عايز تعرف ليه انا مشارك فى العصيان ومؤيده وبشجع الناس فيه طيب اقول ليك واحده واحده الانقاذ جات يوم 30 يوليو قبل 27 سنه ببيان وضحت فيه انها عايزه توقف تدهور العمله لانو لو ما عملوا انقلابهم كان الدولار وصل 12 جنيه عشان الامن منهار وقرنق احتل توريت عشان الفوضى الكان حاصله فى السوق وغلاء الاسعار طيب بعد 27 سنه حصل شنو.. نعمل كشف حساب الدولار وصل كم؟؟ دى خليها.. الحكومه ذاتها بقت تاجر سوق اسود لما نفسها انقطع والحقيقه عملت كدا عشان تقنن لجماعتها سعر الدولار رسميا بالسوق الاسود وظهرت نتيجته الاسعار.. بقى مافى حبل بربطها بدل توريت الجنوب كلو بلحمو وشحمو وعضمو شالو قرنق حلال بلال عليهو .. مش كده وبس الشباب الخدعوهم بالحور العين والشالوهم من الشارع غصب عنهم وعن عين امهاتم وماتو فى الجنوب طلعوهم فطايس يعنى حتى الله يرحمهم استكثروها عليهم التعليم فتحوا بقالات ليهم واهملوا التعليم الحكومى وزى ما قال الكان مطلوب القبض عليه وبقى نائب رئيس الجمهوريه ثم اخيرا عضو برلمان ولانو لا علاقة له بالانسانيه سموهو ابساطور وبكل اسف حامل دكتواره على حساب الشعب السودانى بالمجان من الخلوه للجامعه بستفز الناس ويقول الماعندو قروش ما يعلم اولاده او يمشى يشحد من ديوان الزكاة لغاية ما نائبة رئيس البرلمان زعلت وقالت ليه هوى يا انت يا الغبيان ارعى بى قيدك لو ما مجانية التعليم الخلتك عندك دكتوراة كنت الليله بترعى الغنم فى بلدك الصحه وزيرها الاتعلم مجان واتعالج هو وامه وابوه مجان فتح المستشفيات مولات ليه ولى لغيره وكمان كليه خاصه وجففوا المستشفيات الحكوميه وكمان حتى{ دين} الدين الامر بستر الميت بقى ما عندهم لانو اى واحد يموت فى مستشفياتم لو مادفعو فاتورة العلاج والموت ما بدوهم الجثمان وكانت المغصه انو طبقوا كلامهم دا فى القاضى الكان قائد موكب القضاة فى اكتوبر يعنى طظ فى اكتوبركم وفى تاريخكم .. وبى اجهزتم الامنيه بدل يحموا الاطباء بقوا يضربوا الاطباء ... الا اطباء مستشفياتم؟؟ وعملوها فوضى لكل من هب ودب ولما الاطباء كشفو اللعبه واضربو لصالح حقوق المواطنين بالليل طلعوا ليك الادويه والمعدات الكانو داسنها عشان يكرهو الناس فى المستشفيات الحكوميه وانو الدكاتره فاشلين عشان بيوت الاشباح الفتحوها وقبلها اعدمو مجدى وسرقوا قروش الورثه بتاعتم بحجة المتاجره بالدولار وكانت كذبا ونصبا واحتيال وفتونه شغل عصابات والدليل انهم بعد 27 سنه من عمليتم القذره دى بقت الدوله ذاتا اكبر تاجر عمله وبالسوق الاسود زى قلوبهم.. واول من انتقم منهم الله الهالك ابراهيم شمس الدين شافعهم الهائج ايامها وكان هو ربهم الاعلى اتحرق كما حرق كبد ام مجدى وكل محبى الخير وكمان مرتوا واتزوجها الدلاهة الدلدول الكان بمشيه الهالك ابراهيم شمس الدين كما يريد بقت اكبر من يتاجر فى الدولار فى السودان وبره السودان والعاير فاكى ليها الحبل تطلع مع منو وتجى مع منو ماحد بسال وقال شريعه وفلاحتو فى العفيفات الشريفات ستات الشاى وعجبتنى الكنداكه لبنى احمد حسين وقفتم على صباع واحد لما الركب اتفتلت بت رجال واتحدتم فى محكمتم وغلبم اليسوا ليها حمدو الله اتخارجت منهم لكن برضوا مضوقاهم المغصه دقوا المسمار فى راس دكتور على فضل وفى الاخر بعد تعذيب وانتهو منه رموه فى السلاح الطبى وطلعوا شهادة وفاة كاذبه بانه مات بالملاريا ولما اهلوا رفضوا استلام الجثمان الا بعد تشريح محايد اكتشفو الحقيقه والتى يخجل هتلر من عملها ناهيك عن من يدعى الاسلام دين السماحة شردوا الناس من الخدمه المدنيه والعسكريه وجابوا ناسهم وفتحوا ليهم الميزانيات وهاك يا سرقه عديل وكل سنه المراجع العام ينبح ويقول عووووووك البلد اتسرقت البلد خربت ومافى زول بيقول ليه انت بتقول فى شنو يا العر جلدوا النسوان وقتلوهم وصادروا عدة بتاعة الشاى عشان تجى تدفع دم قلبها ويرجعوا ليها عدتها وبعد كم يوم تانى يعيدوا نفس الفلم عصابات حكوميه بدل ما يوفروا ليهم اماكن نضيفه وبصوره تحفظ للجميع حقوقهم وكرامتهم عارفين ليه بعملوا كده لسببين الاول نهب وتوفير مصاريفم ومواهيهم السبب التانى عشان ما تجوا تقعدوا بمزاج وتشربوا الشاى وتتفلسفوا وتتكلموا عن الحكومه عملت وفلان سرق وفلانه ديييك سوت اخيرا فلسوا البلد والرئيس بدل ما يقعد يحل المشاكل كلو يوم فى بلد وبلدوا مولعه ودا كلو خوف من الناس بتاعين العصيان وعشان لو انقلبت عليهو يكون ضامن نفسه بره وهو القال بكل بجاحه فى الامارات وسط شفع الامراء القالوا ليه لعبم شويه بهبالاتو.. قال العصيان فاشل مليون فى الميه عمنا يا دقس يا فلس هو لسه فى المليون!!؟؟ اسال ودود الحكايه فاتت المليار يا عمك المهم فى الاخر الجماعه بتاعين الامارات خافو على شفعهم لموهم و قالو ليه فضى لينا المحل لانو عندنا ضيوف محترمين مالين مراكزهم عازمنهم جايننا وقالوا انت فى البلد هنا ما بجوا..ريالتو سالت و قال ليهم ليه انا عملت غلط ؟ قالوا ليه عشان امر القبض بتاعك!!.. اول ماجابو السيره دى عمك الرجفى ضربو لما خلى بشكيره فى الحمام.. لانو ما ادوه فرصه وعلى المطار..ودى بالذات اكبر اهانه للسودان الانجليز ماعملوها لما كانو مستعمرين البلد بعد دا تقول لى ليه نعتصم؟؟!! وهم بهددوا الناس بفصلهم من العمل... طيب لو كلنا هب مره واحده اعتصمنا... يعنى حيفصلوا السودان كلو؟؟ مالو طيب ما دا العصيان زاتو الدايرنو نحنا جاهم عديل اكتر من الحاصل دا حا يحصل شنو شدوا حيلكم وتانى مافى تراجع لا وكمان عديم الرحمه لانو ربنا حرموا من الجنا لحكمة يعلمها هو وفى نظرنا القاصر عشان ما يستعروا من عمايل ابوهم قال شنو العاير الجبان انو مره جلدوه 60 جلده طيب لو صدقنا..ما قالت لينا وما وريتنا ليه جلدوك ليها ؟؟عملت شنو سرقت منو.. ما علينا الحاقد قال شنو الطلبه بنات اولاد يجلدوهم فى المدرسه عشان هو كان بتجلد دا زول يبقى رئيس بلد عشان نائب رئيس المؤتمر الوطنى بالخرطوم مدير التلفزيون زمان محمد حاتم سرق وقدموا للمحاكمه وغلبتم وجا يخاطب الناس ومحكمته شغاله يعنى يالقاضى ارعى بى قيدك انا بخاطب الشعب كلو ومعاهم الرئيس انت شنو اقيف قدامك!! الله يرحمك على بن ابى طالب الوقف قدام القاضى (العينو على بن ابى طالب نفسه) يقيف قدامو كمتهم عشان فى يهودى اشتكاهو..ومحمد حاتم بيقول يا المنتظرين يسجنونى الحسوا كوعكم واخيرا قفلوا الملف كيف؟! ما تبقى عوير وتسال... مش هى لله هى لله لا للسلطه ولا للجاه لا مش كده انت نسيت وزيرة الدوله للعدل ما طلعت ولدا القبضوا بالبنقو من الحراسه ولا محكمه ولا يحزنون يطرشنا ويعمينا دا لو واحد منننا امه تانى يعميها ان كان تشوفو عشانك وعشانى وعشان كرامة اهلنا بنات واولاد رجال ونساء شيب وشباب لازم نشيل الوساخه والعار دا من السودان لانو السودان بعزتو واهلو معروف عالميا انو هو شنو قبال ما يوسخوه تجار الدين وشوفوا اخر السفاهه وعدم الاحترام رئيس الجمهوريه برتبة مشير ومسؤل عن حماية امن البلد يكون مدير مكتبه واحد ارزقى اتسلق على كتوف نسوانهم وقعداتوا معاهن ونقل شماراتم لغاية ما ادوه رتبة فريق وهو الكليه الحربيه او كلية الشرطه ما جا بى جنبها و بقى مدير مكتب الرئيس قالو اسمه طه.. طيب مالو ما سودانى وليه حق يبقى مدير مكتب الرئيس ..اى ما قلنا حاجه لكن شوفو عمل شنو ..رمى الجنسيه السودانيه تحت جزمته ما هم اى حاجه بيقولو تحت جزمتى المهم رمى الجنسيه واخد جنسية سعوديه يعنى بقى اجنبى ومرتاح كمدير لمكتب رئيس الجمهوريه الدبانه ما تخش للرئيس لو هو ما اداها اذن ويعنى ادق اسرار الدوله قبال حبرا ما ينشف او فكرتا تنجض تكون عييييييييك عند اسيادو.. زى ما قال بازرعه {ونعتذر لي بازرعه} كل طاير مرتحل عبر البحر قاصد الاهل حملتوا اسرارى الجديده ..والطاير بقى واتساب يا جاك عشان كده انا وانت وهو وهى لو عندنا فعلا كرامه ووجع على البلد وعايزين نعيش زى ما كنا زمان بعزة واحترام ونوفر لاولادنا مستقبل معافى لازم نتكاتف ونقيف وقفه واحده يوم 19 ديسمبر عشان نرمى الناس بره ونحتفل جد بعيد الاستقلال الحقيقى للسودان من الناس الاسوا من الانجليز تجار الدين الذين اشتروا بايات الله ثمنا بخسا كما وصفهم الله فى كتابه والثمن البخس هو مال السحت الذى قتلوا وشردوا الناس من اجله عشان كده انا وانت وهى وهو منتظرين يوم 19 ديسمبر ونقفل الملف البلفو محلوج دا وكابى قرف وفساد وعفن وطغيان واستبداد وحقاره
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
سعيد عبدالله سعيد شاهين
فيس بوك
تويتر
انستقرام
يوتيوب
بنتيريست