|
|
|
 Re: إلى حين هبوط الطائرة يرجى من جميع المسافرين ( البغاء) في أماكنهم .. حاجة عجيبة , ليه نحنا ك (Re: عواطف ادريس اسماعيل)
|
يا عطوووووووووووووووفة..
لغة الضاد تخص ناس الضاد هنااااااااك فى بلاد العرب. عربى شمال السودان + عربى جوبا + عربينا المكسر المخلوط مع الرطانة..ألخ دة عربى السودان ! الداير يفهمو يبذل مجهود يتعلمو كما نتجهجه نحن فى فهم كلام الخلايجة والمغاربة لأنو بلدنا" فغرانة" ونحن مضطرين وراكبين صعب العرب.
بالله عليك الله الصعب فرز فهم الكلمات التى كتبت قافها غينا أو العكس أم فهم مغربية تتحدث العربية يا ناس العرب النحن خايفين تفهمونا غلط ? أم يا ترى الحاجة أم الإجتهاد والفهم.
لمن نكبر شويةعلى حكاية العرب دى دايرين نكتب ونتكلم بى طريقتنا ذى الأمريكان و مثلهم نمنع أونتجاهل رأى الإنجليز/العرب فى كلامنا وطريقة كتابتنا , والثقة بالنفس فى شطب الحروف غير المهمة أو المكررة مثل ز/ذ. فى النهاية ممكن يكون عربى/ سودانى مثلما حصل إنجليزى/ أمريكى فى المعاجم العربية والإنجليزية على التوالي,
معليش لو كان شغلك الكتابة فاللغة لابد أن تستوفى الشروط وكلامى دة بيكون لك "هرطغة" ساكت  .
وسلام يا عطوووووووووفة وكل عام وإنتى تمام
| |
 
|
|
|
|
|
|
|
 Re: إلى حين هبوط الطائرة يرجى من جميع المسافرين ( البغاء) في أماكنهم .. حاجة عجيبة , ليه نحنا ك (Re: عواطف ادريس اسماعيل)
|
والله يا عواطق إحنا كده ليه؟ مش عارف !! لكن لو سألتنا عن بعض المواقف مع الغين والقاف (نطقا) وبين الذاي والزين (رسما) فهي كثيرة ومخجلة للغاية
لو المذيعين ومقدمي البرامج في الفضائيات السودانية .على كترتهم الايامات دي وكذلك ضيوفهم في كل قنواتنا وبدون فرز لا يتحرجون بل لا ينتبهون مطلقا.. بان هنالك اخطاء !!
. في الحقيقة انا اخجل اتفرج عليهم في حضرة ضيوف اجانب!!
تخريمة...
بصراحة انا ما قرأت كل المداخلات.
لكن عندي كلام في تعليق أخونا ديق وتأييد ود الباوقه
يعني لو فلنا ما عرب ... ماشي ..مقبوله
المصريين عندهم مشكلة في الجيم .. تمام .. وكمان في القاف !
بس المشكلة عندنا احنا السودانيين مختلفة تماما
ليست المشكلة في عدم المقدرة على النطق .
يعني بنعرف ننطق القاف والغين!! بس بنبدل . (القاف غين والغين قاف )!!. ليه مش عارف ..
| |
|
|
|
|
|
|
|
|
 Re: إلى حين هبوط الطائرة يرجى من جميع المسافرين ( البغاء) في أماكنهم .. حاجة عجيبة , ليه نحنا ك (Re: welyab)
|
ولياب !!!
ياه ... حمد لله على السلامة ,,, بركة الجيت !!!
لكن وا ويلياب ما بالغت عديل كدة قبلي ما نعرف سبب مشكلتنا مع الغين والقاف تقوم تقلب لينا الفاء
قاف وتقوللي عواطق !!! كويس إنك ما قلت عواتف زي الحناكيش ما بنادوني ( خالتو عواتف ) مثلا
تلاقيني واحدة تقوم تقول لي خالتو عواتف أنا زيزي بت تمادر !!! المصريين لما يتكلمو في التلفزيون
كمذيعين بتكلمو صاح عشان عارفين الجمهور حيشرشحهم ولكن مذيعينا الله يطراهم بالخير ضاربين
بالمستمعين عرض الحائط مع غلطهم الشنيع تلقى الواحد شايل معاه ورقة عشان يسأل الضيف ولو ضاع منه
حرف يضيع في شربة مية عالم عجيب وقريب !!! آل مذيع لامع آل !!!
| |
|
|
|
|
|
|
|
|
|
Re: إلى حين هبوط الطائرة يرجى من جميع المسافرين ( البغاء) في أماكنهم .. حاجة عجيبة , ليه نحنا ك (Re: عواطف ادريس اسماعيل)
|
الأستاذة عواطف لك التحية :
بالمناسبة هذا "بوست " مهم جدا ، ينبغى التعاطى معه بما يستحقه من جدية .ليست المسالة قاصرة على النطق الخطأ الموضوع اكبر من ذالك ماذا نقول عندما يحلف مثقفون كبار فى إجتماعات على مستوى بالطلاق ! أو يتحدث مثقفون آخرون فى التلفزيون بلغة الجسد مثلا يقول ( نقوم نقول ! )وماذا عن لبس مركوب النمر مع البدلة؟ بالمناسبة فى العالم الراقى لايسمح لك بدخول المطار وأنت مرتدي حذاء من جلد الأصلة أو النمر أو غيره ! لماذا فات عليك علاقتنا الرديئة بالوقت !الأسبوع قبل الفائت كنا نناقش قضية الوقت عند السودانيين فى منتدى السودان الفكرى فى النادى السودانى . الأسبوع التالى للمحاضرة جاء أغلب الحضور بعد موعد المحاضرة بنصف ساعة !ماذا تنتظرين من مجتمع يشكل البدو والزراع والرحل تاريخياً سواده الأعظم ؟ بالمناسبة فى إحدى السهرات التلفزيونية وحتى أكون دقيقا فى برنامج (مراسى الشوق ) معروض ضمن الديكور سبت من البلاستيك يستخم لأدوات المطبخ تصورى !
كل هذا يندرج تحت المسكوت عنه فى ثقافتنا السودانية وكل تلك السلوكيات والمظاهر لاتمت بصلة للتواضع ولا للبساطة بصلة ! إنها السبهللية وضرب من السذاجة ودرجة من درجات التخلف ! إذا تجرات بالنقد يقال "هذا مضيقة! " عنما أذهب لشراء الخبز من المخبز اللبنانى وانا عائد من المكتب تخاطبنى البائعة ( يا أستاذ) وعندما أجىء يوم الجمعة بالجلابية تخاطبنى ( يا حاج ) ! سأعود ثانية لأننى ممكون من هذه السلبيات الخطيرة .
| |
|
|
|
|
|
|
|
|
|
Re: إلى حين هبوط الطائرة يرجى من جميع المسافرين ( البغاء) في أماكنهم .. حاجة عجيبة , ليه نحنا ك (Re: عواطف ادريس اسماعيل)
|
سلامات يا عواطف...
قبل سنوات كنت في مسقط وسالتني عمانية وزوجها مازحين! ليه انتم السودانيون تقولون (تزعة ولا تعطون الحروف حقها وذكروا أمثله كثيرة كما أسلفت) ، رغم أن أفضل معلمي اللغة العربية عندنا هم السودانيين! عاد أقول شنو؟ صديقتي اسمها ثناء وعندما تعرف نفسها تقول سناء وذات يوم ارسلت لها رسالة كتبت عزيزتي سناء ردت لكن يا نون انا اسمي ثناء قلت ليها انتي بعد فصاحتك دي تنطقي اسمك خطأ قالت لي (بلا كده الناس شايفني متطنقعة كمان أردد الصباح الصباح واطلع لساني ثناء ثناء)!! وفعلاً لدي عم يحرص على (اعطاء الحروف حقها ومستحقها)! وفي الونسه عندما تأتي سيرة (السورة)! ينطقها (الثورة)ويكتم كثيرين ضحكتهم!! وبصراحةناوية اتحدث عن دعايات الراديو التلفزيون المحشوة بالاخطاء البايخة من شاكلة (من زاغ وتزوغ)!! مافي زول يصحح الاعلان ويطلب من اصحابه تصويبه ولا عشان بدفعوا قروش ممكن يقولوا أي حاجة... شكراًعلى الموضوع
| |
|
|
|
|
|
|
|
|
 Re: إلى حين هبوط الطائرة يرجى من جميع المسافرين ( البغاء) في أماكنهم .. حاجة عجيبة , ليه نحنا ك (Re: Noon3)
|
نون سري !!!
سلامات ,,,
قايتو صاحبتك سناء دي يكاد سناء ضؤها يختف الأبصار ,,,
أنا قايتو عندي صحبتي بتجيب لي الجلطة لمن أسأل من رغم تلفون وتقوم تقول لي سفر خمسة سفر, تلاتة
سفر تلاتة, تزعة خمسة تزعة ولا لمن تقول لي من سنة تزعة وتزعين ما قيرت الغيم والمسل بتاعتي ورقم
أنه كل صاحباتي أجانب لاكين مرات بشعر يغصور تجاه السودانيين لكن أعمل أيه دي ضريبة القربة !!!
يضربك الضريب إنشاء الله قولي آمين يا... ولا ما في داعي أعمل ليك فضيحة منبرية !!!
| |
|
|
|
|
|
|
|
|
 Re: إلى حين هبوط الطائرة يرجى من جميع المسافرين ( البغاء) في أماكنهم .. حاجة عجيبة , ليه نحنا ك (Re: عواطف ادريس اسماعيل)
|
الله يجازي محنكم يا ناس المنبر !!!
عندي تحقيق عن المرأة المثقفة هل هي مكروهة من بنات جنسها .. ومرهوبة من الرجال ؟
قمت كتبت المرأة المسغفة غطعا هي امرأة متميزة ما يجعلها تبرذ وتسطع وقالبا ما تكون المسغفة
مكروهة من بنات جنسها وعرضة لكل أشكال القيرة والحغد ومحاولات التحغير من شأنها وغد تكون منبوزة
لأنها اختارت أن تقرد خارج السرب !!!
آه منكم المدير أداني لفت نظر وقطع يومين من مرتبي أعمل فيكو أيه ؟؟ داهية تاخد البوست وسنينو
قايتو حأقعد أبكي من هسة لين المقرب وبعدين استقفر وأمشي بيتنا, والجاتك في مرتبك سامحتك ..
أقعد كلو مرة أباري فيكم وأقول كدة لامن ألقى روحي في مطار الخرتوم الدولي .. آل دولي آل !!
| |
|
|
|
|
|
|
|
|
|
Re: إلى حين هبوط الطائرة يرجى من جميع المسافرين ( البغاء) في أماكنهم .. حاجة عجيبة , ليه نحنا ك (Re: عواطف ادريس اسماعيل)
|
عزيزتنا : عطوفة
السلام كيمان : استوقفني الموضوع كثيرا وهاك دي :
بالمناسبة دي واحد مهووس بالعربية منذ صغره .. في أحد المساجد كان الامام سوادني .. فما أن بدأ هذا الامام في قراءة قائلا :
( ان انزلناه في ليلة الغدر.. وما أدراك ما ليلة الغدر ....الخ ) .. حتى خرج صاحبنا من بين المصلين
منزعجا وراح يصلي منفردا في أحد أركان المسجد.. تعجب بعض المصلين وسألوه عن تصرفه هذا فماكان من صاحبنا الا أن قال لهم كيف تصلون
خلف امام حول ( بفتح الحاء وتشديد الواو مع فتحها ) ليلة القدر الى ليلة الغدر ؟؟..
انها مأساة يا رفيقتي .. حتى القرآن الكريم لم يحل دون ارتكاب مثل هذا الخطأ الفادح الذي يؤدي الى تغيير المعنى تماما!!!..
ودمت يا سيدتي ..
خضرعطاالمنان
[email protected]
| |
|
|
|
|
|
|
|
|
 Re: إلى حين هبوط الطائرة يرجى من جميع المسافرين ( البغاء) في أماكنهم .. حاجة عجيبة , ليه نحنا ك (Re: maia)
|
الأزتازة ماية !!!
أوغات سعيدة ,,,
صاحباتك ديل لمن الحكنشة على الفنكشة فجاءت النتيجة حنفشة ,,,
مداخلتك تشرح الغلب !!!
نسلمي ,, يا ست البنات ,,,
(عدل بواسطة عواطف ادريس اسماعيل on 01-27-2008, 02:22 PM)
| |
|
|
|
|
|
|
|
|
|
Re: إلى حين هبوط الطائرة يرجى من جميع المسافرين ( البغاء) في أماكنهم .. حاجة عجيبة , ليه نحنا ك (Re: ismeil abbas)
|
ثمعة !!!
ثلامات ,,,
الشوغ متر !!!
ما غادرة أغفله معليش ثامحوني !!!
بلق تحياتي إلى كل من يسعل عني ,,,
تثلم ,,,
| |
|
|
|
|
|
|
|
|
|
Re: إلى حين هبوط الطائرة يرجى من جميع المسافرين ( البغاء) في أماكنهم .. حاجة عجيبة , ليه نحنا ك (Re: عواطف ادريس اسماعيل)
|
استاذة عواطف
ازيك
معليش جيت متاخرة
ما قدرت اقرا كل المداخلات امكن يكون راي دة اتقال كتيير بس قلنا نقولو برضو ما يضير شيء
اصلا هو الموضوع ليه علاقة بهويتنا اللي لحسع ما اتحسمت شوية عربي على شوية افريقي زيدي عليها استمعار انجليزي وقراية في مصر وهجيج لكل بلدان العالم بعد ان ضاق زرعا بنا سوداننا
اها قلتي لي شننو يبقى عدم تحريناللدقة في النطق الصحيح لبعض الحروف العربية معناه نحن ماشين مع المثل السوداني اللي بيقول جلدا ما جلدك جر فيه الشوك اها لغة ما" لغتك" (مع التحفظ احتراما لآراء أخرون) قولها زي ما داير.
نقطة تانية تعرفي نحن بنطقنا دة اخير من ناس تانيي حالتم قال عرب مية في المية
انتي ما شفتي ناس دول المغرب العربي بعملوا في اللغة دي شنو غايتو نحن بعذرنا هم مالهم ولا يجوا يقولو برابرة.
فتك بعافية
صفية
| |
|
|
|
|
|
|
|
|
|
Re: إلى حين هبوط الطائرة يرجى من جميع المسافرين ( البغاء) في أماكنهم .. حاجة عجيبة , ليه نحنا ك (Re: Safia Mohamed)
|
الاخت عواطف
ايامك سعيده
رغم اعجابى بكل اطروحاتك فقد وجهتى لى سؤال فى الصفحه الاولى
فى هذا البوست ( وين الحسانيه) رغم اننى ادافع عن لغة اهلنا
الرصينه ولم ادافع عن اللهجة العاميه وهذا بمعنى اننى خارج
اطار الموضوع الان اقتبس لك من كتاباتك التى كنت اقصد بها بنات
قومى وليس انتى بالخصوص فى تناولهم للهجات مختلفه يأخذونها من
الغناء واصل مكان الاقامه ويفاخرن بها وهى قصدى فى لا ( تغرنكن الدنيا)
وانا اتناول لك اقتباس من لهجه ليس سودانيه بخط يدك ودون زعل لتتأكدى
ان الحسانية غرب النيل الابيض .
يا لهوي !! يا لهوي !! يا لهوي !!!
الشر مننا وبعيد ,,,
تلفزون ولا إذاعة ؟
خبر أيه الأسود ومنيل دة ؟؟
شكرا لاستقبالك لى فى هذا البوست والوعد بوست اجمل من
حروفك عشان ما تسألى الدناقلة وين .
تحياتــــــــى
ســــــــــيد
|
| |
|
|
|
|
|
|
|
|
|
Re: إلى حين هبوط الطائرة يرجى من جميع المسافرين ( البغاء) في أماكنهم .. حاجة عجيبة , ليه نحنا ك (Re: سيد محمد احمد سيدنا)
|
سيد !!!
هو أنت زعلت يا سيد الرجالة ؟؟
والله أنا بمزح معاك زي ما كنت بمزح في البوست بتاع يالهوي يالهوي ,, عارف يا أبو السيد لمن قلت
يا لهوي يا لهوي عايزة البوست ياخد طابع هزلي وليس جادا عشان نحنا ما قضاة ولا جلادين ولا شهود عشان
نحكم على إنسانة قد تكون بريئة ولمن قلت الشر مننا وبعيد أقصد ربنا ما يرمينا في مشكلة يتم
تناولها في المنبر ومع ( زلك ) لك العتبى حتى ترضى وأهديك أغنية عندي كم في الدنيا زيك لماتزعل
مني إنت بس خايفة بكرة يعملو منها بوست ويقولو( الأستازة ) عواطف اتجننت ولا أيه !!! خلاص يا أبو
السيد صافية لبن ؟ أمسح السؤال الموجه خليك مع الإجابة فقط ؟
| |
|
|
|
|
|
|
|
|
|
Re: إلى حين هبوط الطائرة يرجى من جميع المسافرين ( البغاء) في أماكنهم .. حاجة عجيبة , ليه نحنا ك (Re: عواطف ادريس اسماعيل)
|
للأسف نحن الشعب الوحيد اللي بيشوف عوجة رقتو ...
كل دول العالم العربي تقلبن الحروف وتشقلبها كما يحلو ليها ونحن أشد الإعجاب بي شقلبتهم دي لكن لمن تبقا علينا نحن تدخل في باب العجيب والغريب والبشتنة ورقاد الواطــــة ..
للأسف معظم مغتربين الخليج ومغترباته عندهم عقدة من اللون الأبيض وخصوصاً اللبنانين والخليجيين ..
بنشوف ليك اللبناني ده أفهم زول واللبنانية دي كلامها زي العسل وهم ملوك تبديل وتحوير الحروف والكلمات ..مو هيك ؟؟
ليه ما بيتكتب الكلام ده ونانسي عجرم بتقول " تؤبرني حبيبي" ؟؟
ليه ماف زول بيتكلم ونجوى كرم تقول ليك ناولني هي الشنتايي " الشنطة" ..
أما عن الخليجيين فحدث ولا حرج ومعظمهم بل كلهم يحوّل الضاد ظاء ..
طيب ليه ما كتبتي عن نفس المضيف ده لو أماراتي ومسك المايك وقال :
على جميع المسافرين (الحظور) لصالة المسافرين وأن (يحظر) معه شنطة واحدة ..
وفي الزمن ده ومع الإرهاب باقي لي (البغاء) أحسن من (الحظر) ولا شنو؟
ليه ما كتبتي عن الخليجيين و الشوام وهم يقولون (تنتين) بدلاً عن (إثنين) في حين تعج الذاكرة بي (التزعة) بدلاً من التسعة ؟
يكفينا فخراً كسودانيين إنو البنقولوا ده عبارة عن لهجة كلامية وأتحداك لو تلقي سوداني ولو جاهل لمن يحي يكتب 9 يقوم يكتبها (تزعة) !!! لكن تعالي شوفي الخليجيين والشوام بيكتبوا ما ينطقون ..
مديري الخليجي كان بيملّيني في كلام ومن ضمنه جاءت كلمة (حضور) ولمن أديتو النسخة المطبوعة لتنقيحها لقيتو شاطب لي (حضور) وكاتبها لي (حظور) ومعاها تريقة :والله إنتو يا السودانيين لغتكم كعبة خلاص !!!!
يا ريييييييس حظور بالظاء؟؟؟؟
ايييوة يا عمر والله عيب عليك تكتبها بالضاد !!!!!
يا ريييييييييييس؟؟؟
يا زول أكتبها حظور وما عليك !!!!
لكن في سوداني لقيتيهو بأستثناء إبراهيم بقال بيكتب (غصيدة) بدل (قصيدة)؟
زمان يا عواطف الخليجيين كانوا بيتّريقوا على كلام اللبنانيين ده وبيضحكوا فيهو زي ما بيضحكوا أسة في كلمة (ااااااااااااااااااي )..
أسة تعالي شوفي أي خليجي عايز يتكلم لبناني والسبب بي كل بساطة الإعلام والقنوات ...
خلّي بناتنا يتعرّن و يتراقصن ويتسحسحن في القنوات وخلّينا نجيب رقيص العروس لايف وخلّينا نجيب ليهم حفلات الرياض والمنشية والأوفر نايت على الهواء وتعالي بكرة شوفي كان ما لقيتي ليك اماراتية بتقول ليك :
النبي فوقك يا عواطف جيبي لي دلكة وشاف و(تزعة) طلحات ..
بالنسبة لي اللبس فبالله عليك أعملي مسحة صغيرووووووونة كده في بروفايلات الأعضاء والصور اللي إتصورت في حفلات في الخليج أو اوروبا أو اي مكان وشوفي لبس الناس عامل كيف ؟
بإستثناء صورتي في البورفايل حا تلقي كل الناس نضيفة وقاشرة ووجيهة ..
ديل هم المغتربين الحاليين ..انا شخصياً بعرف لي أكتر من 400 سوداني مقيمين هنا وهم أصحابي منهم 200 عضو في سودانيز اون لاين ما حصل لقيت لي واحد مبشتن وما بيعرف يلبس !!!!
دي ثقافة قديمة أطلقها الخليجييون أصحاب الإشاعات لتبرئة أنفسهم وإلصاق التهمة بالوافدين ..
إنتي مش سودانية يا عواطف؟
حصل إتبشتنتي في بلاد الغربة دي؟
حصل ناس الشغل قالوا ليك مالك لابسة كعب كده ؟
أتحداك يا عواطف تلقيك أحسن زول بيقشر في مكتبك وكل يوم الناس بتعلّق على لبسك سواء كان خليجيين أو لبنانيين حتى ..
دي كانت حقبة قديمة أيام كان السوداني جاي راعي ولابس جلابية وسخانة من المرعى للمطار ..
الجيل الحالي جيل واعي وحتى الجيل القديم من المتعلمين كانوا خير سفير واحسن ناس بتلبس ؟؟؟
عليك الله في احسن من الزي القومي السوداني ده ؟
بعدين يعني اسة معقولة يكون في لبناني جاهل وما متعلم وجاي من بيئة قروية وبيكون لبيس؟؟ ما ياهو السروال والعقال الوسخان ومعاهو فنيلة صوف بتاعت البرد ديك لونها أبيض..
والخليجيين البدو ديل في زول بيلبس أكعب منهم ؟؟؟
طيب ياخ في زول بيتسوّك في الناس دي كلها كان لبناني كان مصري كان الجن الأحمر زاتو ؟
الواحد تلقاهو لابس وقاشر ولمن يتكلم معاك تبقا في الطريقة اللي تخارجك ..
الواحد يجلّط شعرو بي مليون كريم ويتمسح بي سبعة وهو ليهو شهرين ما إستحم ..
السوداني المبشتن ده تلقيهو مستحمي مرتين في اليوم ..
مصري بتاع بقالة سألني بي براءة :
إنتو المعجون ده بتاكلوه ولّا إيه يا باشا ؟؟
| |
|
|
|
|
|
|
|
|
 Re: إلى حين هبوط الطائرة يرجى من جميع المسافرين ( البغاء) في أماكنهم .. حاجة عجيبة , ليه نحنا ك (Re: عمر الفاروق)
|
الأخ عمر !!!
مودتي ,,,
مع احترامي لكل ما ذكرته في مداخلتك أود أن أقول لك أن كل الجنسيات التي ذكرتها لا تعنيني في شيء
أكثر من بني جنسي الذين أتمنى لهم الكمال والكمال لله ,, ثانيا أن ننتقد ذاتنا أفضل من أن ينتقدنا
الآخرون وبالنسبة لك قد تكون عايش في مدينة فاضلة يسكنها أناس مظهرهم قمة في الأناقة حتى كلامهم
وجوهرهم عال العال , أما بالنسبة لي فأنا أتحدث عن واقع أشاهده بنفسي ويشاهده المئات مثلي
وبالفعل قد يكون الناس الفي سودانيز أون لاين كلهم آخر أناقة ووجاهة وأنت على رأس القائمة بسم الله
ماشاء الله !!!ولكن تعال يا عمر شوف بعض الناس في الشارع أو في معاينة والله تجري جري وتسيب ليهم
الشارع ونحنا هناما بنقلل من مكانتهم ولكن تنمنى لهم الأفضل وبعدين في ذمتك أحسن كلمة حظور ولا
بغاء ؟؟ أنتظر الإجابة بفارغ الصبر !!!
| |
|
|
|
|
|
|
|
|
|
Re: إلى حين هبوط الطائرة يرجى من جميع المسافرين ( البغاء) في أماكنهم .. حاجة عجيبة , ليه نحنا ك (Re: عواطف ادريس اسماعيل)
|
الأخت عواطف:
تحياتي..
النقد الذاتي شئ مطلوب وجميل ويرتقي بينافي مصاف الجنسيات التانية لكن من شبّ على شئ شاب عليه ودي تعويدة أكتر من إنها فهم لي اللغة ..
دي لغة دارجة ولا تقتصر فقط على القاف والغين والثاء والسين فلا ثا ثور ولا ذ ذنب ولا ز زرافة قد تخرجنا من مشكلة زي دي..
لمن ذكرت باقي الجنسيات مش عشان أقول عواطف تحديداً ربما تتمجد لهذكا جنسيات ولكن دي ثقافة سائدة في كل بلد في العالم إنجليزي عربي إسباني فرنسي أتوقع كلللهم في لغة العامة والشارع شغالين تباديل وتوافيق في الحروف تختلف بإختلاف ألسنتهم المحلية ومن مدينة لي مدينة وقرية لي قرية ..
حرف القاف ده مثلاً انا غير ناس شمال افريقيا واليمنيين ما لقيت لي زول بيقولوا صاح والله لمن يزهجوك زاتو خصوصا ناس شمال إفريقيا الواحد منهم يقول ليك القاف دي لمن يجيك وجع حلق وتحس إنو حا يطلّع ليك بلقم عديييييل كده ..
ما عايز أظلمك معانا لكن اكاد أجزم إنك برضو بتقعي في الإشكالية نفسها ولو حاولتي جاهدة تلافيها مش لأنك ما بتعرفيها لكن بس عشان الطبع غلّاب وكل المجتمع الحولك من السودانيين ..
Quote: وبعدين في ذمتك أحسن كلمة حظور ولا
بغاء ؟؟ أنتظر الإجابة بفارغ الصبر !!! |
النصيييييييحة كده في المطار أحسن البغاء من الحظر في المطار 
يعني أسة الروسيات الجايات الأمارات ديل أحسن ليهن المضيف يقول ليهن إنتو تبع (الحظور) ولّا عليكن (البغاء) ؟
تحياتي..
تخريمة :
للحديث (بغيّة)..
| |
|
|
|
|
|
|
|
|
|
Re: إلى حين هبوط الطائرة يرجى من جميع المسافرين ( البغاء) في أماكنهم .. حاجة عجيبة , ليه نحنا ك (Re: عمر الفاروق)
|
عمر الفاروغ !!!
سلام !!!
كل ما زكرته صحيح ولكن بنجتهد يا ود أمي عشان ننطغ الحروف بطريغة صحيحة وفعلا أنا زاتي بقول الغدر
يعمي البصر وهلم جرا وزي ما قلت الطبع قلاب ولمن درسونا أ.. أسد و نا نمر .. وبا .. بصل وضا..ضب
وحسن البطل ولد العرب ما قالوا لينا طلعوا لسانكم في الثاء ولا قلقلو القاف عشان جدي الجيم معطشة
زي ما بقولو نا س الخليج ظلمونا المدرسين ظلم الحسن والحسين !!!
لكن يا عموري ما ضحكت على حكاية البغاء أفضل من الحظر لحدي ما جارتي في المكتب قالت لي قري أيه
يا ولية ؟؟ طبعا رعرفت الجنسية .. قايتو الروسيات الله يديهن العافية وانتظر بغية الحديث الشيغ جدا.
| |
|
|
|
|
|
|
|
|
|
Re: إلى حين هبوط الطائرة يرجى من جميع المسافرين ( البغاء) في أماكنهم .. حاجة عجيبة , ليه نحنا ك (Re: عواطف ادريس اسماعيل)
|
الفضلى / عواطف وزوارها الكرام
**كان مؤذن الرسول صلى الله عليه وسلم بلال بن رباح ينطق الشين في اشهد سين
وعندما تندر الاعراب قال لهم المصطفى ان سين بلال عند الله شينا
كما ذكر الفاضل عمر الفاروق ان مسالة التبديل دي عالمية
وفي كل اللغات ومن ضمنها العربية
كما تعلمين ان هناك اساتذة اجلاء في الجامعات والمدارس
في كل بلدان الخليج درسوا العربية
ولم نسمع نقد من تلاميذهم وطلابهم يبقى المسالة عادة لغوية
يبقى القول ان المشكلة هذه اكثر من النطق
حيث اصبحت نفسية بمعنى ان المصري يتحدث بتبديلاته عادي جدا وكذلك
الخليجي ووارد شمال افريقيا لكن ما ان ينطق السوداني مبدلا حتى تثار
علامات التعجب والاستفهام
بالنسبة للمذبعين التدريب هو الحل
هناك مسائل يجب ان نضعها على راس همومنا وهي اتي ذكرها الفاضل عبد المطلب الفحل
السبهللية وعدم الاهتمام بالمظهر عدم احترام الوقت الليقة والكياسة في الحديث
مع الاخرين
اما الاكبر والاهم من ذلك هل في شخصيتنا خلل تستلزم اعادة صياغتها
كدي كل واحد وبتحديدا المتوجدين خارج الوطن خالطوا وتعاملوا مع الشعوب
حيث وجدوا كيف تعاملنا معهم وسلوكنا تجاههم هل نحن نبرز قدراتنا وامكاناتنا
هل لدينا خجل عام ام عدم ثقة بالنفس[/B]
| |
|
|
|
|
|
|
|
|
|
Re: إلى حين هبوط الطائرة يرجى من جميع المسافرين ( البغاء) في أماكنهم .. حاجة عجيبة , ليه نحنا ك (Re: محمود بكر)
|
الاستاذة الفاضلة عواطف
شكرا للطرح لمحوى جوهر الموضوع على العموم وهو مهم جدا وانا كنت اتمنى ان يدار بشكل افضل مما كان
بايجاد الحلول المنوط بيها امثالك من قبيلة الصحافيين كل المتداخلين اظهروا السلبيات والتى هى كثر
ولكن هذة ليس نحن المتفردين بها وبالذات فى ناحية اللغة والتى نكتوى منها نحن بالخليج واصبحت سمة
ملازمة لنا للاسف ولكن عزائنا بانها فى احايين كثيرة لاتخرج من كونها دعابات . اتفق معك فى حسن النوايا
فى طرق الموضوع والاخ عمر الفاروق جانبةبعض الصواب فى معالجتة . يجب التطرق للب الموضوع والمعالجات
Quote: أكثر من بني جنسي الذين أتمنى لهم الكمال والكمال لله ,, ثانيا أن ننتقد ذاتنا أفضل من أن ينتقدنا
الآخرون وبالنسبة لك قد تكون عايش في مدينة فاضلة |
وليس كل من لم يذهب باتجاهك هو على النقيض منك . ولكن تعدد الاراء فى التناول هو ظاهرة صحية توصل للهدف
تفنن الاخوة فى اظهار ظواهر سالبة واغلبها تاصلت فينا بشكل عفوى . اعتدنا عليها يعنى حتى تناولنا لاشياء
ممكن تكون غريب بالنسبة بحكم خروجنا وتعايشنا فى مجتمعات خارجية مثلا واحد يتصل على هاتفك الخاص ويكون
مخزن باسم وهو متصل ويقول ليك منو معاى . يعنى هى ليس بغباء ولكن تعود
| |
|
|
|
|
|
|
|
|
 Re: إلى حين هبوط الطائرة يرجى من جميع المسافرين ( البغاء) في أماكنهم .. حاجة عجيبة , ليه نحنا ك (Re: بابكر التوم)
|
الأخ العزيز بابكر التوم !!!
مودتي ,,,
شكرا على مداخلتك القيمة مع تأكيدي على أن كل من يخافني الرأي ليس بالضرورة أن يكون ضدي إذا كان
الخلاف يصب في مصلحة الموضوع أما طريقة إدارة الموضوع كما ذكرت أنا برأي حينما تطرح موضوع للنقاش
وتبين سلبيات الآخرين هو نوع من العلاج إضافة إلى ذلك فمداخلات الإخوة والأخوات مهما كانت غير جادة
فهي أيضا تلقي الضوء على المشكلة بطريقة هزلية لأننا لسنا في مدرسة لكي نوجه الناس بطريقة صارمة
ولكن حينما نقول البشتنة والملابس غير المنسقة وعدم مقدرتنا على الترويج لأنفسنا وقضاينا أفتكر
دة طرح للمشكلة وبعد كدة كل واحد بيعاني من أي ظاهرة حيبتدي يفكر في نفسه بصورة أخري ولا أيه
رأيك ؟ فعلا كل المسائل هي عبارة عن تعود وليس غباء ولكن عندما تكون العادة مؤذية أو غير مواكبة
لابد من تغييرها ,,,
تخريمة : تأكد أنني أحترم وجهة نظرك مهما كان شكلها وليس بالضرورة أن تذهب باتجاهي يعني حتى
ولو كانت في الاتجاه المعاكس تماما ,,, شكرا مرة أخرى ..
| |
|
|
|
|
|
|
|
|
|
Re: إلى حين هبوط الطائرة يرجى من جميع المسافرين ( البغاء) في أماكنهم .. حاجة عجيبة , ليه نحنا ك (Re: محمود بكر)
|
الأخ الحبيب أبوبكر !!!
يسعد صباحك ,,,
شكرا لمداخلتك الهادئة والرصينة ,, عموما مثلما ذكرت أن هناك شعوبا وقبائلا تغير وتبدل وتقلب الكاف
مثلا جيما والجيم ياء وقد يتغير المعنى ولكن لا يكون المعنى الجديد بشعا مثل كلمة استغلال وبغاء مثلا
إضافة إلى ذلك فنحن نسعى للأفضل ولا نقول أن هناك أناس أسوأ مننا هذا ما أرمي إليه أما حكاية
البشتنة والصوت العالي في الهواتف العمومية لامن الشارع كله يتلفت ويكون عرف إنه عصمان مثلا رسل
500 ألف جنيه للأولاد والحاجة وخالتو الشفة وعمتو خدرة دي حكاية صعبة خلاس كمان عدم مقدرتنا على
الترويج لأنفسنا فيها نوع من الخجل وعدم الثقة بالنفس أو نوع من الإحباط الذي يغلف كل مناحي حيانتا
لذلك نتوقع النتيجة سلفا فتهتز صورتنا أمام الشخص الذي يجري المعاينة وبرضو نجي نقول نحنا السي
ونحنا الكي !!! تسلم يا محمود من كل شر إنشاء الله ..
| |
|
|
|
|
|
|
|
|
|
Re: إلى حين هبوط الطائرة يرجى من جميع المسافرين ( البغاء) في أماكنهم .. حاجة عجيبة , ليه نحنا ك (Re: عواطف ادريس اسماعيل)
|
عواطف :
وفي رواية أواتف ..وبي مناسبة اللهجات وقبلنة الحروف قالوا الأستاذة قالت للبنات أي واحدة إسمها بي حرف الألف تقيف على حيلا ..وقفوا زي 10 بنات كده ..الأستاذة سألت الأولى منهم إسمك منو ؟
قالت ليها : أواتف ..
| Quote: وانتظر بغية الحديث الشيغ جدا. |
أغرب واعجب جملة يختلف فيها المعنى وتجمع بين الضدين لمن واحت يقول ليك :
الباغيات الصالحات !!!!!!!
اها دي تجي كيف دي عاد
وفعلاً كده إختلف المعنى وبدل ما يكون المقصود الباقيات الصالحات يكون زولنا ده عاس الأبري مع الحلو مر ..
تخريمة :
طالب من ناس جامعة أفريقيا البيتكلموا لغة عربية ديلك ..في المحاضرة قال للأستاذ بي لغة عربية فصحى :
يا أستاذ سقط قلمي على الأرض ..
الأستاذ قال ليهو ومجارياً للفصحى :
ضنقر شيلو ..
| |
|
|
|
|
|
|
|
|
|
Re: إلى حين هبوط الطائرة يرجى من جميع المسافرين ( البغاء) في أماكنهم .. حاجة عجيبة , ليه نحنا ك (Re: عواطف ادريس اسماعيل)
|
عطوفي
طولت من البوست اللذيذ ده لاسباب تقنية وفنية وجغرافية وعاطفية ذاتو
عشان ترضي عني خودك الماكنتوشات ديل :
مسطول خطيبتو قالت ليهو انا اهم حاجة عندي الاخلاص ……قاليها وانا الفلق
شايقي بقرا قرآن بالانجليزي سالوه ليه؟؟ قال عشان الاجر يكون بالدولار
مسطول مشوكش ….سالوه اجمل بيت شعر؟ ….قاليهم : كل ما نربي كتكوت يكبر ويفوت
شافعة مسطولة ..شايلة بلية في يدها قالت لي ابوها :ابوي دي شنو ؟؟؟ قاليها: بلية ……الشافعة مشت بلتها وجات قالت ليهو اه بليتها ابوي دي شنو ؟؟؟؟؟؟؟؟؟؟؟؟
واحد سأل مسطول شنو عكس تلميذات ؟؟؟ …..قال المسطول …. don’t tell me that
واحد مسطول قالو ليهو مراسل الجزيرة مات فى العراق قال ليهم: هو المرقو من مدني شنو.
واحد مسطول سال ناس بيتهم جيرانا ديل ضابحين ولا شنو قالو ليهو ليه قال ليهم ريحة الابرى ده شنو .
مغترب سال اختو : عايزة عريس ولا موبايل : قالت ليه :والله الشبكه الايام دي كعبه شديد
مسطوله فتحت الجواز بتاع زوجها قرت المهنه : :رجل اعمال - شطبتها وكتبت راجل منيره
واحد تاجر بنقو مشى يخطب أبو البت قالليهو بتشتغل شنو? قالليهو فني تكييف
أدروب مشى يخطب ، قال ليهو البنت بتقرأ قال ليهم خلاص وقت الفسحة نجي
تكاسي رباطابي سأل الراكب ماشي وين؟ قال ليهو : السما قال لي : مربع كم؟
مسطول سألوهو في استطلاع رأيك شنو في الزواج المبكر ….قال ليهم يعني زي حوالي الساعه كم كدا
مسطول اتشاكل مع أمو وزعل منها …….قام مشي السوق اشتري ليهو كرتونة لبن وجابها ليها …..وقال ليها دا كل البيني وبينك
سطووول قالوا ليهو رأيك شنو فى المرأه (العصريه)؟؟ قال ليهم : يا اخوانا ما تخلوها (تمغرب) شويه!!!
مسطول صدم ليهو بوليس حركة …..إتصل على الرقم 911 وقال ليهم بقيتو 910
شايقي اشترى ليهو ساعة جديدة واحد سآلو قال ليهو الساعة كم : ?قال ليهو خلاص دار تكملوا الحجر
رباطابي البوليس سألواانت سوداني ؟قالو لا كنار :?
شايقية في القطر سالت شافع رباطاب دي ابو حمد ؟قالها لا دي ابو ظبي
مسطول شايقي في الطيارة المضيفة سألتو : داير عشاء كامل ؟؟ …المسطول قال ليها : ليه ؟ هو كامل ما داير عشاء !!!ا
مسطول رابط ليهو مسطول من كراعو في طيارة هيليكوبتر >>>وكل مرة يطير بيهو فوق وينزَل الزول جوه البحر ويطلعو تاني …..سألوه .. ده شنو؟ ..قال بعمل في دعاية ليبتون
امام يصلي بمحششين قالهم :صلوا على الخط!! ..قالوا:عليه الصلاة والسلام .
واحد شايقي محشش مسكته دورية شرطة فقالوا له أركب ، فقال لا والله بيتنا قريب
واحد فاتتو صلاة الجماعة .. لقى ليه اتنين بيصلو حاول يصلي معاهم وبدل يقدم العلى الشمال بقى يلذ في اليمين .. صاحبنا يلذ وداك مسردب .. في رباطابي قاعد يراقب الموقف من على البعد قال ليه ازول ها دي الضلفة الفيها الترباس لذ التانية
مسطول عاملين معاهو لقاء تلفزيوني سألوهو : اسباب السخانة الفي البلد دي شنو قال ليهم دا كلو من مشجعين الكورة شابكننا فوق ، فوق لمن تكلونا مع الشمس.
لقيتيني كيف ؟ سرييييييييييع لكن مشتهي الغالي تمر السوق وكان قسموهو ما بحوق
| |
|
|
|
|
|
|
|
|
|
Re: إلى حين هبوط الطائرة يرجى من جميع المسافرين ( البغاء) في أماكنهم .. حاجة عجيبة , ليه نحنا ك (Re: الطيب شيقوق)
|
ود شيغوغ !!!
ثلامات ,,,
ومشتاغين ...
إنت تبغي فنانين نصف النهار وأنا أبغي حفلة رابة يكون فيها الحت شديد والفنانة تغول يا قربتي
( غربتي )
تحياتي للولد الجميل الملك أينما كان ,, إن كان في كريمي ولا نوري ولا جلاس ,,,,
حتى نلتغي في موعد آخر لك مني خالص التحايا و الأشواغ ..
| |
|
|
|
|
|
|
|
|
|
Re: إلى حين هبوط الطائرة يرجى من جميع المسافرين ( البغاء) في أماكنهم .. حاجة عجيبة , ليه نحنا ك (Re: عواطف ادريس اسماعيل)
|
تعرفي يا عطوفة
الحاصـل إنه في زي غفلة كدا , حتى من المتعلمين انفسهـم, بينسـوا القواعد اللي درسوها وعلى طول يروحوا يقلدوا الناس العوام
يعني زينا زمان لما نمشي البلد ونجي راجعين بعد شهرين تلقى اللسان بقى يجرجر الكليمات ( لا ورا) والشباب في الحلة يعلقوا علينا شوية شوية نرجع تاني للكلام العادي حق اواسط السودان
المهــم
المايكروفات دي كلها , ابتداء من المسجد للتلفزيون القومي لاشعارات المطارات وحتى الاذاعة والأغاني المبثوثة أشواق وحنين وأي حاجة بسمعوها الجماهير مفروض تكون مجودة, وطبعا اسهل شئ إنه الاعلانات في الطائرات والسنترالات وغيره تكون مجودة لأنها نموذج (ديــزا) ممكن حتى تشتريهو وتنزلوا من الانترنت ويكون بأحسن ما يكون أو حتى ياخي تسجلوا من عمر الجزلي ذات نفسـه
بالعدم اكتبوا ليهم الاعلانات دي وشكلوها ليهم يا أخوان ما دام انتم مصرين على توظيف الجماعة ال بكسروا القرآن ديل
مع التحية وافرة
أحمـد الشايقي
| |
|
|
|
|
|
|
|
جعفر عبد المطلب
Adil Isaac
عواطف ادريس اسماعيل
welyab
Saifeldin Gibreel
الطيب شيقوق
sama7
خضر عطا المنان
ismeil abbas
Safia Mohamed
سيد محمد احمد سيدنا
بدرالدين يعقوب
العوض المسلمي
عمر الفاروق
سامي عبد الوهاب إدريس
أبوبكر طه
بابكر التوم
إسماعيل حميم
فيس بوك
تويتر
انستقرام
يوتيوب
بنتيريست