|
|
 Re: فاطمة أحد ابراهيم 00 (العرجاء 000 لمراحا) (Re: mansur ali)
|
أخخخخخخ .. كنبت كلام كتير .. نصو نبذ وسخرية .. لكن راح في حق الله.
أولا: يبدو لي انو في حاجة غلط حاصلة الليلة في النظام الكوني .. لأني لقيت نفسي هنا بالذات في البوست ده متفق مع بشاشة .. رغم اختلاف زوايا الرؤية.
ثانياً: الكلام الخارم بارم الكاتبو عطبراوي ده لا قيمة له .. ويجب الا تكون له أية قيمة لاي انسان عارف نفسو انو من العالم التالت .. ومن السودان تحديداً .. حيث الصراع الأزلي حول الكلأ والمرعى ما زال حياً .. والمدافسة للفول والبوش من سمات أهل الحضر في بلادنا التعيسة.
تالتاً:اكره ما اكره في حياتي .. هذه المصطلحات البلهاء: ذكوري؛ انثوي؛ جندري .. الى آخر العنقود من الرطانة. آكرهها لأنها لم تنبت قط في تربة العالم التالت كلو .. وبما أنها مصطلحات ذات شحنة اجتماعية .. فمن البديهي انها ولدت في مجتمع آخر بصورة طبيعية نتاج تطور ذلك المجتمع حضارياً وثقافياً ووووو. المصطلحات الاجتماعية تختلف عن المصطلحات العلمية التي لا تحمل اي مدلول مجتمعي. المجتمع ده يا عطبراوي التعامل معاه بيحتاج وعي كبير.
رابعاً:الاستاذة فاطنة (احب كتابتها هكذا) جندت نفسها لخدمة المرأة لمن كان عطبراوي .. وأنا .. وبشاشة .. وجيلنا ده كلو .. في رحم الغيب. كيف يجي واحد قرأ ليه كورس أو كتاب كاتبو واحد بيتكلم عن مشاكل مجتمعو .. ويقوم يبلع المفردات اللقاها في الكتاب أو الكورس المتعوس ده .. ويجي يجربها في فاطنة؟ بقصدك انت يا عطبراوي. شنو يعني عقلية ذكورية ومجتمع ذكوري؟ يا سلام. أها لو الله هون وكلامك ده كان من صادق ضميرك .. بعدين حتجيب لينا موضوع عن العقلية الانثوية لمن مرادك يتم؟ من وين جات حكاية مجتمع ذكوري وعقلية ذكورية دي؟ ومن وين جات قضايا الجندر الغريبة دي؟ ومن وين ظهرت حركة الفيمينزم وبدت تتغلغل داخل الحركة النسائية وتسيطر عليها .. زي ما قالت فاطنة؟
خامساً: الحركات دي كلها جات ووراها مبرر معروف لاي زول لسع محافظ على ذمتو. دي حركات افرزها المجتمع النشأت فيه كنتيجة شبه طبيعية لمرحلة التطور الوصل ليها المجتمع المعني .. وحتى في المجتمعات النشأت فيها .. نشات حركات مناهضة ليها .. وكل اليمين الأمريكي والاوربي مناهض للحركة الشاذة دي.
سادساً:الكلام القالتو فاطمة كلام خطير للغاية .. وما مفروض اي زول بيعوم في البر يجي ينتقد كلامها .. لانو فاطنة ما جابت الكلام ده بدافع العبث أو الهوى. هي عارفة بتعمل في شنو من قبل ما يلدونا نحن .. وبالتالي تقييمها لما يحدث مفروض ناخدو زي ما هو. ايوه زي ما هو .. بدل نشن عليها حملة نجرب فيها عدتنا المصطلحية الحفظناها من الكتب .. من ذكوري وخلافو.
سابعاً: من المعايشة البسيطة .. لاي زول عاش في دولة غربية أو ذات ثقافة غربية أو متغربة أو مجيقنة أو مخلقنة .. بيعرف انو حركة الجندر من بدايتها حركة غريبة وشوية شوية اصبحت ملاذ للفيمينزم .. وده شيء لو انت يا عطبراوي ما شايف فيه خطر .. يبقى على الدنيا السلام.
سابعاً: الليلة يوقفني الله. أحفظ كلمة للأخ بشاشة .. وأنا اصلاً الكلمة دي موجودة في جرابي .. بس لأني ما بريد بشاشة ده .. ما علقت عليه لمن قالها .. رغم اني اتكيفت كيف ما عادي. الكلمة هي: أي سوداني ما ممكن يكون علماني بمعني المفهوم. يعني أي واحد يعمل فيهاعبد الظمبار بتاع الحداثة الإلحادية والحاجات التانية المخلقنة دي .. ده قطع شك بيصارع في نفسو هو. السودانيين بالذات مهما حاولوا تقمص ايديولوجيات خارجية .. برضو دواخلهم بتكون دينية من نوع ما .. صوفية في أغلب الأحيان. والكلام الدراب البيقولوه الجماعة المثقفاتية بتوع الجندر وتحرير المرأة كلام سطحي جداً .. واي واحد بيتبنى المواضيع دي بتلقاه هو أصلاً عدو للمرأة .. بيسعى لتسليع المرأة وإباحتها لشيء في نفسه .. وبعد يحصل عمرو كم وخمسين سنة .. يمشي يشتري ليه سبحة ومصلاية ويجي يقعد في البيت أو الجامع.
تامناً: الحاصل انو فاطنة ما كانت في يوم من الايام مصابة بخدر ذهني. كانت وما زالت واعية بالأهداف السامية المفروض تتحقق للمرأة. أها الشغلانة جاطت .. وركبن فيها واحدات قالن كلام كُتُر ما بينفع مع المفهوم الاصيل بتاع السودان والعالم التالت الجيعان عن تطوير المرأة وتحريرها. فاطنة استاءت من الموضوع ده بحكم احتكاكها المباشر بالواقع النسوي التنظيمي .. وانتقدته عن علم .. فما الذي يبيح لناس عطبراوي عشان يجربوا فيها فن اللتيق بتاع الكلام الخارم بارم؟
تاسعاً: اي موضوع بتاع ذكورية وخنوثية ومش عارف ايه .. ده موضوع بائس .. إذا كان الكاتب من دول العالم التالت الجيعانة الما قادرة تحل مشكلة الفول. واي واحد عامل فيها بقى من المتخصصين في الجندر .. أحسن يغير تخصصو للجردل .. لأن الجردل في العالم التالت الجيعان له أهمية أكبر بكتير من رطانة الجندر دي.
عاشراً: للمثقفاتية الغافلين .. السودان بلد رعوي . رعوييييييييييي .. واي كلام عن المجتمع الذكوري ده بيعتبر كلام زبد. وحكاية الفيمينزم دي اللهي احتلت حركة الجندر .. لو اتبناها اي واحد من العالم التالت .. أو من السودان تحديداً .. ده زول داير ليه دفرة في علم تطور المجتمعات. يعني لازم كسر رقبة كده نبقى عالم أول؟ انتو ضهبانين ضهاب ما حصل .. أو حربويات عاوزين تلعبوا بضنبّاتكم.
حدعشراً:نرجع لفاطنة. قد اختلف كتير مع فاطنة .. لكن دايماً بؤمن بأن الجوة الموية ما زي البرة منها .. والخباز هو الأدرى بخبز العجين .. والميكانيكي هو المرجع الأول والأخير في التحدث عن خفايا الماكينات والعربيات .. وفاطنة أحمد ابراهيم هي الخبير الأول والأخير في التحدث عما يجري في داخل الحركة النسوية. أها جات وقالت الشغلانة جاطت .. يقوم العيال يسلوا ليها سيوفهم بدون أدنى معرفة بحقيقة ما يجري؟ لو في اي نوع من الوعي بمتطلبات مجتمعنا التنموية يجب أن نقف كلنا صفا انتباه وناخد كلام فاطنة ده كناقوس خطر للمصيبة الجايانا متخفية في ثياب جندر وحقوق مرأة. أما الذين في قلوبهم مرض أو في عقولهم انفصام أو فيهم جهل بحقائق الثقافات وتطور المجتمعات وافرازات ذلك التطور .. فليرموا فاطنة بما عثروا عليه من مصطلحات لا هم يعونها ولا مجتمعهم الرعوي المتخلف يحتاجها البتة.
اطناااااشر: بشاشة .. أنا اتفقت معاك بخصوص فاطنة .. وده حدي معاك هنا. وانت يا عطبراوي .. كلامي ده ما تاخدو باعتبارو عدواني .. ده كلام أنا بؤمن بيه .. وبقولو بحسن نية وقلب ابيض زي الحليب بتاع بطانة داك. بس عليك الله ياخي ابعد من فاطنة دي .. وبالمرة كده ابعد من الكلام الخارم بارم .. لانو المصطلحات دي ما بحبها إلا زول راكب قطر الفاشر وفاكر انو ماشي القضارف.
طلطااااااشر: العفو يا اخونا عطبراوي. ويا بشاشة .. إن شاء الله تاني ألقى لي حاجة بتفق معاك فيها .. عشان شوية اتنازل عن نيتي اني اخنقك خنقة القرد الأكل الدريش.
والسلام عليكم
|
|
 
|
|
|
|
|
| العنوان |
الكاتب |
Date |
| فاطمة أحد ابراهيم 00 (العرجاء 000 لمراحا) | atbarawi | 04-15-04, 08:27 AM |
| Re: فاطمة أحد ابراهيم 00 (العرجاء 000 لمراحا) | اساسي | 04-15-04, 09:34 AM |
| Re: فاطمة أحد ابراهيم 00 (العرجاء 000 لمراحا) | elmahasy | 04-15-04, 09:50 AM |
| Re: فاطمة أحد ابراهيم 00 (العرجاء 000 لمراحا) | esam gabralla | 04-15-04, 10:37 AM |
| Re: فاطمة أحد ابراهيم 00 (العرجاء 000 لمراحا) | mansur ali | 04-15-04, 11:37 AM |
| Re: فاطمة أحد ابراهيم 00 (العرجاء 000 لمراحا) | Ibrahim Algrefwi | 04-15-04, 12:20 PM |
| Re: فاطمة أحد ابراهيم 00 (العرجاء 000 لمراحا) | مراويد | 04-15-04, 01:07 PM |
| Re: فاطمة أحد ابراهيم 00 (العرجاء 000 لمراحا) | atbarawi | 04-15-04, 04:30 PM |
| Re: فاطمة أحد ابراهيم 00 (العرجاء 000 لمراحا) | الواثق تاج السر عبدالله | 04-15-04, 04:50 PM |
| Re: فاطمة أحد ابراهيم 00 (العرجاء 000 لمراحا) | Bashasha | 04-15-04, 11:37 PM |
| Re: فاطمة أحد ابراهيم 00 (العرجاء 000 لمراحا) | atbarawi | 04-16-04, 03:16 AM |
| Re: فاطمة أحد ابراهيم 00 (العرجاء 000 لمراحا) | mansur ali | 04-16-04, 02:45 PM |
| Re: فاطمة أحد ابراهيم 00 (العرجاء 000 لمراحا) | Shinteer | 04-16-04, 09:56 PM |
| Re: فاطمة أحد ابراهيم 00 (العرجاء 000 لمراحا) | Adil Ali | 04-17-04, 00:53 AM |
| Re: فاطمة أحد ابراهيم 00 (العرجاء 000 لمراحا) | Bashasha | 04-16-04, 11:14 PM |
| Re: فاطمة أحد ابراهيم 00 (العرجاء 000 لمراحا) | atbarawi | 04-17-04, 03:51 PM |
| Re: فاطمة أحد ابراهيم 00 (العرجاء 000 لمراحا) | Bashasha | 04-17-04, 08:27 PM |
 Re: فاطمة أحد ابراهيم 00 (العرجاء 000 لمراحا) | الجندرية | 04-18-04, 12:18 PM |
| Re: فاطمة أحد ابراهيم 00 (العرجاء 000 لمراحا) | farda | 04-18-04, 05:52 PM |
| Re: فاطمة أحد ابراهيم 00 (العرجاء 000 لمراحا) | Roada | 04-18-04, 08:54 PM |
| Re: فاطمة أحد ابراهيم 00 (العرجاء 000 لمراحا) | Shinteer | 04-19-04, 07:27 PM |
 Re: فاطمة أحد ابراهيم 00 (العرجاء 000 لمراحا) | ترهاقا | 04-19-04, 09:13 PM |
| Re: فاطمة أحد ابراهيم 00 (العرجاء 000 لمراحا) | الجندرية | 04-20-04, 06:17 PM |
|
| |
Shinteer
فيس بوك
تويتر
انستقرام
يوتيوب
بنتيريست