*هل سيتأثر القائد الإنقلابي وشرذمته بأي إضراب سياسي أو فئوي في السودان؟!.. *هذا هو السؤال الذي كان من المفترض أن يطرحه العاملون في الكهرباء فيما بينهم قبل دخولهم في إضرابهم (الحالي) أو أي إضراب (جاي) !!.. *لن يلتفت ولن يهتم ولن يبالي البرهان وعصابته بالأمر وإن أضرب السودان كله عن العمل وعن الطعام وعن أي حاجة !!.. *والدليل قتل أكثر من (100) شاب بدم بارد خلال الأشهر الإنقلابية السوداء دون أن ترمش لإبرهة شعرة جفن واحدة !!.. *ودون القبض على مجرم واحد .. *ودون الكف عن إتهام الطرف (التالت) بتصفية هؤلاء العزل المحتجين !!.. *لن يكون للإضراب أي أثر على أشاوس (وقد حدث ما حدث) الذين (يضحكون) ويفرحون بجرجرة لجنة أديب التي لا تريد أن (تبرد) قلوب الثكالى والآباء (المحروقين) وتكشف لهم عن هوية من قتل فلذات أكبادهم بدم بارد !!.. *لن تهتم مجموعة (إبرهة طويلة) بأي إضراب بعد أن أذاقوا أهل السودان ويلات القهر والضيم والشلهتة ومختلف أنواع المعاناة والبهدلة و(الطمام) لقرابة العام !!.. *ولأن الطاغية لم ولن يهتم فهاهو يسد أضان بطينة والتانية ب(جبرينة) رغم أن مسألة الكهرباء تعتبر من أساسيات الأمن القومي !!.. *زول فااااالح فقط في (الورجغة) الفارغة !!.. *شن نسوي؟!.. *ضابط (عظيم) ورجاااااغ .. *وكضااااااب .. *كضاااااااااااب !!.. *كضااااااااااااااب !!.. *وسنظل نكرر .. *ولن نمل من تكرار وعوده الكاذبة في بيانه الإنقلابي التخريبي وتأكيده بأنه سيعمل في نوفمبر كذا .. وسيفعل كذا .. وسينجز كذا .. و......و.......و...........!!!.. *نوفمبر الذي أعقب إنقلابه الغادر !!.. *بس هو لا يبالي .. *وكضااااااااااااااااااب !!.. *وعلى هذا الأساس لن يتآذي من إضرابكم يا ناس الكهرباء سوى (أخوكم) المواطن السوداني (المبهدل) !!.. *خليكم واقعيين وشوفوا البرهان بيعمل في شنو؟!.. *وجبريل بيعمل في شنو؟!.. *ومناوي (بيقول) شنو؟!.. *وأردول بيعمل في شنو؟!.. *بالمناسبة : *عضو لجنة العاملين في قطاع الكهرباء (أحمد آدم حماد) يعلن عن مطالبهم المتمثلة في إجازة مقترح الهيكل الراتبي الذي دفعت به اللجنة إلى الوزير والذي تم فيه تحديد (نصف مليار) كراتب للموظف بقطاع الكهرباء وبحسب الدرجات الوظيفية !!.. *ووزير الطاقة والنفط محمد عبد الله محمود رفض بحسب ما جاء في بيان لجنة العاملين بالكهرباء !!.. *وعليكم الله يعني شنو نص مليار؟!.. *(الموظف) أردول بياخد ضعفها كم مرة يا جبريل؟!.. *وانت ذاتك بتاخد كم؟!.. *ومناوي (لخمة) بياخد كم؟!.. *و(الرفيق) عقار بياخد كم؟!.. *والسيادي (الختر) الطاهر حجر بياخد كم؟!.. *واعفاءات عربات الكفاح (المصلح) كلفت كم؟!.. *وكمان الوزير (النفطاوي) بياخد كم؟!.. عموماً .. *سيقع عليكم كل اللوم لو تم تنفيذ تهديدكم بالإضراب الشامل الذي سيعقبه ظلام (كابس) في كل أنحاء السودان .. *خليكم عاقلين .. *وراعوا يرحمكم الله للمرضى والمزارعين و أصحاب المصانع و....... و......... *راعوا لكل ذلك واعلموا - كما أسلفنا - بأن هامان وجبريله وأردوله لن يهمهم أي شيء حتى وإن (ولعت) حريقة في كل أنحاء السودان !!.. *شوفوا أي حل غير الإضراب .. *أقطعوا الكهرباء عن منازل ومكاتب جميع المجرمين الذين تسببوا في إذلال وإرهاق العباد و(تبويظ) البلاد !!.. *اتصرفوا .. *أضغطوا عليهم بأي وسيلة غير الإضراب !!.. *والمزيد من العذاب !!.. *و *الله في ..
عناوين الاخبار بسودانيزاونلاينSudaneseOnline اليوم الموافق September, 08 2022
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة