دعواتكم لزميلنا المفكر د.الباقر العفيف بالشفاء العاجل
|
|
 مصطفى سيد احمد الذكرى الحادية عشر لرحيله صور لذكريات ونصوص وضعت لها فكرة لحن
|
حى بن محمود الدوحة شقة فى الطابق الاول
الساعة حوالى العاشرة مساء يوم الاربعاء
17/1/1996م
غافلتنا ورحلت فى الليل وحيدا
احد عشرة عاما على رحيلك
يا مصطفانا السيد واحمد ومقبول
ولم يزل صوتك يشنف الامكنة والازمنة
باخضرار الامل
أتكئ معكم هنا على جانب من تلك الذكريات
تنهدات: ياناير شهر المواجع السودانية استقلال كسيح
وشموع تنطفئ منها المحمود ومنها المصطفى
|
|
 
|
|
|
|
|
|
|
|
Re: مصطفى سيد احمد الذكرى الحادية عشر لرحيله صور لذكريات ونصوص وضعت لها فكرة لحن (Re: Elmosley)
|
حفل فندق رمادا 1994 ـ تحت رعاية الخطوط الجوية القطرية
الفرقة الموسيقية
من اليمين : عازف الايقاع : عبد المنعم الفكي ـ عازف الطبل : كمال كومي
عازف الدنب : المرحوم حسن بحري ـ عازف الباص جيتار : عبد الماجد مكي
عازف اللد جيتار : محمد بلاش ـ عازف الأكورديون : معتز القريش
من اليمين : عازف الأكورديون : معتز القريش ـ عازف الطرمبيت : الأستاذ دفع الله بشير
عازف الأورغ : ياسر قصاص
جانب من جمهور الحفل
| |
|
|
|
|
|
|
|
|
|
Re: مصطفى سيد احمد الذكرى الحادية عشر لرحيله صور لذكريات ونصوص وضعت لها فكرة لحن (Re: بدر الدين الأمير)
|
الزول الجميل
بدر
هاهي الذكرى السنويه لرحيل القيثاره الحزينه
مصطفى سيد احمد
تمر علينا ونحن في الانتظار والترقب
وانتظار المستحيل
لكن كما تعودنا والتزمنا كل عام في احياء الذكرى السنويه للراحل في تأبين متميز هنا في دولة الأمارات
فهذا العام وهذه الذكرى ال 11 ستكون اكبر واكثر تميزآ من سابقاتها
والجماهير هنا محبي واصدقاء مصطفى سيد احمد في الأمارات على انتظار وتاهب لأحياء هذه الذكرى
وتقبل تحيات الجميع من محبي واصدقاء الراحل
في اسرة نادوس الثقافيه السودانيه – الامارات
وارجو اسال رقم موبايلك لنتواصل ونتفاكر في المقترحات التى من شانها اثراء ساحة محبي الراحل
مع مودتي
مهدي الأمين
00971/50/3669102
الامارات
| |
|
|
|
|
|
|
|
|
|
Re: مصطفى سيد احمد الذكرى الحادية عشر لرحيله صور لذكريات ونصوص وضعت لها فكرة لحن (Re: معتز القريش)
|
كان لمصطفى علاقاته الخاصة والعميقة جدا مع الغبش
الذين لم تلوثهم لا الثقافة ولا السياسة يمازحهم
ويتحداهم فى حرفنة لعب لكتشينة وجودة تمطير الصعود
ومن هولا كان الاخ والصديق العزيز نوح عبدالواحد الصادق ذلك
الجعلى القح ابن قرية ود حامد حين كان يعد نفسه للسفر للسوادان
لاتمام مراسيم زواجه اتى لمصطفى وقال له : يامصطفى ياخوى وكت الظروف
منعتك من حضور زواجى بدورك تعملى بنينة العديل والزين تكتبها وتغنيها
وتسجلها لى فى شريط امش اتحنن بيها عوضا عن حضورك ) وماكان من مصطفى غير الاستجابة وهو فرح للطلب والطالب
تقول كلمات البنية التى كتبها وغناها له:
هى الليلة العديل والزين
والليلة العديلة وياعديلة الله
بسم الله ابتديت زولى السمح والزين
من قومة الجهل معروف ولد ستره
بالفال السمح لنوح اخو الاخوان
مستور العروض نوارة الديوان
لى الجار والبعيد قدحو دوام مليان
ود جعل العزيز قيدومة الفرسان
ياقسم الكبير ابشر بشارة الخير
فال نوح العيال والتانية رزقه كتير
رقصن فى الفرح ديسن طويل وغزير
اخوات الرجال لابسات دروع وحرير
ومصطفى فى الخليج نظم كلام موزون
ذاكر فيك وصف دررا خفى ومكنون
عقبال يامحمد كل صعيبة تهون
ويجمعنا الفرح فى ديارنا زى مايكون
الشايقى الفصيح فرحان لود عمو
ركازه الصديق شرق العيال نمو
بالزين والعديل يا اخواتو يا امو
واخوانو العزاز طعم الحلو وتمو
ملحوظة:قسم ومحمد هم أشقاء نوح)
| |
|
|
|
|
|
|
|
|
|
Re: مصطفى سيد احمد الذكرى الحادية عشر لرحيله صور لذكريات ونصوص وضعت لها فكرة لحن (Re: معتز القريش)
|
في منزل مسعود محمد علي
ذلك المنزل الذي احتضن العديد من جلساتنا وندواتنا
هاهي اسرة ايرلندية تحتفي فيه بمصطفى
من اليمين جلوسا : مسعود ـ ريان مسعود ـ شيفون
من اليمين وقوفا : الراحل الدكتور محمد الطيب ـ طاهرة عبد الحميد ـ نعمات ـ بدر الدين الأمير ـ دارا ـ عبد المنعم الفكي
على يمين مصطفى الايرلندية العظيمة جوزفين ابراين ـ ليت زملاؤها في جامعة الجزيرة وجامعة قطر يحدثونا عما قدمته للسودان والسودانيين . وسوف احكي لاحقا عن حكايتها معنا في حفل مصطفى الأول
| |
|
|
|
|
|
|
|
|
|
Re: مصطفى سيد احمد الذكرى الحادية عشر لرحيله صور لذكريات ونصوص وضعت لها فكرة لحن (Re: nadus2000)
|
جانب من الشعراء الذين تغنى لهم مصطفى سيد احمد
عفوا ترتيب الاسماء هنا لا لشىء غير انى اكتب من الذاكرة
المقبول سيداحمد
محمد طه القدال
عمر الطيب الدوش
محمد الحسن سالم (حميد)
هاشم صديق
يحيى فضل الله
قاسم ابو زيد
ابوزر الغفارى
مدنى يوسف النخلى
عوض مالك
جمال حسن سعيد
خطاب حسن احمد
صلاح حاج سعيد
عبدالعال السيد
نجاة عثمان
ليلى المغربى
عبدالرحمن مكاوى
د.بشرى الفاضل
الصادق الياس
حسن بيومى (شاعر مصرى)
الفرجونى
عاطف خيرى
الصادق الرضى
مصطفى سيد احمد
محمد مريخة
عبدالوهاب هلاوى
محمد المهدى عبدالوهاب
د.عبدالقيوم
عبدالقادر الكتيابى
محمد ابراهيم شمو
حافظ عباس
قريب الله محمد
تاج السر عثمان الطيب
محمود درويش
نزار قبانى
محمد مدنى الشيخ
محمد محى الدين
على عبدالقيوم
فيصل محمد صالح
حسن ساتى
ازهرى محمد على
سيف الدين محمد صالح
مظفر النواب
د.طلال دفع الله
يوسف السمانى
فتحى الملك
خليفة الصادق
فتح الله ابراهيم
حسن توفيق (شاعر مصرى)
احمد صالح كامل (شاعر مصرى)
ازهرى الحاج
| |
|
|
|
|
|
|
|
|
|
Re: مصطفى سيد احمد الذكرى الحادية عشر لرحيله صور لذكريات ونصوص وضعت لها فكرة لحن (Re: بدر الدين الأمير)
|
في يوم من ايام البروفات مع الراحل
كان عندي موعد غرامي حار وما ممكن أجليهو باي طريقة
وكمان ما ممكن أغيب من البروفة لسببين
1- الشخصية القوية للراحل والنظرة الحارة (نظرة الاستاذ) لمن يكون عاوز اعاتبك
نظرة أخير منها اديك شلوت .
2- اذا غبت من البروفة ح تفوتني أشياء كثيرة وح يكون من الصعب الرجوع اليها ومتابعة الجديد خصوصا انو البروفة كانت (مريم الأخري)
أها ... ما كان عندي حل غير اني اشوف طريقة افرتق بيها البروفة.
بس اثناء البروفة وفي نص الغنية جاء مقطع
(آه لو تأتين آه .. من عميق الموج من صلب المياه)
بس جات الراجيها.. بس وقفت العزف وعملت فيها ناقد أدبي
معتز : يا استاذ المقطع دا غلط
مصطفى : الغلط شنو يا ود القريش
معتز : ما ممكن تقول من عميق الموج لأنه الموج يوصف بالعلو مش بالعمق
وشوية فلسفة ـ يا استاذ عمق الموج هو سطح الماء لأنو الموج عالي وكان نزلت لي عمقو بتكون في سطح الموية . وعيييييييك
مصطفى : انت شن عرفك بالشعر خليك في أكورديونك دا
معتز : أنا استاذ لغة عربية وأبوي استاذ لغة عربية وشاعر كمان
عبد المنعم الفكي : هوي يا (الشبير) كان العزف غلبك قول عدييل
مصطفى : دا شعر ايحائي .. رمزي ..
(ما عارف قال شنو المهم عاوز اقنعني)
أنا أصلا ما كان هاميني عميق الموج ولا راس الموج أنا عاوز أفرتق البروفة وبس
أها وكيلك الله بس مسكت ليك في عميق الموج دي وعكلته للطيش .
يا زول الحكاية جرت ومصطفى اتوتر ورجع لي بورتسودان والموج والسمبك وووو
وبقت قصة والجو اتوتر والبروفة اتفرتقت
بس قبل ما تتفرتق
مصطفي : يا ود القريش أخير ليك ما تكاويني والله أنا البكاويني بوسمو
المهم عندي البروفة تتفرتق واتفرتقت
بس للأسف كان الوقت اتأخر والموعد طرشق .اها الطرشيقة الياها لي يوم الليلة
أنا أكتر واحد كنت بكاوي المرحوم وكان يضحك .. بس المرة دي حرقتو .
| |
|
|
|
|
|
|
|
|
|
Re: مصطفى سيد احمد الذكرى الحادية عشر لرحيله صور لذكريات ونصوص وضعت لها فكرة لحن (Re: بدر الدين الأمير)
|
الأخ بدر الدين الأمير
لك التحية والتقدير العظيم على هذا السجل التوثيقي الحافل عن سنوات الدوحة من حياة الراحل الخالد ، والتي كانت عامرة بمودتكم وصداقتكم وإخلاصكم له . هذا السجل عمل ممتاز وجهد مقدر تقدمونه وفاء وعرفاناً لصديقكم في الذكرى الحادية عشرة لرحيله .. لكم الشكر من الجميع . وأرجو ان تسمحوا لي بمشاركتكم في إحياء الذكرى بإعادة نشر هذه القصيدة بعنوان " عرس ود سلفاب " ، والتي كنت قد كتبتها بمناسبة الذكرى الأولى لرحيل هذا الفنان الشامخ والإنسان الرائع .
عبد المنعم خليفة
عرس ود سلفاب
شعر :عبد المنعم خليفة خوجلي
لعرس ود سلفاب
تزينت كل الصبايا
تألق الشباب ..
وعرس ود سلفاب
متضمخ بالخصب والعطاء
كلحن مصطفى
******
من كل فج جاءت الجموع
جاءت تقيم مهرجاناً للوفاء
جاءت تحيي مصطفى
وتستحم بالضياء ..
******
جاءت بكل الصدق والبسالة
قوافل متصلة
في غضبة مجلجلة
جاءت تصوغ الملحمة
وترفض الهزيمة
******
كل شيوخ الشعر والإبداع جاءوا
من حولوا القصيد بندقية ومنجلا
كل النساء الخيرات والرجال الخيرين
من عاشقي السودان
والقيم الفاضلة النبيلة
*******
جاء كلات الموانئ
وفالحوا أرض الجزيرة السمراء
يرددون " مصطفى ..
السراج ما انطفأ
سوف يزول من ديارنا الظلام
سوف يحط فوق دورنا الفرح "
******
وعندما أطل فارس الأمل
قامته الشماء تعانق السماء
يحفه الأريج والندى
كأنه الربيع
بصوته البشير بالرجاء
بلحنه المموسق البديع
زغرد الفرح
وهلل الصحاب بالشبال
وبشر الجميع ..
*******
( 1996م .. بمناسبة الذكرى الأولى لرحيل الفنان الخالد مصطفي سيد أحمد )
| |
|
|
|
|
|
|
|
|
|
Re: مصطفى سيد احمد الذكرى الحادية عشر لرحيله صور لذكريات ونصوص وضعت لها فكرة لحن (Re: بدر الدين الأمير)
|
فى واحدة من ونسات ما بعد طفيان النور مع شخص تسكن معه فى غرفة واحدة
والتحايل على جلب النوم وكنت اعلم جيدا
كيف ا تستفذ المدرس فى مصطفى ليطول لك البال والشرح
قلت : يا مصطفى ياخى اغنية اخونا الصحفى الشاعر فيصل محمد صالح
(سفر السكوت) دى ماخلاص نجضت خليها تطلع للناس رده مصطفى أيوه
انا عارفها عاجباك ونا برضو عاجبانى بس مش عشان فيصل صاحبى زيك
عشان فيها حاجات كتيرة حلوة بس داير اتكلم مع فيصل عشان يغير الجزء
بتاع (الحبيبات خانت) لان فيه اطلاق . قلت: انت رقيب على الشعر ام ضمير الشاعر
( ايوجعك الوصف ) لكترت شواكيشك هذه الكلمة البين قوسين من ضمن مقاطع القصيدة ويارتنى ماقلتها
قام من تحت البطانية وولع النور وتحكر فى نص السرير وامرنى ان اعمل له شاى والشايقى
حين يستمخ بكباية الشاى اجاركم الله من طول باله وشرحه وبدأ فى تقريعى : انت بتعرف شنو عن
خيانة الشاعر للنص وعن خيانة المتلقى لتقى النص وعن الموسيقى البتفضح الشاعر والمغنى والمتلقى
وعن وعن ووولخ وبديت انا فى الجرسة يامصطفى والله انا كان قصدى انك تونسنى لحدى ماالقى النوم
الموضوع ده خليهو لبكره. رده بقوله نحن أى حاجة بنخلها لبكره ماقاعدين نكملها ناولنى العوده
واثناء ماهو بدوزن فى العود كنت قد رحت فى سابع نومة
| |
|
|
|
|
|
|
|
|
|
Re: مصطفى سيد احمد الذكرى الحادية عشر لرحيله صور لذكريات ونصوص وضعت لها فكرة لحن (Re: mahdy alamin)
|
وحين يكون المؤّرخ ..بكامل وجدانه.. جزء من التاريخ الذي يسرده..
فهذا أشبه بمخاض .. تختلط فيه المشاعر والأحداث بحميمية موجعة..
فلا تدري من يسحب خيوط التداعي..
ومن المسحوب..
أغبطك يا ود الأمير على رحلة بهذا العمق...
لكن .. لك الله من عواصف شجن..
يفرضها وبقسوة.. مثل هذا الحكي ..
(بدليل صور تظهر بعد مرور عقد من الزمان)
ألف رحمة على روح مصطفى..
وتبقى رسالته...
مابقيت الكلمة والنغم...
وفي إنتظار الكتاب..
| |
|
|
|
|
|
|
|
|
|
Re: مصطفى سيد احمد الذكرى الحادية عشر لرحيله صور لذكريات ونصوص وضعت لها فكرة لحن (Re: نجوان)
|
Quote: معتّز القريش..
لا أعتقد في ظلامية من كان ضمن كوكبة تنثر النور..
أن تصطفي مصطفى دون غيره...
وان يصطفيك هو..
وأن تتحدثا لغة واحدة.. ترتقي بالجميل في دواخلنا...
وتروّض القبيح وتجمّله...
كل هذا منافي لخصائص العتمة والتعتيم...
لك التحيّة وكل الود والتقدير.. |
نجوان يا ست الذوق
كلامك دا أنا ما بعرف ارد عليه بس أحب ان أنقل عبرك معلومة
وهي أنني بعد مصطفى لم أجلس خلف أي فنان كائنا من كان لأعزف له
إلا محمود عبد العزيز وقد كان ذلك بعد وفاة مصطفى مباشرة
وفي ذلك الحفل غنى محمود أغنية لمصطفى وكانت أول اغنية في الحفل
وأنا في المسرح بكيت وبكيت ثم تركت المسرح وبعدها لم أعزف لفنان
بل ولم أحضر حتى أي حفل لأي فنان ولن افعل .
| |
|
|
|
|
|
|
|
|
|
Re: مصطفى سيد احمد الذكرى الحادية عشر لرحيله صور لذكريات ونصوص وضعت لها فكرة لحن (Re: بدر الدين الأمير)
|
ود الامير
مالك علينا ونحن بنكابد شتاء هذه الغربة اللزجة....أدخل هذا البوست يوميا ولكنني اتردد في الكتابه خوفا من الغرق...فـمصطفي بحيرة عـميقه اجرت معه اول حوار صحفي في حياتي الـمهنية وكان ذلك في العام(1983) إذ تقلدت في ذلك العام تحرير صفحة (فنون)بجريدة(الايام)..واعتقد انه هو الحوار الذي وضع خطا فاصلا بين مصطفي سيد احمد واتحاد شعراء الاغنية السودانية ..ففي ذلك الحوار تطرق مصطفي الي إستهبال هؤلاء الشعراء وطرائق الوسط الفني في التعامل مع الفنانين الشباب آنذاك...فمصطفي كان يغني في ذلك الوقت اغنية(شال هم فرقتك قلبي ) من كلمات عبدالرحمن مكاوي والحان يوسف السماني..وتعرض لإبتزاز مالي من قبل الشاعر والـملحن وفي نهاية الامر اعطيا الاغنية لحمد الريح لانه فنان مشهور....نشرت كل ذلك في الجريدة فقامت قيامة الوسط الفني ولـم تقعد إذ كيف لفنان مغمور ان يقول كلاما كهذا وكيف لصحفي نكرة ان ينشر حوارا كهذا..فجاؤوا لرئيس التحرير(حسن ساتي)مشتكين..فقال لهم حسن ساتي اكتبوا شكواكم وسننشرها لكم...فكتبوا يعلنون فيه مقاطعة مصطفي سيد احمد فنيا وسحب جميع نصوصهم منه...فنشرت لهم ذلك ونشرته معظم الصحف الرياضية في ذلك الوقت..فقبل مصطفي ذلك التحدي فإنطلقت (..الصبر والحزن النبيل!!!)
| |
|
|
|
|
|
|
|
|
|
Re: مصطفى سيد احمد الذكرى الحادية عشر لرحيله صور لذكريات ونصوص وضعت لها فكرة لحن (Re: بدر الدين الأمير)
|
الاستاز الفاضل ود الامير
كل عام وانت والاسرة بالف خير
اولا نسال اللة الرحمة والمغفرة للفقيد الرائع الاستاز مصطفى سيد احمد
ثانيا لا استطيع ان اعبر لك عن مدا اعجابى بما طرحته لنل من كنوز ودرر تملكها حقيقة احسدكم على معاصرتكم اللراحل ومشاركته حقبة من الزمن وحيز من الزكريات
كنت فى حالة مزاج متعكر جدا ما ادرى ما السبب عند دخولى الى المنتدى انبهرت واندهشت فهذه الصور مهمة بل لها قيمة غالية بالنسبة لنا عموما ارتحت كثيرا عند القراءة
هنا لا يفوتنى ابدا ان اثنى على الاستاز ود القرشى لسرده لنا فتره من حياة الراحل ومعاصرته
لكم كل الشكر وانتم تدهشونا بسردكم هذا
ولكم التحايا العطرة والامانى المرهفة
مره اخرى نسال اللة المغفرة والرحمه للفقيد مصطفى
| |
|
|
|
|
|
|
|
|
|
Re: مصطفى سيد احمد الذكرى الحادية عشر لرحيله صور لذكريات ونصوص وضعت لها فكرة لحن (Re: الشفيع عوض شوشتا)
|
الاعزاء
معتصم دفع الله
عبدالحليم ليمو
على بازرعة
كم وكم يشرفنى بل وافخر ان التقيكم حبا لمصطفانا
وكون الصدفة التاريخية منحتنى ان اعيش مع مصطفى
اخر ثلاثة اعوام من حياته هذا لايعنى انى اعرفه او
اعشقه اكثر منكم فقط قدرى انى ملم بتفاصيل تلك
السنوات وحتما عليا ان اوصلها لمن هم اجدر منى
بمعرفة مصطفى وصفاء فى حبهم له
وعشان اوصل جزء من ذلك سوف احكى لكم فى المداخلات القادمة
عن رابطة اصدقاء مصطفى بالعاصمة السعودية الرياض وهو كلام
تقوله الوثائق وتقوله اوتار عود مصطفى ويقوله الاخ العزيز
ليمو الذى كان يعبر الفيافى والوديان لاياتى لنا رسولا من
تلك الرابطة وهو محمل منهم بالدعم المعنوى والمادى
ويكفينى تأدبا ان اقول لمن لا يعرفوكم انكم قد اديتم عمرة جماعية الروح مصطفى
وللحديث بقية
| |
|
|
|
|
|
|
|
|
|
Re: مصطفى سيد احمد الذكرى الحادية عشر لرحيله صور لذكريات ونصوص وضعت لها فكرة لحن (Re: بدر الدين الأمير)
|
شكرا بدر الدين على هذا الخيط الدسم الذي ينضح وفاءا في حق فنان الكادحين الراحل مصطفى سيد أحمد والشكر للأخ عثمان موسى على تنبيهي له ويسعدني أن أشارك فيه بقصيدة العوض مصطفى التي كتبها بعيد رحيل الإنسان الفنان:
يا مصطفى
ودَّعتَ ياحُزْنَ البلد
ودَّعت يالولد السَّمِح
في الغـُربة والزَّمن النـَّكد
وجوك العِـيال ما بقصِّرُوا
سوُّوا العدِيل والزّين هِناك ما اتصرْصرُوا
بس كنت خايـِف كيف عليك
يطويكَ ليل الغربة دِيك
في الغربة لا اندلـَـقــَنْ عليك بنـُّوتـْـنـَا مَحْزُونات كمَدْ
لا اتـْـشالبوك أهلك يَهـِـزُّوا الدنيا يالولد الرَّهدْ
مات الغـُنا المحْشُود وحاتك يـَا الحُزُنْ ما عندُه حَدْ ؟
مطرُود وراك الريح تصفـِّر لا غمدت ولا رَقـَد
شايل همُوم النـَّاس وناسِي البيكَ يالولد العددْ
أصلـُه الغـُنا ان ما كان وحاتك للوطن مابيبقى جد
والحزن لو ما كان نبيل يبقى انهزام .. بحرًا شـَرد
محزون وحاتك يا ولد
صوتـك يرن في بالي حد
(غدار دموعك ما بتفـيد)
صوتك يجيني أنا في الهويد
(عبد الرحيم) و (حاج ود عجبنا) ونفحة العيد والجديد
كـُتْ في انتظار يومًا أشوفك فيه ساير بالنشيد
راجع تبشـِّر بالغـُنا الغنيتـُه في البلد البعيد
ويتلمُّوا ليك النـَّاس دمُوع الفرحة تـَطـْفـُر دون عدد
ويتلمُّوا ليك الصَّالحين يـبرُوك ويدُّوك المدَد
وتفضل تغنـِّي وتنشرح
لا غُربة لا الزَّمن الجرح
حقـَّـك عليْ يا مصطفى
وحقـَّـك علي البلد الوهبتـُه غـُناك والفال السَّمِح
هاكَ السَّلام من عندي انا
ومليون سلام ليك ياجنا
من الغـُبش
قايمين دُغُـش
كادحين علي اللـُّـقمة ْ العِصَتْ
صابرين علي الحَالـة ْ القِستْ
والحال وحاتـَـك ما هُو حَال
رَاجـِين رجُوعكـُم يالعِـيال
لا شيلة ْ لا كِمِّين ريال
راجـِين ضُراعكـُم يـِنكرِبْ
لا فـُرقة لا ريحَة ْ حَرِبْ
نبنِي الوَطـَنْ مَهْما خِـربْ
والسَّاعة دِيك يبقى الغـُنا اللا اتـْـقـَال ولا مَرَّة انـْـكـَتـَبْ
ممدُود من اللـَّحن القدِيم مَحْـشـُود وحاتـَـكْ بالطـَّربْ
مَـلـْيان وُمسْـنـُود ما بْيـَقـَعْ
مَعَجُون من العَرَقْ النـَّـقـَعْ
مِـنْ كـَمْ جبـِـيـن بي تـْصُبـُّه صَبْ
وتخضِّر الأرض اليباب يتبدَّل الزَّمن الصَّعـبْ
وُنفـْضَـل نغنـِّي وْ نـِنـْـشَرحْ
لا غـُربة لا الزَّمن الجرحْ
ودَّعتَ يا حُزنَ البـَـلدْ
ودَّعتَ يا لوَلد السَّمِحْ
| |
|
|
|
|
|
|
|
|
|
Re: مصطفى سيد احمد الذكرى الحادية عشر لرحيله صور لذكريات ونصوص وضعت لها فكرة لحن (Re: Omer Abdalla)
|
الأخ الكريم بدرالدين الأمير
ما أروعك و ما أوفاك وأنت تحى الذكرى الحادية عشرة لهذا الفنان
الشامخ المبدع الراحل المقيم الأستاذ مصطفى سيد أحمد.
كان مدرسة غنائية متفردة، يغنى بإحساس عميق وبصوت متميز متمكن.
ستظل يا ضلنا المرسوم على رمل المسافة وشاكى من طول الطريق
محفورة فى وجدان وذاكرة الإنسان السودانى
تخفف عنه عذابات الترحال والغربة بحثاً عن ظلاً يستظل به.
وستظل الحزن النبيل تسمو بوجدان الإنسان السودانى
تخفف عنه عذابات أحزانه التى اصبحت صديقاً دائماً له.
أخى بدر الدين هذا الفنان العملاق الذى فقدتموه بالدوحة
وفقده كل السودانيون بكل بقاع العالم
ومن بعده أيضاُ فقدوا وفقدتم أنتم بالدوحه
مبدعاً عملاقاً آخر الأستاذ هاشم ميرغنى.
فماذا فعلنا كشعب لهم ولأبنائهم؟
و ماذا فعلت الدولة فى حق ابنائهم وعوائلهم من بعدهم؟
أحسب أنه الإهمال!
لك وللمشاركين والقارئين تحياتى
نادر الفضلى
| |
|
|
|
|
|
|
|
|
|
Re: مصطفى سيد احمد الذكرى الحادية عشر لرحيله صور لذكريات ونصوص وضعت لها فكرة لحن (Re: نادر الفضلى)
|
Quote: هنا لا يفوتنى ابدا ان اثنى على الاستاز ود القرشى لسرده لنا فتره من حياة الراحل ومعاصرته
لكم كل الشكر وانتم تدهشونا بسردكم هذا
ولكم التحايا العطرة والامانى المرهفة
مره اخرى نسال اللة المغفرة والرحمه للفقيد مصطفى |
الغالي علي بازرعة
لك التحايا والعزاء لنا جميعا في فقد هذا الجبل
سنظل نذكره ... لا كيف نذكره ونحن لم ننساه
لك التحايا مجددا وأتمنى أن يسعفنى القلم لكي اكتب أكثر عن زكرياتي معه
ومنها قصة الكرز المطبوخ ....
| |
|
|
|
|
|
|
|
|
|
Re: مصطفى سيد احمد الذكرى الحادية عشر لرحيله صور لذكريات ونصوص وضعت لها فكرة لحن (Re: بدر الدين الأمير)
|
عودة أخرى سريعة يا بدر الدين فقد استوقفني نقلك عن فناننا الراحل لرده لك:
Quote: تعرف يا ود الامير انا لمن تستعصى عليا فكرة لحن
بمشى السوق وبعاين فى وجوه اناس فقط وماتحمله من تعابير وحالات
وبرجع القى التلحين عندى فى حالة تدفق |
فاستيقنت أن ما يجمعه بالأستاذ محمود غير حب السودان ويناير شيء آخر .. فقد ُروي لنا أن أحد محبي الأستاذ محمود كان كلفا برؤيته وكان لا يكاد ينقطع عن زيارته .. وقد هم الأستاذ بكتابة بعض الكتب الا أن حركة الناس عليه لم تدع له مجالا للكتابة .. فرأى بعض الأخوان أن يهيئوا له فرصة للتفرغ فدعاه أحدهم ليقضي معهم بعض الوقت في أحد القرى ثم سعوا لمنع الزائرين عنه فقبل صاحبنا ذلك على مضض .. ولكنه لم يقدر على مسك نفسه كثيرا فزار الأستاذ في خلوته تلك .. فرحب به الأستاذ كثيرا وسأله عن أحواله وعن سبب انقطاعه الطويل عنه فلم يجد بدا من شرح الملابسات واعتذر عن عدم استطاعته الالتزام بالتوجيهات وما قد يسببه ذلك في سير الكتاب .. فقال له الأستاذ: إنت قايل علمي دا بيجيني من وين؟ من مطالعة وجوه الناس !!!
عمر
| |
|
|
|
|
|
|
|
|
|
Re: مصطفى سيد احمد الذكرى الحادية عشر لرحيله صور لذكريات ونصوص وضعت لها فكرة لحن (Re: بدر الدين الأمير)
|
Quote: عمر
قبل ان اعود لباقى الاصفياء المتداخلين
هل تعلم ان هذه الحكاية التى اوردتها
على لسان الشهيد محمود كانت فى اربجى
اربجى الذى قضى فيها الاستاذ محمود مايقر العامين
واملا فيها كتابة الثورة الثقافية على ابنته اسماء
ومصطفى قد درس جزء من المرحلة الابتدائية فى اربجى |
شكراً يا بدر الدين، على المعلومة الأخيرة.
عجيب!!! الآن عرفت سر تعلقي الشديد بروحانية الأستاذ مصطفي سيد أحمد. لقد كان صوفياً، بكل ما تحمل هذه الكلمة من معاني ثرة. أنظر إلى تطابق نظرته مع نظرة الأستاذ محمود، أحدهما في التأليف الفكري والآخر في التأليف الموسيقي، كلاهما ينبع "فنه" من عيون الناس ووجوهم!! ما أبدع الأستاذ محمود محمد طه، وما أبدع الأستاذ مصطفي سيد أحمد.
أعرف أن القصة التي رواها الحبيب عمر تمت في أربجي. ولكني لم أكن أعرف بأن فناننا الراحل المقيم درس في أربجي. يكاد المرء يرى بعين الخيال أن الأستاذ محمود ربما داعب مصطفي وهو طفل، أو أعطاه قطعة حلوة مثلاً، أو ربت على كتفه، في فترة وجوده في أربجي، أو شئ من هذا القبيل.
أريد أن أقول بأن موارد السودانيين من التصوف واحدة، وهي في حالتنا موراد نيلية ممزوجة بدم الزنوج الحار.
من علامات صوفانية مصطفي سيد أحمد أنه وصى بأن تتم الصلاة على جسده الطاهر في معهد الموسيقي والمسرح. وتم تحقيق الوصية، كما أشار بذلك الأستاذ عثمان موسى في قصيدته بعاليه. الصوفية وحدهم كانت لهم جرأة كسر المألوف من العادات، ونسج غير المألوف في منوال العبادات..
لقد كان مصطفي عبقرياً يستمد عبقريته من الإطلاق، ومن حب الله المطلق لخلقه، سعيدهم وشقيهم، إذ ظل يستل الحب والفرح من بين مسامات الكره والأحزان.
لله دره من ولي!!
| |
|
|
|
|
|
|
|
|
|
Re: مصطفى سيد احمد الذكرى الحادية عشر لرحيله صور لذكريات ونصوص وضعت لها فكرة لحن (Re: Kostawi)
|
الى مصطفى في علياءة
عليه رحمة الله ورضوانة
طالما هو حاضر معنا
كتبت النص في الذكرى العاشرة الى رحيلة واسمحوا لي باعادته هنا
في ذكري رحيلك يا مصطفى تاكلنا الغربة ويسافر بنا مد الغيم الى المجهول
نكبكيك ام نبكي انفسنا وضيق الحال؟
ام نبكي" الشجن الاليم" "ما بين خاطر" "وحزنك النبيل"؟
"وبنفتش عليك في المنفى"
وفي "مطر عز الخريق" "وطيبة" تكاتل المشوار علي نار الجرف "طورية متكية"
"نكر صوتك صداك" "واتبرجت غيمة" "نهار شوقنا" ومشاويرنا الصباحية
وانت النيل
وكنت قبيل
دعاش الفرحة لي "طيبة" و" ود سلفاب"
و وسط الدارة "ترقص فوقا صقرية"
تنادي الشفع التلعب مع "نوره"
"وعجنا" الكان بدقوا كرامتو فجرية
و"عم عبدالرحيم" بشهد هوان الحال
وضيم الزول وقت ترزم
خيوت الفجعه فوقو تموت
"تغرد فوقو قمريه"
"مداين" تبكي في المجهول
وفرحة زول
"بيحلم زي مراكبية؟
تكابد "ضلنا" المغشوش علي
"شعر البنية سقف
وايدين الرجال رصاص" بيوقد لي النهاريه.
بعد "عزّ المزار" والنيل بقاوم في جيوش الهم
ويسال عن صلاح الحال
يرتب "مريم الاخرى" ويصاحب لي الخدرجية
بعد "مطر الحزن عاود"
ورشة الدنيا بي سيلو
"بقول غنوات"
"ونشوة ريد"
تقالد بت فرايحية
وقت وقف النهار بالليل
تجي "البت الحديقة" كمان
"وتبكي وجيدة طعنة سيف"
وفي" الزمن الخرافي" تخت
حتة فرحه ورديه
علي "قمر الزمان" تحلم
"علي عينيك تصاوير الغنى" المسفوح
و"عباد الشمس" بشهد
"بحيض النيل" ويملى رعافو كورية
"وخوازيق البلد زادت"
"عجاج البحر" سده الغيم
معاك "ضليت" وضلت فرحة مخفية
مع غيبتك... حزنت نامت الخرطوم
بعد ما "عدى فات"الحال
دعاشك من سماء امدرمان
وتاهت "سمحه سمرية"
وانكسر الشتم بالليل
وضاع النيل
وقال "اتدفقى" الاحزان
"ويا ضي شبابك البيوت" انسد
وسكّت لي الصنايعية
ويا" صابرين" علي جمر الحزن ابكو ا
وبكي سماكا يا السودان
عشان" قمر الزمان" اضحك
يدق مزيكة" حورية"
صحي" ابداك انا ومن وين" ؟
وانت معانا جوه الروح
محل مانروح
وفيك ارواحنا متكية
"وبراك واقف" "هردتا لهاتي" قالن ليك
"سحابات الهموم" يوم جن
"علي بابك" يعزنك بعد ما سابن الجيه
و"سافر" في "زمن بيروح"
شعاع "عينيك مدن"تحلم
في" لحظة شهقة" نص الجوف
و"ميلاد حب" يغالط في السماسرية
ودفرة وجعة تمصر ليك
مشرع الحلم الفسيح وتصر
وشيشا في "طريق الليل"
بسكّت دمعة محرية
وقالت"ماشقيتك" يوم ولا استنيت
"صديقي الاول" المسكون
وساكن في" استلاب" الغيب
ويشتل غنوة وردية
علي "غربة ومطر" و"سحاب"
عشان "اديني احساس" زول
همو علي وطن مهموم
ونفسو تقولو في"نفسي ..في داخلك اعاين" ليك
بعد تميته وردية
وجايي تسكت الشفع
ومن "عزار دموعك ديك"
تقش ايديك عشان تقدر تعاين ليك
وايدك ماها ملويه
رحلتا وسبتا دنيا الهم
بترقع في يباس الحال
علي" لوحة وطن" مجروح
وصوت مبحوح
بعد عيشة الرجال مسخت
وعاشت غربة ابدية
وقالت "يا سلام منك" رحلتا حلاص؟
وسبتا الدنيا لي الاغراب
بعد ما ناح غراب الشوم
ودقا نحاسو زندية
وجاطت فينا ريحة الخوف
وعربد في صحاري الروح
ضجيج الوجعه ينده ليك
ويشحد ربو حرية
تلامس لي سما ارضك
عشان افرح سما الخطوم
بعد "عز المزار" في الضي
نشف ريق البنادرية
نحبك انت مافي وفي
لانك في
وبس بكفي
وجودك في مدى الاحساس
ونارك ماها مطفية
وطعمك ببقى زي ما هو
"مداد ارضك""شليل الراح"
وحزمة ناس تشنق الليل
تخلي الساحة مضوية
عبدالله وداعه الامين
لندن .17.01.2006
| |
|
|
|
|
|
|
|
|
|
Re: مصطفى سيد احمد الذكرى الحادية عشر لرحيله صور لذكريات ونصوص وضعت لها فكرة لحن (Re: Osman Musa)
|
رابطة اصدقاء مصطفى بالعاصمة السعودية الرياض
كانت وتره السداسى واخضرار الامل لديه رهط من الصفاء والاصفياء
الرشيد بهلول - ازهرى الحاج - د,احمد- عبدالحليم ليمو - ياسر عبدالواحد
د.محمد عثمان الجعلى - عبدالحليم حامد نعيم - نجم الدين على حسن - محمد عبدالرحمن
عادل حجر - حمزه النميرى - نجاة عثمان - صلاح وديدى - مامون حسين -الراحل معتصم جلابى
وبقية اخرى من هذا العقد الفريد لا تملك غير ان تنحنى لهم اجلال ومعزة وبادائهم لعمرة
جماعية لروح مصطفى جسدو سابقة فى الصداقة يؤرخ لهاوقد كانو الاكثر حرصا على نشر اعماله الجديدة
وتسويق تسجيلات الحفلات بشكل علمى وقد اخرجو لنا الجزء الاول من سلسة اغنايته( فجر المشارق)
| |
|
|
|
|
|
|
| |
بدر الدين الأمير
Elmosley
khaleel
معتز القريش
عبدالكريم الامين احمد
Mutwali Malik
Salah Waspa
mahdy alamin
-1.jpg)
معاوية الطيب
محمد أبوالعزائم أبوالريش
عبد المنعم سليمان
خضر حسين خليل
Adil Osman
طارق جبريل
nadus2000
نادر السوداني
Mutwakil Mahmoud
Abdul Monim Khaleefa
Bushra Elfadil
Kostawi
نجوان
بهاء الدين سليمان
Osman Musa
abdalla elshaikh
معتصم دفع الله
abdulhalim altilib
Yassir Tayfour
Haydar Badawi Sadig
Omer Abdalla
نادر الفضلى
مهلب خلف الله القريش
Alsa7afa_30
السنجك
عبد المنعم سيد احمد
عبد اللطيف عبد الحفيظ حمد
زياد جعفر عبدالله
فيس بوك
تويتر
انستقرام
يوتيوب
بنتيريست