هيلاري: عارف يا بيل، حاسة بمغص و حمى غريبة كدة، و معاها غمة نفس و وجع ضهر، وذي العاوزة اطرش. بيل: شكلك حامل يا هيلاري هيلاري: هئي هئي هئي، ،دا كلام شنو يا بيبي، كان حامل ما عارفة، و الله انت عليك جنس حركات. بيل: خلاص دي أكيد أعراض حمى الرئاسة. هيلاري: سجمنا، حمى شنو؟ حمى الرئاسة، ودي شن نفرها كمان بيل: دا مرض نفسي كدة بجي للرؤساء و الداخلين الانتخابات الرئاسية. هيلاري: انت جاك زمان يا بيبي بيل: جاني، بس باعراض مختلفة شوية. هيلاري: ذي شنو مثلا؟ بيل: شوية اسهال كدة، الله يكرم سمعك هيلاري: هئي هئي هئ، يا راجل بيل: انا من رائي اوديك الدكتور، عشان نطمئن يا بيبي هيلاري: رائ شنو يا عمك، قال رائ قال، هو انت تاني عندك رائ، انا رئيستك انت و الشعب الأمريكي العظيم، قال رائ قال، بعد شوية حتقول لي قومي اعملي لي شاي، شوف يا بيبي انا البدفع ايجار البيت الابيض دا، و ح انضفو براي و حادفع فواتيرو براي، و انت حتكون الفيرست جنتلمان ذي ما انا كنت الفيرست ليدي زمان، يعني حتقعد كيس جوافة. بيل غاضبا: من رئيس أمريكا لفيرست جنتلمان، هسي الفيرست جنتلمان دا شغلتو شنو ذاتو هيلاري: انا شن عرفني، تمشي بوراي و تعاين بحمرة عين لو زول شاغلني، خصوصا في الرحلات الخارجية، هئ، هئ، هئ، بيل: هووي يا هيلاري تكتري تقللي بضرب هسي لمونيكا، رقمها لسة معاي. وذي ما قالو اصحابي السودانيين، المرة بدقوها ب اختها.. هيلاري غاضبة: و الله رجال عينكم زائقة صحي، يا مؤمن الرجال يا مؤمن المية ع الغربال، بيل: خلينا في المهم يا بيبي، انتي حتشاوريني في إدارة البلد دي ولا الحنك كيف. بصراحة شغلانية رئيس أمريكا دي ما ساهلة و ما اظن مرة بتقدر عليها. هيلاري: اشاورك ليه، و انت شاورتني زمان، قال اشاورك قال، شوف كمان بيل: لكن الوضع مختلف، انتي زمان ما كان عندك تجربة رئيس، و خبرة رئيس، كنتي مجرد فيرست ليدي تعوسي الكسرة و تعملي لي الفسيخ البحبو، وكنت عامل ليك تأمين صحي و كنت كاسيك، ولا خلاص نسيتي، هيلاري: خليني أفكر يا بيل، انا هسي بصراحة شايلة هم الروس و الشرق الأوسط و بشار الأسد، راسي جايط، ما عارفة اعمل شنو ولا شنو، اهم حاجة ما لاقية لي واحدة بتاعت كوفير كويسة، و عاوزة كمان امشي الجيم ، و ..، اقول ليك حاجة يا بيل، كدي قوم اعمل لي كباية شاي، عشان افكر في اولوياتي، و اوعدك اني افكر في مشورتك، هئ، هئ ، هئ المعز عبد المتعال سر الختم نيو بريتن، الولايات المتحدة الأمريكية 8 نوفمبر، 2016 ، الساعة الثانية عشرة و 45 دقيقة ظهرا، يوم الانتخابات الأمريكية، و قبل ظهور النتائج
11-08-2016, 07:39 PM
المعز عبدالمتعال المعز عبدالمتعال
تاريخ التسجيل: 06-11-2011
مجموع المشاركات: 485
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
المعز عبدالمتعال
فيس بوك
تويتر
انستقرام
يوتيوب
بنتيريست