Quote: يا حاتم .. قبيلة جهينة .. هي التي أسقطت سوبا .. وإليها ينسب العبدلاب .. وجهينة هي فرع من المجموعة القحطانية .. ولا أنا غلطان.
يا بريمة أنا والله أحبك في الله! بس كمان ما تجي زعلان وترقع لي كلام أنا ما قلتو دا ذاتو ما نوع الكلام الأنا بقولو يا بريمة يا أخوي، القحطنة دي ما حقتي أنا كلامي زي مشرط جراح الباطنية، شييييت، الجلد والمصران سوا بجرة واحدة.
وياهو زي ما أنت شايف جك جرك، جهينة شنو معاك ياخ، أصبر شوية نوريك باقي الجهانات بالخلقات ساكت قعدناك مع ناسك هداك أنت متحكر في نصهم يا حلاتك، ناقصك شنو تاني؟ وطبيعي جدا تنتقل اللهجة وتنتشر بالاستعارة الواحدة دي، سنتين كفاية على الطفل يتعلم اللغة بلسان أهلها التحت دا كان أمريكي؟
الباقين ما (يزازوا)، الصنف التاني للعمة والجلابية الأمدرمانية السمحة ديك، ذاتا موريتانية طق طرق. بس أرخص شوية يعني من الأبهة والعظمة بتاعة سلاطين سكوتو الفوق ديل.
___ نجيبا ليكم؟ قصدي جلابية موريتانيا، ولا ما دايرين!
==============================
Quote: خلاص "تاورك " وجع الضرس قال نشروها في طريقهم للحج ,,
والله (الثائر) انت لو جينا للجد يعني!
Quote: "السر شنو في انه اللغة العربية في السودان متركزة في وسطه ، بينما هي محاطة من الجهات الأربع شمالا وجنوبا وشرقا وغربا بلغات غير عربية؟ العرب الفي الوسط ديل قاموا بروس؟"
نعم هذه النقطة هامة وجديرة بالانتباه . معروف ان وسائل انتشار الثقافة في الفترة التي سبقت عصرنا الحالي كانت تنحصر في الغزاة ، التجار ، المبشرين ، المهاجرين الخ ، اي عبر التفاعل المباشر بين الاطراف او الثقافات او الحضارات. بالتالي كانت الثقافة تنتشر عبرالجغرافيا وليس من المعقول الحديث عن عملية تعريب واسعة في الوسط الا بواسطة غزاة اقوياء اجتاحوا البلاد من اي من بواباتها وفرضوا ثقافتهم قسرا ، وفي هذه الحالة كان الارجح ان تبدأ عملية التعريب من البوابة نفسها ، هذا مع العلم بأن هذه القوة الغازية التي افترضناها لم توجد من الأساس لأن العرب لم يتمكنوا ابدا من اجتياح بلاد التوبة بالقوة العسكرية ، لكن يوجد بند في اتفاقية البقط يعزز من الادعاء بدخول مهاجرين عرب من الشمال عبر بلاد النوبة الى وسط السودان ، وفحوى البند هو انه "يجوز للعرب المرور عبر بلاد النوبة مسافرين غير مقيمين " ولولا وجود نية من العرب الدخول الى السودان لما تم تضمين هذا البند في الاتفاقية من الاساس ، لكن تبقى قضية حجم هذه الهجرات او كثافتها محل جدل وعصية على التحديد . Re: د. النور حمد لمحمد لطيف: نحن لا نختلف عن ار�Re: د. النور حمد لمحمد لطيف: نحن لا نختلف عن ار�
كل العملتو أنا هنا مجرد ريـال وجدعتو، ياهو النطيت ليهو أنت، ما أخير ليك بدل أحميهو واتشك بيهو؟ حايم بطقم أسنانك كايس ليك قدوم "عربي" تحشروا فيهو ولروحك قدومك درج يلهله وبتقول "السر"! أنت قايل (الهجرات) الشايل الكوبس حقها وبتمثل إنو وراصك ومقطوع ما عارف تركبوا وين دي مسألة صعبة؟ ما ياها قربة موية وشوالين دقيق وملوة شرموط وصرة ملح وعلبة أمنيج، ما يوقفك في طريقك إلا النيل، وتقعد بس! فما قاموا بروس، بس ما كان في مجروس، انتو موريطانيا دي فاتحين ليها كدة ليه يا أخوانا تغازلوا في (الأسرار)؟ أنت مفتكر أسامي (الحاج) و(الشيخ) دي مالية وسط البلد عطية سماوية قال يعني ولا مستوردة من إدلب والحسكة؟
ما ياهو الواحد كان بيطلق مرتو ويودع وداع الميت ويمشي (حاج) ويرجع (شيخ) صعبة دي؟
المقرن كان في ولاتة يا "إدريس" ومنها بيتلاقوا أهل السنغال والكمرون وغيرهم مع الفقراء من حجاج شنقيط، ومكة جاك زول طبعاً دا مسار الفقراء الانتشرت بيهو اللهجة الحسانية في وسط السودان (نقول اللغة العربية) عشان ما تزعل لأنو الأغنياء كانوا بيحجوا بمسار تاني يمر بالجزائر وتونس حتى سيناء ومنها للحجاز، والغالي بغلاوتو ترى يا إدريس وعادي محل ما يقعدوا يسكوا اسم جديد، العرفهم شنو بالمكان؟ تلقى المويلح في موريتانيا ونسخة تانية في السودان، نسخة رديفة (exonym) يعني.
___ فأصبر لي بجيهك، وعسى أن تكرهوا أشياءكم.
Quote: أها وقبل ماا ينشروها الناس كانت بتتكلم شنو ؟
ما كانو فاضين للكلام يا أخينا، شغالين. كانوا بتواصلوا برموش عيونهم والحواجب والكتافين، تخيل! لأنهم كانوا منهمكين في رعاية حضارتهم بمعانيها ومبانيها ومنجزاتها يلا دا يفسر من ناحية تركز اللهجة الحسانية في بقعة صغيرة محاطة بكل اللغات الأخرى ويفسر برضك إهمال الآثار في ذات مسار (الهجرات) شفت كيف، الآثار الاشتكي سيد البوست من "انعدامها" زول يجيك عدمان إلا من دراعة ودوبيت وخربيت من بلد المليون شاعر دا ترجى منو يحيط حضارة أصيلة ومستقرة بالرعاية؟
إذا كانت نواقشوط تأسست سنة 1960 وناس البوست دا أحياء يعاينوا، أي نعم والله نواكشوط عندها (حجر أساس). وخزان سنار اتعمل سنة 1913، دي معلومة مجانية مني ساكت كدة للناس المستغربين في الإعياء والخراب الحاصل لكل الوطن مش بس سوبا.
الفوق دي مفردات من اللهجة العامية السودانية مش؟ لا أبداً، دي عينة مفردات من اللهجة الحسانية، حقت موريتانيا، والما مرتاح للحقيقة دي يمشي يسأل كبارو.
Idris, take note please.
بل حتى الإيماءات والعلامات! الدقيقة 36:36 تقوم "مكفولة" تعمل "شيب شيب شيب" بضروسها دلالة النفي لما سألوها من الفشار اسمه شنو
يبقى أقول للنيس بتاعين "لسان العرب" الدايرين يعيدوا بيهو تسمية أفريقيا جت عليها ياخي عادي نستمر معاكم في اللعبة الاستحواذية الانتهازية دي، أمسكوا كوستي الواحدة دي، كويس معاكم!
أها، دي أصلها (كَوْسَتِي)، يعني الكوسة بتاعتي! المنطقة زراعية وتنتشر فيها بساتين الخضار، من زمان بعيد، منذ دخول العرب السودان نبات الكوسة ينمو في اقليم الهلال الخصيب بلاد الشام والرافدين، لعل الشوام جلبوهوا معهم للمنطقة أ.هـ.
أها، نمشي على واشنطون وأرجنتينا وتاناريف ولا كيف؟
ولو بالطريقة دي نعرب معاكم الدنيا كلها، الصعب شنو، نفتش ليكم جحار نجد والحجاز وطليطلة ذاتا ونكوس البريحكم.
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
حاتم إبراهيم
فيس بوك
تويتر
انستقرام
يوتيوب
بنتيريست