Quote: معقولة للدرجة دي ،،، نحنا السودانيين حلينا مشاكنا كلها وبقت مشكلتنا الوحيدة ( حلقة شيماء ) +++ عشان كلمتين قالتهم شيماء وقلدت فيهم سفيرة الفن السودان في مصر المشرفانا ورافعة رأسنا على قول أخونا حاتم بأعلاه
مداخلتك في البوست هي الثانية مباشرة يا سوداني! فلو كنت حريص على حل المشاكل فالبوستات المتعلقة متوفرة في مكان آخر ابتدرتها بحملة شعواء على سيدة كريمة وأقحمت فيها الذوق والمسخرة والوسـاخة وحتى الحلال والحرام يا "سيف الدين" إذن أنت جئت لتضيف مشكلة، لتفصح عن دواخلك، فلا تتحجج أو تؤدي دور الوطني الغيور في غير مناسبته. فدافع عن (رؤيتك) بدون مزايدة فينا.
ثم أن أخيكم حاتم أتى للدفاع عن سودانية لها الحق في أن لا يجردها أمثالك من موهبتها بدون سبب واضح أو حتى واضح. هذا البوست يتعلق بقضية فنية وليست سياسية فلا تتقافز بين الحبال.
Quote: بعدين يا حبييب طالما إنت مترفع وذوقك راقي وعمرك ما بتشوف ولا شفت زي ستونة يبقى كان من الأجدر عدم الفصل فيما نتناقش فيه ودي دعوة مني ليك ،، حاول بعد الفطور تتقوقل أو تتيوتب ( خش اليوتيوب ) وأكتب ستونة وحتشوف سفيرة الفن السوداني في مصر وعندها حتقول لي شيماء والله ظلمناك وإتحداك لو ما رجعت كل ما أكلته وشربته في إفطارك
نقطة سطر جديد ،،،، يا جماعة بطلوا مكابرة ونفخة كضابة وزي ما قالوا الجمل ما شايف عوجة رقبتو
داير تناقش يعني! هسع فوق مش قلت شوفوا المشاكل الوطنية الأهم؟
__ نفاخ ولا الجمل ما شايف عوجة رقيبتو؟
Quote: ودي دعوة مني ليك ،، حاول بعد الفطور تتقوقل أو تتيوتب ( خش اليوتيوب ) وأكتب ستونة وحتشوف سفيرة الفن السوداني في مصر
أنت متردد مالك؟ الحاجة الأنت شايفها دي أدينا معلومة عنها، وخلينا ناخد انطباع بعيد عن (تأثيراتك) ومؤثراتك الفنية بعدين ياخي حاول ترتقي بنظرتك وطموحك لما هو أبعد من إرضاء الذوق المصري أو (القلق الشديد) من عدم مواكبته ما تبقى لينا زي إدريسو داك، يلف ويدور ويرجع يقول مصر، ميترونوم بس، حتى ظننا أنه سيرث أهلها ومن والاهم نحنا يا محجوب دايرين ليكم الاستقلال بالرأي والاعتداد بالنفس صعبات ديل؟
Quote: عشان كلمتين قالتهم شيماء وقلدت فيهم سفيرة الفن السودان في مصر +++ لأن ما قدمته شيماء ما هو إلا تقليد لما تقدمه هذه الستونة المسميها أخونا حاتم سفيرة الفن السوداني بمصر
ما جابنك الكلمتين.
وكنت تقول كدة من الأول ياخ! أغلطوا إنتو يا الحلوين نجيكم نحنا بالأعذار وبالدمع السخين مدرار أنت مصر تلفق الفلكلور مع الكوميديا بس عشان بأي طريقة تجيب سيرة الأستاذة ستونة ومن ثم تجتهد وتحاول تهيج الناس عليها تحت الغطاء الماكر دا، ومع ذلك بتشوف التقليد ذاتو (عسل) بعدين ياخي ما شايف نفسك متناقض لما تموت في (عسل) التقليد وتقول على (الأصل) مسيخ ووسيخ؟
لكن نسألك، (قلدتها) في شنو بالضبط الخلاك (تعسلها) وتأبى (الأصل)؟ أنا في رأيي تثقف نفسك أول وتعرف الفرق.
بعدين حاتم ما سماها (سفيرة الفن)، هي أثبتت جدارتها ونالت اللقب من جمهورها وتستحق ذلك غصباً عن أمثالك فلو شايف غيرها أحق أدينا ترشيحاتك بالله، قول لينا فلان داك وفلانة ديك عشان نشوف بطنك دي فيها شنو تاني.
___ حاول تكون صريح.
Quote: وفعلاً كان الأجدر بنا ( نغطي كرورنا قبل ما ننبذ بت أم كرور )
اسمو (الكَرْو) "الكرور" داك براهو، زي الكلام الساكت بدافع الكراهية اليسمعك بتتكلم عن السودانيين يقول فاهم كلامهم. الكرو يعني الجرح المتعفن، يحرج صاحبه.
___ والجروح قديمة وكتيرة.
Quote: راجع كلامي من الأول ،، هل فيه ما يدل بأنني كنت أضحك لما شاهدته في هذه الحلقة ؟
كيفن ما كنت بتضحك! ومال الدم الزي العسل دا بيبكي؟
Quote: وشيماء ظريفة ودمها زي العسل وأجادة الدور بكل خفة ظل
والظاهر عليك مالص جلدك لدرجة أن تنعت السودانيين بذات الألفاظ وتقول (يا برابرة) وبتفتش لشماعة تعلق عليها كراهيتك أو بالعدم توجه الاتهام (حسب رغبتك) لأمثال ستونة على أنهم السبب في حصولنا على مثل هذه النعوت، مش كدة؟
__ كدة عيب يا أبونا.
Quote: حاتم يا خوي انت الظاهر عليك ما متابع ولا ناقش حاجة وشايلاك الهاشمية ساكت أرجع لتعقيب أخونا ترهاقا أعلاه وستجد المفيد عسى ولعلك تغير رأيك بعدين ،، دا الميدان يا حميدان إتحداك يا حاتم ،،،، أعرض علينا عمل محترم ومُشرف واحد قدمته المدعوة / ستونة في الإعلام المصري يخليك تقول عليها ( قدمت عمل محترم )
يا جماعة ،،، نحنا بنتفاصح ساي ،،، مجاراة الفنانين والفن المصري دا شعراً ما عندنا ليهو رقبة وآخرتا ،،، تمثلنا ستونة في مصر !!!!!! والله مسخرة وقلة قيمة وفضيحة لنا كسودانيين
متابع جداً ومدرك جداً (ترهاقا) خليهو في حالو! عندو مؤونة تكفيهو لبرنامج أجدع أمسح دشو لباقي السنة، وفي مجاله. داير تجدع وتمسح معاهو اتفضل، داير تقعد تلحس العسل مع الإهانة برضو متروك لنزعاتك (الشخصية)، ليس للسودانيين حق في منعك.
وأغير رأيي فيها لمجرد أنها ما عاجباك وشايفها فضيحة ليك (كسوداني)؟ كلامي معاك محصور في (الأعمال الفنية) ومآل رد فعل متلقيها من السودانيين وغيرهم ستونة ما (جارت الفن المصري) بل عكست الفن التقليدي والفلكلور السوداني حسب إمكاناتها ونجحت أنت دا زعمت وحقرت أعمال الأستاذة ستونة من منطلقات ذاتية جداً وربما تخجل أنت ذاتك من المجاهرة بأسبابك الحقيقية.
قلت (مسخ) وقلت (وسـاخة) وربطت أعمالها بتحقير آخر (برابرة) كأن الأستاذة ستونة أصبحت (شماعة) لرمي العقد فيها. بينما الواضح أنها ناجحة جداً على المستوى الشخصي ولا أجد أي نقد موجه لها على أساس فني، مجرد هجوم فارغ من المحتوى لا يشبه سوى ملاطعات الفنانات بدواعي الحسد والمبالغة في التشنيع بسبب الغيرة، هذا رأيي الواضح فيما ألقيته أنت عليها من حجارة. أما (ألفاظك) الخاصة مثل (مسخ) و(وسـاخة) فهي غير لائقة في حقها ومن واضح أن بطنك تفور بما فيها، وكدة عيب.
Quote: إتحداك يا حاتم ،،،، أعرض علينا عمل محترم ومُشرف واحد قدمته المدعوة / ستونة في الإعلام المصري يخليك تقول عليها ( قدمت عمل محترم )
بس دا نقاش، ما تحدي يا أبونا المحجوب!
وياهو كلامي طلع صاح! ما عندك شيء عليها، البتة نكالاً! كما وضح إدعيت (مساخة) و(وسـاخة) أعمال سيدة سودانية وفشلت في الإثبات فلماذا يجب علي أنا إثبات العكس وهذا العكس هو الوضع الطبيعي؟
وبتقول (وآخرتا تمثلنا ستونة في مصر)، وداير يتحدوك؟ أدينا مواصفات الممكن (يمثلوك في مصر) عشان نقارن! ونشوف الأستاذة المجتهدة ستونة ناقصها شنو من مصفوفة معاييرك القياسية للواتي يحق لهن (تمثيل السودانيين) فناً.
صعبة دي؟
منطلقاتك ضدها ذاتية وتحقيرية، أقولها ليك في وشك يا محجوب، بينما لو بصقت عليك المصرية تقول (عسل) بس! فيبقى يا "محجوب" يا أخوي شوف المعضلة مكانا وين بالله، وحل عقدتك بيدك بدل ترميها في نساء لم يفعلن ضدك شيء.
وأعمالها كلها عندي محترمة من حيث المضمون، للأسباب التالية:
تخلو من البذاءة وما يخدش الحياء ولا أضطر لمنع أطفالي من مشاهدتها، هذه واحدة
أجادت عرض الفلكلور السوداني وأغاني الدلوكة من حيث أرادت الإجادة ولم تقصر أو تبالغ في وصف أو منحت نفسها حق ليس لها، هذه الثانية.
تتنقل بموهبتها ليس في مصر وحدها بل في دول أوروبا، يعني (بيستدعوها) حقيقة مش حلم و(فرقعات) ساكت، يعني عندها جمهورها الأفلحت في تعريفه بالفلكلور السوداني، هذه الثالثة
ذكية وتعرف كيف تتعامل مع معضلات فنها، قررت تعديل الدلوكة من الفخار إلى الخشب مثلاً وهذا يحسب لها وبراءة باسمها، هذه الرابعة
لديها فرقة متخصصة وتشارك في المهرجانات وتستقبلها برامج الحوار وتشيد بها القنوات الفضائية، واثقة من نفسها ولم نشهد لها خذلان أو تلعثم في مقابلاتها، هذه الخامسة.
والسادسة، يا محجوب هي إنو أهل الفن المحترمين ما قالوا جنس كلامك المشاتر غرضي التوجه دا
هذه شهادة في صالحها تكفينا ولسنا بحوجة (لنعوتك) فهي بذلك مؤهلة لتقديم هذا الضرب من الفنون، وتشرف أي سوداني،
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
حاتم إبراهيم
فيس بوك
تويتر
انستقرام
يوتيوب
بنتيريست