلتها وجبت بيها سلاح وقاتلت بيها مع سلفاكير ضد مشار وما وريت الناس.
أموال العقيد الشهيد الاسمو الهندي القتلتوهو انت وعقار عشان مليون دولار فاتت وين؟، مش انتو قلتوا حكومة الجنوب هي المسئولة من كتلوا حسب بيان أردول، وبعد داك جيتوا نكرتوا قرض؟ بس يا الحلو القروش دي فاتت وين وسيبك من دم الهندي المعلق في رقبتكم.
مال كاش انجكشن الشهري ، المابعرف الكاش أنجكشن شنو بوريهو ليهو، هو دعم وربط شهري كاش بتاخدو الحركة الشعبية من وزارة الدفاع بتاعت جنوب السودان كااااااااش من البنك المركزي بتاع الجنوب، زمان كان بمشي حساب الحركة الشعبية ، لكن هسه بشلوهو في صناديق وبدوهو وين ما معروف. طيب يا الحلو دي ما قروش، مال الكاش أنجكشن بتوديهو وين شهرياً بعد تستلموا من حكومة الجنوب؟. والجيش الشعبي ما عندو مرتبات
اموال التعدين العشوائي واطنان الدهب وينها يا الحلو؟ ما معروف انو كلو ضابط عميد وعقيد عندو جهاز دهب وشغال بيهو بجمع دهب وبتدوهو لضباط بتاع الاستخبارات بتاعكم الاسمو يونان وشغال بيهو مع الزغاوة في جوبا ودبي ببيعوا وبتتقاسموا القروش؟ والقصة معروفة ومصورة وموثقة كمان رايك شنو يا الحلو؟.
طيب دي كلو خليهو يا عبد العزيز الحلو، من وين جيبتو قروش يا الحلو لحدي عايزين تسجلوا شركة تعدين كبيرة وجايبين جهاز تنقية دهب بـ 2 مليون دولار ودايرين تسجلوا شركة تعدين في جوبا؟ ولي جوبا بالذات وشنو الا أولاد قبيلة واحدة كمان.
بع دا في حاجة تانية، وين ارباح شركة الطيران البديرها وليد حامد وعندها كم طيارة وين فاتت يالحلو؟ وعندها طيارات وشحنات ولما تشحنوا انتو ذاتكم كحركة شعبية بتدفعوا قروش الشحن، وليد حامد ما زماااااااااااااااان هرب بكم الف دولار وداها وين.
طيب وين أموال وارباح مضاربات الاسهم في الماس بتاعت جنوب افريقيا من 2012 وهي بالتمام والكمال قيمتها 3.5 مليون دولار مع الخواجة اللبناني الجنسية والاصل كمدي الجنسية وفيق أسكندر؟.
من أين ليكم بالدولارات لتنفقونها في مريسة وسكر ونساوين بارات، ورشوة البنقرض من العساكر والمدنيين، وبتدفعوا منها حوافز موظفيكم الخاصييين وطبالينكم وموظفي مكاتبكم التي لا يرغب أعضاء الحركة النظيفين التواجد والوصول اليها خوفاً من وصفهم وتصنيفهم بالطبالين والأرزقية وحارقي البخور وكسارين التلج، لماذا صار موظفيكم في جوبا راحة (الما راحة) منبوذييين عديل من رفاقهم في جوبا؟، ويتحاشوهم لانهم بتاعييييييييين سواطة وحفارين؟؟.
من وين الدولارات التي ترشي بها يالحلو كبار ضباطك من اللواءات والعمداء ليقضوا اجازاتهم في حضن نساءهم في يوغندا وكمبالا وكينيا وبقية العساكر والمناضلين يتلفحون الارض والسماء في الاحراش، ويتسولون قروش المواصلات كالشحادين في جوبا ويوغندا وايدا؟.
يا الحلو لقد سرقتم وفسدتم ونهبتم اموال البسطاء باسم النضال والمناضلين وانكشفتم علي الأخر في النهاية، والداير اقولوا ليك يا الحلو مكنتك بتاعت مافي قروش دي "وهم ساكت" وكلام خارم بارم وشوف ليك كذبة تانية.
قالوا منتهى السرية ،، ومنتهى السرية ،، ومنتهى السرية ،، ومنتهى السرية َ !! أسرار ذلك اللقاء الخطير في ( جوبـا ) بين الثلاثي عبد العزيز الحلو وياسر عرمان وعقار ( القيادة الثلاثية ) وبين المندوب الخاص لعمر حسن البشير في ( سبتمبر الماضي ) ، أسرار وتوافقات يعرفها فقط الثلاثي ومندوب عمر حسن البشير والدكتور جبريل ، تلك الأسرار المحجوبة تعمداَ عن جميع منتسبي الحركة الشعبية ، ومحجوبة كذلك تعمداَ عن جميع أفراد الشعب السوداني ، ومحجوبة كذلك تعمداَ عن القاعدة الفعالة لحزب المؤتمر الوطني !!!. والآن بدأت الإشارات الخطيرة تتسرب عن ذلك اللقاء الذي أدى إلى تلك الزلزلة الكبرى في قمة جهاز الحركة النضالية . وحتى هنا نكتفي ولا نملك المزيد .
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
مقالات سودانيزاونلاين
nour tawir
فيس بوك
تويتر
انستقرام
يوتيوب
بنتيريست