|
|
 Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: أبو الحسين)
|
الحِبان رواد الحوش...
كل عام وأنتم بخير وكل سنة وانتو طيبين وتامين ولامين إنشاء الله يااااااااااارب...
نسأل الله يحقق أمانيكم ويبلغ مقاصدكم ويديكم الصحة والعافية...
أها دي أول طلة... وما أخفي عليكم تَبْ إني كنت قاعد أتاوق في الأيام الفاتت لكم تحيتي ومودتي... وما قصرتو يا ناس بَرَّة (أمريكا وأوروبا) مساهرييييييين وضاربين الحَم في حوشكم العامر دا... نسأل الله يخفف عليكم غربتكم ويرجعكم لي أهلكم سالمين وغانمين...
كميات مودتي...
أبو الحســــــــــــــين...
| |
 
|
|
|
|
|
|
|
 Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: Ahmed Abdallah)
|
Quote: يا مولاي بشكي لَك شقايّ وغلبي
وحظي الديمة من رد الأنيس جافل بي
طآلت السفره وتحتّ مناسك تلبي
هب الريد وعاودك الحنين ياقلبي
Quote: مالك نفسي مطعوني وتملي تنيني
مالك عيني للغميده أبيتي تليني
عطشان كفح المويه مابرويني
وكاتلاني الطريفيي البريدا غريمي
الناس عيّدت مرقت علي أصحابا
وأنا فريت علي الجاهلي السمح ترحابا
بسماً يحكي برق البدودي سحابا
لفّت قلبي زي لف طرحتا اللافحابا
الحبيب خالد
كل سنة أنت والجميع بخير
أهديك الكلمات الحلوة أعلاه ( مع بعض التعديلات الطفيفة في
المكتوب حسب سمعي الكان مرهف في غابر الزمان) |
الحبيب الدكتور سنجك ميه اربعطاشر صباحاتك بيض لبنن هتف من ضرعات السدرن يومن ورتعن بدري وقبل الدنيا تغيّم......
شنو يادكتور طلعّت الاملاء كلها مرصعة بالقلم الأحمر يعني أعدها ..... ذكرتني ايام الأبتدائية وأستاذ علي حليب الشايقي كسر عضيماتنا في الأملاء .....
ياسيدي ألف شكر على التعديل عودونا المطربين بأكل الحروف وفي بعض الأحيان أجيب ليك كلمي تاني ما بتشبه ماقالوا الشاعر
بس أنا مامعاك في كلمة
عطشان وكفح المويه مابرويني
شرب الماء طفح وعدلت في زمنا هذا وقلبت الطاء كاف لذا أنا كتبتها ورجعتها لأصلها مع اني سمعت المطرب يقول سطح ... كدي ارجع وسأل كبارك الجنى طفح الموية ولا كفح الموية
ولك المودة والتقدير والاحترام
خالد محجوب
| |
|
|
|
|
|
|
|
|
 Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: أبو الحسين)
|
كتب أُستاذ/ خالد...
Quote: شرب الماء طفح وعدلت في زمنا هذا وقلبت الطاء كاف لذا أنا كتبتها ورجعتها لأصلها مع اني سمعت المطرب يقول سطح ... كدي ارجع وسأل كبارك الجنى طفح الموية ولا كفح الموية
|
خطيييييييييير والله يا هندسة...
الله يديك العافي وكل سنة وانت طيب يا اخوي... ربنا يحقق أمانيك ويبلغ مقاصدك...
كميات مودتي... عندي مشكلة بس في الكتابة عذراً... وبجيكم صاد إن بقى ربنا مد في الأيام يوم السبت بي عدلي...
أبو الحســـــــين...
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: أبو الحسين)
|
سلام اهل الدار !
كدى اصبرولى الاعدل ويقايتى دى فوق راسى - باقى القيروانى تقيلى بالحيل !
دابى جبت القش للعبور الدارى دى - وجبتلى اشميق من دومة ود حماد لوليد اخوى خالد ود محجوب باقى كان ممجمج - عيللى الحمد لله اسع طاب !
وساعة اخوى خالد ود عمى محجوب جاء كلمنى بيلمتكون دى - بس الريق ما فكيتو - ويلا لفح كسكسيقتى ولبس كركبى - ولقطالى حيبيبات تميرات هبوب لى وليد خالد - فيحال قوت الوليد يجينى جارى يقوللى عميتى ! أب الاقيهو ايدى خلا شى !
دحين اها زحولى الاقنب فى البيكيين العن ضل الضحى دا الانجما حيتين بعدين أنضم معاكون ! انتو اكنكون وقت يرميكون الشاى قعد تنحدسولكون مع زول !!
وجاياكون صادى لا عوقبان ...
ست البنات .
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: أبو الحسين)
|
البرصة .. تلك القرية التى قال عنها الشاعر اسماعيل حسن .. انها من مصادر الهامه الشعري (2)
********************************************************************************
كتبت في الجزء الأول ، ان قرية البرصة ، تتميز بخصوصية تعددية انتماء اهلها القبلى ، وتقسيمها الجغرافي الفريد
بالرغم من صغر مساحة القرية
والللافت ، ان الأنسجام التام بين كافة مكونات اهل البرصة ، لا يقتصر على على سكانها الأ صليين
بل ان وافدين على القرية استوطنوا في سنوات قريبة ، اصبحوا جزءا لايتجزء من ( لحمة ) القرية
فاذكر على سبيل المثال شخصين ، كانا ومازالا يشكلان عنوانا بارزا للإنسجام الوافد ضمن كيان القرية
الأول يدعى ( احمد ) ملقب بود آدم ، وهو طفل جيى به صغيرا مع اندلاع حر ب الجنوب الأولى في الخمسينات ، بصحبة احد التجار من اهل القرية .. فنشأ وترعرع الصبي بين اقران اهل القرية ، واطلق عليه لقب احمد ، واكتسب لسانه بطلاقة ) لهجة الشايقية )
وتحسبه احد منهم |، وكان ماهرا في عزف الطنبور، ويشارك اهل البلد افراحهم واتراحهم ، لم نسمع من احد طيلة زيارتنا للقرية يتلفظ بعبارة عنصرية او فيها نبذ واضطهاد له .
والشخص الآخر ، وكان يدعى ايضا احمد ومعروف ب( احمد الحلبي )
جاء ايضا صبيا الى قريتنا بصحبة امه فى اوائل الستينات ، وهو من منظقة اهلها رحل
فعاش احمد مع اهل القرية وهو وامه ، يساعدهم في فلاحتهم ويجدون له بما يستطيعون
فاصبح من امهر الفلاحين ( وقفازي التمر وحشه )
تزوج وعاش في القرية ، ايضا معززا ن لااحد اعتبره دخيلا عليها
اضف الى ذلك عائلة ( عائلة على العرب ) وهي عائلة مشهور ة لعرب رحل استقروا في قرية البرصة وعملوا في فى بساتينها
وحقولها ، وبنوا لهم بيوتا وتوزجوا من بنات القرية واصبح هناك جيل من الأبناء خليط من العرب الرحل واهل البرصة
هذا التمازج الرائع في قرية كان يلفت الإنتباه بالفعل ، حتى ان الشاعر الراحل الشهير اسماعيل حسن ، وهو كان من قرية ( القلعة )
المجاورة للبرصة ، ولكن كانت له صلة قرابة باهل البرضة .
واذكر انني التقيت به اكثر من مرة في الخرطوم بحكم قرابته بالمرحومة والدتي
وفي جلسة حميمة جمعتني به في داره العامرة بحي السجانة في مطلع الثمانينات
تجاذبنا اطراف الحديث عن البرصة ، فقال لى : البرصة ، كانت محل اعجابي منذ طفولتي
هذا الإنسجام بين اعراق اهل القرية ، كان من مصادر الهامي للكثير من قصائدي الشعرية ، ومن ضمنها ( القمر بوبا )
فهى بحق تمثل نموذجا رائعا لقرى شمال السودان
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: أبو الحسين)
|
Quote: تعرف يا طارق اساساً هو الدكتور متكوك ومورم من الغربة لذا بعمل بالقول عليا وعلى أحبابي حتى يهون ما عليه من آلام الغربة عن الاهل والدار ..... يعني بالدارجة غلفاء وشايلة موسها تطهر
الأولاد ماشاء الله عليهم ندعو الله ان يحفظهم لك ويجعلهم زرية صالحة لدينهم ودنياهم
ولك مودتي وتقديري واحترامي
خالد محجوب |
خالد كيفنك وكل سنة وانت طيب
وتسلم يا سيدي
والله د.يس قاعد يعمل فينا جنس عمايل
الله يديهو الصحة هو ووليداتو
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: أبو الحسين)
|
Quote: والللافت ، ان الأنسجام التام بين كافة مكونات اهل البرصة ، لا يقتصر على على سكانها الأ صليين
بل ان وافدين على القرية استوطنوا في سنوات قريبة ، اصبحوا جزءا لايتجزء من ( لحمة ) القرية
|
نان عليك الله يا عمر يا اخوي... كرم ناس البرصة عموم والعجيمية خصوص موش يخلو الواحد ينسجم فيهم... يكون منهم عديييييييييل كدي... التحية عبرك لكل الأهل والأحباب في البرصة منننننننننن الكرفاب من تحت لييييييييييي البار جلاس فوق...
وأبقى واصل حكي الحديث فوقهم كيف سمح...
كميات مودتي...
أبو الحســـــــــــــين...
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: أبو الحسين)
|
Quote: ويلا لفح كسكسيقتى ولبس كركبى - ولقطالى حيبيبات تميرات هبوب لى وليد خالد - فيحال قوت الوليد يجينى جارى يقوللى عميتى ! أب الاقيهو ايدى خلا شى !
|
يجازي محنك يا الحِكِيمة (بميلان الكاف عشان تدي معناها)!!!
كدي خليني الأترجم لي شوايقة لندن الكَسْكَسِيقَة دي... هسع بحتيها من وين جبتيها يجينا واحد يقول قاعدين ترْطُنو!!!
الكسكسيقة دي يعني الكَاسْكِتة... أو البرنيطة عند الخواجات...
كميات مودتي...
أبو الحســــــــــين...
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: أبو الحسين)
|
Quote: سلام اهل الدار !
كدى اصبرولى الاعدل ويقايتى دى فوق راسى - باقى القيروانى تقيلى بالحيل !
دابى جبت القش للعبور الدارى دى - وجبتلى اشميق من دومة ود حماد لوليد اخوى خالد ود محجوب باقى كان ممجمج - عيللى الحمد لله اسع طاب !
وساعة اخوى خالد ود عمى محجوب جاء كلمنى بيلمتكون دى - بس الريق ما فكيتو - ويلا لفح كسكسيقتى ولبس كركبى - ولقطالى حيبيبات تميرات هبوب لى وليد خالد - فيحال قوت الوليد يجينى جارى يقوللى عميتى ! أب الاقيهو ايدى خلا شى ! |
ست البنات سلام لا يسعني ألا أن ابدأ لك بأبيات لولد الشعراء عاصم بابكر البنا مع بعض التحريف فيها
حباب الشم عزيزة بت البتكي للمكلوفة
محفيه مكفيه الحلّه والجيران كمان وضيوفه
ماالسهرانه تضّارى من الضيف ماسكها الخوفه
أجواده وعطايه وملفحا بالكرم والفيها تب معروفه
ابقي لا داخوول قوم آود حسين نزل من خالتك القرواني دي وجر لها الهباب داك علي الضل ..مالك بتضلعي من كراعك بس لعل مو طعناك شوكي عند البير ... اجري آجنى لابوالحسين بغادي باقي شال الزريبي بدور يضبح لست البنات وقول لو قالولك أدنا الابري والمنقاش باقي داكي الليلي شفتهم فوق جفير خوستو وات آود حُمد احمد ناغم أم الحسين بت سيد احمد التجي تبصار لها الشوكي دي .
أحمد آولدي قوم أمشي لعمتك دي باقي جاتب لك تميرات وسلم عليها ... قوم آالممسوخ مالك مابدورو ات قايلو قوي زي تمرّنا في شندي لا لا آولدي دا اصلو بلادو وديل أهلو.
ربنا يعطيك العافي والصحي يا ست البنات
ولك المودة والتقدير
خالد
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: أبو الحسين)
|
سلام يالعودال وزينيين !
أساعيتى اكنكون كولاكون مرقتو براحة خليتولى البيكيين خلا !
نان انا جاييى احرسوا ليكون ? قالولكون انا ما عندى خيدمى اسوييها عند اهلى ???
نان الجا يحوشلى قشى منو ? أن بيقيت قوت لى منى بت عمى خوجلى ولا ملكة سبأ - كل ويحيدى فيهن تلقالا سيبلى تنسبلبها - البتقوللى منجلى مكسور - والبتقولى اصبعى وارم من شوكة الكيدر !
والاحدسك يا خالد ود عمى محجوب : انا بس مانى قاعدى اضلع ! البتضلع دى ملكة سبأ ! راماها دحشة ود ميلينى من عامناول !
عيللى انا بزح ! طاعنانى شوكة كيدر من تمر ناس جدى ود كروم من زمن الدميرى الكسرت البيوت قبال الانقليس ما يمشوا ! ومشيت لعمى ود حماد يكويها لى عيللى باقيلى غلبتو وكواها فوق عصبى عقلتلى كريعى وبيقيت اب اقدر اقيف فوقها - بس بزح زحيح ساكت !
وان بيقيتوا جيتوا صادين - كوركوليى الاجى صادى - فيحال انا اساعيتى شايلى صنب اجيبلى راس سكر - ولا عوقبان ماشى سوق تنقاسى ابيعلى حيتيتت ليحيمى افورا فوق النار دى وكت ما جيبتولى من ضحيياتكون ليحيمات ولا تورمة املابا خشمى دا - همزت التقيلى - وحسبى فى عجبى - انتو الخلووق بيقوا فسلين وكعبين ! النبى نوح !!
وصادالكون .
ست البنات .
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: عماد شمت)
|
| Quote: كل عام وانتم بخير اهلنا الشايقيه وتحيه خاصة للاخ ابوالحسين والاخ ود المنسي وحاتم... |
الحبيب الفاضل/ عماد عويس (( عماد شمّت ))
مساك الله بالخير وكيف أخبارك يا راجل.. أكيد طلبك سوف تجده في جربات دكتور ياسين حفظو الله لنا يمتعنا بحلو الشدو ويقطع احشاءنا بالألم في غربتنا.
بالمناسبة يا حوش ود الحسين أخونا عماد عويس دا راجل فنان ومطرب ذو صوت متفرد في زمانه لمع في سماء الخرتوم ايام ناس فيصل الصحافة لكن الغربي بعدتو واتوكر في بلاد الجليد.
لك المودة والتقدير أخي عماد وكل سنة وانت طيب والسنة الجايه بين أهلك في الامتداد
خالد محجوب
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: خالد علي محجوب المنسي)
|
بسم الله الرحمن الرحيم
عزيزي عماد ود شمت
كل عام وانتم بخير..
هل من علاقه مع اشرف شمت..
دي القصيده يا عزيزي ..
وانشاء الله دكتورنا الغالي بيجيبها ليك..
القدم ليهو رافع
.................
للشاعر..السر عثمان الطيب
............................
....................................................
القدم كان ليهو رافع
قاسي فرقك يوم اوادع
لو فضل في العمر ثانيه
تاني لابد ليكي ارجع
تاني راجع يا بلادي
ان نسيت ماب انسي مرة
كيف فى بعدك ضقت مرة
كان اخير لى اقعد هناك
اعيش ولو بى كسري مرة
تبقي حلوى في بلادي
عشت يوت فى الغربة امنح
ابكى طول الليل وانوح
كل ساعه اتمنى ارجع
امشي اشد رحلي واروح
امشي اروح لى بلادي
شان اشوف دار الأحبه
اصطفاها القلب وحب
فيها اترعرع تربي
بين حنان خلانو شب
شب عاشقك يا بلادي
إن عطش يسقيهو نيلك
أكلو من ثمرات نخيلك
ياحلاتك ويا حليلك
والقمر يلصف في ليلك
وين مثيلك يا بلادي
يا حبيبه تعالي شوفي
شوفي كيف حالى وظروفي
شوقي نار توقد في جوفي
حار على فراق ولوفي
خوفي تنسي يا بلادي
خوفي تنسي حنان وليدك
فاكري إنو مرق من إيدك
راح جفاك واختار سواك
وقلبو تب ما عاد يريدك
حاشا حاشاى يا بلادي
انت لى عيني نورا
بهجة الروح كل سرورا
جنتي الغنت طيورا
زهرتي الفاحت عطورا
والفؤاد عابدك عبادي.
...................................
حاتم هاشم.
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: أبو الحسين)
|
Quote: بفتش لي في اغنيه اسمها.
القدم ليهو رافع قاسي فرقك يوم اوادع
لوفضل من عمري ثانيه تاني لابد ليك راجع
والله راجعن يابلادي تاني راجع يابلادي..
لونست ما بنسي مره ....كسره مره ...
اتمني ان اجدها بصوت احدي الفنانين او مكتوبة ... |
| Quote: أكيد طلبك سوف تجده في جربات دكتور ياسين حفظو الله لنا يمتعنا بحلو الشدو ويقطع احشاءنا بالألم في غربتنا. |
Quote: القدم ليهو رافع
.................
للشاعر..السر عثمان الطيب
............................
....................................................
القدم كان ليهو رافع
قاسي فرقك يوم اوادع
لو فضل في العمر ثانيه
تاني لابد ليكي ارجع
تاني راجع يا بلادي
ان نسيت ماب انسي مرة
كيف فى بعدك ضقت مرة
كان اخير لى اقعد هناك
اعيش ولو بى كسري مرة
تبقي حلوى في بلادي
عشت يوت فى الغربة امنح
ابكى طول الليل وانوح
كل ساعه اتمنى ارجع
امشي اشد رحلي واروح
امشي اروح لى بلادي
شان اشوف دار الأحبه
اصطفاها القلب وحب
فيها اترعرع تربي
بين حنان خلانو شب
شب عاشقك يا بلادي
إن عطش يسقيهو نيلك
أكلو من ثمرات نخيلك
ياحلاتك ويا حليلك
والقمر يلصف في ليلك
وين مثيلك يا بلادي
يا حبيبه تعالي شوفي
شوفي كيف حالى وظروفي
شوقي نار توقد في جوفي
حار على فراق ولوفي
خوفي تنسي يا بلادي
خوفي تنسي حنان وليدك
فاكري إنو مرق من إيدك
راح جفاك واختار سواك
وقلبو تب ما عاد يريدك
حاشا حاشاى يا بلادي
انت لى عيني نورا
بهجة الروح كل سرورا
جنتي الغنت طيورا
زهرتي الفاحت عطورا
والفؤاد عابدك عبادي.[/QUOTE]
الحبان
شمت
خالد
ابوالحسن
ابوهاشم
سلام
ربنا يقدرنا على طلباتكم
أهديكم لها بصوت صديق احمد والنجار وطارق العوض وودجبارة آخرين
لكم الود
التحية لملك الكلمة والبلاغة السر عثمان الطيب
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: yasiko)
|
Quote: خوفي تنسي حنان وليدك
فاكري إنو مرق من إيدك
راح جفاك واختار سواك
وقلبو تب ما عاد يريدك
حاشا حاشاى يا بلادي |
سنجك ميه واربعطاشر كيف امسيت
يا سلام يا سلام يا سلام القصيدة كلها حلوة والاداء أروع وأبدع وأجمل ... أحلى شئ وشئ يفتت المصارين فت فت فت فتتتتتتتتت صوت ود جبارة في هذا المقطع
تعرف معلومة أقولها لك لم أستمع لمحمد جبارة في الماضي كثير وزي ما قالوا ( البغباك بجهلك ) لكن بعد ما سمعته شكرك ليهو بديت أسمع له جد جد رائع وقمة
كت عارف جرابك مابخلا وأن شاء الله ديمة عامر ومو بالغناء بس أن شاء الله عامر من مجاميعوا يا دكتور ياسين
سوف نزرو موقعك للاطلاع دا كلام كبير نحن برانا مفتفته مصارينا وكمان نبوح بالجوانا
لك المودة والتقدير والاحترام
خالد محجوب
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: أبو الحسين)
|
كتب أُستاذ خالد::
Quote: يا حاتم مسّاك الله بالخير
طبعاً من متابعة البوست عرفنا برنامج الخليفة ابوالحسين.... يوم الخميس من الساعة اربعة بمشي شان يقروا المولد....
لك الاحترام والتقدير
خالد محجوب |
تسلموا يا الحِبان على السؤال والطمأنة علي...
لكن زي ما قال ليكم ود المنسي... يوم الخميس نص دوام وبعدو إنتشار علي الدمام بيت الأراك بالدمام... أما حكاية المولد دي يا خالد أخوي حلييييييييييييلة وحليل أيام جامع سعد والخليفة علي محي الدين... كانت أيام جميلة ربنا يعيدها يااااااااااارب...
كميات مودتي... وأنا موااااااااصل ومتاااااااابع معاكم وبجيكم هسسسسسسع دا بي جرابي ملان...
تحياتي لكل الشباب الإنضموا إلينا...
أبو الحســـــــــين...
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: أبو الحسين)
|
إهداء للجميع قصيدة أُستاذة البركلاوية...
عيد مشروخ...
عيــدك شـــايـل فـــرح العـيـــد
إلا العيــــد لـي عيـدنــا مجـافـي
مره علينـا وما طلانا .. لاقـال لينـا حبـاب وعـوافــي
رتب كل احزانو معانا وخاصم فرحو وأصبح جافـي
نحـن دموعنا بقت سلوانا وانت سعادتك زيهـا مافــي
انت العايش جوا احساسو وبي إحساسك أصبح دافـي
كل الناس عارفين مقدارك وانك راقي ونفسك صافي
رقيـق وحنيّن وطبعك هين وليها عهودك دايما وافـي
ليل الوحـدة طـويل مطاول وليـلك لى ليلاتـنـا مرافـي
همس أحلامك وحلـو كلامك واصل منـك لينا قوافـي
إلا العيــــد لـي عيـــدنا مجـافــي
وانـت معـانـا وبـرضــك مـافــي
*****
عيـــدك شــايـل فــرح العيـــد
لأنــك انــت هــــلال العـيــــــد
انـت العــازف حـبـــو نـشـيــد
وعيـدك جــايب فرحـو جـديـد
وهـايـم بيـن افـراحــو وحـيــد
فـــاتـح قــلبــو وفـــــارد ايـــد
وشــايف حبـو براهــو سعـيـد
عـايش بيـنـا وفـكــرو بـعيـــد
قـلبــوهـِنـاكـا وزهـنـو شريــد
نــابـض فـيـنـا وحـبــو ولـيــد
*****
ويـن مـن عيـدنا بـتـمشي تـروح
وجـــوة الـروح بـتـجـاهــد روح
وليــل العـتمــة بـيـدمـي جــروح
وحــزن الدنـيـا بـيـبـني صـروح
وعـيــد الغــربة فــرح مشــروخ
وميـن لـي غيــرك نـحــن نـبـوح
وانــت الــروح الـداخــل الــروح
وعـطــر العـيـــد الفـيـنـا يـفــوح
الا أفـــراح العـيـــد مــن دونــك
حـاسـيــن بيـها فــرح مشــروخ
*****
وبيـن افـراحـي بتـنـزل دمعـــة
ونـور أيـامـي بـيـصبح شمعــة
ورحلـة شوق ما بتعرف رجعة
وعيـن السـاهـرســاعـة وجعــة
وآهــة العـايـش حبــك متـعــــة
وخـايـف روحو تنازع النزعـة
ومادلك أيـدو ووخايـفَ الفجعـة
وساهـر فيـك ما نـاوي الهجعـة
راجي العيد بـي لهـفـة وسرعة
الا العـيــد مــن غيــرك لوعــة
*****
وعيــدك شــايــل فـــرح العيــــد
الا العيــد لــي عيـدنـا مجـافــــي
وانــت معــانـا وبرضــك مـافـي
للأُستاذة البركلاوية والجميع مودتي...
أبو الحســــــــــين...
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: أبو الحسين)
|
بسم الله الرحمن الرحيم
في حمايا
.........
للشاعر..السرعثمان الطيب
...........................
سلام ياهلنا..
ابو الحسين شرفت حوشك يابن عمي..
اخوي خالد الولييد ضوي البيت..
دكتورنا الغالي الظاهر مشغول مع المولود حفظه الله..
وسلام الي حميع المداخليين والماريين..
.....................................................
في حمايا وفي ضرايا
استريحـــي واستجمي
يا قريبة كما إخيتــــي
أفتديك بالروح ودمـــــي
لا تخافي ولا تهمي
أتكلي الوجع البتاورك
ختّي حملو على كفوفــي
من ضباب الحزن أجبدك
ليكي ممدوات كفوفــــي
لو وسط لهباً مولقـــــد
جوة جوفك وجوة جوفي
ما بيزحزح من عزيمتي
على انتشالك مرة خوفي
والبرٌشّك بي لبيني
تلفا درقاتي وسيوفـــي
نامي في حضن القوافي
وهاك وساداتك حروفـي
لو نهار الصيف سمايمو
بقّت الحر فوق جبينـــك
اتلفحتي التوب طريفــو
ضروة بي أطراف يمينك
كفّك الأيسر مميـــّل
كسكيقة على عيونـــك
واتلفتي تكوسي فــيَّ
ما بخيّب لك ظنونــــــــك
واللّه حتماً تلتقينـــــي
فيكي متحاوشك أصونك
من شتيلة خديرة شبّت
دابا في عز النــــــــداوة
ليك بفِر سعفاتا طرحة
فوقك الضل والطــــراوة
قلبي منقاش لي همومك
للضنا وشوك الشقاوة
وكلما زاد حنو ليكـــي
زاد على العزال قساوة
يا قميرات صيف بلدنا
نورت قبس الأماســـي
راقشي فوق النيل تكشّف
للمراكبية المراسي
وفي النهارات ساوي حنِّك
للمزارعية الشماسي
من دموع جرحك تكتبي
وصفة للموجوع تآسي
ريدي ليك درعاً مدرع
في وشي المحن القواسي
لو عليك زمن الأفاعي
جار وجاك بي سمو ناقع
والخلوق فرّاجا قاعدي
وضاحكي شمات الفواجع
يا الهواك قدري ونصيبي
احتميبي من الصواقــع
سايم الروح ليك رخيصة
صامدة عن حصنك تدافــع.
.................................
حاتم هاشم.
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: أبو الحسين)
|
خالد ود عمى محجوب - سلام -
ومرحب بيى وليدك وربنا يحفضو ويغتيهو -
وقول لابو الحسن اخوى : ست البنات جات هينى وما ليقتك - وختتلك الشنطة المجوز دى - فيها - قرفتن -
وجورم - وديفيقات - وقرقوشى تشربوبو الشاى فيحال لا تشيلو شوغولكون مراييق شى !
والطرد دا فيهو مدينييى وحرجل ومحريب للخواجييى اللت خالد ود عمى محجوب .
وبصل المكادا دا من تقنتنا ومعاهو الطييب والرابول دا ليى معاوية ود عمى كرفس -
وخورتايت العطرون دى ليى الملكة ملكة سبأ - معاها حيبيبة الحيلبى دى - وحبة تمرات اللات
بركاوى من تمر خالى عباس ود كروم الرحمة وسادتو .
وقول ليى منى بت عمى خوجلى : جبتلك صحن الدبكر دا للبوش الليل البينييى -
والطيرقى والكركب ليى ماجدى بت عمى خوجلى - والطريد الليل الكورشة والكيدينداييى دا مافى
زول يشروطو ولا يشيل منو ولا حببايى ! انا جايباهو ليى حبيب نورة الوليد الزيين !
وقوفة القونديلا دى ليى نور الهادى فيحال بيشكى من المى المر فى الخليج ! يا يمة الغربى
قطعت قلب الوليد ! ربى يصددو بالسلامى لامو !
ست البنات .
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: أبو الحسين)
|
كتب الأُستاذ/ أحمد خضر...
Quote: الحبيب ود الحسين
من زمن وانا متابع اهلى وحبانى وكل يوم بتاوق ليكم زى متاوقتك لينا فى بوست الامتداد
ومجهود مقدر منك ومن كل الاخوان المتابعين ومزيدا من الابداع والتواصل
الكلام كتير واكيد بجيك راجع
احمــد خضــر |
الإمتدادي ا لأصيل... أحمد ود خِدِر...
تسلم يا اخوي ومتاوقتك دي زادتنا شبرين لا فوق...
دعواتي ليكم يزيد لمتكم الحلوي ديك ويجمعكم دايماً في الخير... ويحفظكم من متاهات الزمن...
كميات مودتي لك ولكل من بي غادي وأولاد عمي طارق جبريل وإخوته الكرام... وكل أهلنا بالصحافة... وأبقى قريب...
أبو الحســـــــــين...
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: أبو الحسين)
|
كتب أُستاذ/ خالد محجوب...
Quote: المبروك الحنين ابوالحسين
مسّاك الله بالخير
شي لله يا حسن يا حسن يا سلطان الزمن
كنا في صغرنا نتبع شباب الختمية بشندي فوق، وطبعاً أهلنا كلهم ختمية،،، ينشدون هم
الساداتي الأولياء بيكم توسلنا
ونحن نشيلها معهم بنفس اللحن والتحريف
أهل الفتاتي والليقماتي ليكم توصلنا
مادام فارّق المولد من زمن... أقرأ لي لوليدي والفاتحة وأدعو لو دعاياً كتيييييير
لك تقديري واحترامي ومودتي
خالد محجوب |
الغالي خالد...
مساك الله بالخير والرضا...
كدي الأديك اللوحة دي من شباب الأراك... وأجيك راجع أقرا ليك لوح لوحين من المولد العثمان..
كميات مودتي...
أبو الحســـــــــــين...
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: أبو الحسين)
|
بسم الله الرحمن الرحيم
يا السافرت
...............
للشاعر.. طه وداعة
......................
يا السافرت قمت رحل
ما عارفين سنينك كم
لا كلينا لا ملينا
لا فارق قليبنا عشم
نصبر في قليب الوالدة
وإحنا قلوبنا تنزف دم
قلب الوالدة ديمة عليك
وقلبك زي حجر مُنصم
نمني نفوسنا بي لقياك
راجنِّك تزيل الهم
وتبخل بي رسالة تجينا
تفِرح للأهل من جم
ما دايرين قروشك يكفينا
نبل الشوق ونتسالم
أبوك ما إنت عارفو براكَ
زارع وللتمر لملم
كل مناهو ترجع ليهو
وفي بيت الحلال تنجم
نحن عشمنا تبقى معانا
ونرجع زي زمان نتلم
نتخاصم معاك وبرضو
نرجع تاني نتبسم
رنين تلفون بيطلب
بيتنا جيت إتكلم إتبكم
من أول عرفت انا صوتك
قبال تبدأ تتكلم
لو تسأل عن الوالدين
ارفع إيدك إترحم
وليك آخر وصية بقولها
لو ما جيت يكون أرحم
...............................................
حاتم هاشم.
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: أبو الحسين)
|
يا أبو الحسن اخوى : دحين خالد ود عمى محجوب قاللى : ناس الجمارك قالولك الشى الفى المجوز دا بس ما
عيرفولو سهمتن يعرفوهو بيها !
يعنى اكنهون لا عيرفوا الحرجل - ولا المحريب - ولا العطرون - ولا حيبيبة الديفيقات !
يا يابا ان بيقى كدى : امركا - امركت العدو - نان وكت ماب يعرفو الحرجل والعطرون شن طعمون !!
دحين الناس دى فيها فايدى !?
بس نعلهون ما اكلوا
القيرفتينايات شى ??!!
وانا اساعيتى قوت لاخوى خالد فيحال جانى مهجوم وملخوم جاء يقوللى الميجوز الليلك مقبوض فى الجومروك !
فوتلو الوصيى دى ليكا يا ابو الحسن - والرسول ان ما وصللتها للمسعول فى الجومروك :
تيميراتى ديلا والديفيقات - من تمر جدى كمبال وجدى ود كروم ( الرحمى وسادتون )
وعازملنا فوقو السيد على !
دحين قول للمسعول فى الجومروك دا ان بيقيت لمستلك فريد تمرايى ايدياتك
عيللى يكنكيشين ! وتلحق الصح وحات ربى !
والا كمان ان خليلتك كلبا بوليسى يشملنا أغراد ست البنات المرسلاهن
ديل فيحال ينججيسن لينا - عيللى تنظكر كلامى دا وتندم حد الندم ما
يقيف !
ست البنات .
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: ست البنات)
|
الحبيب الغالي الخليفة الحنين أبو الحسين
مسّاك الله بالخير
يا أخوي اولاً عرضّك القتولي دا على ما أظن ما نجح تنزيله حاول مرة اخرى خليتنا في ناراً تسووي جووووووو بندور نشوفو عليك الله في سراع.
الشي التاني البدور احدثك بيهو يا خوي أت بقيت منشغل بالحيل وكل مانجي مانلقاك في الحوش
ونقوم نمشي علي بت عمنا ست البنات ... والله يا ابوالحسين ضمه حلة لحمتا تجقجق في النار وبراد شاهياها ما بنزل مادلا عليه بنيتا كريمي بالحيل
وحد ما أخل الحوش ألقالك الدكتور السنجك مجدوع في عنقريب هباب فوق الضل وخاتي راديهو جنب اضانو ويسمع في ود جبارة
ها زول والله بعدين ماتلمونا كان كسرنا ركبة عند ست البنات
ولا اقولك جيب لك جرم وفول الليل مررو ومخلاية قنديل وخلهن لينا في الحوش ولا تقفل الاوضي البطبلي نحن بنجي وراك والله القعدي صعبي وات مافي وما نلقى شي نحرك بو ضروسنا ديل
أمس جيت والله بس لقيت لي عنقريبن وحيد راقد فيهو الجنى حاتم والحوش خلا وسعلتو مافي زول معاك قال لي انا من ضهراً بدري ومافي زول جا وهسع بدور اشيل البيت باقي ترك أم الوليدات بلا مشهاد وكمان بدور إدلا يجب لو قش للبهايم وسبروق بامي باقي وليدات أخو بجو بكرة من الخرتوم لحبوبتهم اشوفوها وتشوفهم... أنا قت لو أنا ذاتي بمرق معاك أشيل بت عمي ست البنات أمكن ألقا الناس ديل هناك
لك مودتي وتقديري واحترامي
خالد محجوب
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: أبو الحسين)
|
Quote: يا أخوي اولاً عرضّك القتولي دا على ما أظن ما نجح تنزيله حاول مرة اخرى خليتنا في ناراً تسووي جووووووو بندور نشوفو عليك الله في سراع.
|
خالد أخوي صبحك الله بالخير والرضا...
والله يا الحِبيِّب مافي شغَلةً كدي تبعدني من لمتكم دي ومن الحوش وقااااااااعد متحكِّر من الصباح البدري لا عند المغيريب المتأخر... ومتااااابع...
وهسع قلت كدي الأديك اللوح الأولاني دا لاحدي ما أعالج ليك صورة شباب الأراك...
اللوح الأول من المولد العثماني...
بسم الله الرحمن الرحيم
الحمد لله الذي اصطفى لمحبته الذات المحمديّة ☼ من القدم وجعلها واسطة لكل إنسان☼ وأبرزها أولاً في حضرته ألوا حديّة ☼ وفرع عنها سائــر الأكوان ☼ وأمدها بأنواره العظيمة الشعشعانيّة ☼ وأوصل إمدادها لجملة الأعيان ☼ أحمده أن جعلنا من هذه الأمة المرضيّة ☼ وكملنا بانطواء جوف حجاب هذا الدر المصان ☼ ورحمنا بهديه وسنته القوية ☼ وشرفنا بنزول هذا القرآن ☼ وطهر قلوبنا بحب هذه الجوهرة الفرديّة ☼ فصارت قلبنا طاهرة مطهرة من الطغيان ☼ وأفاض على سرائرنا من الود لهذه المعاني العلميّة فنطقنا بالحكمة التي تشرف بها الثقلان ☼ وأهّل عقولنا للتأمل فاقتدينا بتلك الأفعال العليّة ☼ فرقينا على درج العناية لأعلى الجنان ☼ وأشكره على ما خصنا من فضله به من مزيّة ☼ وهي تأخيرنا في أمةٍ هم شهداء الله بحق ونصران ☼ وأيدنا بالعلوم المكنونة المخزونة الإلهية اللدنيّة ☼ وذلك باقتفائنا لاثار نقطة الوجود وسر العلمان ☼ واشهد أن لا اله إلا الله شهادة أتحقق بها وأشهد إفراد الأحديّة ☼ وأعلو بها إلى منزل الموحدين المنزهين الحق عن المكان ☼ وأشهد أن سيدنا محمداً الذي من ميم اسمه امتدت سائر العوالم الخلقيّة ☼ وهو عبد الله ورسوله وحآء رحمته التي رحم بها الملوان ☼ ومن ميمه الأخرى تعينت مياه العوالم الحسية والمعنويّة ☼ وامتلاؤها من أنوار وأسرار وإذعان ☼ ومن دال ذلك الاسم دامت نظامات الممالك الملكيّة ☼ ودامت صولت الدين ببركته ونفعها في العالمان☼ صلى الله عليه وعلى آله واصحابه ما ظهرت أسرار حكميّه ☼ وما برزت علوم وحكم ومعرفة ألزم في البعض الكتمان ☼ اللهم صل وسلم على قبلة تجلياتك الربانيّة ☼ محل نظرك من الوجود عالي الشان ☼ كتاب أسرارك المنطوية الحقيّة العلميّة ☼ مظهر الرحمة من حضرتها مجلى اسمك الرحمن ☼ وعلى آله وصحبه ما استقامت الملة الحنيفيّة ☼ وما ترجم بلسان الشريعة و الحقيقة ترجمان
اللهم صلي وسلم على الذات المحمدية...
واغفر لنا ما يكون وما قد كااااااان...
كميات مودتي... لامن أجيك راجع...
أبو الحســــــــــــين...
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: أبو الحسين)
|
Quote: وعازملنا فوقو السيد على !
دحين قول للمسعول فى الجومروك دا ان بيقيت لمستلك فريد تمرايى ايدياتك
عيللى يكنكيشين ! وتلحق الصح وحات ربى !
|
ست البنات لا حدهن...
صبحك الله بالخير والرضا...
إيديهُو إنشاء الله بالييبِّسِن ليهو... كان فتحلك شنطتك المجوز الفيهِن حويجاتك المرسلاهِن لي ود المنسي...
خواجاتاً ماب يعرفو الينفعُن من اليَضُرهُنْ!!! أيْ تُبْ!!
لكن تاني ساعتِك التخُتيلِك حاجات زي دي زي دي...
عرِّضيلُن سيدي الحسن... وتور الأراك ساكن الجبل...
ماااااااااااب تجيهِن عوجي شي...
كميات مودتي... بعدين أنا أبو الحســـــين... جمال أبريدة من المقـــل ماني من نوري شئ... شايفِك سألتي قبل كدي في مرة دَاكْتَ الزمن!!
أبو الحســـــــــين...
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: أبو الحسين)
|
يا ابو الحسن أخوى -
مرحببك ومرحب بى ناس المقل والحيجير كمان - وبريضكون مننا - ماكون
بوعاد مننا شى - يانا لحم ودم !
اسع دحين كوت جايى أخوت التصويرى اللتى فيحال أكفلكون العين ( باقى
انا والبعشوم ماب ننفرز ) !
لكن قوت وحات تور الاراك بس عيللى اخوتها ليكون - عيللى بس ما
عيرف !
وكوت قوت لى ياسيكو اخوى الميبيريك عافى منو ود القبايل ! عيللى
كوركلو ماهو فى !
دحين انت ماب تعرف تورينى واحدى واحدى لامن اشههل تصويرتى دى ?
قوت ناس الجومروك ان شافوها يبقى يخافو منى ويخلولى غرودى ديل
ماب ينبشوهن لامن يصلننك !
وكتتر خيرك يا عشاى .
ست البنات .
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: أبو الحسين)
|
Quote: أبو الحسن اخوى : دحين خالد ود عمى محجوب قاللى : ناس الجمارك قالولك الشى الفى المجوز دا بس ما
عيرفولو سيهمتن يعرفوهو بيها !اكنو الشى ان بيقى ما عيرفو هون -يا شيتن كعب ?? والله دا جخ دا ! هون
يايابا قعد حريمون يعرفن ديهنايى ينطرشنبها فوق جيسيمن ولا حيبيبة كرار يسوننها فوق صوفن المتل
الليل عبورى دى - مطيررات نيشن عيللى الشواطين كدى ! مى حيبيبة المى يلشقينها فوق كريعاتن
اليبسننهن من الساساق فوق السوق والرججل ديل - هين قعد يهبطن فوق واطات الله دى ! حسبى
فى عجبى مينهن ! |
أبو الحسين
وست البنيات لا حدهن ،،
تحيات وأعجاب وسلام وشوق ليكم ولي الديار ،، بمنسابة الكوت الفوق دا :
بعد دا انحنا ولحد ما ناخد كورسات تقوية عايزين ترجمة على الشريط،،
المشكلة ما أنا : المشكلة عيالي ،، والله ديل عايزين معسكر صيفي
في الدوداب،،
الله يستر،،
واصلوا عليكم الله ،
أخوكم / عبد اللطيف بكري - الجالية بالأبيض،،
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: أبو الحسين)
|
إخوتي الكرام...
مساكم الله بالخير والرضا...
بمناسبة الإخوة الإنضموا إلينا حديثاً أهديكم الجزء الثاني من قصة حُمد إحمد التمرجي...
حمد إحمد التمرجي ـ الجزء الثاني
مشى باع العّز في السوق وجاب القريشات لى أبوهو وجاء ... فضَّل للسفر كم يوم كدي ... أبوهو ساقو قطع لو جلابيي اللت دبلان , وعراقيين اللات دَمُوريي بى سراويلن , وأدوهن للترزي , وأخد لو جزمة باتا بيضاء , وطاقيي حمراء ... وحمد احمد مكوزم ماد تلاليشو , مااااااهو راضي بالسفر ده شي ... عمرو ما عدا من كريمي لا غادي ... زمااان قبّال يعرف كريمي والمشي ليها .. كان حِرِد مع أبوهو مرة , مسك التحتانيي بالبحر بى كرعيهو ومرقها في الحامداب , مشى قعد لو مع ناس هناك ... , وبقوا يكوسوا فيهو بى هِنِي ما خلولن بكان , وأمو وأخواتو بى بكياتن , بس قلبنَّها مناحة عديل , وخيلانو وأعمامو بالنَبِيشِي أكلوا لحم أبوهو .. ما خلوا لو صَفِحْةً يرقد عليها , واقع في الشِنّيف والهَرَجِي كل يوم ...نامن قرب يطفش حتى هو ... خسوساً واحداً في خيلانو , مسمنو المَكَاجِر ... إضنيهو مفندرات بتل الطانجة اللت اللحم , نضَّام نَضَمِيّاً , تقول مَحَنِّكِنُّو في الاذاعة اللت أم درمان زي ما قاعد يقول لو هو ... يجي يكوس الوَنَسِي مع الناس و الناس ويشردوا منو ... ماب يخلي لو زولاً ينضم معاهو ضمّه ... إن بقيت نعست وقعدت تنشهق لو آب يفكك ... وإن بقيت نمت عديييل فوق كتفو يهزك يصحيك وينضم معاك ... منجض ناس الحِلِّي نجاض ... ود حُمدين مرة قال لو : ناس الحيكومة ديل مالن آب يشغلوك معاهن ..؟
على التَعَتِّر يوم من الليام ... عوض الله ود أب كرُّوقة ...شدّا حمارو على الحامداب ... ماشي يتَمِّنْ لو شوالات اللات حَرْجَلْ وشَمَار , يجي يبيعن للتجار هني في البلد , يتمكسب فيهن , حايم في السواقي اللت الحامداب ... بلا لقى لك حُمّد إحمد بارك لو في حيضان يحش في القش ... لكدو بالعصا فوق قفاهو براااحه ... حمد أحمد اتلفت قال لو هَي هَي :- حتى أنت جيت في بكان السفر ..؟ قايل نفسو سافر مرقها في بلداً طيرا عجمي وهي المسافة كلها ساعتين بالحمار , بس مافي زولاً قايلو يقبّل على الجيهي ديك ... كراهو من قفا وركبو في الحمار جابو صاد لى أهلو ... اليوم داك أمو ضبحت لها عَنَاق وقسمتها للحيران في الخلوة ...
.............................................................
وجاهزين لترجمة أي كلمة صِعِب عليكم فهمها...
ولكم مودتي... وتحايا الكاتب عبد العظيم الطاهر...
أبو الحســـــــــــين...
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: ست البنات)
|
Quote: انا اصلى الزول اب خشما كتير بس مكججنا - ولاب استنضفو !
نحنا الناس الخشومون تقيل شن عيرفنا فيهون ! |
ست البنات من جم
كيف أمسيتي علك عافي
بسعل من حويلتك وصحتك .... دحين أنت قاعدي في ياتو بلد... شقّيش بلدك النعم ني قريت في واحد من الجوبات الرسلتيها باليد مع لوري سعد وحُمد عتمان للجنى ياسين وكترتي من الدعاء ربنا يرجع لناسك وبلدك الحلوة
والله الزول النضام دا كان جاك علا يطفشك طفشتن فد واحدي دا زولاً ما بنقدر خشمو بلا البليلي في النار تهجك.... أحمد كل يوم اقول افتحي الكميوتر اللشوف ست البنات لما افتحو ليهو بوستك اقول دا انا هي وينا واقول امكن مرقت وبتجي بعدين بعدها بشوي تاني بعدين جات كدي امكن تكون جات ... افتح تاني يومن اسود القت لو عمتك ست البنات بتسلم عليك ندمني عليها حارسني من يومها زي القاجي لو شرك للطير ومنتظر (( عيني باري وماشاء الله عليهو ))
سلمي لي علي اخيلتك المعاك واخوانك وفي رعاية الله وبقي عشرة علي رويحتك وأختي الاتموبيلات
لك المودة والتقدير والاحترام
خالد محجوب
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: أبو الحسين)
|
Quote: اسع دحين كوت جايى أخوت التصويرى اللتى فيحال أكفلكون العين ( باقى
|
قولي تسري العين...
هسع عليكي الله طعم الكلام دا بي يجي من خِلِقْةً مايلي!!؟؟؟
Quote:
لكن قوت وحات تور الاراك بس عيللى اخوتها ليكون - عيللى بس ما
عيرف !
وكوت قوت لى ياسيكو اخوى الميبيريك عافى منو ود القبايل ! عيللى
كوركلو ماهو فى !
|
أها أول من تبادي...
تقومي تضغطي فوق الأيقونة التحححححححت ديك الإسمها ملفك!!!
ياها دي...
Quote:
· · · أبحث · ملفك ·
|
كدي أبقي ضاغطي لامِن أفطر البهائم ديل وأجيك صاد!!!
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: أبو الحسين)
|
أخوى عصام - وياسيكو الميبيريك -
مرحببكون - وصباحكون زيين -
انتو صيح انجيتو الناس ديلا مالون غامليين ويشياتون من الشى البتصور كدى ?
الشى دا فييو كلام !
باقيلكون امركا يبقى كايسالا زولا فيهون ?
والآ يبقى التبش والبيرسيم ديل جايبنهون من بوكانن مو هيلون - من ساقتن تانى ?
ويا عصام انبقى عندك سوقنا الليل تنقاسى ما تخوتو لينا النشوف بيلييم ناسنا كمان !
ويا منى بت خوجلى اخييتى - ما قيديرتى تعرفيلك زولا من ناسكون فى الناس ديل ??
يا حيليلون بس منفرجخين بى خدارون فى الدايمى دى - ناسا ماب يعرفوا العيجريف والبوبار
والتقا -
نحنا اصيلون ناسنا مابيعرفو الفلقاصى ضوممة !
وهيديماتون انقططعن فوقون - بس بركة الليقولون شيتا ينبللاموبو !
ست البنات .
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: أبو الحسين)
|
Quote: أبو الحسين
وست البنيات لا حدهن ،،
تحيات وأعجاب وسلام وشوق ليكم ولي الديار ،، بمنسابة الكوت الفوق دا :
بعد دا انحنا ولحد ما ناخد كورسات تقوية عايزين ترجمة على الشريط،،
المشكلة ما أنا : المشكلة عيالي ،، والله ديل عايزين معسكر صيفي
في الدوداب،،
الله يستر،،
واصلوا عليكم الله ،
أخوكم / عبد اللطيف بكري - الجالية بالأبيض،، |
صديقي أُستاذ/ عبد اللطيف...
مساك الله بالخير والرضا يا اخوي وطلتك دي قاعدي تطولنا كم شبر كدي لا فوق... بس لا تقطعها شئ...
موضوع الترجمة دا... نحن متابعيييييييييين أي كليمةً كدي ماها واقعي شئ قاعدين نقعِّدها للناس... عشان كمان الجيل الجديد دا...
كميات مودتي... ولكل الإخوة بجمعية الأبيض بالرياض...
أبو الحســــــــــين...
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: أبو الحسين)
|
Quote: يا سلام عليك أخ عصام
شوف التبش دا
كلو يكون من الأراك جزيرة بجبوج
لكن مسعول من الخير الناس ديل كلهن متبلمين مالن |
والقاعد داك يا د. يس... دحين ماهُو عبد الله ود السقيد الجالب الماقَات دا؟؟؟
التبليمة دي يا دكتور نسيت إنها من ثقافة الصَبْيَنة تتذكر زمان إذا كان في حفلة في بلداً تاني ماها بلدك... موش أهم حاجة تعملها العمة للتبليمة؟؟!!
حقيقة الأخ عصام رجعنا لي أيام جميلة وخصوصاً حوش ست نور لو سمح لي نقلت منو بعض الصور بي جاي يكون ما قصر...
كميات مودتي...
أبو الحســــــــين...
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: أبو الحسين)
|
ياسيكو أخوى المبروك -
الله يخليك - عيللى ما فييى بهم ! نان انت ما شوف البروفايل الليلى ! البهم بس اجيبو
من وين انحسبت الله !
وبعدين ويليد خالد وحات ربى طفانا كولنا - الزول بس ما كان يخوت صورتو مع القمرى دى
( الله يخفضو - وما شاء الله - والله واكبر )
عيللى كدى الاخاليك تانى : والله خالد ينبوبربو فيحال يسعلنى الله التقول قال عوع وطرشو !
ان مو اللون !
العيوينات والصوف الاسود والريويحى السمحى - ديل كولهن هولنا - الخواجييى التخوم وتصر !
خالد دا باقيللى ماكيللو هينين اللات قونديلا من اللتنا بالسرقى !
اسسع خالد يجى يهرج فى نضمى دا - ويقوللى انتى شديتى فوقى مع ياسيكو ! باقى قببال كدى
تاهمنى بالشديد فوقو مع أبو الحسن الويليد أب خشمن تقيل دا !
ان سعلك منى : قولوا بس ست البنات دى لى دوريينى ما رأيتا !
ست البنات .
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: خالد علي محجوب المنسي)
|
Quote: تصويرتك ما شاء الله عليها إلا ما بتلحق حقت يحمد ود خالد"طالع على أخوالو"
مع الأحترام |
الحبيب الفاضل دكتور ياسين ( سنجك ميه واربعطاشر )
مساك سعيد
تعرف كان في واحد رباطابي تزوج ليهو واحدة شايقية وسكن معاها في كريمي ... ولدولو وليد والوليد شلخو شايقي... ولمن كبر الوليد مشى زيارة لاهلو في ابوحمد... في واحد من أهلو أتغاظ شديد من شلوخ الوليد وقام سألو ... دحين آ محمد أحمد وليدك دا شايقي ولا رباطابي
قام رده لي قالو وليد رباطابي مافيها شك علا رخصتو في كريمي
نحن بنقولك أحمد دا سوداني وجعلي علا مرخص في المجر
عليك أمان الله من أخوالو ماشال ألا اللون الجنى سوداني في كل شي ان قت النخيري والخشيم والشعر والعوينات السود .. في مجري عويناتو سود
والطبع طبعا سوداني وكان داير تهوشو شكرو اها شن قولك في مو جعلي
لك كثير احترامي وتقديري دكتور ياسين
خالد محجوب
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: أبو الحسين)
|
يا خالد ود عمى محجوب - حبابك -
عاد الليلى ضيحكتلى جينس ضيحك فى الدينى دى !
الله يديك العافى ويخليلك ويليدك يحمد ويزيدو ( ان بيقت امو نعيمى !)
انت يا خالد اخوى لا تاكول فى خاترك من حديسى دا - انا وحات ربى قعد اشوفكون ميتل
اخوانى ومشغولى بالحيل عليكون !
عارفى وليداتنا طيبيين وقليباتون روهاف ( وقعد تشيلون الهاشمييى مرات مع الناس الغوربا
وماب يدورو ينلومو شى !
عيللى الاوصيك : اللوم مرات قع يكون ضرورى - ان بيقى الزول ماهو منوككد من الزول
القدامو - ما تقننب للهاشمييى فيشان تشيلك عيللى فقطن مع الزول الهميم ( الهميم دا
جارنا فى البلد ) سامعى باسمو عن ناس ابوى الله يرحمون .
دحين اسع عندى ليك خبرا بالحيل سمح - لا عوقبان بقولو ليك - بس ان نيسيت ظكررنى لا
تنسى انت كمان .
ست البنات .
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: ست البنات)
|
الحنيني الزيني أم خشمن ينقط عسل
مساك سعيد باقي لي انت في دي الساعة قاعدي في الكميوتر يعني كلامي دا بصلك حار سنسنتو مريمة هسع في الصاج باقي نحن ناس كسري مانا ناس قراصي زيكم والمره عندنا كان ما بتسوي الشاي الاحمر مزبوط وتعوس الكسري بتبور في بلدنا
كيف حالك ياست البنات والله اليوم السعيد النسمع ضحكك وجعل ربي العليم ايامك كلها ضحك وسرور ويبعد من طريقك كل شر ويوقفك شقيش ماتقبلي ويعدل خطوتك ويفتح ليك ابواب خيرو جووووووو
ماكي رايداني حليفي ألا بقولك أنا ماعاد ازعل من زولاً تب وأنا كت ظاني أتي زعلتي مني لما قت ليك قاعدي تقطعي فيني مع إخيّك ابوالحسين لكن اتي بردتي بطني وقتي ما بتزعلي من زول ضمه
اي بالحيل فوقي هوشة وغضب الجعليين لكن الحبان والاخوان الأصدقاء بشيلهم فوق رويشات القليب
والله وربي بشهد من المجادعة في الحديث معاك كني بعرف من زمن ما التقول يا دوب ليهو ايام وكمان عبر الأثير
لك كل الاحترام والموده يا ست البنات
خالد محجوب
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: أبو الحسين)
|
Quote: ياسلام عليك يا أصيل ،، يارقيق أنت ونبيل ،، نضمك حلو وهمسك سلسبيل،،==
|
الشُكُر الزي دا ياهو القاعد يخلينا نطلع من طورنا ونجيب المدكَّن مدَكَّن ونفتح القساسيب القديمي ونطلع ليكم كل جميل...
سلمت يا ابن عمي... ووعدك بعدم الإنقطاعي يدينا دفعة للمواصلة...
كميات مودتي...
القساسيب: جمع قِسِّيبي... وهي إناء كبيييييييير كدي في شكل برميل لكن أكبر شويي يخُتُو فيهو العيش والقمح والحِبوب بأنواعها... وأيضاً يختو فيهو ما ندر من التمر (زي القُنديل والتمود) عشان يسربِقُو منو على طول السنة... أها يسربِقُو منو دي خلو ست البنات تجيكم ليها!!!
أبو الحســــــــين...
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: أبو الحسين)
|
Quote: اها يا منى اخيتى وكت جايى ترسليها لأبو أييى الازيدا ليكى !
الشايقى والجعلى مشولون حفلة وبوش ! والواحد ياكول ويدفع فى الكشف - قام الشايقى دفع وضربلو طلقيتين من البوندوقييى اللتو - الجعلى فكرلو فى شيتا أخير من السووا الشايقى - قام دفع - ورماها قونبولى من جيبو !
ست البنات . |
معليش يا ست البنات...
مشاركة للترجمة فقط... بطلب من أُستاذي عبد اللطيف الشايقي...
البوش:: يعني باختصار كدي العيزومة الفيها كشف للدفع...
ولو عاوزين كان قاعدين يسوو فيها شنو بجيكم راجع ليهو!!!
مودتي...
أبو الحســـــــــين...
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: أبو الحسين)
|
Quote: الحبيب الفاضل دكتور ياسين ( سنجك ميه واربعطاشر )
مساك سعيد
تعرف كان في واحد رباطابي تزوج ليهو واحدة شايقية وسكن معاها في كريمي ... ولدولو وليد والوليد شلخو شايقي... ولمن كبر الوليد مشى زيارة لاهلو في ابوحمد... في واحد من أهلو أتغاظ شديد من شلوخ الوليد وقام سألو ... دحين آ محمد أحمد وليدك دا شايقي ولا رباطابي
قام رده لي قالو وليد رباطابي مافيها شك علا رخصتو في كريمي
نحن بنقولك أحمد دا سوداني وجعلي علا مرخص في المجر |
اللهم أحفظ أحمد... وأبو أحمد وأم أحمد... وكل آل أحمد... يااااااااارب...
النكتة حلوة يا الحِبيِّب... لكن لا يبقى جماعتك ديل... قامو قالو نعمل ليهو مطارق لا تِحِت صاطو وشي الولد!!!
مودتي...
أبو الحســــــــين...
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: أبو الحسين)
|
كتب أُستاذ/ خالدQuote: ماكي رايداني حليفي ألا بقولك أنا ماعاد ازعل من زولاً تب وأنا كت ظاني أتي زعلتي مني لما قت ليك قاعدي تقطعي فيني مع إخيّك ابوالحسين لكن اتي بردتي بطني وقتي ما بتزعلي من زول ضمه
اي بالحيل فوقي هوشة وغضب الجعليين لكن الحبان والاخوان الأصدقاء بشيلهم فوق رويشات القليب |
زي ما نحن شايلنَّك وكل من يطل علينا في قلوبنا... وندفق ليكم مودتنا ومحبتنا حنان... ما أروعك يا إبن عمي... والتحية عبرك لكل أهلنا وأحبابنا أبناء عمومتنا الجعليين...
Quote: والله وربي بشهد من المجادعة في الحديث معاك كني بعرف من زمن ما التقول يا دوب ليهو ايام وكمان عبر الأثير
|
والحمد لله يا إبن عمي بي كدي أبو الحســـين ينوم مرتاااااااح البوست أدى غرضو بالزايد شويي...
نسأل الله يزيد المودة والإلفة والخوة والمحبة بيننا والجميع يااااااااااارب...
خالص مودتي... لك ولزينة البنيات.. ست البنات...
أبو الحســــــــــين...
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: أبو الحسين)
|
Quote: معليش يا ست البنات...
مشاركة للترجمة فقط... بطلب من أُستاذي عبد اللطيف الشايقي...
البوش:: يعني باختصار كدي العيزومة الفيها كشف للدفع... |
الحمد لله اللحقتنا بالترجمة ، والله كت فاكره حفلة (بوش) فول وموية جبنة
قلت واشريري أهلنا بلغ بهم التهميش شأواً بعيدا لدرجة حفلاتن بقت بوش ،،
==
بنات خوجلي ،،
أنا من زمان أقول البنيات ديل حاسي كأني بعرفهن ، أتاريهن من عندياتنا،،
يافخرنا،، كل يوم نطولنا شبرين يا أبو الحسين لامن نلحق منوت،،
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: أبو الحسين)
|
أخوى عبداللطيف ود عمى بكرى - حبابك -
ومن زمان بشوفك تتاوق وتصد بس مابعرفك ليه مابتدخل فى لقدابة ابو الحسن - أكنو نضمنا ماك
فاهمو ???
اها ابو الحسن ينبارك ترا عد يشرحلك - انشاء الله فيهم شى !
عيللى جاييى اقولك : انا مانى ساووى اديشنال شى !
دا لينقويستكس شايقى !
وأمانى كييف قاسى ! وحات ربى الكلمى تطلع ميتل اتتكنها مارقى من الميخيخ ! لامن عيونك
يدميعن - ميتل القاريشلو تلات بصلات غولات وحارات وما سووا فوقن لوقمة القراصى
لححقنياها لاساعيتى !
وفى امان الله - ولا تفوت بيكيينا دا -
ومالك ماب تغشا لقدابتى - ? مو بعيدى - هينوكا .
ست البنات .
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: أبو الحسين)
|
سلام -
انتو البوطان مشوا ويين ??
انا عاد جاييى احرس البوكانين وححدى ?
أساعيتى كوت فى لقدابتى ليقيتا خلا !
وصديت جييت بيى هينى لقيت لقدابة ابو الحسن أخوى دى حتى هى خلا !!
مو أفيئ عليكون !!!
اسع ان عز منى بت عمى خوجلى - وبهم ريقييى بت العيبيد بس انطلقن وجن اكلن
تيميراتى الشاراهن ديلا - ولا قبللن عليى حوض برسيمى دا عدممننو ليى الحبايى - بس أقول
اشينو ??
دحين رسلولكون واحد فى البوطان ديل اليحرسلى لقدابتى بيغادى - دحشة ملكة سبأ دى تجى
تفرطقلى الكبد - مسنداهو بالفيلقى وجارالى فوقا غيسين شوك !باقى موديرى الكوشر الليلى من اول البارح !
ست البنات .
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: خالد علي محجوب المنسي)
|
Quote: خالد ود عمى محجوب - نعلك طيوييب -
عاد حديسك دا بالحيل ريححنى وسرا قلبى انا كمان - نان باقيلكون انا عيرفتكون ماها مفررحانى - يسعلنى
الله ميتل اتكانى طولتلى شيبرين -
وميتل اتتكنى بعرفكون ليى زيمون وزيمون !
وبيقيت بس البيكيين دا ماب ادور افارقو ضوممة !
أساعيتى ديميعاتى قرربن ينزلن -باقى انا قيليبى دا كييف ريهييف !
ودحين انتو وينو أخوى ياسيكو ! نعل ماهو حاسس شى ??
ست البنات . |
سلام اخيتي ست البنيات
كيف حالك علك طيبي
تسلمي يا الزينة وتسلمي يا العديله وتسلمي ويا قفانا ويا البلزينا قدّامك وتزغردي لينا
وتذكيرنا انو أماتنا يوم ولدننا كحلّنا عيونا بشطه وتردّي لنا كلام ابواتنا الرجال مايشوفو راحت كرعيك
بذكرك ما قلتي لي الخبر الزين والدسيتي مني المري الفاتت شنو ؟؟؟؟
اها انا راجيك وبدور اعرفو
لك المودة والاحترام
خالد محجوب
| |
|
|
|
|
|
|
|
| |
أبو الحسين
Ahmed Abdallah
خالد علي محجوب المنسي
omer abdelsalam
ست البنات
طارق جبريل
yasiko
walid taha
عماد شمت
حاتم هاشم
ahmed khidir
عصام عبد الحفيظ
ماجدة عوض خوجلى
Muna Khugali
فيس بوك
تويتر
انستقرام
يوتيوب
بنتيريست