|
طــعــم الـقــهـوة
|
كان ذاك الصباح كسولا ، وكنت انشط ذهني بالقهوة وبعض الذكريات ، ارتمي للانتظار فريسة اجلس بين قدمي خالتي اسيا وهي تعتمد لي كوب قهوتي الصباحي ، لا شي اسخف من الاتنظار .. فالحبيبات في بلادي يعتلين شرف التاخير .. إلا هي كانت تحترم الزمن كأنه يخبي لها العديد من المفاجات . راحت عيوني تتامل حركة الجامعة في هذا الصباح ، اشم في الافق رائحة بنبان ، وما ان انصرفت الرائحة مسرعة من زهني عندما جلست فتاة جميلة تنتظر بدورها من تحب ، لماذا تاخرت ؟؟؟؟؟؟؟ هي التي تحسمك في صرامة ان تهاونت في الزمن ، يعتصر الزنجبيل حلقي ، انظر في حب الي خالتي اسيااتوه في القهوة .. صباح النيل يازول صباح الخدر الشعبي حسن حمدون وطلته الجميلة علاقته بالجامعة تمتد لزمن اتحاد الانتفاضة ولكن هل هو من ضمن طلابها ام .. لا احد يدري ولكنه بشوش وحميم .. ناولني كيس الصعوط وتثاقفنا وتحدثنا في ساسة ... ثم لمحتها من بعيد كم كانت مرهقة هذا الصباح - معليش كان لازم امر علي الايام عشان في موضوع مهم جدا لازم ينزل صفحة بكرة - طيب كان تقولي انك ح تتاخري -ما كان في سكة ، بعدين عثمان شنقر اخدني في همومو وهموم الصفحة و اليوم عموما لك الحب ... بدأت لي شاحبة وساهمة ، ثم قالت وفجاءة تعرف انو النظام ده دخلنافي ورطة ، رشفت قهوتها وواصلت دون حماس لكن ده كلو كويس عشان تاني مايتمررأي تسويف في الشعب دة ، انت لسة زعلان ، لا بس بحاول اعرف نزلت ياتو موضوع ، ذكرتني .. تناولت ظاهرة في الجامعات والمعاهد العليا بدت تستشري وهي ظاهرة الزواج الصوري او العرفي ، ماعارفة لكن في ظواهر بتشبه مجتمعاتها او بكون جزء من متراكمها اليومي وحراكها لكن الظاهرة دي ما عندها اي علاقة بتقاليد شعبنا واعرافة وثقافته ، ببقي السؤال الحقيقي كيف ومتين اندست ومنو المستفيد من انتشارها هي لي درجة انها تتسمي ظاهرة ؟؟ كنا قد قطعنا في ذلك الوقت شارع الحرية وبدأنا نندمج في الزحام في طريقنا الي ابو جنزير ، ما تتخيل العدد الفعلي بخصوص الموضوع دة كبير كيف وسط الطلاب ، طيب ليه الجامعات بس ، ممكن في المجتمع موجودة لكن ما بالشكل المقلق دة في الوسط الطلابي ، ودة بعود لي حركة الطلاب نفسهم وقلقهم الدائم ، ولكن نحن شعب مامكبوت برغم القوانين القمعية اللي وضعتها الدوله لمحاصرتنا لكن نحن عندنا زقاقات في الخاص السلطة نفسها ما بتقدر تتسرب ليها وده باين في علاقاتناالانسانية وحتى في علاقتنا العاطفية انا وان....واعتراها شي من الخجل ، وواصلت انا بفتكر انو الموضوع ده لو الدين بدعمو هو في الاساس تحايل علي الدين نفسه وممارسة للجنس بشكل مبرر.... انا بتفق معاك لكن ببقي في المعالجة شنو .. في تقديري يتم تكثيف كبير حول الموضوع ده وتوعيه كبير وسط الطلاب ... بالمناسبة الموضوع دة اتناقش في التلفزيون وجابو مسئول كبير وقال كلام مضحك هو كان بيشجع الشباب علي اللي مامستطيعين يتزوجو زواج عرفي للحد من انتشار الايدز اللي الاحصائيات اقلقت المسئولين .. ما عارفة يا حبيبي انا ماشاهدت التلفزيون لي زمن لكن ما تستبعد انو ده يكون طرح النظام اصلا ، لانو اي تفصيله مابتشبه الشعب ده بتطلع منهم وزي ما قلت ليك واضح انو كل المتورطين في الموضوع ده اصحاب هوس ديني
الان في الحافلة المتجة لبحري وهي مواصلة لحديثها بذات الحماس ، الركاب يسترقون السمع وما ان كسروا كل حواجز الوقار وكانت المساهمات و التعليقات الساخرة من الكنبة الطيش الي السواق .... و الجميع في انتظار عدد بكرة
|
|
|
|
|
|
|
العنوان |
الكاتب |
Date |
طــعــم الـقــهـوة | elnadeif | 08-05-02, 11:50 PM |
Re: طــعــم الـقــهـوة | Tumadir | 08-05-02, 11:56 PM |
Re: طــعــم الـقــهـوة | DEEK_ALJIN | 08-06-02, 07:08 AM |
Re: طــعــم الـقــهـوة | banadieha | 08-06-02, 07:17 AM |
Re: طــعــم الـقــهـوة | الشرغوف | 08-06-02, 07:57 AM |
Re: طــعــم الـقــهـوة | أبنوسة | 08-06-02, 12:28 PM |
Re: طــعــم الـقــهـوة | dreams | 08-06-02, 02:14 PM |
Re: طــعــم الـقــهـوة | dreams | 08-07-02, 08:52 AM |
Re: طــعــم الـقــهـوة | elnadeif | 08-07-02, 02:30 PM |
Re: طــعــم الـقــهـوة | elnadeif | 08-07-02, 03:01 PM |
Re: طــعــم الـقــهـوة | DEEK_ALJIN | 08-08-02, 07:04 AM |
Re: طــعــم الـقــهـوة | dreams | 10-04-02, 10:36 PM |
Re: طــعــم الـقــهـوة | فتحي البحيري | 06-26-03, 01:48 PM |
|
|
|