الطاحونة لشاعرنا الجميل العطا علي العطا كتبه خليل محمد سليمان

04:53 AM February, 24 2023

سودانيز اون لاين
خليل محمد سليمان-مصر
مكتبتى
رابط مختصر

((الطاحونه ))

العطا على العطا – البركل
فبراير 2022 م

ام فتح الله
مرا زوله الله
وزوله براها
رغم الفتره
وقل الحيله
الا تراها
شايلي الشيله
وشايله حيله
وشائلى الدنيا دى من دنياها
وحاسبه الدنيا دى ضل ارتيق

ام فتح الله
مسكينه الله
من ما تبت
باله مشتت
بين البركل والبرقيق
بين الفي وبينات المافي
نشف ريقه نشاف الريق
تنده في الله العفو والعافي
والله يكافي الضنك الضيق

ام فتح الله
مرا متيقنه
زوله بسيطه
كل متاعه برش ملفوف
مركوز علي حيطه
وكوز الكويه وزير وكبيق
حله موهطه في الواطه
طرحه وسبحه ومصلاه ابريق

وبمبر وطش
وجردل وشنطه
تالا السيبه وسعن الخش
خريتي مترتسي فيها دقيق
تطحن فيها القمح الاحمر
مرات تطحن فيها مريق

يا الله ناره الفوقه
نار مطلوقه في نكت اشميق
من جواها شرار يتطاير
تسمعو طق طق حس الطقطيق
والامال ماتت جواها
والاحلام يبست كاويق

فكرها مشغول بالطاحونه
ومالاقاله طريقه تفيق
ليل ونهار هي مصاقري الصاج
ولهب النار وحمو البزديق
ويومي علي الله فطوره اريق
لما تغيرو برضو تغيرو بالاريق

في ذات يوم والدنيا صباح
وقبال نحن نفك الريق
كانت تحكى ومن دون تشكى
حكي لا حجي ولا نقنيق
حكي مفروض للجيل الجايي
يبقي مسجل في توثيق

سجم اليابا آولدي فتح
سجم الصح اللحق الصح
تمر الساقي
الكان روق روق
متكي سبيطو ملان دفيق
هضلم كلو وبقي كروق
جنات الساقي الكانو ترابله
جدعو الاربل والواسوق
وشالو جهازن وبقو دهابه
وضربو الخلاء والصي الفوق
وبقو يتكلمو بالمليار
جنس بوبار وجنس فوطيق

الباقين الفطن الساقي
الساقطين الرأسن فاضى
تلفقه سلفقه دخلو السوق
فتحو وكاله ومكتب اراضى
وصبحو سماسره وبقو سبابه
خدمه هواء في هواء لتيق

الناجحين الدخلو الجامعه
بعد الجري بعد السيسيق
سنين الجامعه الراحت ساكت
حاشه حشاهن وحارقه حريق

عاين اكنك
شوف الوضع البقي مقلوب
وشوف المحنه
جنا محجوب القرا حاسوب
قدر ماساسق مالقي مهنه
اخر الدور
في الكافتيريا قعد كاشير

ولد التوم القاري تجاره
قال الرخصه وخط السير
احسن اخير من ماجستير
وبت ناس امنه القاريه تقانه
بعد الجامعه بقت حنانه
ويديك فاتحه محل كوفير

يعوضن الله
من التخريج بقي كلو هجيج
سيره وحنه وغنا صفيق
الليسانس والماجستير
بقي ماعندهن أي بريق

يا الله ..
استغفرت مالك روحى
الالام فتحن لى جروحى
وصدق قولي انا يا المبروك
وياولدى المؤمن صديق

من ساعتين كان ينده ابوكه
قالك قوم شيل الطوريه
وشيل المنجل والسلوكه
وشيل الاربل والكارديق
وامسك قوي بس في الواطه
والله يعينك وبالتوفيق
ارضك تدي حبوب وفواكه
وماب تحتاج غير للتسويق

وبي طول حسك
نادى اخوانك
في الحلال في كل فريق
هبلاهوب هوي يارجاله
ومن الليله نقوم علي طول
النيلين من قبل المقرن
ونهر النيل من بعد المقرن
كل القيف نملاهو مكن
ونباري الصحراء دي
عرض وطول
كلنا نزرع
وكلنا نحصد للمحصول

ارضا تدى قمح والفول
اخير من تمرق زيت بترول
وارضا تسقى اطفالنا لبن
اخير من تدي دهب بالطن
تلت واطاتنا ان سقنا ذره
نكفي افريقيا كافه مريق
عشر واطاتنا ان سقنا قمح
نكفي العالم كلو دقيق

وبعد ما نزرع
ممكن نحن نسوى المصنع
ويبقى انتاجنا الاجود وامتن
ولمن تصبح صنع فى بحرى
وتبقى اخير من
Made IN LONDON
ويبقى جنيهنا نصح واتعافي
كالدولار واليورو والين
من هنا تاني
ودوب يادوبنا نفيق ونريق
لا طاحونة فينا بتطحن
ولاب نتنورق بي نوريق

عناوين الاخبار بسودانيزاونلاينSudaneseOnline اليوم الموافق February, 20 2023

حزب المؤتمر الوطني المنحل يحذر حميدتي

صلاح مناع يصف حميدتي بالشجاعة

وزير التربية السابق محمد الأمين التوم: قيمة عربة واحدة من عربات جبريل كفيلة بحلّ أزمة المعلمين

الامة القومي يعلق على تصريحات قادة المكوّن العسكري

ضبط شبكة إجرامية يتبع أفرادها لإحدى القوات النظامية في الخرطوم

عناوين المواضيع المنبر العام بسودانيزاونلاين SudaneseOnline اليوم الموافق February, 20 2023

التيراكوتا أو (جنود الطين) مقال لي من 2016

تصريحات اللواء احمد ادريس

عناوين الصحف الصادره اليوم الإثنين 20 فبراير 2023م

المنسي نبيل أديب

الاطباء....الادباء

رئيس بعثة الأمم المتحدة للانتقال فولكر تشكيل الحكومة سيكون قبل شهر رمضان

انطلاق بث قناة جديدة باسم الوثائقية

عناوين المقالات بسودانيزاونلاينSudaneseOnline اليوم الموافق February, 20 2023

حميدتي و محاولة تغيير معادلة الصراع كتبه زين العابدين صالح عبد الرحمن

توصيات ورشة اتفاق جوبا.. هل تحاشت إلغائه أم تحايلت عليه؟ كتبه إبراهيم سليمان

تحليل قصير، و نشيط، و الرهيفة التنقد.. كتبه ⁨خليل محمد سليمان

لا هم لهم سوى الكراسي كتبه ⁨أمل أحمد تبيدي

الدبلوماسي القطري د. النعمة( بورك السودان والشعب الأغر ) في منصة أحتفال الروابطالمهنية و سوا في ليل

كسرُ ذراع الكيان الخارجية ضرورةٌ وقطعُ يده الطويلة حاجةٌ كتبه د. مصطفى يوسف اللداوي

اسبوع المعارض الفنية في بغداد كتبه اسعد عبدالله عبدعلي

يا هوي أحذروا من الوقوع في الهاوية المظلمة !! بقلم الكاتب / عمر عيسى محمد أحمد

مـا هــي قصـــة المناطيد الصينية والولايات المتحدة ؟؟ بقلم الكاتب / عمر عيسى محمد أحمد