دلع البنات ... ما عسل ... والدم شربات !!!
لمن كنا صغار ياالسني دفع الله طبعا الكلام دا كان سنة 1900 وخشبة حسب نظرة أولادنا لينا ... تصدقوا كل ما أحكي مع واحد وأقول ليه لمن كنا قدركم كنا بنسمع الكلام وكنا وكنا يشب لي في حلقي ويقول لي oh mom it Is useless to talk about this prior time وفعلا ألقى نفسي بضيع في وقتي على الفاضية والمليانة أنا في وادي وهم في وادي تاني والحوار بينا زي حوار الطرشان .. إضافة إلى ذلك بحس قدامهم إني متخلفة ... ما ناقشة حاجة ... وبتكلم إنجليزي مكسر لأنهم تعلموا من أهل اللغة نفسها الله يقطع المدارس الخاصة وسنينها اللي كشفت جهلنا الفاضح بكل أنواع المعرفة حتى الكمبيوتر لما يخرب بيصلحوه زي العفاريت يا جماعة ديل أولاد شنو ديل ؟؟؟ الأولاد ديل خلوهم في حالهم لمن نخلص من قضايا البنات وبعدين لنا عودة عشان ما تقولو لأنها ما عندها بنات كرهت بناتنا العيشة .. والله بحبهن من جوة قلبي وهن عارفات لكن أنا بطبعي حشرية وما بحب الحال المايل وعندي أولاد حيتزوجو سنة 20020 لأني في الوقت دا لو ربنا حيانا من الموت بكون أقنعتهم بفكرة الزواج وطالما هم حيتزوجو لازم أشتغل على البنات من هسة عشان ألقى عروسة فاهمة وبت ناس مش واحدة شردوحة تديني بالجزمة القديمة .. معليش يا جماعة الدنيا مصالح وكله زول بيعمل لمصلحته وأنا من مصلحتي إنه البنات يكونن كويسات ولو ما بقوا كويسات حيكون عندي أربعة مهاجمات وأربعة مدافعين وحأروح في الرجلين المثل المصري بقول الأخ أخو مراتو والخايبة تحلف بحياتو ... أوووه نسيت الموضوع الأساسي وهو دلع البنات الحلوات وهن موجودات في كل بيت مثلا عندك ميسو اللي إسمها ميسون دي ما بتعرف تسلق بيضة ولما أمها سافرت فجأة والشغالة هربت من البيت كان تتصل فيني كله ساعة خالتو عايزة أعمل سلطة لبابا أحط فيها لمون ولا الخل كفاية ؟؟؟ خالتو أحط كم كيس شاي عندنا خمسة ضيوف أوووه أنبيربل ياجماعة خلوني أكتب الانجليزي بالعربي ما ممكن كلما مرة أغير ما تبقوا ثقلا كدا وتقولو دي ما بتعرف أنجليزي كفاية أولادي مطلعني صفر على الشمال وأنا كنت فاكرة نفسي شكسبير زماني دا كله كوم وميمي ( مودة) بت صاحبتي كوم هي وأخواتها ناس زيزي ( زينة ) و ميشو ( مشاعل) كرهو ساندي الشغالة الفلبينية حياتها طبعا هم ظروفهم المادية كويسة عشان كدا شغالتهم فلبينية تعالو شوفو الاتكالية كله دقيقة .. ساندي قلاس أوف وتر بليز ... ساندي قيت مي ماي موبايل إف يو دونت مايند ... ساندي ميك مي أكب أوف تي سلفو بليه ( دي بتدرس فرنساوي في جامعة السوربون الفتحوها قبال تلاتة شهور في أبوظبي ورسوم الدراسة فيها حسبنا الله ونعم الوكيل ) ويتواصل مسلسل ساندي التي تجري متل المجنونة من هون لي هنيك معليش ياجماعة متأثرة بالزملاء في المكتب من المدير لغاية الغفير كلهم ميد إن لبنان ولو ما اتكلمت لبناني بفنشوني نرجع لساندي ... ساندي كلين ماي شوز بليز ... ساندي قيت مي ماي بلاك برا ... ساندي آي هاف بارتي توداي ميك سم كيك أند جوس بلس فطاير باللحمة والجبنة ... ساندي ما بتقدر تقول حاجة بتاخد ميتين دولار في الشهر وديل راتب وزير عندهم وبعدين إقامتها عليهم وحكم القوي دايما بكون قاسي على الضعيف أمبارح زرت جارتي في الدور السبعتاشر لقيت القيامة قايمة مالكم يا جماعة الخير قالت لي أمهم الليلة كان عيد ميلاد ريري ( رزان) والشغالة عيانة ( تتمارض ليس إلا لأنها تعبت وكلت وملت .العندهم شغالة بفتكروها آنسر مشين لا تتعب أبدا ) الأم : ياريري لمي العدة والقلاسات والزينة خلاص عيد ميلادك إنتهى ... أوووه مامي آي كانت أيام سو تيرد وين تريزا ؟ تيرزا مريضة يا بتي وحرام نخليهم كدا في الصالون ... أوووه مامي ليف ذيم فور تومورو إنشاء الله تريزا ول بي أوكي وحتلمهم ... لم تجد الأم مفرا من لم العدة والقلاسات وخلت باقي الشغل لتريزا المسكينة التي تعمل آناء الليل وأطراف النهار لقد استعبدو الناس وقد ولدتهم أمهاتهم أحرارا. في بيت صاحبتي التي تسكن في منطقة الخالدية شغالة إسمها كوماري ( هندية ) وهي أقل أجرا بكثير من الفلبينية التي تكون في أغلب الأحوال خريجة وتتحدث اللغة الإنجليزية بطلاقة أما ناس كوماري ديل فعربي جوبا أخير من حقهم ... نادت صديقتي على ريموف ( ريم ) درست في روسيا فأطلق عليها زملائها هذا اللقب صديقتي : ريموف قومي يا بتي الليلة ساعدي أمك وغسلي العدة دي إنت عارفة الليلة كوماري مافيشة .. مشت تزور أختها العيانة في المناصير .. أوووه ماما بليز انا ما بعرف أغسل العدة وكله ما أغسلها تجي تقولي لي ما نضيفة ولا كسرتي الصحن دا ليه؟ تدخلت بحشرية شديدة يا ريم يا بتي أمك تعبانة من الصباح تطبخ وتستقبل في المعزين أنا عارفة إنك بت شاطرة ولهلوبة ساعدي أمك شوية ! أوه سباسيبا خالتو ( شكرا باللغة الروسية) وفعلا قامت ريموف على العدة هرس كسرت تلاتة كبايات من النوع التقيل وأربعة صحانة ما بتعوضو وثلاتة فناجين قولد بليتد ولما أمها دخلت المطبخ إنصدمت صدمة العمر ولم تتكلم معها ولكنها نظرت إلي والشرر يتطاير من عينيها لتقول : عاجبك كدا ؟؟؟ *** فتكم بعافية يا جماعة الخير عندي شغل كتير وموضوعات لا ليها أول ولا آخر وأنا عارفة نفسي لو تابعتكم في سودانيز أون لاين حأمشي الخور .. غايتو يا بكري أبو بكر دبر لي وظيفة سريعة.. حأجيكم راجعة بس مش دلوقت ...

[رد على الموضوع] صفحة 1 „‰ 1: << 1 >>

احدث عناوين سودانيز اون لاين الان

اراء حرة و مقالات	Latest Posts in English Forum
Articles and Views	اخر المواضيع فى المنبر العام
News and Press Releases	اخبار و بيانات

الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة

About Us
Contact Us
About Sudanese Online

اخبار و بيانات
اراء حرة و مقالات
صور سودانيزاونلاين
فيديوهات سودانيزاونلاين
ويكيبيديا سودانيز اون لاين
منتديات سودانيزاونلاين

News and Press Releases
Articles and Views
SudaneseOnline Images
Sudanese Online Videos
Sudanese Online Wikipedia
Sudanese Online Forums

If you're looking to submit News,Video,a Press Release or or Article please feel free to send it to [email protected]