إحصائية السلطة القضائية السودانية تقول ان اكثر من 270 الف حالة طلاق حدثت ما بين 2016 و 2020 بواقع حوالي 50 الف حالة سنويا هذه كله بسبب الاستعجال في الزواج بالذات في مجتمع (شوفوني) و (بوباري) من الطراز الاول مثل مجتمعنا السوداني في البداية الناس بتستسهل الموضوع "بالبركة" "عمل خير بِتِم" "الناس دي كلها اتزوجت كده" "تزوجوا فقراء يغنيكم الله" وطبعا اعلاه حديث مضروب وهو ماسورة كبيرة وهو اكثر حاجة بغشوا بيها الناس لان الدين من البداية قال: (من استطاع منكم...) وفي نهاية الحديث ذكر ان غير المستطيع عليه الصوم يعني كلام واضح والناس اللي فسروا الباءة تفاسير اخري طيب لماذا امر بالصوم؟؟ لانه صالح للزواج لكن غير قادر علي الانفاق الكلام ده ما عايز درس عصر!! لكن الغش والخداع باسم الدين معروف في مجتمعنا وفي القرآن: (وليستعفف الذين لا يجدون نكاحا) النكاح ده.. بيجدوه كيف؟؟؟ المعني انو ما لاقي حاجة يتزوج بها فأمر بان يعف نفسه.. (حتي يغنيهم الله من فضله) كلام وااااضح ولا داير ابن كثير
المشكلة انو الناس تطوروا عن طريق القنوات الفضائية والميديا لكن البلد لم تتطور يعني دلوقت نحن عندنا مشاكل في الموية والكهرباء بسبب الطلب المتزايد هناك مشاكل السكن وهذه لم تكن موجودة في السابق يعني حتي خطط اسكانية ما اتعملت لعشرات السنين فحتي في العاصمة المناطق الجديدة بتبدأ بوضع اليد!!
يا جماعة في ناس بفتحوا ليهم بيت في الزمن ده بدون مثلا تلاجة وتلفزيون ودولاب؟؟؟ دي الان زول موظف لو دكتور يحتاج لثلاثة اربعة اعوام لتدبيرها وتعال شوف اللوازم التانية ليس لها اول ولا اخر انا والله شايف الناس المستمرين في بيوتهم يعني في الايام دي وفي الظروف دي مفروض يدوهم كل الاوسمة والانواط: الشجاعة والصمود والجدارة ...الخ!! لان ميزانية البيت اصبحت عملية معقدة والناس اصبحوا كأنهم لا يرضون بما رزقهم الله اللهم الا من رحم ربي ولذلك كان الشيخ الازهري مبروك عطية علي حق عنما قال: "ثلاث أرباع الزيجات في مصر حرام، فالزوج غير القادر على الانفاق على زوجته و بيته زواجه حرام واذا عجز الزوج عن الانفاق على زوجته عليه ان يطلقها " طبعا الكلام ده ليس في مصر وحدها وانما ينطبق علي كل العالم العربي والاسلامي واكثر حاجة ينطبق علينا نحن في السودان لان ظروفنا الحالية اسوأ كثيرا من مصر وبسبب التزامات البيوت الناس بقت تغش وتلفح و.. و.. ودي المشكلة الخلت الدين ذاتو يربط الزواج بالاستطاعة لا تضربوا لنا مثلا بالامام علي وفاطمة الزهراء! فذلك زمان مختلف واناس مختلفون فالامام علي حتي عندما وجد بهيمة لا صاحب لها واحضرها المنزل اصرت فاطمة علي ان يذهب فيعرّفها فذهب الي السوق ولم يتعرف عليها احد وعندما عاد اصرت عليه ان يذهب الي الاسواق الاخري...الخ !!!!!!!!!!!!!!!!!! رضي الله عنهم دلوقت المرأة تقول للرجل: يعني كيف ما نجيب خروف؟؟!! انت بتتكلم جد؟؟ انت واعي؟؟ ...الخ!!!! هو اصلا الزواج كله خير كما فصل الامام الغزالي في الاحياء ما عدا شي واحد هو الوقوع في الكسب الحرام وهذا ما قاله الشيخ عطية ولكن بطريقة اخري
عناوين الاخبار بسودانيزاونلاينSudaneseOnline اليوم الموافق June, 12 2022