* أحمد: شايفك ما شغال بى موضوع (العقوبات) حاج احمد : قصدك العقوبات بتاعة الكيزان على الشعب؟! احمد: لا عقوبات امريكا على حكومة الكيزان. حاج احمد : لا يا خوي .. دي ما شغلتى .. دى شغّلة كيزان في بَعَض!! ==== * احمد: سمعت إنك فرحت لمن ترامب قال ما ح يرفع العقوبات .. حاج احمد : كضبوا عليك. أحمد: يعني زعلان؟ حاج أحمد : برضو لا . احمد : معقوله؟ لا زعلان و لا فرحان ؟ انت ما سوداني؟. حاج أحمد .. سوداني . بس دا ما موضوعي. أحمد : عجيب و الله .. !! طيب موضوعك شنو ؟. حاج احمد : سيد الدكان المزرزرني، والجنا البِسِهل دا، و اللمبه البتبقبق دي، والولد العاطل دا، و المرا الدايرا دوا الرطوبه دييييييك ..
==== * احمد: عفيت من البشير .. راجل كلس و الله!! حاج احمد: مالو سوى شنو... كلاستو خلّها . احمد : شاكل امريكا وجمد التفاوض معاها. حاج احمد : هههههههه. ات يا احمد زولنا دا ما بتعرفو. ؟؟! ..لامن يزعل بيقول كلام وبعد داك يجي (يأوّلو). احمد : دا كلام شنو يا حاج احمد؟! حاج احمد : ما تتذكر موضوع الحشره الشعبيه؟! احمد : كيفن ما بتذكرو ... اها باقيلك حسي ح يقول شنو ؟. حاج احمد : جااااهزه يا خوي ..يقول جمّد (لجنة) التفاوض .. ويجيب لجنه جديدة بس!! ==== * أحمد: يا سلام على غندور، راجل راقي ياخ. حاج احمد: مالو .. شِن رُقيهو؟! أحمد: في الموتمر الصحفي الليلة اعتذر للشعب السوداني. حاج احمد : يا سلام ياخ . و الله كتيره منو .. اعتذر عن شنو؟! أحمد : عن (عَسَف ) القرارات الامريكيه .. والا شنو كدا ما عارف... احمد : هههههههه. اعتذارو طاير عليهو .. انا كنت قايلو اعتذر عن مصايب ناسو الودرت البلد، والجايبا لينا الجلا و البلا. ==== * أحمد : الحمد لله .. البشير رجع تاني للتعاون مع الأمريكان .. ربنا يوفقو ياخي ونخلص من عقوباتم دي . حاج احمد: و انت يا الناجِحْ كنت قايلو ح يواصل كدي ؟؟. أحمد : كيف كلامك دا؟ الريّس جمد التفاوض و قاطع امريكا.. انت قايلو بيلعب؟؟. حاج احمد : هههههههههه. يا خوي انا ما كلمتك قبُل يومين ؟؟ .. الموضوع دا يا احمد زي الزول الجعاااان، و حِرْد الأكِل .. كان دايرلُو تَخسِيمَه (تحليفة) .. ولقاها .
مقتطفات: * لي قريب، ذو صلة بالكيزان (تجارياً)، قال لي ذات تجلٍ كلاماً معبراً: و الله الجبهجية ديل حيرونا ذاتو، اي واحد تقعد معاه يقول ليك: ( والله الناس ديل سووا، و سووا، وضيعوا البلد) .. والله ما عرفنا الجماعه ديل هم منو؟؟ في حواره مع التيار، الزول طه بتاع الرئيس قال انو عندو خلاف استراتيجي مع (الاسلاميين ) ..!!!. أبو الزفت .. و البشير قبل فتره قال انهم ما اخوان مسلمين .. و الله لو تابعنا الناس ديل خايف يوم مش نسال (الناس) ديل منو، بل نسال روحنا ذاااتو : نحنا منووو ؟؟ ==== * من خبر الكيزان في الثمانينات، ان رئيس اتحاد الطلبة ارسل برقية لريغان يحذره من العبث بامن (إيران). فجاء في البرقية : من المعتصم بالله إلى المدعو (ريغان )، ارفعوا أيديكم عن إيران ، وإلا سوف ترون .. و السلام. المعتصم بالله عبد الرحيم رئيس اتحاد جامعة الخرطوم.
==== * ومن خبر الكيزان فى التسعينيات أن أحدهم هتف فى مظاهرة مناوئة للإمبريالية والصهيونية: يا بوش يا جبان يا عميل الأمريكان!!