|
Re: ود الشلهمة (Re: سمية الحسن طلحة)
|
وإلى الفنجرى الذى أراه من منظورى الخاص أقوى فى هذا الجانب :ـ
نحنا جدودنا فُرساناً بصادمو الخيـل ونحنا دروبنا للكايسين مشيها تقيـل ممنوعين فوق شـوارع الحِطّة مابنْمِيل ومجبورين علىالدَبَرة أم وعايـة نشيـل
نحنا جدودنا فرسـان اللِقاهِـن يـُـوت وشِيتاً هِيلنـَا مُو مَنكُور بدُورلو ثبُـوت نحنا المِنْ خـبـرنـا بتســـأل البَنـّوت ونحنا بنَفـدِي سُـتـّيرالعُروض بالموت
ونواصل إن كان فى العمر بقية ... لكم مودتى .
| |
|
|
|
|
|
|
Re: ود الشلهمة (Re: سمية الحسن طلحة)
|
نحنا قلوبنا ثابتـات من خَـلل يُـبـّاس ويـــاأم خَدّاد نـَقـَايـبْـنـَا بتـلِـفْ الراس نحنا جدودنا فرّاســاً نَشَـــتْ فـُرّاس وديـدَان لِجـّة المـوج البيـاكلـو النـاس
نحنا قـلوبنا مابنزل خفيـف في دِيَارن وبمشَن دُغري بالدرب المَشُوبـو كبَارن راسيات الجبال كِيفِـن رحِيـل حَجّـارن البـِلد المِحَن مجبــور بلُوِلي صغــارن
كتير من الناس نسب المربوع الأخير لغير أصله أتمنى أن يعلم الكل أن القائل هو الفنجرى .
| |
|
|
|
|
|
|
Re: ود الشلهمة (Re: سمية الحسن طلحة)
|
نحنا جـدودنا يـاأم خـدّاد قِبيـل دِيــدَان وأولاد ريشَة نَحَسِـب لاالحسين فرسان مانا عِـريـــب بننـقـَــاد للدُنا وننهـــان وصقـّـار مِيتـَرا وافلـَـح من الغربــان
نحن جـدودنـا أظهــر مـن عَـلـَم بَـينِيـن ونحن قـلوبنا في البـُولاد حَدِيدَا مَتِيـن نحن العِـن عُـرُوضـنا لُـئـَام وجَبّاريـن وبعـرفنـا الصـبــر ياالملكـــــة صَبّارين
| |
|
|
|
|
|
|
Re: ود الشلهمة (Re: Ahmed Yousif Abu Harira)
|
السلام عليكم ورحمة الله
مِيـرَاث جَـدّنا الحَـارّة أم طلايقـاً قايمة قدّاد رَاسُو والهَاري ابْ دَرقـة ًصَايـمَة أصلو طلبنـا مُوسعَايَه وعَمِيـرة ً حايمة غيرسُمعَه وشَكِرتن تبقى في المِي دايمة
لا تـْـهـِدّونــــا نـــَـــابَا الـمــــــوت ونحن قـَدرنــا في كـل القِبَـل مَثبُـــوت نحن الفرسَــة نَبنِيها ونَسِــيها بيـــــوت ونحنا ورانا ناس مَارح فضِـلة الحُـوت
نحنا عَـشِــيــرنـا مـُومـَمْــــغُـــوص ونحنا خِيولنا بتكسِّــر قـَوي الفاعُــــوص في زمَنـاً سِـيوفــنا على الرقاب بتكُوس كانـو جدودنـا زاربـِيـن القبُـور بالروس
| |
|
|
|
|
|
|
Re: ود الشلهمة (Re: سمية الحسن طلحة)
|
أصْـدَق نحن من الأنجـليز في عهـودنا ومابنبَطِـّـل الدرب المشُــوبـُو جـدودنا يالبُرّيبـَة مابنقبـَل خَلل فـي عـروضنـا نَفدَاهِن رُخاص بى دَمّـنا وموجودنا
نحنا الزيـَّنـا راقـد بالتِريـك ومَشَـوّن ونحنا إيـدينا يـاأم خـَدّاد حقيقـة بسَوّن نحنا الفِي مَحَاكرالضِّيق وجُوهنا بضَوّن وديــدان عَـركَة اليـوم الصُقـورا بخَوّن
كان ســألوك عن صِـنعَـة جُدودنا قبيـل َدوَابي العَـركَـة يـاام خَدّاد صـنُـود الخيل عَـرّاضـيـن نِحَـاسَــاتاً دِمَــاها تـســـيـل مَجبُـوريـن علـي التـَقـَل الشــديـد بنشِيل
| |
|
|
|
|
|
|
Re: ود الشلهمة (Re: سمية الحسن طلحة)
|
Quote: كان ســألوك عن صِـنعَـة جُدودنا قبيـل َدوَابي العَـركَـة يـاام خَدّاد صـنُـود الخيل عَـرّاضـيـن نِحَـاسَــاتاً دِمَــاها تـســـيـل مَجبُـوريـن علـي التـَقـَل الشــديـد بنشِيل |
يا بت طلحة انا رايح على كلام اظن قالو واحد من البطاحين يحمل بعض معانى الابيات التى ذكرتيها:
نحن الما بسمونا العريب فى غبرة نحن العندنا اللبن الحليب بالبدرة ------------------------------ نحن الما بنشيل هيجة ونخت الفزرة
ارجو التصحيح وامكانية ذكر البيت المفقود لانو راح على والله.
| |
|
|
|
|
|
|
Re: ود الشلهمة (Re: على احمد النعيم)
|
Quote: . تـْـهـِدّونــــا نـــَـــابَا الـمــــــوت ونحن قـَدرنــا في كـل القِبَـل مَثبُـــوت نحن الفرسَــة نَبنِيها ونَسِــيها بيـــــوت ونحنا ورانا ناس مَارح فضِـلة الحُـوت |
حرم ياسميه كلامك ده يحمى الزول اللكل عديل كدى .دا شنو البسوى فيه دا. ابشر بى الخير.
| |
|
|
|
|
|
|
Re: ود الشلهمة (Re: خالد المحرب)
|
Quote: ارجو التصحيح وامكانية ذكر البيت المفقود لانو راح على والله. |
ياود النعيم آخوى كان فى واحد من عربنا ديل متنتح فى الثقافة بالحيل بعدين نط ليهو واحد غتيت قال ليهو إت آفلان دحين غوربتشوف دا شنو السايب ؟ أخونا المثقفاتى المدعى قال ليهو والله الإسم دا ما غريب على أظن نوع فاكهة ... هسع أنا أريتك كان سعلتنى من فلادمير بوتن ... غايتو الإسم دا ماغريب على وناس حليب البدرة ديل يكونوا ناس ود الشوبلى المهم أنا بديكم آخر كلام للفنجرى وودعتكم الله والرسول نخلى الخبز لى الخباز
ويختتم الفنجرى بما يشابه خاتمة طه :ـ
نِسْــــــــلك مُـوبـَخِـس معـروف وحَكموك النجُوس مالقيت خَلاصنا كفوف كان اتيامَنّا الهَاري بى إيدينا ووقفنا صفوف تشـوف الِبرغِي والطبَق الحِمِل مَـردُوف
مُوتـَــك دُرتـُـو فوق أصْـدَم مَخَمّس دَافِر يابـِس فوق سـرُوجـِن ماهُو حَاكمَك كافر يامُقـنـَع كوَاشــــف أُمَـّات وضِيبَــاً وَافِر مـادام العُمــــر عَاريّــــة خَلـّـو يســـافـر
Quote: حرم ياسميه كلامك ده يحمى الزول اللكل عديل كدى .دا شنو البسوى فيه دا. ابشر بى الخير. |
تسلم ياخالد أخوى يادراق المحن
أها يا أحمد ود يوسف العفو فوق العافبة أومى لى قيسان بالعمة اليجيب لك جبنة وزنين ودعتكم الله .
| |
|
|
|
|
|
|
Re: ود الشلهمة (Re: سمية الحسن طلحة)
|
ويختتم الفنجرى بما يشابه خاتمة طه رثاء شقيقهما عمر ( عليهم الرحمة أجمعين ) :ـ
نِسْــــــــلك مُـوبـَخِـس معـروف وحَكموك النجُوس مالقيت خَلاصنا كفوف كان اتيامَنّا الهَاري بى إيدينا ووقفنا صفوف تشـوف الِبرغِي والطبَق الحِمِل مَـردُوف
مُوتـَــك دُرتـُـو فوق أصْـدَم مَخَمّس دَافِر يابـِس فوق سـرُوجـِن ماهُو حَاكمَك كافر يامُقـنـَع كوَاشــــف أُمَـّات وضِيبَــاً وَافِر مـادام العُمــــر عَاريّــــة خَلـّـو يســـافـر
| |
|
|
|
|
|
|
Re: ود الشلهمة (Re: سمية الحسن طلحة)
|
الأخت العزيزة سمية
شكرا لك فقد وعدت وأوفيت وكفيتي ووفيتي..وأنا الان مطمئن أكثر من اي وقت مضى على حفظ هذا التراث الجميل من خطر الاندثار والنسيان وقد اودعناه هذه الذاكرة الجبارة ونتامل ان تكون حاضنة له أبد الأبدين كالحرز المتين...
رحم الله أولاد الشلهمة اجميعن طه والفنجري وعمر...وجزاك الله عنا وعن محبي هذا الأدب كل خير..
وتقبلي جزيل شكري وامتناني
| |
|
|
|
|
|
|
Re: ود الشلهمة (Re: Ahmed Yousif Abu Harira)
|
سلام عليكم يا بت ود طلحة والحاضرين جميعا ..
بشوفكم بِتـ"أومو" لي .. يعني خلاس بقيتو علي؟؟
اها عاد خلوني الم شديدي وعدتي..اصلها الضُل من قبيييل جفل منها.. واقوم اشد الجمل ..واجي عليكم تب..
دحين قبّال ما أصلكم .. حضروا السماعات في الكمبيوترات والزول الفي مكتب يوطي الصوت شوية .. والجنبو شفع وجوطة اليشوفلو شيتاً يشغلهم بيهو بعيد .. عامنو انا عازمكم حكاية مجلس جبنة ..سمع ..
بعدين ناس البطانة ديل برضو غنو فوق النسوان ..غزل راسو عديل .. وكت شوفنا كلامهم في ألبِل وفي البطانة زاتا وفي الحزن والفقد والنعي .. نجي نشوف كلامهم وكت يجوا يشربوا الجبنة.. ماهي اصلها الحكاية قصة حياة ..حياة اهل البطانة ..
مو ياهو كدي آشيخ أب حريرة؟؟
جاييكم ..
مع خالص التحايا ..
| |
|
|
|
|
|
|
Re: ود الشلهمة (Re: gessan)
|
Quote: ماهي اصلها الحكاية قصة حياة |
قيسان عشا الضيفان
إياها كدي ..إت قايل شن فيها تاني ؟؟...
الحكاية كلها قصة حياة وبس !!
ونحن بانتظار روايتك لهذا الجانب من الحياة...
لا تتأخر علينا
| |
|
|
|
|
|
|
Re: ود الشلهمة (Re: Ahmed Yousif Abu Harira)
|
أحمد على النعيم كان طه ودالشلهمة عليه رحمة الله بساما غير عبوس مرحا بذكاء وبداهة ففى أحد الأيام وجد والدتى خارجة من منزلنا فقال لها ماشة وين يابت الشيخ ... قالت له ماشة لى أبوى أكلمو بى فلان .. شال عجلة من عجولنا قال حقتو ، فقال طه ضاحكا :ـ المخاخيت ديل أبوك ما بهبشن تعالى متل فلان دا أنا بقضيهو ليك ... ونظم مسدار فى لحظته بهذه المناسبة كان مطلعه : أنا فى نظرى زى ما قال لو ود عباس تغنى عدم قرايتك ومسكة الكراس وطول إيدك هدا وجدع القوى وفراس ( القوى بضم ال ق : جمع قوة ) وود عباس دا برضو طه عندو معاهو قصة مضحكة . أنا جبت لك الكلام دا كلو لأنى قبيل حبيت أمازحك فى إجابتى على سؤالك أعلاه ...المهم ياسيدى :ـــ
الشاعر هو :-- مضوى ود اللديغم بطحانى عوضابى همباتى متدين يجمع صلاته ويقصرها فى مساديرو وسأوافيك ببعض كلامه فى موضع آخر . لك منى أجمل المنى
أحمد يوسف لاشكر على واجب هذا واجبنا كما أتمنى عليك أن تعاوننى فى جمع مسدار المستشفى وكلام طه فوق عجب وأعدك أن أختم لك هذا البوست بعد عمر طويل .. بمسك الختام من الوحى والإلهام الكلام الأصلو طه ما بخالطو بى كلام . ودمت
قيسان
حبابك عشرة برا كشرة كلنا آذان صاغية لسماع غنا الحياة
من صرة جبهتك طرز البوابى وين خليت قباحتك يااللئيم مشابى جات غايرانا بى غفلة أم وضيبا كابى سوت لينا كتل المنخلع للدابى ود الشلهمة ( مسدار المستشفى ) لك عاطر التحايا . والسلام عليكم ورحمة الله وبركاته
| |
|
|
|
|
|
|
Re: ود الشلهمة (Re: سمية الحسن طلحة)
|
Quote: متدين يجمع صلاته ويقصرها فى مساديرو |
أعجبتني هذه العبارة في حق (الهمباتي) عمنا مضوي ود اللديغم...
وتذكرت جدنا طه الضرير وعمنا كيقة ود عمران وأخوه أمحمد ودعمران الملقب بـ (الجعلي)...هؤلاء كانوا من عتاة الهمباتة وقد طبقت شهرتهم الآفاق في هذا المجال ولهم فيه قصص وحكاوي ومغامرات وأشعار وأهازيج... وقد شهدتهم في أواخر سنين حيواتهم يكثرون من الصلاة والاستغفار...رحمهم الله وغفر الله لهم جميعا..
وأذكر وأنا صبي أن جدي طه الضرير الذي بلغ حينئذ الثمانين من عمره..لا ينام الليل..ويكثر من الصلاة والصلاة على النبي ويناجي ربه بأعلى صوته..
غفر الله لهم جميعا
ولله في خلقه شؤون
| |
|
|
|
|
|
|
Re: ود الشلهمة (Re: محسن خالد)
|
محسن منور..
والله متذكرك لكن عندى قراية كبر داوشانى الأيام دى.
تسلم والله السطيرات ديل مابحلنك من البوست دا..
بندور منك نضم كتير خلاس..
| |
|
|
|
|
|
|
Re: ود الشلهمة (Re: محسن خالد)
|
محسن خالدبى جاى فى ردنا!؟
ود الشلهمة صيدك ثمين وخرايد مادام الديار طلاها محسن خالد لمينا الرزق السادرة فوق الوارد وجيناك ياالفهيم صايدا قصدلو طرايد
Quote: ، المجينينة "تحبَّباً"، |
تعظيم من عظيم
Quote: والتي أتحفتني وحيّرتني، |
شهادة أفتخر بها
Quote: أوَّل مرة أشوف امرأة قاصعة في الدوبيت، |
سمانى الوالد على إسم أول شهيدة على الإطلاق بنت خياط التى لم يسبقها للشهادة رجل ، وحبب إلى إرتياد أوائل مواضع الكلم منصور المفتاح صاغها شعرا إننى لم أخيب ظن أبى بى د. الطاهر الدرديرى كتبها فصاحة إننى أول إمرأة أرتاد مجال كتابة المديح الشيخ الصامت خرج من صمته لينطق أن سمية زاحمت الرجال كتفا بكتف فى مدح النبى ومحسن خالد يأتينى بما أعتبره مسك الختام، قاصعة ، فلا يضيرنى بعد اليوم شىء
Quote: الذي بقي لزمن طويل، كمشهاد لرجال فحسب، والله عوافي عليها،
|
قال لى أحدهم غيرى بروفايلك (ميل إلى فيميل ) فأجبته : (اعتبرنى مره ضكرانه)
Quote: ويا سمية عوافي وعفارم عليك |
ويامحسن شرفت بك الدار أيما شرف ، ترقبنا حضورك وكلنا يقين (إن أخلف الغيث لن تخلف أناملك) وها أنت تمطرنا بعاطر الثناء موؤنة نتمير منها مابقينا.. ولكن رشفنا وما أرتوينا من حديثك سنظل نترقب خريفك .
| |
|
|
|
|
|
|
Re: ود الشلهمة (Re: gessan)
|
..
لسمية بت الشيخ طلحة
Quote: ود الشلهمة صيدك ثمين وخرايد ما دام الديار طلاها محسن خالد لمّينا الرزق السادرة فوق الوارد وجيناك يا الفهيم صايداً قصدلو طرايد |
كلامك دا هَوَّشني زيين، وبسطني، يكافيك ربي من جودو، بس الكسبان أنا مو طه، طه الكنز ونحن غَرَّافين وكوني بخير ----------------- يا ريت يا بلّة موسى، ما بالعمر حيلة --------------- قيسان تربت يداك، وشوف كلام الزول دا مش قصة قصيرة جاهزة؟ والكيف جبنة بس ------------------- يوسف دير بالك علي التشكيل، ويا ليتك ترجع تفليهو تاني، أرجو منّك أن تبعث لي الملف كاملاً على بريدي، وكذلك من الأخت سمية، وسأكون شاكراً لكما على الغنيمة أوَّلاً، كما سيصبح بوسعي التصليح أثناء الاستمتاع والقراءة، هاك الرباعية دي نموذج: ضُلِكْ خَتّ من رَفَ السِحَابْ ...الكَوَعْ وبراقك مَمَاسَكْ..وبالفجيج اتبوعْ اتفقع سماك نازل...صبيبو منوعْ وشَقّاقِك شِبِعْ في الموية لامن توعْ
بحذفك للشدَّة من القافية –خصوصاً- إنَّك فتحت "الكَوَع" أوَّل مفردة من القافية، بعدّاك كلها بتتقري غلط، بالإضافة لهنّات شوية في تشكيل المفردات، دا التصويب تحت:
Quote: ضُلِّك خَتَّ من رَفَّ السِّحَاب الكَوَّع وبَرَّاقِك مَمَاسَك وبالفِجِيج اتْبَوَّع اتْفَقَّع سَمَاك نَازِل صَبِيبو مَنَوَّع وشَقَّاقِك شِبِع في الموية لامن تَوَّع |
عليكم الله شوفوا الأخيلة المجنونة دي، الواطـة تصبح شبعانة لدرجة المرض، تمسك بطنها الطامَّة، وأوووع تطرش أبقوا طيبين
..
| |
|
|
|
|
|
|
Re: ود الشلهمة (Re: محسن خالد)
|
محسن كيفنك؟
ملاحظتك في التشكيل صحيحة مية المية على الرغم من أنو الكلمات زاتها لا يمكن أن تقرأ بمعنى غير القاصدو الشاعر وعمك طه زاتو ما كان محوجنا ليهو...لكننا ما دام شرعنا في التشكيل يجب أن يتم بالصورة الصحيحة...
تعرف أنا التشكيل ده حرم اتعلمتو مع عمك ود الشلهمة ده ، مع أني مصاقر الكمبيوترات دي لي زمنن مِعِد.. بعدين (الشديدة ّ) دي اصلها ما كانت فايته علي لكن وكتي الكتبت الكلام ده ماكنت عارف دربها بي وين...أتاريها خاتينها فوق حرف الذال وجادعناها في آخر كورنر..
طبعا ده كلو كوم ووجودك بينا كوم تاني...ولن نفي التعبير حقه إذا قلنا لك سعدنا بك والمنبر ولع والنوع ده من الحديس..لكن أنا وربعي المعاي دول في غاية الشرف والانشراح والارتياح ...لأنهم جميعا طلاب جمال وأنت في بحر الجمال تزاحم الكبار بالمناكب..
لن نمعن في الطمع ونقولك خليك معانا لأسباب نعلم بعضها ، مشغولياتك الخاصة وطمام البطن العام أمثلة دون حصر ، لكن عدنا بالمتاوقة من حين لآخر ..
طلباتك ستصلك باسرع بريد إلكتروني شرط ان تجدك بخير..
| |
|
|
|
|
|
|
Re: ود الشلهمة (Re: Ahmed Yousif Abu Harira)
|
حبيبنا الدكتور بله ود موسى
تحياتي النواضر
نحن كنا ولا زلنا في حضرتك والطمع زي ما بقولوا أهلك "فحل العيوب" ولا زال الشعور العام عندي ولدي الرباعة أنك لم تفصح بعد عن مكنوناتك الجميلة فكلما زاد جودك اتسع طمعنا فيك ..فبالله عليك لا تحرمنا من طلتك البهية وحرفك الندي القوي البليغ الرشيق...
قيسان عشا الضيفان جاب لو صورة حية عن مجلس أدبي في أحدى صالونات الجمال كما يحلو لك تسميتها وننتظر تعليقك عليها..
حبيبنا المحسن الخالد قال أن ما أورده الراحل المقيم عبد الكريم ود شعيت يصلح لأن يكون قصة قصيرة.. ورأينا انها "قصة حياة" إتفاقا مع ما ذهب إليه الجميل قيسان ...ننتظر رأيك على جمر الغضا..
علمنا أنك سويتلك قراية كبر...وخوفنا أن يكون ذاك عذر عايز تنملص بو مننا لكن ونستنا دي طريق ...زيها وزي سبيل أهل الطريق ...لا تمنع سالكها من جد ، فلا تبخل علينا بالطلة وأعلم أن مداخلة بله موسى تتنادى بها الركبان..
ودم أيها الصديق الجميل
| |
|
|
|
|
|
|
Re: ود الشلهمة (Re: Ahmed Yousif Abu Harira)
|
قيسان عشا الضيفان
لم نشكرك كما ينبغي على تكبد مشاق الكتابة لعمك عبد الكريم ود شعيت خاصة وان هذا النوع من الكتابة على عسره ، عمك ود شعيت جابلوا غناين سيرتو براها فجمع بين شعر أحمد ود عوض الكريم ود اب ناجمة وأحمد ود الفكي حمد وسليمان الهدندوي وذاك الشيخ الرشيدي الذي حب أن يجامل العجمان بمقطع شعري على نسق الدوبيت...
فلابد انك عانيت في التفريغ ، ووجب علينا شكر جهدك لكن نجي ونقول أنك ماك مشحود على هذا الجهد فأنت توثق لـ"قصة حياة" كنت ولا زلت شريك أصيل فيها...
أنا حكاية "قصة حياة" دي وقعت لي بالحيل وعلى العموم لن نوفيك حقك شكرا ، ومع ذلك خليك قريب كي لا تحوجنا لأن "نومي لك بالعمة" مرة أخرى حيث لا عمة ولا توبا يوموا بيه..
سعيد بك أيها الجميل النبيل
| |
|
|
|
|
|
|
Re: ود الشلهمة (Re: Ahmed Yousif Abu Harira)
|
شكرا قيسان على هذا المجهود الجبار يبدو أن التسجيل الذى كان معى عتيق بدلالة إختلاف بعض التعابير وتغيير بعضها فى التسجيل الذى معك لدى بعض تصحيح لأخطاء مطبعية فقط سأوردها ( بين قوسين) إذا رغبت تعديلها فلك ذلك ... فى أول فقرة :ـ (الوطا ) صباح و( الشمش عود حربة ....) الصادق ( حلب شدوقو ) فى العرب .. ولعت الفحم ( يتواجج ) متل مغس الأقربين يقال : الجرح يوج ..والخدود يتواججن .. والجمر يتواجج متل مغس الأقربين.. حار بالحيل مغس الزول القريب منك وليك ، وظلم ذوى القربى أشد مضاضة من وقع الحسام المهند قول الإمام على بن أبى طالب كرم الله وجهه .
وفى الغنا :ـ سمحة وضوكا لبن صهبا ( ودخلها ) مبسط الفارس اللبس ( درع الدويدى بخافك ) نسبة للدروع التى كان يصنعها سيدنا داؤود عليه السلام... ( جوز قمارا دشيش ) تصغير دش قال الشيخ عبد العزيز :ـ ياقلبى الرهيف ليه كاره الفريق تعبان روحى تتقطف من العشريق (الدش ) المعاى لاعب بصرتى حريق ياحليل النزيه المونتى فى أبودليق ( الدش والبصرة .. مصطلحات لاعبى النرد ) ( وحداهو ) أى بجانبه... ولنا عودة بإذن الله .
| |
|
|
|
|
|
|
Re: ود الشلهمة (Re: سمية الحسن طلحة)
|
يا شيخ أحمد أبوحريرة
بالله شوف أبوحريرة دا إسم مفعم بالتفاؤل والفرح.
تحياتى لك ولضيوفك الكرام
لازلت أصفى فى مزاجى العكران لأنقى لك الكلمات فمثلك لايرد عليهم إلا آن مزاج تتراقص له غزلان البر .
| |
|
|
|
|
|
|
Re: ود الشلهمة (Re: Balla Musa)
|
يا من رفعت السموات وطرحت الأرض يا من فارض الضي من الظلمة وفرضت الفرض نحن الصح تركناه وربحنا الغرض نرجاك تمحى واضحنا وتستر العرض
ود اللديغم
الخترة البقت هادمة الجفن مي صولة أول نيتي أشد كلسي واقافي الدولة فوضنا الأمر للأولــــــــــــــــى باطلة القوة من غير البريدو المولى
| |
|
|
|
|
|
|
Re: ود الشلهمة (Re: سمية الحسن طلحة)
|
Quote: يا من رفعت السموات وطرحت الأرض يا من فارض الضي من الظلمة وفرضت الفرض نحن الصح تركناه وربحنا الغرض نرجاك تمحى واضحنا وتستر العرض |
تاورنا الحكي
| |
|
|
|
|
|
|
|