Post: #1
Title: إستقالة حمدُوكْ بين (آمَنَّا) وسُواقة الخلا!!!
Author: جمال أحمد الحسن
Date: 12-22-2021, 01:40 PM
12:40 PM December, 22 2021 سودانيز اون لاين
جمال أحمد الحسن-الرياض-السعودية
مكتبتى
رابط مختصر
*خارج النص*
**
– الرياض 22 ديسمبر 2021م
ونحن بكورتي الثانوية في بداية التسعينات.. سمعنا كثيراً عن هذا السَوَّاق الاسطُورة محمد صالح سيد حمد الشهير بـ (آمَنَّا)، وكثيرٌ منا لم يره قط.. وأنا شخصياً لاحدي كتابة هذه السطُور ما شفتُو بي عيني دي.. إلاَّ في السنوات الأخيرة قام تليفزيون السودان بإنتاج حلقات لتوثيق حياته بعد ما إعتزل السُواقة، عمل مزرعة نخيل واستقر بمسقط راسه حسينارْتِي، ما كُنَّا نسمعه عنه هو ما يلي:
- شخص عصامي بنى نفسه بنفسه حتى إمتلك البُوكس آخر الموديل دا..
- يسافر الصباح ويجي راجع يحصِّل الغداء في نفس اليوم.. في وقتٍ كانت السفرة لأم درمان تستغرق يوم كامل!!!
- يمتلك موديل السنة، قبل كل الناس في البلد..
- سوَّاق ماهِر مافي زول بيسابقُوا في الخلا..
- وأهم حاجة يفك صندوق البُوكس الوراء حق الشركة، ويركِّب صندوق صناعة محلية.. قالُو ليه؟؟ عشان الصندوق ما يتخربَش وبعدين يجي يبيعُوا كأنه جديد.. وبقينا كلما نشوفلنا بُوكس ضنبُو ما زي راسو من قدَّام.. نقُول إيه.. دا زي بُوكس (آمَنَّا) ونحن آمنَّا دا لا شفناهُو ولا قابلناهُو ولا شُفْنَا بُوكْسيهُو من قَعَرْوا.. سمع بسسسسسس!!!
المُهم..
البلد دي في زول سايقَها بريمُوت حقَّق فيها كل ما يريده وعن طريق النُشطاء وكُتَّاب الأسافير ديل نفسهم.. قُولُولي كيف؟؟ حا أضرب ليكم مثالين فقط:
* طبعاً من المعلوم في التربية الوطنية بالضرورة، أن القضية الفلسطينية كانت هي أُم القضايا عندنا و(الفلانيين) ديلك هُم العدُو الإستراتيجي بالنسبة لنا ومكتُوب الكلام دا وموثَّق في جوازات سفرنا.. أها قامُوا النُشطاء ديل هلَّلُو لي زيارة (فضل السيد) لعنتيبي وتغنُّوا للتطبيع (ولزم حينها عضو مجلس السيادة، البعثي العربي الإشتراكي د. تاوُر الصمت) وكان ذلك حسب حجَّتهم السَوَّقُوها للعامَّة بأن بلدنا هي الأهم وأن الخير حا يترادم علينا، ومَالْنا ومَالْ عداءات ما عندنا فيها لا ناقة ولا حمارة، وتم التطبيع بسلام!!!
* وجاء دور أُكلُو واشربُو (دعم السِلَع الإستراتيجية).. نفس النُشطاء الزمان كانُوا ضد رفع الدعم وسياسات البنك الدولي.. بشَّروا وتباشرُوا بإجراءات رفع الدعم.. بحُجَة أن هذا الدعم قاعْ يمشي للناس الأغنياء على حساب الفُقَراء.. وحكمة الله رفعُوا الدعم.. زاد الأغنياء غنى.. وزاد عدد الفُقراء فيما تبقَّى من المليون ميل مربع!!!
* هذه نماذج فقط تؤكد بأن هناك سائق ماهِر يعمل في الخفاء كاللَّهْوْ الخفِي الذي يُذكر في الدراما المصرية تماماً، ولا أحد يجزم برؤيته حتى الآن، يقُود بذكاء خارق يُحسد عليه هذه البلاد لتثبيت قضايا وجعلها مُستساغة للعامة!!!
واليومين دي شغالين بالتَقِيل في موضوع الإنقـــلاب الجايِي، وصدِّقُوني حا يلِتُّوا ويعجِنُوا في هذا الأمر حتى يتمنَّاهُ رجل الشارع العادي، الذي زاد إعجابه –عبر هؤلاء النشطاء نفسهم- بديكتاتور كوريا الشمالية، حتى أصبح الواحد يقُول ليك (والله البلد دي عاوزة ليها واحد صعب زي كيم جُونغ)!!!
*خارج النص*
أمس الليل كلُّوا، تايِم لاين الإزيرِق والإخِيدِرْ + قناة الجزيرة الفضائية ما كان عندهم موضوع سِوَى الإستقالة المُرتَقَبة للدكتور عبد الله حمدُوك رئيس مجلس الوزراء الإنتقالي!!!
عندما ظهر نجمه في العام 2019م وصار رئيساً للوزراء تحفَّه دعوات الملايين من أبناء الشعب السوداني وتتغنى له الحسان (وبعضاً من دكاترة أخر زمن)!!! وأصبح له دجاج إليكتروني شرس جداً يكاكي من حوله، كان للدكتور الواثق عبد الرحمن الحُسين رأي آخر.. ففي جلسة صفاء جمعتنا به هُنا بالرياض فجَّرها داوية وسط مجموعة من أنصار حمدُوك.. بأن المُوظف الأُمَمِي هُو أداة تنفيذ فقط (مُو) رجل دولة وإبتكار وإبداع، لذلك لا تأمِّلُوا في هذا الحمدُوك كتير عشان ما تجُو تنْصَدْمُوا فيهُو لا قدَّام!! وقد صدق، ورب الكعبة.. ففي غضون سنتين وأربعة شهُور تحوَّل هاشتاق #شكراً_حمدُوك الأكثر إنتشاراً إلى: #بالصُوت_والصُورة_حمدُوك_طلع_ماسُورة ، والله المُستعان!!!
وقلتها (أنا) بعد سنة من تعيينه رئيساً للوزراء (في أُغسطس 2020م) لصديقي الهادي أبو الريش في مجموعة واتساب جمعتني به، بأن هذا (الزبير) ما قدَّم شي وما حا يقدِّم شي وما حا يقدَر حتى يستقيل!!!
وقلتها أيضاً في 7 أُغسطس 2020م تحت عنوان (حكُومْةَ الفَشَلَة – منشُور بصحيفة الراكوبة الإليكترونية) بأن هذا السُودان الحبيب لن يتقدَّم خطوة واحدة إلى الأمام في وجُود هذا الثلاثي الفاشل.. (فضل السيد، بخيت وتابعهم الزبير)، إلاَّ أن تُضخ في قلوبهم وطنية من العَدَم، تجعلهم يربطُوا قاشهم من جديد ويضعُوا أيديهم على (ذهب) السودان المُهدَر!!!
...
..
.
*ويظل سؤالنا الدائم.. البلد دي السايِقَها منووووووو؟؟؟*
*+ خبر الجماعة القَبَضُوهم في مطار الخرطوم مهرِّبين (الذهب) برَّة شنو؟؟؟*
*++ لجنة التحقيق المُشتركة مع (الآي بي إف) في حادثة إغتيال حمدوك الفاشلة وصلت لي وين؟؟؟*
*وأخيراً.. القروش الضايْعَة بين المالية ولجنة التمكين، إتعرفت كم وعند منو ولَّة لسَّع؟؟!!!*
عناوين الاخبار بسودانيزاونلاين SudaneseOnline اليوم الموافق 12/21/2021
عناوين المواضيع المنبر العامبسودانيزاونلاين SudaneseOnline اليوم الموافق 12/21/2021
عناوين المقالات بسودانيزاونلاينSudaneseOnline اليوم الموافق 12/21/2021
|
|