محجوب شريف شاعر الصمود بلا منازع: صفحات من مذكراتي

Quote: إسماعيل: فترة سجن أكتوبر وهي كانت مراحل كثيرة ولكن في فترة ما رافقك الأستاذ وردي . كان أيضاً نزيل في كوبر معكم. ممكن تحكي لينا عن الفترة دي وهل كان هنالك إبداع سواء كان من ناحية الكلمات أو اللحن بالنسبة للأستاذ وردي. مبارك: يعني أنا زرت كوبر مرتين، في كل مرة 6 شهور وعشرة يوم. كان في قانون إسمو قانون الاعتقال التحفظي، ما في محاكمة، 6 شهور وعشرة يوم تمرق. وممكن يرجعوك في اليوم زاتو. أنا دخلت مرتين، 72 و73. فعلاً كان في نشاط. كان بنعمل حلقات أدبية، نقرأ أشعار، نتكلم عن بعض الكتب. نـُـحي المناسبات البتم في الخارج، نحن نـُـحييها بالداخل ومحمد وردي كثيراً ما يُـحيي حفلات غنائية. وحتى كان في أنشطة أخرى مهمة جداً. عملنا مدرسة لتعليم من يحتاج إلى اللغة العربية، اللغة الإنجليزية. حتى كان المحامي سليم عيسى عبد المسيح يدرِّس اللغة الألمانية. وعملنا مدرسة بناظرها، شفتَ كيف، وقدرنا نفرض نفسنا على إدارة السجن، يدونا محل، يجيبوا لينا طباشير، وقعدنا ندرِّس لفترة طويلة وناس كتار جداً استفادوا من الجانب دا. كسرنا رتابة السجن بهذه النشاطات. إسماعيل:هل قام الأستاذ وردي بتلحين أي من أغانيه في السجن. مبارك: لا ما حصل. لكن من الطرائف، مرة جابوا ليهو أكل ملفوف في جريدة ويفتحها يلقى قصيدة التيجاني سعيد (قلت أرحل). ولحنها طوالي، شالها من الجريدة ولحنها. طبعاً كان معانا محجوب شريف وأمتعنا كثيراً بأشعاره. إسماعيل: كنت حأجي لأستاذ محجوب شريف. إسماعيل: يعني الأستاذوردي لحَّـن (قلت أرحل) في داخل السجن. مبارك: أيوة في السجن. مبارك: الغريبة لاقيت التيجاني سعيد في مشيتي السودان هسه وحكيت ليهو ولقيتو ما عارف الحكاية دي. إسماعيل: دا في 72/73. مبارك: 72. إسماعيل: ومحجوب شريف، هل تـذكـُـر إذا كان أنتج شعر في داخل السجن؟ مبارك: أنتج طبعاً. نحن كنا، مثلاً الواحد يُـطلق سراحه ونجي نودعوا، كنا نقول (أهلاً أهلاً بالأمجاد)، قام هو طوالي عمل (أكتوبر ديناميتـنا، أكتوبر ساعة الصفر ركيزة بيتنا)، وبقي البيـُـطلق سراحو نودعوا بالنشيد دا. ولحنه وردي. وعمل حاجات كتيرة. وبعدين نحن من كوبر رحلونا ودونا كسلا. في يوم من الأيام اكتشفوا إنو الناس الفي المعتقل كلهم مُـبَـعِـدِين من بعض والناس المستشفى العسكري كلهم أضربوا في يوم واحد. قاموا وزعونا. ودوا ناس شالا. وأنا وقع نصيبي في كسلا ومعاي محجوب شريف وحسن الترابي. إسماعيل: دا في 72/73؟ مبارك: 73، كنا عشرين واحد. ومعانا بدرالدين مدثر وعباس علي (الله يرحمه). كنا مجموعة.