أحبها وتحبني ويحب ناقتها بعيري وكيف وقد قدر الله الله أن يكون مصيرنا مصيري مصيرها .. أنعترض ؟ سبحان ربي الذي فطر القلوب ما تحابَّ إإتلف ليه بنهرب من مصيرنا ونقضي أيامنا في عذاب ؟ ليه ما ننتصر لحبنا لنسعد ؟
صبيـــة العطر يشتهيها أمذنب إذا أنا شتهيت سافرت في عيونها دهوراً فما إرتوت عينيّا وما إرتويتُ جدائل الليل على كتفيها تهدّلت حولي فما أهديّتُ وقال الإعيسر
أنا وإنتِّ ليه بنحب نكون دايماً سوا ؟ يا ربي هل ياهو الهوى ؟ أم أغنياتنا وكت تهيم بتبدل الأحساس نوى وحاجاتنا ليه ساعات تقيف ؟ محتارة .. وحايرة .. وما سوا ؟ وأسفارنا في الخطوات تلم شان تلقى في الآخر هوى والحسرة تملا الأغنيات يحجل في جواتنا الجوى وأنا وإنتِّ مالنا ومال سوا لا حلمة فرّت ضحكتا لا ريدة جات في مرة للقلبين حوى آه .. مالنا ومال سوا
01-22-2013, 05:05 AM
عبيد الطيب عبيد الطيب
تاريخ التسجيل: 08-31-2012
مجموع المشاركات: 1801
عبيد وليد الطيب سلااااام يا دنيا الأدب أنت الفنجري أبـ نضمن فنجري تعرف يا العبيد يتخيل وهذا الفكرة معشعشة فوق راسي من يوم قريت ليك أول مرة إت الزول التخت كباية شاي أحمر موزونة بالنعناع في ضهرية تحت شديراتنا وأديك رأس الخيط في الموضوع وأستمع ( زولاً حكّاي ) وديل الناس البحبهم موت الزول البحب الحكي الموزون ورصين ما الزول النضام ونضمو كلو ضربو رمّى
ونحب عناد جبل توتيل عندما يتلم السحاب قبلي ويلثم من قمم الجبل قُبلة هذا المنظر منطبع في ذهني وكان ايامها عمر في سن 5 سنوات كيف تلثم السحائب فاه توتيل ودي كانت أول مرة أرى أنثى تبدأ بالقبلة السحابة .. لجبل توتيل
وله الشرف أ، يكون نزيل سجنها وقضبان سجنها رموش العيون تمنعه من الفرار وكيف نفر من عيون الحبيب والسجن جنان ووروض فيه
تحياتي ومودتي يا عبيد
01-22-2013, 06:07 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
Quote: أخويا يا الأسد الهُمام ماقالوا قال ماجاب كلام وكت الحارا أم زحام يخوجل شايل أبـ قيام
ماقالوا قال : اي لم يقل في حياته القول البسوي اللوم واللوم بجي بالغفلات ما جاب كلام اي لا يمشي بين الناس بالنميمة ونقل الأخبار ليحدث فتن ومشاكل وكت الحارة أم زحام يوم الوغى ويوم المحاص وسميت الحرب بالمحاص لانها تمحّص الرجال وتصنفهم بين شجاع ومقدام والجـ بان بتر لي ورا .. وقالت الشاعرة في قصيدة بغني لود القبائل سيد الرأي والفهم تصف الممدوح في يوم المحاص زي بحر الدميرة دفيرو لي قدام يخوجل : اي يتبخترفي مشيته وأبـ قيام هو السيف
كــانيا سلام .... لو تحكي لي .. عن شجرة الأمل النمت جوّانا قامت .... غامرة بي أحلامنا ضي عن بكرة في الأفق البديع نشوانة تهمسبيك علي عن خاطري وكتين ينشده لو تحكي لي .... عن ضحكتين ... عن روعتين .. عن صحرا جواهن تلاوي وتنتظر غِيمات وري
يا العبيد أخد ليك عرضة تجم ما في القلوب من مشاعر طيبة لزول طيب
01-22-2013, 09:26 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
Quote: غنيّلو الهاش في لهيبا أسد ابــ هرش ابـ ضريبة ما قام تبن القريبة وما حام ضح الربيبة
قولي فيه القصيد يوم الحرب والقلوب في الحناجر خوفاً ورهبة من ذاك الموقف المشهد الجلل صوت صليل السيوف .. الرماح تزاحم الهواء جواً الدروع لها جلجلة تصك لها الأذنين .. حوافر الخيل تهرس وتدوي لهبا يتعفر له الغبار .. وفي وسط كل هذا الهول ترى الممدوح هاشي باشي منفرج الأسرة تبسما كأنه أسد له هرش ( اي شعر كثيف في وجهه ) أبـ ضريبة اي الضربتو بتلزم البتقع فوقو الجابرة ومابقوم منها وشقي وصادف نكير ... وهو الامين على ذات القرابة دماً والجارة .. تبن اي ما بعقب وقت الرجال مافي ( في عملهم ) على النساء وتعني هنا انه مأمون على نساء الحي ما بسوي الرزيلة ... وما حام اي ما طلع وهمبت وضبح يكرم ضيوفه بالمسروقة وهذا فهمي لها لو حالفني الحظ في المعنى وقد تكون الربيبة هي البتسبل وتطلع في الروح يحللها ويذبحها والله أعلم قد يفتينا في هذا الامر العبيد ود الطيب
01-23-2013, 06:01 AM
عبيد الطيب عبيد الطيب
تاريخ التسجيل: 08-31-2012
مجموع المشاركات: 1801
Quote: ونحب عناد جبل توتيل عندما يتلم السحاب قبلي ويلثم من قمم الجبل قُبلة هذا المنظر منطبع في ذهني وكان ايامها عمر في سن 5 سنوات كيف تلثم السحائب فاه توتيل ودي كانت أول مرة أرى أنثى تبدأ بالقبلة السحابة .. لجبل توتيل
يا الله يا المحجوب عشان نضمك الكيف بخور الشيبة ودي زاتو البجاوزوبو المسك لي السحري وعشان هرعك الراحل تالا السَّافل زي ما يقال الرائع الجميل ودبادي تعال شوف الكباشي د جمعة البري وصف الهرع والخريف كيفن البرق البعقلولو العطيش في حرور جاب لينا الدعاش قال الصعيد ممطور اصبح نملو فوق كوم الدباب منشور وطربان طيرو هبالو النسيم كافور اتراحل هرع من غادي جي مدفور واتحين وقف منلم جميع مضفور اشابيب النحاسي وصبها المخبور نزلت ديس فلاني الشبلولو سيور
عينة النترة ساقت وخرف العتمور والضحوي البعم في صبو ديمة صبور السيل وهط العالي وعني الشختور واتخلط رحل عاد كبو مو معبور
الوادي الرفس سقايو في الصنقور ضهبان سيلو في سدرو الشدر مدفور متدرع رقبتو وممغي ممسور وفار جنحينو متمدد بعيد مفرور والخريدة طويلة ما اودته جزء منها ما ني داير اديكن ياهاكلها عشان ونستي ما تكمل وما بدور أحت الجراب كلو وتكفوا اقروها بي مهلة عشان تتمتعوا بوصف الخريف السَّقاي هي روافد الوادي وزي ما قلت عند رحيل الهلالية الشَّامخة ست روحي الوالدة
Quote: عينة النترة ساقت وخرف العتمور والضحوي البعم في صبو ديمة صبور السيل وهط العالي وعني الشختور واتخلط رحل عاد كبو مو معبور
الوادي الرفس سقايو في الصنقور ضهبان سيلو في سدرو الشدر مدفور متدرع رقبتو وممغي ممسور وفار جنحينو متمدد بعيد مفرور
يا سلااام يا عبيد حديثك شهد .. وياني العاقل كراعك ما تفارق الإنجمامة فد بالمرة .. عينت الحديث بخلي الزول يعضي إيديهو جرابك ملان إن شاء ما يعدم وترقد لينا دُخري وأنيس ( ونستك تب سمحة وطاعمة ) ولا يفي الشكر لبكري الذي كان السبب أن نلم ونتلم وننجم مافوت الشديرات والضل الضليل قدر ما تتعب تعال أخد فوقن جميمة وسوي لينا النضم الدُقاق
شوف عليك جنس البلاغة دي الوادي الرفس : ماقال السال رفس تديك الشعور بشدة مو مليان لآمن رفس بي برة ودفق ولما مرق برا ضهب سيلو لعند السدر البي فوق ملا والوادي لما يرفس خير ونعمة وأن هدم وخرب عندنا في نواحي شندي وادي مشهور اسمو العوتيب وهو من أكبر الوديان في هناك من مجموعة وديان أخرى
وقد قال فيه ود بادي
هوى يا وليد حصل جربتا كب السارية فى القلعة وخلا العتمور وشفتا بروقا تترقص وتتحرقص تقول مطويه فى قرقور وعاوى الزيفة ينفخ فى جبال النقعة زى الصور.. ( والنقعة والمصوارات هي مجموعة من جبيلات وهناك كانت حضارة ولا زال توجد أثارها ) والحصحاص يجرفوا السيل يكنسوا على مهاوى الخور وقلب الصاقعة يتفرطق يكب النار دمار وشرور وشفتا الحال .... عرق مقلوع جبل متروم فرع مكسور جمال غرقانة بى حالا وحد المويه فى الغرغور ود ابن ادم المسكين نجاتو تحت قرون التور والعوتيب يجيك يجرى يشيلك وانتى ما بتدرى وما بيرفع ...
01-23-2013, 07:27 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
أخاصمــــــك وتاني أشتاقك مطر ينبت زروع الدهشة في باكر ... وتر مستني غنوة فرحة في الحاضر ... ونتسامح سماح طفلين بينقلو في دروس النيل ويلعبو حِجلة في الخاطر لأنك في مداي سكـــــة ووطن ممتد بلا آخر ... لأني بخاف يطل العيــد وأبقى وحيد بلا عنوان ولا سفراً عليك ... دافر .......
01-23-2013, 07:48 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
Quote: وهو الامين على ذات القرابة دماً والجارة .. تبن اي ما بعقب وقت الرجال مافي ( في عملهم ) على النساء وتعني هنا انه مأمون على نساء الحي ما بسوي الرزيلة ...
يا سلام يا المنسي دي ذكرني مناحة بت جلي ابو فاطنة فارس بني جرار المشهور ووالد الفارس الشهير موسي هذه القبيلة هي رائدة شعر الدوبيت وشعر الجالسة لكن لم يتطرق احد لتاريخها وشعراءها وان مد الله في العُمر سوف اكتب عنها اضاءة...... بت جلي منحت علي والدها ابويا راكِب علي كوفات براهِن وما عتَّم الخلفات كايس لباهِن وما حلب مواخيرهِن وطرَّد حِشاهِن وماتبن الجارات كايس زناهِن والقصيدة طويلة......
Quote: وما حام اي ما طلع وهمبت وضبح يكرم ضيوفه بالمسروقة وهذا فهمي لها لو حالفني الحظ في المعنى وقد تكون الربيبة هي البتسبل وتطلع في الروح يحللها ويذبحها والله أعلم قد يفتينا في هذا الامر العبيد ود الطيب
والربيبة ايضا هي البهيمة التي تربي بالبيت ولم تسدر مع البهايم تسدر من السدور (سادرات) واظن ما ضح من الضايحة والبهيمة الربيبة دايما تضوح وتحلق بالفريق والحديث ذو شجون شوف الكباشي دي في كلمة ضايحة قال شنو
أنا ليش يا أُم عروض بضوَّح ما ساسكت في دربك عملت تنوَّح ما تفيديني يا بكيرة الحزمهِن وروَّح ما تبقيلي زي مطرا صبيبو شلوَّح الاخ الشاعر حنفي عندما قال ود المصايد المقطع الأخير (ماتبقيلي زي مطرا صبيو شلوَّح) علَّق حنفي قائلا والله لولا إنك زول امي ولا تعرف حرفا واحد لقلت سرقت المعني من كثير عزة إنِّي وتهيامي بعزة بعد ما تخليتُ عن ما بنا وتخلَّتِ لكالمرتجي ظل الغمامة كلما تبؤ منها للمقيل إضمحلَّتِ
لكن يا دكتور المنسي إظن الكباشي ود المصايد ابلغ من كثير عشان شوق اهل البادية للمطر اكثر من شوقهم للغمام لأن كثير يقول كيف الزول الراجيلو ظل غمامة وحين يهم بالمقيل تحتها تتلاشي لكن ود المصايد بقول ماتبقيلي مثل المطر الذي ياتيك قريبا ثم يتلاشا ويذهب الي مكان اخر
Quote: سلام يا المنسي دي ذكرني مناحة بت جلي ابو فاطنة فارس بني جرار المشهور ووالد الفارس الشهير موسي هذه القبيلة هي رائدة شعر الدوبيت وشعر الجالسة لكن لم يتطرق احد لتاريخها وشعراءها وان مد الله في العُمر سوف اكتب عنها اضاءة...... بت جلي منحت علي والدها ابويا راكِب علي كوفات براهِن وما عتَّم الخلفات كايس لباهِن وما حلب مواخيرهِن وطرَّد حِشاهِن وماتبن الجارات كايس زناهِن والقصيدة طويلة......
بني جرار والأدب سمعت في برنامج أذاعي زمان أن تحدث عن هذا الموضوع الطيب محمد الطيب القاص والأديب المعروف عليه رحمة الله قال :
بني جرار من القبائل العريقة في السودان وتنتمي لجهينة وهي بطن من بطون الشكرية .. ومركزها حول مركز الدويم ناحية البطانة وكان لهم دور كبير في إثراء الأدب السودان باشعارهم والشعر بيهم حتى في ونستهم العادية ومن أشهر اشعارهم ما يسمى بالجراري وان اشعارهم تتميز بشعر الحماسة وان شعر الجراري بعض الرواة ينسبوه لهم وأن بعض الرواة ذهبو انه سميّى جراري للحركة التي تصاحب هذا الضرب من الشعر وأن قبيلة بني جرار حصلت على قسمة الأسد فيه ( الجراري ) وأ، الجراري هو من الأنغام الخفيفة التي تنساب من الحنجرة واللسان بيسر وسهولة .. اثر شعرهم الجراري يوجد في كردفان وارض البطانة والنيل الأزرق وقد أثروا قاطني تلك المناطق بنوعية شعرهم هذا وكان رأي الطيب في هذا الموضوع أن تسمية هذا الضرب من الشعر سميّى جراري للحركة أو الرقصة الحركية مع أخراج صوت من الحنجرة والحلق المتابعة له هي سبب التسمية ( جراري ) وكان في حركة الرقص تراهم يجرون الثوب الذي يرتدوه ويكون المؤدي للرقصة مائل بجسمه لاسفل واضع يده في فمه لتزيد من الصوت
وراي بني جرر أنفسهم أنهم ينسبون هذا الاسم ( الجراري ) لخرافة أنه عندهم جبال هناك وأن الشياطين كانت تجي بالليل في الجبل وتغني وترقص بطريقة الجراري التي يفعلونها وتشاركهم هذا الرأي قبائل البزعة وبعض الجوامعة ومن فرسان بني جرار موسى ودجلي كورينا وغيرهم من الفرسان اللذين لم يخلدهم التاريخ والشعر لكن أكيد بني جرار أدرى بهم ويعرفون فرسانهم
ونواصل يا العبيد يا جميل
01-24-2013, 06:45 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
Quote: والربيبة ايضا هي البهيمة التي تربي بالبيت ولم تسدر مع البهايم تسدر من السدور (سادرات) واظن ما ضح من الضايحة والبهيمة الربيبة دايما تضوح وتحلق بالفريق والحديث ذو شجون شوف الكباشي دي في كلمة ضايحة قال شنو
أنا ليش يا أُم عروض بضوَّح ما ساسكت في دربك عملت تنوَّح ما تفيديني يا بكيرة الحزمهِن وروَّح ما تبقيلي زي مطرا صبيبو شلوَّح
نحن ولاد بندر يا العبيد لكن مهتمين شديد بمفردة البادية والقرى لم أطلع منك بشئ عن معنى الربيبة ... فقط أنها هي البهيمة التي تسدر الخلا مع البهائم للرعي وهي الحايمة وسط الحلة ترم هنا وترم هناك في نواحي شندي عندنا ربيبة البيت هي أفضا انواع البهائم وعادة بتكون مربوطة وتعلف بالبرسيم وابـ سبعين وافتريتا أيام الفتريتا سعرها مناسب وتربى لكي يضحى بها وبتكون سمحة وسمينة وهنا في القصيدة ما بضبح الربيبة ....!!!! كدي يا العبيد تبحر في هذه المفردة شوية جزاك الله كل خير
تحياتي ومودتي
01-24-2013, 07:20 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
Quote: أنا ليش يا أُم عروض بضوَّح ما ساسكت في دربك عملت تنوَّح ما تفيديني يا بكيرة الحزمهِن وروَّح ما تبقيلي زي مطرا صبيبو شلوَّح
يا سلام علي طاعم الحديث تعرف يا عبيد الشعر الصادق وقعه في النفس أكبر ونحن في زماننا هذا أصبح الشعر حرفة وقليل ما تجد من يقول كلام نابع من قلبه بصدق ترى الشاعر يشعر ويعمل خلاف ما قال من مبادئ في شعره والمبدئ أصبح مطية لتصل للغرض المنشود قارن بين الشعراء زمان والآن تجد الفرق واضح وألحظ قوله بعين فاصحة وتجزم أنه كان مغرم لشيشته بمن قال فيها هذا الكلام الطيب ساسكت .. وفي نواحي موطننا شندي نقول ( ساسقتا ) من كترة المشي نواحي بيت المحبوبة ويا سلااام ويا سلام تعجبني في الشعر العمق لم يقل قولي لي بحبك بل قال: مــأ تفيديني اي قولي القليب رايدك عشان أرتاح وقال شاعر أخر لا بتسالمي لا بتكالمي بس بتهادي لآك سامعانا لآكي معانا تيهي إتمادي أرح وأردح وراك.. أرتاح ولو بي كلمة إما أعيش وإما أموت .. وإما وإما
Quote: الاخ الشاعر حنفي عندما قال ود المصايد المقطع الأخير (ماتبقيلي زي مطرا صبيو شلوَّح) علَّق حنفي قائلا والله لولا إنك زول امي ولا تعرف حرفا واحد لقلت سرقت المعني من كثير عزة إنِّي وتهيامي بعزة بعد ما تخليتُ عن ما بنا وتخلَّتِ لكالمرتجي ظل الغمامة كلما تبؤ منها للمقيل إضمحلَّتِ
صدق الشاعر حنفي في قوله هناك شعر عندما ترى حال من قاله يصيبك العجب العجاب وتحضرني الآن قول الأديب البروف عبدالله الطيب عليه رحمة من الله عندما قال أن أجمل بيت في الوصف حسب قول النقاد بيت بشار بن برد كأن مسار النقع فوق رؤوسنا وأسيافنا ليلُ تهاوى كواكبه قال البروف لو ما كان بشار أعمي لكان بيت جماع أجمل منه في الوصف
أنتَّ السماء بدت لنا وإستعصمت بالبعد عنّا ولك يا العبيد من كل المودة يسعدني عندما أجد الشخص الذي يغصب الكلام يطلع منك الفي بطني كتير لكن لوحدي ماقادر أطلعو .. ولقيت زولي ما تبعد عني عليك الله
وجيب لي الحديث البحرك الروح ويخليها تقول وتقول
[
Quote: B]لكن يا دكتور المنسي إظن الكباشي ود المصايد ابلغ من كثير عشان شوق اهل البادية للمطر اكثر من شوقهم للغمام لأن كثير يقول كيف الزول الراجيلو ظل غمامة وحين يهم بالمقيل تحتها تتلاشي لكن ود المصايد بقول ماتبقيلي مثل المطر الذي ياتيك قريبا ثم يتلاشا ويذهب الي مكان اخر
وكان عيب علي السحابة والمحبوبة ترك الكباشي ود المصايد وبلمناسبة تعني في نواحي بلدنا المصايد الزول المنزوي وما بخالط الناس يقال ليك فلان دا مصايد وهل هو نفس المعنى
01-24-2013, 08:04 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
وقال الطيب محمد الطيب عن أدب المراثي ( المناحة ) في السودان جرت العادة في نظم المراثي للنساء ولها الأثر الكبير في هذا الضرب من الشعر اكثر من الرجال لطبيعة النساء وجدانياً .. مشاعر المرأة ... المرأة بطبعها عطوفة حنينة مشاعر متدفقة وهذا فطرة فطرها عليها الله تعالى وصدق الطيب محمد الطيب في هذا نجد أغلب المناحات في السودان نظمنهنَّ نساء .. مناحة أب عاجات اللحو ( عمدة كلي ) مناحات عمارة ود المك نمر نظمتها أخته بنونة بت نمر .. مناحة موسى ودجلي .. مناحة مختار ناظر بربر وغيرهنَّ من المناحات ... وفي مناحة العمد أبـ جديري عمدة كلي قصة ولا أعلم ما مدى صحتها قيل انه مات محروق .. والحرقتو سيجارة .. كان مشلول شلل ف الجانب الشمال ورمى السجارة في تلك الناحية ووقعت السيجارة وبدت السيجارة تحرق في المرتبة وحلف ما ينادي زول ( ضكرة بس ) وهو زول عمدة ومعروف بحزمه وشدته يرقد الكلام حكي بعد يقولوا صرخ لما السيجارة جات تحرقو . وكان في ديوانه لوحده المهم هذا الحرق كان سبب موته بناتو ما كنَّ يعرفن قرض الشعر ونظمه بنات هنَّ شمة .. وزينب إستأجرن راعي كان معروف بقوله الجميل للشعر وهو النظم القصيدة المشهورة التي يتغنى بها علي ابراهيم اللحو أبـ عاج اللحو وكتين إزم وينتر إن جات الألوف لابضل ولا بفتر حود يا الخصم بغادي دربو بضر
سمعت من الطيب محمد الطيب يقول أن مناحة موسى ود جلي المشهورة نظمتها أمه ما صحة هذا الكلام
01-24-2013, 08:15 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
وصلتنا رسالة من حورية البحر بعد غياب طال ضربت في الحورية جهات خليج بنما ولم تكن منّا غريبة وتعذر إرسال رسالة....
رسائل بحر
جانا الريد يعلمنا نعيش الدنيا بالاحساس نسامح بقليب طيب نشيل الريد لكل الناس عشان الناس تحب الناس وزي عينينا إتحبو مااصلو البزوروا الريد حب الناس بزور قلبو حورية بحر
01-24-2013, 08:32 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
وهنا في مناحة موسى ودجلي بكى أحمد الفرجوني وما بكائه أعجاب بشعر لكن عاش احمد الفرجوني في صغره في تلك المناطق وما زال مربوط بها وجدانياً عاش مع الفراجين عندما وجدوه تايه في البطانة من أهله وعاش معهم إلى أن بلغ سن البلوغ ولذا كان الأسم
أحمد الفرجوني نسبة للفراجين
وعاش في تلك المناطق واكيد الذاكرة تحن لذا كان منه البكاء الصادق في هذه المناحة
01-24-2013, 09:41 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
ومن أشهر المناحات تلك المرثية التي نظمها عُكير الدامر في أحمد علي بشير كمبال ود البيه عمدة حلفاية الملوك وسوف نعرض جانب من المناحة بعد موته وكان قد ركب من الدامر ليراه عندما وصله المرسال ان أحمد علي بشير مريض شديد
كان مرض أحمد علي بشير كمبال ود البيه ونظم عكير قصيدة طويلة يتشفع فيها بكل من هو صالح وشيخ ليسألوا العافية لصديقه علي بشير كمبال
وهذا نص القصيدة بصوت ابن أحمد علي بشير كمبال ود البيه
01-24-2013, 10:04 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
كانت صداقة عميقة ربطت بين الشاعر عكير الدامر والشيخ أحمد علي بشير كمبال عمد حلفاية الملوك وفي ايام مرضه نظم عكير الدامر قصيدة طويلة ( قصيدة إستغاثة ) ويدعوا في الله خالق الكون ان يشفي صديقه واستعان بالشيوخ وأهل القباب رغم في هذا خلاف شرعي لكن هنا يهمنا الجانب الأدبي في القصيدة عاش أحمد بشير ود البي بعد مرضه هذا سنتين لكن كان طريح الفراش وفي ايام كان الشعور بالعافية ولم يدري انها الهدؤ الذي يسبق العاصفة وهذا قدر الله إن جاء لا يؤخر ساعة .. ارسل لعكير الدامر يدعوه لحضور كرامة الشفاء وفي يوم جاء المرسال ( قبل الكرامة ) لعكير الدامر من بعض معارفه في دامر المجذوب حصل صديقك مرضان شديد وفيها تحصله وفيها لا .. ترك عكير كل ما يشغل يده وهبَّ لاحق اللواري يشد الرحال للحلفاية ويمني النفس أن يصل قبل يسلم الصديق الروح لباريها ... وصل وكان قضاء الله وقدره قد حصل .. احزنه ذلك كثير فشدا رثاء يخلد به صديقه ود البي
يقول فيه
حلفاية الملوك الليلة ويـــنو حفيدك ود البي البريد الضيف قدر ما يريدك ... في كوم رماد ... الليلة غتسي إيدك .. أمسحي جبِهتك ... بي بفروة وأربطي إيدك
دكتور المنسي حبابك وصباحك ابيض من سنون أُم عاج نأسف من عصرية الخميس بسدر من النت وما بجي الا صباح السبت وجدت عبق نوارك وحاولت ان اعلق عليها تفصيلا لكن النت لم يطاوعني
عليه هاك دي من اخونا حنفي حاج الطيب وهو ابن خالي وشاعر جميل وعميق واديب وشاعر مسادير رائعة جدا كان لميت فوقو تاني ما بترايمني قطع شك عشان هو اجمل مني كتير والله صحيح وبجيك صاد لي الفرجوني الشاعر والفنان حقا والشاعر عكير الدامر الما بصاقع تب
Quote: وقال شاعر أخر لا بتسالمي لا بتكالمي بس بتهادي لآك سامعانا لآكي معانا تيهي إتمادي أرح وأردح وراك.. أرتاح ولو بي كلمة إما أعيش وإما أموت .. وإما وإما
يا سلام عليك يا المنسي شوف برضو علي ودياب قال شنو
لا بِتْريدي لا بتجاملي لا بهمك تعب زول لا تعب لي زاملي العزَّالة يا ديفة البتسرح هاملي ريدك كمل الناس وإنت راحتك كاملي
لكم محبتي
01-26-2013, 10:40 AM
عبيد الطيب عبيد الطيب
تاريخ التسجيل: 08-31-2012
مجموع المشاركات: 1801
Quote: وكان عيب علي السحابة والمحبوبة ترك الكباشي ود المصايد وبلمناسبة تعني في نواحي بلدنا المصايد الزول المنزوي وما بخالط الناس يقال ليك فلان دا مصايد وهل هو نفس المعنى
يا سلام اي والله المصايد الزول المنزوي ما بخالط الناس نعم محمد ود المصايد كباشي عطوي ولقد انزوي اهله وفارقوا بادية الكبابيش وسكنوا بمنطقة الوخايم وكانوا قبلها مصايدين بي بهايمهم في الخلا (الجزو) اها عرفني عليه صديقي الشنفري الشال شقي اللايساري وملخو ورحل ماعاد والله نفرني في خلق الله محمد ود المصايد العطوي الكباشي جاورنا بمنطقة ام سنطة قادما من منطقة الوخايم في اقصي الشمال الغربي حيث حدودنا مع تشاد وكان ود المصايد في السبعين من عمره اعجب بفتاة صاحبة مقهي (محل شاي) ياتي يوميا لتناول كوب شاي حيث يتمتع بمسارقة النظر اليها لانها تشبه خطيبته سابقا كما يقول وقد كان يُمتعها بشعره الجميل وكنا شخصي والاخ حنفي نستدرجه ونستضيفه علي فنجان قهوة ليمتعنا بشعره الجميل والحق يقال بالرغم من معرفتي لود المصايد قبل الاخ حنفي حيث كان ياتيني يوميا بالمدرسه الاّ ان الاخ حنفي بشفافيته وشاعريته وجمال روحه استطاع ان يخرج من دواخله درر وجواهر بامتياز( وبالمناسبة كتب حنفي مقال رائع عن هذا الشاعر الجميل بجريدة الوان). الشاهد في الامر في احدي الايام و ذات اصيل ونحن نتناول فنجان القهوة بصحبة ود المصايد سأله حنفي قائلا: الدرفونه دي قلت فيها شنو ...دي قلت فيها: نمرة واحد الفي سوق وقف زابونك والجيل المدايف كلوُّ قصَّر دونك عنافية ابو روف الرقيق شنشونك بيض القوق سنونك والملاقي عيونك شوف يا المنسي اخوي الروعة في (الجيل المدايف كلو قصر دونك) مدايف هو برروب الصيد اي الجدي عندما يطعن ويطلع قرنه الملاقي هي إناءين من الفخار (جَر وقطارة) يملأ الجر بحب البطيخ او الحنظل ويوضع فوق القطارة لاستخراج القطران ويكون اسودا لذا شبه عيونها بالملاقي وسنونها ببيض طائر القمري (القوق) ثم بدأ في سرد قصة الفتاة التي احبها وكان يريد الزواج منها ولكنه في احدي رحلات الجزو المشؤمة كما يقول عندما عاد وجد اهلها زوجوها الي ابن عمها ليقول: لولا قبيل حضرتك قبال الصفاح والعايط ما كنت بحجنك آ عنز الدُّباق ام نايط نقدم شكوي يا الصورة الملاني زبايط ونستلم القضية ونبقا فيها عبايط عرفت المقاطع الاولي بحجنك اي بمنعك عنز الدباغ الصيد ولكن سالته من الصورة الملانة زبايط ليجيني بانها النخلة الغنوتين يا المنسي اخوي جاسرات خلاس لكن الاخيرة ما بتصاقع القافية صعبة خلاس وكلها كربها بلحيل وله شعر جالسة مُدهش احزنتني وافته حيث عاش وحديدا وكان جميلا والله يا المنسي قبل الطابور لازم اعرج عليه واشرب معه الشاي ولقد احببته جدا وصادقته حتي علمني (الخط) اي الرمل والله تعلمته وانا اعلم انه لم يكن حقا ولكن اردته ان يألفني ويرايمني وقد كان واصدقائي مثله كُثر وبالمناسبة بعد غنوة (يا أُم عروض بضوَّح) وتحديدا بعد المقطع (ماتبقيلي زي مطرا صبيبو شلوَّح) حنفي من اليوم داك لم يهدأ له بال الا بعد ان كتب رائعتة من الدوبيت سمحة سماح وناجحة نجاح وهي طويلة سوف ارفدك بهايا المنسي وهي اظنها من شواردالدوبيت لكم محبتي
(عدل بواسطة عبيد الطيب on 01-26-2013, 10:48 AM) (عدل بواسطة عبيد الطيب on 01-26-2013, 11:00 AM)
01-26-2013, 03:30 PM
gessan gessan
تاريخ التسجيل: 02-05-2002
مجموع المشاركات: 746
Quote: ((وتبكي طويرة الاحزان سنين وسنين مصيرة تساسك المسكينة بين الباسا والباساي ترفرف من سخاي لسخاي وتسال عن صدور مغسولة بالدوباي و تنزل فوق حلقات مجالس الشاي تقول الشيخ وفي الشاشاي تبل الريق من الدمع البيوشل من ارامل الحي وتشرق بالرحيح في الردحه و الوب حي وتمرق من محاري الناس تولول فيها جرس الصى وتصرخ فايقة ياجلابة اقيفوا لي وتسعل ضايقة ما شفتوه زولاً لي ))
------------------- --------------------
سلامات يا خالد..ليك ولي ضيوفك..وكل المارين من هذا البوست الممتد..
ياخي اسمح لي ارجع بيك لي قصيدة (الشاعر ود بادي) في رثاء الشاعر إسماعيل حسن..والتي جاءت سيرتها في هذا البوست ..وفي الجزء الذي أصبح الآن في الأرشيف..على ما اظن..اي في مكتبتك.. فالمقاطع التي ذكرتها أنتا فيها بعض الأخطاء..ارجو شاكراً ان تسمح لي بتصحيح بعضها..وخاصة هذا المقطع الجميل شعراً..(وتبكي طويرة الاحزان....إلخ).. وعندما اقول تصحيحها..اقصد محاولة مني عبر ما اراه من معاني الكلمات التي يحملها المقطع المقصود..
وفي الحقيقة أن قصائد محمد ود بادي كثيراً ما نجدها منشورة على عدة منتديات..مكتوبة باخطاء بعضها قاتل يذهب بالمعنى كلياً..وبما أن اشعار ود بادي موغلة في الدارجية..ففي ظني أن السمع دائماً ما يقطع الشك في مثل هذه الحالات..اشعار ود بادي مثلها مثل الدوبيت..كتابتها صعبة بل في بعض الأحيان الحروف لا تقوى على من صورتها الحقيقية.. المهم.. ------------ النص في حقيقته يقول: ((وتبكي طويرة الاحزان سنين وسنين مصيرا تساسِق المسكينة بين الباسا والباساي وتبكي طويرة الأحزان ترفرف من تخاي لتخــاي وتسأل عِن صدور مغسولة بالدوباي و تنزل فوق مجالس الشاي وفي حلقات ابونا الشيخ وفي الشاشاي تبِل الريق من الدمع البيوشِل من أرامل الحي وتشرَق بالرحيح في الردحة و الووب حي وتمرق من محاري الناس تولوِِّل في هجير الصي وتصرخ ضايقة ياجلابة أقيفوا لي وتسعل ضايقة ما شفتوهو زولاً لي؟؟ تضيع صرخاتا في المجهول ويرحل من دريبا الضي وييين تلقيهو يا مِسيكينة ..زولِك قالو ميِّت وحي.. آه يا طويرة الأحزان لو تعرفي البي.. ..... ... ))
--------- فكما تعلم أخي خالد.. أن ود بادي زولاً شاعر بالحيل..شِعرو بيدخل في مسامات لغتنا الدارجة..(لغة منطقة الجعليين)..كيف لا وهو إبن مناطق جنوب غرب شندي..ورغم -جذوره الشايقية- إلا أنه أكثر من إستخدم مفردات لغة مناطق الجعليين الخاصة جداً -في ظني الخاص- ، إستخدمها في اشعاره لذلك جاءت -في ظني- أكثر صدقاً واكثر جمالاً.
ود بادي حالة خاصة، تحتاج أشعاره لوقفة، ود بادي يستخدم كلمات موغلة في خصوصية لغة مناطق الجعليين بحصافة "الشايقي" الشاعر المتمكن..ود بادي في إعتقادي الخاص أنه (همباتي و نوَّاتي) في آن همباتي يغني مع المهاجرية في الخلا والصي..ونواتي يغني للرواويس في البحر والجروف و(جزيرةعِبدِلة) خير شاهد..أي أنه (زول خلا وزول بحر) في آن .. كما أنه (نخلة شوايقة وسيَّالة جعليين) في آن واحد، أيضاً. لذلك جاءت أشعاره بجمال متفرد.
--------------- وفي ظني أن هذا المقطع بالذات من أجمل ما قاله ود بادي في حق إسماعيل حسن.. طويرة الأحزان ..مصِيرا تساسِق المسكينة بين (الباسا) و(الباساي).. الباسا معروفة في الشايقية..اما الباساي فالذي اعرفه انه إسم وادي معروف في قلب البطانة..!!! ترفرِف من تخايِ لتخاي.. التخاي على ما أظن هي (التخاية)بلغة الشوايقة..والجمع تخا..والتخا معروف وهو السحاب الخفيف عديم الماء..!! لذلك ارجح هذا المعنى لأن المقام مقام حزن وسحاب بدون مطر.. ---------- ود بادي أراه قد قال لنا إن إسماعيل حسن منتشر في ربوع الوطن..وبالتالي الحزن عليه غطى كل البوادي والارياف: الدوباي إشارة للبوادي/مجالس الشاي منتشرة في كل البيوت مدن وارياف وربما إشارة للبرامكة المعروفين بمجالس الشاي وغنائها/ وفي حلقات ابونا الشيخ (الخلاوى) /وفي الشاشاي غناء بوادي ايضاً..
-------------- ياخي الزول دا جميل خلاص ..هذا الود بادي ..شوفو قال: (وفي الشاشاي تبِل الرِيق من الدمع البيوشل من ارامل الحي).. تبل الريق..معروفة طبعاً بلة الريق..الشراب قليلاً بعد عطش.. تبل الريق من الدمع البيوشل..!!!! الدمع البيوشل..يوشل..الوشلان هو تدفق الماء من بين المسامات..أهلنا عندما يشتروا زير جديد..بيملوهو موية عشان يفحصوا درجة تدفق الماء من بين مساماته..فتراهو كثير النقط..لذلك لهم طريقة خاصة في معالجة درجة الوشلان الشديدة..حتى تصل درجة معينة..والزير البيوشل اي ينقط الماء بدرجة معينة هو الاكثر تبريداً للماء..!!! ومقياس درجة الوشلان طبعاً هي (النقَّاع) الماعون الموضوع تحت الزير. هذا الامر نجده أيضاً في حالة (القِربة) و(السِعِن) المخصص للموية بالذات..الجديد بعد الدباغة..يملأونه بالموية ويتركونه (يوشِل)..منها يخرج طعم (القرض) بتاع الدباغة..ومنها يعرفوا درجة وشلانو..لو كانت فتحات كبيرة تدفق الماء كثيراً فيقومون بقفلها..وإن كانت صغيرة لا تؤثر في كمية الماء يتركونه.. والكلمة دي وردت في واحدة من أغاني الفنان الراحل محمد كرم الله..(سهران وحدِي والناس نامــــوا للأنوار تكتِّـلْ أنـــوِِّح آهة وأمنِــح آه زيــن عينــيّا توشِـــل)..اي تدفق الدمع بإستمرار..والمقام مقام رثاء.. -------- وتشرَق بالرحيح في الردحة و الووب حي وتشرَق بالرحيح ..الرحيح أظن بمعنى الذهاب والعودة سريعاً..المشي والجية بالجري..واظنها تقال في وصف لعب الأطفال..يجروا جاي ويجروا جاي.. وصاحبنا محمد طه القدال إستخدمها كثيراً..(رحيح جنياتنا في الهضبة الصعيد الحِلة..)..!! --------- وتصرخ ضايقة ياجلابة أقيفوا لي وتسعل ضايقة ما شفتوهو زولاً لي؟؟
وهنا أراه قد إستعاد من حكاية شعبية من الادب الشفاهي -ضاعت مني تفاصيلها الآن- ولكن اظن انها تحكي عن بنت ..عندما تسأل فاطمة -على ما أظن هذا إسمها- عن أبوها الرايح..:(هوووي يا الجلابة..ما شفتي ابويا يالجلابة؟؟ ابويا كذا وكذا توصف ابوها..).. والجلابة المقصودين في الحكاية هم الباعة /التجار المتجولين عن طريق الإبل..فهم الذين يسافرون كل البلدان..فهي تسألهم عن أبوها..وهنا (طويرة الاحزان) تسألهم عن إسماعين..ولكنهم..قالوا لها أن إسماعين (ميِّت وحي).. ميِّت وحي..لم يمُت إسماعين لأن اشعاره واغانيه باقية بين الناس البسطاء..
ود بادي زول مبدع..يعرف كيف يستخدم كلماتتنا في اشعاره..وقد رثى إسماعيل حسن بكلام يطول مقامه وفقده..
لك مرة أخرى اخي خالد التحايا ..لجميع المتداخلين وحتى المارين من هنا.. وشكراً أن منحتني فرصة أن ارجع وأتمعَّن مرة أخرى في أشعار محمد ود بادي..
تحايا للجميع..
01-26-2013, 05:44 PM
فيصل محمد خليل فيصل محمد خليل
تاريخ التسجيل: 12-15-2005
مجموع المشاركات: 26041
Quote: هذا الامر نجده أيضاً في حالة (القِربة) و(السِعِن) المخصص للموية بالذات..الجديد بعد الدباغة..يملأونه بالموية ويتركونه (يوشِل)..منها يخرج طعم (القرض) بتاع الدباغة..ومنها يعرفوا درجة وشلانو..لو كانت فتحات كبيرة تدفق الماء كثيراً فيقومون بقفلها..وإن كانت صغيرة لا تؤثر في كمية الماء يتركونه
الاخ قيسان لا ادري هل ذكرت اسمك صحيحا لكنك زول جميل وطاعم والله ودبادي في رأي المتواضع اشعر من كتب بمفردة الموروث ودليلي مرثية اسماعيل حسن وعودة الدراويش وجدي سعيد في هذه القصائد الثلاثة تجد مفردات موقلة في الموروث والمحلية
والوشلان كما اسلفت استاذ قيسان ينقط بدون ثقب والسعن الذي يوشل بدون ثقب منسميهو (ملوبِن) شوف الكباشي قال شنو
دومَاتَك حاكَن السِّعِن القديم ؤ مِلَبِّن ؤ رَقَلَك بِمْحَق الحَدَبي الطِّوال ؤ مِدَقِّن طالْب المِنُّو ما ظَنّيتُو عقلي إيَقَّن ؤ غَوَّر جَرْحُو في تَمرة فؤادي مِحَقِّن
Quote: يا سلام عليك يا المنسي شوف برضو علي ودياب قال شنو
لا بِتْريدي لا بتجاملي لا بهمك تعب زول لا تعب لي زاملي العزَّالة يا ديفة البتسرح هاملي ريدك كمل الناس وإنت راحتك كاملي
يا العبيد كلام ونضمي سمح بالحيل ويدخل في تباريح الهـــوى .. الناس بتحب ولما تحب وتعجب بتحب صاح وقال الشاعر ودبادي بعدما شاف حب ناس البندر الذي يعد قضاء وقت وبرجسة وبس
قال : جني جن الزول يقول رايد فلانة وينقسم نُصين ... وجني جن عاشق مباغت يبكي بي فرد عين الريد في القلوب وعندما تريد مفروض الريد يكون بصدق وأخلاص ووفاء قلة هذه البضاعة في زماننا هذا وبقى الخسـ يس من الهوى هو الشراكة الزكية مصالح ومنفعة وولى زمان المحنة والود والوفاء والاخلاص وزي ما قالوا المحنة راحت مع القمل زمن الناس حنينة في بعض يجلسو الضهرية يفلو بعض ليه كل فضيلة في الأجداد ابت ماتبقى في الأولاد وليه كل فضائل العابرين معاهم راقدة في شبرين ومسكت في النعوش الطاهرة وإندفنت مع الجُثمان بقت أمجادنا كانوا زمان .. وريدك كمل الناس وأنتِّ راحتك كاملي اسمع جنس النضمي دا من ودالرضي
01-26-2013, 06:48 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
Quote: المنسي حبابك وصباحك ابيض من سنون أُم عاج نأسف من عصرية الخميس بسدر من النت وما بجي الا صباح السبت وجدت عبق نوارك وحاولت ان اعلق عليها تفصيلا لكن النت لم يطاوعني
عليه هاك دي من اخونا حنفي حاج الطيب وهو ابن خالي وشاعر جميل وعميق واديب وشاعر مسادير رائعة جدا كان لميت فوقو تاني ما بترايمني قطع شك عشان هو اجمل مني كتير والله صحيح وبجيك صاد لي الفرجوني الشاعر والفنان حقا والشاعر عكير الدامر الما بصاقع تب
ومساك سعيد يا العشا أبـ لبن رايمك بحق ورايم اي زول بقول النضمي السمح أنا يا العبيد لما أسمع شعر المفردة العامية بهتز كلي مفتون بهذا الضرب من الشعر .. ولسوء حظي قضيت جُل حياتي خارج السودان طلعت من السودان فتاً صغير بعد أن أكملت الثانوية ومن يومها تشيلني رياح وترميني رياح ومن صقيع لصقيع وبردة تكنكش القربة .. لذا لم أجد ضالتي إلا في النت وقراءة الشعر هنا وهناك وللأسف الكثير منه في النت مكتوب غلط زي ما قال غسان .. لذا بعتمد علي السمع من فيديو لو وجدت أعجبني شعر حنفي حاج الطيب ود الريف ومن الليلة سمتو ود الريف نسبة لاسم حنفي تعال لي راجع للرائع أحمد الفرجوني وزي ما قيل أحمد أدبه جم شعرا وتهذيب وصافي السريرة عرفته عن قرب لجيرته مع خالتي بت بادي في ودالبنا.. وما شاء الله يا العبيد أولاد البنا ديل فيهم ادب سمح وناس رائعة خلاس ... وأحمد بالذات فيه طباع لا تعد وتحصى في طبعه السمح طبع ناس البطانة تعال واتحفنا بالجميل من عكير الدامر والفرجوني
01-26-2013, 07:27 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
Quote: محمد ود المصايد العطوي الكباشي جاورنا بمنطقة ام سنطة قادما من منطقة الوخايم في اقصي الشمال الغربي حيث حدودنا مع تشاد وكان ود المصايد في السبعين من عمره اعجب بفتاة صاحبة مقهي (محل شاي) ياتي يوميا لتناول كوب شاي حيث يتمتع بمسارقة النظر اليها لانها تشبه خطيبته سابقا كما يقول وقد كان يُمتعها بشعره الجميل وكنا شخصي والاخ حنفي نستدرجه ونستضيفه علي فنجان قهوة ليمتعنا بشعره الجميل والحق يقال بالرغم من معرفتي لود المصايد قبل الاخ حنفي حيث كان ياتيني يوميا بالمدرسه الاّ ان الاخ حنفي بشفافيته وشاعريته وجمال روحه استطاع ان يخرج من دواخله درر وجواهر بامتياز( وبالمناسبة كتب حنفي مقال رائع عن هذا الشاعر الجميل بجريدة الوان). الشاهد في الامر في احدي الايام و ذات اصيل ونحن نتناول فنجان القهوة بصحبة ود المصايد سأله حنفي قائلا: الدرفونه دي قلت فيها شنو ...دي قلت فيها: نمرة واحد الفي سوق وقف زابونك والجيل المدايف كلوُّ قصَّر دونك عنافية ابو روف الرقيق شنشونك بيض القوق سنونك والملاقي عيونك شوف يا المنسي اخوي الروعة في (الجيل المدايف كلو قصر دونك) مدايف هو برروب الصيد اي الجدي عندما يطعن ويطلع قرنه الملاقي هي إناءين من الفخار (جَر وقطارة) يملأ الجر بحب البطيخ او الحنظل ويوضع فوق القطارة لاستخراج القطران ويكون اسودا لذا شبه عيونها بالملاقي وسنونها ببيض طائر القمري (القوق)
والله يا العبيد هذا الحديث من الجمال لما تدور تهبشو وتتبنو بارك ربي فيك يا السمح يا الزين
وتعرف حتى كلمة شنشون اصبحت لي رصيد معنى كلمة بفضلك ود المصايد زولاً عجيب ونقول عليه ما شاء الله في هذا العمر ويحفظ بعض من شعر قاله زمان دا في حد ذاته شئ عجيب ما شاء الله ربنا يحفظهويعطيه الصحة والعافية وقوللي حنفي سلسل منو النضمي السمح ودون دي حاجات لازم تدون وما تندثر كما حدث للكثير منشعر الشعراء زمان كما ضاع شعر شاعر جميل في منطقة شندي الشاعر حمدان وهذا بعض من ابيات شعر نظمها في حاج محمد إبراهيم فرح ناظر الجعليين
قال لي : سمعتَّ بيك شكروك لي ... وعجبني شَكِرتّك .. صمد المتعافيات .. الصف تهزّو نترتّك الشنب المبرّم .. شوفتو ليك إتفرتّك وا أسفي الشديد من بدري ما عاشرتّك
من البسري لي السبلوقة ( وهذه هي حدود مناطق الجعليين البسري هو الأتبراوي (( نهر عطبرة ) والسبلوقة هو الشلال السادس عند منطقة حجر العسل ) حدد دار أبوك يا أبــ رسوة كدق فوقا الحَالاك تسوقو .. بي سماحة وروقّا والكازاك حفرك ليهو لي المخروقا
Quote: عرفت المقاطع الاولي بحجنك اي بمنعك عنز الدباغ الصيد ولكن سالته من الصورة الملانة زبايط ليجيني بانها النخلة الغنوتين يا المنسي اخوي جاسرات خلاس لكن الاخيرة ما بتصاقع القافية صعبة خلاس وكلها كربها بلحيل وله شعر جالسة مُدهش احزنتني وافته حيث عاش وحديدا وكان جميلا والله يا المنسي قبل الطابور لازم اعرج عليه واشرب معه الشاي ولقد احببته جدا وصادقته حتي علمني (الخط) اي الرمل والله تعلمته وانا اعلم انه لم يكن حقا ولكن اردته ان يألفني ويرايمني وقد كان واصدقائي مثله كُثر وبالمناسبة بعد غنوة (يا أُم عروض بضوَّح) وتحديدا بعد المقطع (ماتبقيلي زي مطرا صبيبو شلوَّح) حنفي من اليوم داك لم يهدأ له بال الا بعد ان كتب رائعتة من الدوبيت سمحة سماح وناجحة نجاح وهي طويلة سوف ارفدك بهايا المنسي وهي اظنها من شواردالدوبيت لكم محبتي
من حديثك في البدء ظننت أنه حي لذا دعوت له بالصحة والعافية لكن من حديثك الآن عرفت أنه قد رحل ود المصايد لجوار ربه في الدار الآخرة دار الخلود والنعيم ربنا يرحمه رحمة واسعة ويجعل الجنة مثواه الأخير ويجعله من أصحاب اليمين ويظله في قبره ويعوضه عن وحدة بالحور العين في جنانه العُلى .. لكن يا العبيد لابد أن يكون هناك الكثير من الناس اللذين ما زالوا على البسيطة يحفظون بعض من شعره اجتهدوا أنت وحنفي في جمع هذا التراث الجميل .. دا راجل مو ساهل وهوين دا كنز يمشي على رجلين اي عليك الله دايرك تمتعنا بشعر ود المصايد وشعر حنفي الجميل وشعر كل الشعراء في تلك المنطقة
بارك ربي فيك يا العبد
01-26-2013, 08:19 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
أخي عبدالعزيز شلت الهم من حديث العبيد عندما قال إن شاء أكون نطقت الأسم صحيح غايتو نحن في إنجمامتنا بنادي عبدالعزيز جنى المحمية فلك الود منا إن نطقنا اليوزر نيم صحيح ولك الحب السخي لو لم يحالفنا النطق الصحيح فكان اسم مكتوب بالفرنجية فلنا الحق في اللعب به
فلو تزيد الجمال حسنا وتتعمق وتغوص لنا في كلم ود بادي الطيب تفنيد لمعانه حتى تعم الفائدة يكون ذاك هو المرام والغرض الذي حدبت على توصيله لاجيال غاب عنها كل شئ جميل كان في بلادنا فواصل في تفنيد بعض المعاني يرضى عليك ربي
تحياتي وودي الشديد
01-26-2013, 07:30 PM
الطيب شيقوق الطيب شيقوق
تاريخ التسجيل: 01-31-2005
مجموع المشاركات: 28804
Quote: سلامات يا خالد..ليك ولي ضيوفك..وكل المارين من هذا البوست الممتد..
ياخي اسمح لي ارجع بيك لي قصيدة (الشاعر ود بادي) في رثاء الشاعر إسماعيل حسن..والتي جاءت سيرتها في هذا البوست ..وفي الجزء الذي أصبح الآن في الأرشيف..على ما اظن..اي في مكتبتك.. فالمقاطع التي ذكرتها أنتا فيها بعض الأخطاء..ارجو شاكراً ان تسمح لي بتصحيح بعضها..وخاصة هذا المقطع الجميل شعراً..(وتبكي طويرة الاحزان....إلخ).. وعندما اقول تصحيحها..اقصد محاولة مني عبر ما اراه من معاني الكلمات التي يحملها المقطع المقصود..
أخي الفاضل العزيز غسان التحية الطيبة سلاااام ونحمد ربنا أننا أخطاءنا في بعض من قول ودبادي العكودابي حتى ترمي بك مركب الحوش بك علينا في إنجمامتنا لتمتعنا يا جميل والله بحب المشاركة والتصحيح فنحن غرضنا أن نمحص ونغوص في شعر هولاء النفر الكريم من شعراءنا الحلوين بطعم عجوة معطونة في عسل حديثك طيب وأسعدني وليتنا نسعد بصحبتك دائماهنا إنجمامتنا وتحت ضل الشديرات نتسامر ونتجاذب أطراف الحديث ومن كل شجرة ثمرة وهكذا يحلو الحديث ويجافيه الملل بالتنوع في الونسة .. سوف ارجع لكل ما جاد به قولك الجميل فعلاً هناك الكثير من الذي نشر عن بعض الشعراء فيهمن الأخطاء ما يقلب المعنى رأس على عقب ومع أني لا أعتمد على ما كتب بل اسمع مرات لو جدت تسجيل لكن في بعض المرات يتعذر علينا ذلك مرثية سماعين ود حسن من أجمل المراثي التي كتبها ود بادي وعموماً الرثاء هو اصدق انواع الشعر وقال أبن الروم عندما كتب مرثية أبنه محمد التي قال فيها توفى حِمام الموت أوسط صبيتي فلله كيف اختار واسطة العقدي سُأل ؟ ماهي اجمل اشعاركم قال الرثاء لاننا نظمه وقلوبنا مفجعة وفعلاً فجع ودبادي في شيخه سماعين ود حسن لذا كسبنا نحن كمستمعين هذه الدرر من الؤلؤ المنضوم برجع ليك لكن يا الحبيب ارجوك أن تبقى معنا تتحفنا بهذا الجمال ونكون مقدرين لك ذلك يا رائع
01-26-2013, 08:08 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
صديقي العنيد في صادقته الصادقة فيسل هليل والله ولعت ناراً كاد رمادها أن يخمد الرقصات الشعبية في المجر كنت من المعجبين بها شديد وياما هاجرت من الأرنيانوش لتابسلا حتى أرى السيقان بين مقاهي تابلسى يرقصونها وكنت مرات أشاركهم الرقص مع الجميل مصفى البكري وطارق عبدالله ( فليطح )
وكانت شلحات إيفا تمعنا وهي تتمايل مثل غصن هبَّت عليه نسايم الصباح الباكر يتراقص طربا إيفا هذه مجرية من فرقة فنون مدينة مشكولتس مدمنة رقص شعبي وبتجي تفش إدمانها في تابلسى وقت الصيف في مقهى يانوش السمين عند ركن المحطة بتاعت البص
Quote: ود بادي حالة خاصة، تحتاج أشعاره لوقفة، ود بادي يستخدم كلمات موغلة في خصوصية لغة مناطق الجعليين بحصافة "الشايقي" الشاعر المتمكن..ود بادي في إعتقادي الخاص أنه (همباتي و نوَّاتي) في آن همباتي يغني مع المهاجرية في الخلا والصي..ونواتي يغني للرواويس في البحر والجروف و(جزيرةعِبدِلة) خير شاهد..أي أنه (زول خلا وزول بحر) في آن .. كما أنه (نخلة شوايقة وسيَّالة جعليين) في آن واحد، أيضاً. لذلك جاءت أشعاره بجمال متفرد.
عبدالعزيز جنى المحمية سلااام بطعم محنة أهلنا
فعلاً كما أسلفت ودبادي حالة خاصة وتحتاج منّا لوقفة وتأمل فاحص يحتاج منا لتنفيد بعض من معاني غردَ بها في كل أشعاره حلاوة المفرد في شعره وحتى في قصائده الحلمنتسية لها رنين براق وكما أسلفت ودبادي جمال شعره أن تسمع له وهو يلقيه بنبرة صوته الجميل ألتقيته زمان في الخرطوم في رحلة لابناء جنوب شندي كانت في جناين الفكي هاشم وبدع يومها شعراً وحديثا ( حتى كلامه العادي درر تتناثر من لسانه ) ثم كان اللقاء الثاني قبل شهور عند حضور صديقي العزيز أبوبكر سيد أحمد ( الفنان الرائع ) نظم أطباء في مدينة العين حفل لوداع بروف شد الرحال بعد المعاش ليساكن أبناءه في بلاد اليانكي ( امريكيا ) وكان يوم في غاية الروعة ذهبت مع ابوبكر للعين فكان الفاكهة أكلنا يومها من التين (ودبادي ) والعنب ( بابكر ) وشبعنا لو منهما يكون الشبع لكن هيهات لاتشبع المشاعر منهما ... أذكر يومها كان كل الحضور من ديار الشايقية وحتى ابوبكر سيدأحمد .. كنت انا وأخر فقط جعليين وعند التعارف كانت الملا حظة .. فلان الفلاني شايقي من منطقة كدا .. وجاء دوري فعرفت نفسي خالد جعلي .. وكان ودبادي بجواري فأبتدر قوله بمزحة وهو دائما ينتقي المفرد محمدودبادي شايقي مرخص في ديار الجعليين وتربية ولاد جعل وهذا ديدنه في الحياة تقضي معه الساعات الطوال فتمر سراعا لا تمل الحديث منه ومعه ابدا فلله درك أيها الشاعر الجميل روحاً وشعرا وهذا ما يوجب الوقفة في بعض ما قال من شعر وارجو ذلك من كل قلبي وليتك تلبي النداء يا عبدالعزيز ونسعد معك برحلة في أعماق هذا الإنسان الشاعر الجميل ولك مني كل الود
01-26-2013, 08:45 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
وقفت كثيرا في (وصفك مكان السجدة في متن القصيدة المحتفي (ولمَّن ابادْرِك بالسؤال تضاري في النَّعَم النَّفي)
عبد العزيز مداخلتك لم اجدها فمعذرة اذا لم ارد التحية فلك ولغسان ولفيصل ولابوي الطيبب وللمنسي ولكل المتداخلين التحايا الزاكيات والسلام عبركم للجميل ودبادي ويااستاذ غسان في اوائل التسعينات اردت ان اعرف شاعرية بعض شعراء العامية فقرأت جزء من شعر ود بادي وبعض الشعراء علي مسامع فحول شعراء الدوبيت في البادية وهم لا يكتبون حرفا واحدا اتدرون اكثرهم وقف عند شعر ودبادي بل اصبحوا يلهجون به
اكرر شاعرية ودبادي تكمن في
1-مفردة الموروث الموقلة في التراث وفي التراكيب الكيميائية
Quote: دايرك تمتعنا بشعر ود المصايد وشعر حنفي الجميل وشعر كل الشعراء في تلك المنطقة
كتب حنفي حاج الطيب
زولاً فى متاهات دنيتو مسرحنا جاتنا أخبارو راحل وتانى قول ما أرتحنا حقيقه الدنيا بتغش مره بتفرحنا وتانى تقبل الغشّاشة تلغى سَمِحنا وتسحب مننا الأدت بعد ما فرحنا إتوالفنا ولفاً قلنا ما بزحزنا كان عرفات رحل نحنا الثبتنا أنحنا لا احتجينا فى يوم قلنا ليك ماسحنا ولا يوم بى الوهم بى الفرقه بتمازحنا وكل ما نهوى زول من ريدو بِتطَمِحنا وحد ما نطارد الصيد أنت بتقمّحنا ونحنا جهاله ما بنسمع كلام ناصحنا ما خففنا من ريدُو البقا مِكَسحنا وبقت الدمعه دم والهم بقى مصابحنا والليل ببقى نم كان الغنا بنصحنا وما ودعنا مخصوص يوم بقى مبارحنا زولاً كان حبيبنا وكان طبيب لى جرحنا عارفين لاولوف بعدك بجى بصارحنا ولا بعد المسافات ببقى من صالحنا ويادوب البريدك خشــّه بيت المحنه وبقول لى أغلى زول يوم الوداع سامحنا
01-27-2013, 10:06 AM
gessan gessan
تاريخ التسجيل: 02-05-2002
مجموع المشاركات: 746
سلام وتحايا الأعزاء خالد و عبيد ..وكل المتابعين .. يا شباب ما عندكم مشكلة في الإسم..أخدو راحتكم..غسان..قيسان..عبدالعزيز..:) :) ..المهم الكويس معاكم إختاروهو..هههههه..
وإن كان الإسم هو (قيسان)..والكلام دا بيرجع لي سنين طويلة..عندما بدأ هذا الموقع..ارسل لي بكري ابوبكر طلب ان انضم لهم في سودانيز (شفتوا كيف؟) وجيت لقيت الناس مختارة (في الزمن داك) نكنيمز..فإخترتا انا إسم قيسان بالإنقليزي..(نسبة لمدينة قيسان..أجمل مدينة سودانية في ظني)..اها من ديك وعيك.. المهم..
ارجع لموضوع ود بادي..حقيقي اشعار ود بادي (وََعَرة) ما بتِنشَق بي هينة..دايرة ليها رجعة ومعرفة معاني كلمات موغلة في خصوصية لغة الشايقية والجعليين والبوادي..ولكن في ظني نامن الناس تترَّفق مع بعض بنقدر ندخل (وعرة) اشعار ود بادي..الجميلة وناخد وندي فيها..:) :)..
وشكراً يا عبيد على تأكيد..معنى كلمة وشلان السِِعِن..وهذه هي الرفقة التي اقصدها..لبيان جمال اشعار ود بادي..
ومتين ما لقيت فرصة برجع ليكم..
لكم خالص التحايا..
01-27-2013, 01:05 PM
عبيد الطيب عبيد الطيب
تاريخ التسجيل: 08-31-2012
مجموع المشاركات: 1801
بعد ما كُنت دليل الرّدَّن الهدو ويبي بقيت عاطلاً بحلِّق في الككر لا الغيبي أصلها الدُّنيا يا دُخري البخورهِن شيبي مرّة فتية مرة عروس ومرة عذيبي الهدوويبي هي العتامير والخلا الردَّن اي سرحن ورعن ويقصد الابل ووردت الرَّدَّهن هدوويبي بقيت عاطلا احلق في الككر اي يقصد اصبح هرما وفقير ولا يرحل مع الظاعنين والمشوقرين البخورهن شيبي هن النساء والشيبة صنف من العطور اليابسة فتية اي بكر عروس معروفة وعذيبي اي عذباء وثيب
محبتي
01-27-2013, 01:30 PM
عبيد الطيب عبيد الطيب
تاريخ التسجيل: 08-31-2012
مجموع المشاركات: 1801
Quote: حدد دار أبوك يا أبــ رسوة كدق فوقا الحَالاك تسوقو .. بي سماحة وروقّا والكازاك حفرك ليهو لي المخروقا لة
دي زول ما بصاقع تب وفارط شوف الراحلة فرحتنا بت الفكي قالت لي الراحل الشيخ المُر شنو من غنا الجراري
يا مفتاح السَّجر الكازاك ماتجر بشوف مضعانك كجر فوق طروم الحجر نقول الطبلة سجرت اي ابت تفتح - تجر لم يربح -طروم منطقة مخارف ونشوف لبوادي الغرب(كبابيش-كواهلة -زيادية-بني جرار-ميدوب) مضعانك اي ظعنك والكبابيش احيانا يبدلون الضاد ظا والعكس والشين ت والثاء تاء الثريد يقولون التريد اثرم يقولون اشرم واترم[ والله يا المنسي فرحتنا دي الله يرحمها عندما يدقو الشَّتم والدلوكة وخاصة يوم عرب الناظر يدقو النحاس شتم ويخلفو الايقاع وتقول فرحتنا فك أسيادي واسياد عزازة بعجبوك يوم البرازة ولي الخصيم كَي ؤغيازة وكراعهُن ماها فزازة ويا منصورة فوق اسيادك والله تلقي الناس دي واقف رهوم رهوم وتلعب الصقرية بي فد كراع منصورة واحدة من طبول النحاس(البقرة والتور والعجول) QUOTE]
كلمة الضلة حَاشاك إن مشيت ساخيلا .. سترة الحال .. بتبذل مالك ضُحاها وليلا الفرسان وخيلا .. شوفتك بتبرد حيلا تفرج ضيقها .. بعد أجاودا تغلب حيلا
هل يقصد شجر الكداد والله ابدع في من نهرتك الفارس بحيض والدارة تصبح طارح يا سلام والله صاحب أمعفر الورد الهزبر بصوطه.........ما سبقو مُسدارك علي ناس ام عمد وام حايمة ونايبك كك بشيل عضم الضهر والقايمة تسدِّد في قضاياك والكبابيش نايمة جيدا جيت تهبِّط ها النفوس القايمة محبتي
01-27-2013, 03:23 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
حتى نعود للرد على الدررالتي التي زينتما بها عقولنا الأخوين قيسان عبدالعزيز والعبيد ود البطانة أم خيراً باهل
لابد أن ننظم الموضوع ونبدأ بقصيدة الرثاء للشاعر ودبادي يبكي فيها شيخه الراحل( سماعين ودحسن ) سوف انزل القصيدة كاملة والأخ عبد العزيز يراجعها ولو في تصحيح يصححه وثم نبدأ في تفنيد معانيها ونبرز الجوانب الجميلة فيها وهي كثرة
وبعدها ننتقل لقصيدة اخرى من قصائد ودبادي
أظنكما تتفقا معي حتى نجني ثمرة إنجمامتنا هذه نتجاذب الحديث المفيد وما ينفع الناس ليمكث في الأرض ويذهب الزبد جفاء
تحياتي ومودتي لكما
01-27-2013, 03:51 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
ارمي الدمعة فوق الدمعتين ياعين بعد الليلة حابسها الدموع لي مين نزيف الدنيا من حد البلد غربي ونزيف الدنيا لاحد البلد شرقي وجوم عموم الليالي العامره كل الدنيا خاتة الخمسة فوق اتنين رحيلك وجعة يا سماعين رحيلك نجعة من دار الفرح والزين رحيلك طعنة في لهات الحِبى دريفين رحيلك وقفة فوق درب العليك باكين فيها نهاية المشوار وحد الفرحة والامال وحد الفال وحد الزين ارمي الدمعة فوق الدمعتين ياعين وبعد الليلة حابسها الدموع لي مين بعد نزلت سكاكين القدر مسنونة ديل فوق ديل وشربت من بواكير المعتَّق حالتو ياالداسنو من السيل وياالمخزون حرابنا متكلات قدامو فوق مشنكتتات الخيل وياالداخرنو من زمن التساب شفعنا رابطين الحجر بي التيل وفجاءة يجينا من طرف السماء مريسيل ينعق فوق كلنكاكول غراب هابيل ويبقي رحيل...... رحيل كل الغيوم الهامعة متواترات رحيل كل السهول العامرة بالخيرات رحيل الطينة من طرف الجزر يومات رحيل الخضرة قدام منجل الهدام جفاف وممات رحيل البادية فوق برقا وراء نجيمات رحيلك مو رحيل أفراد رحيل اجيال ..... رحيل بلدا تمام وكمال يا العرشت فوق نخل السواقي الشال واتمددت فوق النيل من الشلال وللشلال وياالهاجرت فوق ريش الرهو رحال تظل مرسوم علي باب الليالي سؤال بعد عشعشت في خاطر الغبش موال واتبللت من الموية.... بين السعفة والبلال بعد عرقك ضرب في ترابنا حد ما شال واتمددت غادي وجاي يمين وشمال بعد الحال منو البقدر يجيب غربال يغربل روحك المدسوسة في الاجيال وفي نفس الدغش مبثوثة في الشتلة ونداها السال بعد الحال.... منو البقدر يطاول حرفك المعقود علي البركل .. حرير وهلال مسطور فوق رقاب اللوح فوق البردي فوق الصخرة والتمثال بعد الحال..... رحيلك ياالمشرش في مداخل الدنيا كالاوصال رحيلك هزه في العقدة ومجامع الروح كما الزلزال ارمي الدمعة فوق الدمعتين ياعين بعد اليلة حابساها الدموع لي مين كتير من اساب ديارو العامرة هاجر فوق درب وداي كتير من عدا فوق درباً بلا يوادع بلا يناشد كبار القوم وياخد راي... كتير ياعين.... كتير الغابوا ماحضروا وكتير الراحوا ما عادوا وكتير البمشوا منو جاي الا الناعي...... عمرو ما طاف البلاد من جم ولا صاح بالدروب صباحي حتى لسانو إتلجَّم ولا مرقت عروس النيل ولا طفرت دِميعات طفلة في اللولاي عشان الفقد ما ساهل بعيد المستحيل واصل وكل الما حصل حاصل وتبدا طويرة الاحزان تفتش راحلة غادي وجاي تفتش عن حروف مكتوبة فوق درب الرحيل منثورة فوق أطراف مجر الناي مصيرا تسير مع السايرين سنين وسنين ... مصيرة تساسق المسكينة بين الباسا والباساي ةتبكي طويرة الأحزان ترفرف من تخاي لي تخاي وتسال عن صدور مغسولة بالدوباي و تنزل فوق مجالس الشاي وفي حلقات أبونا الشيخ وفي الشاشاي تبل الريق تبل الريق من الدمع البيوشل من ارامل الحي وتشرق بالرحيح في الردحه و الووب احي وتمرق من محاري الناس تولول في هجير الصي وتصرخ فايقة ياجلابة اقيفوا لي وتسعل ضايقة... (اي تسأل ) ما شفتوه زولا لي وين تلقيهو يا مسيكينة زولك قالوا ميت وحي آه آه ياطويرة الاحزان آه لو كان تعرفي البي جرحك انتي صاب الريش وجرحاً لي مسافر في النسيج الحي دريبي بعيد وحزني فريد ومن يوم ما قفلنا الدار ورحل البلبل الغريد بسرح في عيون الناس بسـأل ولو سؤالي يفيد كيف الدنيا تصبح دنيا والصيد يبقي ياهوالصيد؟ مين ينضم عقود منقوشة ترقد في حزوز الجيد ومين يضفر كلام الريد وا ضيعة كلام الريد كلو جميل مصيرو مصيرو يجي ومصيرو يفوت بلا تخليد كتاب الكون يظل مقفول بدون خاتمة بدون تمهيد وباهت قوس قزح وناقص لونو .. ومطرو صديد ... وحتي النيل .... مصيرو يكون مجرد موية شاقة البيد منو البيقدر يساهر الليل يجيب ليكم خباراتو رقصة موجو في الشاطئ رواويسو وحكاياتو رقاد القمرة جنب النجمة فوق رملو مراياتو ولما تغيب ينوم النيل موشح بعباياتو وزي ما النيل يضيع في الدلتا يتلاشي ويموت مشلول انحنا كمان تفيض امالنا تضيع تنشره في ساحل المجهول وا اسفاي .... وا اســــــــــفاي وا اسفاي علي الحرف الشمخ في الطول وكيف الليلة في بطن التراب مسبول حرام تبلينا يا ايام حرام تملينا شوق وهيام اتارينا بنعيش الليلة نرويها ونقوليا ليل نغنيها ونجلد الليل نبكيها وغير ماندري نفنيها وزي الشمعة نطفيها وتسقط من عمرنا حُطام أتارينا بنشيل من حرفك الجواني يا سماعين ونقعد في حواشي الحضرة نشرب زيييين وانت تكب علينا غمام وماعارفين ..... حروفك نازفة من شريان من دم القليب الاصلو مابريان لما شربنا لما طربنا واتلفتنا ما لقيناك يا إنسان وشفنا روحيتك الشفافة ركبت هودج الاحزان محمل فوق جناج ملكين ودربو علي مشارف الواحد الديان قوايمو شقايق النخل الوقع حزنان مضفور بي سعف يابس مفرش بي كباد اماتنا والحبان مزمل بي حبال صبرا فقدنا زمان ومشرور فوق سودلد الليل مبلل وبي الدموع شرقان عجيب يا هودج الأحزان عجيب ياهودج الاحزان مواسم الهجرة ما حانت ولا زمن الرحيل قد حان مسافر ليه ونحن عطيش وزادنا الشربه من بحر الحُزن والآها والحرمان وداك اليوم .... كان وداع الهودج المتهادي كان جامع رجلات الحضر والريف طيور السافل المحزونة جات بي ليله تاركةجناها للريج والمطر والزيف وروح ترهاقه روح أبواتنا والعباسي وروح يات من ملك روحاني وروحوشفيف وريحة الماضي كلها جات ملوك شايق .. وقف شاويش منكس في ترابو حرابو واقف بي قفاهو التابعو شايل سيف لا .. صيد الفلا الناجع من أبــ ريحان ومن بوحات ومن وادي الخلا أبــ عليف دا الفقرا والشعار وناس مجهولة وما معروفة جات من وين ووصلت كيف وتبكي مهيرة ست الوجعة تتنكد علي النعش المفارق من كتيف لي كتيف غريبة حكاية الحُضار غريبة مضارب الحُفار يقوم حفار قبور الليل يدق بي الإيد على ضهر التراب إزميل تحس بالضربة في صدرور الرجال والخيل وفي صدر البنات دم القواني يسيل ما دفنوك في قلب التراب والله يا سماعين قبرك في قلب كل زول وقبرك فوق قلب كل جيل وبعد الليلة كل بنية تلبس فوق صديره اكليل يكون مزروع فيهو قلب الشهيد وانت شهيدنا يا سماعين يا الله .. يا الله .. يا الله بعد يتمت وا أسفاي ونور العين يا الله بعد ما شلت اسماعين وفات..... فات معاهو باقي كلام وباقي حنين بعد الفجعة الله نظل شاكرين نظل واقفين علي بابك معاي طلبين يكون عبود مع ود توم كذا شاهدين قدام قبر الولي سماعين نظل واقفين يوم الليلة والباكر إلي ماشئت يالله إلي يوم الفصل والدين وداك اليوم يكون يومنا ونقالد شيخنا سماعين وداك اليوم يكون يومنا ونقالد شيخنا إسماعين وداك اليوم يكون يومنا ونقالد شيخنا إسماعيل
نعم يا العبيد هذه هي شاعرية ودبادي التي ميزته عن غيره من شعراء هذا العصر ودبادي يرسم بحروف ومفردة شعره لوحة تستهوي كل من عاش في الريف والبادية أو عشق مفردة الريف والبادية ( مفردة الوروث الموقلة العميقة في التراث كما قلت يا العبيد ) روح ودبادي السمحة تضفي في كل قصائده سحنة من جمال أخاذ يولع النفوس ويبهجها وتجرك ابيات شعره يرويها لتسمع دون أن تأخذك لما قال وسوف يقول عجيب يا ود بادي التواضع فرض القبول فهو إنسان إنسان إنسان لابعد درجة تتخيلها من الإنسانية والشاعر إنساني كثيراً ما أعقد مقارنة ودودة ... بينه وبين الشاعر الجميل محمد طه القدال وإن كان هناك وجه شبه ووجه اختلاف سوف نتطرق له إن شاء الله
ولك كل الود أخي العبيد
01-27-2013, 07:08 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
زولاً فى متاهات دنيتو مسرحنا جاتنا أخبارو راحل وتانى قول ما أرتحنا حقيقه الدنيا بتغش مره بتفرحنا وتانى تقبل الغشّاشة تلغى سَمِحنا وتسحب مننا الأدت بعد ما فرحنا إتوالفنا ولفاً قلنا ما بزحزنا كان عرفات رحل نحنا الثبتنا أنحنا لا احتجينا فى يوم قلنا ليك ماسحنا ولا يوم بى الوهم بى الفرقه بتمازحنا وكل ما نهوى زول من ريدو بِتطَمِحنا وحد ما نطارد الصيد أنت بتقمّحنا ونحنا جهاله ما بنسمع كلام ناصحنا ما خففنا من ريدُو البقا مِكَسحنا وبقت الدمعه دم والهم بقى مصابحنا والليل ببقى نم كان الغنا بنصحنا وما ودعنا مخصوص يوم بقى مبارحنا زولاً كان حبيبنا وكان طبيب لى جرحنا عارفين لاولوف بعدك بجى بصارحنا ولا بعد المسافات ببقى من صالحنا ويادوب البريدك خشــّه بيت المحنه وبقول لى أغلى زول يوم الوداع سامحنا
لا تعليق على هذا الجميل وحار الفراق شديد يا عبيد والله ما فرق قلبين حبو بعض حب صادق وامين وكانا مخلصين لحبهما
01-27-2013, 07:27 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
Quote: سلام وتحايا الأعزاء خالد و عبيد ..وكل المتابعين .. يا شباب ما عندكم مشكلة في الإسم..أخدو راحتكم..غسان..قيسان..عبدالعزيز..:) :) ..المهم الكويس معاكم إختاروهو..هههههه..
وإن كان الإسم هو (قيسان)..والكلام دا بيرجع لي سنين طويلة..عندما بدأ هذا الموقع..ارسل لي بكري ابوبكر طلب ان انضم لهم في سودانيز (شفتوا كيف؟) وجيت لقيت الناس مختارة (في الزمن داك) نكنيمز..فإخترتا انا إسم قيسان بالإنقليزي..(نسبة لمدينة قيسان..أجمل مدينة سودانية في ظني)..اها من ديك وعيك..
هههههههههههه وبالمناسبة يا عبد العزيز قيسان أنا برضو لي قصة مع الأسم وموقع بكري هذا أنا أسمي الحقيقي خالد علي محجوب محمد إبراهيم كنت أيامها في دولة كوسوفا .. اذكر في سنة 2006 كنت أقرأ سودانيزاولاين ومنبري المفضل للقراءة كان صديقي الجميل فيصل محمد خليل طوالي يدفعني لكي أنال عضوية في هذا المنبر المهم في يوم قلت كيف أحصل على العضوية واخبرني الطريقة وايامها كان يفتح بوست لكي يثنوك بعض الأعضاء .. فيصل فتح البوست .. وانا أرسلت لبكري رسالة
كان نصها لو أستطيع اتذكر الأخ الفاضل بكري أبوبكر تحية طيبة أخوك خالد علي محجوب منسي في بلد من بلاد الواسعة لا رفيق لا صديق إلا النت أتعشمفي عضوية في هذا الموقع وانا متابع له من زمن بعيد أجد لي مساحة لأبرز مكنون بداخلي ورفقة تونس وحشتي في بلاد الفرنج المهم بكري رسل لي العضوية في نفس ليوم وكان اليوزر نيم ( خالد علي محجوب المنسي ) ههههههه ومن يومها وعيييييك والآن اصبحت كمان بعض الناس تناديني ود المنسي ههههههههه ابوي مرة سمع بهذا قال لي مازح والله هسي نحن حيين غيرت اسم جدك لما نموت ماتقوم تغير اسمنا نحن اقول له يا والدي ربنا يعطيك الصحة والعافية وترقد لنا شجرة موية نتكئ تحتها كلما قست علينا هذه الدنيا
موتي قيسان
01-27-2013, 07:45 PM
علي محمد الفكي علي محمد الفكي
تاريخ التسجيل: 01-08-2013
مجموع المشاركات: 3863
الأخ علي محمد الفكي لك التحية الطيبة سلاااام المكان برح وبراح وبك يزدان براحنا محتفين ومستقبلين لك في إنجمامتنا إنطرح وجر ليك عنقريب هبابي وإنتكي تأخد وتدي معانا وحبابك ألف يا المبروك بس شوية معلومة ختها عقد جلاد فوق رقبتك لسنا محصورين في موضوع بعينه هي إنجمامة نتجاذب فيها حديث طيب .. كلمة طيبة جزورها تعمقت في باطن البسيطة وفروعها تداعب أعنان السماء تلثم من رحيق الطيبة والمحنة قبلة لتعود بها للبسيطة مقامنا تغرسها في نفوس البشر المتكاتلين وفوق شنو ماني عارف موضوعنا من كل شجرة ثمرة ( الفي جرابك بسعدنا يؤنسنا في إنجمامتنا يا الحبيب ) أبقى معنا تعطي وتأخذ كلمة طيبة تعمر قلبك لتنطلق تنفس في المنبر معاني سامية فحواها طيبة وحنان وقلب طيب
ولك مني كل الود والمحبة
01-27-2013, 09:01 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
Quote: بعد ما كُنت دليل الرّدَّن الهدو ويبي بقيت عاطلاً بحلِّق في الككر لا الغيبي أصلها الدُّنيا يا دُخري البخورهِن شيبي مرّة فتية مرة عروس ومرة عذيبي
قال عباس النقرابي
وكان رجل هايم ينظمالشعر قطع أخدر وغاب عن الدنيا ( لشئ من ذهول عقلي ) لكن كان عقله متقد فطن في نظم الشعر مع ان الكثير من شعره كان سفيه المفردة لكن لم يجد من يدون له ماقال إلا بعض من شعر
في ذات مرة شاف لي مرأة وغازلها أظن ردت له رد بايخ تقول فيه العجوز المكركب دا ما تحترم نفسك فرد عليها بهذه الابيات
كلام عباس المذوذّو عيفك منو بقى شايب كبير جقّا مقرعب جنو ماحضرك زمان جهلو ورباع في سنو
والبيت الاخير خلو يا العبيد ما بنقال
وقال الشايقي
بعد ما كُت أمباشي ولي شريطين أنا بقيت خيات أرقع في الدلاقين قاعد المكني سبب لي الطواعين القميص أبـ رقبة وليهو جيبين سيدو إن إتسركن معاك يديك قرشين
سعيد بوجوك يا العبيد
01-27-2013, 09:25 PM
علي محمد الفكي علي محمد الفكي
تاريخ التسجيل: 01-08-2013
مجموع المشاركات: 3863
Quote: وياالداخرنو من زمن التساب شفعنا رابطين الحجر بي التيل وفجاءة يجينا من طرف السماء مريسيل ينعق فوق كلنكاكول غراب هابيل ويبقي رحيل...... رحيل كل الغيوم الهامعة متواترات رحيل كل السهول العامرة بالخيرات رحيل الطينة من طرف الجزر يومات رحيل الخضرة قدام منجل الهدام جفاف وممات رحيل البادية فوق برقا وراء نجيمات رحيلك مو رحيل أفراد رحيل اجيال .....
شفعنا رابطين الحجر بي التيل دي يا جماعة الشرطاقة والله واحدة تاني وهل هي نفس حقت اطفال الحجارة وبعدين شوفو مريسيل الخرااااااااااب دي غراب هابيل (.........يواري سوءة اخيه) غراب البين تنعق في سمائي ومزن الحزن جد علي ماطر (وكان خير لينا وليك وكان شر بي نات كرعيك) لكن شوف وصف موت ود حد الزين والذي لم يسميه ودبادي موت وانما رحيل لكن رحيل كووووووووووون
رحيل الغيوم الماطرة والتي ينتظرها الناس بشوق ومادام رحلت السحب حتما ترحل معها خضرة الجروف والسهول وحتي الطمي والطين لا يأتي للنيل لشح المطر ثم ترحل خضرة شواطي النيل (الهدام) فلا زرع ولا حرث ثم رحيل البادية وهي شامت البرق لكن رحيل اسماعيل رحيل أُمه ورحيل بلد
Quote: رحيل بلدا تمام وكمال يا العرشت فوق نخل السواقي الشال واتمددت فوق النيل من الشلال وللشلال وياالهاجرت فوق ريش الرهو رحال تظل مرسوم علي باب الليالي سؤال بعد عشعشت في خاطر الغبش موال واتبللت من الموية.... بين السعفة والبلال بعد عرقك ضرب في ترابنا حد ما شال واتمددت غادي وجاي يمين وشمال بعد الحال
لم اري نعشا اطول واعظم واضخم من نعش اسماعين ودحسن لله درك يا ودبادي ولو كانت توصف النعوش بالجمال لقلنا نعش ود حد الزين الذي رسمه ود بادي هي اجمل النعوش
Quote: بعد الحال منو البقدر يجيب غربال يغربل روحك المدسوسة في الاجيال وفي نفس الدغش مبثوثة في الشتلة ونداها السال بعد الحال.... منو البقدر يطاول حرفك المعقود علي البركل .. حرير وهلال مسطور فوق رقاب اللوح فوق البردي فوق الصخرة والتمثال بعد الحال..... رحيلك ياالمشرش في مداخل الدنيا كالاوصال رحيلك هزه في العقدة ومجامع الروح كما الزلزال
اها الداير يفتش لي رويحة ود حد الزين يشيل غربالو ويتبع الاجيال وهمبريب الدغش وانفاس الرياحين والجناين والندي البرقش والفراش البحلق فوقها وشوفو روعة وصف شعر اسماعيل مسطور (في رقاب الالواح ماقال اللوح فقط اضاف اليها مفردة رقاب ذادتها بهاء وجمال وفي البردي) الم اقل لكم جمال روح ودبادي المشبعة بسماحة التصوف وعبق النيل وبخور البادية فكما ترك المفكرين واصحاب الفكرة واهل التصوف مريدين واتباع يخلدون ذكراهم ايضا ود حد الزين ولكنه سبقهم فكان في الوجدان والحنايا
(رحيلك يا المشرشر في مداخل الدنيا كالأوصال رحيلك هزة في العقدة ومجامع الروح كما الزلزال) اها دي نتذوقها فقط الشرح يفسدها وكما يقول ودبادي في كاسيته الاول:- اذا لم نفهم المعني فلنستحسن اللفظ)
لكم محبتي
(عدل بواسطة عبيد الطيب on 01-28-2013, 06:42 AM) (عدل بواسطة عبيد الطيب on 01-28-2013, 10:26 AM)
01-28-2013, 10:43 AM
عبيد الطيب عبيد الطيب
تاريخ التسجيل: 08-31-2012
مجموع المشاركات: 1801
Quote: ولا مرقت عروس النيل ولا طفرت دِميعات طفلة في اللولاي
الرائع في شاعرية ود بادي الترابط ومتانة السبك لم تخرج عروس النيل حدادا وكأن اسماعيل هو زوجها فسوف تمكث ثلاثة شهور وعشرة أيام ولا طفرت اي شردت ومفردة طفرت اقوي دموع حتي اطفال الطوطجانية او المرجحة ليجيبنا ودبادي عشان الفقدو ما ساهِلْ بعيد المستحيل حاصِل وكل المحاصل حاصِل
(عدل بواسطة عبيد الطيب on 01-28-2013, 10:46 AM) (عدل بواسطة عبيد الطيب on 01-28-2013, 10:52 AM) (عدل بواسطة عبيد الطيب on 01-28-2013, 06:13 PM)
01-28-2013, 11:57 AM
عبيد الطيب عبيد الطيب
تاريخ التسجيل: 08-31-2012
مجموع المشاركات: 1801
Quote: وتبدا طويرة الاحزان تفتش راحلة غادي وجاي تفتش عن حروف مكتوبة فوق درب الرحيل منثورة فوق أطراف مجر الناي مصيرا تسير مع السايرين سنين وسنين ... مصيرة تساسق المسكينة بين الباسا والباساي ةتبكي طويرة الأحزان ترفرف من تخاي لي تخاي وتسال عن صدور مغسولة بالدوباي و تنزل فوق مجالس الشاي وفي حلقات أبونا الشيخ وفي الشاشاي تبل الريق تبل الريق من الدمع البيوشل من ارامل الحي وتشرق بالرحيح في الردحه و الووب احي وتمرق من محاري الناس تولول في هجير الصي وتصرخ فايقة ياجلابة اقيفوا لي وتسعل ضايقة... (اي تسأل ) ما شفتوه زولا لي /QUOTE] شاعرية ود بادي تكمن في تركه للطائر المعروف والذي يتبع القوافل ليلتط الحبَّ واتجه لطائر الحزن الذي تخلق من روح (عُقلة البكان) كما في الموروث وعقلة البكان كانت فتاة جميلة شردتها زوجة ابوها والقصة طويلة نهايتها تخلقت روحها في شكل طائر وصارت كل يوم تحط وترك بجوار اخوها بدر الزمان تقوقي وتنشد (اكلي كنيش يا بدر الزمان وفراشي بريش يا بدر الزمان طائر مع الطيور يابدر الزمان وشارب مي البحور يا بدر الزمان) والحجوة طويلة والطائر لا يفتش عن الحب وإنما عن حروف مكتوبة فوق درب الرحيل ومنثورة فوق اطراف مجر الناي لكن بعد رحيل ود حد الزين مصيرها ترحل مع الراحلين سنين عددا وهنا تلميح لشاعرية اسماعيل وكأن ودبادي يلمح تلميحا ذكيا ان لا خليفة لاسماعين يا سلام تساسق مفردة ماكنة بين الباسا والباساي تبكي وترفرف من (تخاي لي تخاي) وودبادي ايضا عودنا الوزن حتي في صدر البيت(الباسا والباساي ----------تخاي لي تخاي) والتخا اظنه السحاب الذي لا يحمل ماءً وهنا تكمن الشاعرية لانه لم يقل سحاب تخي ساكت هذه الطويرة الراحلة تسال عن صدور مغسولة بي الدوباي او الدوبيت وتحط علي مجالس السمر ثم ترحل الي حلقات القرآن ثم الي مجالس الشاشاي ولأنها عطشي تبل ريقها ولهاتها ولكن ليس من الماء وإنما من دموع ارامل الاحياء والفرقان ثم تبكي بحرقه وكلمة الووب الا للعزيز وتترك الناس وتصايد بالخلا (تسعل فايقة--------وتسعل ضايقة) صدر البيت موزون وعجر البيت موزون) يا جلابة اقيفوا لي------------ماشفتوهو زولا لي ولكن ودبادي يجيبنا
Quote: وين تلقيهو يا مسيكينة زولك قالوا ميت وحي آه آه ياطويرة الاحزان آه لو كان تعرفي البي جرحك انتي صاب الريش وجرحاً لي مسافر في النسيج الحي دريبي بعيد وحزني فريد ومن يوم ما قفلنا الدار ورحل البلبل الغريد بسرح في عيون الناس بسـأل ولو سؤالي يفيد كيف الدنيا تصبح دنيا والصيد يبقي ياهوالصيد؟ مين ينضم عقود منقوشة ترقد في حزوز الجيد ومين يضفر كلام الريد وا ضيعة كلام الريد كلو جميل مصيرو مصيرو يجي ومصيرو يفوت بلا تخليد كتاب الكون يظل مقفول بدون خاتمة بدون تمهيد وباهت قوس قزح وناقص لونو .. ومطرو صديد ... وحتي النيل .... مصيرو يكون مجرد موية [
نعم شعر اسماعيل وعبقه باقي مابقي الدهر ثم يخاطب طويرة الاحزان رغم حزنها فيقول لها ان جرحك اصاب ريشك ولكن جرحي غائر (من يوم ما قفلنا الدار ورحل البلبل الغريد بسرح في عيون الناس بسأل لو سؤالي يفيد كيف الدنيا تصبح دنيا والصيد يبقي ياهو الصيد) لاتعليق لأنه من الحُزن المقفي وكأن الشعر مات بموت اسماعيل حيث يسأل ودبادي من ينضم عقد الشعر ومين يصفر كلام الريد كلمة(يضفر) ماكنة وملانة وموقلة في الموروث وهي لحباكة الجلود والقرب والخيام وبيوت الشعر... وحتي قوس قزح اصبح لونه باهتا وامطاره شحيحة وحتي نيل الفراديس بموت اسماعيل اصبح ماء يشق الصحاري لماذا ويجيبنا ودبادي
Quote: منو البيقدر يساهر الليل يجيب ليكم خباراتو رقصة موجو في الشاطئ رواويسو وحكاياتو رقاد القمرة جنب النجمة فوق رملو مراياتو ولما تغيب ينوم النيل موشح بعباياتو
ثم يأتي وهو مع النيل ليوصف حزنه بالنيل ايضا فيقول:-
Quote: وزي ما النيل يضيع في الدلتا يتلاشي ويموت مشلول انحنا كمان تفيض امالنا تنشره وتضيع في ساحل المجهول المجهول /QUOTE] ثم يبكي بل يحن ويرزم لإسماعيل
Quote: وا اسفاي .... وا اســــــــــفاي وا اسفاي علي الحرف الشمخ في الطول وكيف الليلة في بطن التراب مسبول حرام تبلينا يا ايام حرام تملينا شوق وهيام اتارينا بنعيش الليلة نرويها ونقوليا ليل نغنيها ونجلد الليل نبكيها وغير ماندري نفنيها وزي الشمعة نطفيها وتسقط من عمرنا حُطام أتارينا بنشيل من حرفك الجواني يا سماعين ونقعد في حواشي الحضرة نشرب زيييين وانت تكب علينا غمام وماعارفين ..... حروفك نازفة من شريان من دم القليب الاصلو مابريان لما شربنا لما طربنا واتلفتنا ما لقيناك يا إنسان[
لما شربنا لما طربنا وإتلفتنا ما لقيناك يا إنساااااااااااااااااااااااااااااااااااااان
محبتي
01-28-2013, 05:29 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
لو قريت مداخلتي كويس كنت لقيت اني قلت من خلاله انو البوست شامل
وما حصرتو في موضوع معين ..
وصيوان البكاء يمثل كل قيمنا السمحة من مواساة وصلة رحم. وعز بالاهل ..
ومساعدة ومساندة ومناحة نعدد فيهم قيم وافعال وخصال جميلة ..
وبرضو فيهو الونسة الحلوة ..
وصيوان البكاء في بلدنا اكبر من نختزلو في دموع حزن ..
أخوي علي محمد الفكي كل الحصل أني حبيت أختصر عليك هذا البوست مستمر من سنة 2006 وبنفس الاسم وانت زولاً جيت جديد وهذا الكلام دائما بكتبه لاي زولاً يغشانا في إنجمامتنا وأأسف لو كلامي جرح ولو القليل من مشاعرك وكون بيننا يا الحبيب فعلاً كما قلت صيوان البكى في السودان حكاية صفاء وتسوية لماترسب في النفوس من خصام .. سياسة .. كورة .. قراءة جرائد والتمباك دا تلقى مردوم البسف والمابسف يشيل لي كيس ..ونسة حميمة .. مجاملة.. تكافل أجتماعي .. أدب حيناً .. ملتقى وفسحة للقاء في ظلال زحمة الوقت التجافي .. وكل هذه مجتمعة تنسي أهل الفقيد ما بهم من حزن لفارق عزيز وهذا حال الدنيا يا الحبيب .. ارجو ان تقبل عذري وهذا والله قصدي ولك مني كل الود تحياتي ومودتي
01-28-2013, 06:08 PM
عبيد الطيب عبيد الطيب
تاريخ التسجيل: 08-31-2012
مجموع المشاركات: 1801
Quote: وشفنا روحيتك الشفافة ركبت هودج الاحزان محمل فوق جناج ملكين ودربو علي مشارف الواحد الديان قوايمو شقايق النخل الوقع حزنان مضفور بي سعف يابس مفرش بي كباد اماتنا والحبان مزمل بي حبال صبرا فقدنا زمان ومشرور فوق سودلد الليل مبلل وبي الدموع شرقان عجيب يا هودج الأحزان عجيب ياهودج الاحزان مواسم الهجرة ما حانت ولا زمن الرحيل قد حان مسافر ليه ونحن عطيش وزادنا الشربه من بحر الحُزن والآها والحرمان [/ QUO هودج ود حد الزين دي عجيب لم يكن علي بعير ولكنه علي جناح ملكين وهذا اعظم هودج حيث لم تحمله مطيه واحدة ثم لم يكن له اثر في الرحيل وانما دربو علي مشارف الخالق وللهوادج قوائم توضع علي غارب البعير ولكن هودج ودحد الزين علي النخل الذي سقط حزينا وسقوط النخل في الموروث من اعظم الرزايا ثم معروف ان الهوادج تضفر بالصوف ولكن هودج اسماعين مضفور بالزعف وكأن الشاعر يرجعه الي مسقط رأسه حيث النخيل والزعف واما فرش الهودج فهو كباد امهاتنا المحروقه وكباد الاحبة ومعروف يحكم ربط الهوادج بالحبال والزمل والزمل هو حبل ولكنه اطول وهي كلمة دارجة وفصيحة ايضا ولكن هودج ود حد الزين مزمل بالصبر الذي فقدناه عند رحيله (مشرور فوق سواد الليل) ...........حزن مقفي لا تعليق فكان نعش ود حد الزين اطول النعوش واجملها وكان هودجه أعظم الهوادج محبتي
01-29-2013, 00:06 AM
علي محمد الفكي علي محمد الفكي
تاريخ التسجيل: 01-08-2013
مجموع المشاركات: 3863
لو قريت مداخلتي كويس كنت لقيت اني قلت من خلاله انو البوست شامل
وما حصرتو في موضوع معين ..
وصيوان البكاء يمثل كل قيمنا السمحة من مواساة وصلة رحم. وعز بالاهل ..
ومساعدة ومساندة ومناحة نعدد فيهم قيم وافعال وخصال جميلة ..
وبرضو فيهو الونسة الحلوة ..
وصيوان البكاء في بلدنا اكبر من نختزلو في دموع حزن ..
الحبيب علي محمد الفكي أول شئ وقبل كل شئ نجي لتسمية ( الفكي ) وهي أصلا الفكيه وقلب القاف كاف وهذه جرت في العامية السودانية ثم صارت الفكي وكثير من الكلمات كانت ذات معني لغويصحيح وحصل فيها قلب لكن مرات في حرف او اثنين وصارت تعطي معنى غير منطقي لغوياً مثال كلمة يقول الزول بتكلم ساكت فكيف يتكلم وساكت أساساً كانت الكلمة يتكلم ساهي اي يتكلم ولا يعي ماذا يقول ( ساهي لاهي ) فقلب حرفين الهاء .. والياء واستبدلت بكاف وتاء أخي والله ما بقصد غير اني كنت عاوز أختك في المعمعة واختصر عليك الطريق لأن هذا البوست بفكرته مستمر من سنة 2006 وهذا الذي كتبته لو كنت متابع للإنجمامة من بدر بصراكتبه لكل من يغشى انجامتنا ويدور بنجم فهي كلمة طيبة نتجاذبها ونستظل تحت شديراتنا وهج الهجير مستأنسين بحديث طيب المهم يا سيدي لو مسَّ حديثي اي شعرة من مشاعرك فلك العذر حتى ترضى وزي ما قلت بيت البكاء وصيوان البكاء اكبر من موطن حزن حزن .. عزاء .. تكافل اجتماعي مادياً ومعنويا .. ملتقى لناس قد يطول الفراق بينهم .. ونسة .. جرايد قراءة ومناقشة أمور سياسية رياضية أجتماعية وافعال ناس ود طه وود البشير فينا كل شئ جميل تجده في صيوان البكاء .. وكل هذا في حد ذاته يهون على أهل الميت المصاب الجلل
لك مني العذر حتى ترضى لك كل المودة وابقى معانا
01-28-2013, 10:57 PM
ماجدة عوض خوجلى ماجدة عوض خوجلى
تاريخ التسجيل: 12-25-2006
مجموع المشاركات: 7279
فراق الحبيب من اشد اللحظات على البشر وخاصة الشعراء فهذا احد الشعراء الذين ابتلوا برحيل المحبوبة من الديار .. فيرحل معها عبر القطار ومحطاته باثاً لواعجه وشجونه .. في مناجاة تشابه مناجاة ود الرضي وهو ينتقل بمليم من الخرطوم الى الرجاف عبر الوابور .. وشاعرنا يتنقل بشجونه مع رحلة المحبوبة عبر القطار من بربر الى مدني الجمال ولست متاكد ايهم اسبق شاعر هذه الابيات ام ود الرضي .. وهذه الابيات منسوبة الى الشاعر ابراهيم ود الفراش وانا استبعد ذلك فابراهيم الفراش حسب ما موجود في ديوانه انه توفى العام 1893م وهذا التاريخ سابق لدخول السكة حديد السودان ..
الليلة اللبيب زعلان خلاص في رحولا قال ساقوها ليه قبال تتمو هي حولا الجيران جميع بدي لنقلة ما فرحولا وا أسف القبيل يمشوا ويجوا يروحولا *** قطر المشترك بالجمعة شال محبوبنا وفراُقك يالرخيص والله ما مطلوبنا ساعة اشرو لو وقام ختر في قلوبنا السواق معجل قال كمل مشروبنا *** علي دارمالي قام بك ذي لمحة البصري ومن فراقك بنوح يابنيه حي كيف بصُري سواق القطر( ود جون) عديل مو مصري دخل الداخلة في ميعادو وأخد النصري
من الداخلة قام ستر اللاله يعمك ويكفيك شر عجاج المشترك لايغمك روحي اتزعزعت في جوفي فاير سمك الدامر أتى المجذوب يفرج همك *** من دامر حمد قام بك علي الزيداب ويفر من القضيب وعجاجو بي الارداب مقدار ست دقائق جابك العالياب وعاقبة السفر يارب ذهاب واياب *** من العالياب قام بك علي المحمية ويحميك الاله من الشرور يابنيه مّرابه الجبل أم ُعقـــــدة ملوية فوقك حـامد الشيخ طيب الزرية *** من الجبل قام بك علي كبوشــــــــــية ويا حليل ستنا الفي فارغة ما منشيه السواق مغـــبرن وحـــالتو ما آدمية جابك في التراجمــة وترجم العجمية *** من التراجمة قام قاصد مدينة شــندي ومن كُتر التعب عرق الخديدات يندي غاية ماهناك ياناس عقـــــل ماعندي اتحاسبي زوجها المسمـــــــى أفندي *** من شندي قام بك عليهــــــــــــو القــوز مرور ود بانقا في الميجا جٍبنا رجـــوز السواق مغبرن وشو باقي عجـــــــــــوز في الدين الحنيف في الشرع قتلو يجوز *** من الميجا قام علي جبل جاري وجرى المقدور وياحليل المعظــــــــــــــمة ســـــــتي قمر الدور شوف المشترك في مشــــــــــيهو كيف محدور في الرويان وقف قيزانو ليهــــــــــــــــــا هدور *** من الرويان قام بك عليه الجيــــــلي ومن بعد الفراق ياربي أجمع شملي جاتك ياكباشي ياعظــــــــيم ياكُملي قول محفوضة عندي بي بركة الجيلي *** من الجيلي قام بك عليهـــــــــو الكدرو وكان شفتي العشوق يابنيه زائد كدرو ربي أراد فراقك والصـــــــبر لي قدرو كلما يمسى ليل دمع العيـــون ينحدرو *** من الكدرو قام طالب الحلفـــــــــــــايا وكلما اتذكرك أنا فيك يزيد أســــــفايا يا المحجوب وبنتو أقيفوا ليها حماية في الخرطوم وقف نزل طرود بالمايه *** قطر المشترك غير من الخرطـــــــــــــــوم وادوهو الاشارة الساعة سبعة يقــــــــوم وصل لي سوبا وسال دمعي اللكان مكتوم وياحليل الحشيم العرضـــــــو مامشتوم *** قام من سوبا متوجـــــــــــه علي البـاقير ويفر من القضيب تحلف يحــاكي الطـير عاقبة الســـــــــــــــفر ياربي تبقى ألخير توصل بالسلامة وبي سرعة دون تأخير *** بالحب والسلامة وصلت مسيد ود عيسى شيشك ياقطر فيك المفرهـــد ديســــــــا أحفظ بي أمان ماتكون معاها تعيســــــــه قول محفوضة بي جاه ستي نور ونفيسة *** من المسيد قام قاصد الترابي بســـــرعة والسواق سطل وزنت معـاه القـــــــرعة خمرتو جنبو كل سـاعة يأخد جُـــــــرعة شتت شملي شال زولي البشابه الزرعة *** من ود الترابي نيرانو زاد توليعـــــــــــا وصّلا في اب عشر عشرة وتلاتة دقيقه روحي اتزعزعت ماقدرت ابلع ريقــــــا ماتنسينا يا ام طبعاً جــــــــميل ورقيــقه *** قام من ابعُشر ويا حليل عُشـــــرتك لينا يا ام أدباً ســــــــمح بي رقة بي تقابلينا جابك الحصاحيصـــــــــــا وفيها اتغدينا وماتقول ام قوام بي فراقه نحن رضينا *** من الحصاحيا قام بيها وحصـــــاه يفنن السواق غشيم في الصنعة مــــو متفنن فتحولو النفس من يومتو قـــام متجنن شيشك ياقطر فيك الخليقــــــــتو تحنن *** جـــــات المسلمية وطيبة قعــدت تدني ويا السواق متين توصل مدينة مـــدني جاتك ياود مدني ياعظـــــــــيم ياســني قول محفوظة عندي انا بالحفظ والامن *** حين نزلت في الرصيف كل الخلوق تتعارك ويارب ياكريم من العـــــــــــــــــلي تتدارك وتجعلو ليها منزل ســـــــــــــــعيد ومبارك بي حق الكتاب وبحــــــــــــق نون وتبارك *** من بعد الوصول أقول ياجامع بيوسف من غياهب الجُب أجمع قلبي بي مريودي راحــــــــــــــــــــــــــــة قـــــلبي أحظى بي نظــــــــــــــــــرتا وتبرد حـــــــــــــرارة قـلبي وأخد ركعتين حمدا لمــــــــــــــــــــــــــــــــــــولاي ربي *** انا منا ي كان دايرك تبقي جاة وافتح عليك شباكي والسالف العلي اسوية خــوف أنســــــــــــــــــاكي ان طال الزمن قلبي العشــــــــــــــــــــوق يطراكي كيف انســاة ريدك وريدك دوام مســــــــــــــواكي
01-29-2013, 11:07 AM
عبيد الطيب عبيد الطيب
تاريخ التسجيل: 08-31-2012
مجموع المشاركات: 1801
Quote: كان وداع الهودج المتهادي كان جامع رجلات الحضر والريف طيور السافل المحزونة جات بي ليله تاركةجناها للريج والمطر والزيف وروح ترهاقه روح أبواتنا والعباسي وروح يات من ملك روحاني وروحوشفيف وريحة الماضي كلها جات ملوك شايق .. وقف شاويش منكس في ترابو حرابو واقف بي قفاهو التابعو شايل سيف لا .. صيد الفلا الناجع من أبــ ريحان ومن بوحات ومن وادي الخلا أبــ عليف دا الفقرا والشعار وناس مجهولة وما معروفة جات من وين ووصلت كيف
اها بعد النعش وهودج الأحزان ورويحة ود حد الزين السافرة لي مولاها تعالو شوف الهودج الناس الودعتو رجالات الحضر والبادية والارياف وحتي طيور الخلا تركت ذغب الحواصل لا ماء ولاحب وتبعت الهودج ثم حتي روح الملك العظيم تهراقا وكل الاجداد وروح بني العباس ............الخ وهذا إن دل إنما يدل علي عظمة الميت وكأن نعشه وهودجه وحد السودان جمعا وهذا حق وشوفو الملك شاويش واقف ومنكس سلاحه وفي الموروث لا يقف الملوك وهم ينكثون سلاحهم الا لهول المصيبة وعظمتها وحتي صيد الخلا الشارد والفقره والمداح وناس مجهولة لا يعرفهم اهل الميت ولكنهم يعرفون ود حد الزين بادبه واشعاره ديل كيفنا أنحنا ديل لكن شوف كيف ادخل ود بادي الجمال للشعر حيث اول الباكين هي مهيرة وهي ست الوجعة وهي رمز لكل حواء السودان وهي الشاعرة الفذة وبنت المكوك (مهيرة بت عبود
Quote: وتبكي مهيرة ست الوجعة تتنكد علي النعش المفارق من كتيف لي كتيف غريبة حكاية الحُضار غريبة مضارب الحُفار يقوم حفار قبور الليل يدق بي الإيد على ضهر التراب إزميل تحس بالضربة في صدرور الرجال والخيل وفي صدر البنات دم القواني يسيل ما دفنوك في قلب التراب والله يا سماعين قبرك في قلب كل زول وقبرك فوق قلب كل جيل وبعد الليلة كل بنية تلبس فوق صديره اكليل يكون مزروع فيهو قلب الشهيد وانت شهيدنا يا سماعين يا الله .. يا الله .. يا الله بعد يتمت وا أسفاي ونور العين يا الله بعد ما شلت اسماعين وفات..... فات معاهو باقي كلام وباقي حنين بعد الفجعة الله نظل شاكرين نظل واقفين علي بابك معاي طلبين يكون عبود مع ود توم كذا شاهدين قدام قبر الولي سماعين نظل واقفين يوم الليلة والباكر إلي ماشئت يالله إلي يوم الفصل والدين وداك اليوم يكون يومنا ونقالد شيخنا سماعين وداك اليوم يكون يومنا ونقالد شيخنا إسماعين وداك اليوم يكون يومنا ونقالد شيخنا إسماعيل
شوفو عظمة النعش من كتف الي كتف وتعجب ودبادي من لوعته وحرقته حتي من حفار القبور وكيف تطاوعه نفسه بحفر قبر لأسماعيل ودحسن فيشعر بها ود بادي في فؤاده وقلبه وفي صدور الرجال والخيل كذلك وفي صدور الحسان وشوفو روعة (دم الغواني يسيل) وعندما تيقن ان اسماعيل مات بجسده ولكن إرثه باقٍ صاح ودبادي إنك لم تمت ولم يدفنوك في الثري وأنما قبرك محفورا في قلوبنا وفي قلوب الاجيال من بعدنا بما تركته من قيم وجمال ومحبة في شعرك الخالد ثم استغفر ودبادي وهو الصوفي المتبتل وآب الي ربه داعيا ياربي بعد أن تأتمت وا أسفاي ونور العين...... وهن من اغنيات ود حد الزين الخالدة والتي صدح بهن الفنان الخالد الراحل وردي ويا ربي نظل نحمدك ونجلك ولكن اسألك امرين ان يكون (عبود وودتوم) وهما صديقا العمر لو دبادي ورحلا ايضا فدعا ان يكونا كالشاهدين علي قبر اسماعيل يا الله ويا لشاعريتك يا ودبادي ويكونا كذلك الي يوم الحشر والنشور وفي هول هذا اليوم حيث يفرُّ المرأ من ابيه وامه واخيه ودبادي وصديقيه يكون هذا يوم سعدهم حيث يعانقون ود حد الزين
هذه هترشة وهرطقة زول مسكون بشعر ود بادي نأسف كان اتركشنا وعلي إلإطالة واخاف ان اكون ثقيلا ومن الذين كان الصحابي الجليل إبن مسعود حين يراهم يقرأ (ربنا لا تعذبنا فإنا مؤمنون) محبتي
01-29-2013, 07:18 PM
الطيب شيقوق الطيب شيقوق
تاريخ التسجيل: 01-31-2005
مجموع المشاركات: 28804
Quote: : وجوم عموم الليالي العامره كل الدنيا خاتة الخمسة فوق اتنين
كنت احفظها هكذا (وجوم عمَّا البوادي العامرة) وشوف جمال الوصف ...كل الدنيا خاتة الخمسة في الإتنين أظن الخمسة اصابع اليد واللتنين العيون
شكرا المحجوب محبتي
أخي العبيد التحية طيبةأأسف للتأخر في الرد كان هناك عطل في الصفحة رقم تسعة فأرسلت لبكري وحلَّ المشكلة جزاه الله خير عنَّا وجوم كل الليالي العامرة فكان يوم فراقه ( سماعين ودحسن ) فجعة وجمت له كل الليالي التي كان يعمرها حضوره حلقات ذكر .. مجالس شاي وشاشاي .. تجادع في الشعر مع فطاحلة الشعر .. ليالي أُنس وطرب .. كل الليالي وجمت وجزنت من هول الفجيعة لموته ( سماعين ودحسن ) وكل الدنيا.. وأطلق كل الدنيا حتى يؤكد لنا أنَّ كل مخلوقات الله أصابها الهول من فجعة الخبر ( موت سماعين ود حسن ) ورمز لذلك .. أن جعل كل مخلوقات الدنيا كالبشر بالذات النساء (لان الفعل الذي ذكره فعل من عادات النساء عندنا في السودان ) عندما تسمع بخبر مفجع ينزاح قلبها من محله ويتلجم اللسان ولا ينطق وترى ذلك ( تخت الخمسة في الأتنين ) تعبير عن عدم القدرة على الكلام والنطق تعبيراً الخمس هي الاصابع الخمسة في اليد والأتنين هي الشفتين وهذه هي المحنة من أثر هول شئ سمعته.... وعندنا تسمى المحنة ( يقال مالك متمحن اي محتار في امرك ) وتكون المحنة إما لاستغراب .. او عدم تصديق .. أو إستنكار .. حيرة في امر ما
01-29-2013, 07:52 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
Quote: شكرا ليك كتير على الهدية اهلى ديل اجمل واحن منهم مافى وتسلم يارب ...
العزيزة مــاجدة عوض خوجلي بدءً بارك الله فيك نعم نحن جعلين لكن طرب الشايقية والمردوم منشري في المشاعر ويتسرب مع مجاري الدم كامناً حينا وفي حركة أحيانا لكن حين نطرى البلد بندق الدلوكة ونشغل تسجيل البسرىجاد السيد أو الحواري ونصوقر نعرض زيييييين أنا وأحمد ولدي وبعدين شكراً كتير علي الأغنية الجميلة ميلة الروح ونظية السمع
حنية بني شايق تجدها كرفة وقلدة ( أم لبنوها ) في اشعارهم عندما ينأوا عن ديار الشايقية
لك مني التحايا والمودة
01-29-2013, 08:16 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
Quote: فراق الحبيب من اشد اللحظات على البشر وخاصة الشعراء فهذا احد الشعراء الذين ابتلوا برحيل المحبوبة من الديار .. فيرحل معها عبر القطار ومحطاته باثاً لواعجه وشجونه .. في مناجاة تشابه مناجاة ود الرضي وهو ينتقل بمليم من الخرطوم الى الرجاف عبر الوابور .. وشاعرنا يتنقل بشجونه مع رحلة المحبوبة عبر القطار من بربر الى مدني الجمال ولست متاكد ايهم اسبق شاعر هذه الابيات ام ود الرضي .. وهذه الابيات منسوبة الى الشاعر ابراهيم ود الفراش وانا استبعد ذلك فابراهيم الفراش حسب ما موجود في ديوانه انه توفى العام 1893م وهذا التاريخ سابق لدخول السكة حديد السودان ..
الحبيب علي الفكي فعلاً ما أقسى الفراق اياً كان ( الموت فراق .. رحيل القريب من القليب سفراً أو هجرا فراق اخياتر الحبيب البعد عنك أقسى .. ) لذا نجد كل أنواع الفراق تهيج الوجدان وتلهبه لذا نجد أجمل الشعر قيل في فراق هجراً كان أو سفرا ومرة قال الاديب حسين خوجلي كلمات فعلاً حق ليت كل شاعر يتألم في حبه حتى نسمع الجمال والأبداع
أفتكر الشاعر ود الفراش سبق ود الرضي لان ود الفراش عاش وأنشد قبل ناس ودالرضي لكني غير متأكد من .. لمن هذه القصيدة وأول مرة اسمع بها وغير متأكد كذلك متى مات ود الفاش ومتى عاش قرأت له بعضمن اشعار المهم نستمتع بجمل الرحلة مودع الحبيبة محطة محطة في رباعيات تنزل الدمع زفرات ومن ضاق ولع الهجر ينقبض القلب ويحزن لمجرد ان يرى شبح غمام وسحب يلوح لفراقاً سفرا ولو لي حين برجع لابيات القصيدة وبعود ليك وخليك قريب إنسنا بك يا جميل
01-29-2013, 08:30 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
Quote: هذه هترشة وهرطقة زول مسكون بشعر ود بادي نأسف كان اتركشنا وعلي إلإطالة واخاف ان اكون ثقيلا ومن الذين كان الصحابي الجليل إبن مسعود حين يراهم يقرأ (ربنا لا تعذبنا فإنا مؤمنون) محبتي
بل كان الجمال والأبداع المشترك بينك وبين الشاعر الجميل ودبادي والأحساس والمشاعر معك هايمة وكيف أنتَّ عايش بين طيات بيوت القصيد رثاء وتنثر الدرر الجمال ترجمة من مشاعرك هذا الاسلوب في سردك أحبه وأعشقه وهو المراد من هذا البوست تمليك الاجيال حديث له طعم ( عاميتنا السودانية الفصحى ) وأقول عاميتنا السودانية الفصحى لانها جد فصحى لكنها خجولة ومتدمدمة بثوب الحياء خجلا زد وابحر يا عبيد وكلنا أذن عين قارئة بارك ربي فيك وزدنا من جرابك يا رائع مودتي
01-30-2013, 06:50 AM
عبيد الطيب عبيد الطيب
تاريخ التسجيل: 08-31-2012
مجموع المشاركات: 1801
الصديق الجميل ود الفكي الزول الطاعم شكرا لمسدارك مسدار الرحيل امانا ما قطعت رقبتو بي المتاوقة
Quote: من ود الترابي نيرانو زاد توليعـــــــــــا وصّلا في اب عشر عشرة وتلاتة دقيقه روحي اتزعزعت ماقدرت ابلع ريقــــــا ماتنسينا يا ام طبعاً جــــــــميل ورقيــقه
لكن العجبني فيهو جمال روحو حتي بعد ما عرفها أنتقلت الي اخر تمني لها السعادة وهذا غير مألوف كثيرا في شعرنا شوف الزول الداير يحرق قطارها للشيخ الراحل الزعيم المُر مسدار مشابه طويل منو يومنا القمنا من جبرة وعديل غربنا والسواق حسن واللَّوري ذاد في العَبْا ابو رقبة الكجَّرولو حجيلو ومنعولو الكبه طالق فيا نار سنتين أبت ماتبرا والشاعر استاذنا ود المُر يا قلبي المشارف لي البريريب روق واصلو الحظ معاكسك شان بقيت عشوق زولي المافي تمتيل ليهو في مخلوق قبل ما تواعدو عفشت قمت يا الغرنوق ------------------- بيضا وزرقة موية عينك كفل حوليه فاصلات الهجار حجلينك لا كلمة مقص لا صرةً في جبينك وناس امونة وردَن يا البريريب وينك
ابوي الطيب حبابك عجبتني كلمة (محمداني ) يا سلام حنينة وعندها شرف وشهقة ومتاوقة
مطلوق من رشاش تتربَّا وحبست الخلفة من مطر الضراع ما صبَّا في الخط سادرك محزوم طريقك خبَّا هجام دكة البادية أُم نحاساً دبَّا الحبيب دكتور المنسي المو منسي حباب اعجبني ما اوردته ان الاتنين هي الشفاه يا سلام والله حزن وتهويلة كبيرة خلاس ماني شاعر لكن حين ينزف القليب بحاول ...... اها دي مرثية لي زول حي بس فارقنا ولقد كتبتها ايضا في بوست اخر لكنني اردتكم ان تمروا عليها ولوعابرا لأن فيها قليل من مفردات البادية وشايف بوستكم العامر بطلوه ناس جميلين يتذوقون الدوبيت ودعني الدُّخري ابوالبرعي ورحل ولكنني لا اخاف عليه وهو مثل المعدن النفيس لا يصدأُ ولكنه اخذ معه نصفي الأيسر لأنه من الذين (ترايمهم) الرّوح والي الان اري جبينه حين تومض البروق وأسْمَعُ صوته حين توشوش الاشجار وأشُمُّ ريحه حين يضوع دِعاش المطر فنزيف حزني مستمرٌ الي يومنا ولكنه الآن في هدوءٍ لكنني لا أدري ماذا أفعل حين يضوع عبق المكان مثل ما فعل في إجازتي الأخيرة فكتبت من الحُزن المقفي :- كُل ما يِهِب دِعاش ؤ يسارِق السَّاهيت لي ليم الفَنْجِري ؤ ضُلِّي الرَّهين شاشيت ؤ لي سَمْحْ النَّافلة والوجه الصَّبوح دوبيت ؤ مع الطَّير البِغرِّد في الدّغش قُوقيت ؤ حنين النّوق ؤ قرْواح اللُّقح سَوّيت إتَّ ما بِصُّر جبينك ولي الكُبار دَعّيت ؤ تَفِقد الجار ولي ضيف الهِجوع عَشّيت ؤ كُنت مُقنع وَلاَيَاك ؤ كُنت طَنِيبْة البيت ؤغروز قلبك مِطاوعَك ولي الوكر شَقّيت ؤ ركَزْتْ في الحوبة وإتْجَتَّنْتَ ما فزّيت ؤ طِريت ناس فاطنة والقدَّالة وِسْتَعزيت ؤكتير قَبَّلْت وسِيق الهَبْرَب أُم مَحَويت ؤ صَعَب دربك زَلَق لي ناس قِعير البيت بعد ما رحلتَ كيف مطَر الرِّشاش عدّيت ؤ تركتَ دِيارْنا يا زين الرِّجال جافيت ؤحرقت قلوبنا بي جمر الفراق ؤشويت مُحال بعدَك ترايم روحنا يا الكاكليت ؤأبْكَن يا البقيتن لي الحزاين بيت
الضُّل الرهين كما في الموروث هم الرجال والفزعة- سمح النافلة اي طيب المعشر -قرواح الُّلقح اي حنينها وهي النوق- مُقنع ولاياك اي حامي وليتك او عرضك والمقنع هو الثوب وكما في المثل فلان دي مُقّنعة ما بتلداهو - الطنيبة كلمة فصيحة والكبابيش اكثر الدارجة عندهم فصيحة
(هام الفؤاد بإعرابية سكنت بيتا من القلب لم تمتد له طُنبا غروز من غارز وعادمة الدّر وغروز قلبك اي لا يعرف الخوف الوكر اي القلاع الحصينة ان كانت غابات او وديان او جبال اي مقدام ولا يهاب الموت الحوبة اي المعركة -وسيق اي ما يأخذه الحرامية من الإبل -الهبرب وأم محويت كلها اسماء الإبل اي كثيرا ما استرد إبله من عتاولة الحرامية- قعير البيت اي الذين يجلسون في الفرقان (سفهاء) الكاكليت يطلقها اهل البادية علي الرجل الشجاع والكريم بقيتا لي الحزاين بيت -اي كأن عيونه اصبحا مأوي للحزن بعد رحيل صديقه
ترايمهم..ههههههههههه.. ياخي دي كلمة جميلة خلاص..يا أستاذ عبيد ياخي.. فيا بخت البَهم..(الأماتُو رامنو)..او (الأمو رايماهو).. كما تعرف يا عبيد..ان "البهَـــم" ..الأُُمو ما بتـ "رامو " أو ما بتـ "رومو"..يحسب بأنه أقرب لليتيم..ههههههه..
الله يديم عليك (ريمان ) روح كل من تحب..:)
تحايا وسلام..وصباحاتك جميلة..
01-30-2013, 10:08 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
بيضا وزرقة موية عينك كفل حوليه فاصلات الهجار حجلينك لا كلمة مقص لا صرةً في جبينك وناس امونة وردَن يا البريريب وينك
نعم الوصف والجمال في العيون السوداء وبياضها ناصع لاتشوبه غبشة
كفل حولية فاصلات الهجار حجلينك دا بالغ عديل يا عبيد كفل حولية ؟ دا كيف عبيد
يا سلام كلمة برويبة أوردها الشاعر الجميل ود النزيها من منطقة شندي ( ساردية - الشقالوة ) هو شاعر أغنية الكنينة يارطب الجنينة للفنان اللحو اوردها ود النزيها في أغنية ( غزلية ) يقول : زي البريبة قامت دابا
تسلم يا العبيد ولنا عودة
01-30-2013, 10:27 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
Quote: كُل ما يِهِب دِعاش ؤ يسارِق السَّاهيت لي ليم الفَنْجِري ؤ ضُلِّي الرَّهين شاشيت ؤ لي سَمْحْ النَّافلة والوجه الصَّبوح دوبيت ؤ مع الطَّير البِغرِّد في الدّغش قُوقيت ؤ حنين النّوق ؤ قرْواح اللُّقح سَوّيت
يا عبيد ما بنجامل وحات الله دا كلام عجيب وجميل ونابع من قلب فطر لفراق صديق عزيز نعم الصادقة هذه وخليتنا نبغر من صديقك دا كدي حاول مرة تانية وقول فوقنا شئ حديثك طاعم ويدخل على النفوس نسمة وكت كتمة
بارك ربي فيك
01-31-2013, 08:28 AM
عبيد الطيب عبيد الطيب
تاريخ التسجيل: 08-31-2012
مجموع المشاركات: 1801
Quote: المرة دي داير يا المحجوب ننوع ليكم شوية ونديكم من شعر الجالسة وهو اخف إيقاعا من الدوبيت وأطول من التوية ولكنه جميلا ورائعا ولقد انتقل للكبابيش من قبيلة بني جرار ايام صداماتهم وعقالاتهم وقبيلة بني جرارهي رائدة هذا الشعر بإمتياز يقول فارس بني جرار كورينا عندما كان في الرمق الأخير وله شقيقة اسمها أُم بلينة يحبها: ود السلام أدُّوهو أم بلينة أن دارَت الرَّحيل دانولها أبو سنينة وإن دارت اللَّبن أحلْبولْها بارينا وأن دارت الزواج أدُّوها دُخرينا وأن قالت مِنُوَّي الوَقَع قولُولها كورينا ثم انتقل منهم الي قبائل الزيادية ودار حامد و حمر...الخ وشعر الجالسة يكون خفيفا ويختلف عن الدوبيت في طريقة النظم والسَّبك وليس في المناسبات كما ذكر الاستاذين الباحثين خالد الشيخ ودوليب وليست تسميته من المجالسة او الأُنس كما ذكروا وأنما تسميته من ركوب الجالسة وهي احدي جانبي السرج والبادية عندما تقول(فلان راكب جالسة) اي علي سرجه فقط بدون زاد وعفش وغالبا راكب( الجالسة) يكون مُراده أو وجهته قريبا خلاف من تكون وجهته بعيده سوف يَعُد العُدة من زاد وماء وفرش .........الخ وهذه درة من شعر الجالسة الجميل للراحل الشيخ موسي ود الشيخ علي التوم وقد كان شيخ موسي رجلا انيقا كريما وقد كان موسوعة في التراث والموروث توفي عام 2009 عن عمر ناهز الخمسة والثمانون ولقد ربطتني به علاقة وطيدة حيث كانت بين والدي وبينه محبة وصداقة ونقطن بقرية واحدة رَاقْ السِحَاب روَّق رِدَم ومن الصعيد جَنْ العِجَم راعي البقر راعي الغنم وإتهَوَّل الطَمْبارِي هَم كَم يا أم سوالِف ؤ كم ؤكَم يا النَّزْرة قطاّعة العشَم حَدَباتْهَا ما فِيهِنْ مَجَمْ جَدْيَة ومَرَاقْدِك في السَلَم رُقَّابة قَنْدُولْهَا إنْبَرَم بَكْرَة رَشِيد في امَّات كَزَم خَلبوسة في وادِي البَشَم ضَرْبِك علي الشَّرْشُوف سَهَم كَتَبك شِرَاع عَضَبِك عَلَم يا نَارِي هِبِّي اللّيل قَسَم وين الزِّلال سمح النَّغَم عسل النحل حِلْو الطَّعَم جرعتها بِداوي السَّقَم سَالْكَة عِيوب خلَّاقْهَا تَم والله كان فَرَّه ؤبَسَم شَرْطَنْ تقول تَرْميلْها دَم
استهلاله كان رائعا والوقت منتصف الخريف وراق السحاب ورجع من رحلة النشوق اصحان النِّعم التي سماها العجم (بقر-غنم.....) ولكن تحسّر السفيه (ومسكتو الهولة) وشاعرنا ايضا كان ناشقا وفي لهفة لرؤية المحبوبة والتي تخلص له ولحبه أُم سوالِف مفردة رائعة وكنية جميلة (النزرة قطَّاعة العشم ) اي جافية خلاس (وحدباتها ما فيهِن مجم ) الحدبة هي الأرض الجافة وبها حصي وحجارة السلّم -نوع من الشجر الكتب يقصد به العطفة وادواتها وزينتها فعندما توضع العطفة مع إكسسسواراتها بظهر البعير ويتحرك به شببها بالشراع ومن زينة العطفة (العضبة) مصنوعه من جلد وصوف وتشبه الاعلام والبيارق شوفو كلمة (خلبوسة) لها رنين وموسيقي والخلبوسة هي النبات اللين إن كان بري قصبة او شجيرة صغيرة اونبات اخر او شتلة يتحدها صاحبها بالسقيا يا دكتور المنسي (كفل حولية فاصلات الهجار حجلينك) الحولية هي المهرة التي اكملت عام من عمرها اي حال عليها الحول واهل البادية يسمون (العجل- المهر) الذي مر عليه عام حولي والهجار كالقيد لكن القيد للبعير والهجار للفرس والقيد يُشبل في الرجلين الاماميات اما الهجار يُشبل في الرجل الامامية اليمني والرجل الخلفية اليسري
محبتي
01-31-2013, 12:49 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
Quote: الحولية هي المهرة التي اكملت عام من عمرها اي حال عليها الحول واهل البادية يسمون (العجل- المهر) الذي مر عليه عام حولي والهجار كالقيد لكن القيد للبعير والهجار للفرس والقيد يُشبل في الرجلين الاماميات اما الهجار يُشبل في الرجل الامامية اليمني والرجل الخلفية اليسري
تعرف يا عبيد ود الطيب في كل مداخلة لك الواحد يكتسب معاني لمفردات جدد ( اضافة ) وتسلم يسلم فاهك يا رائع
الحولية وهذا التعبير معبر جداً اي أتمت حول الحولية عند الصوفية ايضاً ليلة الذكر السنوية التي تكون كل سنة مرة وبعدها صار كل ذكر الصوفية وحتى ليلة كل أحد وصباحن الاتنين تسمى حولية
المفردة التي تعبر عن نفسها تدخل في النفس وهي أصلح للشعر وعلى عكس المفردة الجوفاء التي لها معنى لكن لا حركة فيها جامدة مثال يقال الخيل عركسن تحس العركسة في المفردة لواي سلسلن قاهراً بلا تحنيس تحس اللوية في لسانك لما تقرأ المفردة ولامن تنط وتاخد ليك قمزة لما تقرأ ( قاهراً ) تحنيس : تحس الحنينة والمودة في المفردة يا عبيد لغتنا العامية غنية بالمفردة المعبرة تعبير صريح عن معناها
وجدت من اللغات الحية المعبرة ( الغة المجرية ) كل مفردة واسم لها معنى دال في كل العالم أو اغلبه مثلاً تجد الشرطة ( police ) في اللغة المجرية روندرشيق اي المنظم او الحافظ للأمن وهذا مثال لكن قس عليه كل تسمياتهم تجدها لها معاني تدل على الفعل الذي يقوم به المسمى
معليش عرجت وزي ما قالوا كل شخص بفتن بشئ وأنا مفتون بالمجريين وحاضرتهم الكبيرة ورُقي الشعب يقاس بحضارته وممكن أن أٌول ان الشعب المجري شعب راقي شديد ومهذب
01-31-2013, 09:53 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
براي سويتا في نفسي وقلبي الحبَّ ما واعي عِشق زولاً مجافيهو ... وما كان للحصل داعي أقول إتناسّى حبي يزيد تزيد بالتالي أوجاعي طريق الحُب مشيت فيهو تعذر تاني إرجاعي .. مسكين مسكين
خِطابتي البوديها تقول لا بتمشي لا حاجة وديت ليهو زول مُرسال والمُرسال مشى وما جا بقيت أنا والنجوم بالليل بالليل ... سوا نساهر ونتناجّا النماس اللكانوا سبب رموني وصبحو فراجة مسكين مسكين ... أملو يغلبو تحقيقو والعاشق الجفا المعشوق وا سهرو ونشاف ريقو وا سهرو ونشاف ريقو
Quote: وأنما تسميته من ركوب الجالسة وهي احدي جانبي السرج والبادية عندما تقول(فلان راكب جالسة) اي علي سرجه فقط بدون زاد وعفش وغالبا راكب( الجالسة) يكون مُراده أو وجهته قريبا خلاف من تكون وجهته بعيده سوف يَعُد العُدة من زاد وماء وفرش .........الخ
سلامات يا شباب..
اخونا الأستاذ عبيد.. سلام وتحايا.. كما قلت لك من قبل..ما تكتبه أتابعه بكل شغف..وكما قلت لك من قبل أيضاً ..في ظني أن البادية الغربية كنز زاخر بكم هائل من الدوبيت وغيره من أشكال الإبداع الشعبي.. وفي ظني أيضاً أن الكتابة عنها قليلة ، مقارنة بالبادية الشرقية (البطانة) . بل أذهب إلي ابعد من ذلك لأقول أن البادية الغربية تبدو لي أنها أكثر محافظة على ثقافة البادية ، بما فيها الدوبيت وحياة الناس (ترحالهم، نشوقهم ودمرهم)، حياتهم البدوية بكل قيمها وعاداتها وتقاليدها. وفي ظني أن البادية الشرقية تأثرت بحركة المدن التي قامت حولها وفي داخلها، والمشاريع المروية بكل زخمها ومدنها، وحياتها المنطمة. هذا الزحف الحضري -إن جاز لنا تسميته- أثر على إنسان البطانة، البدوي ، وبالتالي تأثر إبداعه وفنونه بسبب التغيير الذي فرضته الحياة الجديدة علىهم. !!!!. زحف (البنادِر) نحو البطانة، وزحف إنسان البطانة نحو البنادر. في ظني ، بقدر ما منح ادب البادية هناك بعض الإضاءات والتناول، بقدر ما أثر على البادية هناك بكل أدبها وقيمها. على اي حال هذه وجهة نظر قابلة للنقاش.. وارجع لي كلامك عن أدب الجالسة.. وتحديداً معنى الجالسة.. نعم الجالسة عندنا موجود و بنقس الإسم و المعنى الذي أوضحته أنت. حيث الجوالِس هي الخشبتين العارض الواصلات ما بين العكفتين..والبيقعد فوقن الزول الراكب. في المخلوفة. سرج الجمل المخصص للركوب. كما أوضحت انت. كثير جداً من كلمات ومفردات الدوبيت الذي تنقله أنتا موجود بنفس المعنى وبنفس النَـفس في دوبيت البادية الشرقية. في ظني فقط اللهجة المحلية في ديار الكبابيش بعض الأحيان تفرض نطق الكلمة او قولها بشكل محدد قد تختلف عن ما يحكي به إنسان البادية الشرقية.
** كثيراً ما كنت احتفي بشاعر إسمه (ود الزمزمي) من ديرة الكبابيش..خاصة وأن له دوبيت يتابع فيه منازل السنة، بأقسامها الاربعة. إحتفاء وصل بي درجة أن قمت بتخطيط مشروع رسومات، اسميته (كالِندر ود الزمزمي)..موازي لدوبيته الجميل حول كل منزل من منازل السنة. الكلام دا كان قبلي كم سنة.. ولكن المشغوليات والجري، والله ما قدرتا أرجع للموضوع تاني. :) :) .. عموماً من خلال دوبيت ود الزمزمي و(كالندره) المبدع، وضح لي في البادية الغربية إبداعاً أدبياً يحتاج كثير من التناول..
لك التحية مرة أخرى.. وشكراً للأخ خالد المنسي صاحب البوست وضيوفه الكرام..
سلام ..
02-01-2013, 11:51 AM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
Quote: بل أذهب إلي ابعد من ذلك لأقول أن البادية الغربية تبدو لي أنها أكثر محافظة على ثقافة البادية ، بما فيها الدوبيت وحياة الناس (ترحالهم، نشوقهم ودمرهم)، حياتهم البدوية بكل قيمها وعاداتها وتقاليدها. وفي ظني أن البادية الشرقية تأثرت بحركة المدن التي قامت حولها وفي داخلها، والمشاريع المروية بكل زخمها ومدنها، وحياتها المنطمة. هذا الزحف الحضري -إن جاز لنا تسميته- أثر على إنسان البطانة، البدوي ، وبالتالي تأثر إبداعه وفنونه بسبب التغيير الذي فرضته الحياة الجديدة علىهم. !!!!. زحف (البنادِر) نحو البطانة، وزحف إنسان البطانة نحو البنادر. في ظني ، بقدر ما منح ادب البادية هناك بعض الإضاءات والتناول، بقدر ما أثر على البادية هناك بكل أدبها وقيمها.
أخي عبد العزيز تحية طيبة سلااام كما أسلفت ... الأخ عبيد ودالطيب مكسب كبير ينير لنا درب من ديار البادية الغربية ومن اول يوم كنت أيقن واعلم أن عبيد سوف يكون شعلة تضئ جانب قد خبأ فيه الضوء لوم يكشف عنه
البوست ملك لك متداخل أنا صاحب الفكرة وانتم ( المتداخلين ) أهل البوست لكم فيه كل الحرية وهذا والله حديث من كل قلبي راضي وفرح بكم وبأي شخص يتداخل في هذه المـ واضيع التي تثيرونها وهي غنية والله ثقافة وأدب فلك مني عبدالعزيز كل الود والمحبة
يومي الجمعة والسبت نحبهما للراحة من عناء العمل المتعب ولا نحبهما لأانهما يغيبا عنّا الجميل عبد الطيب بكون سدر وفي سدرته هذه يتعذر عليه الدخول وكيف يجتمع لنا الضدان وكيف نؤلف بينهما ؟؟
تحياتي عبيد
02-01-2013, 04:21 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
طال بك الهيام في البادية سادر يا الحبيب الغالي عبيد ود الطيب تذكر في ناس عشقت حديثك الطيب الجميل بطعم كل حنان أهلنا ليه طولت كانعهدنا بك العودة كل سبت من سدرة
لك مني كل الأشواق لحديثك الطيب ولشخصك العالي في نفوسنا وان شاء صحة وعافية يا جميل انت ما بتخون عهد الوداد لكن القصد رحتو طولتو وعلينا ما سألتو وكنتو قراب لكن هذه المرة طال الغياب
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
خالد علي محجوب المنسي
عبيد الطيب
الطيب شيقوق
gessan
فيصل محمد خليل
علي محمد الفكي
ماجدة عوض خوجلى
فيس بوك
تويتر
انستقرام
يوتيوب
بنتيريست