ام فتح الله مرا زوله الله وزوله براها رغم الفتره وقل الحيله الا تراها شايلي الشيله وشايله حيله وشائلى الدنيا دى من دنياها وحاسبه الدنيا دى ضل ارتيق
ام فتح الله مسكينه الله من ما تبت باله مشتت بين البركل والبرقيق بين الفي وبينات المافي نشف ريقه نشاف الريق تنده في الله العفو والعافي والله يكافي الضنك الضيق
ام فتح الله مرا متيقنه زوله بسيطه كل متاعه برش ملفوف مركوز علي حيطه وكوز الكويه وزير وكبيق حله موهطه في الواطه طرحه وسبحه ومصلاه ابريق
وبمبر وطش وجردل وشنطه تالا السيبه وسعن الخش خريتي مترتسي فيها دقيق تطحن فيها القمح الاحمر مرات تطحن فيها مريق
يا الله ناره الفوقه نار مطلوقه في نكت اشميق من جواها شرار يتطاير تسمعو طق طق حس الطقطيق والامال ماتت جواها والاحلام يبست كاويق
فكرها مشغول بالطاحونه ومالاقاله طريقه تفيق ليل ونهار هي مصاقري الصاج ولهب النار وحمو البزديق ويومي علي الله فطوره اريق لما تغيرو برضو تغيرو بالاريق
في ذات يوم والدنيا صباح وقبال نحن نفك الريق كانت تحكى ومن دون تشكى حكي لا حجي ولا نقنيق حكي مفروض للجيل الجايي يبقي مسجل في توثيق
الناجحين الدخلو الجامعه بعد الجري بعد السيسيق سنين الجامعه الراحت ساكت حاشه حشاهن وحارقه حريق
عاين اكنك شوف الوضع البقي مقلوب وشوف المحنه جنا محجوب القرا حاسوب قدر ماساسق مالقي مهنه اخر الدور في الكافتيريا قعد كاشير
ولد التوم القاري تجاره قال الرخصه وخط السير احسن اخير من ماجستير وبت ناس امنه القاريه تقانه بعد الجامعه بقت حنانه ويديك فاتحه محل كوفير
يعوضن الله من التخريج بقي كلو هجيج سيره وحنه وغنا صفيق الليسانس والماجستير بقي ماعندهن أي بريق
يا الله .. استغفرت مالك روحى الالام فتحن لى جروحى وصدق قولي انا يا المبروك وياولدى المؤمن صديق
من ساعتين كان ينده ابوكه قالك قوم شيل الطوريه وشيل المنجل والسلوكه وشيل الاربل والكارديق وامسك قوي بس في الواطه والله يعينك وبالتوفيق ارضك تدي حبوب وفواكه وماب تحتاج غير للتسويق
وبي طول حسك نادى اخوانك في الحلال في كل فريق هبلاهوب هوي يارجاله ومن الليله نقوم علي طول النيلين من قبل المقرن ونهر النيل من بعد المقرن كل القيف نملاهو مكن ونباري الصحراء دي عرض وطول كلنا نزرع وكلنا نحصد للمحصول
ارضا تدى قمح والفول اخير من تمرق زيت بترول وارضا تسقى اطفالنا لبن اخير من تدي دهب بالطن تلت واطاتنا ان سقنا ذره نكفي افريقيا كافه مريق عشر واطاتنا ان سقنا قمح نكفي العالم كلو دقيق
وبعد ما نزرع ممكن نحن نسوى المصنع ويبقى انتاجنا الاجود وامتن ولمن تصبح صنع فى بحرى وتبقى اخير من Made IN LONDON ويبقى جنيهنا نصح واتعافي كالدولار واليورو والين من هنا تاني ودوب يادوبنا نفيق ونريق لا طاحونة فينا بتطحن ولاب نتنورق بي نوريق
عناوين الاخبار بسودانيزاونلاينSudaneseOnline اليوم الموافق February, 20 2023
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
خليل محمد سليمان
فيس بوك
تويتر
انستقرام
يوتيوب
بنتيريست