▪ مَنْ هُوَ قائِلُها £

♤ ربي يمتعكم بالصحة و العافية . اكن تعال آجنا البقولوك ود (التاي)
دا نطقو الصاح عندنا كدي لو زول حواشات من ضهارينا. علا أصبر قوتا
لي المعنى بترضعو البقرات تشاركوهن؟ لا عاد دا علا المتلاب و لا (الورل).

♤ ياخي لسة ما انفض سامرنا من مجلس الخليفة ود تورشين.كلما الواحد
يجبد لسانو تقول بترترلوانا سكر في شلاليفنا تقو نقابض.كدي نرجع لحكاية
عمي الكنقار مع تمرجي الحيرة (البهيمة) الاتهمو زورن و بهتانن بالسكري.

♤ ذكروني واكدة قديمة كتبتها بعنوان ورني بولك بوريك كوعك من
بوعك .. و بشخص ليك الD.N.A بتاع عائلتك عن بكرة أمها و أبيها)!
فدا عمن لينا يوم ماشي مطلش في الملجة قام عتر وطالو قشرة موزاية
سحسحت بو مرقتو في السقط لقط. غايتو لوما ربك لطف و لحق سند في
شباك محكمة العُمَد و مسك في بوابة عبد القيوم والطابية المقابلة النيل؛ كان
توشك الموية إلا يلقع في خور الكبجاب جنب القماير. لكن وقع كسر كوعو.

♤ بس، و من هناك قام فللي جاري لا يلوي على شيء وصل مستشفى البلك.
قال للتمرجية: أنا داير أقابل الدكتور! التمرجية مقلفصة : من آخر شلاضيما :
قالتلو :عايزين عيّنة من البول لو سمحت ! عمك باستغراب شديد : عشان شنو
عينة بول يعني؟! و شنو كمان دخل البول بكوع إيدي ثم التفت يحدس نفسه دي
الظاهر خميرة عكننة من صباح الرحمن. التمرجية مصرة و بعصبية لامن موبااالغة :
بكيفك يا خوي، لازم عينة بول عشان تدخل على الدكتور.. دا النظام هن عجبك. مافي
بول.. يعني كان شنو داك ماف علاج.أخونا سلّم امره لله و قال: يلا خير ما مشكلة على الأقل نلقى حتة (نشخ) فيها؟ بدل ما نشرشرو فوق ركبينا في أقرب كوشة ، و لا كمان حمامات موغف جاكسون يدفعونا دم قلبنا عشان بولة. يلا دخل و جاب لهم عينة البول سلموها للطليب النبطشي. بعد شوية ندهوه و لما الدكتور شافو ابتسم و قال ليه :

♤ما تشوف شر يا عمك ، واضح الضربة قوية. بس اطمئن كوعك سليم و ما عندك عوجة
و أمورك طيبة طب . المريض رايو انفتح : كيف عرفت من البول يا دكتور دا كوع أكيد البت الممرّضة قايلا ليك. الطبيب: لا أبداً ، يا شيخنا ما تشيل هم ..كل ما هنالك، إنو خارطة بولك هي البينت لينا كل حاجة. عندنا جهاز حديس كدا عامل صيحة في عالم التحاليل ؛ كدي إتا خُد المرهم دا خلو معاك تدهن منو محل الأذى و بعد اسبوع تراجعني ( و ليك علي عاد ، ح أوريك المكشن برا بصل) و أوعك تجيني يديك فاضيات ناسي تجيب عيّنة بول تاني معاك.

♤ الحاج رجع بيتو و في راسو خرتمية سعال مندنش من الاختراع الشيطاني دا، و قال لأهله عن الموضوع و قعدو يضحكو عليه و قالولو دا نصب دكاترة و مافيش حاجة اسما تحليل بول بالكمبيوتر زاطو.بعد أسبوع الزول الكوع طاب مية مية و قرر يرجع للحرامية ديل. يلا واحد شِفِت من شفعو اقترح عليه انهم ينصبولم فخ لكشف شبكة الاحتيال دي يلقنوها درساً.قام الولد كب ليك عينة من بوله على عينة من بول الشويفعة أختو بت روضة على شوية من بول أبوه و عليها قدحة من زيت فرامل عربيتم االقرمبعة مركونة ليها زمن.

♤ عمك شال (كوكتيل البول) و يلا فللي على الممرضة جاك عصار، قام سلمها العينة الموقوتة! و قعد منتظر يراقب الموغف، و كشمة مكبوتة تدافر في كناكينو متل بحر الدميرة. بعد نص ساعه كدا تقريباً طلع الدكتور عرقو دا يتخلت و سايل بي سداغاتو
و ماسك ورقة نيتجة الفحص طويلة ليها بداية ما ليها نهاية. قام المريض سألو ليك
بنوع من التهكم: أها بشر يا دكتور شن لقيت في التحليل المرة دي سبع و لا ضبع!؟

‎♤ لكن الحكيم كان ليه بالمرصاد و رد التحية بأسوأ منها ثم قاللو ببرود إنجليزي: لا
و انت السادق و اضح ياخي إنو كوعك شفي تمام التمام بس في شوية نتائج غريبة هنا!
الحاج نفسو قام فجأة: يعني شنو غريبة!؟قاللو: يا حاج كدي أهدأ شوية و روق المنقة ح نفهِّمك: أول هام لقينا في دمك دعكة سبغة (نظام موت بطيء) من استنتاجاتنا العلمية بنرجح سببها يكون غاز ثاني أوكسيد اللعوتيك؛ الظاهر يا إما إنك بتاكل (سواس) حمير
و يا إمن بترمرم في الكوش. تاني هام و لدك طلع بشم بلاوي. و أما تالت هام و دا أهم،
بالنسبة للأمورة الحلوة بنتكم المصون نقول (بلف) مبروك هسةفي الخامس، بس ياريت
نعمل ليها ألترا ساوند و إن شاء الله تجيبو ضكر و لو نتاية ، برضو من المستورات.
ثم بعدين ما تنسى يا حاج عربيتكم دي عايزة شنابر! أها من حيسك دا يا ود التاج
أكان لاقاك زول حايم يلقط قزاز عينات من الكوش طوالي تعرفو دا صاحبنا شغال
بالنسبة لصالح عصابة اللولات الطبية إياها!. و الله لا يعتركم في( ملجة)
مع تمنياتنا لكم بصحة و عافية . أخوك ود اللصيل ( تيبار سبيل)