|
|
 Re: كلما اخفقنا في حب وكلما عصرونا العسكر نسمع لحناً ... ديل إحنا .. ومالو الله كريم علينا (Re: خالد علي محجوب المنسي)
|
كان الغناء في زمان بعيد فقط تردده النساء
وقد فاق صيت الفنلنة المعروفة من كبوشية
الحمرا
وكانت تشعر وتلحن وتغني الدلوكا
وشاهد لها قصيدتها المحبوبة لكل الناس
سيد محكر الديوان
والتي نظمتها في الحسن ود ضبعة ( من الجوير ) غرب شندي
وسوف نعود لغناء الحمرا بشئ من التفصل
لكن في تلك الايام بدأ يغني فنان معروف في شندي وضواحيها
هو الفنان ود النزيها
ود النزيها من قرية ساردية ( الشقالوة ) شمال شندي وهي اول قرية والآن اصبحت من أحياء مدينة شندي بعد أن تم ضم اقرب قريتين للمدينة ( واصبحت أحياء في المدينة وهي الشقالوة وحلة قريش )
عمل ود النزيها بالزراعة وتربية الماشية وهو شاعر له القصائد كثر ومعروفة وبعض منها فاق حدود شندي بفضل الفنان علي إبراهيم اللحو
أغنية ( الكنينة )
الكنينة يا رُطب الجنينة
ألله لينا
الكنينة الدار أخمجيها
الكنينة والروبا تليها
الكنينة وخلق الله انجضيها
الكنينة والدنيا شن فيها
بنريدك ونموت نخليها
نحن إنكوينا
رحم الله الفنان المبدع الجميل ود النزيها
| |
  
|
|
|
|
|
|
|
|
Re: كلما اخفقنا في حب وكلما عصرونا العسكر نسمع لحناً ... ديل إحنا .. ومالو الله كريم علينا (Re: خالد علي محجوب المنسي)
|
كما أسلفنا رحل اللحو من شندي في ذاكرته بعض من أغاني المنطقة
تغنى بها في العاصمة فوجدت القبول
اغنية
الكنينة
وغزلية
هذا نص أغنية غزلية
غزلية وين الرايقا
يا فنية نار الليلة
غزلية يا فرع المحلب الفواح
غزلية كل الشافو جنَّ وراح
الزول الكلام صراح
إن ما كتلني مابرتاح
غزلية يابا العبيد ود ريا
غزلية ويالبادراب بنية بنية
غزلية يا باسبار ابوالعونية
جاني مسرّح القادرية
عوّد لي سهر عينيا
غزلية يابا الشيخ حسن يا الزين
يا غزلية قوليها الملاقا متين
ومتين العين تشوف العين
دي الدُقاق علي العاشقين
وزي الأزهري اسماعين
غزلية يوم ودوني للعملية
غزلية جا الدكتور يشرح فيّا
غزلية وقال الكبد مهرية
وكل اسبابي ناس علـــوية
غزلية سيدي الحسن يايابا
غزلية دي التميرة قامت دابّا
وفوق الدارا دي اللعابا
وزي الفتحت تُقابة
| |
|
|
|
|
|
|
|
|
|
Re: كلما اخفقنا في حب وكلما عصرونا العسكر نسمع لحناً ... ديل إحنا .. ومالو الله كريم علينا (Re: خالد علي محجوب المنسي)
|
ولاغاني الدلوكة والسوط ( البطان ) في تلك المنطقة معاني تراثية موروثة
هناك من يعتبر دق السوط جهل وغياء
وهناك من يعتبره تلذذ بالعذاب
وهناك من يعتبر كذا وكذا
هي عادة كانت لها معانيها في الماضي ايام القبلية
وكل قبيلة بتعمر بي فرسانها
وكل اسرة في القبيلة جاها وفخرها بنوها من الذكور
لذا كان يجرق الأولاد من هم صغار على تحمل المشاق وكان السوط واحد من مقايس التحمل
والبحمل السوط ويقيف ثابت حيطة وما بزح ويرمش بحمل كل قاسية وصعبة
لم تكن تلك هي عادة جعلية كما يزعم البعض انما هي عادة مثل غيرها انتشرت بين قبائل السودان كافة هناك من اجزم ان السوط في بعض قبائل الجنوب كان موجود
في منطقة شندي انتشرت هذه العادة وارتبطت بغنى الدلوكا
وبما ان غنى الدلوكا فيه شئ حماسي ويحرك الحماسة في النفس ارتبطت هذه العادة بالجعليين اكثر
ونسب لهم انها هي عادتهم لكن هذا حديث منافي للحقيقة
نعم تمسك بها الجعليين أكثر من غيرهم لكن هناك مناطق من شمال كردفان ( بقارة وابالة ) ومناطق النيل الأبيض شرقه وغربه مازالت عادة البطان موجودة عندهم وفي بعض مناطق الجزيرة ومناطق الشايقية
ومناطق اخرى
وقد قال محمد ودبادي العكودابي في البطان كلام جميل يسر العين
سوف نرد بعض منه ومع شرح المفردات الصعبة
| |
|
|
|
|
|
|
|
|
|
Re: كلما اخفقنا في حب وكلما عصرونا العسكر نسمع لحناً ... ديل إحنا .. ومالو الله كريم علينا (Re: خالد علي محجوب المنسي)
|
هوى يا وليد ...
حصل صحاك عز الهجعة
صوت شتماً بعيد مخنوق
وجاتك شخرة الطنبارى
مشتاقاً يسوى القوق
ونومك طار واتقسم
والرشرش صبح مفروق
واتلفحت نص من توبك الجرجار
على الدلوكة سايق سوق
وتلقى هناك بنات بلدك ولاد بلدك
يعلو الصفقة تقدح فى القلوب الشوق
ونغم الفال ابشرن يا بنات بالخير
والجنيات تطير لا فوق
وكم زغرودة تتفجر
تفور بالناس بعد ما تروق
يعوم الوز صدورو تشابى
للمجهول وما بتضوق
تميل زينوبة زى البان
يمين وشمال تودى الطوق
واخوان ام شلخ ينكبو جوه الداره
زى صقرا نزل من فوق
ضرب الصوت والركزة بيفرق الناس
عشان زينوبة ما بتحوق
وعاد تتحزم الجنيات
وتتنظم تقيف في روق
وكل واحد يهز ضرعاتو
والحجبات تزح لافوق
جفير الخوسة فايت الكوع
وسيرو مع العضل مطبوق
والطاقية تحت الحاجب المعقود
هدية أم زين وما مشرية من السوق
ويتقدم عريس السمحة رافع صوتو
كان بسوقوا بيهو النوق
والعنجاوى ينزل فوق ضهورن
بس تقول منشحطة فيهو بروق
يبدا مجرو بالترقوة ويتحدر
مع الضلع القصار ملصوق
واحمر عين يشم الدم بعد ما يرش بنات
عمو ويزيدن شوق
وثابت حيطة لا بتهز ولا بتلز
وصارى جبينو كلو عروق
وقال بعد العقد طلقانة ما يحجزوهو
إلا يخلو ضهروا شقوق
هناك الحال مغير جد
وهيجة الناس تفوت الحد
وكان حجازو مد الليد بتسمع كع
| |
|
|
|
|
|
|
|
|
|
Re: كلما اخفقنا في حب وكلما عصرونا العسكر نسمع لحناً ... ديل إحنا .. ومالو الله كريم علينا (Re: خالد علي محجوب المنسي)
|
الكنينة للشاعر
ود النزيها ألحان ود النزيها
الكنينة .. الكنينة
الكنينة يا رُطب الجِنينة
الله لينا ....
الكنينة الدار أخمجيها
الكنينة والروبة تليها
الكنينة واخلق الله أنجضيها
الكنينة الدُنيا شن فيها
الكنينة بريدا ونموت نخليها
كُر علينا....
الكنينة يا شتلة يا دُقاقة
الكنينة يا النارك حراقا
الكنينة وخلق مُشتاقا
الكنينة الدُنيا فراقا
بنريدك متين بنتلاقا
تعومي لينا ....
الكنينة الكنينة بت بلة
الكنينة وأدي الشعر تلّا
الكنينة نجضتي خلق الله
الكنينة في نارا بتقلّى
بريدك أدي العشوق طلّا
والريشا لينا
الكنينة وقلبي داب حِتا
الكنينة وفارقتا لي الجِتا
الناجضنا في شندي المحطة
الله لينا ....
الكنينة يا شبه الأرايل
الكنينة يا المحلب الشايل
الكنينة غِصينك المايل
الكنينة ما هماني في القايل
بريدا وفيها الثمار شايل
نحن إنكوينا
الكنينة الكنينة يا بت مالك؟
ناجضا الخلق مالك
الكنينة أديني شبالك
الكنينة ختينا في بالك
بنريدك والدنيا دايما لِك
نحن إنتهينا
| |
|
|
|
|
|
|
|
|
|
Re: كلما اخفقنا في حب وكلما عصرونا العسكر نسمع لحناً ... ديل إحنا .. ومالو الله كريم علينا (Re: خالد علي محجوب المنسي)
|
واشتهر ود النزيها
بمظهره البسيط
سروال ابيض طويل وقميص بلدي ( عراقي )
ومركوب والتوب الذي ميزه
كان يجول في غناه ولا يقف في مكان واحد
كان يغني من غير مايكرفون وصوته جهور يسمع القريب والبعيد
وأغاني الدلوكا كانت تحرك مشاعر الحضور وللأن تحيس عندما تهبق الدلوكا ويخلف الشتم
تحس انك بين السماء والأرض وما تطيق القعدة ان كنت جالس
فلا تلوموا من ينزل كتين يهوش ليخد لي سوط يبرد ماهاج من مشاعر داخل جسده
وزي ما قال عمي تاج السر طه ود محمد ود إبراهيم
الدلوكا لما تهبق الحُمار بتجي شعرانية
لم اجد نموذج للغنا الدلوكا عند ود النزيها
لكن أغاني الدلوكا في تلك المنطقة يتعاقب الفنانين والمطربين اللذين إهتموا بغنا الدلوكا
مثال المطرب محجوب كبوشية
| |
|
|
|
|
|
|
|
|
|
Re: كلما اخفقنا في حب وكلما عصرونا العسكر نسمع لحناً ... ديل إحنا .. ومالو الله كريم علينا (Re: خالد علي محجوب المنسي)
|
العزيز قرحطب فور
لك التحية والشكر
كنت ببحث عن هذه الأغنية ( سيد محكر الديوان )
وسوف تنال منا كل اهتمام
لانها من أغاني المشهورة في تلك المنطقة
وعندما اقول تلك المنطقة اقصد
المنطقة من البسري للسبلوقة
وان كان قد تعمقت شمالاً حتى منطقة الباوقة وما جاورها
والبسري : هو نهر عطبرة وكما يحلو لسكان تلك المنطقة تسميته الأتبراوي
السبلوقة: هو الشلال السادس ( شلال السبلوقة )
وفيهاومنها اشتهرت وانطلقت الأغاني ( أغاني الدلوكا )
وحتى لا يختلط الأمر على بعض الناس أغاني الدلوكا بشكلها هذا
التقيل
الخفيف ثم الأخف احياناً
وسوف نعود لنعطي هذه الأغنية ( سيد محكر الديوان حقها ) بإذن الله لو مد الله في عمرنا
ولك الشكر مجزول أخي
قرحطب فور
| |
|
|
|
|
|
|
|
|
|
Re: كلما اخفقنا في حب وكلما عصرونا العسكر نسمع لحناً ... ديل إحنا .. ومالو الله كريم علينا (Re: خالد علي محجوب المنسي)
|
من بعد الله راجينك خلق بتحرّو
ياك ضرع اليتامى الما غرز يوم درّو
شباع الجِياع يا توب شتاهم وقرّو
بتكسر جبرة العديلو ليكا بقرو
ماك رعديد ويوت لله أهلك يفرّو
يا هاش هجعة الليل البتعرف سرّو
ومن بعد الله راجينك خلق بتحرّو
يا ضرع اليتامى الما غرز يوم درّو
راجينك تعابا وكت زمانُن يضيق
وزي القبلي هطال لا بتكل لا تفيق
سليل الكندي يا البيك التليد وعريق
بيت الحِكمة بيتك لا بتضر لا تعيق
ومن بعد الله .......
دا ماسك دربو لا ضلَّ الطريق لا تاه
وكامل يا أبـ كمال إلا الكمال لله
من تبيت مشيت في بيت قبيلة وجاه
في هيبة وجلال فوخة الملوك الشاه
ومن بعد الله ......
ياود القداسة وقفت ملك الحيرة
خليت بي وراك بذرة وتساب ودميرة
لا خوف من قواسي ولا مِحن بضيرا
لحدك في الجِنان بستانوروضة نضيرة
ومن بعد الله .......
الخفيف ......
كُل البلد تهابو يا قاصدين تذابو
مابتعرفو لي طرايقو
صدر الكور حمي وفوقكم طلق نارو
الليلة أبـ كريق فوق القيوف سدّر
بلعب في مخاضتو لقاها ما بِتتخل
زرعوك يا العُشاري وتجرو وفضّل
وياجبل المِلكي رحل الحكل سطل
وياحجر الزلط كُل البباينو نعل
وصدر الكور حمي .....
وفوقكم طلق نارو.....
يا رحل الكُحل الغلب الجِمل بي الشيل
ويا إيد الحسين اللي هداو يسيل
وكت الهجعا جاتو، أنتَّ بتعدل الميل
وللجار والعشيرة فاقداك هويتا الليل...... هويتا الليل تنطق هكذا لكن يقصد بها هويدة الليل اي نص الليل
وصدر الكور حِمي
وفوقكم طلق نارو
إنتَّ يا الخزين دخراكا لي أولادي
ويامطر السواري الصبا مترادي
إن جاهو العشير مابصدّو لي غادي
بتدخل وليتّو في بيتو ما بحاجج
وصدر الكور حِمي
وفوقكم طلق نارو
| |
|
|
|
|
|
|
|
|
|
Re: كلما اخفقنا في حب وكلما عصرونا العسكر نسمع لحناً ... ديل إحنا .. ومالو الله كريم علينا (Re: خالد علي محجوب المنسي)
|
شاعر/ شاعرة الاغنية
لا أعلمه
لكن اشتهرت في تلك الفترة وجل اغاني الدلوكا وأغلبها من أشعار نساء
وقد حازت بنونة بت نمر قصب السبق في شعر الحماسة الفخر ومن بعدها كُثر
ثم جاءت الحمرا بت كبوشية وكان لها الكم الهائل من شعر أغاني الدلوكا
قد يكون شاعرتها مرأة وقد يكون رجل
لكن أناالذي يهمني توضيح معاني ما قيل فيها
ويا حبذا ما كان له علم من قال وفي من قِيلت ليسعفنا بمعلومة
وله منا الشكر أجزله
من بعد الله راجينك خلق بتحرّو
ياك ضرع اليتامى الما غرز يوم درّو
شباع الجِياع يا توب شتاهم وقرّو
بتكسر جبرة العديلو ليكا بقرو
ماك رعديد ويوت لله أهلك يفرّو
يا هاش هجعة الليل البتعرف سرّو
ويظهر من صيغ الكلام في القصيدة صحة عقيدة من قال
لم تقل انت راجينك خلق بتحرّو
لان التوكل لغير الله لا يجوز
فقال من بعد الله وان الله سخرك لمن دعاه أن يرزقه (والله ما بيدي من اليد لليد )
من بعد الله راجينك خلق بتحرّو
بتحرو : اي عشمانين ومنتظرين كرمك وعطاك
بتحرى الشئ يترغبه
ضرع اليتامى : الضرع هو الثدي في البهائم
وضرع اليتامى تقصد يها مصدر زادهم ورزقهم ان جعله الله عن طريقه
شباعالجِياع ياتوب شتاهم وقرّو
القر : هو البرد القارس الشديد
توب شتاهم : غطاهم في وقت البرد الشديد
الرعديد: هو الصعلوك فاعل الموبقات السبع ومابرفع
يوت : اي دوماً
لي الله أهلك يفرّو
تقصد ان اهلك اب عن جديد كان أهل دين وعلم ومخافة من الله واهل تقوى وورع
يا هاش هجعة الليل البتعرف سرّو
وتحمل في كلامها معنين انك يا من تقيم الليل والناس نيام وانت تعرف سر قيام الليل
وقد تقصد به انه يتفقد المحتاجينوالناس نيام حتى لا يستحوا من مساعدته ولا يراهم أحد وهو يساعدهم
| |
|
|
|
|
|
|
|
|
|
Re: كلما اخفقنا في حب وكلما عصرونا العسكر نسمع لحناً ... ديل إحنا .. ومالو الله كريم علينا (Re: خالد علي محجوب المنسي)
|
دا ماسك دربو لا ضلَّ الطريق لا تاه
وكامل يا أبـ كمال إلا الكمال لله
من تبيت مشيت في بيت قبيلة وجاه
في هيبة وجلال فوخة الملوك الشاه
ماسك دربو لا ضلَّ الطريق لاتاه
تقصد أنه ماسك درب ابواتو في الدين وما ضلَّ منه
وكامل يا ابـ كمال
إلا الكمال لله
وهنا ايضاً تظهر العقيدة الصحيحة لشاعر او شاعرة القصيدة
انها ارادت ان تصفه انه كامل في حياته إلا أنها او انه رجع وقال
وحتى الذي يكون كامل يجعل فيه نقص حتى يتفرد الله العلي بالكمال
وهنا نرى قمة صحة العقيدة رغم بشاطة من كتب القصيدة
ومن تبيت مشيت في بيت قبيلة وجاه
وهنا فخر تفتخر انه الممدوح من بيت جاه وعز
وفيك هيبة وجلال الملوك والأمراء
الفوخة: الفخامة
| |
|
|
|
|
|
|
|
|
|
Re: كلما اخفقنا في حب وكلما عصرونا العسكر نسمع لحناً ... ديل إحنا .. ومالو الله كريم علينا (Re: خالد علي محجوب المنسي)
|
ياود القداسة وقفت ملك الحيرة
خليت بي وراك بذرة وتساب ودميرة
لا خوف من قواسي ولا مِحن بضيرا
لحدك في الجِنان بستانوروضة نضيرة
تفخر مرة اخرى
يا ود القداسة انت سوايت ملوك الحيرة في مقامك
والبيت الجاي هذا منأجمل بيوت القصيدة
خليت بي وراك بذرة وتساب ودمير
هنا يتضح لنا ان الممدوح مات وهذه القصيدة ( هي مناحة ) ورثاء له
خليت بي وراك : اي بعد رحيلك
بذرة : اي اراضي زراعية منتجة ويعيش منها اهلك
تساب : فيض وفيضان
الدميرة هي اوج اوجه الفيضان
وتقصد : انك لم تترك من كانوا ترعاهم دون شئ بل تركت لهم فيض من من كثير
| |
|
|
|
|
|
|
|
|
|
Re: كلما اخفقنا في حب وكلما عصرونا العسكر نسمع لحناً ... ديل إحنا .. ومالو الله كريم علينا (Re: خالد علي محجوب المنسي)
|
Quote: كُل البلد تهابو يا قاصدين تذابو
مابتعرفو لي طرايقو
صدر الكور حمي وفوقكم طلق نارو |
الخفيف
كل البلد تهابو : اي تخافه وتعمل له حساب
يا القاصدين تذابو
تذابي الشئ : اي تصل لمستواه وماهو عليه ( لو كان شجاع وقوي او محسن : اتصل وتبقى له ند ومثيل )
فالشاعرة تقول لهم : مابتعرفو لي طرايقو اي الطريق السلكو وعر وما بتقدروا علي
صدر الشئ اي أهم منطقة فيه
صدر المجلس :هو مكان جلوس الأعيان والكبار
والصدر مقدمة المكان او الشئ
الكوور : هو التنور
حمى : اي حرا ######ن واتلتهب بلهبه
| |
|
|
|
|
|
|
|
|
|
Re: كلما اخفقنا في حب وكلما عصرونا العسكر نسمع لحناً ... ديل إحنا .. ومالو الله كريم علينا (Re: وضاحة)
|
الليلة أبـ كريق فوق القيوف سدّر
بلعب في مخاضتو لقاها ما بِتتخل
زرعوك يا العُشاري وتجرو وفضّل
وياجبل المِلكي رحل الحكل سطل
وياحجر الزلط كُل البباينو نعل
وصدر الكور حمي .....
وفوقكم طلق نارو.....
ابــ كريق : هو التمساح
القيف : طرف في البحر ( النيل )
القيف في النيل هي مراقد التماسيح
المخاضا : هي المكان هي المكان الضحل اي يمكن للشخض ان يخوضة خواضة مو عوم
ما بتتخل اي لا يمكن ان يتركها ويخليها
وهذا البيت ايضاً جميل وفيه بلاغة عالية
وتقصد
( وسمته العشاري ) والعشاري هو التمساح لانه طوله بكون اقله عشرة امتار ( طويل )
انت كفيت ووفيت في كل شئ كما البضاعة الوفيرة تاجروا فيها ورغم كدا فضلت
في الشجاعة كفي ووافر
في الكرم مكفي ووافر
في الشهامة والرجولة وغيرها من الصفات الكريمة مكفي وموفي
وانت قاسي وقوي متل حجر الزلط كل البقيف في طريقك اتنعل وما سمَّى واتشهد
| |
|
|
|
|
|
|
|
|
|
Re: كلما اخفقنا في حب وكلما عصرونا العسكر نسمع لحناً ... ديل إحنا .. ومالو الله كريم علينا (Re: خالد علي محجوب المنسي)
|
Quote: من أجمل الاغاني السمعتها
وبتخلين احس انوا السودان جميل والرجل السودانى مميز وغير |
يا وضاحة ديل رجال ولّوا وذهبوا
واصبح من تشبه بهم فقط وحتى لو لم يدانيهم وهذا من المستحيل قد فاز ويمكن أن نطلق عليه لفظ رجل
لان هناك فرق كبير وشاسع بين والرجولة وبين الذكرية ( وبين كل مخلوقات ذكر )
وقال ودبادي
كل فضيلة في الأجداد
أبت ما تبقى في الأولاد
وكُل فضائل العابرين
معاهم راقدا في شبرين
وبقت امجادنا كانوا زمان
قيلت هذه القصيدة في ناظر العبيدية ( منطقة شمال بربر )
وهو الناظر مختار
ونظمتها فيه اخته
عرش دود مراقد السار
مو فشار
سمحة الهيبة فوق مختار
الدود هو الأسد
السار هو الصخور الصلدة
مو فشار : اي مو فوجاج ... ويقول انا سويت وانا عندي وانا بسوي
سمحة وخايلا الهيبة الجاه في مختار
لك الشكر وضاحة على هذا الجمال
| |
|
|
|
|
|
|
|
|
|
Re: كلما اخفقنا في حب وكلما عصرونا العسكر نسمع لحناً ... ديل إحنا .. ومالو الله كريم علينا (Re: خالد علي محجوب المنسي)
|
يا رحل الكُحل الغلب الجِمل بي الشيل
ويا إيد الحسين اللي هداو يسيل
وكت الهجعا جاتو، أنتَّ بتعدل الميل
وللجار والعشيرة فاقداك هويتا الليل
وصدر الكور حِمي
وفوقكم طلق نارو
الكُحل : حجر معين اسود يطحن وتزين به العيون وهو ايضاً علاج للعيون
والكُحل تقيل في الوزن
وهنا فخر وتفخر بالممدوح وتقول انه تقيل في كل شئ من صفاته وحتى وزنه صار مثل الكُحل لانه تقيل على الجمال حتى في حمله
غلب الجِمل بي الشيل
ويا إيد الحسين : اي يد المحسن التي تسيل دوماً بالخير
الهجعة : هي منتصف الليل والناس نيام
يعدل الميل : اي بسد ويداوي كل مشكلة
يعدل اي يرجع الشئ لمكانه الأول لو إثنّى ومال
وهنا معناه برقع ويساعد
وانت يا البتفقد الجار والبعيد وكت منتصف الليل ( هجعة )
| |
|
|
|
|
|
|
|
|
|
Re: كلما اخفقنا في حب وكلما عصرونا العسكر نسمع لحناً ... ديل إحنا .. ومالو الله كريم علينا (Re: خالد علي محجوب المنسي)
|
إنتَّ يا الخزين دخراكا لي أولادي
ويامطر السواري الصبا مترادي
إن جاهو العشير مابصدّو لي غادي
بتدخل وليتّو في بيتو ما بحاجج
وصدر الكور حِمي
وفوقكم طلق نارو
الخزين اي المدخور ليوم الحاجة
داخراك لي أولادي
مطري السواري : هناك تسمية لانواع الامطار باللهجة السودانية
الطرفة .. المطيرق .. السواري .. وغيرها
ومطر السواري غزير
العشير : اي الصديق
مابصدو : اي ما برجعه ويصده
وليتو : هنَّ حرماته من زوجة وبنت
ما بحاجج : اي لا يكثر من الحجة والكلام في الشئ لا ونعم يبقى ولا لا
| |
|
|
|
|
|
|
|
|
|
Re: كلما اخفقنا في حب وكلما عصرونا العسكر نسمع لحناً ... ديل إحنا .. ومالو الله كريم علينا (Re: خالد علي محجوب المنسي)
|
هواك وهواي بي جاروا
سبن أفكاري نظراتك
أحب تعطف تزيل وجدي
وأحب كل البحب ذاتك
أحب لونك أحب نونك
أحب يا حبي نفحاتك
وأحب في خدك الزهرة
وأخاف ترميني لمحاتك
أحب قربك أخاف بعدك
اشوفك بين دوحاتك
أخاف صدك أخاف جورك
أحب تتهنّى بحياتك
أحبك حبي للعافية
كمان يا سيدي وحياتك
أحب فيك الهوى العُذري
وأذوب من حالي في حياتك
إذا في حبكم ضعتَّ
إذن أقبر في ساحاتك
أكون للحظ دوام شاكر
أقبل أمتى راحاتك
شعاع الشمس من نورك
زهور الروضة وجناتك
سكرتا وتهتا دون خمرا
وكان أسبابي لجناتك
حلاتك حلاتك يوم أراك رافل
في منصب عز في جناتك
وأشوفك زي بدر كامل
وبيكا تنور دُجناتك
زيد يا دمعي في الهملان
وزيد يا صدري زفراتك
حبيبك ودعك راحل
وزيد يا طرفي عبراتك
حمام الأيك حين مرا
تعال أسمعني نبراتك
طريت أم در مقر أهلي
يا زماني كفاي عباراتك
| |
|
|
|
|
|
|
|
|
|
Re: كلما اخفقنا في حب وكلما عصرونا العسكر نسمع لحناً ... ديل إحنا .. ومالو الله كريم علينا (Re: خالد علي محجوب المنسي)
|
هذه الأغنية فيها مشاعر ما عادية
ولابد أن نقف عند كلماتها
Quote: هواك وهواي بي جاروا
سبن أفكاري نظراتك
أحب تعطف تزيل وجدي
وأحب كل البحب ذاتك |
كان الجور الغدر من هواه لها وهواه له قبل ان تهجره
هواك وهواي بي جارو
ومن يتحمل جور الهوى
فلو كان الجور من الحبيب نقول غدر وضحى بالحب الذي كان بيننا لكن عندما يكون الحبيب مجبور للهجر بعامل خارج من إرادته (الأهل مثلاً ) هنا يكون الجور قد وقع على الحبيب بحبه الذي احب به الحبيبة وبحبها الذي بادلته به هذا الحب محبة ... فإذدوج جور الحب ووقع على عاتقه
سبا اي اسر والسبايا كانت تكون في الحرب نساء تسبى
لكن قال الشاعر سبت نظراتك افكاري وإلتهب الحب في قلبي
احب تعطف وتحن حتى يزيل مابي من ألم الفراق المر
انا احببتك واحببت حتى التراب الذي تمشي عليه وبحب كل البحبك ويحب ذاتك
كما قال
الشاعر
احبها وتحبني ويحب ناقتها بعيري
ومن الحب ما قتل
| |
|
|
|
|
|
|
|
|
 Re: كلما اخفقنا في حب وكلما عصرونا العسكر نسمع لحناً ... ديل إحنا .. ومالو الله كريم علينا (Re: خالد علي محجوب المنسي)
|
Quote: أحب لونك أحب نونك
أحب يا حبي نفحاتك
وأحب في خدك الزهرة
وأخاف ترميني لمحاتك
أحب قربك أخاف بعدك
اشوفك بين دوحاتك
أخاف صدك أخاف جورك
أحب تتهنّى بحياتك |
أحب لونك وانا بحب اللون الخمري
احب نونك
النونة هيَّ (طفقة ) في الخد تظهر عند الإبتسامة وتزيد الإبتسامة والوجه حلا وزينة
أحب لونك اب نونك
وأحب يا حبي نفحاتك
كل ما ينفح من عطر من بدنك الغض اللدن
أحب في خدك الزهر واي زهرة ( زهرة حمراء ) وكيف تكون الزهرة في خد
هي حمرة من حياء وخجل
واخاف ان اصرع صريع بسبب لمحاتك
وعينك تكسر للحجر إن بقت شافتلّو
أحب قربك دوام واخاف بعدك وانت كنت معي وكيف الحال عندما أبتعدت صدق وحقيقة ؟
احب ان اراك بين دوحاتك وقد تكون الدوحات هنا الاتراب والله اعلم
الدوحة هي الشجرة الظليلة
رغم اني كنت اخاف صدك واخاف ان تجور عليَّ لكن مستحيل ان اقف عقبة في طريق سعادتك وحتى لو كانت مع غيري
احب تتهنّى بي حياتك
| |
|
|
|
|
|
|
|
|
|
Re: كلما اخفقنا في حب وكلما عصرونا العسكر نسمع لحناً ... ديل إحنا .. ومالو الله كريم علينا (Re: خالد علي محجوب المنسي)
|
Quote: أحبك حبي للعافية
كمان يا سيدي وحياتك
أحب فيك الهوى العُذري
وأذوب من حالي في حياتك
إذا في حبكم ضعتَّ
إذن أقبر في ساحاتك
أكون للحظ دوام شاكر
أقبل أمتى راحاتك |
أحبك حبي للعافية
والنفس مفتونة بحب العافية والصحة الكاملة وحبي ليك كحبي للعافية
واحب فيك الهوى العذري العفيف النقي الصادق
وادوب في حياتك
لو قدر الله ان حصل الذي اتوقعه وهو الفراق
فأعلم اني قبرت ومت في ساحاتك اي مكان دارك
لكن رغم هذا سوف اكون للحظ شاكر اني قبرت في مكان استطيع فيه ان تمشي علي راحة أرجلك
ونحن في السودان نسمي اسفل القدم راحة القدم
| |
|
|
|
|
|
|
|
|
|
Re: كلما اخفقنا في حب وكلما عصرونا العسكر نسمع لحناً ... ديل إحنا .. ومالو الله كريم علينا (Re: خالد علي محجوب المنسي)
|
Quote: شعاع الشمس من نورك
زهور الروضة وجناتك
سكرتا وتهتا دون خمرا
وكان أسبابي لجناتك
حلاتك حلاتك يوم أراك رافل
في منصب عز في جناتك
وأشوفك زي بدر كامل
وبيكا تنور دُجناتك |
[green]وحتى الشمس أخذت شعاعها الذي يطل علينا من نور وجهك حبيبي
وزهور الروض الجميلة الحمراء لونت خديك وكستها حمرة تجذب الناظر إليك
وهذا الذي حملني اكون مثل خامر عقله خمر ومع اني لم اشرب لكن بفعل جمالك سكرت وتهتا دون خمر
وسبب سُكري تلك اللجنة في حديثك وانت ترددها ثمح بدلاً من سمح
وا حلاتك ووا جمالك .. حلاتك يوم اراك وانت في موكب بين اترابك
وكأنك الملكة ذات منصب وجاه
واشوفك تتلألأ زي بدر اكمل الرابعة عشر من عمره ( بدر كامل )
وتنير لنا تلك الدجى والعتمة المظلمة
| |
|
|
|
|
|
|
|
|
|
Re: كلما اخفقنا في حب وكلما عصرونا العسكر نسمع لحناً ... ديل إحنا .. ومالو الله كريم علينا (Re: خالد علي محجوب المنسي)
|
ترك الجاغريو الديار وعشق بري
كان محب لبري وبي سببو
وكان مريد للاتحاديين ( ناس الشريف الهندي )
وتغنى لبري
وردد غناه واحبه أهل شندي وضواحيها
سمح الريد أذاني
سمح الريد أذاني
ومين العودة تاني
يا قلبي السراري
وفيك دافن أسراري
حبيبتك أبعدوها
سكنوها البراري
جاهلا قواما بانة
ولايكا الناس لُبانة
مابنقدر نعاين
رِمش العين سبانا
أصبح عقلي رايح
وكبدي رقد سرايح
مالك يا الحبيبة
مابتزوري الضرايح
مأذيني بي عيونو
وزي الدُر سنونو
حبيبي ما بخونو
في شندي الفوق سكونو
مازيدو الخشونة
سافرو وما غشونا
باريهم قُلوبنا
الحبايب الأوحشونا
| |
|
|
|
|
|
|
|
|
|
Re: كلما اخفقنا في حب وكلما عصرونا العسكر نسمع لحناً ... ديل إحنا .. ومالو الله كريم علينا (Re: خالد علي محجوب المنسي)
|
يا رائع جفيتني
وأنا ضايع ...
تعال لي ..
الخدو لال تعالي لي
دقايق قُلال تعال لي
مانع الدلال تعال لي
والحب حلال تعال لي
يا مزدهر تعال لي
وزينة الدهر تعال لي
في شاطئ النهر تعال لي
نعدي البحر تعال لي
الما شاف صروح تعال لي
وأشفي الجروح تعال لي
أنا ليّا روح تعال لي
قُبال تروح تعال لي
أضناني الجوا تعال لي
وشُتك دوا تعال لي
عارف الهوى تعال لي
والأرواح سوا تعال لي
يا الفي الشروق تعال لي
وأنا ما بروق تعال لي
انا ما بروق تعال لي
وبسمك بروق تعال لي
ظبي الحقول تعال لي
وسوي الوصول تعال لي
بين الفصول تعال لي
حبيبي الرسول تعال لي
| |
|
|
|
|
|
|
|
|
|
Re: كلما اخفقنا في حب وكلما عصرونا العسكر نسمع لحناً ... ديل إحنا .. ومالو الله كريم علينا (Re: خالد علي محجوب المنسي)
|
تمَّ دورو أدور
عمى نورو شال
فات الحلة نوّر
زي بدر التمام
واحدين قالوا نوّر
واحدين قالوا دوب
مروي ما بتنور
من يقوم يتهوّر
يبرى القيف هناك
تحتو الدابي كوّر
قالوا الكون إتطور
لا عاشق عفيف
لا جميل يتصور
الحسود يتضور
نارو ماكلا لسانو
كلو زور ومزوّر
الطريف الحوّر
دمي الما بروح
سيدو ليه يتجور
هزَّ شوقي وتوّر
يانديم أذاي
جُرحي المخفي غوّر
يا قليبي إتصبر
قوم وريني كيف
الكرام تتصبر
نحن ما بنتبر
النفوس إن حبت
تستحي وتتكبر
قام محمد بشّر
هزَّ فوق تيجانن
سلَّ سيفو وكبّر
نحن ما بنتفشر
نحن أسياد عِروضن
نحن يوم المحشر
لاك خبير تتخبر
في الزمان الفات
والجديد تتّبر
أوعى لا تتشبر
هل رأيتلك عاشق
بالغرام يتّبر
يا زميل إشطّر
شن بشوف في الدارا
اللحوحو مبطر
إبقى يومنا مطّر
حال الكون دليل
والفريق معطّر
النحر مغمر
والسباتا حارا
والمداس مبطر
الشعر مخمر
ينضح كلو ليل
عقرب المجمر
وكان يتغني بها علي الامين بي الرق وما احلاها
| |
|
|
|
|
|
|
|
|
|
Re: كلما اخفقنا في حب وكلما عصرونا العسكر نسمع لحناً ... ديل إحنا .. ومالو الله كريم علينا (Re: خالد علي محجوب المنسي)
|
خلي العيش حرام
خلي العيش حرام مادام أرى الموت يحين
مابين الرِميش فوق لي الطريف الكحيل
هزاز صدرو ميّل فدع الخصر المحيل
بالرجاج يقلع شبه المهر الوحيل
النوم منِّ فرَّ وقلبي ناوي الرحيل
من غير المنام طيف الخيال مستحيل
والاني إشتياقي وقلبي أصبح وجيل
تتملك محاسنك روحي جيل بعد جيل
بنخوض الرماح لو كان تزيد أو تقل
ونخاف ضميرو الأهيف المنفقل
بنقابل المدافع بالثبات والعقل
ونهاب سيف عيونو اللمعو يبرق صقيل
يا المنّك معار تكحيل شويدن الخميل
علمتَّ الغصون مع النسيم كيف تميل
مختارك يحاكي الشولة دمعو الهميل
والتختارو لي لا شك جميل ياجميل
| |
|
|
|
|
|
|
|
|
|
Re: كلما اخفقنا في حب وكلما عصرونا العسكر نسمع لحناً ... ديل إحنا .. ومالو الله كريم علينا (Re: خالد علي محجوب المنسي)
|
الفنان علي الامين له ابنان غنا واطربا اصدقهما
هما صلاح علي الامين ( في الحقيقة صلاح قد غنى في حفلات لكن حفلات خاصة كتير في نطاق العائلة فقط
وايضاً كان يغني في جلسات مع الاصدقاء فقط
البدري كان دفعتنا في الدراسة كان يغني لنا في الفصل في نطاق خاص شديد كنا اربعة اصدقاء
شخصي وجلال عمر الفضل وحسن التاج إبراهيم
وحكمة الله قد اخذا صلاح والبدر الكثير من والدهما عليه رحمة الله حسن الهندام والاهتمام الشديد بالمظهر
وكذلك هما يشبهان الفنان علي الامين في شكله كثيراً
رحم الله الفنان علي الأمين
| |
|
|
|
|
|
|
|
|
|
Re: كلما اخفقنا في حب وكلما عصرونا العسكر نسمع لحناً ... ديل إحنا .. ومالو الله كريم علينا (Re: خالد علي محجوب المنسي)
|
طار قلبي
طار قلبي
مني وقال ماهو عائد
مادام مفارقا
لي أرواحنا سايقة
طار قلبي
يا قلبي تعذيبك ماهو فائت
وأصبر عسى المحبوب أبقى جائب
قال ليَّ كيف أصبر وأنا جمري قائد
وكيف أنسى الغصن المن طبعو مائد
طار قلبي
إذن الوداع يا قلبي وحبيبي
أهلاً ضنايّا الحير طبيبي
فارقني حبي إرتاح يا رغيبي
ويا نجوم سعودي إتلاشي غيبي
وطار قلبي
دي المن دلالا دايماً وجولة
قاسية وطموحة نافرة وخجولة
شكت الألم من لمسات حِجولا
ليه بي بعادا الأيام عجولة
وطار قلبي
ما بنسلى ريدا مهما أذانا
بنعشق عفافا المازجا الرزانة
نهواها موتنا وأخر جزانا
آه لو تناجي قلوبنا الحزانا
طار قلبي
ضاعت قلوبنا الخلان نعوها
اسباب حُزنا ليه ما وعِوها
يا قلوبنا بي الصد لا تدعوها
وبتقول وداع وهيا ودعّوها
وطار قلبي
| |
|
|
|
|
|
|
|
|
|
Re: كلما اخفقنا في حب وكلما عصرونا العسكر نسمع لحناً ... ديل إحنا .. ومالو الله كريم علينا (Re: خالد علي محجوب المنسي)
|
سميري الفي ضميري .. وين سميري ؟
جميل يا الفي ضميري
وين سميري ...
الرسموك في ضميري
وين سميري ...
حبيب روحي أهديلّي
من عِنبك أديلّي
يا ملايكةعديلّي
أنانسيت مناديلّي
يازهرة أحلامي
بنظم فيك كلامي
نايح ودمعي هامي
يا وحي إلهامي
مع القِمري البقوقي
برسل ليك سلامي
نزلت مني دمعة
والأمة مجتمعة
واليوم كان جمعة
يا فارم الإمعاء
اعطف سيب صدودك
حبيب روحي يا ابو لمعة
شاتلا في قلبي غُمة
وصار مني ما لمّة
وبقيت في مهمة ..... ( اي بقيت أمري كله هموم وهم )
ياحبيبة ميعادك
اسعدني لو تمَّ
عيونو مبادراني
نظِرتو مودراني
ساهي وما دِراني
من لون جِسمو شايف
الكون بقى أسمراني
بعد ما كنتَّ هادي
في قلبي قدح زنادي
يا حظي كفاك عِنادي
بقيت كل يوم أنادي
للضوّا حليلّا نادي
دي البسماتا حاليَّ
مهذبا روحا عاليا
بس نظراتا غالية
في الحي الأمامي
جوار الإزبتاليا
هديلك جن تلاتا
وأعرفوا تومتي ياتا
البحلف بي حياتا
أهاجر ليها حافي
وأزور بيت الخياطا
أنظر شوف حلاتا
وظهرت بي غلاتا
نعسات كاحلاتا
أنا دستوري نازل
في الخرتوم تلاتا
لي أيام عديدة
من الناير خِديدا
المالكنا ريدا
أجمل غانية اشوفك
في الحلة الجديدة
لي أنغام جميلة
عيوني زرف هميلا
بسماتك جميلة
أهاجر ليها حافي
وأزور قوز الرِميلة
لي ست هي الودودة
ياقلبي هديك خدودا
والساعة معدودة
ازور القبة باكر
عشان أنظر خدودا
هي النقرت أجراسي
انا قلبي ميراثي
حنَّ الزهر باسم
أنظر شوف ديك بثينة
كمان شوف ديك محاسن
جلسن بي رزانة
لي فرح الحزانة
والاخلاق مزانة
طوّل بدري فادع
في فريع خِيزرانة
هجم الحب ملانا
في أجسامنا إبتلانا
بي سهامو والانا
وإضارا خلانا
أنا قلبي التركتو
شالو شريك أذانا
الحبيب البهوى لونو
وقلبي تزيد جُنونو
هو يزيد بي فنونو
أخدر لونو زرعي
واصفر تبري لونو
| |
|
|
|
|
|
|
|
|
|
Re: كلما اخفقنا في حب وكلما عصرونا العسكر نسمع لحناً ... ديل إحنا .. ومالو الله كريم علينا (Re: خالد علي محجوب المنسي)
|
| Quote: يا مك ياخى انت مبدع ياخى ربنا يخضر ضراعك ( من الفولدر بتاع جدتى ) |
وقيل كُل إناء بما فبه ينضح وقارورة الطيب والعطر تفوح دوماً بأشذى الروائح
لك كل الشكر على هذا الإطراء وهو من طبعك الأصيل
من فولدر حبوبتك ( الحمد الله ما قلتي جدتي كان ناس جبل أم علي طردوك وقالوا البنية مرقت برا جاتنا
تتكلم تنقليزي وتقول لي حبوبة جدتي )
Quote: يا الله على حسين شندى
حبيبتك سكنوها البراري يااااااااااااااااااا
اخضر زرعى لونوا زى الدر سنونو
حااااااااااااااااااالف ما بخونوا
وياتومى البريدو |
وأني لأعشق حسين علي جبريل ( حسين شندي فقط عندما يترنم بغنا وفن الدلوكا
وكم اقترحت ان يكون كله دلوكا يعكس تراث تلك المنطقة التي جاء منها حسين شندي يمتلك قوة في التطريب في فن الدلوكا فقط ولا غير ومفروض يركز شوية على هذا الضرب من الفن الجميل )
واصبح عقلي رايح
وكبدي رقد سرائح
ومالك يا الحبيبة
مابتزوري الضرائح
( والضرائح هي قباب ناس الشريف الهندي في بري ) وقصته انه لم يوافيه كحال الكثير من خلق الله
أن يتلم مع من أحب تزوجت وسكنت بري فطاب له المقام في بري سكان أهلها واحبهم واشغل نفسه مع الحزب الاتحادي شاعراً ومحب لهم )
ومأذني بي عيونو
وزي الدر سنونو
حبيبي ما بخونو
شندي الفوق سِكُنو
وهذا المقطع اضيف من فناني شندي اللذين أحبو فن الجاغريو
إنتِّ بتقولي كدا مالك غيرك ونحن نردح ؟؟
شن نسووو
وآه أنا الجنيت وقلتا هوووو
أحي أنا المرضان شن أسو
إنبهم الرأي والدليل
النجوع ياناس والفليل
أحي انا المرضان شن أسو
من هوى مو رايق قليل
كيف حالي ؟ اصبح مليل
تعلمي كيف تقتلي الهم بي المرح زينا
نضحك ونمرح وداخلنا تنبى بحال معاكس
وتقول :
الحال العلي حال العدو المسكين
وحال الكتفوهو وسالين علي السكين
وحال الفي البحر حايشنو تمساحين
وحال الفي السجن ماقدرولو سنين
Quote: من اجمل اغانى البنات البحبها حبيبي تعال نتلم
مدام الريد بقي في الدم |
حبيبي المنقا والتفاح
حبيبي عسل والناس مُساخ
وهاك من حسين شندي أحلى الكلام وشوفي حسين شندي لما يغني الدلوكا شن بتسوي في مستمعيه
ويومها وقف عربي عازف الكمان الذي لم نراه واقف أبداً يومها وقف وعرض يحمل قوس الكمان
وكثير ما أردد قول عمي عليه رحمة الله
الدلوكا لما تهبق وتدق الحمار بجيهو شعرانية من صوت الدلوكا وماتحركه من مشاعر كامنة في النفوس تريد المخرج ومخرجها عرضة وصوقيرة وشبال من السمحة في البنوت لما تنفدع وتتل الإيد في أحلى رقصة
اللول اللول يا رباعا
ناري بتزيد كلو ساعة
( الرباعة هم الربع الاصدقاء كما يقول أهلك في الخليج )
ويا زُمال الله لينا
للتفاح عنب الجنية
ولونن الخفى للرتينة
سبعين نفر مفقودة فينا
خيزران ساكن رفاعة
إيدو جدلة وعينو ساعة
وصلة اغنية يا رباعة بعد فارس الحديد مباشرةً
ومع تطريب الدلوكا عند حسين شندي
الفيديو حتى تشوفي عرضة الاستاذ عربي عندما هاجت مشاعره في الدلوكا
| |
|
|
|
|
|
|
|
|
|
Re: كلما اخفقنا في حب وكلما عصرونا العسكر نسمع لحناً ... ديل إحنا .. ومالو الله كريم علينا (Re: خالد علي محجوب المنسي)
|
وكان من بين فناني ذلك الزمن الجميل الفنان
اليوزباشا ( النقيب ) الزين محمد الزين عليه رحمة الله
من سكان شندي فوق مربع سبعة منزله يفتح علي ترعة فرانكا
كما يحلو لسكان شندي تسمية ذلك الميدان الذي تتجمع فيه الأمطار في الخريف ( ميعة )
يسموه ترعة فرانكا وهي اسم لوالدة أولاد سيد عجيب في شندي
الزين لم يكن مطرب حفلات وقلَّ ما كان يغني لكنه كان يقول الشعر ويلحنه ويتغنى به مرات
في مناسبات قليلة حاله كحال غيره كُثر
الفنان بشير بادي
والفنان صلاح علي الامين
اشتهر الزين باغنيته
الله الريد اذاني
ومتين العودة تاني
| |
|
|
|
|
|
|
|
|
|
Re: كلما اخفقنا في حب وكلما عصرونا العسكر نسمع لحناً ... ديل إحنا .. ومالو الله كريم علينا (Re: خالد علي محجوب المنسي)
|
سوف أورد نص الأغنية كما قالها الزين محمد الزين
عليه رحمة الله
وقد أتجرأ ويسرح بي الخيال أن الشاعر قد شقفه جمال بنات الزاندي في جنوب السودان
ولكنه حدث نفسه وقمعها وتحفظ وتصون الحبيبة في خدرها بعيدة وكان منه الورع والتقوى
ونفس عن ذلك بكلمة وشعر
وبالمناسبة هو والد الموسيقي الفنان علي الزين محمد الزين
يا عيني تعاينن
جننتنو قلبي
بي إستمرار تعاينن
مفرح أو حزاينن
فيها كمان تباينن
دايركن تداينن
وأصبح لا تعاينن
إلا للعندو قلبي
يا قامة البانة
المايحا طربانة
بي ديسة غالبانا
بي سهاما ضاربانا
هي سر أذاني
خافي الله علي قلبي
( هنا وصف لبنات الزاندا في جنوب السودان اللائي سلبن عينه )
يا غربة هينتينا
ويا ظروفنا خنتينا
كفاكي عِقتينا
وإشتهينا ستينا
يا لله ودينا
للمتمة غرب شندي
( وستينا هي زوجته عليها رحمة الله ستنا )
انتّ وطال صدودك
وحق جدودك
تبطل صدودك
وتطر مريوك
لو يسمع ودودك
وفيها تقول حبيبي
حبيبة طال سهدي
وفكي إنبذل جُهدي
سلامي ليك أهدي
أحلّى من الشهدي
من قلبي والمهدي
يا حبيبة وحات ربي
يا ماشي الإجازة
أرجوك أغشى الحِجازة
الديمة عجازة
وقول ليها الحجازة
ياقلبي تجازا
وسهران وطال تعبي
حبيبة عليك دينك
وحق والدنك
إتوصي بي زينك
إتوصي بي زينك
أنا هايم مخبي
| |
|
|
|
|
|
|
|
|
|
Re: كلما اخفقنا في حب وكلما عصرونا العسكر نسمع لحناً ... ديل إحنا .. ومالو الله كريم علينا (Re: خالد علي محجوب المنسي)
|
Quote: هلا وغلا بيك يا أب أحمد ...وينك طال بيك الغياب يا راجل يا زين ؟
أشواقنا ليها زمن ترفرف حول دوحك ...مستنية إذن الهطول ...
حمدا لله على سلامة العودة ...وواصل مشوارك التوثيقي البديع ...
ليك سلام ربط ربط ...والشوق بالكوم .. |
يا سلاااام علي الدُنيا التي تجمع لتفرق وتفرق لتجمع زمان
ويا سلاااام على تكنولوجيا الفضاء الإسفيري التي جعلت لقائاً ممكن وفي اي لحظة اخي إبراهيم فضل الله
وصدق القال ربُّ أخ لم تلده أمك
السؤال دوماً عن حالكم ثلاثي مرح بقى مع الشبتار
( ابراهيم ... عمر ... وعاطف )
كنت في عطلة في ربوع شندي
ويا حليل ربوع شندي
بلد الجمال عندي
الفيها نمى فني
ومن المتمة أمان
وساهرتو بينا
في الشاطئ يا حبان
كانت حق اجازة ممتعة واحمد الله اني قضيت في البندر الخرتوم فقط من عطلة شهر ونصف 3 ايام و8 ساعات
والباقي كان بين ربوع مرتع الصبى بين ناس حنان ينسوك الحال الحصل في البلد
تحياتي لكل الاحباب بطرفك وللأسرة ( ولحاج درويش الصغير نبراس .. والملكة عندليب والصغار )
تحياتي ومودتي
| |
|
|
|
|
|
|
|
|
|
Re: كلما اخفقنا في حب وكلما عصرونا العسكر نسمع لحناً ... ديل إحنا .. ومالو الله كريم علينا (Re: خالد علي محجوب المنسي)
|
''أشواقنا ليها زمن ترفرف حول دوحك ...مستنية إذن الهطول ...
حمدا لله على سلامة العودة ...وواصل مشوارك التوثيقي البديع ''''يا عيني تعاينن
جننتنو قلبي
بي إستمرار تعاينن
مفرح أو حزاينن
فيها كمان تباينن
دايركن تداينن
وأصبح لا تعاينن
إلا للعندو قلبي
يا قامة البانة
المايحا طربانة
ولك مني كل الشوق وان تكحل منك المقى بلقاء جميل في شخصك
وتسعدني والله كثير مشاركتك البهية
وفي الفاشر الكبير تصلك كل اشواقنا وانت تسبح بين أمهات كتب الطب يا جميل
لتخرج لنا طيب إنسان في المقام الأول وتبدع حُسن الطب
الإنسان
تحياتي ومودتي
| |
|
|
|
|
|
|
|
|
|
Re: كلما اخفقنا في حب وكلما عصرونا العسكر نسمع لحناً ... ديل إحنا .. ومالو الله كريم علينا (Re: خالد علي محجوب المنسي)
|
سمعت اللحو مرة يحكي
قال انه عمل في راعي للغنم
وراعي كان في خير ابوه
ويقال ان بهائهم ابراهيم ود دمامة كانت يكون اولها في قرب قضيب السكة الحديد
شرق مويس وأخرها لسة في الحلة
وهنا صيغة مبالغة لكثرتها والسعية كانت مدعاة للتفاخر بالعز ايامها
وكانوا لا يبعونها فقط تحلب ويوزع لبنها ويذبح منها في الاضاحي واكرام الضيوف
نشأ علي إبراهيم في هذا العز لكنه أختار العمل في قوات الشعب المسلحة
شرد كما فعل الكثيرين من أقرانه أيامها يشردون من أهلهم وحتى لا يعيدهم كانو يختارون أماكن ومناطق بعيدة
تجند في الشرقية التي كان مقرها ( كسلا ) وتدرج في الخدمة حتى وصل لرتبة شاويش وبعدها تقاعد ( المعاش الاختياري )
| |
|
|
|
|
|
|
|
|
|
Re: كلما اخفقنا في حب وكلما عصرونا العسكر نسمع لحناً ... ديل إحنا .. ومالو الله كريم علينا (Re: خالد علي محجوب المنسي)
|
التوب السوداني
حشمة وهويــــة
يميز الفتاة السودانية عن غيرها
وشوف عيني الحبيب
بي حِشمة لابس التوب
وقد أشتهرت انواع من الثياب السودانية
ومن أشهرها
رسالة لندن ( وما لبست رسالة لندن ما لبست زمانها )
وابــ قجيجة واشتهر منه الأبيض زي ( زي الموظفات والنساء اللآئي تقدم بهنَّ العمر لكن بحبن الجيهة ) وان وجدت منه ألوان عدة
لكن اشتهر الأبيض
ومن أنواع التياب القديمة
خط الإستواء وتغنو له في الأإنية المشهورة
الموز روى .. قايم سوا
خاطري إنضوى
ياناس جسمي بي النار إنشوى
لسة دُقاق وما إستوى
حراسوا مرتينن عوى
قطعولو خط الإستوا
وخط الإستوا توب اي فاتت مرحلة الفناة الصغيرة التي كانت أيامها تلبس الطرحة ومرحلة التوب تأتي بعد عمر الثاني أو الثالث عشر غالبا ( قبل سن البلوغ بي مرحلة قصيرة )
صوت الموسيقة
وتوب الكرب بألوانه الرائعة
وتوب الزراق ( وهو توب جيران عند البعض وتوب مرقة عند اللآئي لم تسعفهم المادة )
والتوب البنغالي
وتوب الحِد ( حداد على عزيز فقد ومات )
وهو من الدمورية الخشنة مع فستان أسود
وتوب الساكبويس
وغيرها الكثير من التياب
إلى أن جاء عهد الحرير وتوب فتقة واحدة ( ربط ...دول ناس اسيا ربيع )
ثم جاء دقة الترابي وغيرها مع أني اصبحت غير مواكب لموضات التياب والسبب واضح ( شهراً ماعندي في نفقة وكيف أعد أيامو ... خواجية والاجر علي الله )
والتوب السوداني والله جميل ومميز وحلو علي المرأة
وفي بعض النساء لا يعرفن يلبسن التوب بطريقة صحيحة ( يقال عنها شولا اي بتخت الرمية بتاعت التوب بي الشمال )
وشوف عيني الحبيب
بي حشمة لابس التوب
| |
|
|
|
|
|
|
| |
خالد علي محجوب المنسي
فيصل محمد خليل
وضاحة
الطيب شيقوق
ibrahim fadlalla
فيس بوك
تويتر
انستقرام
يوتيوب
بنتيريست