Post: #1
Title: اوتوبيوغرافيا: التجربة المصرية (1): مارقين بي أرقين !! كتبه محمد سمنّور
Author: محمد سمنّور
Date: 05-27-2022, 12:31 PM
11:31 AM May, 27 2022 سودانيز اون لاين
محمد سمنّور-السودان
مكتبتى
رابط مختصر
كثير من الاسر رقيقة الحال
تجدهم مذبذبين هذه الايام
بين شمال الوادي وجنوبه
طبعا زمان كان امثال هؤلاء
بمشوا اجازات يصيفوا
ويجوا محملين ببعض الاجهزة والاواني
لكن لانو فرق المعيشة والسكن
بقت الناس تعدي في الشمال فترات اطول واطول
انا احب انو اوثق لي تجربة اسرة سودانية
ويعني ممكن الناس التانين يستفيدو برضو
اصلا قبل حوالي ثلاثة سنة كان عملنا الجزء الاول من المسلسل
بعنا نص العفش واجرنا غرفة واحدة خزنا فيها باقي العفش
ومشينا عدينا الصيف هناك
وجينا اول الشتا
تصوروا نحن السنة دي سافرنا في عز الشتا
وطبعا الشمال معروف انو البرد صعب
طبعا يعني مافي زول بتهون عليو بلدو
خاصة الاهل والاصحاب
وخاصة لي ناس كبار في السن سبعينات وتمانينات
الغربة طبعا حتي لي زول اتجاوز الاربعين صعبة
لكن انتو عارفين ظروف البلد ضغطت علي الناس
كل الناس اغنياهم وفقراهم
لكن طبعا المجتمع المصري قريب من المجتمع السوداني
لانو فيهو كل الطبقات والناس كلها واعية للحتة دي
وعشان كدة ما كلهم بقيمو الزول بي قرشو
زيما في دول الخليج مثلا
صراحة السبب الرئيسي المرقنا هو ظروف السكن
الايجارات في جمهورية الخرطوم بقت حاجة فظيعة
يعني انت لما تدفع ليك 100 الف في ايجار
تاني تعيش كيف؟؟؟!!!!
الايجار يؤثر علي ميزانية الاسر تاثير كبير جدا
عشان كدة انا بقول انو نحن مرقنا .. نازحين
النازح ما اصلا زول فقد المسكن اول حاجة
النزوح طبعا اليومين دي خشم بيوت
لكن ما نلخبط بين النازح والمغترب
لانو الفرق بي النازح والمغترب
انو النازح بمشي بلد اساسا ما فيها شغل
ناس البلد زاتم عطالة
عشان كدة حتي البمشي تركيا نازح
لانو ما بمشي بي عقد عمل والشغل بكون صعب
وقروشو مهما كانت كتيرة حا يجي يوم تنتهي
لكن انت احسن تنزح (تهاجر)
تشوف الحتة البتقدر تعيش فيها
المثل بقول:
"البلد البتودر جوعك
غُز فيها كوعك"
فاحسن تمرق اي حتة
مما تعيش بالسرقة والنهب والغش والكضب
والحياة دي اصلا تقلبات
يوم عسل ويوم بصل
يوم ليك و يوم عليك
والدنيا دي زي البورصة
صعود و هبوط
اي مؤشر ممكن فجأة يدق الدلجة
او زي ما بقول ترباس:
"طبيعة الدنيا زي الموج..
تجيب و تودي"
فمعروف انو في اسر كانت فوق نزلت تحت
وفي واحدين كانوا تحت نزلوا تحت "شديد"
وطبعا صعدوا ناس تانين
و زي ما قال الشاعر:
الموتّد انخلع واتوتد المخلوع
وجاعت بيوت الشبع وشبعت بيوت الجوع
التحدي انو كان كيف نوفر حق السفر
لانو زول واحد سفرو بكلف قريب خمسين الف ج سوداني
بالبص طبعا
ودايرين حق ايجار شقة وتأمينها
ويوم او يومين فندق لحدي ما نلقي الشقة
والشقة لازم دور اول او تاني بالكتير
لانو عندنا عجائز ما بقدروا للسلالم ولا حتي السانسير
وطبعا دايرين مصاريف يوم يومين لحدي ما نلقي شغل
الشغل المتوفر بسهولة هو في المصانع والورش
شغل صعب شوية لكن المجبور بشتغل
و "ما حدش بياكلها بالساهل" زيما بقولوا المصريين
عرفنا من النت انو في شغل فيو "قبض" يومي
يعني يوميات
المهم عشان نوفر الميزانية دي اتاخرنا قريب الخمسة شهور
لحدي ما التاشيرات خلاص كان الباقي ليها ايام
ولحدي ما كبس الشتا
المسألة دي طبعا ادت لي تداعيات خطيرة جدا جدا
في بعض اهلنا لامونا وقالوا ناسكم الكبار ديل مفروض ترجّعوهم
لانو مفروض تتحسبوا لي حاجات ...زي الموت وكدة
لكن لما هسع انا جيت وعايزين نعمل ترتيبات للرجوع
فالمشكلة انو الكبار ديل زاتم
المفروض يكونوا مرتبطين بالبلد وبالناس..
قالوا ما راجعين !!!!
نرجع لي قصة السفر
جات لحظة كدة
قلنا انحن خلاص
كان ما سافرنا هسع تاني ما بنسافر
المشكلة الميزانية ما كانت وصلت
لي الربط الانحن عايزنو
اللي هو كان حد ادني يعني
لكن قلنا نتوكل علي الله ..والله كريم
واتوكلنا وحجزنا
طبعا المروق كان بي معبر ارقين البري
معبر صعب جدا جدا والمرة الجاية حا احكي تفاصيل كتيرة
ونحن عارفين لانو عندنا تجربة سابقة
لكن في التهاية:
عشان كدة انا بقول ما بعبر بي ارقين الا اتنين:
يا تاجر...
يا نازح!
ونواصل انشاء الله
عناوين الاخبار بسودانيزاونلاينSudaneseOnline اليوم الموافق 05/26/2022
عناوين المواضيع المنبر العام بسودانيزاونلاين SudaneseOnline اليوم الموافق 05/26/2022
عناوين المقالات بسودانيزاونلاينSudaneseOnline اليوم الموافق 05/26/2022
|
|