سؤال: ما معنى كلمة SINNAR/سِنّار باللغة الهندية

Quote: اشمعنى اللغات الاثيوبية ؟ يا رجل البجة ديل عاملين Buffer zone بيننا وبين اثيوبيا من يوم ربنا خلق واطاتو وفك فيها الزيك ديل لحدي يومي ويومك ده ، فكيف ياخي تنطهم وتمشي اثيوبيا ؟ شنو الخلا لغاتنا العامية تاخد من اللغات الاثيوبية بالمناولة من فوق لي الحيطة ؟ بالتأكيد هناك تأثير بجاوي على عامية الوسط وده شيء طبيعي وسببو معروف وواضح ، الجغرافيا ، التاريخ ، التفاعل واالتداخل والتعايش واخيرا لكون الشرق هو منفذ السودان البحري الوحيد وعبر القرون نشأت فيه موانيء كثيرة اخرها بورتسودان . فلو كنت تقصد تأثير بجاوي فيجب عليك الانتباه وتسمية االاشياء بمسمياتها لأن شعب البجا شعب ابروجيني مستقل وظل كذلك منذ اقدم العصور الى ما بعد قيام سلطنة سنار والتي تمتع فيها ايضا باستقلال نسبي حتى سقوطها.

يلا البيستخدموا المفردات الحسانية هنا ديل يطلعوا دروز؟

والأهم من دا كله، تجمعهم ذات الأسماء يا إدريس،
ذات الأسماء تصور! مع بعض التصريفات لغير المألوف منها طبعاً، زي صمبارة وأقيت وغيرها

تجي تكلمني عن الإيتيمولوجي وأنت ما عارف هو شنو ذاتو!

__
أكل نارك ساي يازول.

Quote: شنو الخلا لغاتنا العامية تاخد من اللغات الاثيوبية بالمناولة من فوق لي الحيطة ؟

مشكلتك الجهل بآليات اللغات بالكامل والشعبطة في المصطلحات الأنت ما قدرها
واضح جداً نهجك في التصرف غير الموضوعي على أساس الرغبة في الدايرو والما دايرو، يعني نهجك رغبوي

اللغات الإثيوبية لأننا واقعين ضمن منطقة تأثيرها على كل المنطقة
مش بس في اتجاه الشمال والغرب بل في الشرق أيضاً عبر البحر.

اللهجات تنتقل طبيعيا بدون حيطان يا إدريس، ظاهرة اسمها (dialect continuum) وتأثيرها أدعى إنو يكون أقوى بمجرد
انعدام الحواجز الطبيعية ووجود علاقات تداخل بين المجتمعات ودا الموجود منذ قرون بين السودان الحالي
ودول شرق أفريقيا من عهد انعدام الحدود السياسية فترة أكسوم، حيطة شنو يا أبونا معاك!
دا الخلا العامية السودانية تاخد من اللغات الإثيوبية تأثيرات المجاورة وتفاعلات التاريخ.

يا إدريس، تعال نوريك

بنبر ወንበር ونبر
جزمة ጫማ جما
أنجيرة እንጀራ إنجيرا
الأنجيرة الحبشية: ما ياها الكسرة السودانية ذاتا .. إكتشاف خطير!!الأنجيرة الحبشية: ما ياها الكسرة السودانية ذاتا .. إكتشاف خطير!!

طبنجة ጠመንጃ طمنجا
كباية ኩባያ كبايا
شنطة ሻንጣ شنطا
قدة ቆዳ قُدا
كوشة ቆሻሻ كوشاشا
دبلة ደውል دِولا
طبق طعام ጠብቁ طبقا (في الأمهرية طبقا تعني حماية)
ضريب ድርብ ضريب
حكيم ሐኪም حكيم
حيل ኃይል حيل
شِفت ሸፈተ شَفتا
عمبسا አንበሳ ودي في السودان بقت "عمسيب"
مطرطش (متردد) ጥርጣሬ طرطري
طرى ጥሪ طرا
استنى አስተና استنا
دقيقة ደቂቃ دقيقة

وما تنسى (المكونن) يا إدريس
مك መኮንን مكونن

المك فلان والمك علان بوصفها رتبة قيادية،
أوعك تقول لي جات من الحجاز، وأصلها ملك، بزعل منك ترى.

مجرد عينة، دي في العامية السودانية جات من حيفا؟
وعادي ممكن نصنف المرارة والفتفت بذات الألفاظ دي ونلقاها مطابقة في الدلالة مع اختلاف المسمى.

أنا ما بتكلم عن أسماء مفردة، معظم المفردات المستعارة دي راسخة في اللغات الإثيوبية بتصريفاتها.
المفردات الأمهرية الفوق دي معظمها متصرف يعني فيهو الفعل والفاعل واسم المفعول وأي تركيب تتخيله.
يعني يتوفر ليها أبنية مصرفة في الإملاء وتراكيب نحوية وخصائص دلالية ومش مجرد مفردات متناثرة
أظن كفاك، شوف ليك حيطة تعصمك يلا.

الشاعرة قالت:
ما حرسو الجري وصدرك موشح بالدمى ما بخاف
فارس الحديد إن حِمي
توبك موشح بالدمي (باللون الأحمر)
...
جاء مرهون علي جفونو الدمي سايلات

الدمي (ደም) في الأمهرية هو الدم، لكن هنا الإشارة إلى النطق دا تحديداً.
ودا موضوع تاني يتعلق بالعربية شرق البحر وكيف أخذت الصوت ورمزت ليهو بنظام كتابة مختزل
دا لو حبيت تتعلم شيء عن الإيتيمولوجي بالطريقة السليمة،
مش تلطش التعريف من غوغول وتغوغي بيهو.


بالمقابل، نجد الشاعر في منطقة أخرى ضمن مسار ركب حاجّ تكرور يقول

شويفعونه ،
تقول مويةَ المحاية . .
تقولْ ، تداوى الزولْ ،
بِسيماتَه .. تقول نُقَاطْ
شِوىْ فى شِوىْ
يِسَوِن طَاطْ عِويناتَه

الطاط من هي التاط، تطاوين (البيض) والإشارة للعيون الكبيرة، تطاوين مدينة في تونس، والمفردة أمازيغية.
القالها اسمو (سيد_أحمد) الحاردلو يا إدريس، والحسانية خليط من لغات منها الأمازيغية.
فالشاهد إنو عامية السودان خليط الغالب فيه لهجة الحسانية على مستويات متعددة بسبب الهيمنة الإعلامية من جنس الكبكبة الحاصلة هنا دي
ولو المجال اتسع عادي نجيب الفيديوهات وأونسك عن المظاهر الصوتية النقلوها من موريطانيا الناس الوراء الحيطة.

فما تعافر ساكت عليك الله وركز على الشيء البتعرفو.


إدريس!
اللغات الإثيوبية تأثيرها طاغي حتى على اللغة العربية ذاتها، مفردات وأبنية ومعاني، شنو ليك!
عامية الوسط الأنت بسطحيتك عايز تبني حوائط وتعزلها خايف عليها من التكارير
فما عارف هل حتنزلها من السما قال يعني ولا كيف؟ جيت بالشرق أنا قاعد ليك
جيت بالغرب ديك بلاد تكرور تعاين ليك.

حأجي أكلمك في المرة الجاية عن الأسامي الموريتانية، ما تلاوز، دا كان سؤالك الرخيس.

____
تعال بعدها أعمل حيطة وزيطة وقول دي مشتركة مع الأندلس.

===============================================

Quote: و احتراما لوقتي و وقتكم الثمين حتى لايضيع في مماحكات و تصفية حسابات ليس لي فيها ناقة و لا جمل...

وقت شنو البقى غالي هسع!
البوست دا فتحتو أنا؟

يعني أبطل الاجتهاد في إزالة الوهم والغموض وأخليك تحلم؟
أمدرمان دي العاصمة الوطنية نخليها نهباً للمطامع والظنون !
يعني يا نقبل بأنها سعودية بالزندية يا كمان تكورك تقول حاتم داير يصفي حسابات!
ليه كدة ياخ؟

والمهزلة أنكم بتستشهدوا بدستور ود ضيف الله وما قريتوهوا ذاتكم
ما سمعتوا منه غير الفقرات الحلوة البتكرر نسبة فلان إلى فلان
طبعا دي شهادة التفاصيل الداعمة للكراتين المعلقات وكدة
عشان كدة المقتبسات السريالية المخزية دي جات صادمة
زول يشيل جمل ويطير بيهو فوق!
أصلو هليكوبتر إسكايهوك؟

على العموم بجيك المرة الجاية أكلمك عن أمدرامان أو أم دلمان بحسب رؤيتي
غير الملزمة.

Quote: و لكن...ربنا يشفي النفوس المريضة..

طيب كدي عاين معانا هنا

Quote: شجر الغضى الذي يحتمل بل في أغلب الظن كان يكثر في منطقة امدرمان

يعني (تفترض) وجود الشجر احتمالاً ومن بعد مظنة غالبة وطاااااخ السعودية؟
خلاص كان كدة سنار المحمية بالنيم تبقى هندية!
مايرنو-براديش، ميري مهبت أنا وياكا فيها نعيش.

الاستطراد والتماهي في تسمية أمضرمان
الأرنب والقنفذ والشجر يثبتان
فبأي معالم عروبتها تكذبان!

هسع النفس المريضة مكانا وين بيني وبينك راس كدة؟
التداعي بالسهر والحمى دا هسع في ليهو داعي؟
هم طالبوا بأمدرمان ولا كبكبة ساكت؟
هههههه

___
الحب الطاهر.