|
وين نيمة رجاء الظليلة
|
كان عندنا نيمة ظليلة زرعتها لينا رجاء وسقتها بحبها الكبير لكل من يبحث عن الامان والراحة 0 هربنا كلنا وادسينا فيها ونادينا باقى الحبايب وفرشنا العناقريب التقال انا وعلى عثمان وود الشيخ محمد ما قصر ابدا هو المكتشف حقنا للواحة دى وجاتنا حنينة الحنينة و راوية بعد ما جاتها ريحة النيمة الحلوة وشمت فيها ريحة الشقيقة بت العباسى جاتنا تجرى بعد مارشه الرملة سوركتى وشال العناقريب وقال اتفرجخوا فى الواطة محمد الشيخ جاب حيوانات الهنا وهالة قوته هلت علينا زى هلال رمضان ونورت النيمة وسوركتى جاب العود وجاء يجرى وقال ده طلب الحبيبه راوية وقعدنا اترصينا عشان نغنى وفجأة اختفوا الناس كلهم بس انا وود الشيخ اتلاقينا فى النيمة يوم كامل برانا وعملنا لينا مسلسل وحضرنا السيناريو ومنتظرين سوكتى بالاخراج وتماضر بالتمثيل وباقى المبدعين وفجأة اختفت النيمة 0
امال ام وضاح
|
|
|
|
|
|
|
|
Re: وين نيمة رجاء الظليلة (Re: essam&amal)
|
أم وضاح وراوية كيفنكن ، والله رأسي مقطوع ومسخن وحالتي بالبلاء من متقطعوا النيمة ومافي زول بيديك جواب شافي عن الحاصل ، اظن لي سيد الحوش مادخل علينا بجاي عشان يعرف الحاصل شنو حقوا نعمل ليهو نداء بأسمه عديل كده ونطالبه برجيعها تاني ، والنيمة ماخسارة فيها الباندوث
| |
|
|
|
|
|
|
Re: وين نيمة رجاء الظليلة (Re: essam&amal)
|
راوية وعلى ورجاء لا يا رجاء النيمة بتاعتك قوية بعزيمتك انت وحبايبك المشاركنك مافى شىء يقدر يقلعها 0 ايدى على ايدك وباقى الحبايب عشان نرجعها تانى والله محتاجين ليها شديد بس هى زى ما قال على عثمان ودوها وين من غير اذن0 نحن عاوزين نيمتنا ذاتها 0000 امال ام وضاح
| |
|
|
|
|
|
|
Re: وين نيمة رجاء الظليلة (Re: essam&amal)
|
سلامات قايتو انا مشيت الحطّابة جبت لي كم مرق كده عشان نعمل لينا راكوبة في الحتة دي لحدي مابكري يرجع النيمة ، بس حسه واحدة فيكن تمشي تجيب لينا عناقريب من الجيران . وشوفوا لينا خالد ولا تمبس ينزل لينا غنوة تحت فيحاء الخميلة .
| |
|
|
|
|
|
|
Re: وين نيمة رجاء الظليلة (Re: essam&amal)
|
الاعزاء على عثمان وسوركتى راكوبة شنو عاوزين نيمتنا نسوى فيها راكوبة ولا اى حاجة بعدين على كيفنا ، المهم النيمة الزرعتها رجاء ما بنتنازل عنها ابدا 0 وبكرى مطنشنا ارحكم للشايقى سيد الحوبة التانى الحمد لله رجع لينا بالسلامة خالد الحاج يا ابوى النيمة وديتوها فى ياتو ارشيف رجعوها لينا عشان نسقيها باقلامنا قبال ما تنشف وعلى عثمان واقف كم يوم مستنى ولو عمل مظاهرة نحن وراه وانتوا عارفين الشعب السودانى فى المظاهرات يلا 000 يا على عثمان عصيان مدنى طوالى ونحن ما عليك نهتف على طول
( صفا واحد خلف القائد )
امال ام وضاح
| |
|
|
|
|
|
|
Re: وين نيمة رجاء الظليلة (Re: essam&amal)
|
عيد ميلاد جيران صاحبك ؟ احكى ليكم قصة ظريفة حصلت لى فى السودان عندما ذهبت لختان وضاح ( ذكرنى ليها على عثمان العاوز يتشبك لينا مع الناس ديل ) فى الحفلة شفت لى واحدة شكلها غريب مننا وزى عاوزة تعمل مشكلة مع ناس البيت مشيت قلت ليها منو انت ومالك زعلانة، قالت لى اول تسألينى مالك زعلانة بعدين منو انت ، انا زعلت من طريقة كلامها، وقبل ما اتكلم لقيت الناس كل واحد يغمز لى بجهة ما معناه اسكتى وعلى طول ردت هى تانى انا بت عم العريس اسمى حنان لبط عندك كلام واقدر اعرف انتى منو موجهة سؤالها لى ( وطبعا ده ما عرس ده ختان وضاح ) فى نفس اللحظة رد عليها اخوى لمعرفته التامة بها نحن قرايب العروس قالت لينا يلا اتفضلوا اقعدوا بقينا اهل 0 بعدين عرفت لو قلت كلمة زيادة تفرتق الحفلة كلها وبتلعب كاراتيه تمام وراكبه ليها موتر كمان 0 اها يا حنان لبط اقصد يا على يا اخوى ما تتلبط لينا ساكت بى جيران صاحبك نيمتناماشة زى العجب ومزدهرة وعيد ميلاد جيران صاحبك هنيه فى الجريدة اليومية صفحت الاجتماعيات يا اخوى 0
اها رجوته حبيبتى استقالة بالجملة على راى ابو محمد ولا بطنشونا احسن نزرع نيمتنا والخير الفينا كتير نحمد الله والحبايب بجوا داخلين بالميات 0 رايكم يا على ورجاء وسوركتى وباقى الحبان 0 امال ام وضاح
| |
|
|
|
|
|
|
Re: وين نيمة رجاء الظليلة (Re: essam&amal)
|
سلام ياناس النيمه رجاء الله يجازى محنك قال الاستاذ نيمه قال غايتو انا فى المعمعه الحاصله دى بخجل اسال من النيمه لكن عندى راى بدل مانفتش ديك ربنا يدينا العمر والصحه واهو كلنا فى خلاص نبداها من هنا وانا حاجزه الحجرة ديك
| |
|
|
|
|
|
|
Re: وين نيمة رجاء الظليلة (Re: essam&amal)
|
الاعزاء
علي عثمان 000 ام وضاح 00 رجاء 000راوية
انا يتخيل لي ما في اي مشكلة 000 عندنا فرقة جميلة جدا من البنات
الزهرات الصغيرات أسمها ألوان الطيف عندهم أغنية جميلة ومعبرة
وانا ايمانا بالاعمال الفنية الجادة بادعوكم للتواصل عبر هذا
البوست بأعتبار أنه (نيمة)000 لانو لو ما عملنا كدة حا ناكل نيم
أغنية زهرات ألوان الطيف بتقول00
لو تزرع بذرة00 تطلع شجرة تبذر بذرة000 تنبت شجرة تاني
شجرة وشجرة تساوي شجرتين شجرة وشجرة وشجرة بتعمل غابة
خذوا الحكمة من أطفالنا الحلوين وأجعلوا هذا البوست هو النيمة بتاعتنا00 والنيمة يا حلوين رمز وممكن تحت ضلها نعمل عمايل يلا انا اتحكرت واتفرجخت ومستنيكم000
| |
|
|
|
|
|
|
Re: وين نيمة رجاء الظليلة (Re: essam&amal)
|
ناس النيمة ازيكم: انا طبعا ما فاهم اى حاجه وطالما الموضوع ليه علاقة (بالبلح? زي ما قا لعادل امام) اقصد بالنيمة وبقيادة رجاء وامال وعلي عثمان وراوية,,فانا اؤويد بشدة واضم صوتى الي صوتكم.. بدار جدي ( بالولي) نيمة كبيرة بجتمع بها كل الاهل والاحباب في عز النهار والهجير والجبنة مدورة.. ويا رجاء زي ما بقولو امرأة نخلة حانقول ليك امرأة نيمة.. ودمتم...
| |
|
|
|
|
|
|
Re: وين نيمة رجاء الظليلة (Re: Raja)
|
اهلااااااااااااااااااااااا ياناس النيمة
والله ليكم وحشة انا كنت مشغولة جدآ الايام الفاتت جيت دخلت قبل 3 ايام ولقيت النيمة قطعوها بيني و بينكم بطني طمت
اها و من ديك و عيك
بجيكم راجعة بس مشغولة معاي ضيفة عزيزة الايام دي من ناس البورد و النيمة
انقروا منو؟؟
| |
|
|
|
|
|
|
Re: وين نيمة رجاء الظليلة (Re: essam&amal)
|
Quote: أنا ناس البلدية النيمة دي قالو نشيلها عشان توسيع الشارع يللا فرتقوا.
|
قال توسيع الشارع قال طول عمرنا بنعرف ناس البلدية بيعملوا كشة على السوق وبيرفعوا الحاجات في البوكس وبودوها بيتهم .
| |
|
|
|
|
|
|
Re: وين نيمة رجاء الظليلة (Re: essam&amal)
|
العزيز ايهاب مرحب بيك فى النيمة ياالغالى وشد حيلك نحن عاوزين نيمة جدك بى حالها لكن اوعى تطول مننا لازم يومى تمر بى هنا0
يا بتاع البلدية انت يا خسارة بدل ما تجمع وتزيد الحبايب داير تفرتق يا قول اهل رجاء اولاد بمبا ( الا على جتتى ) يا خسارة يا ود الشيخ ارجع واعتذر وما حنقبل اعتذارك الا تجيب معاك خمسة من احلى الحبايب الجنبك بى هناك 0 واقول ليك حاجة كان جبته كل عربات البلدية ما بتقدر على النيمة لانها جذورها قوية وساقنها الحب الصادق البيننا كلنا0
حنينة الحنونة مشيتى وين نحن نعزى لينا كم يوم على نيمتنا الغالية غلاوة رجاء يلا هلى انت وضيفتك ونوروا النيمة 0
انت يا محمد الشيخ سمعت ولا جابوه ليك يا اخوى اضانى طرشة ولا طله
يا سوركتى خلاص نحن تبعك والاغنية حلوة شديد وحنعمل بيها طوالى بس جيب العود وتعال تلقانا مفرجخين كلنا فى الدايمة دى 0
على عثمان يا اخوى ما تنسى انه اتعاهدنا النيمة دى ما تمرق من هنا بس محلها الرئيسية دى وكلكم البجى ماشى وما عنده موضوع بس فوق
( فوق فوق نيمتنا فوق )
فى الانتظار لباقى الحبايب00000000
امال ام وضاح
| |
|
|
|
|
|
|
Re: وين نيمة رجاء الظليلة (Re: essam&amal)
|
سلام هوووووى سجمى النيمة خلا يا كافى البلا 0000 تعالى يا النيمة هنا ليه مشيتى الصفحة التانية ده بتاع البلدية شالك ما عنده ذوق ابدا 0 ارجعى للصفحة الاولى لحدما يجى على عثمان اصله رجاء ما حارنها تجى فى اليومين ديل مع سمعة الراجل وشرفه عاذرنها خلوها تاخد لينا حقنا بهناك ان شاء الله بت العباسى يوم شكرها ما يجى وتسلمى يا نصيرة المرأة 0 امال ام وضاح
| |
|
|
|
|
|
|
Re: وين نيمة رجاء الظليلة (Re: essam&amal)
|
فوق يا النيمة انتوا مشيتوا وين يا اخوانى ما قلنا النيمة دى ما تمشى الصفحة التانية ابدا ، على عثمان وين انت بس فصاحة ساكت ما شايف شغلك ابدا تعال وجيب باقى الحبان 0 امال ام وضاح
| |
|
|
|
|
|
|
Re: وين نيمة رجاء الظليلة (Re: essam&amal)
|
دعـــــــــــوة مفتوحـــــــــــــــــــة
حفاظا على هذه النيمة ولكي تظل صامدة قررنا توزيع بنابر لك من يرغب اضافة للشاي واللقيمات عند الطلب وهذا مقابل أن يدفع كل من يرغب في بنبر+ الخدمات أغنية او قصيدة او نكتة او اي حاجة ظريفة وبالعدم يرفع البوست فوق . والكلام ده والله العظيم والله يكسرني حتة حتة برئ وماقاصد بيهو حاجة ( عشان ماتنطوا لينا في رقبتنا ساكت براي مكتوب بقلم الرصاص لسه )
والعاقبة عندكم في المسرات
| |
|
|
|
|
|
|
Re: وين نيمة رجاء الظليلة (Re: essam&amal)
|
ناس النيمة سلام جيناكم يا حبايبنا والله ليكم وحشة
النيمة شايفة ضلها رمي لبعيد ما شاء الله
اها مارقين انا والكاشف اخوي بت قوتة وجايينكم بعدين الليلة سعدي يوسف في محاضرة بلندن وحنقابل نفر كريم من البورداب نحاول نجند البورداب ديل ونجيبهم للنيمة
لبعدين
| |
|
|
|
|
|
|
Re: وين نيمة رجاء الظليلة (Re: essam&amal)
|
حنونه 00000000 كيفنك ومبرووك عليكم هاله وتعالوا النيمة ومعاكم كل الحبايب بعد المحاضرة 0 يا اخوانا الشاف خالد الحاج يقول ليه نزل لينا اغنية حلوة ولو بقت تحت فيحاء الخميلة نكون شاكريييييين يا بتاع البلدية كلم خالد الحاج انت ونعتبرها هديه منك بس ترحل فينا من لورى لى لورى 0 امال ام وضاح
| |
|
|
|
|
|
|
Re: وين نيمة رجاء الظليلة (Re: essam&amal)
|
حنونه 00000000 كيفنك ومبرووك عليكم هاله وتعالوا النيمة ومعاكم كل الحبايب بعد المحاضرة 0 يا اخوانا الشاف خالد الحاج يقول ليه نزل لينا اغنية حلوة ولو بقت تحت فيحاء الخميلة نكون شاكريييييين يا بتاع البلدية كلم خالد الحاج انت ونعتبرها هديه منك بس ترحل فينا من لورى لى لورى 0 امال ام وضاح
| |
|
|
|
|
|
|
Re: وين نيمة رجاء الظليلة (Re: essam&amal)
|
بت العباسي ده كلامك ولا كلام واحد تاني ؟
Quote: الحبيبة آمال.. كلامك صاح.. بس انا كنت محبطة شديييد هسع بقى شوووية .. وعليك علي طول ما في ناس حلوة، جوة وبره، زيك وحنونة وعلي ومحمد الشيخ وايمان وسوركتي وهلولة وراوية ما حيتغير المنبر ده، وطبعا انحنا كنا راجين باقي الحبايب الحلوين يجوا..
|
يلا طلي من جديد
| |
|
|
|
|
|
|
Re: وين نيمة رجاء الظليلة (Re: essam&amal)
|
ايهاب يااخوي مالك علينا تطورات شنو ؟ المهم موقفنا منها زي موقف سكينة ست الشاي من اعادة ترشيح اثنار يازول خلينا ماتجيب لينا هوا ساكت .
دكتورة بيان مرحب بالطلة وحبابك عشرة . انتي ماوروك بداية الهمبتة في السودان كانت من العبابدة وأخوي عبادي قاطع ( ماقاطع طريق ) يعني قاعد هنا ومأمون على بنوت فريقي .
| |
|
|
|
|
|
|
Re: وين نيمة رجاء الظليلة (Re: essam&amal)
|
الاعزاء على عثمان الهمباتية بيان شرفت كتير ، الهمبتة مش منك رضيانين بيها0 ايهاب الظريف تمبس يا راقى اغنيتك حلووووة وشرفت النيمة اقعد 00 اها يا رجاء النيمة عمرت وضلها رمى ولسه حتكفى ناس البورد كلهم ان شاء الله وسعوا الحلقة خلوها كبيرة شايفة رجاء جايبه اللقيمات الما خمج والشاى باللبن وسوركتى معاها شايل العود يلا يا ابو مديحة ابدأ لينا سودانى الجوه وجدانى بريدوا امال ام وضاح
| |
|
|
|
|
|
|
Re: وين نيمة رجاء الظليلة (Re: essam&amal)
|
شكرا ليكم والله بوستكم دا لما الشلاليت والعكاكيز تكثر نجى نندسى فيهو.. امال خلاص نختطف بوست مصطفى داك وما نديه فرقة خالص خالص فيهو مش هو براهو كل الموضوع قديم وقتل بحثا وكمان نجى هنا لزوم الفسفسفة بعدين كان الله هون نجيب قصيدة لهاشم صديق
| |
|
|
|
|
|
|
Re: وين نيمة رجاء الظليلة (Re: essam&amal)
|
بيان الحقينى بقصيدة هاشم صديق رجاء بركة الجيتى كفاك البوست البهناك ده قطع قلبك والله ديل ما بقتنعوا ابدا لكن موضوعك رهيب صراحة 00 يلا يا بيان بهناك على البوست الشلناه همبتةعدبل كدة0 امال ام وضاح
| |
|
|
|
|
|
|
Re: وين نيمة رجاء الظليلة (Re: essam&amal)
|
تمبس الرائع تشكر على الأغنية والحظة ديك بتذكرها والحمد لله انك ما دخلت اللحظة ديك ونزلت غنية كان احت ساكت .
بت العباسي حمدلله على السلامة وتشكري على اللقيمات والزوغات دي بطليها .
| |
|
|
|
|
|
|
Re: وين نيمة رجاء الظليلة (Re: essam&amal)
|
سلام للحلوين
تمبس شرفت وشكرا لنبوية الصوت الجميل
بيان العزيزة00 تسلمي واخدي راحتك000
اليوم الخميس قلت امشي اقعد شوية تحت النيمة00 ما لقيت زول امس اتذكرت حسين ملاسي وضحكت شديد00000 تتخيلواامبارح النادي السوداني بابوظبي كان مسضيف عبدالرحمن مختار الصحفي (الكبير) والصحفية (الشابة) لبني احمد حسين00000 المهم00 قلنا نسمع شيء عن تاريخ الصحافة لكن سمعنا عن تاريخه الشخصي وحكاية زواجه 0000 وطبعا اخوكم كان محضر نفسه وراجعت خريف الفرح0000 لكن الموضوع طلع فشوش0000 في الاول كنت متمني حسين ملاسي يكون معاتا000 لكن بعد الجلسةحمدت الله انه ما كان في لانه ضغطه كان حا يرتفع
| |
|
|
|
|
|
|
Re: وين نيمة رجاء الظليلة (Re: essam&amal)
|
عزيزى سوركتى لك التحايا وين انت طولت من النيمة لكن الليلة عرفت السبب غاطس مع عرسان الغفلة ، الحمد لله انى ما جيت اصبت بصداع شديد قبل بداية المحاضرة وبينى وبينك كسلتنى ضيفة معاى من السودان ومن زوار المنبر الحر الساكنين فيه على طول الاخت عائشة عبد الله وهى تهديك السلام والتحايا ولاسرتك الغالية ، الاخت عائشة من المثقفات السودانيات الحادبات على الوطن ولها مواضيع جميلة جدا عن المجتمع السودانى ولقاءات مع الطلبة والشماسة وستات الشاى وذوى الاحتياجات الخاصة بالصور كمان واللقاءات مفيدة ، كان لديها الامل فى الاشتراك فى الموقع ولكن عضويتها اتاخرت كتير وسوف تستقل وجودها معى فى ابو ظبى وتكتب من هنا بعد اذن العزيز بكرى ، نرجع للاستاذ عبد الرحمن مختار يا سوركتى اقنعتنى الاخت عائشة بانه انسان فارغ وهى متابعة تماما لكل ما يكتب وخاصة بعد الزواج العامل ليه هوس ده ، وهى تعتقد ان التجربة لم تصقله اذا قورن بالشباب الجدد من الصحفيين المبدعين حقا 0 شكرا سوركتى وشكرا الاخت ام ياسمين وفى انتظار مساهماتك الرائعة 0 وطبعا موضوع الشماسة ده حيعجبك يا سوركتى لانهم اصدقاءك 0 امال ام وضاح
| |
|
|
|
|
|
|
Re: وين نيمة رجاء الظليلة (Re: essam&amal)
|
بت العباسي يا أصيلة ، والله ماقصرتي تب وترحيبك الحميم رد لي إعتباري المهدر من الما عبروني ، وعبروني ذي شارع كوريا بالدقداق
والمصالخني مصالح ربو سبع بلحات في دربو
والمحاربني مخارب ربو سبع سكاكين في قلبو
وتاني يا رجاء انا لو جيت النيمة دي بيكون بس عشان خاطرك.
| |
|
|
|
|
|
|
Re: وين نيمة رجاء الظليلة (Re: essam&amal)
|
سلام يا ناس النيمة والله انا ما فاهمة اى حاجة كنت مريضة وما موجودة وكمان قلقانة مع شيماء لامتحانات الشهادة اعذرونى . وابو ساندرا مالك زعلان كيف ما عبرناك يعنى ، انت ضيف عزيز وجيتك بالدنبا والبيت بيتك . استريح يا ابو البنات لحدى ما ارجع ليكم تانى . انت يا على محمد الشيخ وين وباقى الحبان اختفوا حتى بتاع البلدية ما شايف شغله . بنات العباسى ليكم وحشه والله وكان لى راوية بقت جافية عديل . العزيز سوركتى وينك يا ابو مديحة ما ظهرت من زمن ولا محبوس زينا كدة من دخول البورد انا دخلت يوم عيد الام ما قدرت اعمل خروج تانى قاعدة يس كدة بدون فايدة لا قادرة اكتب ولا قادرة اعمل خروج . مشكور يا بكرى رديت لينا الروح وشكرا لجهودك العظيمة . لكم الود يا الحبايب .. امال ام وضاح
| |
|
|
|
|
|
|
Re: وين نيمة رجاء الظليلة (Re: essam&amal)
|
اول حاجة يابنات العباسي عليكم الله امسحواكلام الضرس ده لأنه مما اسمع واحد عنده وجع ضرس ضرسي الوحيد الباقي بتاورني . وسلامتك وانشاء الله ضرسك يبقى كويس وفدايته ضرسي .
منو القال ليك بحرد ( حلبي ودمي تقيييييييل )
| |
|
|
|
|
|
|
Re: وين نيمة رجاء الظليلة (Re: ali othman)
|
ناس النيمة احلي سلام ...لاجدع ناس مشتاقين ليكم والله الا البورد والقفلة وحاجات تانية حامياني
رجوية سلامة الضرس..انا مجرباااه الله يصبرك بس والدكاترة ما تخافي منهم ناس طيبين والله
اما انا وحياتك وقعت ولوحت رجلي يوم وصول بت قوتة 4 ايام وانا ضيفة في بيتي هالة ما يجي يوم شكرها انشاء الله
يا ابو ساندرا النيمة نيمتك والضل حقنا كلنا وبركة بي جيتك معانا وانشاء الله بالنجاح لتوماتك
وبرضو لام و ابو وضاح
اما الما فارقو النيمة خالص ام وضاح وعلي عثمان والجميع
تتباركوا ما تتشاركوا
| |
|
|
|
|
|
|
Re: وين نيمة رجاء الظليلة (Re: essam&amal)
|
وين الوعد يا ابو الحلوين .. النيمة مشت الصفحة الرابعة عاد ده كلام .. اوعى النيمة تطلع من الصفحة الاولى يابنات العباسى وسلامتك يا رجاء اوعى من الضرس انا والله لو يقع براه ما بشوف دكتور اسنان . لما جاء دكتور محى الدين الله يطراه بالخير لخطبة اختى قلت ليها ما لقيتى غير بتاع الضروس ده شوفى ليك بتاع باطنية ولا اى حاجة فى واحدة نصيحة بتحب ليها دكتور اسنان . حنونة ربنا يستجيب لدعواتنا جميعا وسلامتك يا حبيبة وطمنينا على رجلك وما تشوفى شر ان شاء الله . العزيزة راوية اظهرى كتير ما بالقطاعى كدة . والباقيين يجيبهم الله . امال ام وضاح
| |
|
|
|
|
|
|
Re: وين نيمة رجاء الظليلة (Re: essam&amal)
|
الشباب الحلوين
سلالالالالالالالالالالالالالالام زمن ومافي زول سأل قلنا تاس النيمة ديل هم الوحيدي حا يفقدونا000000
لكن نا شايف البرنامج شكله واقف وجيت لقيت النيمة ورقها محتحت تحت غايتوا قشيتوا وأها دي قعدة0
أبو ساندرا000 ليش زعلان000 ورينا الزعلك منو ونحن تاخد حقك
| |
|
|
|
|
|
|
Re: وين نيمة رجاء الظليلة (Re: Abd-Elrhman sorkati)
|
ناس النيمة سلام عاد اتلومنا تب وشكرآ يا ام وضاح للسؤال بيقولوا الحالة في تحسن لكن انا ما شايفة كدة بس زايغة من الدكاترة..اصلي خواااافة
عبدالرحمن سوركتي والله مرحب بعد الغيبة وانشاء الله الجبنة تجهز قريب
سلام للكل
| |
|
|
|
|
|
|
Re: وين نيمة رجاء الظليلة (Re: ali othman)
|
علي عثمان يا راعي النيمة الظليلة
والله أحرجتنا عديييل كدة وين الباقين بالمناسبة؟
فكرة عبد الرحمن سوركتي بمناقشة موضوع هام كويسة والله بس ما دايرين شكل..النيمة دي مفروض تبرد الاعصاب
اها يلا نشوف بجينا تاني منو
| |
|
|
|
|
|
|
Re: وين نيمة رجاء الظليلة (Re: essam&amal)
|
حنينة بركة الجيتي ، والله الناس ديل ماعارفهم مشوا وين حتى بت العباسي وام وضاح طولوا الغيبة انشاء الله خير ؟
اقتراح سوركتي جميل وعشان نبعد من الشكل حقوا نناقش الحاجات الإجتماعية لأنها اساس حل كل المشاكل وكمان مواضيع ذكريات السودان الذمان ولا رأيكم شنو ؟
| |
|
|
|
|
|
|
Re: وين نيمة رجاء الظليلة (Re: essam&amal)
|
علوبة ود عثمان الظريف و ناس النيمه الظليلة اها انا جيتكم سلاااااااام اول حاجة اعذرونى عايشة على اعصابى مع السودان ومع شيماء والامتحانات فى اليوم عشرة مكالمات الله ينجح شيماء بركة دعواتكم الصادقة . رايكم شنو نبدأ فى طرح موضوع للنقاش زى ما قال سوركتى .. انا فى موضوع خطر على بالى بعد ان سألنى احد الشباب بانه يسافر وين عشان عاوز يتزوج سودانية بمهر معقول وقالوا الزواج فى امريكا ساهل ومافيه مشاكل او هولندا او اى دولة فى اوروبا على شرط ترجع معاه الامارات عشان وضعه هنا ممتاز وهو ما عنده مشكلة جوازه بريطانى . هل يهاجر ابناءنا بحثا عن الاستقرار بتكاليف بسيطة ؟ خطر ببالى ان اسأل البورداب فى كل مكان عن تكاليف الزواج كيف فى المنطقة الموجودين فيها . يعنى بورداب هولندا يحكوا كيف تبدأ تكاليف الزواج ابتداءا من الخطوية وكذلك ناس امريكا وكندا وهلم جره . موضوع حلو مش كدة ؟ يلا نبدأ ....... سوف اعود لاحكى لكم تكاليف الزواج فى الامارات ، طبعا حاجة خرافية . امال ام وضاح
| |
|
|
|
|
|
|
Re: وين نيمة رجاء الظليلة (Re: essam&amal)
|
الحبيبة رجوية يلا ساعدينى فى الموضوع الخطير ده
عاوزين البورداب كلهم يطلوا عشان لازم نفتح الموضوع ده بصورة موسعة، كل واحد يحكى لينا بالتفاصيل عشان يا جماعة نساعد اولادنا وبناتنا البورداب اولا ، وبعدين نعملها معاهدة مستقبلا لاولادنا وبناتنا ونحدد قصة البزخ والصرف الخرافى فى الاعراس والتقليد الاعمى ، زى ماناس فلان عملوا انا كمان اعمل لاولادى. انا ليه ما اعمل لاولادى فيلا وعربية وراس مال عشان يبنوا حياتهم وياسسوها صاح .
والله هذا الشاب الذى سألنى عن عروس بدون مغالاة وبهرجة. قال لى انا عاوز عروس تاخد كل اموالى بس تخطط بيهم لى حاجة مستقبلية لينا، ليه انا اتعب واشقى واشتغل الليل والنهار وامى تصرف كل المبالغ دى فى ثلاثة ليالى ، انا مرتبى يفوق الثمانية الاف دولار شهريا , ولدى رصيد فى البنك لكن انا ما من انصار البزخ والابزار الغير منطقى وما قادر اقنع امى ساعدونى يا جماعة لا استطيع ان اصرف ما ادخرته فى سنوات فى لحظة ولا استطيع ان اغضب امى . قالت ليه اقل حاجة عشان تعرس فى ابو ظبى لازم يكون عندك مأتين وخمسون الف درهم ( 250 الف درهم ) يعنى ما يعادل تقريبا سبعين الف دولار وكمان بالسودانى ( 175 مليون جنيه سودانى ) .او ما بمشى معاك هذه اقل تكاليف زواج عندنا فى ابو ظبى لى زول عادى ..
ولى زول عاوز ينافس ويعمل ليه هودج بخمسة وعشرين الف غير حق الناس الشايلين العروس وكوشه بعشرين الف وكروت الدعوة ثلاثين الف ( كروت شيوخ طبعا ) وفطور العريس مع العدة البايركس والكريستال هدية لام العريس والفنانين من السودان تذاكر وفيزا واقامة فى الفنادق والشرط الاساسى الفنانة قسمة تجى فى اول طيارة عشان العروس تتعلم الرقيص ( مع العلم بان موعد الزواج هنا تحدده قسمة على حسب برنامجها فى السودان ممكن تقدم شهر او تأخر شهرين ) بعدين يجوا الجلاليب والعمم والملافح المطرزة عند ارقى محلات التطريز ومراكيب النمر والثعلب والاصلة وحيوانات ما سمعت بيها ابدا لكن شفت مراكيبهم فى ابو ظبى . وبعدين خواتم الفضة الفاروظة مع لون تطريز الملفحة ، وبعدين الحنة فى فندق والدخلة فى فندق تانى والصبحية فى فندق ثالث . ( فى ناس قنوعين تكاليفهم اقل و لكنهم اقلية ) والبقية تأتى ولى عودة.... امال ام وضاح
| |
|
|
|
|
|
|
Re: وين نيمة رجاء الظليلة (Re: essam&amal)
|
ام وضاح وناس النيمة الحنان قليت لي يا أم وضاح دة كله بيسووه الناس عندكم؟؟ لا حول الله..انا ما عارفة متين نحن السودانيين نعي الدرس جاتنا حروب..مجاعات..طغيان ..فيضانات وبرضو الحال في حاله إنك لن تهدي من أحببت ولكن الله يهدي من يشاء
انا بس مافهمت حكاية زولك دة يا ام وضاح يعني عايز يجي يتزوج برة الامارات وعنده إنسانة مرتبط بيها وبيفتش علي المكان المناسب؟؟
ولا بيفتش علي إنسانة من مكان شرطآيكون تكاليفه مناسبة؟؟
يعني لقي العروس وحيشتري ليها الشيلة؟؟؟ والا إشتري الشيلة أولا..وبعدين يبحث عن العروس التي تطابق مقاسات الشيلة؟؟؟
فاهماني طبعآ...موش؟؟
ولكم التحية..وبالله ما تطولوا
| |
|
|
|
|
|
|
Re: وين نيمة رجاء الظليلة (Re: essam&amal)
|
اهلا ومراحب باسامة الخاتم .... انا برش ليك الرملة ورجاء تجيب اللقيمات من خالتى علوية وسوركتى وعلى عثمان يجيبوا ليك العنقريب عشان تقيل باقى ده عنقريب جرتقعديل كده ويلا يا حنينة الحنونه فرشى الملاية السمحة لى اسامة . يلا اتوهط وابدأ يا ود الخاتم . امال ام وضاح
| |
|
|
|
|
|
|
Re: وين نيمة رجاء الظليلة (Re: essam&amal)
|
أهلي النيماب سلام000 (نيماب زي عبدالاب ومجراب) 000 الخ
كيف قيلتوا 0 0000 يديكم العافية
امال اثارت موضوع هام ولكن واقع الامارات غير وضع السودان000000
وأنا اري الا نتماشي مع واقع الامارات لان به كثير من الزيف والفشخرة
الفارغة بأعتبار ان الناس هنا يحاولوا ان يجاروا بعضعهم القادر
والغير قادر00000
بعيدا عن الموضوع الذي طرحته أختي أمال وبدون اختلاف (لاننافي النيمة)000 فأن نصيحتي لكل من أراد الزواج من الشباب السودانييين ان يتزوج بالسودان من سودانية 0000 وكل المشاكل محلولة
ويديكم العافية000000 طبعا دة بأختصار كدة
| |
|
|
|
|
|
|
Re: وين نيمة رجاء الظليلة (Re: essam&amal)
|
حبايبى الحلوين فى النيمة الحلوة بدون فرز سلاااااااااااااااام الموضوع ده مهم خالص مناقشته حنونة الحبيبة هذا الشاب ارتبط مع فتاة سودانية حضرت مع والدها من الصين الى دبى لعقد صفقات عمل هنا ، وكان هو من ضمن قروب الصفقة هذه ونشأت بينهم صداقة تحولت الى حب واتفقاعلى الزواج بعد ثلاثة سنوات ، ولما دخلوا فى تفاصيل الزواج اختلفوا ، الشاب مصر انه بيبنى فى مستقبله عشان عاوز يرجع يعيش فى السودان وبيقول كل المال ده هو جمعه عشان يشترى بيت فى السودان وسيارة وبعدها هو قادر بانه حيكون مستقبله فى السودان مشرق لانه ذهب وعرف انه السودان فيه دهب مش قروش بس الواحد يكون معه بيت وسيارة وعرض عليها بان يسجلهم باسمها ، رفضت الفتاة واصرت بان يحضر هو وامه وابوه للصين لخطبتها ومعه كمية من الدهب والملابس والعطور وبعدها يشهرين يرسل لهم التذاكر هى واسرتها وصديقاتها الاربعة المقربات ليها شديد ويكون مهرها مائة الف دولار ودهب بس ( بس دى حلوه يعنى متكفى )هى تختار الشيلة بنفسها والباقى عليه هو فى السودان فندق وفنانين وعشاء وصبحية وجرتق . فاعتذر لها بانها لا تناسبه فكريا وزى ما تقولى يا حنينة صدم على حسب كلامه معاى وترك الامر لوالدته على شرط ان تكون فترة خطوبة كافية ليعرف افكار الفتاة ورؤيتها للحياة والمستقبل وصدم ايضا بان افكارهن نفس افكار امهاتهن وعمل اكثر من خمس محاولات فشلت كلها وصدم كثيرا وسؤاله يا حنينة هل الفتيات العايشين فى اوروبا يحملن نفس هذه الاشياء البالية واتربوا على نفس التقاليد القديمة بانهن لازم يتزوجن كما تزوجت فلانه . فى اسر بسيطة وفتيات متعلمات ممكن يلقى ضالته فيهم ولكنه لا يريد ان يزعل امه لأنها شرطها الاساسى ان العروس تكون فى مستوى معين من الطبقات اياها فقرر ان يبحث فى اوروبا وهو مستعد للسفر لاى دولة المهم فتاة سودانية من اسرة محترمة وافكارها متقدمة . مشكلته انه مصر على المبدأ الذى قرره بان الزواج يكون مختصر وهو مستعد يدفع لحد خمسين الف دولار ولكنه والله ما وجد من تقبل . وهو لا يحب الزواج من اجنبيات امنيته فتاة سودانية متعلمة وراقية الفهم . والله انا اعتقد انه جوهرة ولكن ؟ سوف اعود لرجاء واسئلتها الراقية والمهمة والموضوعية . رغم انى اعتقد بان الموضوع هذا فيه اجابة على جزء منها . على عثمان لى عودة سريعة معك . سوركتى ساعود عشان احكى ليك بالسودان والله كلامك ده الا تمشى اقاصى الحدود السودانية لكن فى الخرطوم لا ثم لا كل الظواهر الفى ابو ظبى دى جات من الخرطوم يا اخى ناس الخرطوم جابوا اصالة نصرى ( زى ما بتقول حبوبتى انت بى صحك ) ؟ امال ام وضاح
| |
|
|
|
|
|
|
|