|
|
 Re: تركيا جنة الأرض (Re: منصوري)
|
نظرية تركية مهمة
،،،
لو طبقناها فى السودان خاصة مع هبة الشباب فى الثورة دى لتصليح اى حاجة وخلق اساليب جديدة لرفع معيشة الناس،،
حقو نحن نرفع واقعنا لمساعدة حكومة الثورة الانتقالية ، وما نرجاها فى نص الطريق بعصا سحرية تغير لينا كل حاجة
لا
،،،،
طيق التغيير لرفع معاش الناس يتطلب تضافر الجميع ، كل يدلى بدلوه
،،،،،،
عادة حسنة فى جميع تركيا
،،،،،
عندك دكان ، عندك شركة ، عندك ورشة ، عندك مخبز ، عندك اى عمل خاص،، تلقى كل افراد العائلة يشتركوا فى العمل دا ، ابدا ما بيجيبوا عمال من برة
الدكان حق ناس البيت ،عماله ناس البيت ، ادارته ناس البيت،،،حتى محلات بنشر السيارات ناس البيت ، اللهم إلا ورشة كبيرة او معمل ملابس كبير محتاج ل300 عامل،، ناس البيت كلهم بشتغلوا فيه ، بعدين يتموه بعمالة خارجية ،،
،،،،،،
عندك مخبز مثلا
تلقى البت الفتاه بنت صاحب الفرن ماسكة العصاية ديك البي يدخلوها فى الفرن ، تدخل الرغيف نى فى الفرن وتطلعو،، تجد مرة الراجل تعجن بالخلاط الكلير في الدقيق،، تجد الولد الكبير يليع للزبائن الرغيف،، تجد الشافعة بنتو عمرها 5 سنوات تفتح فى الأكياس،،،، تجد البنت 10 سنوات جات من المدرسة آخر اليوم فى علاقة فى الحيطة فى المخبز علقت شنطتها بتاعة المدرسة فى العلاقة ودخلت جوه المخبز غيرت هدوم المدرسة ولبست يونيفورم المخبز ومسكت المكنسة تقش فى ارضية المخبز ،، تلقى واحدة من ناس البيت خاته تربيزة بى جوة وتورق فى خدرة عسان يطبخوها لى غداهم يتغدوا كلهم فى الفرن دا ،، مافى زول بى يمشى البيت ،، البيت دا تمشى ليهو الساعة 12 بالليل لما تتعب من العمل خلاااص وتبقا تانى ما قادر تنتج،، الليت بس تجى آخر اليوم تستحما وترقد ،، عشان كدا الاتراك بيوتهم نضيفة جدا جدا ،، تعجبك ،، بالمناسبة معظم الاتراك اللي يجونا ديل فى السودان كثير منهم لا يمثلون اخلاق الشعب هنا ،، قد يكون فيهم الانتهازى البي يجونا ،، او العايز يربح بسرعة ويرجع تركيا وهكذا ،، لان تركيا ما بتتفات ،، كثيرون منهم يذهبوا امريكا ويذهبوا كندا والمانيا يجيبوا قروش ويجوا يفتحوا مساريع هنا،، بلدهم ما بتتفات ،، ويقولوا ليك بلدنا حلوة ما بنفوتا،،
والله انا طيلة فترتى دى هنا لا شفت زول شاغل ليهو زول ولا زول قرن فى زول ،،، بل يستغربوا زول يشاغل ليهو زول،، مع انو الناس ماشة مشلعة فى الشوارع
انت عايز زول تبدا معاهو علاقة وبعدين تعرسو ،، خلاص انتهى كل شىء،،
بلد ما فيها (دار مايقوما ) ابدا ابدا ،، دى موش براها رحمة ونعمة من الله تعالى ،، بدل ما تخلق زول غير سوى فى المجتمع ، ينشأ حاقد على المجتمع
،،،،،،
الوالد مدير الفرن القلناهو ،، ما بيضيع حق زول من ولادو ،، عندو دفتر ،، انت ولدو او بنتو ليك راتب شهري من الفرن ،، طلبو ا منك ناس المدرسة ،، كراس،، قلم ،، لبس مدرسة ،، الابو يشتري ليك ويخصم من راتبك ،، البت الفى الجامعة رسوم دراسة ،، مشروع تخرج يعطيها ويخصم من راتبا ،، آخر الشهر يديها باقى راتبا،،
راتب البت الفى الجامعة من الفرن اكبر وتتوالى المنظومة فى صغر الراتب لغاية ولدهم داك العمرو 5 سنوات يفتح فى الاكياس،،
يوم اجازتهم سبت واحد ،، تلقى الاسرة طالعة تبهرج فى اعظم المنتزهات والمطاعم ،، موش يدفع الأبو لا ،،، كل زول الابو يدفع ويخصم ليهو من راتبو ،،
والفرن ما بيقفلوه يوم الاجازة ، يكون فى عدد من افراد العائلة يفتح الفرن ويمشى العمل ويعطيهم الوالد اوفر تايم على شغلهم يوم راحتهم ،، الاسبوع الجاى كمان الما قعدوا فى وكت راحتهم يجوا يقعدوا،،
الطلبة تلقى اختهم الكبيرة فى الفرن بعد ما تنتهى من لخ عين العيش تغسل يديها وتجى تحل الواجب المدرسي مع اخوها فى تربيزة وكرسيين موضوعات فى ساحة الفرن لحل الواجب المدرسي،،
،،،،،،،
تعال شوف نحن فى السودان
،،،،،
الابو عندو شركة او مصنع ،، هو شغال بى نبارتو براااهو لامن يموت ،، العمال عندو كلهم من برة ،،، المرة يمكن ما نعرف موقع وشارع شركة راجلا،، ولا تعرف عن سير العمل فى الشركة اى شىء،، ولا تعرف ذاتو راجلا شغال فى شنو ،، بس تفلح فى الحنة شالت ،، الحنة ما شالات ،، دخانى ما شال بكرة اطبقو ،، فلانة جارتى ماشى اورق عندها الخدرة ،، واشوف ولدا داك البارح كان يطرش،،، بت خالتى طهرت بتها فى الكلاكلة صنقعت ماشى ابارك ليها ، فاطنة جارتنا المحسية عازماني جبنة ،، ود خالتى فى الروصيرص الليلة اربعينية عرسو مسافرة ماشى ابارك ليهو ،،
الراجل دا لامن يموت يموت واقف،، ولما يموت يشلعوا الشركة لانو مافى زول بى يعرف يشغلها ولا يعرف حتى ما يدور فيها ،، الراجل يقع ناااشف يموت واقف
زى الفاضل سعيد فى مسرحية ( اكل عيش) قال ليهو والله ياصاحبي نحن الاتنين واقعين وجيوبنا مقددة بس انت واقع قدامى على الأرض وانا واقع واقف جنبك،،،
،،،،
البت يصرفوا عليها ما تشوف منها مساعدة فى الزمن الصعب دا ، تصرف عليها عصارة دمك وحصيلة هجرتك او قروش شركتك فى السودان ،،مع مصاريف الجامعات البقت بى ملايين الملايين دى ،، جامعة مامون حميدة وغيرها من المصاريف التى لاحد لها وايجار داخلية ومصاريف مفتوحة لاحصر لها ،، واول ما تتخرج البت طوالى تعرس وتدخل فى حياتها الخاصة وكان ادتك حاجة لاتفى بالتزاماتك كلها،، الولد ذاتو من يلدوه لامن يتخرج ما يعرفك انت قاعد تعمل فى شنو ، والا تتمها كيف ، والا تلتقا كيف؟ وتلقى بت جيرانكم مما هو فى الجامعة عينا عليه ، عشان ابوه عندو شركة او ابوه مغترب،،، وانت ذاتك تعبان فى الغربة تقاوم ظروف صعبة جدا من الكفيل او من اسطاف العمل معك البي يطلعوا على كتفك ويتسلقوا المسؤولين فى الغربة بوسائل تقشعر لها ابدان السودانيين من وسائل فى منتهى القذارة والتسلق حاجات ما يعرفوها السودانيين فى تربيتهم حتى لو أكلوها بى ملاح شعيفة ،، ام رقيقة بيضا بصلتا طافحي طافحة بى فوق،،
جبرتهم الغربة ان يختلطوا مع جنسيات اخلاقها ما انزل الله بها من سلطان ،،
كدى البركة في ثورتنا دى تخلى الشعب السوداني يطور من ادوات سلاحو فى الخدمة المدنية ،، ويكون اهلا للترقي الجديد ،،
،،،،،،،،،
عندى صاحبي تركي عندو مصنع احذية ،، مرة مرة بسوقنى المصنع ،، وعندى صاحبي شديد عندو شركة انشاءات شقق،،
اها مرات اكون انا مثلا مع صاحب المصنع الكبير فيهو 300 عامل ،، اولادو وبناتو شغالين فى المصنع
،،،،
عندهم عادة الاتراك معظم المعامل والشركات تعمل وجبة للعاملين وشاى وقعوة مجان موجودة فى المصنع تكب فى اى وقت،،
اها جات مرة الراجل سايقا عربيتا من البيت وفيها الغداء لكل العمال ،، يجوا يشيلوا منها يختوه على طاولات فى المصنع،، ياكلوا تشيل عدتا يغسلوها ليها ،، وتقعد هى ذاتا تشتغل مع الناس
صاحبي بتاع المصنع قال لى مرتي دى طماعة قلت ليهو كيف؟
قال لى هدت كتفى ،، انا صاحب المصنع لى راتب،،ما بزيد عليهو ،، باقى القروش بوردا فى البنك لعاديات الايام ،، احتياط ،،مكنة اتكسرت،، حصلت حاجة ،،
قلت ليهو ياخى المرة دى كويسة هسه فى الزحمة دى جات شايلة الاكل
قال لى تاخد منى حق الخضار
وتاخد منى حق طهى الخضار
وتاخد منى حق المشوار وبنزين العربية
وتانى تاخد منى راتبا زى العمال ديل واحد
فلت ليهو عفيت منها ،، زوجتك دى شايقية والا شنو ؟
يموت من الضحك ،، قال لى بسمع بى قصص الشوايقة عندكم ،، هو زول منفتح ويحب السودانيين ويعرف عنهم الكتير
|
|
 
|
|
|
|
|
| العنوان |
الكاتب |
Date |
| تركيا جنة الأرض | منصوري | 07-20-19, 11:57 AM |
| Re: تركيا جنة الأرض | منصوري | 07-20-19, 05:26 PM |
| Re: تركيا جنة الأرض | عزالدين عباس الفحل | 07-21-19, 04:50 AM |
| Re: تركيا جنة الأرض | منصوري | 07-21-19, 08:42 AM |
| Re: تركيا جنة الأرض | عزالدين عباس الفحل | 07-21-19, 10:18 AM |
| Re: تركيا جنة الأرض | منصوري | 07-21-19, 03:34 PM |
| Re: تركيا جنة الأرض | منصوري | 07-21-19, 07:02 PM |
 Re: تركيا جنة الأرض | عزالدين عباس الفحل | 07-21-19, 09:51 PM |
| Re: تركيا جنة الأرض | منصوري | 07-21-19, 11:16 PM |
| Re: تركيا جنة الأرض | منصوري | 07-22-19, 05:49 AM |
| Re: تركيا جنة الأرض | عزالدين عباس الفحل | 07-22-19, 11:49 AM |
| Re: تركيا جنة الأرض | منصوري | 07-22-19, 12:09 PM |
| Re: تركيا جنة الأرض | علي عبدالوهاب عثمان | 07-22-19, 01:51 PM |
| Re: تركيا جنة الأرض | منصوري | 07-22-19, 03:57 PM |
| Re: تركيا جنة الأرض | منصوري | 07-22-19, 04:02 PM |
| Re: تركيا جنة الأرض | محمود الدقم | 07-22-19, 04:19 PM |
| Re: تركيا جنة الأرض | عزالدين عباس الفحل | 07-22-19, 05:24 PM |
| Re: تركيا جنة الأرض | منصوري | 07-23-19, 06:42 AM |
| Re: تركيا جنة الأرض | خالد عبد الحليم سعيد | 07-23-19, 07:49 AM |
| Re: تركيا جنة الأرض | طارق ابراهيم ابوالفضل | 07-23-19, 08:10 AM |
| Re: تركيا جنة الأرض | منصوري | 07-23-19, 10:23 AM |
| Re: تركيا جنة الأرض | عبدالله عثمان | 07-23-19, 10:45 AM |
| Re: تركيا جنة الأرض | منصوري | 07-23-19, 11:43 AM |
| Re: تركيا جنة الأرض | Kamal Alalla | 07-23-19, 02:17 PM |
|
تعليقات قراء سودانيزاونلاين دوت كم على هذا الموضوع:
at FaceBook
| |
منصوري
فيس بوك
تويتر
انستقرام
يوتيوب
بنتيريست