*تدور هذه الأحداث أثناء جلسة عاجلة لمجلس الأمن بخصوص الحرب العنيفة في أوكرانيا .. *مندوب امريكا : سيداتي آنساتي سادتي .. إن ما يحدث في جمهورية أوكرانيا لهو عار على جميع أرجاء الكون .. ويجب إيقاف الروس عند حدهم بأسرع ما يكون .. *مندوب بريطانيا : نعم .. نعم يا (جامد).. هذا الأمر يجب أن يجعلنا جميعاً على قلب رجل واحد .. *مندوب الصين : لا تتسرعوا .. ولابد من عمل تحقيق دقيق لمعرفة حقيقة ما حدث عشان بعدين ما تتجرسوا .. *مندوب كدا ما معروف جاي من وين : *يا جماعة أدونا فرصة معاكم دحين.. نحن ممكونين وبالجد تعبانين .. كنا قاعدين في أمان الله في كراسينا الوثيرة جوة القصر .. لكن فجأة كدا بقينا عطالى قبل نومة العصر و ...... *مندوب فرنسا مقاطعاً : انت منو أولاً يا سخيف.. وخشيت هنا كيف؟!.. *مندوب (الكراسي) : أنا ممثل المسخرة والبهدلة والمآسي .. لقد طردونا من مكان المنجهة والطراوة وشالونا من الكراسي .. وركبونا التكاسي بعدما (برطم) قايل نفسه لاعب أساسي !!.. *مندوب امريكا بغضب شديد : أقعد يا ولد قعدك بلا ياخدك .. برطم شنو وكراسي شنو و سلم خماسي شنو؟!.. *مندوب روسيا : معليش .. معليش .. حا نكلم ليكم (هميدتي) يشوف ليكم أي شغلة كدا غميتي !!.. *مندوب الكراسي : أحييييي يا راااااسي الضرب.. هميدتي عمل زهجان وكايس سبب .. ومشى يعيش همبريب الخريف في الغرب .. ونحن شفنا العجب !!.. *مندوب فرنسا : عملت لينا شلل أطفال وضيق في الشريان و(النخرة) والوريد.. عاوزين المختصر المفيد .. *مندوب الكراسي : طول بالك وأهدأ وارتاح .. ياخ البرهان خلى اللي اسمهم حركات كفاح .. ونحن كرشونا عشان مساكين وما عندنا سلاح !!.. *مندوب بريطانيا بزهج شدييييد : *طيب نحن نعمل ليكم شنو؟!.. *مندوب الكراسي : ياسلام يا مستر بلفور .. زي ما عملتوا زمان واستعمرتوا بلدنا تجوا هسة تاني عشان (الرفدونا) يعرفوا مين اللي طفى النور !!.. *مندوب أمريكا : يا جماعة دي مصيبة شنو الوقعنا فيها دي .. خلاص هسة اطلع برة وبعدما ننتهي حا نناديك يا (نكرة) !!.. *مندوب أوكرانيا بصرة وش منقطعة النظير : أيوا ياخ قوم فز .. وحا يجمعوا ليكم شوية (هوت دوق) وبطاطس بالرز !!.. *مندوب الكراسي : نحن مصنقرين برة القاعة من الدغش .. لا غداء لا عشاء ولا (تبش) .. الله لا كسبك يا برهان يا الخمشتنا من الترطيبة خمش !!!.. *مندوب روسيا : أيها السادة المحترمين .. لابد من النظر بعين الرأفة و الألم الدفين لهذا الوضع المشين .. أوكرانيا مين والحبايب في السودان مطرودين وزعلانين ومغبونين !!.. *مندوب أمريكا وهو يخبط الطاولة بعنف : هذا استكراد واضح .. والوضع في أوكرانيا جهنمي وكل الشعب هناك في الدم سايح .. *مندوب الكراسي : خلاص لقطوا لينا حق الرجعة والضحية عشان نحصل العيد و (الكمونية) !!.. *رئيس الجلسة : أعلن بصفتي الإعتبارية عن تعليق هذا الإجتماع إلى أن يتم إخراج هذا الشخص بواسطة فرقة الحراسة الأمنية .. *مندوب الكراسي : *تسقط بس !!.. *مندوب الشعب : *الله في .. هس هس !!..
عناوين الاخبار بسودانيزاونلاينSudaneseOnline اليوم الموافق July, 07 2022
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
عادل هلال
فيس بوك
تويتر
انستقرام
يوتيوب
بنتيريست