سلام وشكرا بسمات ودكتور أحمد ومبروك للوطن، والمطلوب كتير.
وأتبرا لا يكتمل ألقها إلا بحميد وقصيدته أتبرا التي كأنما يقرأها من لوح .
أتبرا الطيبة
بينما نحن نقاسي بين رمضاء المآسي
و أقاصي المقبرة … فاجأتنا اتبرا
فإذا بالمقبرة تتنامى سنبلات
و المآسي قُبُّرة
دوزنوا لحن المبادي فالأيادي حنجرة
لونوا قوس الأماسي كيف كاسي محبرة
وطني … أو اتبرا
خلف ليلاي قصاصي أي فجرِ يا ترى
وطني … أو اتبرا
اتبرا الطيبة يا منجم الثورات
كيفك بعد غيبة وغربة ووطي جمرات
رجالتك الهيبة … نسوانك الحارات
قالن لي قوله تسر … تنفع زمان الضر
كل البلاد أم در .. والمهدي حي ما مات
الخطوة في الشارع منبثة ثورية
بق الغضب طالع .. أبرول وطورية
شافع ورا النافع .. طلبة وأفندية
الجوع وكان دافع .. لي هبة شعبية
ما الصبر ما نافع في أيام كركية
ذات وضع همباتي .. وأحوال متل دية
كهان وجهدية .. وكابات هي ما هيّ
أحموني اغرودة والدنيا عيدية
حرموني زغرودة في فرحة عادية
حظروني من عودة .. أو مرقة ليلية
منعوني من ذاتي .. واخواني جندية
للقمع يوماتي سدوبا وردية
شك في هوياتي .. فتيش وسخرية
لكناتي .. لهجاتي .. شلخاتي .. عينيا
أوكير وحمداتي .. باعوضة سل فيا
تحتاج معاناتي لبطاقة شخصية !
يا مسخ بعاتي .. وقام لجنة شعبية
لي حضرة الآتي .. شايل الفرج ليا
عبيت مساماتي .. من غيمة منفية
وعلى أرض مأساتي .. فرغت ما فيا
وضل الوطن شاطيء .. وشمسو المراكبية
النيل ديمقراطي .. والقيفة جمعية
بردت غنواتي .. بي نمة مغلية
بقت هتافاتي .. دوديتا بي إيديا
في دقن همباتي .. وعسكر حرامية
طارت حماماتي .. وركت سلامية
غدروها شماتي .. وكتل الرصاص فيا
لكن يا مواتي .. يا ذمة مشرية
يا عسكراً فاتي .. مافيا وطفيلية
من شرفة الآتي .. وبي كل حنية
أخدني أماتي .. وبي طرحة و أمنية
ربطن لي جرحاتي .. وبي مرتق واغنية
سدن لي آهاتي .. فوق وقفة صخرية
سنن لي إيديا .. وصاحن بي صد صارع
يا عيش وحرية .. وانغير الواقع
يا ميتة دغرية
نار التكل ماتت .. نار فينا شن حية
و روحك إذا فاتت .. روح الوطن جية
أماتي يا أمات .. كل الغلابة الجات
من حلفا لي نمولي .. من بارا لي سنكات
غضب الخلا اليغلي .. صرصيرة الغابات
في عب ضلوع النيل .. جيب القلب غيمات
أشواقا تالا الأرض .. والأرض شوقا نبات
أماتي يا أمات .. ود الحياة الصنديد
قولاً لكل عنيد .. وصاحب دقن همبات
قولنلو إحنا حديد .. زي المرمة شداد
اللي ضميمتو يخون .. ما أمنوهو بلاد
يا مستبداً بات .. حارساهو دبابات
كضاب وكضابات .. هواب وهوابات
شن حـزبــك الويحيد .. وضرعاتك ام حجبات
طظ .. جبهتك وين سيد ... الإشتراكي الفات
لا البوت ولا النبوت .. لا التوت ولا الكهنوت
ونقل الفلاشا أفاد
وكان بحكمونا بيوت .. لو بحكمونا أفراد
حارين حديث الموت .. والبعث والميعاد
كل لحظة روح بتفوت .. وكل لحظة كم ميلاد
وعلتنا يا مسخوط .. مو اسم الله واحنا عباد
علتنا كيف القوت .. والجيهة والمشهاد
ما مر قطراً توت .. ما طال للبراد
الشغلو الكلو زيوت .. ما يلقى زيت لا زاد
ما يلقى الطِّري .. وضاقنبو السبل
العجل العري .. والنار والبقل
خيري وسكري .. في الدقن ام قمل
يا الدقن ام قمل
شيلي وصدري .. وجيبي دمار دبل
زير ولباش كيري .. شامبو دلال وفل
غني وشكري .. يا كوز المثل
في الضيق منهري .. وحمدك الربل
وبت السمكري .. جيهتك للرجل
دهناً كركري .. الطلح الكحل
هوي يا العسكري .. غيرك من قبل
عامل فنجري .. وفاكر الناس هبل
بى اسم الدين يطل .. وبى أسمى المثل
يرغي وينفعل .. ضاحك بالعقل
ما داعب طفل .. لو..لو قالو كل
ينفرطق نعل .. في المرة والرجل
قاصد ننشغل بي سنن الغسل
عن موية وأكل .. لا توب لا في ضل
نقعد ننكتل .. في اوصاف الرسل
مين برعى الإبل .. وتبرا الغيمة ضل
والمن دوب طفل .. يفتي ويشفي غل
والوكتين يطل .. يلفح للعقل
حيلتك ما بتحل .. وفي فكرك عطل
زهدنا فاض فضل .. وما ناقصين مثل
وين يوجعنا وين .. ماك داريبو كل
ما شعنف دقين .. شنف حالنا ذل
عيشة يا مفتري .. ويوم كامل شغل
نسرق ننكري .. ولا بلاش تكل
غني وشكري .. يا كوز الدبل
زير ولباش كيري .. والآية بــ رطل
بس يا عسكري ..
يا عسكري التالفين .. ويا تالف العسكر
يا لايصاً في يمين .. والشعب قد أيسر
ما جف ساق ابريل .. اكتوبر الأخضر
يات شيمة ليهو تشيل .. كل ما الرياح تكتر
فرعو الهطيط بيميل .. بس ما بينكسر
يتسامى دغري عديل .. كلما الرياح تنتر
طير الخطى الجايين .. ما بتفزعو الهزات
لا صقورك النازات ..
من دم رعاف الطين .. ودنس الحياة ام لذات
فاكر رقبتك مين ... وفاكرنا مين بالذات
دي القرشي .. قاسم أمين .. ويا دا الشفيع ما فات
وما اعظم الجايين .. يا اتبره وجايات
حاضرنا ما ضنّين .. وكل الدروب صاحيات
يا لابساً كم وش .. على مين تدور وتحوم
شغلك ضلالي وغش .. نضمك عسل مسموم
قاصد عيونو تتش .. ويرغى البلد مقسوم
طقّت جبهتو شمس .. فارت في راسو دموم
الجاي بعدو يمش .. يعتب بعيد مكروم
تطفش طيورو تطش .. وبومك يعشعش شوم
يا ضاحكاً غياظ .. لي شعبك المأزوم
ظنك ليالي حراز .. ما دلدل الخروم
في مزارعو .. لافي رذاذ .. لاغيمة طاشة تحوم
لا زيت ولا أمباز .. قطّن مصانعو عموم
وانعكنن الإفراز .. وقد بلغت الحلقوم
وبرضك تنوني انقاذ .. ينقذنا منك يوم
بيناتو نمشي عزاز .. زي النبي المختوم
يا ضاحكاً غياظ .. لي شعبك المأزوم
من دكة التلفاز .. دايماً تطل ملخوم
وتنطاير الإنقاذ .. وزبدك يرك متخوم
عرب الكنانة حجاز .. بستقبلن مهموم
عشمان في كوتة جاز .. عربونا كم قدوم
شن لذتك تنحاز .. مع غزو ما له لزوم
كان ماك نتن لذاذ .. فتان ولخبات كوم
شن غزتك في عكاظ .. شعب الكويت مو الروم
لا قصباً لا عكاز .. وقت الدميرة تقوم
لاك نافعاً حجاز .. وشن للعتاب واللوم
فوق العليك لاواز .. تشهد سما الخرطوم
غماز ويا لماز .. هماز ويا مفصوم
ما الفرق بين ملوك .. كادى الرعية تلوك
وعسكر وراها بنوك .. ساوى الغلابا حنوك
طول النهار عوك .. عوك والليل تراب وصكوك
تملا وتفضي تنوك وتملص ضميرا هنوك
واسترني يا المبروك متل التكني أبوك
ناس بي أخوي وأخوك لا اخلاق لا دين لا سلوك
اخلاق ..دين وسلوك
يرمي الولد في الشوك أما البلد مشكوك
يا شعب يسلم فوك .. عطفك رضاك وعفوك
قول للخزين صل صوم ولا تنكسر مهزوم
ولو فضلت الخرطوم من تصحى قبل الطير
بعد النجيمة تنوم
ومنعاشى طيبة بخير مكفية راجية اليوم
ممنوع عليها السير غير لى كبار القوم
والسادة الأمجاد ..
لابد من يجي يوم ساعاتو ما ها بعاد
يجي من صراع اضداد
من امة حق الموت ما لا قيا وانتو سعاد
قول للدعي المتخوم
يا متفن التفاح .. وشغلك فياقة ونوم
في شعبك الكداح .. وفي أطفال مو لاقى الدوم
يا أرزقي ومرتاح .. ما جابهنو هموم
جاييك زمن كتاح .. جاياك رياح وغيوم
جاياك مطور الصاح .. جاي الصح المعلوم
من كل فج في كفاح ..ومو وحدا الخرطوم
البيننا بينك دم .. تاراً غريق وجراح
فينا البحرفو السم .. فينا البكفو سلاح
شهدانا ما قت كم ... لا ياتو فيها فلاح
لا ارتحت شلت الهم .. لكنو يا سفاح
لا الإندلق بنخم .. لا بتتوزوز أرواح
ان النفوس جم .. جم
ود الفضل ما راح .. وما طال فينا شهيد
عصيان وإضرابات .. ما بنفع التشريد
لا بجدي صالح خاص .. لا مسخك الشعبي
وغنايك الرقاص .. لا دفاعك الحزبي
لا حيلة ابن العاص .. لا السجن لا التهديد
يابوت ولاد الناس أشراف وما بتنداس ..
ما بمشي فيها وعيد .. وفيها الوعد متراس ..
فيها العشق صنديد .. صاد أعزلاً داواس ..
يا أرذلاً رعديد .. يا أنجس الأنجاس
وسع مجاري الدم .. زيد السجن ترباس
يا هالكاً مجراس .. مصاص خزا ومصاص
خازوق بني العباس .. زي ما انت عندك دين افريقيا ليها تراث وكان تنهري وتنغاظ .. عبداللطيف والماظ .. ما حرضم النخاس يا رباية المنظمة .. المريبة المسجمة دي البلد طيبة ملهمة .. وما بتزوّر ملاحما كنتِ خدرا ومنسمة .. جنة طيبات مواسما يا ارض جاك مسيلمة .. في ايدو كيزان مخرمة فاضية فاضية ومعلمة الله من دين ولا انتما بين دهاليز مضلمة .. وبي مراويد مسممة تشتك وانتي مرغمة .. يا أرض صابك العمى وكل شيء طار السما .. إلا المطر طار من السما وما اكتفى السفه انعما .. دكن السفة دردمة وقال نشرع نأسلما .. وفي البداية النقسما ويا كضب .. لا بتقسما .. لا بتقدر تأسلما ويا كضب .. لا دا بلسما .. لا ترابيك مرهما كلكم ملة مجرمة .. والبلد في البيكرما في الغلابة المنظمة .. في نقابات مصادمة أو جماعات مقاومة .. للخضوع والمساومة واللا أحزاب مصممة .. سلطة الفرد تهزما من أساسا وترايما .. وبالبنوك المرمرمة من عرقنا ومخمخمة .. مافي خير غير نأمما إلا وجعة ملاحما .. الغلابة المألمة تنزع السلطة بالدمى .. وأي ثورة نقيما الكروش المنعمة .. كش تلملم تخمخما تصحى ذاتا المرخمة .. وللعساكر تسلما دايرة فعلاً مأزمة .. إلا لابد لازما يا الغلابة المأزمة .. من تجارب تعلما من دروباً تقدما .. والديمقراطي أسلما هو البوضح معالما .. والمعالم تفهما إنو سبة مظالما .. في الارض ماها في السما ولو دا أفضل عوالما .. يبقى في صون ومكرمة ولو ما أفضل عوالما .. يبقى غييرا لازما وعِن تلملم عزائما .. غيرا ما بيبقي حاكما شعبنا وفارس الحمى .. ينطلق بي ملاحما تصبح الدنيا سالمة .. والخلائق مسالما الحبيب للحبيبة ما .. من عساكر تقاسما شعبنا وفارس الحمى .. ينفرد بي ملاحما الحبيب للحبيبة ما .. من عوارض تقاسما منك براء .. ألديش إيمانو والإخلاص يا سم بنوك العيش .. يا أرزقي ولحاس ايد تقبض البقشيش .. وايد ترشي للحراس يا كرشك القدر ايش .. واكبر فراغ الراس ماك جايي منقذ ايش داعي الهلاك للناس شن داعي للفتيش .. حالة الطواريء وفاس حظر التجول ليش .. ليش كتمة الأنفاس وليش جايي أصلاً ليش .. يا جايي من غير ساس ما قابلك دقيش .. جوة القطر .. في الباص حال حلة تشكي دغيش .. ما عشتو في الإحساس لا جُعْ لبست الخيش .. لا سهدك قراص أطفال حفايا تكوس .. للموية في الحصحاص يوم ما لبست البوت .. في هيصة الأعراس تعب البرد والصيف .. حمى النفس والراس طيب حتقدر كيف .. تلمس قضايا الناس نار المدن والريف .. الضمة ما بتنقاس كم نفنفت نفنيف للأقوى منك فات فاكر الحكم طرطيش .. والسلطة قوة راس كتيل رقاب عشغيش .. حميس جهالة حماس مو رقصة يا درويش .. عليق بخور ونحاس ملينا شعب وديش .. ملو الأرض والفاس الخبة تبقى بشيش .. والحيطة من فد ساس قول للحرامي بريش .. حلتنا مو تكساس دم اخيي مو معليش .. وانا ماني نايم حاس وين تمشي وين شقيش .. اترك برا القصاص واهلي الغبش ديش ديش .. وكل البلد حراس ديل نحنا مانا قريش .. وماك ود اخو العباس والشعب ماهو قشيش .. حالنا يصيدو يباس وسوداننا ماهو حويش .. بيقفلو بي ترباس اماتي يا أمات .. قولن لكل عنيد على شعبنا وعاناد قولنلو نحنا حديد زي المرمة شداد وين تمشي يا رعديد .. وانا يا دا يا جلاد جيت من قريب وبعيد .. من ادنى قول في البيد وآخر فرع غابات هبة رجال و ولاد نسوان عزاز وبنات أجداد وحبوبات جيتك بكل جنس .. أحيانا والأموات جيتك بكل لغة .. رطان وصاحب ضاد جيتك هجمة السيل .. مطراً بلا ميعاد لكني ما جيت ليل .. جيت في الضحى الوقاد وما فوقي إلا نشيد .. وما تحتي إلا ثبات .. ما في إيدي إلا الأيد شعباً جنا حوبات وين تمشو يا أوغاد ..يا شرزمة كابات خانت ثرى الأجداد بي 300 زول في خمشة دبابات بدل البطمن خوف وبدل البيلم شتات بدل البسند الجوف صفيق ومؤتمرات بدل المدارس جات تملأ البلد ثكنات بدل القلم رصاص بدل الفهم خوذات محضر بدل كراس جيهة النشيد غارات حس رنة الاجراس ابواق وصفارات تمرينا للجمباز بدل الشباطة ابوات الحصة كتم انفاس درس العصر كشات فتش بيوت الناس واستجوب الاموات جز الفرع بالفاس اما العرق هيهات انقاذ وما ادراك انقاذنا الاهلاك انجاز وما اسماك تكويشة الملاك يا مسخرة مأفون ترباية السافاك يا مدعي وافاك زمبارات القصبة حيكومتكم كعبه بموروث الشعب والبسملة مغتصبة ضرعات العمال الزراع الكتبة سارقين لبس الديش باسم الشعب الطلبة يا شناق القول يا رباط العقبة يا خناق الزول يا كسار الرقبة كنا بنأكل فول نرجى الله في الكربة مر علينا الحول ضِقنا وضُقنا الادبة وانت تجب كف كف تنضم لامن تغبى مؤتمرات السف شكل لجان الضيبه شنفت الاحزاب قت كوفية وعذبة الجمعية ضراب زي الما منتخبة حق الله الاضراب وأي حقوق مكتسبة قلتو سياسة غاب طيب لية يا كذبة ما وفرتو القوت حل الحالة الصعبة ما وقفتو الموت والنهب البى قلبة دقن فرشة البوت فوق جوطة وغلبة ولا نزيف الدم منو عمارة وعربة وشر العيشة الغم ليكم خير يا كسبة كسبة وضلاليين لي بنوكم الخربة تحيو وحلاليين وللغير حرام وربا السلطة للاحزاب الشعب ساقا غبا ولحزبكم ده ثواب جاء من الله جابو هبة بجيهة الله الجاب وبجيهة الله ابى لي بيتو انتو قراب من بحرى بقببا تنفرج امدرمان والمهدى في الكنبه تنشايت ام ضبان ود الترابى وباء فوق تربة السودان في ضرايحو كم غرباء يا ملعبة كيزان دنيا وبلاش غلبة وجيداً ظهرتي بيان يا اتبرا التعبة ما ضاقت الاديان والدنيا كم رحبة وفي حضرتك فتيان ما بدلت جببا الدروشة الغليان الهمهمات غضبا وكم ذوبت بمبان بمواقفا الصلبة يا ملطشة فرعون موسى الشوارع عاد وعلى مين تحلقوا دقون كان اتخلقتو جداد الشعب كلو عيون الأمة بالمرصاد اللي ضميمتو يخون ما امنوهو بلاد وكان بيحكمونا بيوت لو بيحكمونا افراد يا شعبنا الوقاد يا صاحب اعتى جهاد يا ابن الغلابة الحر يا جيهة يا مشهاد كتر السكات بيضر وكت المهادنة فات بيك يا النضال المر تحلى البواكر هات ايدك لعالم حر ولتنهض الكلمات كل ما الضلالة تضر زي ما هى جات بتمر يا مفدر الظلمات يبقى اللقى البيسر وكل البلاد أم در والمهدى حي ما مات يا اتبرا الِبرة يا منجم الثورات
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
Yasir Elsharif
فيس بوك
تويتر
انستقرام
يوتيوب
بنتيريست