♧ شَوارِدُ من حَظيرةِ بِنْتِ عَدْنانَ (3)£

/ جدري الشمومة/
الليلة الأسد جاي من جبال الفيل
بشّمشم بكوس بسأل من العنتيل
يا رحل الكحل الديمه وزنو تقيل
يا جدري الشمومه الزول تشقو عديل
والليل بابي ليل العوبة يا نديمه
عندنا خاصة في البوادي والأرياف نستخدم كلمة كرف بمعنى شمّ،
أو تشمم ، خاصة لما يجد الإنسان روائحَ طيبةً، كروائح الأمطار و ما
يسمى (الدُّعاش) فيقال فلان يتكرف، والبهائم كرفن ريحة البرم، وكذلك
إذا شم رائحة غيرَ طيبةٍ، والكروفة هي الشمومة. فعمومًا هي بمعنى الشم،
وعلى كل حال هي بهذا المعنى فصيحة، قال في #لسان_العرب:
كرف: كرف الشيء: شمّه، وكرف الحمار إذا شم البول ثم رفع رأسه
وقلب شفته، وأنشد ابن بري للأغلب العجلي:
تخاله من كرفهن كالحًا**وافتر صابا ونشوقا مالحا
وكرف الحمار والبرذون يكرف ويكرف كرفا وكرافا وكرف:
شم الروث أو البول أو غيرهما ثم رفع رأسه
* و لا بأس أن نخوض في السياق بشيءٍ من الإسهاب
و لدينا هنا منـــاحـــة (الواعي ما بوصـوه)
شــاعرتها الكنداكة (بت مسيمس), و من أداء:
الفنان الشعبي الراحل / بادي محمد الطيب.
الواعي ما بوصوه من أمس الضحى
تورى أب قرون ساقوه يا مقنع ولياتو
الواعي ما بوصوه الفتح الدرب خلى العريب يمشوه
************
غنيت بجيب مسدار
المكنه بتكاكى جنك مدافع النار
يا قصر الرجال اللي الفقر عصار
يا قصر الفراسه اللي الضلع كسار
يا نار الزبل الما بندركلك حال
يا رحل الكحل لا بتنزاح ولا بتندار
عوج الطنضبه الما بتعدلو النار
درعولو أم خريز العسكر الزنهار
مأمن بالقماحه اتقدلت ليك برجال
***********
الليله عليك غنيت
بلع الألف كلو قال ولا استكفيت
يوم جوك للحرب لا سخيت ولا ضليت
صامت بالقماحه أتفرشت واتغطيت
دا تور الجواميس العليهو الرك
دا عقد الحديد لى الحلبى ما بنفك
دا سم الغدور الفى الحلق عشرق
منو غيرك دق فى الحراجه مدافع الحق
***********
الليله عليك غنيت يا مطرق الجراح
قلت ليهم عشارى مسكو يفوح
ما ختف البدينقا وما جفل مجروح
بلع الألف كلو درب الجبين مطروح
جابوك بى أم خريز الزدخانه تفوح
سيفك بشيل الفقر ومعاها ملاح المخ
***********
من كوجه وكجيج لي عند بلاد العين
جابونا الضحى في مركز الكامنين
الأهبل يقول أدوه عشره سنين
والعاقل يقول حكموا عليهو بسنتين
وكتا جانا الجنا الطبق الجنيه في أتنين
كملت العمد والمشايخه وحلانين
********
ابشر يا صقر ما تكتر الحلقان
تأكل ليك مطايبا ما لحم سخلان
تأكل في المطايب ما لحم عيران
تأكل في المطايب فوق ضهر سلطان
تتغدى وتفوت كبده وكلا ومصران
شن منك نقول لامات عقيد مرجان
********
تكلم يا لساني تكلم المنطوق
عن مدافع الحق الفى مشيها بروق
قال قاسم اليمين كان اليمين مطلوق
زى كاسر الأسود ما بشنقوه في السوق
شـــرح للكلمــات :
يا نار الزبل الما بندركلك حال:
نار الزبالة حيث أنها لاتنطفئ بسهولة وتكون متقدة لفترة طويلة ...
يا رحل الكحل لا بتنزاح ولا بتندار :
الرحل هو ما يحمل على ظهر البعير من قفاف وغيرها أو هو مكيال حمل جمل ....
والكحل وزنه ثقيل جد ويصعب رفعه عل ظهر البعير إذا امتلا به الرحل
قالت الشاعرة ...
الليلة الأسد الجاي من جبال الفيل ...... بشمشم بيكوس بيسأل من العنتيل
يا رحل الكحل الديمه وزنو تقيل ...... يا جدري الشمومه الزول تشقو عديل
عوج الطُنضبه الما بتعدلو النار :
طنضب هو الطندب وهو شجر أعواده قوية .... ودائما تعرض الأعواد المعوجه إلى
النار لتعديلها حتى تكون مستوية ولكن عوج الطندب لا تؤثر فيه النار ......
درعولو أم خريز بأم عسكرا زنهار :
أم خريز هى حبل المشنقة وزنهار اى منتبه وواقف زنهار اى واقف انتباه ...
قال المغنى ... واقف زنهار ياعلى ... فارس حار يا على
وتقصد بت مسيمس إن من نصب المشنقة هم العسكر المنظمين ...
يا جدري النزيله الفرزولو البيت :
جدري النزيلة : النزيلة هي من الجوائح التي تنزل
بالناس قال احدهم ... يا جدري النزيله اللي جلود رشاح ..
الفرزولو البيت : قديما كان كل من يصاب بالجدري يعزل في بيت بعيد عن
القرية حتى لا تنتقل منه العدوى للآخرين .. ولقد وصف الرحالة لويس
بوركهارت عزل المصابين بالجدري في بيوت بعيدة عن قرى النيل في شمال
السودان وكان ذلك إبان زيارته سنة 1812 م....
الحراجه : سوق الحراج أو سوق المزاد والدلالة قال الشكرى ... الما اتلتلت
في سوق الحراج مجلوبه ... الجدير بالذكر إن ود حبوبه شنق في السوق ....
قلت ليهم عشارى مسكو يفوح
ما ختف البدينقا وما جفل مجروح
العشارى : هو التمساح
بدينقه : نوع من حراب الصيد يستعمله صائدو التماسيح يربط طرفه بحبل أو
خيط قوى قال احدهم ( نفسك مسك الخطف البدينقه وفات) والبدينقه أو الكوكاب
هي الحربة او الرُّمح له سِنَّن متخالفان بحي إذا غرز في اللحم يتمكلن منه فلا يمكن
نزعه غلا بشق الانفس و الكناية هنا، تقول بت مسيمس إن ود حبوبة كان أشجع
و أقوى من التمساح حيث انه لم يخطف البدينقه و يجفل (يهرب) لينفد بجلده .