*الجهر بكلمة الحق في وجه الطغاة أصبح شيئاً نادراً في زمن (الخواف ربى عياله) !!.. لكن .. *توجد بعض الإشراقات التي تتناثر هنا وهناك بلا خوف من سلطان جائر .. وبلا رهبة من عصابات مسلحة تدعي النضال والكفاح ضد التهميش وضد (الحقارة) وضد الإقصاء وضد الجوع الكافر!!.. *وأفضل نموذج سعدت به أسماعنا قبل يومين تلك الكلمات (النجيضة) التي أتحفنا بها البروفيسور جبارة محمد الحسن .. *لم يترك في تسجيله (الكارب ) شاردة ولا واردة إلا أحصاها .. *وفحصها .. *ومحصها .. *وصحهها .. *وفي حال سماع البرهان وجبريل لحديث البروف (المليااااان) من المفترض أن يلتحفا بفضيلة (الخجل النبيل) مرة واحدة ويذهبا فوراً من وجه الشعب السوداني غير مأسوف عليهما !!ّّ.. *و(طبعاً) لن يفعلا ذلك طالما أنهما يتجاهلان أن الله يمهل ولا يهمل !!.. *حضرة البروف المحترم اختار الدخول في عش (الوطاويط) بالعديد من الإيضاحات الدقيقة والأسئلة المباشرة التي لا ولم ولن (يتسلح) جبريل وبقية قادة الحركات (المصلحة) بالشجاعة الكافية للإجابة عليها .. *ومنها نختار : *إتفاقية جوبا كانت وستظل اكبر كارثة على السودان .. *وكلها كانت (غمتي) وكل البلاوي الفيها لم يتم الإعلان عنها .. *هذا الرجل خلق فتنة بينه وبين شمال السودان كله لأنه بيقول ما عندي موارد اصرفها على افراد حركتي ياخ نحن مالنا ومالهم؟!.. *وهل خصصت ميزانية للكتب والكراسات والمدارس المهترئة بفعل الزمن؟! *وماذا قدمت لوزارة الصحة ونحن نعاني من أسوأ الأمراض في هذه الأيام؟!.. *انت كنت بتحارب في نظام مرة تصالحه ومرة تقعد معاه .. مالنا ومالك ياخ؟!.. *والقال ليك يا جبريل اتمرد منو؟!.. *وانجزت شنو لدارفور بعد قيادتك لحركة تحرير السودان؟!.. *وهل كل السودانيين مسؤولين من تمردك؟!.. *وبعد اقتلاع نظام البشير الجابرنا شنو ندفع فواتير افراد حركتك؟!.. *تاني في شنو؟!.. *وبأي قانون وبأي تشريع تتصرف في وزارة المالية على كيفك؟!.. *وهل دارفور اللي فيها اكتر من مطار (مدني) مهمشة ولا كل مناطق السودان مهمشة ومنتهية؟!.. *وماذا قدمتم لأهلكم في معسكرات النازحين؟!.. *وكمان بتتبجح وتقول إعفاء العربية اللي قررته لود أخوك ما بدعة؟!.. *ويا بروف جبارة محمد الحسن .. *ويا سعادة اللواء م أحمد إدريس .. *ويا كل الشرفاء الذين لا يخشون في قول الحق لومة لائم .. *أو (خمشة) ظالم !!.. *السودان بحاجة اليوم أكثر مما مضى لمثل هذه الأصوات المزلزلة لأركان الطغاة والفاسدين .. *الرفض ب(اللسان) لأفاعيل الطغمة الشيطانية هو أضعف الإيمان .. *الرحمة والمغفرة لمن ازهقت ارواحهم بآلة البطش والطغيان .. *وعاجل الشفاء للجرحى في كل مكان داخل مدن وقرى وطني السودان .. *و *الله في ..
عناوين الاخبار بسودانيزاونلاينSudaneseOnline اليوم الموافق September, 16 2022
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة