▪ مَنْ هُوَ قائِلُها £

♧عنجهية خصام و ندالة£
(مرة أخرى مادة مسروقة من الدكتور الظريف الثوري علي الكوباني حول راهن الأوضاع، أرجو الدعاء له بالشفاء فالرجل طريح الفراش منذ مدة طويلة فاسألوا الله ان يشفيه ويعافيه)؛ قال:
• سألني واحد طاعن في السن من العاملين فيها شباب وقال لي (يا عمو) انت مقولة "(الاختشوا ماتوا" دي اصلا قصتها شنو؟ أول حاجة قلت ليهو بركة الما قلت لي يا جدو، اول شي يا زول..لمن يكون الشاسيه بتاعك كبير (8 شنكل) وتكون طول وعرض وكمان الغلاف بتاعك مش ولا بد ودِشِن😏..قصة عمو وخالو دي معاك ما بتجي.. وما لايقة عليك وبتخليك زي الفيل اللابس مايوه🙊)😅

• حكاية الاختشوا ماتوا طلعت لما في حلة كانت قطاطيها كلها مبنية من (القش)،
وقامت فيها حريقة عاتية والناس نيام، وأي زول عايز ينجو من الموت كان لازم يجري ويطلع من القطية، والناس الكانوا نايمين بملابس النوم الخفيفة او الداخلية او (امفكو)، يعني "مولاي كما خلقتني🙈، الكانوا منهم "ما بخجلوا وما بختشوا" اتخارجوا جري طوالي وما هماهم التعري، اما البختشوا والقعدوا يفتشوا في ملابس تسترهم وبعدين يطلعوا
من القطاطي..ديل طبعا ماتوا حرقاً..😰

• على مر التاريخ لم تنطبق هذه المقولة بصورة فعلية الا على الكيزان القاعدين
(امفكو) بعد ثورة ديسمبر العظيمة مثلاً: يصرح رئيس حزب الكيزان المكلف بأنه ثبت
ان العقوبات الامريكية ما كانت ضدهم ولا ضد رئيسهم بل كانت ضد السودان وشعبه!!
اجي ياااا ناس الطاغية "الامريكان ليكم تدربنا"..😏 نسيتو الجعجعة الفارغة وقلة الادب القديتوا بيها راس الشعب.. وما خليتوا متطرف وارهابي من كل العالم ما لميتوا في سودانا المسكين ده، لكن بعدها فهمتوا حاجة وأتضايرتو لما عرفتوا الخواجات بلقطوا وببيدوا الارهابيين بالدرون (الطيارات المسيرة) صقع بلاي استيشن بس😰 ..
-و خد عندك التحقيقات بدت لمن لقوا (فرِت) كوز وااحد عند 400 قطعة ارض..ياااخ قال ليك كان مفروض يعمل حلة حقتو عدييل ويسميها (كوزواتيا)🙊😅
- و خد عندك ان يقوم الكيزان العواليق الاصلا البشتنه حقتهم بس طلِع منهم (ميسي😜) وكمان معاهم واحد صحفي قال كان كوز وتاب.. واظن الضرس تاورو😏 يقوموا بالسخرية من لبس د.حمدوك لقميص نص كوم وقال ايه (بدون بدله) عند تفتيشو لكركون الشرف في الفاشر. تقول ما شافوا لمن رئيس وزراء كندا وكل رؤساء العالم كيف بلبسوا خفيف (كاجوال) في الرحلات الداخلية ..واصلا ما مفروض يكون في استقبال حمدوك كركون شرف (وحركات الجيش دي).. لانو ده ما ضيف ده رئيس وزراء وجاي لشغل جوه بلدو ..مفروض توقف مثل هذه الممارسات التي هي في الاساس (مشاريع لتربية الطغاة).. ياااخ جستن ترودو او اوباما كانوا لمن يزوروا ولاياتهم..بمشوا بتغدوا في ماكدونالدز مع الشعب..
واصلا البهدله والبدل الكبيرة الزي (البردلوبه) ما شفناها الا عندكم وكمان مرات بتكون مزررة غلط🙊)
ـ وخد عندك..هسه كمان طالعين لينا بقصة اطلاق القمر الصناعي السوداني من الصين ودا تم التعاقد عليه منذ 5 سنوات، طبعا بالدين😰.. بلد دخلت في العشرين سنة الفاتت 179 مليار دولار من البترول والذهب والمعادن… .الخ وتجي تلقى (الرد السد) ذااتو طلع بالدين، حالو وحال شارع بارا أم درمان (الاتماص زي حلاوة قطن) مع اول مطرة وعقاب سيل
جدعة اخيرة:
• يا حمدكة يا أصلي و السادة الوزراء الكرام ويا ناس قوى الحرية والتغيير شايفكم شغالين لكن بمهلة وعلى الراحاات، وبعدين الناس معصورة في معيشتها ومزنوقة شديد، وصابرين عشان انتوا خيارهم والمدنية حقتهم، لكن الصبر مع الجوع ما بجي..وكونكم خليتو اعداء الشعب مفكوكين وكمان بكل الغلة السرقوها حيحاربوكم اقتصاديا تحت تحت..انكربوا شوية وادوا الني للنار..وجاييكم يوم 19 ديسمبر المجيد..يا بقت مليونية احتفالية ببعض انجازاتكم بمحاربة الفساد والقيام بشي من الاصلاحات او المصيبة تبقى مليونية "تصحيحية"، وتاني تكون راحت سنة شمار في مرقة من عمر الثورة😢