*جربوا كل شيء .. *تفلتات أمنية .. *(خنقة) إقتصادية .. *فوضى خدمية .. *إشاعات (أخلاقية) .. *أزمات علاجية .. *صعوبات تعليمية .. *إنقلابات (موزية) .. *وأخيراً قرروا هدم المعبد على رؤوس كل أهل السودان بالفتنة العنصرية !!.. *هكذا هم أعداء الإستقرار والعيش بأمان .. *وبطريقة لم تعهدها البلاد منذ الإستقلال إلى يومنا هذا إشتعلت نيران الطامة الكبري في مناطق متفرقة بتخطيط خبيث وتافه لأبعد الحدود حتى يضيع وطن الجدود والأب للأبد !!.. *والشيء الذي يدل على وجود من يتعمد النفخ في هذه النيران المهلكة لحاجة في نفسه أصبح واضحاً لكل من لا يحمل (قنبوراً) في رأسه !!.. *و(النعرة) في اللغة هي (ذبابة) زرقاء تلتصق بالدواب و(تنط) داخل (مناخيرها) وتجعلها في حالة هيجان وفوران وغضب لا مثيل له !!.. *إذن الأشرار لا يريدون للأمة خيراً .. *يهمهم فقط إطلاق (ضبانتهم) الخبيثة لكي يفور السودان ويمور ويصبح في خبر كان !!.. *يفعلون ذلك طبقاً لمصالحهم الذاتية الدنيئة .. *وشعارهم المفضل لتحقيق ذلك : *(نحن ومن بعدنا الطوفان) !!.. *يعلمون أن أعداء (الخارج) يخططون لتقطيع أوصال السودان و(تجهيزه) لكي يكون مسرحاً للإقتتال الإثني الذي سيجعل عاليها سافلها .. *لكن لا يهمهم ذلك طالما أنهم لا يرون سوى (الأنا) وبس !!.. *إستخدام القبلية للوصول إلى السلطة أو (الكنكشة) فيها .. *وانتشار السلاح .. *وغياب القانون الذي يردع كل من يتجرأ ويجهر بلغة العصبية القبلية .. *و(ضعف) حكام الولايات وعدم حسمهم للتفلتات الجهوية .. *كل هذا وذاك سيكون وبالاً على السودان وشعبه (المو ناقص) !!.. *خاااااااصة وأن رب البيت المدعو البرهان يضرب و(يخبط) ويلخبط كيمان القبلية بلا أدنى شعور بالخطر المحدق بالسودان لأنه (عاوز كدا) !!.. *الرجل يقول بكل استهتار لدى مخاطبته ل(أهله) في نهر النيل : *انحنا في بلدنا دي محتاجين نتكاتف ونتعاون .. وانحنا بالقدرات والامكانيات حقتنا دي، كان بشرية بس كان بني آدمين، ما بسيطة ولا ساهلة .. ولا انحنا بالسهولة والهوان البسوقونا الناس ويقودونا، الولاية دي .. التاريخ حق السودان كله مارق من هنا .. من البجراوية ومن كبوشية ومن مروي والبركل ولغاية مملكة سوبا وعلوة، كله، جزء كبير من تاريخنا !!.. *أنحنا قبيل في زواج ناس كلي دي الزيجة 34 ، كل سنة ما انقطعت، قلت ليهم انتو معلمين، هنا ناس البلد دي فعلا معلمين بعلموا الناس العادات الطيبة والتكاتف والتعاون والتراحم بين الناس .. انحنا محتاجين في الولاية دي انو نوحد كلمتنا ونقوى لحمتنا عشان نحفظ حقوقنا على الاقل عشان نحفظ حقنا، أنحنا شايفين كتير من المشاكل وكثير من الاستهداف لابنائنا في كل مكان !!.. *أنحنا ولايتنا فاتحة صدرها وفاتحة ابوابها وما عندنا لا بنفرز ده من وين ولا ده جنسه شنو ولا ده كلنا سودانيين بناكل سوا وبنشرب سوا .. لكن برضو يجب انو يكون في حدود فاصلة بين حق الناس العام وبين الحق الخاص .. *انحنا والله لينا حق عندنا في البلد دي .. دايما بنكلم الناس انو يا جماعة أنحنا عندنا شنو .. الدولة قاعدة تقدم لينا شنو .. *ياتو دولة دي وانت عامل فيها رئيسها بإنقلاب حقير و كاتم على أنفاس البشر من أواخر 2021 لغاية الآن؟!.. *ثم قال فض الله (خشمه) : الليلة انا كلمت كل الناس ديل انو الدهب بيمرق من هنا ده .. الزراعة بتمرق من هنا ده .. القوة البشرية ذاتها الناس البكاتلو في الجيش في الشرطة قي كل مكان مارقين مننا من هنا ده .. يجب انو يكون انحنا صوتنا مسموع ما نسمح لناس تانيين يتكلموا نيابة عننا .. ما نخلي ناس ما بمثلونا ولا بشبهونا !!.. *بالله دا قائد جيش ومسؤول عن أمن البلاد والعباد؟!.. *اللهم عليك بكل من تسبب في أذية أهل السودان .. *و *الله في ..
عناوين الاخبار بسودانيزاونلاينSudaneseOnline اليوم الموافق July, 18 2022
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
عادل هلال
فيس بوك
تويتر
انستقرام
يوتيوب
بنتيريست