|
|
 Re: كلما اخفقنا في حب وكلما عصرونا العسكر نسمع لحناً ... ديل إحنا .. ومالو الله كريم علينا (Re: خالد علي محجوب المنسي)
|
وصلتني في الخاص
من صديقي العزيز الباشمهندس ( عمر حسين عبدالماجد ود الشايقية )
فيها تصحيح لمكان أقامة اسرة الفنان الطيب عبدالله
وفيها يقول العزيز عمر أن اسرة التيمان ( أخوله ) واسرة الطيب عبدالله تسكن في مربع 14 الثورة
كما ذكر في رسالته الجميل وبديع ( النقادة في شندي )
كنت قد تعرض لهذا الحديث أمس عندما كنت افتكر ان اسرة الطيب عبدالله تسكن في حلة المحطة مربع 1
وهو الحي الذي يسكنه الكثير من النقادة
سوف اعرض حديث اخي عمر حسين في مداخلات أخر
والنقادة في شندي سيرتهم الحلوة قد لا تكفينا مجلدات لسرد قصصهم التي تعكس حسن التلاحم بينهم وبين أهل شندي
وتخطو كل عقبات العرق والدين وكانت هذه تمثل حسن التعايش مع سكان تلك المنطقة
وهذا يؤكد طيب اصل النقادة وحُسن خلق إنسان شندي الأصيل
وشندي وضواحيها بأهلها كما أحب ان اردد هذا القول دائماً
شندي وضواحيها التي ظُلمت من كل من حكم السودان منذ الاستقلال وليومنا هذا
( مهمشين بس ماعندنا غابة نتمرد فيها ودا الحاجزنا ومصبرنا على أذانا على مر العصور المظلمة حزبية كانت أم عسكر )
| |
  
|
|
|
|
|
|
|
|
Re: كلما اخفقنا في حب وكلما عصرونا العسكر نسمع لحناً ... ديل إحنا .. ومالو الله كريم علينا (Re: خالد علي محجوب المنسي)
|
| Quote: ((وقد قال الشاعر ازهري محمد علي جنى المحمية )) -- أعتقد يا أخ محجوب أن الشاعر ازهري محمد علي من المكنيّة وليس المحمية , بس عموما هن ما بعيدات من بعض |
تعليق من أخي عوض ( H ) عبدالله ( فيس بوك )
بدءً لك الشكر أجزله أخي عوض على المداخلة
وسعدت جداً بمرورك المنير مصباح يضئ لنا في الظلمة بتصحيح لمعلومة
وخاصة معلومة تخص شاعر بمقام أزهري محمد علي الخلوق الإنسان
فعلاً الشاعر أزهري محمد علي من أبناء المكنية
وأنا دائم الخلط بين المكنية والمحمية
شكراً للتصحيح
ونقول كلنا نحن وازهري وغيرنا نحن أبناء شندي أمنا الرؤوم الحنون التي سقتنا من طيب خلوقها وكستنا حسن في التعامل نفتحر به وهو ديدنا وشعارنا ( تعال لينا تجدنا في جنبيك وامامك سنداً أخوانا )
لك الشكر أخي عوض ومناي ان تواصل في مداخلات أخر
| |
|
|
|
|
|
|
|
|
|
Re: كلما اخفقنا في حب وكلما عصرونا العسكر نسمع لحناً ... ديل إحنا .. ومالو الله كريم علينا (Re: خالد علي محجوب المنسي)
|
كتب أخي وصديقي عمر حسين عبدالماجد عن ( النقادة )
ونسمي المداخلة الأولى
نقادة ( 1 )
اصل الأسم ( نقادة ) يرجع أنهم إنحدروا من منطقة تعرف بأسم ( نقادة ) في صعيد مصر وهم أقباط في معتقدهم
النقادة سكنوا في مربع ( 1 ) حلة المحطة في شندي المدينة
وحالهم كحال غيرهم من أبناء شندي عندما ضاق السكن بافراد الأسرة الواحد توسعوا في مناطق أخر عندما تمددت المدين وكبرت فسكنوا في مربع 17 جنوب مدرسة عبدالله الحسن وهو حي درجة أولى في شندي ومن الأحياء الجديدة
تميزت شندي عن غيرها من مدن السودان بوجود عدد كبير من النقادة ( اللذين كانت هجرتهم لتلك المنطقة أسر ) والكثير من أسر النقادة عندما قدمت لأرض السودان دخلت من البر عن طريق الشمال من وادي حلفا وقد استهوتهم وطابت لهم البقاء بمدينة شندي عندما مروا بها رغم صغر المدينة أيامها لكن السبب قد يعلمه النقادة أنفسهم لكن أهل شندي يعلمون انهم قوم طيبي المعشر والجوار ساكنوا وأجبروا أهل شندي على أحترامهم وحبهم بحسن خلقهم وطيب معشرهم والشواهد كُثر على ذلك من قصص سمعنا بها وأخرى لم نسمع بها كيف كانت سيرة النقادة عامة في شندي ( بين كل مجموعة تجد الحسن والسيئ لكن هولاء القوم قد لا نكذب إن قلنا أو وصفناهم بحسن الخُلق عامة لاتجد منهم إلا الإبتسامة في حديثهم والصدق في تعاملهم النخوة وقت الحاجة والكرم .. أختلطوا مع أهل شندي في الحلوة والمرة قاسمهم اللقمة وجقمة الموية شاركهم في أفراحهم وأتراحهم ..... ( بشروا في حفلاتهم وشيعوا معهم فقيد لمثواه الأخير .. حضروا معهم المولد النبوي وقدموا لزفة قوات الشعب المسلحة يوم قفلة المولد عصير الشربات عندما تمر الزفة من مربع واحد وهو أول حي يقابل الزفة بعد خروجها من القيادة الشمالية ) وما فعلوا هذا رئاً بل هو طبعهم أناس طيبي المعشر والكريم يكرم
والتعايش الذي كان بينهم وبين أهل شندي يمثل قمة التعايش بين البشر وانصهروا بين سكان مربع بل تعدت علاقتهم لشندي فوق كلها مربعات 7 و 8 و 9 نجد لهم علاقات طيبة مع سكان تلك المربعات ( السوق جمع )
ونواصل
| |
|
|
|
|
|
|
|
|
|
Re: كلما اخفقنا في حب وكلما عصرونا العسكر نسمع لحناً ... ديل إحنا .. ومالو الله كريم علينا (Re: خالد علي محجوب المنسي)
|
النقادة في شندي 2
في بدايات قدومهم لشندي عملوا في مجال صناعة الغزل والنسيج وكانوا يتخذون من دورهم مشاغل بسيطة
نسيج النول بعد الغزل اليدوي وكان يساعدهم في صناعة الغزل اليدوي نساء شندي
( نلاحظ هنا فائدة وجود النقادة في الحراك الاقتصادي في شندي )
أولاً اتاحة فرص مكسب رزق للكثير من الأسر في شندي إذ كانت النساء يقمنَّ في أوقات فراغهنَّ بعملية غزل القطن
ويستخدم لذلك ( المرطراق ) وهو عبارة عن قوس يشبه القوس الذي يطلق منه السهم وهذا يستخدم في نبش القطن ونظافته حتى يكون نظيف ومنفوض بطريقة تجعل غزله بواسطة المترار سهلة .. و ( المترار) وهذا يستخدم في عملية الغزل وترانا نجد ان عملية الغزل في الحقيقة هي عملية مسلية ويقمنَّ بها النساء في أوقات شراب قهوة الضحى والرجال في أعمالهم سواء وظيفة أو زراعة أو غيرها .. وتكون جمعة والونسة والقهوة مع الغزل او شغل القطبة ( بي ابرة الكرشي ) وشغل العمم والشالات برمة يعني يجتمعن مستفيدات من وقت الفراغ في شئ نافع تبريم عمة أو غزل قطن أو عمل مشغل طواقي ومناديل وهي مصدر دخل
وكان يشترون منهنَّ ماغزلنّا بأسعار مغرية وبعدها يقوم النقادة بنسيج هذا الغزل ومنه تصنع أقمشة في غاية الأبداع ( فرد للغطاء - وقماش قنجة تقيلة للبرد يخاط جلابيب - وقنجة خفيفة صيفية - شالات وغيرها مما تجيد به أيدي هولاء المبدعين في النسيج والغزل وقد اشتهرت شندي بفضل النقادة بصناعة النسيج الجيد على مستوى السودان والما إتغطى بي فردة من نسيج شندي البرد نفخو والما لبس جلابية من قنجة النقادة تب ما قدل وما قشر وما لابس شال نقادي ما إتفوجج في المجالس وإتحكر هاك يا قعدة وفاقاق
| |
|
|
|
|
|
|
|
|
|
Re: كلما اخفقنا في حب وكلما عصرونا العسكر نسمع لحناً ... ديل إحنا .. ومالو الله كريم علينا (Re: خالد علي محجوب المنسي)
|
النقادة في شندي 3
وبعد طاب لهم المقام في شندي وعرفوا أن هذه البلدة الطيبين أهلها هي بلدهم بدأ البعض منهم ممارسة التجارة في سوق شندي لبيع منتوجاتهم مع ممارسة التجارة في ضروب أخرى ليوفوا حاجة السوق وهم أهل سوق وتجارة وأكثر ما تتميزوا به عن غيرهم صدقهم في البيع وبذلك كسبوا ثقة المشتري وأصبح لهم من مرتادي محالهم ودكانيهم أكثر من غيرهم وعرف النقادي لو قال لك هذا الشئ بكذا معناها هو سعره الذي لو حفت رجليك ما وجدت مله سعر في مكان أخر .. وأصبح المشتري قبلته دكان النقادي وكسبوا ثقة الزبائن ( امانة وصدق وجودة في البضاعة ) .. إستأجروا وتملكوا الار والمحل وهذا حقهم ولكل مجتهد نصيب ونفخر بهم نحن أهل شندي أنهم أصبحوا منّا وفينا ...
| |
|
|
|
|
|
|
|
|
|
Re: كلما اخفقنا في حب وكلما عصرونا العسكر نسمع لحناً ... ديل إحنا .. ومالو الله كريم علينا (Re: خالد علي محجوب المنسي)
|
Quote: مدة طويلة ببحر فى فى بوستيك العجيب ده
والزمن مايسعفنى اسجل اشادة
شكرا لهذا الجمال
ياخالد
بوست متكامل
ياريت تواصل فى كل الانواع بمافيها فن الفنون ما قبل الحقيبة الا وهو المديح وفنونه وضروبه ومدارسه وجهابذته وما رائينا فنانا الا وله اسهامات فيه
شكر مكرر |
لك الشكر اخي الفاضل يوسف محمود وخيار الاسم اسمك يوسف ومحمود على الابحار دون شراع ومع التيار
لكن فيما العجب ؟
فلو كان العجب أعجاب نزيدك من الشكر مكيال بل عشرة وتكرم يا أبن الأكارم خصلة وخصال
بإذن الله سا اخي نواصل بس خليك قريب
وكم يهمني التعقيب على ما كتبت وإن كان نقداً وتصحيح يكون أجمل
القصد والمرام أن تكون الفائدة للجميع
وزيارتك مكسب لنا وشكراً عليها كتير
| |
|
|
|
|
|
|
|
|
|
Re: كلما اخفقنا في حب وكلما عصرونا العسكر نسمع لحناً ... ديل إحنا .. ومالو الله كريم علينا (Re: خالد علي محجوب المنسي)
|
النقادا في شندي 4
والمتتبع لمسيرة أهلنا النقادة في شندي يكون قد سمع أو شاهد بعض المواقف التي تسر القلب قد وقفها هولاء القوم اللذين نفخر بهم كأهل
ونذكر على سبيل المثال بعض من أعلام النقادة والأسماء التي لمع نجمها في سماء شندي وها أنا أقول قبل أن أبدأ في ذكر وأقدم الاعتذار للذين قد يسقط مني ذكرهم اسمائهم ليس عن قصد والله. فأنا بشر والبشر ينسى وجلَّ من لا ينسى والبشر يخطأ في معلومة لكن يجب ان تصحح متى ما علم الحق أو قد يكون لا يعلم عن فلان وعلان وهم موجودين كانوا وكانت لهم أدوار في الحراك الاجتماعي في شندي اكبر من اللذين سوف اذكرهم.. والله ماتعرض للحديث عن هولاء إلا لاثبات حق لهم في الحركة الاقتصادية والاجتماعية في مدينة شندي
( رجاءً من متتبعي هذا البوست التصحيح أو اضافة معلومة حتى نخرج بالمعنى المراد من حديثنا هذا في أجمل صورة تنساب حجم دورهم الذي لعبوه في شندي )
إبراهيم بسخرون كان يعمل في مجال النسيج وقد لعب دور كبير في خدمة طبية قد اكتسبها فطرة كان إبراهيم مسخرون يعالج بالاعشاب والدواء البلدي إضافة أنه كان بصير خبير في مداوة الكسر والفكك بالجبيرة وأرجاع ماتحرك من عظام مكانه الطبيعي بحكمة ودراية فطرية وقد أشتهر بالبصارة في شندي وأصبح الناس يرتادوا منزله للعلاج من داخل وخارج المدين من الضواحي ( شايلين من أصيب ماشين لي بسخرون ) وكان يقوم بهذا العمل دون مقابل أكرام للبشر
| |
|
|
|
|
|
|
|
|
|
Re: كلما اخفقنا في حب وكلما عصرونا العسكر نسمع لحناً ... ديل إحنا .. ومالو الله كريم علينا (Re: خالد علي محجوب المنسي)
|
وهذه ايضاً من الأغاني الجميلة للفنان الطيب عبد الله
تمـــــد الإيد ونتسالم
تمد الإيد ونتسالم
كأنك ما نسيتني زمان
ولا الزول القبيل خاصم
بعد فرقتنا بالسنوات
نسيت اسباب الطال
ونتقابل تمد الإيد
وفي عينينا ألف سؤال
وحات الرعشة في الإيدين
سلامك ما خطر بالبال
سنيني الفاتو من دونك
براي قضيتا في أحزان
اشيل الليل عذاب مُشتاق
وعادت سهد الاجفان
تخاصم كيف وتنسى الريد
وتنسى العُشرة والتحنان
غريبة الليلة نتقابل
ونتعاتب بدون كلمات
وفوق إيدي تنوم إيديك
واحسك في الفؤاد رعشات
واشوفك تبكي يا غالي
علي الماضي وزمانو الفات
| |
|
|
|
|
|
|
|
|
|
Re: كلما اخفقنا في حب وكلما عصرونا العسكر نسمع لحناً ... ديل إحنا .. ومالو الله كريم علينا (Re: خالد علي محجوب المنسي)
|
النقادا في شندي 6
ومن النقادا أديب فاخوري تغمده الله بواسع رحمته
أديب فاخوري كان صاحب محل لإيجار المايكروفات (مكبرات الصوت ) وأجمل شئ ان بجي بي نفسو ويضبط الصوت والميكرفونات في بيت الفرح واوعك من ميكرفون تاني يقول صننننننن
كان يقوم بصيانة ميكرفونات المساجد في شندي ودون مقابل وكذاك يقوم بشد كل ميكرفونات يوم قفلة المولد النبوي الشريف وصلاة العيد في ساحة ميدان الاتحاد الاشتراكي قديماً وكان ذو خلق كريمة كعادة أهلنا النقادا كما يشهد لهم كُل أهل شندي ويمثل الأب الروحي لكل النقادة وحسب علمي أنه كان عضو بمجلس بلدي شندي قديما ( محلية شندي ومن يوم مابقت محلية بقت ملجا ) وحليل بلدية شندي أيام رجال كان شعارهم العمل ومافي خطب وجاه
والله أيامها كان ترى عامل رش البالوعات يجول في كل الأحياء لممكافحة الباعوض وكانت عربة الاوساخ تمر على كوش المدين يومياً وما كان فيها ضريبة يدفعها المواطن المسكين ومافرض عليه غير العتب ضريبة العقار وضريبة الموية في الزراعة ويدفع ما استهلك من كهرباء وماء ومقابل هذا كان يتمتع بكل الخدمات من بلدية شندي.
واولاده فادي وهو الآن صيدلي في شندي وبولس
| |
|
|
|
|
|
|
|
|
|
Re: كلما اخفقنا في حب وكلما عصرونا العسكر نسمع لحناً ... ديل إحنا .. ومالو الله كريم علينا (Re: خالد علي محجوب المنسي)
|
النقادا في شندي 8
بالرغم من الغالبيه النقادة ميسورى الحال لكنهم تميزوا بالبساطه وتيسير الأمور فى مناسباتهم خاصة مناسبات الزواج والأفراح فيها يقدم البيبسى ( مشروبات ) مع الحلوى والبلح فقط فى الدعوة الرئيسيه وبعدها تختصر الدعوه على اهل العروسين وبعدين العروس هى البتسير للعريس الى بيت الزوجيه يعنى العريس يجهز بيتو بعدين يعرس ومجتمع النقاده مجتمع تكافلي ويساعدوا بعض .. وكلهم بدوا بتجاره صغيرة وسرعان ما نمو وكبرت تجارتهم لانهم ماعندهم البوبار والصرف البذخى ومارسو الرياضه ولعبو لفرق الدرجه الاولى على سبيل المثال الاعب عطا الله ولعب لفريق النداء و عماد قرد ولعب لفريق النسر وفى اى المناسبات تلقاهم اول الحاضرين يعنى يا خالد البفرقنا منهم الصلاة فى الجامع ونحن مسلمين وهم اقباط مسيحين لكن أنصهروا معنا في كل شئ إلا التصاهر ( الزواج ) والعقيدة لكنهم لم يجعلوا هذا عقبة في التعامل والتعايش جنباً لجنب مواطني شندي
عمر حسين عبد الماجد شندي فوق مربع 7 قرب نادي الأهلي شندي
| |
|
|
|
|
|
|
|
|
|
Re: كلما اخفقنا في حب وكلما عصرونا العسكر نسمع لحناً ... ديل إحنا .. ومالو الله كريم علينا (Re: خالد علي محجوب المنسي)
|
ملامــــــة
ياما طال صبري وهديتك
قُلتا يوم حالك تسيبو
مانفع فيك التوسل
إنتَّ زول برخص حبيبو
وإبتديت أفكر لعمري
ألحق الفضّل أجيبو
لو ضميرك راضي إسيبني
قلبي رضيان بي نصيبو
قبل ماتغير دُروبك
كنّا بنماسيك نصابحك
كنَّا بنقدر ظروفك
كلما تغلط نسامحك
ما بنعاكسك في طريقك
بي العذاب ما بنصارحك
بي العملتو إنتَّ فينا
الله يا ظالم يسامحك
كم سِهرتا الليل شقاوة
سيرتا ليك مشوار يفتر
كان بنفع ولا بشفع
شوقي في دربك يخدر
كم غلطتا وقلبي سامح
تاني يوم ألقاك مقّصر
والله مسكينة المحبة
تمشي لي ناس مابتقدر
والله مسكينة المحبـــــة تمشي لي ناس ما بتقدر
| |
|
|
|
|
|
|
|
|
|
Re: كلما اخفقنا في حب وكلما عصرونا العسكر نسمع لحناً ... ديل إحنا .. ومالو الله كريم علينا (Re: خالد علي محجوب المنسي)
|
تفاصل قولي والمجمّل
سأصبر يأخي إيه أعمل
إذا قلب الفتى إتحمّل
مُصائب الدهر وألامو
أرى الصبر الجميل أجمل
حديثي ودمعي إتسلسل
فصول في رواية تتمثل
أبين في مواقف إستبسل
وعند رؤيا الحبيب حالاً
أبين في مواقف أتوسل
هواك في جسمي إتخلل
مجاري الدم إذا إتحلل
حقيقة وليس تتأول
صريع لحظات سيوف لحظك
وحالي إن شفتو تتهوّل
ترك أفكاري تضلل
بي عُذرو البيهو إتعلل
أما شرع الهوى حلل
لأثقلنا نهار ولكن
ليل إذا أليّل
تذكر عهدنا الأول
أصحي الأيام بتّول
قريب يوم داك وما طوّل
مضت وأيام ويا حليلا
بقت أحلام وتتأول
| |
|
|
|
|
|
|
|
|
|
Re: كلما اخفقنا في حب وكلما عصرونا العسكر نسمع لحناً ... ديل إحنا .. ومالو الله كريم علينا (Re: خالد علي محجوب المنسي)
|
Quote: بالله هاك اخد ليك عرضة وقدلة فى شندينا دا
والتاقي الباب غرفتى اخد لى رقصة ههههههه
وهااااااااااااااااااااااك شبال جااااااااااااك
كية في شيقا المسيخ |
حسين شندي أحسن من يغني فن الدلوكا هو علي إبراهيم اللحو
لبست العراقي السوروال الطويل وإتلفحت بي توب أبوزيق وشايل السوط فوق يمني
وحاقت عصاتي تحت أباطي ( اصوقر وأتيتل )
العنكش الحمّى
الجنى بضعتو أمانة
شن سوّا ...
حايداني الامانة
مكمل الرُجلا
كبولّو الزِخام فوق
وشو ما صرّا
تختولّو الجمر
فوق وركو ما حتّا
أبواتك برضو
المستحيل في سما
صقر الجو بحلق
قال بدورلو غدا
أبشر يا الصقر
في الكبدة تتغدا
التُكل الكبير
ختينا في زكالنا
والشقا عصاتنا
الباقية دي التبقا
وهاك يا الملكة ( الدخري )
اطبلي الإويضة عليك وانزلي دستور وما تخلي ولاد ماما ولا أحمد البشير الهدندوي
وحتى الخواجة امرقي اتنصلي منهم كلهم ارمي الشبال
وانا أخو البت اللكعت
قرن الخُمرة النازا
فوق وردات الصبوة الراكزا
بالحيل آجني
أي والله ...
| |
|
|
|
|
|
|
|
|
|
Re: كلما اخفقنا في حب وكلما عصرونا العسكر نسمع لحناً ... ديل إحنا .. ومالو الله كريم علينا (Re: خالد علي محجوب المنسي)
|
أذكر وأنا في مدرسة شندي الأبتدائية ( معهد التربية شندي )
وكان معهد التربية شندي أكبر مدرسةابتدائية في شندي وأمه الكثير من أبناء شندي
شندي فوق كل المربعات 7 و8 و9 اضافة لبعض الطلاب من مربع 15 و16 الثورة ومن مربع 1 كان اولاد الحارث
ومجدي وموني صبحي وقرد وثابت
ومن القيادة الشمالية كان طالب واحد رغم وجود مدرسة في القيادة ابتدائية اسمه سعد ( يقيم الان في عجمان )
وكانت تطلع من القيادة سيارة كبيرة في خدمته وكان يشاركه فيها طلاب مربعات 15 و16 الديم والثورة
والركوب كان بواسطة ورقة تسمى ( الباص )
كان عوض عبدالله معلم في معهد التربية
اذكر ولنن ينمحو هذا اليوم من الذاكرة يوم طلع الاستاذ عوض عبدالله ليقدم فاصل غنائي قدم فيها روائع اخيه الفنان الطيب عبد الله وأبدع عوض عبدالله
كان معهد الرتبية يضم ثلاثة انهر
السوباط
الرهد
القاش
وكل نهر له ناظر
وكان الناظر الكبير حسن بتيك عليه رحمة الله
| |
|
|
|
|
|
|
|
|
|
Re: كلما اخفقنا في حب وكلما عصرونا العسكر نسمع لحناً ... ديل إحنا .. ومالو الله كريم علينا (Re: خالد علي محجوب المنسي)
|
سوف تكون لنا عودة لسيرة الطيب عبدالله
ومن فناني مدينة شندي
الفنان حسين شندي
هو حسين علي جبريل من قرية الدريمات جنوب شندي
وجنوب شندي تنتظم القرى على ضفاف ذاك النيل الخالد
القليعة
مويس
حوش بانقا
ود الحاج
الفجيجة
الدويمات
ولنا مع اهل الدويمات نسب ( ولاد حسن أحمد )
نشأ حسين شندي في تلك القرية درس الابتدائية في مدرسة قندتو الابتدائية ولا علم اين درس المتوسطة لكن كان يدرسون أولاد تلك المناطق في مدرسة بانقا المحطة المتوسطة
لكنه درس الثانوية في شندي الثانوية ثم عمل بالتدريس في المراحل المتوسطة
استوى عوده الفني منذ نعومة أظافره وكان يغني وهو صغير مع فناني شندي في مناسبات أهله مع عوض الطيب وقوار همفنانين محليين في شندي
ثم سطع ضوءه في العاصمة ومن ديك وعيييييييييييييييك
| |
|
|
|
|
|
|
|
|
|
Re: كلما اخفقنا في حب وكلما عصرونا العسكر نسمع لحناً ... ديل إحنا .. ومالو الله كريم علينا (Re: خالد علي محجوب المنسي)
|
حليل زمن الصبا الماضي
وحليل زهر الحياة الزاهر
حليل زمن الحبيب راضي
وحليل زمن الهوى الطاهر
حليلو الابلج الباسم
حليلو الكاحل الناير
حليل قمر السماء القاسم
لياليهو وصبح داير
آه لو آه تفيد مجروح
والمثل القديم ساير
رهاب ماحصلوا الجاري
وسماءك ماحصلو الطائر
تجدني مراقب اخبارك
إذا النسمات بها تخابر
تجدني على الفراش مضنى
تجدني على الاسى صابر
انا البعدك وصون عهدك
وليتك كنت بي طاري
ليتك مرة تذكرني
ولو في ذكرتك طاري
فداك نوم عيني يا نايم
وهل بلغك أنا مساهر
أراغب في كواكب الليل
أراك بيناتا ماك ظاهر
أغض الطرف وأتناوم
واقول يا الحسنو لي ظاهر
متين أنظر جمال محيك
ووين يا كوكبي الزاهر
جمالك يسعد الشافك
صباحك يشرح الخاطر
مياسك دا الهلك ناسك
دلالك وبسمة الفاطر
| |
|
|
|
|
|
|
|
|
|
Re: كلما اخفقنا في حب وكلما عصرونا العسكر نسمع لحناً ... ديل إحنا .. ومالو الله كريم علينا (Re: خالد علي محجوب المنسي)
|
تميز حسين شندي بصوت فيه بحة
وأجمل أدائه في أغاني المنطقة اعني منطقة شندي وضواحيها
( أغاني الدلوكا )
فهو يجيد التطريب فيها
وقترح على حسين شندي ان يجمع كل أغاني المنطقة والمنطقة غنية بالكثير من هذا الضرب من الفن
تغنى حسين شندي وأنا اعتبره اليسير جداً من أغاني المنطقة
وهناك من يحفظون هذا الشعر في تلك المنطقة وهم كثُر يمكنه أن يستعين بهم
ولحن الدلوكا مهيج للمشاعر
وما اجمله عندما تغنى باغنيت أزهري محمد علي ولحنها لحن سيرة ( دلوكا )
البضوي الليل
الغناء الحديث لا يناسب طبقات صوته
ولا ارى الجديد في الذي تغنى به من اعماله الخاصةفي الحديث
لذا اناشده ان يركز على هذا الضرب من الفن ومستمعيه كثُر وأجزم أن الشعب السوداني كله
لو اكون قد تجاسرت لكن اغلبه يحب هذا الضرب من الألحان ( الدلوكا ) وليست جهوية لكن الدليل موجود
أنظر في اي حفل عندما تردد أغنية دلوكا كيف تكون مشاعر الناس والحضور
ارجع يا حسين للمنطقة وأجمع اكبر كم من الاشعار القديمة في ن الدلوكا واطربنا بها
| |
|
|
|
|
|
|
|
|
|
Re: كلما اخفقنا في حب وكلما عصرونا العسكر نسمع لحناً ... ديل إحنا .. ومالو الله كريم علينا (Re: خالد علي محجوب المنسي)
|
Quote: البضوي الليل والخدود نجفة
والعيون السود والحديث عفة |
البضوي اي الذي ينير الليل
ويضئ الليل القمر فشبه المحبوبة كأنها قمر في ليلة أربعطاشر زي مابقولوا اهلنا طاشر
وفي رأي لو ما قلنا اربعطاشر بتفقد حلوتها المعنى الكامل قمر اربعطاشر
والخدود نجفة والنجفة معروفة مجموعة اللمبات مجتمعة منتظمة في شكل معين تعلق وسط الهول او الغرفة
والخدود تبق كأنها ضوء النجفة
والعيون السود .. والعيون اسود لنا معها غرام
حكى لي صديق ايام الدراسة ( في المجر ) كان صديقته مجرية عيونها خضراء .. تركها سألته مرة لما تركتها ( وكانت جميلة ) رد وقال لي :
والله بالليل عيونها بتنور بخاف منها ههههههه
ذات العيون السود بتكون لها منالصفات المحببة عند الرجل كما هو الحال عند الأوروبين الشقراء محبوبة وعيونها خضر
ملاك في ظلالو متأني
رشيق في القامة متثني
إذا قبلنا محياهو....
جذب أفكارنا بي ضياهو
سحر أنظارنا بي بهاهو
وأنا البي حبو شاغلني
وكيف لا أعشقو وأغني
وأذوب في لطفو وأخلاقو
وفوق كل هذا الجمال حديثها أن تكلمت عفة وبأدب والعفة سمة حميدة جداً في النساء يقال عفيفة
| |
|
|
|
|
|
|
|
|
 Re: كلما اخفقنا في حب وكلما عصرونا العسكر نسمع لحناً ... ديل إحنا .. ومالو الله كريم علينا (Re: خالد علي محجوب المنسي)
|
Quote: تسلمي يا العفيفة والعفاف فيك طبعا
زان حسنك في الخِديد بان إحمرار طبعة
أقدلي بي مهل خلي لقلوبنا اللوعة
اياك بت الرُجال والشرف ليك طبعا |
حباب ود ابواتى الجعلين
ود الرجال البملوا العين وتفضل
اخوا البنات ومقنع الكاشفات
خالد اخوهن السمحات تمــلي غطاهن
وعشاهن البايتات بزيدو عطــاهن
بنوت دارجعل ما قالو زول جا وطاهن
ماسكات الدرب ما فارقنو خطــاهن
Quote: تعرفي يا وضاحة طلتك علي البوست تنقح القريحة لتجود حرفا... ما طولي علينا الغيبة بعرف المشاغل
لكن من وقتك الغالي اعطينا بس 3 دقائق سجلي حضور ويسرنا ويرضينا القليل منك
لك الشكر يا ملكة
|
الله يديك الفى مرادك يا اخوى ويملاك صحة وعافية قول امين
Quote: وميل وإتاكا ومراض وصُحاح مقلو الفتاكا
ظبي الرام
والميل التتاكي يكون في رقصة وقديكون في مشية وقدلة من جيرانا قاصدا بيتا
ومراض وصُحاح
هذا ابداع في جمال العيون مراض اي ويبدو عليها النعاس كأنها مريضة لكنها صحيحة وما مريضة |
يا سلااام يا مك
ظبي الرام
من اجمل الاغاني البحبها
لكن حسين شندى ما فى حد بنافسوا فى اغاني الحماسة بخلي الرجال يهوشوا والنسوان يرقصن ويحاكن الوزين
مناي ليك ما وقف من الاغاني البتخلى ابوى يهوش ويركز فى الدارة يتجلد
ود العز ابوى مسؤل من الجنسين
| |
|
|
|
|
|
|
|
|
|
Re: كلما اخفقنا في حب وكلما عصرونا العسكر نسمع لحناً ... ديل إحنا .. ومالو الله كريم علينا (Re: الطيب شيقوق)
|
Quote: مسنوووووووووووووووح س .................ك قام عليك خلاص؟
كمان المسنووووووووحة بارياك وراء قدام
اها خمي وصري اكان بقى دا ضراك وغطاك |
هههههههههههههه
هيع جاك يا وضاحة حجر الصاقعة الفرطك
هو زولاً حنين وزولناإلا في حديثو مفرتك
عرريب وكايس الحداثة في البنادر يتلصق
بغلبو ليك لو شدولو سيرتو وفيها مجرتق
هييييييييييع وانا الككو الفجخ الطين
وتاني هييييييع وضاحة الضب الوقع في العجين
هييييييع بتقدر علينا يا جنى الدندر المسكين
هييييع بنسكنك التُرب ونجر واسوقنانردمك طين
أنا الضرا ما بقولولي هوي سو
انا للعيون الرمد بيوجع كو
أنا الكان جيتك بتلافك هسي تو
أنا البفزع ويقش الدمعة للقالت هو
حباب ود شيقوق المسنوح
والله عرفتك وقلت لي وضاحة هسي وكان داريرني امغصك اتصل بي والله انا مابخسر فيك فلس المرة دي
لكن لو داير تعرف أتصل
وأخخخخخخخخخ
انا الجنيت وقتا هوووووو
وشن اسو إنبهم بي الرأي
والدليل النجوع
يا ناس والفليل
من هوى الرايق قليل
كيف حالي ؟؟
أصبح مليل
أحي ياناس
شن أسوووو
| |
|
|
|
|
|
|
|
|
|
Re: كلما اخفقنا في حب وكلما عصرونا العسكر نسمع لحناً ... ديل إحنا .. ومالو الله كريم علينا (Re: خالد علي محجوب المنسي)
|
الجرف عطشان والزرع جفا
والبيوت حِزنت وشالت الحفة
غابت القمرة والفريق خفا
القليب إشتاق للبريدا هفا
الجرف هو الأرض القريبة من البحر
وأهلنا بقولوا للنيل البحر ومنها جات كلمة ود البحر اي ابن الحضر والقرى الريبة من النيل
يوم سفر حتى الجرف عطش ودي من المستحيلات الجرب جنب البحر وبشرب نز
ونز يا وضاحة يعني مياه البحر بتسقي الارض القريبة منها عن طريق تسرب الماء خلال المسامات
والزع جفا يوم سفرك يا المحبوبة
البيوت حِزنت وشالت الحفا
أطلق لفظ البيوت وأراد ساكنيها من البشر ( بالذات النساء ) لانه أتى بدلالة توضح المعنى المقصود أنهنَّ النساء
شالت الحفة
والحفة مفردة تستخدم تعني الجفاف
يقال الشعر حفان عندما لا يدهن بدهنة وهي عادة كانت تستخدم في الحداد على فقد عزيز ومن عادة النساء لا يدهنَّ شعرهنَّ في الحداد ويكون الشعر حفان ( يعني بضربو جفاف تصحر ) يبرهن أنها في حالة حداد
وتغيرت تلك الظاهرة الطبيعية لم يظهر القمر ومفروض يكون ساير في منازله يبدأ هلال إلى أن يكتمل بدرا
والقليب أشتاق الشوق بحور للمحبوب وشعر الغربة يوم فراقها
تسلم يا ازهري على هه الحروف في زمان شقت في المفردة إتبدلت
| |
|
|
|
|
|
|
|
|
|
Re: كلما اخفقنا في حب وكلما عصرونا العسكر نسمع لحناً ... ديل إحنا .. ومالو الله كريم علينا (Re: خالد علي محجوب المنسي)
|
سافر السمبر في السما إتصفى
والسحاب باري ماشي في زفــة
الضلام خيم في العيون صدفة
والصقيع في الروح سبب الرجفا
سافر السمبر يوم رحيلك المبر من اطيور المهاجرة ولمسافات طويلة يقطع السمبر في هجرته المسافات الشايعة
حكى لي الزميل ( حسن عبدالوهاب زميل دراسة في دولة المجر ومن أبناء كوستي ) ان اخاه الأكبر كان من هواة صيد الطيور وكان يطلع في نهاية الأسبوع مع بعض من أصدقائه للصيد وفي مرة من المرات خرجوا للصيد وهم يستخدمون السلاح في الصيد ( القطا والقمري وغيرها من الطيور التي يؤكل لحمها ) وقعت بالصدفة سمبرية مع الطيور التي أصابها البارود وكانت المفاجأة لهم أن وجدو في رجل السمبرية قطعة نحاسية مكتوب عليها باللغة الأنجليزية ( الرجاء من يجد هذه السمبرية أن يتصل بنا ومكتوب رقم تلفون )
قال لي حسن : اتصل اخي واصدقائه بصاحب الرقم وكان مواطن مجري في دولة المجر وطلب منهم ان يحددو له موقع كوستي في خارطة العالم لكي يعلم كم من الزمن وكم من الأميال سافرت هذه السمبرية ففعلوا
وسافر السمبر في السماء إتصفا
اتصفا اي لم تبقى منه واحد الكل سافر معك يا المحبوبة وحتى السحاب أسرج متاعه وسافر متتبع للسمبر في موكب حزائني يوم فرقك وكانت الغمةان طلت على عيوننا نحن من نحبك ونهواك ضابة سوداء وكانت أن تبعتها رجفة أرتجف لها كل البدن كأنها فعل صقعة صدمة كهربائية
| |
|
|
|
|
|
|
|
|
|
Re: كلما اخفقنا في حب وكلما عصرونا العسكر نسمع لحناً ... ديل إحنا .. ومالو الله كريم علينا (Re: خالد علي محجوب المنسي)
|
شاحب الصفصاف نام علي الضفة
القليب الراد الحُزن لفا
لا خطاب منك لا خبر وافا
قدر ما أشتاق ليك شوقي ماكفى
الشحوب ان تغير في اللون يقال شاحب لونه من مرض اي تغير لونه من المرض وبعضهم يقول وجهه مختوف اي شاحب
وكل شجر الصفصاف كان شاحب لونه نائم على ضفاف النيل وما عادته يهتز لكل نسمة تمر به قديما وكان حزين ساكن
وقلب المريد ( المحب ) وكل ظواهر الطبيعة حزنت
الحزن لفّا
لم يكن ما اصابه حزن فقط بل الحزن جاء وسكن واحاط كل قلبه
الحزن لفّا أعمق من حزن
وأنت يا من فارقت ديارنا لا خطاب منك ولاخبر وافنا اين وكيف أنت ؟؟
وأنا الحال العلي الشوق الشوق الشوق وكلما أشتاق لايكفي الشوق أن يهدئ مابي
ونفضل في الشوق الشوق مطية العُشاق
| |
|
|
|
|
|
|
|
|
|
Re: كلما اخفقنا في حب وكلما عصرونا العسكر نسمع لحناً ... ديل إحنا .. ومالو الله كريم علينا (Re: خالد علي محجوب المنسي)
|
كلمات الاغنية أو الأغاني التي تمدح الرجال
ومافي مدح بجي من فراغ دوماً يمدح من هو أهل للمدح
في قديم الزمان كانت هناك الحروب بين الجوار
وكان الفزع عندما تنهب بهائم من قبيلة يفزعها صبيان القبيلة
وكانت الحروب بين الأسر في القبيلة الواحدة في الزرع والمرعى
لكن الناس كانت تتحارب ويحفظوا للإنسان قيمته
مثال العدو ( القبيلة المعادية ) لو جاء منها من يستجير يجد من يجيره ويحل كربته ويحميه
وهذه هي فضائل الصفات
الإنسان إنسان وكونك تجير وتحمي من إستجار بك بمالك ودمك هذا قمة الرجولة
الرجولة ليست ذكورة والفحل في الضبان في وذكر
الرجولة مواقف
والرجولة صفات حميدة
هل سمعت بزول بقلع حق الناس قالوا راجل
زول بخيل أو خبيث أو يمشي بين الناس بالنميمة قالوا راجل
الرجولة صفات
شهامة
كرم
زود
شجاعة
ثبات على المبدأ وثبات يوم الزحف
الرجولة كلمة وتقيف قدام كلمتك وكلمتك ما تقع واطا إن كُنت على حق
| |
|
|
|
|
|
|
|
|
|
Re: كلما اخفقنا في حب وكلما عصرونا العسكر نسمع لحناً ... ديل إحنا .. ومالو الله كريم علينا (Re: خالد علي محجوب المنسي)
|
كلمات الأغنية
ومن ظاهر الكلمات
نظمت هذه القصيدة مرأة
في أبنها أو أخيها وهذا الذي يظهر من مفردة القصيدة
بالذات عندما قالت له
كان تجري وتخيب
ومن العدو تتضارا
بشيل وداللبيح
وببقالو مرسالة
كلمات القصيدة
الليل باقي ليل
عجبوني تيراني
يا الشادين قفاي
أنا طرقو لِساني
العنكش الحمّى
الجنى بضعتو أمانة
شن سوّا ...
حايداني الأمانة
مكمل الرُجلا ... ( أي الرجولة )
كبّولو الزخام
في وشو ما صرا
ختّولو الجمر
فوق وركو ما حتّا
وابواتك برضو
المستحيل في سما
صقر الجو محلق
وقال بدورلو غدا
أبشر يا الصقر
في الكبدة تتغدا
التُكل الكبير
ختينا في زِمالنا
والشقا عصاتنا
والباقية دي التبقّى
وغني وشكري
ياقصيبة السارى
بتكلم علي جنياتنا
بي حرارة .....
شايلين جوز طبنجي
وضربو بي بصارة
كان تجري وتخيب
من العدو وتتضارى
بشيل وداللبيح
وببقالو مرسالة
بوح من لساني
الستو ماني خايفا
شايلين السنين
سيف معا درقا
ياليل النشيب
مكمل الشكرة
ومن العين دَقر
والجِنيات وداعة الله
يا الشادين قفاي
طرقو لساني ....
| |
|
|
|
|
|
|
|
|
|
Re: كلما اخفقنا في حب وكلما عصرونا العسكر نسمع لحناً ... ديل إحنا .. ومالو الله كريم علينا (Re: خالد علي محجوب المنسي)
|
الليل باقي ليل
عجبوني تيراني
يا الشادين قفاي
أنا طرقو لِساني
اليل باقي ليل
وهو مقطع يراد به كمدخل لاغاني الحماسة معناه الليل ياهو الليل بظلمته الدامسة وفيه يرد الخوف
والليل ياهو الليل
وفي أغاني الدلوكا هناك مقاطع يقصد بها التطريب وهذا المقطع منها وكثير الإستخدام في أغاني الدلوكا
والحماسة
وقد أدخل الفنان الجميل علي إبراهيم مقاطع تميز بها
القوق قوق القمري القوق قوق
ومقطع
برد الليل برد الليل
لي اللالوب برد الليل
لي العُشاق برد
برد الليل برد الليل
وكانت الحمرة تستخدم مقطع
كدي فوقو ودقرتا عيني
اي له الشكرة
ودقرتا عيني اي مليت عيني
عجبوني تيراني
والتور ( الثور ) هو رمز القوة في الريف والحضر التي لم تعرف الأسود والنمور التي في الأحراش
ولذا نجده في وصفهم كثير مايرد ويشبه بالتور الممدوح للقوة
يا الشادين قفاي
طرقو لساني
الذي يشد القفا من يسند ويدرج فتناشد من يسندها ويشد قفاها اي ظهرها هو المقصود هنا وقد ترد كلمة قفا للراس وهي وردت كثير في الاشعار القديمة
وقد ذهب وغادر
قفا وفات البلد
وفي مشيهو تقيل وخاتي من خفة
ويا حليلو القام للبلد قفا
طرقو لساني
طرق المدية او السكين اي سنها وحداها حتى تصبح ماضية وسنينة قاطعة
ولساني مطرق اي ماضي في شكر مناحبهم وذم من ابغضهم
طرقو لساني حتى اقول ما اريد قوله
| |
|
|
|
|
|
|
|
|
|
Re: كلما اخفقنا في حب وكلما عصرونا العسكر نسمع لحناً ... ديل إحنا .. ومالو الله كريم علينا (Re: خالد علي محجوب المنسي)
|
العنكش الحمّى
الجنى بضعتو أمانة
شن سوّا ...
حايداني الأمانة
مكمل الرُجلا ... ( أي الرجولة )
كبّولو الزخام
في وشو ما صرا
ختّولو الجمر
فوق وركو ما حتّا
وابواتك برضو
المستحيل في سما
صقر الجو محلق
وقال بدورلو غدا
أبشر يا الصقر
في الكبدة تتغدا
التُكل الكبير
ختينا في زِمالنا
والشقا عصاتنا
والباقية دي التبقّى
العنكش الحمّى
الجنى بضعتو أمانة
شن سوّا ...
كانت المهر والمهر رمز الفروسية وكانت تربى والماعندو مهرة مو زول شدائد ومحن وحروب وفزع
كانت تزين لحرب كما تزين وقت الفرح ( عرس )
عنكش : اي زينها بزينتها التي تليق بها كمهرة فارس مميز يكون معروف بها في ساحة الحرب للذي يقصده ويريده وللذي يريد أن يحتمي به ويكون في يساره يحميه ويحتمي به ( يقال فلان اريتو في يمينك )
الحمى ذات اللون الشاهب صفار مائل لحمرة
الجنى : الصبي الفتى
بضعتو أمانة
اي أودعته أمانة
وأين تودع الأمانة ... أكيد عند صاحب الامانة ( الله سبحانه وتعالى )
شن سوا
اي ماذا فعل في حربه أو فزعه هذا إن شاء الله يكون دقر وكفى عيني
حايداني الأمانة
مكمل الرُجلا ...
سألت واجابة نفسها تطمئنها ان اخيها او ابنها قدر الثقة التي تضعها فيه
حايداني وهي نوع من القسم ويعني تأكيد لما يأتي بعدها
حايداني الأمانة
مكلمل الرُجلا اي رجل مكتمل بكلما تحمل كلمة الرجالة من معاني سامية
ولم تصمت لان هناك من يصدق حديثها ومن يكذبه في شُكر الممدوح وقالت للتأكيد
كبّولو الزخام
في وشو ما صرا
ختّولو الجمر
فوق وركو ما حتّا
دا الكبوّلو الزخام في وشو ما صرا
الزخام هو السائل لاي مادة في درجة حرارة عالية ( المذاب من الرصاص مثلاً )
ما صرا : اي لم يتغير شكل وجهه وثبت للحرق
ودا الختو لي الجمر في وركو ما حتّا
حتّا : اي ابعده ونفضه ويبعده ولو أبعد ونفضه خاب وما حِمل الحارة
كانت هناك عادة قديما
التحدي
وفيها عندمايكون خصام بين مرأتين
فتقول واحدة للاخرى نسبيتك وتعني بها نسيبتك ماهي مراة شريفة لو ما دخلتي معي في التحدي
وانظر كيف كان مقام النسيبة زمان عند المرأة وكيف أصبح اليوم
والتحدي أن تترك فأسين ( الحديد منها ) في النار حتى يحمر
ويجن علي الاتنين ومن تحمل هي الفائزة وشريفة ونسيبتها أشرف
وكانت جهالة لكن تحمل معاني لهنَّ في ذلك الزمان
والمعاني انها تتحمل الصعاب من أجل شرف نسيبتها ام زوجها
والزوج قبلتها
وابواتك برضو
المستحيل في سما
وتتعمق في التأكيد لجالته وتقول انت الشئ حارسك من اب عن جد
ديل ابواتك كان من شدة كرمهم يكرمو طير السماء وهذا مستحيل
ويرضوهو اشباع
وابواتك برضو
المستحيل في سما
وترجع بعد تاكيد رجالته وتقول الليلة الصقر محلق في الجو بدور لي غدا
( والبدخل الحرب يا قاتل يا مقتول )
ثم ترجع وتتكلم بلسان ابنها او اخيها وتثبت على لسانه انه قدر هذا واهل لها مسئولية غدا صقر الجو
وتقول على لسانه
أبشر يا الصقر
في الكبدة تتغدا
ابشر بالخير يا الصقر في سماك غداك علي وكبدة من جثث من أقتلهم اليوم
التُكل الكبير
ختينا في زِمالنا
والشقا عصاتنا
والباقية دي التبقّى
التُكل : هو المطبخ مكان طبخ الطعام
وقالت على لسان ابنها او اخيها
التكل الكبير وتقصد الطعام الذي طبخ فيه ( اطلقت الكل وارادت الجزء وهو ضرب من ضروب البلاغة )
التكل الكبير ختينا في زمالنا
اي الزاد الكبير وضعنا في زمالنا اي ركبوتنا التي نمتطيها
ووين قاصدين ؟ الشقة عصاتنا
اي عقلناها وتوكلنا
ويامن غرقنا يا جينا حازمنها
الشقا عصاتنا
والباقية دي التبقى
| |
|
|
|
|
|
|
|
|
|
Re: كلما اخفقنا في حب وكلما عصرونا العسكر نسمع لحناً ... ديل إحنا .. ومالو الله كريم علينا (Re: خالد علي محجوب المنسي)
|
وغني وشكري
ياقصيبة الساريه
بتكلم علي جنياتنا
بي حرارة .....
شايلين جوز طبنجي
وضربو بي بصارة
كان تجري وتخيب
من العدو وتتضارى
بشيل وداللبيح
وببقالو مرسالة
تطلب من السمحة في البنوت أن تغني له وتقول له الشكر والحمد
البنت البضة اللينة مثل قصبة الساريه والسارية من سرى يسري ليلاً والماية السارية ليلاً لابد أنها مياه النيل التي لاتفتر من السريان ليل ونهار
وانا بغني وغناي لي جنياتنا البسرو العين بغنييلهم بي بحرارة وصدق
هم شايل الطبجني وبعرفوا يجيهو الرمي بالرصاص البصارة هي المعرفة الصائبة
وتعود تناشد الممدوح وتثبته بكلماتها اثبت لانو لو جريت وخبت وفشلتني ماعند وشي تاي بس بشيل ود اللبيح اي بمشي لود اللبيح ( ويظهر ان ود اللبيح هذا فكي معروف في تلك المنطقة او رجل ذو جاه وحشم وخدم ) وابقالو مرسالة اي خادم يرسلني واخدمو
| |
|
|
|
|
|
|
|
|
|
Re: كلما اخفقنا في حب وكلما عصرونا العسكر نسمع لحناً ... ديل إحنا .. ومالو الله كريم علينا (Re: خالد علي محجوب المنسي)
|
بوح من لساني
الستو ماني خايفا
شايلين السنين
سيف معا درقا
ياليل النشيب
مكمل الشكرة
ومن العين دَقر
والجِنيات وداعة الله
بوح من لساني
الستو أنا ماني خايفا
البوح للكلام عندما لا يكون سر اي كلام قلته في العلن الشمع بكلم الما سمع
وأنا ثابتة على كلامي وكلامي حق وحقيقة وماني خايفا منو ويقولوا كضابة لاني شكرت ومدحت رجال يستاهلوا
مدحي وهم قدره وزنا وما بفشلوني
وكيف من الخبية وهم شايلين السنين سيف ومعا درقا والدرقة معروفة وكانت تصنع من النحاس او من الجلد القوي جلد الجاموس لانو الدرقة المعدنية يثقل حملها وحركتها ولا يحمله إلا واحداً قلبو محدثو وراضع في ضرايع عنز فاردة ورضع لبن أمو عامين ( درقة النحاس والحديد أو المعدن سبيكة اي خليط )
يا ليل النشيب
مكمل الشكرة
والنشيب اسم يطلق على الولد القارح الفايت ندادتو قوة ورجولة ولا أدري أصل الكلمة يرجع لماذا
لكني سمعت كثيرين أطلقو عليهم هذا الاسم
النشيب وهم فعلاً كانو صبيان قارحين
وقد تكون والله أعلم ترجع لكلمة نشاب النشاب عندنا في العامية تطلق على السهم ( اي ماضي وفتاك قاتل )
العلم عند الله
ومن العين دقر
والجنيات وداعة الله
وتعني بكلمة دقر ( الله يحصنه ويحفظه ) وتطلق كلمة دقر لكف العين
والجنيات ما بزابو ويحصلو في قدرتو وجسارته
| |
|
|
|
|
|
|
|
|
|
Re: كلما اخفقنا في حب وكلما عصرونا العسكر نسمع لحناً ... ديل إحنا .. ومالو الله كريم علينا (Re: خالد علي محجوب المنسي)
|
منايا ليك ما وقف
منايا ليك ما وقف
وإن إتمنيت أنا
إكبر ويشيل بي ردف
مو لُقاط طرف .....
شدولي البِزم مربوط
وحقبولو السنين
وفي إيدو شايل السوط
مو لُقاط طرف ....
ودلكُتو بترز
قُبال عرسو سايقة الحول
ود العز أخوي
الحاشا مو مصغور
مو لُقاط طرف ...
ويا أبــ أحمد تقيف
من اليعادوهو ...
السيرة إتقدمت
بالتخريجة بريوهو
مو لُقاط طرف ....
ويا العيال تقصرو
ولا تذابوهو
دا هيلو الشي حرس
من جدو لابوهو
مو لُقاط طرف
أبواتك بحلو القاصد
البلد دينا ....
يا أبـ حنكاً بليغ
الكلمتو مي لينة
مو لُقاط طرف ...
جدك بدخل الوكرة
والولي هينة ...
وبحل كاتل الزمم
لا شهادة لا بينة
مو لُقاط طرف ...
أنا قولي ليكا وجيب
شدو لي وركب
وفي شباحو أديب
مو لُقاط طرف
وجلسنّلو البنات
قفنلو بي الترتيب
وعشمانة الكريم
رجايا فيك ما يخيب
مو لُقاط طرف ....
ويا سعدة اللوقتين
أبواتك رُجال
الفي الأصل بينين
مو لُقاط طرف ...
وجدك بدخل الوكرة
السلاحا سنين ...
وود العز أخوي
المنسوب من الجهتين
مو لُقاط طرف ....
| |
|
|
|
|
|
|
|
|
|
Re: كلما اخفقنا في حب وكلما عصرونا العسكر نسمع لحناً ... ديل إحنا .. ومالو الله كريم علينا (Re: خالد علي محجوب المنسي)
|
منايا ليك ما وقف
وإن إتمنيت أنا
إكبر ويشيل بي ردف
مو لُقاط طرف .....
هذه القصيدة غريبة شوية عن سائر القصائد التي تحمد فيها مرأة ابوها أو زوجها أو اخاها أو قريب
هذه القصيدة قالتها مرأة تتمنى لاخاها يوم مولده أن يكون كما كانوا ابواته ويشيل الأسم بحق وحقيقة
ويحمل الراية ويركز
وكانت تمدحه بصفات حميدة وهي معروفة
شجاعة - عز وجاه - كرم - شهامة وغيرها من صفات محمودة
وتمنت وتطلب من الله ان يتم مناها وترى اخيها لما يكبر ان يكون متل اجداده وابائه
مناي ليك ما وقف
وإن إتمنيت أنا
لا اكف عن المنى ودعاء الله ان تكون اخي كما كانو أجادك
وكل مناي هم شالو وما كلو وانت تشيل وكمان بي ردف اي تطبق الحمل الذي شالوا من قبلك وتقدل بي ماشي
والحمل
والحمل قد يكون ذود ودفاع عن حمى عرض ومال
وقد يكون مساعدة الناس المحتاجة
وقد يكون وقفة في احقاق حق وابطال باطل وبحزم
وقد يكون وقد يكون اي انواع المواقف التي تستحق الشكرة
مناي ليك ان تكبر وتشيل الحمل الذي حمله اباك من قبلك وتزيد في العملوا وتشيل طابق عليهم اي يكون فضلك أكبر منهم وهم كانوا فاضلين من قبلك
| |
|
|
|
|
|
|
|
|
|
Re: كلما اخفقنا في حب وكلما عصرونا العسكر نسمع لحناً ... ديل إحنا .. ومالو الله كريم علينا (Re: خالد علي محجوب المنسي)
|
شدو لي البِزم مربوط
وحقبولو السنين
وفي إيدو شايل السوط
مو لُقاط طرف ....
ودلكُتو بترز
قُبال عرسو سايقة الحول
ود العز أخوي
الحاشا مو مصغور
مو لُقاط طرف ...
[red]شدو لي البزم مربوط
وهو المهر الحُر القوي
يزم اي يصدر صوت ويصهل يريد الحرية والإنطلاق حتى يماس هوايته من كر وفر وجري
شدو لي :
شد المهر تعني اي اسرج ووضع فيه كل ما يجهز بها للركوبة من سرج ولجام وركاب ( ويعرف باسمالشُباح ) لانه يشبح فيه الفارس او الراكب ليركب على ظهر الفرس ويكون الركوب ان يضع رجل على الشُباح ويرفع الاخر ليستقر في ظهر الفرس
والحصان كان رم عز وجاه ويربي الحصان في بيت العز الجاه وكان يستخدم فقط في فرح أو في فزع او حرب ...
ويزين الحصان في حالة الحرب والفرح اما في حالة الفزع يشد ويركب لضيق الوقت لتدارك من سرقوا واللحاق بهم
وزينة الحصان مهمة والاهتمام به من نضافة وقص شعر اهم ليظهر في مظهر جيد ( والخيل معقود على ناصيها الخير ليوم القيامة )
شدو لي البزم مربوط
وحقبولّو السنين
وفي إيدو شايل السوط
السنين هو السيف والسيف يستخدم ايضاً في الحر والفزع سلاح وفي الفرح زينة للعريس او ولد الطهور
وهنا حقبولّو السنين هنا لفرح ( لطهور اعتقد لانه بدت بي الحلم من صغره ) واول جديد هو الختان
حقب الشئ اي حمله في كتفه وتدلى من تحت ابطه
حقب شمطتو وسافر اي طبا شنطتو في اباطو وسافر وختر والخاتر ما بدور الوداع
ومن هنا جاء المثل المفارق عينو قوية ( هو حقيقة عينه ما قوية لكن طبعة الإنسان ان لايحب الفراق إلا مجبور وما بي خاطرو لذا يتحاشى عيون من يحبهم ويبعد عنهم لحين سفره وهم يفتكروا جفا ويقولوا عينو قوية )
حاقب السيف في كتفه ويحمل السط في يده والسوط من زينة الولد المطهر وايضاً زينة العريس ويستخدمه عندما تنقر وتهبق الدلوكا في البطان
مو لُقاط طرف
ويعني هذا القول أنه منقّى ومعزل مو ملقط من طرف
واللقيط هو في جني التمر والثمار عامة( جنيها )
وتعبأ منها من ينقا ويفرز بعناية بالذات الجيد منه فقط ويعبأ
ودا المنقّى
ومنها ما يخم خم ويعبأ ودا لُقاط طرف يعني لمّى من طرف وعبا
ودلكُتو بترز
قُبال عرسو سايقة الحول
ود العز أخوي
الحاشا مو مصغور
ودلوكتو بترز اي تدق وتهبق وقال دلوكتو ويعني حفلات الإحتفال به
وكان الحفلات من قبل فترة طويلة وقالت ( حول ) اي سنة لتبين انهم أهل عز وجاه ومقدرة حفلاتهم به بدت من قبل سنة ليوم ختانه أو عرسه لو كانت تقصد عُرسه
ود العز اخوي
والحاشا
وتستخدم كلمة حاشا للنفي
حاشا مو ########
حاشا موبخيل
للنفي تستخدم
مصغور : اي يستسغره أنداه
ونفت عنه ان يكون صغير في قدره بين انداده وانه قائدهم وحتى الاكبر منه
| |
|
|
|
|
|
|
|
|
|
Re: كلما اخفقنا في حب وكلما عصرونا العسكر نسمع لحناً ... ديل إحنا .. ومالو الله كريم علينا (Re: خالد علي محجوب المنسي)
|
ويا أبــ أحمد تقيف
من اليعادوهو ...
السيرة إتقدمت
بالتخريجة بريوهو
مو لُقاط طرف ....
ويا العيال تقصرو
ولا تذابوهو
دا هيلو الشي حرس
من جدو لابوهو
مو لُقاط طرف
يا أبـ أحمد تقيف
من اليعادوهو
أبـ أحمد قد يكون خاله وقد يكون اخوه الكبير تطلب منه أن يحموهو حتى يشد حيلو وما يكون محقور وإضينة بين اترابه وكانت هي عادة الصبية قديماً لزمن قريب حتى عندما نشأنا نحن واحتمال ليومنا هذا في القرى وبعض صغار المدن الوحيد محقور كنا نعمل دون ان ندري كنه معاني ( أنا وأخوي على أبن عمي وأنا وأبن عمي على الغريب ) كنا نحمي بعض وتب ما كنا محقورين وما بنخطا على زول لكن البصلنا وصل العقرب في جحرها بنقوم علي ما بنخلي فيهو إلا عصبة الطمبور فلذا فهي تطلب من ذوية وقد حددتأبـ أحمد ان يقف معه من ضد من يعادوهو
السيرة إتقدمت
بالتخريجة بريوهو
مو لُقاط طرف ....
السيرة هي سير يوم ختانه اتقدمت اي طلعت ومرقت وهو فوق حصانو مجرتق ومزين ويا عين دقر
التخريجة هي نمة السيرة التكف العين
الليل ليل العديل والزين
والليلة العديلة تقدمو
وتبرّى
وبسم الله أبتديت
قولي السمح والزين
والقول ماهو داير
البكتب يقرا
مشكور في الفريق
لابيت ولا بيتين
لا لعب القُمار
لا جرب الخمرة
التخريجات كثيرة ومنها ما هو مشهور ومعروف للناس وهناك بعض الناس عندما تكون بينهم شاعرة وتعرف نظم الكلم تألف لكل ود طهور وعريس في الأسرة ابيات للتخريجة والسيرة
ويا العيال تقصرو
ولا تذابوهو
دا هيلو الشي حرس
من جدو لابوهو
وتتفاخر بي جسارة اخوها وتميزه من بين اترابه وتقول لاترابه انقصروا ما بتبقو زيو في رجالته وفرسته وما بتصلو فأبقو ورا وما تحالوا تتقدمو دا الفراسة والشجاعة حارسا من جد لابو
| |
|
|
|
|
|
|
|
|
|
Re: كلما اخفقنا في حب وكلما عصرونا العسكر نسمع لحناً ... ديل إحنا .. ومالو الله كريم علينا (Re: خالد علي محجوب المنسي)
|
Quote: متابعة لصيقة
.
.
.
فى حضرة هذا العطر الفواح |
بحضوركم أخي يوسف محمود تستمد الروح عبق أهلنا الحُنان ونجاض
نتمثل بهم علَّ ننجع من البلد التي سنحت سحنة أهلها وطغى فيها المكر
الاحتيال وعلَّ الناس ترى كيف أهلهم ويختو الرحمن في قلبم ويرجعوا
لكل فضيلة في الأجداد
الأبت تبقى الاولاد
نسيتا كل مكارم العابرين
المعاهم راقدا في شبرين
بقت أمجادنا كانوا زمان
كانوا زمان
ليه من نتشبه بهم وننبذ كل دخيل علينا البخلينا نجري جري والوحوش ونحن عارفين غير رزقنا ما بنحوش
للولد آجنى ارجع وكون الدخري لاهلك بالكريمة الحلال
للبنية ختي قلبي بين شطورك وأنظري كيف كان سلفك
وأنا محتاج لهذه الوصية
الفضيلة سمحة والبسوي السمح برقدلّو
تسلم يا يوسف محمود
وبنقول ليك
يسلم يوسف الليلة ونهديك
حديث في الولد البحمي عرضو
| |
|
|
|
|
|
|
|
|
|
Re: كلما اخفقنا في حب وكلما عصرونا العسكر نسمع لحناً ... ديل إحنا .. ومالو الله كريم علينا (Re: خالد علي محجوب المنسي)
|
أبواتك بحلو القاصد
البلد دينا ....
يا أبـ حنكاً بليغ
الكلمتو مي لينة
مو لُقاط طرف ...
جدك بدخل الوكرة
والولي هينة ...
وبحل كاتل الزمم
لا شهادة لا بينة
مو لُقاط طرف ...
من صفات القائد
الشجاعة
الكرم
البلاغة في الحديث
حُسن الرأي
محدحت الأخت أخاها فقالت تذكره ان ابواتك
قالت ابواتك وتقصدابوه واعمامه وأخواله وأجداده
كان أهل خير وصفات حميد وكانوا يحلوا الدين عن المدين أن قصدهم وجاء لكي الحلو
أبواتك بحلو القاصد دينا
يا أبـ حنكاً بليغ
الكلمتو مي لينة
وتعني انه كان فصيح في إدارة الحديث في المجالس وكلمته مسموعة
كلمتو مي لينة وتعين انه كلمة ورأيه دوام السديد والصاح ونجيض مو ني ولين
ومو لينةتعني بها كلمته مسموعة ورأيه ماضي ونافذ
جدك بدخل الوكرة
والولي هينة ...
وبحل كاتل الزمم
لا شهادة لا بينة
وتهني ان اجدادك كانوا أهل شجاعة وفي الحروب هم من يشقو صفوف العدو ويتوكروا في الاعماق ( الوكرة والولي هينة )
وهم كذلك اهل رأي ولهم كلمتهم حتى في اصعب الأشياء قتل النفس التي عليها القصاص يمكن أن يحلو صاحبها ومرتكبها ولا يطالبون بشهادة ولا بينة من قبل القضاء فقط كلمتهم تكفي ( واصلين )
| |
|
|
|
|
|
|
|
|
|
Re: كلما اخفقنا في حب وكلما عصرونا العسكر نسمع لحناً ... ديل إحنا .. ومالو الله كريم علينا (Re: وضاحة)
|
Quote: يااااااااااااااه يا مك
عليك ابواتى ما تقبف كلو كلو
ياخى دى الحاجات البتخلينا نحس انوا السودان لسة سمح وبخير
نسوان الدوحة مليانات كشكوش ههههه
نادية دى لسة بتمشي حفلات شي عجيب هههههه
انصاف دى عجيب ياخى شوف دى ههههههههه |
قلابة كشكشي لي
حلاوة النوقشي
منقوشة بي الكروشي
والسكر الحبشي
طوالي لي
تسلمي يا شمس المشارق مع اني زعلام منك
وعاملة لي
قام يتعزز الليمون
عشان بالغنا في ريدو
وتجي تدينا حقنة كل 15 يوم
حقن الملاريا يومياً يا دكتورة
وارجوك يا صاحب سيادة
قليل مراهم من العيادة
البعرض دا انا لكن ما جابوا صورتي في حل دبي
| |
|
|
|
|
|
|
|
|
|
Re: كلما اخفقنا في حب وكلما عصرونا العسكر نسمع لحناً ... ديل إحنا .. ومالو الله كريم علينا (Re: خالد علي محجوب المنسي)
|
| Quote: انصاف دى عجيب ياخى شوف دى ههههههههه |
يا وضاحة هذه أغنية قديمة جداً وهي من أغاني السباتا
ومن تأليف البنات
وأغاني السباتا مجهولة الشاعر
كل بنت تعرف الشعر تضيف لها مقاطع
يعني الأغنية تؤلف في نيالا لما تصل شندي بتكون بشكل مختلف
وكانت ايامها البنت لا تزوج إلا لابن العيلة نفسها
ابن العم
ود الخال
وابن الجد ( بي اللفة مو جد عديل )
ولكن ابن الخال لم يكون ايامها حبو بي الجوال لكن كان
ود الخال الديمة مشغول بال
ولا تحب ان تنتظر مجئ والدها من سفره
وتريد تتزوج في غيابه وحتى لو يكون عرسها بي حليب بخبز وحليب بقرة
ولا تريد وليمة حتى وكل هذا حتى لا تنتظر والدها الذي سوف يجبرها على ابن العم
| |
|
|
|
|
|
|
|
|
|
Re: كلما اخفقنا في حب وكلما عصرونا العسكر نسمع لحناً ... ديل إحنا .. ومالو الله كريم علينا (Re: خالد علي محجوب المنسي)
|
أنا قولي ليكا وجيب
شدو لي وركب
وفي شباحو أديب
مو لُقاط طرف
وجلسنّلو البنات
قفنلو بي الترتيب
وعشمانة الكريم
رجايا فيك ما يخيب
مو لُقاط طرف ....
تقول له انا لو قلت ولو شكرتك يا اخوي قولي فيك واجب علي إت أخوي
شدو ولي ركب
وفي شباحو أديب
وكما ذكرنا الشباح جاي من شبحة ( شبح خطأ أو رفع رجله بخطوة ) ويقال فلان شباح اي سريع في مشيته أو ركضه )
الشباح قد يقصد بها الرِكاب في سرج الفرس ( وهو حديدتين فيها فتحة تتيح للقدم ان تستقر فيها وتثبت ) وفائك الرِكاب او الشباح يثبت الفارس على ظهر الفرس لكي لا يسقط ويكون الشباح أو الرِكاب مثبت على سرج الفرس بطريقة محكمة حتى يضمن ان يكون من يركب على ظهر الفرس ثابت فيه ...
في شباحو اديب تريد ان تقول انه كان كامل الأدب وحتى عندما يشبح ليركب الفرس يركب بكل أدب يليق بمقامه بين الناس
وأيضاً يستقيم المعنى لو أخدنا الشباح هو بمعنى شبح اي رفع رجله لكي يركب ويستعين بالرِكاب ليستقر على ظهر الفرس
ويكون انه وحتى شبحته ليركب كانت مؤدبة وبأدب
وجلسنّلو البنات
قفنلو بي الترتيب
كان عادة البنات في بيوت العرس أو الختان في الحفل الجلوس في سباتا
وهنا تقصد أن أعناق البنات كلهن تتشابا للفوز بأعجابه فوقفن مترصات في الثباتة
ولسان حالهنيقول يا رب أنا الأقع في عينو
وعشمانة الكريم
رجايا فيك ما يخيب
ثم تعود وتتمنى أن لا يخيب رجاءها في الكريم الله جلَّ في شأنه أن يكون أخاها كما تمنت له
الغريب في الأمر في قناة الشروق
كتب على الشاشة مرة ان هذه القصيدة من كلمات الشاعر الجاغريو
لا علم لي من شاعرتها لكن المفردة تدل أنه قول أمرأة وحتى لو كان الجاغريو فأنه كتبها على لسان مرأة
والشئ الثاني الأغنية قديمة جداً
والجاغريو عاش في الستينات والسبعينات وظهرت شاعريته
ليس هدفنا من هو شاعر الأغنية لكن لو كان هناك من هو متأكد ليؤكد لنا المعلومة
أنا الذي يهمني تجريد المفردة من التعقيد ليسهل فهما
| |
|
|
|
|
|
|
| |
خالد علي محجوب المنسي
عزالدين عباس الفحل
وضاحة
الطيب شيقوق
فيس بوك
تويتر
انستقرام
يوتيوب
بنتيريست