ابو الحسين ارقد عافية أنا برضي شايقي و من شايقية تنقسي الجزيري يعني مقطع مخاضة من أرقي طالبني قريشاتن كتار شان عارف بخت كباية الشاي و إتحكر في بوستك أضووق طعم الدفيق أشم ريحة الكركتي أسمع صوت الدليب بالساعات الطوال المره قربت تخلي ليًَُ البيت ليك و الي كل المشلخين لي ورا هزة يدا قوي و دي ما عنصرية
11-19-2006, 12:09 PM
أبو الحسين أبو الحسين
تاريخ التسجيل: 11-07-2006
مجموع المشاركات: 7948
شكر لك أخي الحنين أبو الحسين على هذه اللمة الرائعة التي جمعت كوكبة من الحبائب والشكر لكل المشاركين من الاخوة والأخوات وأقولهم بدون فرز أتحفتونا ونسيتونا هموم الدنيا ولا زلنا نتابع بشغف أملاً في المزيد من حكاوي وتراث أهلنا الرائعين عسى ولعل نروي شيئاً من عطشنا.
وعودة إلى قصيدة أسماعيل حسن في رده على بتت خير رحمها الله وخاصة المقطع السابق الإشارة إليه
ورقابن يمه وين رقاب الريل ؟؟ علي الحدب البعيد شرفن علي هوهيو كلابي
كل مرة اسمع المقطع يقفز إلى ذهني المشهد نفسه كأني أشاهده واحس بعمق المعني وجمال الصورة وروعة التصوير الذي لا يجيده إلا امثال اسماعيل حسن وهو في تقديري أفضل ماكتب في الوصف والغزل . وأذكر ونحن نفر من أبناء المنطقة تضممنا روابط مروي بجامعة الخرطوم وجامعة القاهرة الفرع أذكر منهم الأخوة محمد أحمد سيداحمد التوم محمد بادي محمد (طبيبان فيما بعد) والراحل المقيم عبود شخصي (وآخرين)، وبمبادرة من صاحب المبادرات الرائعةالراحل المقيم عبود رحمه الله قررنا ان نصلح بين الفنان الكبير محمد وردي والراحل اسماعيل حسن لننهي قطيعة بينهما استمرت عشر سنوات لمواقف سياسية متقاطعة بين الرجلين وللتاريخ أبدى اسماعيل حسن حماسة للفكرة ولم يرفضها الفنان وردي وكان اللقاء والصلح وتلك قصة أخرى ،المهم وبمبادرة من الراحل عبود أيضاً أقام الفنان وردي على شرف هذا الصلح مأدبة عشاء بمنزله بالكلاكلة يوم الثلاثاء 29/12/1981م حضرها جميعنا وأقام الشاعر اسماعيل حسن مادبة مماثلة بعد اسبوع 5/1/1982م توفى بعدها بيومين حضرنا وغاب وردي وأذكر في تلك الجلسة (وهذا بيت القصيد في هذا السرد) قلت لإسماعيل حسن انو المقطع دة(المذكور فوق) هو أفضل ما كتبت. قال اللــــــــــــــــــــــــه أتخيل الغزالات وهي تنقز ومن فوق تعاين خايفي من الجاييها وبعدين حكي قصة قال تعرف ونحن في النيل الأبيض مجموعة أصحاب قررنا نمرق نصطاد شلنا بنادقنا ركبنا اللاندورفر وطلعنا الخلا وبعدين وقفنا عربيتنا وكمنا في وادي راجين الصيد، والله يا ولاد اعمي جات غزالة تتراقص وتتلفت يمين وشمال ولما قربت مننا واحد من الجماعة المعانا صوب بندقيته عليها، رجيتو بالله ورسول الله يقيف قلتلو الغزالة دي عندها مواعيد لا تحرموها، والله يا ولاد اعمي مافي دقائق إلا وجاء فحل غزلان للغزالة دي واتعانقوا كانو سنة ما شافو بعض والله المشهد ده كأنو قامي الآن وبعدين واحد من اخواننا الله يسامحو ما مهلهم ضربهم بالرصاص ومن اليوم داك انا كرهت رحلات الصيد وكرهت البيضرب الغزال لا يومنا دة.
التوصلية المرفقه طيه: "رمزية المكان وشرعية المطلب: الجابرية تحيي الثورة دايرين بوسطة ومدرسة وسطي، مهداه للأخ يس، وابوالحسين، ود المنسي، وعليهم أيضاً أن يتولوا الرد علي المتداخلين لأنهم أرسخ قدماً وأطول باعاً من في هذا الشأن، أضافة لعدم وجودي الأيام القادمة بالمنبر للأسباب عملية، لهم الشكر.
فارس الرمال شكرا علي الموضوع ولكي نبحر قليلا نطرح السؤال لماذا يكثر الشعر بمختلف الوانه عند الشايقية وخاصة الغزل والشعر الغنائي ؟ اقدم اجابة ولكن ليست كاملة واتمني ان يكملها النقاش وهي ان الشوايقة ليس لديهم تعقيد كبير للحياة وعموم القبائل شمال الشوايقة نسبة لكون القبيلة متماسكة وكل الناس صحاب كل الناس اهل والبيوت مفتوحة علي بعضها لذلك لم يكون هناك تشددا يمنع التغزل ويحرمه ويضع العراقيل حيث ان الشايقي لايضطر الي ان يتخفي او يخفي حبه وولعه ويمكن ان يخفي محبوبته ويشير اليها رمزا وهذا من باب الحياء وليس الخوف . هذه البساطة انعكاس لواقع الحياة البسيط حيث السواقي والجروف والنخل والتمر والدكاي والرمال والقيزان والطنبور حتي موسيقاهم تعتمد علي آلة بسيطة وغناهم لا يحتاج الي كبير جهد وفي تقديري ان للطنبور نغم مؤثر وارجو مراجعة النعام آدم في هذا ومحمد جبارة ولكن يظل الطنبور رغم نغمه الحلو الجميل لا يستطيع ان يلائم كل نظم الشوايقة وهنا استدل بأن المرحوم يس عبد العظيم قدم اغنيات خالدة للشاعر حميد ولكن محدودية الطنبور لم تساعد علي انتشارها وعندما تغني المرحوم مصطفي سيد احمد بنفس الاغنيات صارت ملاحم واكتسبت شعبية عريضة ( نورا وبت العرب النوبية ) كمثال . اضافة الي كل ذلك ان ديار الشايقية ديار تتوسط بين شمال نوبي ذو حضارة راسخة بكل تفاصيلها وجنوب ماضيه البعيد زنجي عريق وحاضره ذو ثقافة عربية توطدت بمر السنين هذا التوسط انعكس علي طبع الشوايقة البسيط الذي يخلو من التعقيد . تعرضت اغنية الشايقية ككل الغناء في الفترة الاخيرة للأزمة فأصبح بين كل فنان وفنان فنان هذه المجموعة الجديدة غير مميزة في الصوت ولا في عكس الاحساس علي الطنبور او الالحان فانك عندما تسمع الدليب تعرف ان الأغنية للنعام وعندما تسمع صفقة الكورس تحس بنفس صديق احمد وعندما ينقرش الطنبور تعرف محمد جبارة ولكن الآن الي ان تنتهي الأغنية لاتعلم من المغني وربما تسأل عنه هذا اذا احتملت حتي نهاية الاغنية ... أمونة الصباح قالتلو النعال والطرقة انهرن ما قالتلو جيب .. شيلن يالحبيب قشهن النقلتي والترزي القريب
كل النجوم عضو مُـميز جداً
يمتاز الشايقي برقة في الاحاسيس والمشاعر وهذه الرقة ادت الى تصوير جميع ما يحدث لهم الي اغاني جميلة فانت حينما تستمع الى اي فنان شايقي مع نقرة الطنبور تحس بانه يخاطب وجدانك ويصف حالتك فالشيايقي يخاطبون الوجدان وقد قال كدكي : في بلدنا بين كل شجرة وشجرة بتلقى شاعر وبين كل كلمة وكلمة بتلقى بيت شعر وقد استمعت الى اغنية محاسن التي يغنيه المبدع عبد الرحيم ارقي وهي تصور حال من تزوجت محبوبته فيقول فيبتدأ قائلا تصدقي يا حاسن لمن خبرك جاء وصلني انا جيت ابارك جراحي تنزف لدياركم ساحبة ظني وهو استعمل كلمة خبرك والمتعارف عليه ان كلمة الخبر تستعمل في البكاء ( جاءنا خبر بكاء ) وهذا دلالة على قمة جزنه وأساه ثم ينحرف ليتحدث عن نفسه قائلا بي بشيشكن يا عيوني يا دمعوع لا تفضحني طالما الاقدار بتحكم غصب عنك وغصب عني جيت في ليلة زفافك برضاي ورغبة مني انا جيت اضم الشوق واقالد وانضم الاشعار واغني جيت في فرحك اشارك جيت اقول مبروك واهني جيت امد ايدي البترجف لي ايادي ملاني حني انا جيت اعاين واملا شوقي في العيون العذبني انا جيت اودع في خدودك البي صفاهن جرحني كان مناهن اعيش معاهن أه دا لو كان بالتمني قسمة والاقدار ارادن يحرمني ويحرمني التمن املي البنيتو حتىلي شوفتك امني
ثم بعد ذلك يصف حالته ويقول: ادي حالي انا يا ليالي لي بكاي ماك دار تحني كنت في عتمت همومي اللبن ما يرحمني وانتي في عش السعادة أه انا الشوقك كتلني ابكي في زحمة سنيني في الليالي العاكسني الوداع الوداع الوداع يا نور حياتي يا امل خاب فيهو ظني بي بشيشكن يا عيوني يا دمعوع لا تفضحني طالما الاقدار بتحكم غصب عنك وغصب عني
كتبت هذا الموضوع منذ فترة طويلة وبدأنا نقاش لم يكتمل حول الشايقية وغناهم ومحنتهم السر عثمان الطيب لمن كتب يازينوبة وغناها المبدع محمد جبارة كتبا لمن جاء الجامعة يعني بس اتحرك من الشمالية للخرطوم بدات الجرسة والرجعني للموضوع بتاع الغنا دا تاني هو موقف حصل لي وانا في المواصلات وكان سائق الحافلة مشغل شريط ارقي الحزن الدفين لمن جات اغنية عافي منك كان في حاجات كبار من اللهجة يتضح ليكم انهم دنقلاويات واحدة وقفت الحافلة وقالت ليها انزل يانورا التاني قالت بدور اصل لي اخر محطة اختها سالتا تسوي شنو في اخر محطة قالت ليها بعد الغنية تنتهي عشان عشان كل ما اسمعا بطرا محمد ولدي حقيقي كانت حاجة مؤثرة والمراة بتتكلم والدموع بتقرط من عيونا ما كان من السواق الا انو قال للركاب يااخوانا انا حا اقيف لمن الاغنية دي تنتهي والماعجبوا ياخد قروشو ويركب حافلة تانية مافي زول نزل ولا في زول علق بالعكس الناس فضلت راكبة والحافلة واقفة لمن الاغنية انتهت وحاجة نورا نزلت من هنا بيجي حبنا لي اغاني الشوايقية لانها مفردة ساهلة بتصل لي اي انسان مهما كانت طبيعتو او تعليمو او عمرو
سخانة عضو مشارك تحية واحترام ... كل النجوم بقولو انو جمال الوصف بجي من العين الفنانة التي تري ما لا يراه الاخرون فمن نظرة واحدة ترتسم التفاصيل في الذهن وهكذا يرسم لوحة كاملة من مجرد نظرة .... اما جمال التشبية بجي من العقل الفنان فهو يعتمد علي الخيال فهو وصف لشئ عادي بطريقة غير عادية ... وهاتان الصفتان اجتمعت في شعراء الشايقية الوصف والتشبية معا ... ولما كانت طبيعة البيئة العايشين فيها الشوايقة كان الوصف والتشبية كلو من وحي الطبيعة لذا كان الجمال من الخضرة والرقة والعزوبة من النيل تعلموا من الصحراء الصبر ومن النيل العزوبة والقوة ومن النخيل العطاء ومن الطير رقة المشاعر والشجن وهكذا كانوا ... شعراء الحب والعزوبة والحنان ...... واقول ليك اختي كل النجوم شوفي الشاعر العملاق الحميد في وصف انثي رائعة دخلت البيت تعبانه وسلمت علي اهل البيت .. قال :- جات داخلة ذي مرقة غضب من جوف حليم رمت السلام .... ذي شنطة من كتف المسافر بي تعب دي السّرة بت عوض الكريم .... مرة ولا دستة رجال في اروع من كدا ؟؟ وعلي فكرة شعراء اغنية الطنبور الشايقية غزو المركز وبرز منهم الكثيرين وغني لهم العملاق الخالد مصطفي صحيح انو كتبوا باللهجة الوسطية للسودانيين الا ان الطبيعة غلبت عليهم فكان شعرهم الغنائي يغلب علية الوصف والتشبية باجمل صورة وبنفس الروح الشايقية ..... التحية للشوايقة ولشعرائهم الذين الهمونا ودغدغوا مشاعرنا واحاسيسنا باجمل الكلمات وارق المعاني لهم كل الحب... ولك احترامي ورررمضان كررريم
11-19-2006, 02:13 PM
yasiko yasiko
تاريخ التسجيل: 02-05-2002
مجموع المشاركات: 2906
سلام يا شباب أدعوكم لاستراحة مع المبدع محمد النصري والتمعن في تلك "الصبرية وجمالها" أنا عارف انو الفيديو ح يخت أختنا "الملكي" كداد / واطة لكن لابد منه أخطروني إذا كانت هنالك خسارات
11-19-2006, 02:59 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
يا اخوي سيد البيت بيستأذن في بيتو؟؟؟ دا كلام شنو دا؟؟؟
والدار دي زي ما قلنا قبيل... ملك لكل الإخوة الباحثين في التراث الشعبي أياً كان نوعه... ولا تحده حدود جغرافية وهسع أنا جاييكم بعد ما أعمل بحث عن قبيلة الشايقية الهنا في المملكة العربية السعودية...
أها كيف دايرين نعمل... عندنا شوايقة هنا في عُقَالاتُم...
الإذن معاك يا اخوي والدار مفتوحة لكل عُشَّاق الجمال...
قواسيب مودتي...
كيف أمسيت ابـــو الحسين دي المحريه فيك والكرم فيك طبعه وجارك ما بهم أن كان مسوي السبعه (( السبعه الموبقات ))
شكراً ليك كتير يا الفحل وربنا يقدرنا علي جزاك
خالد ود محجوب
11-19-2006, 03:08 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
الأخ خالد سلام وأيضاً قِـيل " مَنْ اُسْتُطْربَ ولم يطرَب فهو حمار" هكذا كان يقولها صديقي وزميلي المرحوم بإذن الله "عبود المحامي" أما التالته الخفت من قولها لأبوالحسين فهناك "من يقع دون تعتر ليهو" وهذا في الدرك الأسفل من الشقاء الأخ أمين حمد سلام إن شاء دائماً تدفق فرحاً وحباً للآخرين
سلام سيد محكر الديوان اي والله الكلمة تطرب والنغمة تطرب وفي كلمات تهزك هز من فوق لتحت
البزيد لي تاني جروحي تاني يفتقه كل ماشوف لي عروسه قاعده مجرتقه
اها شوف جنس الحديث دا ما بخلي الزول في حالة الا شعور .
والله يا ياسين من يوم عقبت لي اول يوم عرفتك زولي بالله يا ياسين مغروض شديد في غنية هون لي الزمن سمعتها مرة واحدة بس واعجبتني شديد لكن نسيت وكنت ناوي اشتري كاسيت عند اخر زيارة لي لارض الحبان
أغنية ماشفتو عوض يا ساري الليل درويش من يادوبو صغير عشر سنين الزول زول الله من الصلاح الرفعت عنهم الاقلام ارسل اللنك لو مسجلة عندك ولو تعذر اكيد في واحد من زوار البوست حافظها نطلب منه ان ينزلها
بجيك من سكـــة القلب العشق ذاتك سنين بجيك من صفحة الماضي الكان قاسي وضنين خايف يكون زيف المدن غير أصالتك والحنين جايك من ليل العـذاب ارجيني بالصبح المبين
فُتيني للليل الطــويل يرميني في حضن الآلم سبتيني بين شبح الظنون وأحزان بتنبع من وهم ارجيني فوق أرض الصبر جايك من زمناً سجم لا فيهو للأفــراح طريق ولا فيهو للأيام طعم
باكر بجيك بي لعنة الريد المـــــلك قلبي الجريح بي حال بيغني عن السؤال ما بوصفو الخاطر الفصيح خايف يقصر بي العمــــر تحملني من الدنيا ريح لو كان مُقدر إني اروح سوي لي في روحك ضريح
سافرتي مـــا خليتي خيط ابراه للمرسى الجديد سافرتي مـــا خليتي لي غير ذكرة الزمن البعيد علمتي روحي الإنشراح علمتي قلبي يحــب شديد فجاءة اختفيتي من الدروب وأخفيتي كل زمني السعيد
لكني لي أحســـاس يسوق خطواتي لأجمل عيون باكر بتلقي خطاي معــاك تتمشى ما بين الغصون ما تقولي لي وصلت كيف مــن دل قلبك يا حنون أنا قلبي أصبح ليك مكان يا الناسية إني انا ليك كون
باكر بنكشف الضباب القـــاك في فرح الشباب تقشي في دمع الفـــراق وتزيلي في أثر العذاب بكرة المسافـات تجتمع وتلم قلوب يوم عيدها آب ويعود شباب الفي هواك يا حلوة بي أحزانو شاب
منقول
حاتم هاشم
11-19-2006, 03:54 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
لا يسعني تعليق على الكلام البنقط عسل. والصورة المعبرة. ألا بأبيات للشاعر الجميل عميق النظره محمد الحسن حسن سالم (( حميــــــد ))
بت الخير إجيكي الخير وصل جوابك الكاتباهو للولد الحتالي وكان الظن ترسلي لي من البركاوي داك الطعمو حالي وتكتحي فيهو هين هينين من نبق سدراتنا في بدل التسالي وكان بالجملة شخالب دوم هنا ني ومسيخ وغالي (( يعني في البندر ))
شيخ العاشقين / عبدالله محمد خير أداء المبدع الرائع / صديق احمد
خلهن سوا لا تفرقن يالله توماتى انا بعشقن دوره دوره انا بنتاوقن لحظة مابقدر أفارقن ليه عيونى الشوق حارقن والدموع دايرى تغرقن والدن قال ما يمرقن خايف النظرات تلحقن وخايف العين ما تعوقن كان زمان لى شتلو يسقن ومره فى اللوبى يورقن ديمه بالقعده ينقنقن ويحلفن لو ابي ما يصدقن هن وين تانى بيتلقن وليه يحفظن الخالقن يا عيونى انا لا تزهجن ولى مشاعرى انا لا تزعجن لى خيوط السعد انسجن يمكن التومات يخرجن خطوه ... خطوه ... بيندرجن وفى عذابكن بيتفرجن انا ما بخاف الموت والسجن والله جسمى الصبى يتعجن هن مالن ابن ما يجن ويا الله مالى انا ماشى اجن ما بصح يا الحاج اب شنب ولسه ديل ما بقو للادب فى المعاملة ما تكون صعب انت ما تقسى على العنب وما تعكر موية الدهب شمعتين اوعه من اللهب ونحن يا الزينيين لينا رب متلى كم زول مات بالشجن وقبلى ود الزومه انسجن من ضفاير بتموجن من خدودا بتوهجن من تويمات اتخرجن من عيون اترابن نجن فوق عروش الحيا توجن لى مريضن ما عالجن قلبى نيرانو اتاججن وكل اعصابو اتبنجن مالى قبلاتى اتعوجن امشى وين يا نور الدجن ************** ما كفاى يا التومات اذى وما كفاى انا لعب الخذى هو طيف ! ويلاوز لى ملاوزه ما التويمات انا حاجزه وحاجه غيرن ما عايزه يا الجمالكن بقى معجزه السن النقاد عاجزه انت جيب اوصاف موجزه يا قليبى انا حبزه تبقى حالتنا مجهزه ولحظه تأخير ما جائزه *************** ليه يضايقونا الناس كده والغرام .. سنه .... مؤكده أنا قلبي من اول ما بدا بى غرام التومات شدا والعيون مويته جامده البعاد الطال سهده البكى المكتوم شاهده ليها سته شهور شارده من زمان فارقت الندى ما بتشوف ناس هاديه لا زيارات .... لا معايده لا صدف عن ساعه الغدا انا قلت بالصبر ازوده على البعاد يمكن اعوده تانى ترجع متمرده تعيد اشواقه تجدده روحى دركت ........ منو ينجده؟ بلا التويمات الرايده
منقول
حاتم هاشم
11-19-2006, 05:51 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
محمد الحسن (( حميد )) قامة سامقة جاء من ارض النخيل والجمال ومهيرة بت عبود, يحمل في دواخله أحساس صادق نبيل, رضعه من أرض الخضرة النيل وتاتا به على قيزان رمالها, وشب معه في حله وترحاله بين عطبرة والشمالية حتى تفجر ذاك الأحساس درررررررررررررررر تلب لب القاري لها فياروعة ما كتب ويا جمال ماسيكتب عودنا بالجميل الذي يأتي من بعده الأجمل حفظه الله ورعاه بلبل مغرد يرسل الألحان نديه شجية تخرج من صدره صادقة رمي السهام فلا تخطي أن تصيب السمع نشجى ونفرح بها وشجوها حلو المذاق أن كانت حزينة لك التحية والتقدير شاعر الشمال حميد.
الواســــــــــــــــــــوق
من الواسوق أبت تطلع من الأبروول أبت تطلع من الأقلام بت تطلع من المدفـــــــــع طلـــــع خــــــــــازوق خوازيق البلد زادت فيض النيل نحيض نحن يظل حال البلد واقف لا النيل القديم ياهو ولا يانا نعاين في الجروف تنهد ولا يانا متين آيد الغبش تمتد ولا قدام تنش عين الضلام بالضو تفرهد شتله لا هدام لا فيضان يفوت الحد عقب يا نيل تكون ياكا ونكون أهل البلد بالجد
يا مطر عز الحريق يا مصابيح الطريق يا المراكبية البتجبد من فكة الموج الغريق جينا ليك والشوق دفرنا يا المحطات الحنيني القصرت مشوار سفرنا ياما شايلك بيني حائم لا الليالي المخملية لا العمارات السوامق لا الأسامي الأجنبية تمحى من عيني ملامحك وانت جايه المغربية دايشي داقسي المغربية وشك المكبوت مكندك سمسونايتك زمزمية كون شبر طوريّ منجل سبحي فانوساً مدردح قلتي بيهن لي زمانك يازمان الحاجة عندك يازمان الآها حدك لا تطي الوردة الصبية
11-23-2006, 12:45 PM
mahmed alhassan mahmed alhassan
تاريخ التسجيل: 02-10-2004
مجموع المشاركات: 1793
Quote: لا يسعني تعليق على الكلام البنقط عسل. والصورة المعبرة. ألا بأبيات للشاعر الجميل عميق النظره محمد الحسن حسن سالم (( حميــــــد ))
بت الخير إجيكي الخير وصل جوابك الكاتباهو للولد الحتالي وكان الظن ترسلي لي من البركاوي داك الطعمو حالي وتكتحي فيهو هين هينين من نبق سدراتنا في بدل التسالي وكان بالجملة شخالب دوم هنا ني ومسيخ وغالي (( يعني في البندر )) (عدل بواسطة خالد علي محجوب المنسي on 19-11-2006, 04:18 م)
تصحيح لللاخ/ خالد علي محجوب هذه الابيات للشاعر محمد بادي وليس الشاعر حميد التحية لهم ولشعراء بلادي ولكم والاخ/ ابوالحسين علي هذا البوست الجميل محمد الحسن
11-19-2006, 05:53 PM
yasiko yasiko
تاريخ التسجيل: 02-05-2002
مجموع المشاركات: 2906
الحبيب ابو الحسين سلام أغنية ودجبارة مشفرة يصعب تسجيلها حسب علمي المحدود لكن حارسل لك لنك الصفحة مع الكود كما اتفقنا
Quote: أغنية ماشفتو عوض يا ساري الليل درويش من يادوبو صغير عشر سنين الزول زول الله من الصلاح الرفعت عنهم الاقلام ارسل اللنك لو مسجلة عندك ولو تعذر اكيد في واحد من زوار البوست حافظها نطلب منه ان ينزلها
اخي خالد بكل اسف هذه الأغنية ليست عندي وبحثت عنها في مواقع أخرى ولم اجد المواقع التي رايتها فيها لكن راجع ماسنجرك لهدية أخرى
11-20-2006, 03:28 AM
ابو عثمان ابو عثمان
تاريخ التسجيل: 12-15-2002
مجموع المشاركات: 1389
أما حديثي عن شِبا والله يا بتنا من يوم الكلام القُلتُو لي طارق أخوي داك... وعندي قصـــــــيدة كُنت ممجِّد فيها شِبا ومَرَحب بيها بي بعثة الموردة الكان زارت شبا بقيادة صديقي وحبيبي البروفيسور عبد الهادي تميم... وأتذكر أيامها كُنت مدرس في مدرسة أُم أيمن الثانوية بتنقاسي وكتبت القصيدة وإستقبلت بها البعثة في شِبا وتاني ما فارقت البعثة إلا لمن بقوا مسافرين...
فقصيدة الخير دي أفتش فيها في أوراقي القديمة من يومي القلت الكلام داك لي طارق ولييييييي هسع ما لاقيها... إلا إحتمال عندي باقي كراسات أحاول أرسل أجيبها من السودان عشان موش كلو مرة متواتِنِّي بيها إنتي وطارق!!!
لك كميات مودتي... وأبقي قريبة...
أبو الحســــــــــــــين...
11-20-2006, 03:18 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
دايما تراني عاشق ومولع بشعر أهلنا الشايقية, واكتر مايعجبني فيهو بساطة الكلمة وحركتها والله أحس بالحركة في الكلمة في شعرهم . عشقت هذا الشعر منذ نعومة أظافري وحفظت منه الكثير وأنا في مراحل الدراسة الابتدائية ومازلت أهواه وعشقه.
قصيد آسيـــــــــــــــــــــــا
آسيا بابورك في الأراك يا آسيا بابورك في الأراك
العجو الجايّ من المحوس وأن عول ما بينقرو السوس المفلس شن داير يكوس بس يعاين ويشبع مغوص
في آسيا بابورك في الأراك
آسيا فيها طبعاً يا اخي مفهوم وفي الفريق أن دارت تحوم أول حاجة تقيف السموم وينزل الغيث والقش يقوم
لآسيا بابورك في الأراك
آسيا واقفه دغري بلا تدابير وعودا صندل وعرقو أكسير شاهد الله أن وقفت عديل تشوف وشيك في ساقه فليل
دي آسيا بابورك في الأرك
أنا لو ماكت من بخاف الله الحساب وأخشى انتو تقولوا كضاب أنا كت بحلف فوق الكتاب آسيا من نور ماك من تراب
يوم رحيله أنا كت داير أموت وصفر البابور داير يفوت البحر صفا ليها مبسوط وشوف عيني أتشرف الحوت
لآسيا بابورك في الأراك
لزيارة كسلا راحن التاكسي اتبرعن والضرايح ذاته رزن وكان داير يقوم سيدي الحسن
ارجوك لا تمحن قلبى الاستاذ الشاعر / عبد الرحمن الحسينابى اداء المبدع الفنان / صديق احمد
ارجوك لا تمحن قلبى قلبى بالمصير سلم خلاص ودع سنينو معاك لى دنيا السعاده ختم عفوا ياربيع الدنيا لو كان قلبى فالو نعم ما زرع الامانى رجاها وفى الاخر حصادو ندم ياريت الدموع تنفعنى ابكيك بى دموع الدم شن فايدة بكاى ياروحى مادام كله قسم مادام النصيب فرقنا للعش البنيننا هدم ساكت نرضى اقسامنا والمقسومه جقمه سم اريت عمرا بعيشو بلاك تتعاقب سنينو وهم ان طال وان قصر صدقنى غيرك ما بضوقلو طعم الحال النسيتنى انا فيها اكبر من جراح والم انا اتعذبت ضقت المره حن فى حالى يوم ارحم طال ليل السواد يا قاسى فجرك ما طرانى بسم اريت كان لا عرفت هواك لا ساقتنى ليك قدم
منقول
حاتم هاشم
11-20-2006, 10:27 PM
حاتم هاشم حاتم هاشم
تاريخ التسجيل: 08-31-2006
مجموع المشاركات: 1411
شجون العيد كلمات / محمد سعيد دفع الله اداء المرحوم / النعام ادم
مر العيد وفات لا شوق لا تهانى وما قادر اقول انو قسا ونسانى كم ناجيت حروفو الخمسه فيها نظمت اغانى ساهر ديمه ... افكر فيهو ... فر النوم جفانى اعيد لحظات قضيته معاهو انسج فى الامانى كان ياهو الامل يا حياتى ... مالى غيرو تانى ما عارف اذايا البىّ كيف الشوق برانى والعارف لحالى يا روحى قبل الموت بكانى عاد هسع الومك انت .. ولا الوم زمانى واقول ياهو المقدر كان .... والمكتوب لى جانى اسمك ديمه الهج بيهو ما فارق لسانى طيفك ده الملازم لى ما فات يوم ختانى ما بقدر اطيق الفرقة ... ما بحمل ثوانى كيفن هان عليك تنساهو .. كان ريدى وحنانى شوف حتى الطيور حزنانه تبكى توح عشانى وينو حنان قليبك لىّ.... ليه صد وابانى ما غلط على حا شاهو ... ديمه عطوف وحانى مالو الليله بى ايديهو .... كاس الويل سقانى
منقول
حاتم هاشم
11-20-2006, 10:32 PM
حاتم هاشم حاتم هاشم
تاريخ التسجيل: 08-31-2006
مجموع المشاركات: 1411
مليت من الغربه كلمات الاستاذ/ محمد سعيد دفع الله اداء المبدع الفنان / عبد القيوم الشريف
مليت من الغربه آعلى .. يا ولدى يا ايدى اليمين داير الرجوع بس كيف يكون ... وتفكيرى فيهو انا من متين كل ما اقول اصبر شوى باكر تكون الحاله زين القى الظروف ياها الظروف .. بس زايده سؤ بحلف يمين وآخد لى لفته على الزمان ... القاها مرت كم سنين لمتيـــــــــن بتتفك القيــــــــود ... القاسى قلبها ما بيلـــــين ********** جيت فاكر انى اكون سعيد ... بى مال بيجرى على اليدين لكنــو مقسوم يــا لعــــزاز .... رزقا يكون دائمــا ضـــنين والشئ العجيب مما وصل ولليلى فوق اكتافى دين حســرة وهموم متواليات .... والدمعه يوت هالابه عـيــن نيران مولعى فى القلب مسكين فقد لضرا الامين كان عيشو هاديه قبل يجى ... و فى بيتو كان قوتو اليقين والليله فى الاهوال دوام يصرخ ومو لاقى البعين وينــك بعــدتى على ّ ليه ... وانا ليكــى كاتلنــى الحــنيــن يا السمحه سموكى القرير والناس تجيك من وين ووين وانا قـمــت منك شــن اقول .... غير ده المسطر فى الجبين يا درة الوطن العزيز يا النادره يا لماليك وزين عشمى ومناى ارجع واجيك ....... انا غير هواك متل السجين داير اكون بين الاهل محضون وحاضن اعز طين داير حياتى مع الصحاب ..... واللقمه ما بين العوين *********** يا لوبه شمر للضراع والليلى جيت اوصيك دحين كونك تقصر ما اظن وانا عارفو طبعك يا الخزين يات من معلم درسك شاكرك علم وخلقا يزين ما عليك خوف ما دام معاك زولا مسمى الزين وزين انت البتعرف للاصول كاسب رضاء الوالدين من قمت درفونا صغير ما كت يوم نيا عجين دائما مواظب و مجتهد فى الجانبين دنيا ودين ورافع السماوات غير عمد داعيهو ينصر وليك يعين
منقول
حاتم هاشم
11-21-2006, 12:33 PM
yasiko yasiko
تاريخ التسجيل: 02-05-2002
مجموع المشاركات: 2906
قضيت حياتي عذب لا حفلة لا شبال لقيت الراح كتير وكتير مرق لا زوجه لا أطفال
تراني وسط مهب الريح مريكب لافحه الشلال بقيت مسحور عيونك ديل إتحجر بقيت تمثال وأفتش في مكانك وين ؟ لقيتك في قليبي هنـــــا
تقول لي أنا.........أنا المأساتي مابتنقال
أنا الجرب مأسي الحب أنا الجرب مأسي الغي تعال شوف كيف حفن كرعيّ وأنا أتبشتنته ياخلا ي فوق درب الفريع الني بقيت لي مع العيون قصة مخلفه فوق جروحي الكي خيالن مادوام ماثل يحلق في خلاهو الصي ولا قادر أقيف وأرجع ولا قادر أداري البي
أشوف غيمك وأنا العطشان وأقول هسع أجيني الري وأفكر في أمور الحب وأدور في الساقية غير معنى
تقول لي أنا........أنا المأساتي مابتنقال
ويا حليلي أنا ويا حليل ايام سعادتي معاك وكت كان الزمن بسام يشاور لي دوام ضحاك يضمنا كان هدوء الليل ولا حس همسة لا كوراك لقيت تب ياقلب زولك وبعد وجعك لقيتو هناك اتاريهو الزمن دولاب قسى ورجعني ألف سنة
تقول لي أنا ...... أنا المأساتي مابتنقال طريته أنا .... طريت السمحة بين أهله وكت تنزل وكت تطلع مع الحوب أجتمع شمله تمد آيديها للمنقه تداعب للجريد جبله وماهماها زولاً فات أقاسي الغربة من أجله دا الخلاني ابتليت بريده أفتل في حبال رمله وكمان خليف الجنون يحصل يفوّت عقلي بالمره بوريكم مآسي غرام عشتها زمني كان قبله
تقول لي أنا......أنا المأساتي مابتنقال
11-21-2006, 06:19 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
عافى منَّك .. وراضى عنَّك .. سوْ رضايا ومابيخيب الرضَّى والدتو.. يا جنايا إنتَّ من يا دوب صغيِّر من زمان دايماً معايا إنت ديمة أمامى ساير .. ما بخليك بى قفايا ما بتغيب من عينى لحظة لا حصل سبتك ورايا ولامن الله يشيل أمانتو ببقى خاصاك بالرعاية لىِّ يرعاك البيرعى لىَّ بيك يبرد حشايا أصلك إنت هدية منِّو الله بيك أجزل عطايا جيتنى واحد مالو تانى رحمة فى آخر صبايا قبل ما أفقد قدرتى وقبل ما تنهار قوايا جيتنى زى بدراً منّور فجأة طليت فى سمايا وصرت حد عمر المآسى وسد سيول سهرى وشقايا وكنت راس هرم الأمانى واحتياجى ومبتغايا وكان بتتوخد النصايب كنت جبتك بالشراية الا كان إيمانى ثابت وراضى بى قدرى وقضايا وجيت يا دخرى الغلابة.. مَسَّحْ غبار همى وعنايا وصار غرامك لىَّ حرفة ولىْ مداعبتك هواية وياما سويت فيك قصايد وياما حجيتك حجايا وصرت لى أمك فؤادا ومركز التفكير ورايا إنت ياكا عَدِلْ مزاجا وياك تمام الكيف وشايا وهسى لما خلاص كبرت ماش تسيبنى أعيش برايا؟؟ ماش تفارقنى وتهاجر والحزن يصبح جزايا؟؟ كيف يهون لك تحزن أمك شان تحقق ليكا غاية؟؟ لو مناك ترحل تغادر قعدة بى جنبك منايا لو مسافر شان علاجى بلقى فى شوفتك دوايا ولو مسافر شان كسانا أخير نعيش جنبك عرايا لو عشان كرعينا راحل نحن بى بعدك حفايا لو عشان تسقينا زمزم نحن بى حنك روايا لو مسافر شان تعرس خير ابوك مالى التكايا خيرو وافر ابوك يحمدو مراحو مليان بالسعايا وبالقروش الجيب متكن ولسة برضو الجايى جاية برضى منك مابقصر بحفر اديكا المعايا ولو دة كلو كمان شوية بتلقى فى دهبى الكفاية اصلى من سويتو ناذرا يبقى لى ايام قسايا داخرا للزمن البعاند ولى سعادتك يا عشايا إنت من تبيت صغير راسى مابتحتاج وصاية ما حصل خيبت ظنى ولا فشل فيك زين غنايا لا تسيب أمك تسافر يمة محتاجة الحماية ولا تسيبنى وراك ترحل وإنت للمكشوف غتاية دايرة منك تبقى جنبى.. جنبى فى فرحى وبلايا ودايرة كان قحيت أتبنك .. أرفع أقسملك غتايا إنت ساعة تبقى جنبى بتبقى ضلى وتوب دفايا وما بخاف ظلم الليالى إنت ياك عكاز عمايا داير أقضى عميرى جنبك أصلو قارب للنهاية وخايفة كان سافرت ترجع تلقى فاضى البيت بلايا وحينا ما بتنفع قروشك وما بتجيبلك أم سوايا مانى عارفى سبب رحيلك يا وليدى شنو الحكاية الا تبقى براكا شايف فى فراق الوالدة غاية ما بعاتبك لو رحلت وما بلومك وبلقى فى الأمثال عزايا على حجر دايما قليبك وقلبى كلو عليك جنايا
عيون امــــــي يوم فى الغربه ماشى براى وشاقى الحى لقيت وحـــــيده زى امى ترضع فى وليدا صبى ويعصر قوق ضريعا شديد يناتل فوقو يصرخ وي وجيتا قريب لقيتو ضريعا ضريع امى دارى غزييييير أظنه لبي وقفت شويه وأتاملت فيها كتير لقيت فى وشيها اغرب شئ عيون امى وكت ماتغوص جفون الليل تفتش لى وفى حدقاته تلاقانى أحفظ فيه اشعارى ويدندن بى قصيدة لى واشوف فى قمره وش امى واشوف دمعاتا فى شلاخا جاريات لى بقيت كان شفته بادى هلال تجرى الدمعه فى عيني واتذكر دموع امى يقالدونى ويشابن لى وتنقز دمعه من شلاخا ترقد لى فوق خدي مافى احن من أمى أجيها صغير ،، أجيها كبير تفلينى و تقردن لي تحجينى وتوسوس لى تكبر لى ياولدى واشوفك ضاوى متل الضئ تحججنى وتشيل كُبرى وأشوف اولادك يفرحوا بى أحجيهم والوليهم ينومو العافيه فوق إيدي يوم أسمع كلامك داك أحس بالعبره تخنقنى وتحسي جوابى فى عينيى وأقع فى حضُنك الدافئ واسلم ليك فوق راسك و أضمك انتى بى يدي واحقق ليك أمنيتك مهما تقسا تصعب لي واوديك مكه الفين مره لو الالف يبقى شوي وكان كُبرك أساهر الليل واشيلك يما بى يدي وتكبرى لى .. تحضرى عروسى واولادى ويفخروا بيك متل ما كنتى تفخرى بي ولو ما الدنيا قوقا شويه متل املا أكان القمرى يبقى حدي ويعيش الناس ضلام فى ضلام يفتشوا شمعه بس للضئ شمعه يتفنى متل امى عشان بس نورا يفضل حى أكان ما جيتا من بطنك اكان الدنيا حتى الاخره ضاقت بى عشانك انتى يا امى وعشان بأبوك متسمى وابوك العارفه مازول نئ عشانك انتى قلبى كبير وضيه كتير وماخد من شمعتك ضئ بنده الله انتى تعيشى يا امى وكل الباقى خليه على عشانك انتى يا يما وعشان ما انتى نور عينيى تشيخيى وتعيشى بيناتنا واشوفك قيمه ماشه علي قيمه بتقصد المحتاج وفضلة خيرك يبقى هو حي وخيرك يغشا ك الناس من الماشى بالعكاز لا عند البحبا حبيى وأشوفك فى عيون الناس عبيراً صافى جائي نقي احس نسامو فى جوفي تخش بى سهولة فى رئيتي شعرى القلته يما حزين وكلو مآسي مرت بي الا غناك يا أمى زفره ونبضه نبضه وزفره زفره ونبضه فى دمى وبسمه عريضه فى شفتيى
منقول
حاتم هاشم
11-22-2006, 01:42 AM
yasiko yasiko
تاريخ التسجيل: 02-05-2002
مجموع المشاركات: 2906
Quote: Quote: الشوايقة مثل النحل تتلطف به تجد منه العسل ، تتطفل عليه تجد منه اللسع
اللهم إني أعوذبك من مكر الشوايقة وعبط الجعليين آمييييييين
اقتبس عبد الرحمن الحلاوي الجملة الأولى أعلاه وكتب تحتها العياذ من المكر والعبط فكان أمره نشازاً ولا أدري مقصده لذلك لا نملك إلا أن نقول "الناس في شنو والحلاويييييييييييييييين في شنو" والعياذ بالله من النشاز
11-22-2006, 01:54 AM
أبو الحسين أبو الحسين
تاريخ التسجيل: 11-07-2006
مجموع المشاركات: 7948
Quote: شكر لك أخي الحنين أبو الحسين على هذه اللمة الرائعة التي جمعت كوكبة من الحبائب والشكر لكل المشاركين من الاخوة والأخوات وأقولهم بدون فرز أتحفتونا ونسيتونا هموم الدنيا ولا زلنا نتابع بشغف أملاً في المزيد من حكاوي وتراث أهلنا الرائعين عسى ولعل نروي شيئاً من عطشنا.
وعودة إلى قصيدة أسماعيل حسن في رده على بتت خير رحمها الله وخاصة المقطع السابق الإشارة إليه
ورقابن يمه وين رقاب الريل ؟؟ علي الحدب البعيد شرفن علي هوهيو كلابي
كل مرة اسمع المقطع يقفز إلى ذهني المشهد نفسه كأني أشاهده واحس بعمق المعني وجمال الصورة وروعة التصوير الذي لا يجيده إلا امثال اسماعيل حسن وهو في تقديري أفضل ماكتب في الوصف والغزل . وأذكر ونحن نفر من أبناء المنطقة تضممنا روابط مروي بجامعة الخرطوم وجامعة القاهرة الفرع أذكر منهم الأخوة محمد أحمد سيداحمد التوم محمد بادي محمد (طبيبان فيما بعد) والراحل المقيم عبود شخصي (وآخرين)، وبمبادرة من صاحب المبادرات الرائعةالراحل المقيم عبود رحمه الله قررنا ان نصلح بين الفنان الكبير محمد وردي والراحل اسماعيل حسن لننهي قطيعة بينهما استمرت عشر سنوات لمواقف سياسية متقاطعة بين الرجلين وللتاريخ أبدى اسماعيل حسن حماسة للفكرة ولم يرفضها الفنان وردي وكان اللقاء والصلح وتلك قصة أخرى ،المهم وبمبادرة من الراحل عبود أيضاً أقام الفنان وردي على شرف هذا الصلح مأدبة عشاء بمنزله بالكلاكلة يوم الثلاثاء 29/12/1981م حضرها جميعنا وأقام الشاعر اسماعيل حسن مادبة مماثلة بعد اسبوع 5/1/1982م توفى بعدها بيومين حضرنا وغاب وردي وأذكر في تلك الجلسة (وهذا بيت القصيد في هذا السرد) قلت لإسماعيل حسن انو المقطع دة(المذكور فوق) هو أفضل ما كتبت. قال اللــــــــــــــــــــــــه أتخيل الغزالات وهي تنقز ومن فوق تعاين خايفي من الجاييها وبعدين حكي قصة قال تعرف ونحن في النيل الأبيض مجموعة أصحاب قررنا نمرق نصطاد شلنا بنادقنا ركبنا اللاندورفر وطلعنا الخلا وبعدين وقفنا عربيتنا وكمنا في وادي راجين الصيد، والله يا ولاد اعمي جات غزالة تتراقص وتتلفت يمين وشمال ولما قربت مننا واحد من الجماعة المعانا صوب بندقيته عليها، رجيتو بالله ورسول الله يقيف قلتلو الغزالة دي عندها مواعيد لا تحرموها، والله يا ولاد اعمي مافي دقائق إلا وجاء فحل غزلان للغزالة دي واتعانقوا كانو سنة ما شافو بعض والله المشهد ده كأنو قامي الآن وبعدين واحد من اخواننا الله يسامحو ما مهلهم ضربهم بالرصاص ومن اليوم داك انا كرهت رحلات الصيد وكرهت البيضرب الغزال لا يومنا دة.
ونعود
الحِبيِّب الروعة...
موسى ود الحِســـــــين...
يا اخوي إنت دقِّيت فيي وترة حساسة خلاااااااااااااس الله يرضى عليك... وإنت ممن حضروا ذلك الزمن الجميل... شاهد عليهو بالزمان والمكان...
وأنا هسع أفتِّش في ردك دا لقيتو بعد سلَلْ روح...
تاني عليك الله لمن ترد لا ترُد من الإقتباس رد من (الكِيمِيِّي) التِحِت دي ـ وعليك الله كلمة الكِيمِيي دي أشرحها ولة إذا جاء قبل د. يس اليشرحها لأن معانا شوايقة لندن كتاااااااااار ـ عشان ردك يكون ساهل تحت الردود الأخيرة!!!
قواســـــيب مودتي...
أبو الحســــــــــــــــــين...
11-22-2006, 11:28 AM
حاتم هاشم حاتم هاشم
تاريخ التسجيل: 08-31-2006
مجموع المشاركات: 1411
يا قمره ... صبي السنسني الحمره شوفي أبوي أنا الراجاهو كلو صباح يا زينوبه أبوكي هو أصلو حالو بره لو قاري العلم هو ولاهو سيد خبره ومو زول غربه لكن الظروف جابره مالو إن كان صبر كل الخلوق صابره والصابرات روابح لو يجن قماح
هو أصلو متين نساكم يُمة شان يطره بيتنفس هوا ذكراكم العطره رهيف إحساس حنين قلبو بالفطره نديمو بقت دموعو الديمه منقطره وأصلو إن ما قعد بينكم ولا بيرتاح
جاهو العيد كمان زاد القليب حسره ساد العبره حلقو ونفسو منكسره هو لا لمّ القروش لا حصل المسره بلد ما فيها زول مات من عدم كسره فراقكم ليها يا أحباب ولا كان صاح
يا أمارتي الما طاعت الأمره ندماني وبقت محتاره في أمره بعد قسن الدرادر قصرن عمره الشوق فاض وعماها الحنين غمره الشوق للبلد لي بهجته وسمره الشوق لي مقيلا ضم ضم تمره الشوق لي حديثا ضم ضو قمره الشوق للبلد جابريتا وككره كان الشوق يخفف والله يبرى جراح
نسيتك أنا نسيتك ما لأني إنسان ونساي نسيتك أنا لأني بقيت لما أطراك بساهر وإنت طيفك ماهو لولاي نسيتك أنا عشان ردة فعل ذكراك جواي بقت تنتر مغس مرات ولواي نسيتك أنا ونسيت كل السماحه الفوق دريبا بقيت غناي وخليت لك بلد بي حالو ورحلت بي جاي غلطانه إن بقيت فهمتي إنو رحيلي فوق رأي مهاجر شان أحسن حالي وأرجع ليك شاشاي وحاتك لا لا .. دنياك ما بتوافق تاني دنياي وحاتك لا لا .. لا داير أخادعك ولاني خازاي قسا القلب الببكي الشوق عليك بقي ماهو بكاي وجفاها القمري عصرياتنا ماعاد فيها .. قوقاي صحيح حسدوني فيك زمن عزلتك وقالوا نقاي ما عارفني بكدح وبشقى ساكت وماني لقاي يفيض بحرك يعم وما فيهو من تالاي سقاي نسيتك أنا وبفتش في دليل لي دربي ضواي دحين أطفيها نار الغيره أو زيديها بوباي وأبكي على غرورك بعدي أو كوسيلو رضاي وقول لي معاك سلامه، أو قوليها باباي
حاتم هاشم
11-22-2006, 03:16 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
Quote: ورقابن يمه وين رقاب الريل ؟؟ علي الحدب البعيد شرفن علي هوهيو كلابي
الصورة فعلاً جميلة ويتذوق جمالها من كان له معرفة في القنيص حين تجري الغزلان وتقف روبة أو مكان مرتفع, وجيدها مرفوع مائل تنصت لصوت كلاب السلوق وهي كلاب الصيد تتبع اثرها
11-22-2006, 03:33 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
تعرف يا ابو الحسين الشاعر دائماً يرى مايراهو الناس ويحس بما يحس به الناس لكن يكمن الفرق هو اعني الشاعر يعبر عنما يراه ويحسه في كلمات يعجز عنها الشخص العادي لذا عندما نقرأ أو نسمع الشعر يصادف هوانا فتذوقه ونطرب له
الان انظر كيف صور شاعرنا الكبير سماعين ودحسن صورة الابن المغترب وهو بعيد عن الاهل والاحباب والديار
صوره في صورة انسان مزوزو وهي حالة زهزل وشرود عقلي وسرحان وأهلنا بقولو ليك الزول دا مزوزو وكمان بقولو على حالته (( الأندراوة )) ويضرب فيها المثل الجن بداوى لكن كعبه الاندراوة لا علاج لها وفعلاً الانسان المزوزو كما صوره سماعين ود حسن دائما عندما يتحدث مع الناس يشخبط في التراب فهو دوما عندما يتحدث يشغل يده بشئ
وكلنا مرت علينا حالات لاشخاص مثل هذه لكن اسماعيل حسن صورها واخرجها لنا شعراً وهنا يكمن عمق وبعد نظر الشاعر
11-22-2006, 04:09 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
يوم الناس قالوا لك لا لا وأترجوك ماتفوت الدار ضرب بكلامن عرض الحائط وشلت شنيطتك بأصرار وقلته بسافر يعني بسافر كل الناس بتقوم وتسافر فعلاً وقم مشيت رأيك وأصرفته بدون ماتشاور
جيت البندر بي آمالك ألا لقيت الوضع مغاير خاب الأمل الجيته عشانو وقمته تلوم في الزمن الجائر كنت هناك بالجد متريح فوق واطاتك طالع ونازل تأكل وتشرب بين نخلاتك وتنفق وتصرف من غير فايل
أخر اليوم لبيتك ترجع لافي مدافره لافي مشاكل لا بتقيف في بص شماعه دمك فاير وعرقك سائل لا نشال إنشل ماهيتك لا كمساري معاك متثاقل لا بتأشر للملاكي .... سوقني معاك ياعم أن واصل تحرج نفسك وانت بتعرف انو الطيبه أنصاره قلائل
انو تعوم عكس التيار انت براك البدري أخترته ليه ياقلبي تنوح تتبكى وتندب حظك ليل ونهار لمن قمته وجيت البندر وكنت تظن الحال اتصلح كنت بتحلم بمستقبل فيهو ابواب الخير تتفتح ألا لقيت الواقع أمر وزينا ناس بتشقى وتكدح وناسن عايشي معيشتن راقيه بتلفون بتخسر وتربح وناسن عايشي على الماهيه من يوم خمسة الجيب اتقمح وناسن عايشي عليّ خلق الله أمن تشحد وأمن تلفح
غايتو الحاله معادله صعبه كأنو الناس قاعدين في مسرح عندي سؤال بالجد حيرني ونشف ريقي وراهو نشاف وليل ونهار أنا شاغل تفكيري لمن منو أنا بقيتا اخاف
حال الزول القالوا موظف وراتبو الشهري شويت ألآف لو عديت مصروفو الشهري أكيد تلقاهو أضعاف اضعاف حلو معاي المسألة ديا وساعدوا معاي العم الزين زولاً محمول وعندو أطفال عشان مايأكل أجيب من وين؟؟ يسرق!!! ينهب !! يشحد !! ولا كمان يغرق في الدين
قولوا معاي اسوي شنو ؟؟ عشان مايعيش أجيب من وين ؟؟ عم الزين يعلم بو الباري ديمه عليهو الجوف محروق كان في الماضي ركازة الحله وياهو البربط للمطلوق... حسع وين ياحليلو التائه ودر وأصبح جنو كلام.... يصرف عربي مبالغ فيهو وناس الحي سمو النضام مرات يضحك لمان تشفق ومرات يبكي بكا الأيتام عندو عبارة تملي يقوله أوعك تحسبه بالأرقام تتعب نفسك بتضريبه وآخر شئ تجيك أوهام
بعد الشفتو براك ياقلبي أخير لك ترجع منك وليك خلي وظيفت المكتب طايري لا لا قسم مالايقه عليك عود من تاني وأزرع أرضك دي مابتخدر ألا بدّيك عزة نفسك في واطاتك بين نخلاتك وحنب والديك
11-22-2006, 04:20 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
تعاتبنا !!! وما قبلان تكاتبنا ما إنتو البيتو الحله يا نوره ورحتلو بعيد بلا شوره تراها الحله من يوم قمتو مهجوره وما رضيانه بعدك إلا مجبوره ومشتاقه عارفه الدنيا لمان تقسى فراقه حليل الحله .. وين أملاكه (وين حوره)؟؟ وين شاديها ؟؟ يا شاديها ما تزوره يا فتنه يا البعد الله منك كان مخافتنا أكان حيين .. وما متنا وكان حن القدر والدنيا لمتنا وتاني الحله زي ما كنا ضمتنا بنحلف ليك بزمتنا سعادتك كل مهمتنا وبلاك قامت قيامتنا.
Quote: Quote: ورقابن يمه وين رقاب الريل ؟؟ علي الحدب البعيد شرفن علي هوهيو كلابي
الصورة فعلاً جميلة ويتذوق جمالها من كان له معرفة في القنيص حين تجري الغزلان وتقف روبة أو مكان مرتفع, وجيدها مرفوع مائل تنصت لصوت كلاب السلوق وهي كلاب الصيد تتبع اثرها
الأخ خالد منسي المقطع كما ذكرت جميل والقصيدة كلها رائعةوكذلك قصيدة الراحلة بتت خير رحمها الله وقد سقط منك (في الغالب سهوا)ً مقطعين رائعين تقول فيهما بتت خير رحمها الله وإنت ماك عارف قليباً لي مجينين وماك عارف جواب السلامي يجيني اطول لي شبرين وإنت ما بترسل لي جواباً فيه سطرين تقولي نعيم صباح امو اشتقل وين والقصيدة حسب علمي قديمة ترجع إلى ذلك العهد البعيد عندما يمم العديد من أبناء المنطقة وجوههم شطر أرض الكنانة طلباً للرزق قد تكون كتبت في الخمسينات من القرن الذي مضى ثم جاء رد اسماعيل حسن في بداية السبعينات أبرز هذه القصيدة الرائعة إلى السطح عندما شدا بها الرائع المعتزل للغناء محمد كرم منتصف السبيعنات وأحلى مافي القصيدتين بساطة الكلمات المستخدمة وقد تلاحظون معي أن سر مخاطبة أشعار الشايقية للقلوب هو بساطة الكلمات المستخدمة وعندما أقول الشايقية إنما أعنى قرى وهجر(ريفي مروي سابقا) خذ مثال لهذه استخدام الشاعرالكبير محمد سعيد دفع الله لكلمتي (رهيف)(ما غابيك) في أغنية لا شوفتاً تبل الشوق ولا رداً يطمنً) كان ممكن للشاعر أن يستخدم كلمات كثيرة غيرها مثل ما هماك أوغيرها ولكنها ماكانت لتقع في النفس موقع الكلمة المذكورة وكذلك رهيف ، وتامل كذلك استخدام الشاعر الفذ السر عثمان الطيب لعبارة (إنتي جداولي حس خاويهاشاق محل السواقي وبورها) في الأغنية الرائعة ( وا لومي العتاب جابوه) وبالذات حس خاويهاأي حس خاوي الجدول سماع مثل هذه العبارات يملؤك حنين قد يصل مرحلة البكاء إن كان القلب رهيف . ونعود
11-23-2006, 02:05 AM
أبو الحسين أبو الحسين
تاريخ التسجيل: 11-07-2006
مجموع المشاركات: 7948
شكراً للأخ فاتح هذا البوست العظيم .......... الناس دي بي تحب الطمبور لدرجة الموت رجال على نساء وكنا نتنسم كل موسم إجازات الجديد البي يجينا من كريمة ومن مروي في ريفي مروي ........ في موسم الصيف غالباً ما نسحب عبدالرحمن البركل، وعبدالرحيم البركل، وغيسى بروي، وعادل السيد وغيرهم، ومرات يجي معاهم رائد الطمبور صديق أحمد.. كان هناك عرس عندنا في جزيرة شيري.. وكان عرس عظيم وكبير، في أواخر السبعينات وصيفها.. جاهو عيسى بروي مخصوص من كريمة وجاهو غيرو من الفنانين.. وأهدى فيه الفنان عازف الكمان على ميرغني إهداءاته للعروسين العريس كان أحمد تيتو اي أحمد السيد سليمان والده كان نائب عميد كلية الفنون الجميلة وزجة أبيه الثانية كانت شقيقة المرحوم علي ميرغني عازف الكمان الشهير في أوكسترا الإذاعة السودانية والتلفزيون كذلك جاءت إهداءات عازف السكسفون الشهير الشايقي( اي المقدم محمد الحسن الشايقي.ز( أوكسترا التلفزيون) وكان دائم الرفقة للعميد أحمد المصطفى.. والشايقي من جزيرة(سوور) جاءت إهداءاته في ذلك العرس الناس دي بي تحب الطنبور وتموت في الطنبور وقامت شكلة كادت أن تأدي الى موت لأسباب عيسى بروي كان حالف مايغني في جزيرة شري.. وجاء من كريمة مخصوص لهذا العرس واحد قال ليهو ليه ماجيت غنيت في عرسي جيت هسه حرم ما تغني قال ليهو ولسه قسمي موجود ولكن أحمد صديقي دخلت واسطة حلت الموضوع بعد جهد جهيد وقامت شكلة بي هناك في فرقة جاية من الخرطوم عايزة تشارك العريس تغني بالعود غناء ناس الصعيد .. ناس حلفوا بالتقطعهم ماعايزين يسمعوا صوت العود حتى لو قلبو دليب وحايكسروا ليهم عودهم ويرموهو في مبخر ويبخروهم بيهو وناس قالوا لما يشوفوا منظر العود بيطرشوا.. يستفرغوا وقالوا جايين يسمعوا طمبور صرف وفعلا رقصوا على الطنبور حتى طرشوا وبتاعين العود جاملوهم بكرة في صبحية كدة ........... قطعنا بمركب من الجزيرة للمجاملة في عرس آخر جنبنا في نفس الليلة بالغرب حلة النعوفاب كان فيه الفنان غيسى حامد وخليفة محمد خير عرس محمد الحسن ود أب قرن من حلة النعوفاب أولاد اب نعوف الشايقي .......... وغنى عيسى بروى الجديد ورجع الى كريمة لحفلة كانت هناك ..... الدليب يوم دنا... السليك يوم رنا بشوف السمحة في الرقيص تتنا ........... شوفو كيف بشتن بالخلق عومو كالوزين حين يشق ........... الضمير كل مايوم يرق قبلي مركب قيس بالشرق ........ نجري للشبال ننسبق شوفو كيف وزعو كالرزق ...... ماني خاتي أكان ليك عشق ......... .......... ............................... واحد فنان مغترب صاحبي قال لى قبل أيام كنتا في السودان وتعاقدنا مع حفلة عشان نغني غناء حديث وقال لى على شقاوتنا الحفلة كانت حقت شوايقة نفاجأ بأنو تاريهو جابونا ساكت تطعيم للحفلة. والحفلة فيها أكثر من 12 طنبور طلع المسرح عرفت فيهم بس جعفر السقيد لأني مغترب ما عرفتهم كلهم لكن الناس هناك يعرفوهم.. والله يا صديق منصوري الناس ديل غنوا جنس غناء ودقوا الأرض دي جنس دق.. ونقزوا جنس نقزي.. والبنات ديل رقصوا جنس رقيص موع بس موعان ونحن فاتحين خشومنا ونتفرج كرهنا غنانا ذاتو ودلوكتنا البت البي ترقص تلقي بي هناك صف الحريم كلهم واقفات ويتجابوا معاها يرقصوا بي رقبتهم كأنهم هم يرقصوا.. تصدق يامنصوري نفسنا راودتنا نشيل عدتنا وعودنا وأجهزتنا وننسحب لكن صبرنا كدة كدة عملنا فاصل تصدق واحدة كضبت طلعت رقصت فيهو مافي؟ ......... طيب هن وكت رقصن إنتو ما مشيتوا أخدتوا ليكم شبال؟ قال: يازول هيي دي فيها كتل عديل ومسدسات..؟ المهم كرهنا غنانا؟
11-23-2006, 08:14 AM
منصوري منصوري
تاريخ التسجيل: 09-28-2003
مجموع المشاركات: 2504
البليلي أم ملحاً نضيف حبي لوبا.. وحبي عيش ريف يا حلاتك في الشلاليف ............ يا لبينة الصيف الحليب المعلقة في الهنربيب المنضفة من السبيب كان لقيتك خاتري بيطيب ......... شرح: عيش الريف... هو الذرة الشامية ............... اللوبيا.. كما هو معروف في السودان ينقسم الي لوبيا طيب.. ولوبيا عفن.. ولوبيا ابيض المنضفة من السبب كناية على أنها محلوبة فرييش من أمها وطازجة.دلالة على أنها حلوبها للتلو وبها بعض السبيب دلالة على أنو لبن ماعز والسبيب للماعز والصوف أو الشعر للضان.. وعادة ما يكون بعض السبيب في الحليب..
11-23-2006, 01:22 PM
yasiko yasiko
تاريخ التسجيل: 02-05-2002
مجموع المشاركات: 2906
الاخوة الكرام سلام ان كان هنالك واحد لا يستطيع مشاهدة الفيديو يمكنه انزال البرنامج دا وهو سهل الانزال وسرع download the following free software For vedio
Quote: يا خالد المنسي وحاتم هاشم اليوم فاقدين طَلَّة د. يس ما الصباحية... إنشاء الله مانعو خير...
الحبيب ابوالحسين الشغلة حاصلة لكن كل يوم بتمم على "اللقدابة" دي في الصباح والمساء واطمئن لمن القي الرجالة وافقين عمدان للبوست
Quote: وقامت شكلة بي هناك في فرقة جاية من الخرطوم عايزة تشارك العريس تغني بالعود غناء ناس الصعيد .. ناس حلفوا بالتقطعهم ماعايزين يسمعوا صوت العود حتى لو قلبو دليب وحايكسروا ليهم عودهم ويرموهو في مبخر ويبخروهم بيهو وناس قالوا لما يشوفوا منظر العود بيطرشوا.. يستفرغوا وقالوا جايين يسمعوا طمبور صرف وفعلا رقصوا على الطنبور حتى طرشوا وبتاعين العود جاملوهم بكرة في صبحية كدة
Quote: نجري للشبال ننسبق شوفو كيف وزعو كالرزق
Quote: والله يا صديق منصوري الناس ديل غنوا جنس غناء ودقوا الأرض دي جنس دق.. ونقزوا جنس نقزي.. والبنات ديل رقصوا جنس رقيص موع بس موعان ونحن فاتحين خشومنا ونتفرج كرهنا غنانا ذاتو ودلوكتنا البت البي ترقص تلقي بي هناك صف الحريم كلهم واقفات ويتجابوا معاها يرقصوا بي رقبتهم كأنهم هم يرقصوا..
لك تحياتي الخ منصوري لا تحرمن من طلاتك
أحكي لي عننا والهوى المبدع /محمد جباره له تحياتي أين ما حل
جعفر السقيد يوم الناس اترجوك وقالو ليك لا انت براك البدري اخترت هدية للأستاذ خالد المنسي بس خايف الرجالة يسمعو الاغنية دي باكر اجي القى البوست فاضي كل الرجالة دقوا خروج نهائي ورجعوا والصامد فيهم معلقلو درب في المستشفى
11-23-2006, 01:38 PM
حاتم هاشم حاتم هاشم
تاريخ التسجيل: 08-31-2006
مجموع المشاركات: 1411
الحبيب حاتم هشام سلام لك الود انا خايف من طلاتي توديك التوج خاصة انو واضح قلبك رهيف وقاعد تحب ودا ظاهر من نوع القصائد الجايبا بل أكاد أجزم انك مش ماخد شاكوش وبس "بل مضروب بي بديقة" لكن برضو بقول لك الحديث أدناه دا
Quote: بعد الشفتو براك ياقلبي أخير لك ترجع منك وليك خلي وظيفت المكتب طايري لا لا قسم مالايقه عليك عود من تاني وأزرع أرضك دي مابتخدر ألا بدّيك عزة نفسك في واطاتك بين نخلاتك وحنب والديك
الحبيب حاتم هشام ودي عشان خاطرك الغالي
11-23-2006, 02:19 PM
حاتم هاشم حاتم هاشم
تاريخ التسجيل: 08-31-2006
مجموع المشاركات: 1411
Quote: جعفر السقيد يوم الناس اترجوك وقالو ليك لا انت براك البدري اخترت هدية للأستاذ خالد المنسي بس خايف الرجالة يسمعو الاغنية دي باكر اجي القى البوست فاضي كل الرجالة دقوا خروج نهائي ورجعوا والصامد فيهم معلقلو درب في المستشفى
صامدين وما بندق خروج والآمن مازال مستتب لكن الدرب اتعلق يا خوي جنس الكلام دا جلكوز ما بكفي
11-24-2006, 00:10 AM
حاتم هاشم حاتم هاشم
تاريخ التسجيل: 08-31-2006
مجموع المشاركات: 1411
تعاتبنا !!! وما قبلان تكاتبنا ما إنتو البيتو الحله يا نوره ورحتلو بعيد بلا شوره تراها الحله من يوم قمتو مهجوره وما رضيانه بعدك إلا مجبوره ومشتاقه عارفه الدنيا لمان تقسى فراقه حليل الحله .. وين أملاكه (وين حوره)؟؟ وين شاديها ؟؟ يا شاديها ما تزوره يا فتنه يا البعد الله منك كان مخافتنا أكان حيين .. وما متنا وكان حن القدر والدنيا لمتنا وتاني الحله زي ما كنا ضمتنا بنحلف ليك بزمتنا سعادتك كل مهمتنا وبلاك قامت قيامتنا.
.........................
حاتم هاشم
11-24-2006, 12:05 PM
حاتم هاشم حاتم هاشم
تاريخ التسجيل: 08-31-2006
مجموع المشاركات: 1411
اجمل منو في الكون كلو ما شفنا جود يا الله بي لقياهو أنصفنا راضين نحن مهما حبو كلفنا لأنو ملك شعورنا ملك عواطفنا والفناهو لو يرحم يوالفنا نحن نطيعو ما دايرين يخالفنا حاول مره زورنا عشان تشرفنا وبي معنى الجمال الفطري عرفنا لفينا المداين والقرى وطفنا زيك لا بنلاقي ولا بيصادفنا يا سواقنا قدام بيتو وقفنا خليها الزهور تمرق تلاطفنا ما حبينا غيرو وهو عارفنا دايرين لي لماهو الحظ يحالفنا ليك غنينا وتر سلكو عازفنا نظمنا القصائد فيك وألفنا دايم حبي ليك ومستحيل يفنى وسيل الشوق على الحابنو جارفنا تعال بالله أرقص تاني أتحفنا وبي عينيك لو بتحب تكاشفنا ناري أنا من عيونو المنهن خفنا عيونا بالسهام كادت تنشفنا إن نسفت سبيبه معاهو تنسفنا وإن مالت بعد سابتين ترجفنا حياتنا عليها من قبلك تأسفنا ولو ما شفنا حسنك تاني شن شفنا
............................
حاتم هاشم
11-24-2006, 12:53 PM
yasiko yasiko
تاريخ التسجيل: 02-05-2002
مجموع المشاركات: 2906
ريدكم لي شديد يا يابا ريدي أنا للبريدو شديد إلا أنا ما معاكم ديمه لكن عن حبيبي بعيد خلوني اللسافر أبوي لو كان في إجازة العيد أمشي أزور حبيبي الغالي داير أوفي حق الريد عشان يا يابا من يوم روح ما جاب لي منو بريد وما قال لي وين يا زولي كيف عامل براك وحيد ليشن يابا ما بترضوني ياني وليدكم الويحيد خايف بكره ما تلقوني إلا تتلتولي القيد شان شوق الحبيب مالكني والنار في ضلوعي تقيد داير يابا أمشي وأزورو يمكن شوفتو لي تفيد يابا عليك عطفك لي ما تخلوني أبكي شديد ويابا إن كت بتدري البي ماب تأبى لي أبقى سعيد يابا إن كت قادر أخلي كت خليتو بدري أكيد زولاً حبو عاش في قلبي كيفن عن طريقو أحيد كان يا يابا ما جربت تهواها الحسان الغيد وكان يا يابا ما أشجاك صوت البلبل الغريد وكان يا يابا ما ساهرت وعينيك ضاقن التسهيد ما بتهتم بي أعذاري مهما أقول ومهما أعيد دحين يا يابا ماك مشتاق وحيدك يبقى عندو وليد يحوم في البيت ويلعب فيهو يمرح في براءه سعيد يقول لي يمه يا حبوبه يا حبوبه عندي نشيد يسعدني ويسر بال أمه ليك يا يابا يبقي حفيد هاك يا يابا من أشعاري أبيات أنهكا الترديد كم تاه في دروب الريده قلبي وكم نظم له قصيد.
.............................................
حاتم هاشم
11-25-2006, 01:45 AM
yasiko yasiko
تاريخ التسجيل: 02-05-2002
مجموع المشاركات: 2906
Quote: وقامت شكلة بي هناك في فرقة جاية من الخرطوم عايزة تشارك العريس تغني بالعود غناء ناس الصعيد .. ناس حلفوا بالتقطعهم ماعايزين يسمعوا صوت العود حتى لو قلبو دليب وحايكسروا ليهم عودهم ويرموهو في مبخر ويبخروهم بيهو وناس قالوا لما يشوفوا منظر العود بيطرشوا.. يستفرغوا وقالوا جايين يسمعوا طمبور صرف وفعلا رقصوا على الطنبور حتى طرشوا وبتاعين العود جاملوهم بكرة في صبحية كدة
أول شئ اخوي المنصوري كدي خلني الأعلق علي إقتباسي دا حتى أرحب بيك في البوست دا...
إنت عارف الجماعة ديل حبهم فاشِر خلااااااااااااااس... قلت لي قالو حا يكسرو العود ويشمموهو ليهم بخور...!!! والله دي ما صبقهم عليها واحد قبل كدي...
أها الأرجع وأرحب بيك إضافة جديدة وحقيقية في بوست أهلك وأحبابك الشايقية... وحبابك ترتع وتضيف وتثري هذه الثقافة الشايقية المنصورية المشتركة... فيا هلا بيك ومرحبا...
شرفت جيت مرحب حباب نور العيون يااااااااااااامرحبا...
قواسيب مودتي...
ولامن أجيك راجع للتعليق على:
الدِلِيب يوم دنَّا يوم دَنَّا... السليك يوم رنَّا يوم رناّ...
شوف سيد الناااااااس في الرقيص يِنْتنَّى... يِنْتَنَّى...
أنا طبعاً كتبتها بلحنها الجميل بصوت الرائع عيسى بروي...
أبقى قريب يا المنصوري وروائعك العطرة...
أبو الحســــــــــــــين...
11-25-2006, 04:20 AM
أبو الحسين أبو الحسين
تاريخ التسجيل: 11-07-2006
مجموع المشاركات: 7948
Quote: : ورقابن يمه وين رقاب الريل ؟؟ علي الحدب البعيد شرفن علي هوهيو كلابي
الصورة فعلاً جميلة ويتذوق جمالها من كان له معرفة في القنيص حين تجري الغزلان وتقف روبة أو مكان مرتفع, وجيدها مرفوع مائل تنصت لصوت كلاب السلوق وهي كلاب الصيد تتبع اثرها
Quote: الأخ خالد منسي المقطع كما ذكرت جميل والقصيدة كلها رائعةوكذلك قصيدة الراحلة بتت خير رحمها الله وقد سقط منك (في الغالب سهوا)ً مقطعين رائعين تقول فيهما بتت خير رحمها الله وإنت ماك عارف قليباً لي مجينين وماك عارف جواب السلامي يجيني اطول لي شبرين وإنت ما بترسل لي جواباً فيه سطرين تقولي نعيم صباح امو اشتقل وين والقصيدة حسب علمي قديمة ترجع إلى ذلك العهد البعيد عندما يمم العديد من أبناء المنطقة وجوههم شطر أرض الكنانة طلباً للرزق قد تكون كتبت في الخمسينات من القرن الذي مضى ثم جاء رد اسماعيل حسن في بداية السبعينات أبرز هذه القصيدة الرائعة إلى السطح عندما شدا بها الرائع المعتزل للغناء محمد كرم منتصف السبيعنات وأحلى مافي القصيدتين بساطة الكلمات المستخدمة وقد تلاحظون معي أن سر مخاطبة أشعار الشايقية للقلوب هو بساطة الكلمات المستخدمة وعندما أقول الشايقية إنما أعنى قرى وهجر(ريفي مروي سابقا) خذ مثال لهذه استخدام الشاعرالكبير محمد سعيد دفع الله لكلمتي (رهيف)(ما غابيك) في أغنية لا شوفتاً تبل الشوق ولا رداً يطمنً) كان ممكن للشاعر أن يستخدم كلمات كثيرة غيرها مثل ما هماك أوغيرها ولكنها ماكانت لتقع في النفس موقع الكلمة المذكورة وكذلك رهيف ، وتامل كذلك استخدام الشاعر الفذ السر عثمان الطيب لعبارة (إنتي جداولي حس خاويهاشاق محل السواقي وبورها) في الأغنية الرائعة ( وا لومي العتاب جابوه) وبالذات حس خاويهاأي حس خاوي الجدول سماع مثل هذه العبارات يملؤك حنين قد يصل مرحلة البكاء إن كان القلب رهيف . ونعود
الحِبيِّب المرهَفْ الفنان الرائع موسى ود الحســـــــين...
نهارك سعيد يا اخوي...
إنت عارف وأنا أفتِّش في ردك دا لي مدة آخر الردود في القائمة إنت... لكن ردك وين... معلق فوووووووووووووووووق زي المشعليب!!! دحين يا اخوي لمن ترد الله يرضى عليك... أضغط في أيقونة الرد التحت الفي الركن التحتاني دي... لا ترد بإقتباس عشان ردك ما يروح فيها فوق...
عشان الواحد المتصفح دايماً بي يجي يتصفح من محل وقف... وماب يتخيل إنو في ردود لا فوق لسع...
عليك الله رجاء خاص... لأن تعليقاتك وردودك في المليان وحاااااااااضرة من ذلك الزمن الجميل...
متعك الله بالصحة والعافية... وسوا سوا لي قدام...
كميات مودتي...
أبو الحســــــــــــــــــين...
11-25-2006, 11:18 AM
حاتم هاشم حاتم هاشم
تاريخ التسجيل: 08-31-2006
مجموع المشاركات: 1411
طولت شايل الذكرى في عيني للعيد المضي طولت بحسب في نجوم الليل وأقدر في مساحات الفضا وأغصب مشاعرى علي الألم وأروضا واتمني لو لحظاتنا ديك تسمح ظروفنا نعوضا وتجمعني بالحسن الرفض أفكاري كان بيعارضا يمكن قبل نتبادل الحب الشريف يمكن رضا تمضي السنين وتمضي الشهور واتمنى لو كان تمت الأيام وانتهت السنين والكون وقف خلا المسير كان قلبي فتش عن نصير خفف عذابات الضمير ومن قبل ما أصل المصير الفيهو قلبي المحترق فكر كتير اتذكر العيد المضى يوم بيتنا أصبح كلو خير يوم كنا بي نشوة فرح دايرين نطير يوم القمر في بيتنا متواضع قعد فوق السرير وقال ... كل عام وانتم بخير نظراتو كان زي بسمة الطفل الغرير وخصلات شعر تنساب متل موية الغدير وحبات نهودو الطعنن فوق الصدير حاولت بيهن استجير من العيون التايهه والخصر الصغير من الشفاه العطشى والوجه المنير من السعير ومرت ليالي طوال علىّ وطأت غرامك ما بتخف حاولت أصارحك وليك بالبي اعترف فكرت أكتب ليك رسائل بي دموعي الما بتجف مليون حرف داير أخليك عن دلالك تنصرف داير أعبر عن مشاعر عن مشاعرك تختلف ودايرك تصدق إني في محراب غرامك معتكف واجيب قلم واحصر تعابير الألم وكل ابتهالات العشم لكني من أول حرف أجد الأنامل ترتجف وتتذكر العيد المضى أعياد تجي وأعياد تفوت والفرحة تصحب كل عيد تملا البيوت وأنا كل ما استقبلت عيد أحيا وأموت وأطبع ملايين التهاني على الكروت تمضي السنين وتمضي الشهور وأنا قلبي يحيا بلا شعور لكنو قرر يا القلبت ظلامو نور قرر يحارب كل أوضاعو ويثور قرر يكاشفك بي ضمير ما فوقو زور قرر يرسل ليك سطور مكتوبه فوق ورق الزهور مكتوبه بي دمعو الغزير داير الحروف تبقالو نور وتبقالوا .... لى قلب البحبو جواز مرور
...................................
حاتم هاشم
11-25-2006, 11:25 AM
حاتم هاشم حاتم هاشم
تاريخ التسجيل: 08-31-2006
مجموع المشاركات: 1411
جافاني المنام وأصبح محال يا سلوى مالو عذابي طال طريت زولي العليهو قليبي مال طريتو اللي منام عيني شال طريت الحسنو آيه من الجمال الوحيد بين جيلو معدوم المثال بوصيك يا رسول قبل الزوال سافر وفي عقاب الليل تعال أمش للفي الصعيد شد الرحال قولو طيفك في خيالي أنا لا يزال أقول ظبية ونشت بين التلال والله أقول حورية من جنة بلال أقول غاده ومكلله بالدلال دي قطعة من سحر الطبيعة الفي الشمال سلوي ليه فكري أنشغل بيك يا غزال وليه طال إشتياقي ودمعي سال متين ألقاك في بيت الحلال وألقي كل شقاي كل عذابي زال حجبت ضياك عننا يا هلال ونسيت بلدنا يا سمح الخصال تطول يا الله أيامنا القلال نعيش ونحقق أحلام الخيال أسرت قليبي يا تبش الرمال أنا لا يلوموني إن بقيت في هواك ضال مع ذكراك دايماً في نزال أنا نومي جافى وعقلي مافي وحالي حال.
..................................
حاتم هاشم
11-25-2006, 11:34 AM
أبو الحسين أبو الحسين
تاريخ التسجيل: 11-07-2006
مجموع المشاركات: 7948
Quote: تطول يا الله أيامنا القلال نعيش ونحقق أحلام الخيال أسرت قليبي يا تبش الرمال أنا لا يلوموني إن بقيت في هواك ضال مع ذكراك دايماً في نزال أنا نومي جافى وعقلي مافي وحالي حال.
اللللللللللللله من كلمة تِبْش الرمال دي...
أصلاً ما يتخيلها إلا أهل الجزايِر (وبالأخص ناس بجبوج) والأرض المِتْرومْلي القريييييب من القيف من تالا البحر... صحيح تِبِشها تدي ربك العجَب...
كميات مودتي... ويسلم ضُراعَك أخي حاتم...
ونسأل الله الصحة والعافية للمبدع القامة عبد الله محمد خير...
أبو الحســـــــــــــين...
11-25-2006, 12:17 PM
أبو الحسين أبو الحسين
تاريخ التسجيل: 11-07-2006
مجموع المشاركات: 7948
Quote: بت البلد كلمات السر عثمان الطيب غناء محمد جبارة
بلا خبر تلقى الخبر مالي البلد قالوا العريس قام بالأحد الحلة جاطت والحريم يتهامسن جاي الولد كوم من بنات للبير ورد يتحدثن جاي الولد يابختها وشوقنا نحن اللينا جمر الشوق وقد ***** لامن خلاص الليل دخل آخر شعاع من الشمس روح نزل ضو القميره جاء من بعيد بهر قدل دافر ظلام الحله قدامو وصل **** ناس البلد النام رقد والماسك السبحي عبد مشغول هو بى خبر العريس القالوا قام بالأحد
الليلة هناك بعيد بقادي في آخر الديار راكوبة ضلها أحر من حر النهار كوم من بروش وجريد تمر عيدان صغار دلوق هدوم موروثه من زمن الكبار تلات عناقريباً صغار كرابه منقطع نزل والنوم من البى فوقها روح داك جفل *** راقد هناك كوم من ضياع مركب مسافرة بلا شراع وأحلام مسافرة بلا وداع دموع ضياع تجاره من غير انقطاع أحرف أنين ما خطتن أيد بيراع
بت البلد عبراتها سدت في الحلق تبكي تنوح تشرب دموعها تنشرق لمن حسيس نقارة جاها من الشرق *** قامت على الحيل صنقرت شالت طريحتها للدميعات كفكفت
أتذكرت فجاة السنين الفاتو جن وأيام زمان اتلملمن أتذكرت كانت تقوم فجراً صباح لمن يقموا أهل الصلاح وأبوها شايل السبحي صاح ياشفعه شدي سريع سوي الملاح شيلي المناجل وأمشي قدامي الجرف أتذكر كانت تسبقو تمشي تنـزل بي تِحِتْ تمسك صبيت التمرة بايده تَحِتْ تقعد تحش اللوبي لي الكاويق تقش تصل البحر والموج يداعبها فوق هدومه ينط يرش وبعدين تشيل القش تفوت واليوم يفوت وتفوت سنين وتمر سنين يكبر عمير بت البلد ويكبر معاه كمان حنين
الليله في يوماً صباحو صباح هنا واحة عبير نغمة غنا ريحة لبينه مقننه مر الجنى وسلم على بت البلد ذي عادتو سلم وأبتعد تابعاه عين بت البلد بت البلد سمعت ضريبات القلب ياالله مالو ده ها القلب بعد الثبات كيفن خرب بت البلد عرفت تحب *** واليوم داك وماجاها نوم مادام خيال ود البلد يمشي يحوم بين الخيال شافت وجيهو الهاش وباش شافت عيونو الفيها فيض أحلامها عاش شافت سحاب الريدة فوق واديها راش الليلة تاهت مع الشوق الما عاد ينكتم والصورة هاد في قليبه صبح وسم تاهت مشت سايقاها دقات الدليب لي دار حبيبها منى القليب لي قعده عصراوية فوق العنقريب لي الونسة والخاطر يطيب لي مسكة في أيد الحبيب *** الوقفة قدم الجنيات القرمصيص وغنا البنات ياالله وين تلقى الثبات والصفقة من تال الولاد تسمعها جاياها من أخر بلاد أتذكرت قول حاج مُحُمد والدها حالف بي يمين ود البلد ما يخدها لو كان ركع قدامها صلى يعبدها *** أتذكرت قول حاج مُحُمد والدها وصف العريس الجاي بقطر الأحد كتَّر محاسنو عددها .... راجل موظف عندو مال يأويك في بيتاً حلال تبقي لو أماً للعيال
أتذكرت لمن أبت قول حاج مُحُمد والدها كيف نهرها وكيف نهزرها حالف بي يمين بيودرها لو ما رضت بالجاي بي قطر الأحد *** قاليها: ما عندك أدب تعبان سنين فوقك تعب بديك لي زولاً كعب تربال عشتو عدم عدم لو قاري لو ماسك قلم لو أخديتو تندمي صح ندم يشقيك يورك الألم أتذكرت كيف الحبيب ود البلد في الغربة سافر وأبتعد بكت لمن الخبر زاع في البلد أنو العريس قام بالأحد *** الحلة جاطت والحريم يتهامسن جاي الولد لكنهن ما عرفن الشوق كيف وقد ما عرفن هي شوقها تب ما عندو حد مو للعريس للحبيب ود البلد دا الراح في زحمة ضياع ما توجد يا حليلك إنت يا بت البلد
وينك إنت يا حِبيِّبنا الكيك...
ويا ريت د. يس ينزل لينا الأُغنية دي بصوت المبدع محمد جبارة...
كميات مودتي للجميع...
أبو الحســــــــــــــين...
11-25-2006, 01:23 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
Quote: الأخ خالد منسي المقطع كما ذكرت جميل والقصيدة كلها رائعةوكذلك قصيدة الراحلة بتت خير رحمها الله وقد سقط منك (في الغالب سهوا)ً مقطعين رائعين تقول فيهما بتت خير رحمها الله وإنت ماك عارف قليباً لي مجينين وماك عارف جواب السلامي يجيني اطول لي شبرين وإنت ما بترسل لي جواباً فيه سطرين تقولي نعيم صباح امو اشتقل وين والقصيدة حسب علمي قديمة ترجع إلى ذلك العهد البعيد عندما يمم العديد من أبناء المنطقة وجوههم شطر أرض الكنانة طلباً للرزق قد تكون كتبت في الخمسينات من القرن الذي مضى ثم جاء رد اسماعيل حسن في بداية السبعينات أبرز هذه القصيدة الرائعة إلى السطح عندما شدا بها الرائع المعتزل للغناء محمد كرم منتصف السبيعنات وأحلى مافي القصيدتين بساطة الكلمات المستخدمة وقد تلاحظون معي أن سر مخاطبة أشعار الشايقية للقلوب هو بساطة الكلمات المستخدمة وعندما أقول الشايقية إنما أعنى قرى وهجر(ريفي مروي سابقا) خذ مثال لهذه استخدام الشاعرالكبير محمد سعيد دفع الله لكلمتي (رهيف)(ما غابيك) في أغنية لا شوفتاً تبل الشوق ولا رداً يطمنً) كان ممكن للشاعر أن يستخدم كلمات كثيرة غيرها مثل ما هماك أوغيرها ولكنها ماكانت لتقع في النفس موقع الكلمة المذكورة وكذلك رهيف ، وتوين امل كذلك استخدام الشاعر الفذ السر عثمان الطيب لعبارة (إنتي جداولي حس خاويهاشاق محل السواقي وبورها) في الأغنية الرائعة ( وا لومي العتاب جابوه) وبالذات حس خاويهاأي حس خاوي الجدول سماع مثل هذه العبارات يملؤك حنين قد يصل مرحلة البكاء إن كان القلب رهيف . ونعود
ابوالحسين سلامات نعم كنت احفظ هذه القصيدة أنا من زمن بعيد تفلتت من الراس يا اخوي الكبر ما دخل مع اني صغير وجاهل. كان المبروك دكتور ياسين نزل القصيدتين بصوت محمد كرم الله وعدلت قصيدة بت ود خير وانزلتها مرة اخرى وفيها كما ذكرت البيتين الحلوين الذكرتهم
نعم يا احوي حلاوة شعر الشايقية في بساطة الكلمة وكمان ببحتو واشوفوا الكلمة ذات التأثير القوي
وصلوها مرحلة الخطر والأمن مامستتب
هنا لو لاحظت كان ممكن يستخدم الشاعر اي كلمة اخرى تدي المعنى لكن بحت بحت حتى جاء هذا التعبير الذي فعله فعل السهام للآذان فوقف الشاعر في اختيار اللفظ واجاد هذا ما يتصف به شعراء الشايقية
مثال اخر قصيدة حميد الواسوق
طبعا القصيدة رمزية
لكن حميد اراد ان يقول أن الثورة التي ينتظرها الناس ما جاءت من العمال ولا من الطلاب والمتعلمين ولا من المزارعين لكن جاءت من الجيش مرة اخرى . غاص حميد فطلع لنا بكلمات بسيطة فكان اختياره لما هو مرتبط لكل ممن تقدم
من الواسوق ابت تطلع من الأبرول أبت تطلع من الأقلام أبت تطلع من المدفع طلع خازوق
11-25-2006, 02:00 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
سلام أولاً أشكر الأستاذ الأديب موسى الحسين لتحليلاته الفنية الأدبية الضافية وارجو منه أن يرد من "الركن اليماني" حتى نستمتع بما يكتب ولو لا كتابة أبوالحسين وتعليقه لما كنت رأيت هذه الدرر الأستاذ ابوالحسين والأستاذ خالد المنسي سلام قصيدة "بت أدخير " موجودة في الصفحة الأولى بصوت ود كرم ما عارف قد أكون فهمت غلط عموماً أعيد انزالها هنا
11-25-2006, 05:38 PM
حاتم هاشم حاتم هاشم
تاريخ التسجيل: 08-31-2006
مجموع المشاركات: 1411
.............بسم الله الرحمن الرحيم...............
احدى روائع الشاعر..المبدع..شيخ العاشقين
عبدالله محمدخير............شفاهالله..........
المبطر
زيدي من لحظات الوداد يا المبطر وسيب العناد إنت ليه إخترت البعاد وفي بلدنا أبيت القعاد مالقلوب شوقه عليك زاد وبي وراك أعلنت الحداد مالو سفرك من غير ميعاد بيهو شمتو علينا حساد لامتين ينتم المراد وبكره نسمع بيك جاي صاد كم وكم في الدنيا زهاد بيك ولهانين يا سعاد ما عيوني أزاها السهاد ومن مشيت فارقت الرقاد الله لي صبري من النفاد ويا حليل قلبي الما استفاد قلبي لو في حبك يباد يبقي زي المات في الجهاد داير أوصفو لوشعرى جاد حاكى فرع البان فرعو ماد دقو ليهو الكف يا ولاد خلو يبدع زي ما اعتاد يا جميل ربنا كان أراد يبقى حبنا ليهو امتداد قلت أسافر وأبقي شحاد وأمشي لي بيتن في المزاد عاد أدق الباب والله عاد أسكت امشي أقيف كالجماد.
.....................................
حاتم هاشم
11-26-2006, 02:22 AM
أبو الحسين أبو الحسين
تاريخ التسجيل: 11-07-2006
مجموع المشاركات: 7948
Quote: من الواسوق ابت تطلع من الأبرول أبت تطلع من الأقلام أبت تطلع من المدفع طلع خازوق
الحِبيِّب أُستاذ خالد...
صبحك الله بالخير والرضا يا اخوي...
إنت عارف بساطة الكلمات القُلت بينتقوها أهلنا الشايقية دي... ذكرتني موقع طريف وجميل في نفس الموقف...
مرة جالسين في خلوة السادة الإسحاقاب (اللهم أرضى عنهم) في منطقة فتنة بتنقاسي... وجالس معانا أخونا صاحب الردود اللذييييييييييذة والحلوة والساخرة في نفس الوقت بس موزووووووووونة وماها مشاتري!! الحِبيِّب محمد ود جادين وهو من أعيان منطقة فتنة بتنقاسي...
وهو راقد علي قفاهو كدي فوق برش الصلاة بعد فطور رمضان في الخلوة... إتذكر أُغنية صديق أحمد...
فقام قال ساخراً عليكم الله يا اخواننا شوفو شيطان الشعراء ديل...
هسع نحن من قُمنا حايمين وطالعين ونازلين في الجزيري دي... ومن حفرو البحر نحن نزرع في ملاح الويكي والسبروق دا... والبحر نعديبو شرق وغرب... والجروف سارحين فيها بالعُرُض والطول... الكلام دا غالِبنا نَربِّطو مع بعض؟؟؟
حقيقة يا أخي خالد كلمات الشايقية تمتاز بالبساطة الشديييييييييدة بس معناها عمييييييييق وبالذات زي ما قالت أختنا خالدة بت البدوي... لمن يكون في الحُب وفراق الأحبة...
البليلي أم ملحاً نضيف حبي لوبا.. وحبي عيش ريف يا حلاتك في الشلاليف
حلاتها في الشلاليف لآنو ماكان في غيرها وكواري الآبرى البنطاقشن.
تخريمة على بليلة رمضان حكى لي أخونا من تنقاسي احمد عبدالله يقيم في تربة أنو في جماعة بيفطروا فطور رمضان في الشارع كعادة أهلنا الطيبين وبعدين في نعجة متواتاهم بس يقيموا الصلاة تغير على البليلة من صحن لصحن الجماعة يخلصوا الصلاة يلقوا صحن هنا وصحن مقلوب هناك والحكاية تكررت ، يوم حللوا الصيام بس الشيخ قام يلا صلاة المغرب الصلاة ياناس أقيمو الصلاة .. واحد مسخوط أو مطموس قال لو يا شيخ بالله خلينا الصلاة دي النعجة داير تجي تأكلها .
Quote: سلام أولاً أشكر الأستاذ الأديب موسى الحسين لتحليلاته الفنية الأدبية الضافية وارجو منه أن يرد من "الركن اليماني" حتى نستمتع بما يكتب ولو لا كتابة أبوالحسين وتعليقه لما كنت رأيت هذه الدرر
د. يس أخوي...
نهارك سعيد يا اخوي...
الحمد لله اليوم تستمتع بي ردود الأخ الأديب موسى ود الحسين... الظاهر عليهو رد من الجانب اليماني يا عملات كلامك...
التحية ليك وللأخ ود الحسين... والجميع...
وكميات مودتي...
أبو الحســـــــــــــــين...
11-26-2006, 09:35 AM
أبو الحسين أبو الحسين
تاريخ التسجيل: 11-07-2006
مجموع المشاركات: 7948
Quote: سلام أولاً أشكر الأستاذ الأديب موسى الحسين لتحليلاته الفنية الأدبية الضافية وارجو منه أن يرد من "الركن اليماني" حتى نستمتع بما يكتب ولو لا كتابة أبوالحسين وتعليقه لما كنت رأيت هذه الدرر
د. يس أخوي...
نهارك سعيد يا اخوي...
الحمد لله اليوم تستمتع بي ردود الأخ الأديب موسى ود الحسين... الظاهر عليهو رد من الجانب اليماني يا عملات كلامك...
التحية ليك وللأخ ود الحسين... والجميع...
وكميات مودتي...
أبو الحســـــــــــــــين...
11-26-2006, 11:14 AM
حاتم هاشم حاتم هاشم
تاريخ التسجيل: 08-31-2006
مجموع المشاركات: 1411
عاد يا قلبي كيف تعمل ماضيك اللكان أجمل سعادتك فيهو ماش تكمل ودقاتك بتتعطل تقبل والله ما تقبل مجبور ترضي باللحصل تخطيطك تراهو فشل وما دليت دلوك نشل كفاك زمن شربت عسل هاك اتجرع الحنضل ظنيتك كبرت عقل وفوق نيرانو تتململ أخيرلك صلى وإتنفل أوعك تانى تتطفل ماضيك بالأماني حفل أفراح فى لعوب وحفل غاب نجم السعود أفل جديا كان ولوف وجفل في دنياك مافي عدل شقاوتك ما بي تتبدل بي فوقك جا ماشي قدل ديسو اللي كتيفو هدل يميل ويميل ويستعدل وعينيهو الملاني جدل تقبل والله ما تقبل مجبور ترضى باللحصل.
...........................
حاتم هاشم
11-26-2006, 11:22 AM
حاتم هاشم حاتم هاشم
تاريخ التسجيل: 08-31-2006
مجموع المشاركات: 1411
تلب أمسك حبل الصبر خلو قلبك لا يبقي ني أصلو ود أب زيد كل يوم من بلدنا يرحل جدي شن بسويلك عاد أنا القبلك الحرمان مر بي والضنا الهسا عليك زاد من زمان أنا زايد علي كم حبيبا شغل الفؤاد في العيون كان متل الصبي حل بي (توفيق) السواد مافي زول قال كفاره لي أرقى يا تلب ودعت قبلو كم قمره منوره وكم تحف نادرات سافرن وكم فراشه وكم جوهره وكم قلوب متلك بالفراق الأنين والشوق سهره شوف عوض عبدون الحروف خل من باطنه ظاهره يا عوض مدرسة الشعر بي جداره إياك ناظره بي غناك حرف السين بقت فوق بنات جيله مبطره سابك اللى بلد الجليد ودعك ودقّ مغادره يا قلب مالك انجرح ولسه ليه جرحك مابره أما أنا المسكين الطروف غرزت في أظافره وين غناي لي شتل الجروف والجناين وأزاهره أسألوا الدرويش عن صديق عمرو كم جمرات عاصره خلو يحكيلكم عن حياه النجيفى الهو معاصره الككر يا رحمن زمان ضاع مع العشاق شاعره مانفع تغريدو الحزين ما نفع صدق مشاعره جننو (البتوفيق) رحل وهام ورا القام بالباخره خلا دنياهو فرندقس ما عرف أوله وآخره أرقى يا رحمن في السماح مافي بلداً بتجاكره الله مديها سماحه صاح من كروها ولى تكره أصلو ود أب زيد معترف بي جريمتو ومو ناكره كلو جور القال سفروها وقطع ليها تذاكره.
...............................................
حاتم هاشم
11-26-2006, 11:40 AM
حاتم هاشم حاتم هاشم
تاريخ التسجيل: 08-31-2006
مجموع المشاركات: 1411
حورية ساكنة كريمة انا ما بجيب اسما جل الاله الخالق فتجلا في رسما صيد الخلا الجفال في النص عديل قسما اتمنى يوم في النوم تجمعني بي قسمة ويصبح صباحي سعيد والدنيا مبتسمة والكون يبشر لي وخلق الله تتلما يوم الزفاف والحنة لي زغرتي يا يما لزهرة في بستان توب العفاف جسما نغماً حنين رنان اسم الله فوق نضما راقد سنين وسنين كيفن اطيق ألما وكيفن اساهر الليل اسهر معا حلما جوا القليب نشاب صايبني بي سهما ارجع اقول يا ناس اصلو العذاب قسمة حورية ساكنة كريمة انا ما بجيب اسما
.........................................
عن الشاعر حليفه عمر
الشاعر خليفة عمر من مواليد جزيرة بوني بالمناصير في عام 1951م بدء مسيرتة الشعرية من الصغر بمناطق الشمال واستمد من روعتها ورونقها الإبداع والجمــــــال والذي ظهر في قصائده وكلماته الرنانة تغني لخليفة عمر الكثير من فناني الشمال وددندن الطمبور بالكثير من روائعه من هؤلاء المبدع المعتزل عبد الرحمن محمد صالح حيث شجي بالكثير من اغانية ومنهم ايضاً طارق العوض وصديق احمد وكثيرون ويعتبر خليفة عمر من الشعراء والملحنين المتميزين وبدأ رحتله الفنية ايضاً بالغناء ولكنه حاليا يكتفي بالشعر والتلحين فقط ، ويعتبر خليفة عمر مدرسة فنية قائمة بذاتها وله ديوان شعر تحت الطبع سيري النور قريباً بأسم نهاية الصيف
* البذيد لي جروحي تاني يفتقه كل ماشوف لي عروسة قاعدة مجرتقه ما بطيب لي قاعد أقوم اتاوقه العطور جنب المراي مروقة ( الله دا كلام دربك ما ينفعو يا دكتور ياسين )
* النفوس الطيبي ما كانت شريرة أنا ولله طاريك يا أمدرق وطاري العشيره الليله أنا من فتح لقيتك أمدرق النضيره من أمي العلمتني أمشي تاتي علي الحصيره
لا شوفتن تبل الشوق ولا رداً يطمن أريتك تبقى طيب انت أنا البي كلو هين
قليبن لي رهيف عافو ما بحمل حنين والله ما يخفيك حالو الفيهو كل البيهو بين
* مالا يا خلاقة اوعة تكون مريضة أنا بريده ياالله شادية حياتي في آيده
أنا مرق خليته في صحة وشديده أنا رجعت لقيته نقص النص عويده يا إلاهي أشفيها وليها الصحة عيده أنا بالعمر بفديها شادية عشان بريده
شادية نارا أذتني وغيرها منو البقيده
أنا يا خلوق جنيت واسباب جني ريده
* خليتنا لي منو شادي خليتنا لي منو يابا ود حاج أنا جيت أزور وجب زيارتك حب للطيور لي تجيبو عريسي في دور يضوي حوشنا يلالي بالنور
يابا ودحاج الفي السلم يابا ألحقني أنا أنظلم ناس ابوي رعوني الغنم وأنهروني خشمي أن نضم أن نضم قالوا بنات زمن وأن سكت الموت والعشم
11-26-2006, 01:58 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
حورية ساكنة كريمة انا ما بجيب اسما جل الاله الخالق فتجلا في رسما صيد الخلا الجفال في النص عديل قسما اتمنى يوم في النوم تجمعني بي قسمة ويصبح صباحي سعيد والدنيا مبتسمة والكون يبشر لي وخلق الله تتلما يوم الزفاف والحنة لي زغرتي يا يما لزهرة في بستان توب العفاف جسما نغماً حنين رنان اسم الله فوق نضما راقد سنين وسنين كيفن اطيق ألما وكيفن اساهر الليل اسهر معا حلما جوا القليب نشاب صايبني بي سهما ارجع اقول يا ناس اصلو العذاب قسمة حورية ساكنة كريمة انا ما بجيب اسما
.........................................
عن الشاعر حليفه عمر
الشاعر خليفة عمر من مواليد جزيرة بوني بالمناصير في عام 1951م بدء مسيرتة الشعرية من الصغر بمناطق الشمال واستمد من روعتها ورونقها الإبداع والجمــــــال والذي ظهر في قصائده وكلماته الرنانة تغني لخليفة عمر الكثير من فناني الشمال وددندن الطمبور بالكثير من روائعه من هؤلاء المبدع المعتزل عبد الرحمن محمد صالح حيث شجي بالكثير من اغانية ومنهم ايضاً طارق العوض وصديق احمد وكثيرون ويعتبر خليفة عمر من الشعراء والملحنين المتميزين وبدأ رحتله الفنية ايضاً بالغناء ولكنه حاليا يكتفي بالشعر والتلحين فقط ، ويعتبر خليفة عمر مدرسة فنية قائمة بذاتها وله ديوان شعر تحت الطبع سيري النور قريباً بأسم نهاية الصيف
الحِبيِّب الأُستاذ حاتم هاشم...
صباحك زين يا اخوي...
إنت عارف القصيدة دي أنا لي زمن بفتش فيها وما لاقيها... والأخ خليفة عمر دا شاعر مجيد تغنى له معظم فناني الطنبور وله أشعار جميلة جداً جداً تغنى بها زي ما تفضلت الفنان المبدع عبد الرحمن البركل...
ومبروك صورة سيدي عثمان الظاهرة منورة الديار دي...
لكن عليك الله بيني وبينك...
خليفة عمر... قال حوريّة ساكنة كريمة ولة ساكنِي كريمة؟؟؟
واصل إبداع وتسلم يا اخوي...
كميات مودتي....
أبو الحســـــــــــــــين...
11-27-2006, 02:10 AM
yasiko yasiko
تاريخ التسجيل: 02-05-2002
مجموع المشاركات: 2906
Quote: هذه قصيدة حفظت ابياتها منذ زمن لكن تفلتت ابيات منها اكيد جوابي بلقى عند الدكتور المبروك ياسين أن ينزل ألاغنية أو يزودنا بكلماتها
الحبيب الأستاذ خالد محجوب سلام آ زول والله القصيدة إلا في أساطير الأولين يطرشني تب ما سمعت بيها لا قصيدة لا أغنية حقيقة استمتعت بها وسأبحث عنها عسى ولعل أجدها في احد المنتديات
11-27-2006, 02:25 AM
أبو الحسين أبو الحسين
تاريخ التسجيل: 11-07-2006
مجموع المشاركات: 7948
Quote: تعرف يا ابو الحسين مشكلتي أنا ما كنت أدون الأشعار الجميلة عندما اسمعها كنت أعتمد على الحفظ من السمع
هذه قصيدة حفظت اباتها منذ زمن لكن تفلتت ابيات منها اكيد جوابي بلقى عند الدكتور المبروك ياسين أن ينزل ألاغنية أو يزودنا بكلماتها
هيثم أحكيلكم حكايتو قولي صح مافيهو ريبه قصتو المشهوري كانت حاصلي قبل سنين عديدة
تبدأ بمشوار عواطف بين قلوب ملاينة طيبه وريده في عمق المشاعر وكل يوم يزداد لهيبه
نجوى بت خالتو الوحيدة ريده أصبح مبتليبو وفي إشتياق للّقّية دايماً كان يسوقو علي دريبه
كاتم الريد في دواخلو وبرضو كاتمه هي في قليبه ومطوي في الوجدان غرامن زي خلائق ساتره عيبه
وكان في يومها الما تشوفو نهارها كلو تكون كئيبه وتبكي لما الليل يهود ويسمعو الجيران نحيبه
سلام وصباحات ندية للحِبَّان...
القصيدة بتاعت هيثم دي... تغنى بها الفنان الرائع معاوية المقل...
والبُشَارة يا خالد أخوي... قصيدة كَدَكي (حُمَّد إحمد في العمل ... زولاً يضُرْبُوبُو المثل)... لقيتها وحا أنزلها ليك اليوم بإذن الله تعالى... طلَّتَك المسائية اليوم تلقاها كااااااااااملة...
كميات مودتي...
أبو الحســــــــــــين...
11-27-2006, 05:41 AM
منصوري منصوري
تاريخ التسجيل: 09-28-2003
مجموع المشاركات: 2504
أبو الحسين البوست بتاعك راقي جدا ويجبر الزول على المشاركة فيه وشكرا ليك على الكلمات الرائعة البي تشبهك في حقنا.. سنواصل معك في هذا التراث الذي نحبه ........
Quote: أحكي لي عننا والهوى المبدع /محمد جباره له تحياتي أين ما حل
وكمان شكرا ياسيكو على الكلمات دي سوف أخبرك كل مرة شوية شوية عن الفنان محمد جبارة ............ محمد جبارة من أعظم فنانين الطمبور بعد النعام آدم ولكن بكل اسف لم يسلط عليه الضوء الإعلامي الكافي من الإعلاميين ..لكسل.. لامبالاه.. بعد عن العاضمة.. ظروف لاأدري لو سألت كل فنانين الطمبور وعلى رأسهم عبدالرحمن اليمني في نادي الطمبور من هو أحسن عازف طمبور لقال ليك هو محمد جبارة لو سألت صديق أحمد من هو أحسن من وظف قدرات الطمبور لقال ليك محمد جبارة وهو فنان زيهم وهم فنانين زيو.. لكن عشق تراث المنطقة خلاهم يقولوا الحقيقة من غير ضرار ..... لم يجد الأضواء الفنية الكافية.. حتي بدأ يشيخ الآن وشوية نبرات صوتية تضمحل عنده.. وهذا مالايرضه الفنانيين.. الفنان مابيحب تقول ليهو صوتك كدة والله كدة ولايحب تقول ليهو عمرك دخل الستينات زي الحسناء ما بتحب تقول ليها كبرت وكدة... لكن محمد جبارة فناننا العظيم لايزال يبدع.. ولكن لا أحد ينكر غبار السنين بالطبع.. لايزال هو في قمة ............. أغنية يايمة كلمات الشاعر الرقيق السر عثمان الطيب.. الذي يربطنا به معارف من جهة نوري وقرابة.. وإحدي شقيقاته جارة لنا كانت في الثورة.. وبعض معارفنا من نوري وأقاربنا زملاء دراسة معه وأصدقاء.. هذه الأغنية دفعت بمحمد جبارة الى جمهور عريض من خارج منطقتنا حتى في كل أصقاع السودان... كما دفعت أغنية الطيف بمحد كرم الله الى بعد وقامة كبيرة .......... بدأ محمد جبارة علما لايطال في فن الطمبور بصورة ظاهرة قبل صديق أحمد بسنوات معدودة وقد تكون متقاربة.. كان مركز محمد جبارة على مدينة عطبرة وكان وجوده فيها ولكثرة الشايقية فيها.. قعد فترة طويلة محمد جبارة في عطبرة.. وله فيها قصة.. بدأت تظهر اإاني وصوت محمد جبارة الى المستمع وتظهرفي الحفلات في أواسط الستينات.. وبدأ يندفع للساحة الغنائية بقوة في 1967 وسنة 1968 وسنة 1969 وسنة 1970 وما تلاها.. أغنياته التي كان يرددها بعضها أغاني النعام آدم وبعضها تراثية وبعضها خاص به ........... الله الليل واللينا الله الليل ياناس الليل واللينا الأمان ياناس .......... بعد ما كت فقير بقرا القراية رجعتا أنا تاني صديت لى غنايا كسر لوحي وكسر حجر الدواية لى فقير الخلوة قوم يلاك معايا ......... شتيلة المشرق الفدع السبيطة بقيت مشغول بها الآيات نسيتها ودحين ياناسي تهتا وما لقيتا ............ وكان يردد يامحمد دا بلودو وين قول لى أمو مني أبوه مين ......... كين رقص وفدع الإيدين سووا عوم فرخ الوزازين ..........جسمو زي البانة في اللين وفي القرير أرضو أعز طين ........... قلبي في الدقات والأنين في الفرق تشهدلو( بق بين) ................. وكان يردد عليكم الله ياعشاق وليا من نار الغرام الديمة حية ......... سمحة الروقه فوقا حلات رقيصة حلات وجناتا دي الدر النفيسة ............ جملا خلقة ذو القدرة العظيمة مؤصلة من جدودا ملوك حزيمة .......... وكان يررد كيفن القليب بيطيب مادام إنت ياكا طبيبو .......... وكان يردد يارب ياكريم تلطف عليا..... إي إي إييي أغنية راقية ظهرت في أول السبعينات كدة ........ وكان يردد ياعذاب العاذب حياتو عذاب حقيقة بقولا ........... وكان يردد أنا ياناس الله لى والليلة عربية الزراعة شالت النعناعة يانبي الشفاعة يتكسر ضراعا وهذه كان يرقص على أنغامها غير بنات الشايقية في عطبرة وغيرها لأن إيقاعها غير إيقاع الدليب ........... وكات يردد مليح اللون شوفتك تفرح المحزون واناري من مليح اللون .... كل هذه المساحة من عمر الفنان الرائع وهو لم يظهر على التلفاز كلها مطوية في اشرطة حفلات ومناسبات وقعدات.. ولكن التاريخ لايضيعها وابناء المنطقة لاينسونها في حق هذا الفنان العظيم.. معذرة لبعض شعراء المنطقة الذين أوردت بعض مقاطع من كلماتهم وقتما تطرقت لبعض مسيرة محمد جبارة الفنية وان شاء الله فرصة قريبة اقدر اسجل النصوص كاملة وهي موجودة باسماء شعرائها معذرة في هذه العجالة
11-27-2006, 05:47 AM
منصوري منصوري
تاريخ التسجيل: 09-28-2003
مجموع المشاركات: 2504
أبو الحسين البوست بتاعك راقي جدا ويجبر الزول على المشاركة فيه وشكرا ليك على الكلمات الرائعة البي تشبهك في حقنا.. سنواصل معك في هذا التراث الذي نحبه ........
Quote: أحكي لي عننا والهوى المبدع /محمد جباره له تحياتي أين ما حل
وكمان شكرا ياسيكو على الكلمات دي سوف أخبرك كل مرة شوية شوية عن الفنان محمد جبارة ............ محمد جبارة من أعظم فنانين الطمبور بعد النعام آدم ولكن بكل اسف لم يسلط عليه الضوء الإعلامي الكافي من الإعلاميين ..لكسل.. لامبالاه.. بعد عن العاضمة.. ظروف لاأدري لو سألت كل فنانين الطمبور وعلى رأسهم عبدالرحمن اليمني في نادي الطمبور من هو أحسن عازف طمبور لقال ليك هو محمد جبارة لو سألت صديق أحمد من هو أحسن من وظف قدرات الطمبور لقال ليك محمد جبارة وهو فنان زيهم وهم فنانين زيو.. لكن عشق تراث المنطقة خلاهم يقولوا الحقيقة من غير ضرار ..... لم يجد الأضواء الفنية الكافية.. حتي بدأ يشيخ الآن وشوية نبرات صوتية تضمحل عنده.. وهذا مالايرضه الفنانيين.. الفنان مابيحب تقول ليهو صوتك كدة والله كدة ولايحب تقول ليهو عمرك دخل الستينات زي الحسناء ما بتحب تقول ليها كبرت وكدة... لكن محمد جبارة فناننا العظيم لايزال يبدع.. ولكن لا أحد ينكر غبار السنين بالطبع.. لايزال هو في قمة ............. أغنية يايمة كلمات الشاعر الرقيق السر عثمان الطيب.. الذي يربطنا به معارف من جهة نوري وقرابة.. وإحدي شقيقاته جارة لنا كانت في الثورة.. وبعض معارفنا من نوري وأقاربنا زملاء دراسة معه وأصدقاء.. هذه الأغنية دفعت بمحمد جبارة الى جمهور عريض من خارج منطقتنا حتى في كل أصقاع السودان... كما دفعت أغنية الطيف بمحد كرم الله الى بعد وقامة كبيرة .......... بدأ محمد جبارة علما لايطال في فن الطمبور بصورة ظاهرة قبل صديق أحمد بسنوات معدودة وقد تكون متقاربة.. كان مركز محمد جبارة على مدينة عطبرة وكان وجوده فيها ولكثرة الشايقية فيها.. قعد فترة طويلة محمد جبارة في عطبرة.. وله فيها قصة.. بدأت تظهر اإاني وصوت محمد جبارة الى المستمع وتظهرفي الحفلات في أواسط الستينات.. وبدأ يندفع للساحة الغنائية بقوة في 1967 وسنة 1968 وسنة 1969 وسنة 1970 وما تلاها.. أغنياته التي كان يرددها بعضها أغاني النعام آدم وبعضها تراثية وبعضها خاص به ........... الله الليل واللينا الله الليل ياناس الليل واللينا الأمان ياناس .......... بعد ما كت فقير بقرا القراية رجعتا أنا تاني صديت لى غنايا كسر لوحي وكسر حجر الدواية لى فقير الخلوة قوم يلاك معايا ......... شتيلة المشرق الفدع السبيطة بقيت مشغول بها الآيات نسيتها ودحين ياناسي تهتا وما لقيتا ............ وكان يردد يامحمد دا بلودو وين قول لى أمو مني أبوه مين ......... كين رقص وفدع الإيدين سووا عوم فرخ الوزازين ..........جسمو زي البانة في اللين وفي القرير أرضو أعز طين ........... قلبي في الدقات والأنين في الفرق تشهدلو( بق بين) ................. وكان يردد عليكم الله ياعشاق وليا من نار الغرام الديمة حية ......... سمحة الروقه فوقا حلات رقيصة حلات وجناتا دي الدر النفيسة ............ جملا خلقة ذو القدرة العظيمة مؤصلة من جدودا ملوك حزيمة .......... وكان يررد كيفن القليب بيطيب مادام إنت ياكا طبيبو .......... وكان يردد يارب ياكريم تلطف عليا..... إي إي إييي أغنية راقية ظهرت في أول السبعينات كدة ........ وكان يردد ياعذاب العاذب حياتو عذاب حقيقة بقولا ........... وكان يردد أنا ياناس الله لى والليلة عربية الزراعة شالت النعناعة يانبي الشفاعة يتكسر ضراعا وهذه كان يرقص على أنغامها غير بنات الشايقية في عطبرة وغيرها لأن إيقاعها غير إيقاع الدليب ........... وكات يردد مليح اللون شوفتك تفرح المحزون واناري من مليح اللون .... كل هذه المساحة من عمر الفنان الرائع وهو لم يظهر على التلفاز كلها مطوية في اشرطة حفلات ومناسبات وقعدات.. ولكن التاريخ لايضيعها وابناء المنطقة لاينسونها في حق هذا الفنان العظيم.. معذرة لبعض شعراء المنطقة الذين أوردت بعض مقاطع من كلماتهم وقتما تطرقت لبعض مسيرة محمد جبارة الفنية وان شاء الله فرصة قريبة اقدر اسجل النصوص كاملة وهي موجودة باسماء شعرائها معذرة في هذه العجالة
11-27-2006, 11:16 AM
أبو الحسين أبو الحسين
تاريخ التسجيل: 11-07-2006
مجموع المشاركات: 7948
مرات يقول لها يبقى راقد موجعو شِي كان وردي ولة وجع ضَهر...
مرات يقول لها يبقى راح باري الهواليق والسهر...
صح غايتو قلبي علي جناي وقلب جنايَ على حجر..
ومن ميسو لف علي كريمي وخش تووووش ركب القطر...
لابسلو مركوباً نصيح وحاقبلو شنطة اللِّت صفيح...
لملم هدومو من الحبل شكَّاها فيها كُسَر كُسَر...
وسداها بي فِقْشةْ جريدةً يابسي عارضها زي كُشَر...
وقاااااال لك كدي إتحكر قعد حكيرة جد...
وجر من حرفو المتمَّر زين كمان قلم فطر...
وقطرو تُوت تُوت كوْ نتر...
وُكَشَح ألمي تب ما خلَّ جر...
وانفك جاري جري الرماد في القضيب يشْكي العجل...
وعود السلك دا يسوي زنْ (الدغفلي) قلبي اتقطع..
(الدغفلي) قلبي اتقطع وكان للعجاج يعمي البصر...
يوميييييين مصنقر في الخشب لامن عِسِم ما نام شَخَر...
بي وين ينوم؟؟ دا قطر كريمي مي ملان لا عينو ديمي...
إن جاء التمر مكمود كمد.. والمنقة وكتين تستوي تلقاهو للوَكَّاي زَرِد...
كُلْ زول معاهو الفين طرد... كترة كُلف قايل شِنو؟؟
أبى ما يشيلْ لَنا ود منو؟؟ عفشاً جبال والدنيي حر جرى حُمد إحمد عرقو ترْ...
وكتين يجي الكمساري مار... تلقاهو بالنطيط فتر...
وتلقى الشَكَل... لكن قبُل يصل الكجم الناس تعود للقرقراب...
وتلقى الأكل سوى والشراب.. بس غايتو كدي كدي في القطر...
حاج حُمد إحمد قى يومييييين خير وشر...
ولمالُو في ولداً بيعرف ولدو في حقو انتستر...
وراهو درسو مع بعض والليلي جيري جُوَرْ بعض..
ويوم التلاتا مع الصباح إتفكُو من قطر المرض...
ووداهو لي بيت ولدو داك البي هناك بلا خبر...
تاريهو فات قُبال يجي بس ثانية مافي علي العمل...
وخلاهو روح دار ينوم فعلاً غمد...
وتلاتة دقت بي هنوك إن كان وقف طولو انسند...
وناس المكاتب لا ورا تبْ مافي واحداً إنكرم...
وكان ولدو عاد من جُمْلتُم للسوق غِشَى وشال الرِزَم...
ودافس ركب باصاً يَئِن لامِن نزل...
يقدل عليك يا الله طقْ للباب دفر...
شايلو أكياساً غلاااااد طوستة وعنب باسطة وعسل...
شيتاً كتير بالحيل يأكِّل كم نفر...
لقى ابوهو قدامُو اتهجم..
قُبال يسالمو وقف سأل!!!
إيهْ! أبوي يابا ما معقول الجابك شِنو؟؟؟
يا ولد تنقطع ريحتك!!!.. باقيلك بلاك إنت منو...
يعني مستغرب أكني بلا خبر جيت... وفَتْحِتَك للباب لقيتني انا جوة في البيت؟؟؟
إنت ما دام يا ابْ ضُراع كم إجازي غبيت...
شِنَّ أسوي تراني قمت معاك طبيت...
بس فشَان ما جيتنا ليك أربع سنين...
قمت جيت مركب (على الله) انا يا الخزين...
عندي قلباً لي عليك كيفن حنين...
وماااااااب تعرفوا بلا تسويلَك بطينين...
قمت ساكت لله سهل لي الطريق...
وجيت مخصوص غير اشوفك ماب افيق...
صح رفيق المولى ماب يعدم رفيق...
وفي القطر لماني ولداً ليك صديق...
جابني بي عربيِّي صاحبك كلو ذُوق...
وفات وقال بيجيك اقيف اسمعني روق...
قال لي قاري معاك كلية الحقوق...
وبيتو منك جبدة ساكن قبلي فوق...
هي جنا!!!... إتقونن شويِّي اوعك من الدين...
هسع الخميتو جبتو دا كلو من وين...
لا تَقَنِّب خدمتك تبقى الدلاقين...
المهم في البنك وفِّرلك ملالين...
تبكي أُمك ذاتها كانت جايي لكين...
بيتنا ماب يِتفات واخَيّانَك صغيرين...
ما سمعتا غناها ليك البي الجرانين...
الشئ نضْماً كلو يهرِد في المصارين...
مرة بيهو تنوني مرة تحصِّنك زين...
تقرأ آية الكُرسي ليكَ معاها يس...
جيت أسوقَك للعرس لاتْ قولِّي ملحوق...
ياخي أُمَّك ديك هناك مقليِّي بالشوق...
لامِتين تقْعُد كدي وراسَك دا مطلوق...
المحل بندَر وكمان عيشْتَك من السوق؟؟؟!!!
كميات مودتي... مع مراعاة الكلمات التي تحتها خط... للتدبر الشديد... فهذه الأبيات عجبتني شديد خلااااااااااس وبجيها بالتحليل في وقت لاحق لو ربنا مد في الأيام...
مرات يقول لها يبقى راقد موجعو شِي كان وردي ولة وجع ضَهر...
مرات يقول لها يبقى راح باري الهواليق والسهر...
صح غايتو قلبي علي جناي وقلب جنايَ على حجر..
ومن ميسو لف علي كريمي وخش تووووش ركب القطر...
لابسلو مركوباً نصيح وحاقبلو شنطة اللِّت صفيح...
لملم هدومو من الحبل شكَّاها فيها كُسَر كُسَر...
وسداها بي فِقْشةْ جريدةً يابسي عارضها زي كُشَر...
وقاااااال لك كدي إتحكر قعد حكيرة جد...
وجر من حرفو المتمَّر زين كمان قلم فطر...
وقطرو تُوت تُوت كوْ نتر...
وُكَشَح ألمي تب ما خلَّ جر...
وانفك جاري جري الرماد في القضيب يشْكي العجل...
وعود السلك دا يسوي زنْ (الدغفلي) قلبي اتقطع..
(الدغفلي) قلبي اتقطع وكان للعجاج يعمي البصر...
يوميييييين مصنقر في الخشب لامن عِسِم ما نام شَخَر...
بي وين ينوم؟؟ دا قطر كريمي مي ملان لا عينو ديمي...
إن جاء التمر مكمود كمد.. والمنقة وكتين تستوي تلقاهو للوَكَّاي زَرِد...
كُلْ زول معاهو الفين طرد... كترة كُلف قايل شِنو؟؟
أبى ما يشيلْ لَنا ود منو؟؟ عفشاً جبال والدنيي حر جرى حُمد إحمد عرقو ترْ...
وكتين يجي الكمساري مار... تلقاهو بالنطيط فتر...
وتلقى الشَكَل... لكن قبُل يصل الكجم الناس تعود للقرقراب...
وتلقى الأكل سوى والشراب.. بس غايتو كدي كدي في القطر...
حاج حُمد إحمد قى يومييييين خير وشر...
ولمالُو في ولداً بيعرف ولدو في حقو انتستر...
وراهو درسو مع بعض والليلي جيري جُوَرْ بعض..
ويوم التلاتا مع الصباح إتفكُو من قطر المرض...
ووداهو لي بيت ولدو داك البي هناك بلا خبر...
تاريهو فات قُبال يجي بس ثانية مافي علي العمل...
وخلاهو روح دار ينوم فعلاً غمد...
وتلاتة دقت بي هنوك إن كان وقف طولو انسند...
وناس المكاتب لا ورا تبْ مافي واحداً إنكرم...
وكان ولدو عاد من جُمْلتُم للسوق غِشَى وشال الرِزَم...
ودافس ركب باصاً يَئِن لامِن نزل...
يقدل عليك يا الله طقْ للباب دفر...
شايلو أكياساً غلاااااد طوستة وعنب باسطة وعسل...
شيتاً كتير بالحيل يأكِّل كم نفر...
لقى ابوهو قدامُو اتهجم..
قُبال يسالمو وقف سأل!!!
إيهْ! أبوي يابا ما معقول الجابك شِنو؟؟؟
يا ولد تنقطع ريحتك!!!.. باقيلك بلاك إنت منو...
يعني مستغرب أكني بلا خبر جيت... وفَتْحِتَك للباب لقيتني انا جوة في البيت؟؟؟
إنت ما دام يا ابْ ضُراع كم إجازي غبيت...
شِنَّ أسوي تراني قمت معاك طبيت...
بس فشَان ما جيتنا ليك أربع سنين...
قمت جيت مركب (على الله) انا يا الخزين...
عندي قلباً لي عليك كيفن حنين...
وماااااااب تعرفوا بلا تسويلَك بطينين...
قمت ساكت لله سهل لي الطريق...
وجيت مخصوص غير اشوفك ماب افيق...
صح رفيق المولى ماب يعدم رفيق...
وفي القطر لماني ولداً ليك صديق
ابو الحسين مساك زين يا الزين تكرات مثنى وثلاث ورباع ونزيد فوق الشرع في شكرك خماس وسداس للمليون تسلم يا أخوي حققت العشم وجزاك الله عنا كل خير وكمان جزاك خيل برجع ليك مشغول اليوم شديد لكن كلام الكدكي دا داير لو قعدة لك الود والاحترام والتقدير يا ملك خالد ود محجوب
الشالك حسن سافرتي خليتينا نحنا برانا فارقتي الجزيرة الخضراء ليه يا حلوة ما طارنا يوم اللوري قام من بوني في ساعاتو خشا البنا غنيت وما نفعني غناي يا رب هالزويل بطرانا يا صالح الجبل تلحقني ترجع لديارا فلانا ترجع والقا عاد الرايقة تتونس معا جيرانا تومتي حروفا زي طنبوري كل سلكاية عاملة الحانا من نارك لبس يا حلوة فصل لي قميص وغبانة يا صالح حليلو انا زولي فات بي فوقنا تب ما غشانا بنتلاقا يوم في حفلة لو كان الاله خلانا ما تحمل شمس دي السمحة ديما من القمر تعبانا وديما بهاتي ببكي عليك من اعماقي يا نديانا زي قصبة جرفنا اللينة تتمايل تحاكي البانا شوف يا خليفة كيفن خدرت وديانا يوم حنا الحنين بجلالو بفستانا يقدل جانا لابس توب وباريا فراشة يا وسط الخدار هيمانا الخدرة وجمال النضرة ذادا حبيبنا من احسانا خايض في مياه النيل تشرب والكفوف عطشانا طير يغني فوق اشجارو تتمايلبو كيف اغصانا عين المها جيداً غزالة من نضراتا سر عيانا جرجر توب بارت جمبي جرجر لي قلوبنا كينا من قالولي انت تجن صدق مافي جان غير جانا
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
أبو الحسين
القلب النابض
عبدالرحمن الحلاوي
yasiko
خالد علي محجوب المنسي
حاتم هاشم
mahmed alhassan
ابو عثمان
خالدة البدوي
منصوري
فيس بوك
تويتر
انستقرام
يوتيوب
بنتيريست