هل خلاف وجهات النظر (يبيح) لنا (فط) بعضنا في الردود؟

Quote: العزيزة لنا بقيت ما براي .. انا والله فطتى ليها ضل.. وعاملة لي عوارة جوف ما بتتحك على راي حبوبتي.. انا فطوني وعمت عديييل في الفط.. كنت جديدة على المنبر، يعني زي شهرين كدا.. دخلت على بوست اشيل واشكر في سيدو/ستو (ما دايرة افصح عن جنس الفاط) المهم هو/هي كان بيستحق الشكر (دا رايي قبل وبعدالفطة).. علقت وحاتك .. وجاء بعدي واحد علق.. ردوا على العلق بعدي والكلام دا مثبت باليوم والساعة، المهم جات الفطة المقصودة ولا غير المقصودة وقعت في انا.. قاعدة مقهية شهر كامل مستنية الرد ما ردوا على والبوست (حتل)..وحتل معاهو البرستيج والسيلف ستيم بتاعي.. طبعا مفرود تلك الفطة كان قاسيا على .. تعرفي ليه؟ كان البوست بتاعي"لوطنة العالم" شغال جديد، والناس بين قلة قبلانة ومؤيدة واخرى رافضة.. يبدو ان زولي/زولتي كانوا من القلة الرافضة المغسة الفاطيني دا كتاب ونفسي اتداخل معاهو بس والله الفطة واقفة لي زي عضم اب قبيح في حلقي لي يوم الليلة.. اخيرا جاء الرد والعذر معاه.. ماشين سوا..بعد ثلاثين يوما حسوما. الفطة التانية كانت اخف من دي.. (عشان جلدي تخن واخدت مناعة في الفط) واحد فاتح بوست في كاتب عملاق.. غزيت البوست اكتر من تلاتة مرات .. ما اشتغل بي شغلة.. وحاتك خلا البوست حتل لي يوم الليلة ما ظهر واظنو اتارشف ذاتو بعدها بقيت زي الاطرش (نص كم) في الزفة.. مشاركاتي قاصرة على بوستات معنية واسماء معينة..ناس تتشاكل .. تحرق ..تغرق سادة دي بطينة ودي بعجينة.. ضد رغبتي تماماَ.. اصلو بيني وبينك عُوَّارة الجوف دي ما في طريقة حك ليها.. وبس ... بس والله كانت هناك احلي فطة تداخلت في بوست الترحيب بالشاعر العظيم فضيلي جماع..(القصة هنا ح اقولها عديييل) وكان عدد زوار البوست كبير.. وسقط اسمي اقول سقط لان شاعرنا العظيم الذي اكن له كل الود.. بادر بارسال ايميل يعتذر فيه بشدة عن الخطأ الذي حدث..مع اني يشهد الله لم اتوقع منه هذا التصرف الذي اكبرته تماما.. صحيح انا لم اتداخل في قصائد فضيلي.. لاحساسي بانني لن اضيف شيئا جديدا.. بالرغم من متابعتي اللصيقة..واعجابي الذي يمنعني من المشاركة.. بس ناوية اتغلب عليهو واشارك ولومرة بالتعليق على قصائد ذلك الرجل الذي عطر سماوات حياتنا.. فتك بعافية المفطوطة

وبعد تجربة حليمة الحبيبة مع ال(فط) أنام قريرة العين هانئتها ..