سؤال ل موصلي وعزيز

Quote: يا أبسن رمضانك كريم القصة في التعود غالباً والاعتياد تتذكر ايم الإنقاذ الاولى (أنا ماشي نيالا اوووو) ترديد موسيقى معينة على اضانك بتبقى هي الاستنادرد وهي المعيار، وبيبقى الغناء القديم دايماً هو أجمل الغنا واجمل الالحان يا خي أنا لمن طلعت برة السودان حتى قدرت اسمع صوت الكمان الجد جد عندنا ناسنا عاملين فيها شفوت بيغنو من غير نوتة تسجيل اغانينا كعب وما بتسمع وموسيقياً فيه نشاز ولمن اتعاد توزيعه بتلقى التسجيل القديم دا كروتة ساكت. شوف تسجيل وردي بتاع الطير المهاجر والفرق بين التسجيلات القبله بالنسبة ليك ما حتستسيغ غناء كتير من الشباب لأنك متعود وعندك معيارك بتاع ود اللمين وعركي وكابلي. الجيل البعدك دا بستسيغ الغنا بخشم محمود عبد العزيز، وعنده أغنية (الولد الشفت)  أجمل من الطير المهاجر وممكن لو سمع الجريدة يقول ليك دا غنا دا. الغنا مدور فينا صباح ومساء شيء رادي شيء طهور شيء عرس والتلفزيون وعلى ذلك قس لمن ناس عبد القادر سالم كسروا الحاجز وزغموا اغنية كردفان في الموسيقى الرسمية لقت رواج ناس الانقسنا ما قدروا وناس الوطاويط ما قدروا والماهرية ما قدروا والصبحة ما قدروا وضاع غنا سوداني لو كنا بنسمعوا كل يوم وكلساعة كنا حنستسيغه ويعجبنا  بحكم التعود. أبوي الله يرحمه بيسمع ام كلثوم بالليل كل يوم زمان، أول ايام أنا مغيوظ وما فاهم الموسيقى وشايف انه الموسيقى في جهة والكلمات في جهة تانية وبالزمن بقيت احب اغانيها بالعود والسماع اليومي. أها أو ما طلع محمود عبد العزيز قبل الانقاذ ذاتها عندي قريبي بيشغل محمود يومياً أها انتهيت إنه عجبني صوته وتحديداً كان بيغني اغنية بتاعة ترباس واغنية خضر بشير. نفس القصة حصلت لي مع حنانا بلوبلو وزهرمان واي فنان ما حبيت غناءه بشغل اغانيه كل يوم بنتهي باني بحب غناءه جربتها مع الفنانين الافارقة نجحت مع البرازليين نجحت مع الجامييكين مع الهيب هوب مع الكلاسيك ميوسك وهلما موسيقا. التعود التعود التعود مسألة مهمة وبالمناسبة أنا من معجبي (الزنق وموسيقته) وبسمعها وبسمع مصطفى سيد احمد وعركي والبعيو وقسمة ونصرة (آييي ست الاسم وفيفتي سينت حمد البابلي وكلهم بتعجبني أغانيهم. أما غناء راقي وغناء هابط، فدا اختيار طبقي ما بيفرق معاي كتير البيشوف الغناء الآخر هابط بيستند لمعاييره هو ، لمن نسمع أغنية اووووه دشكا دشكا من موقعنا الطبقى والتعليمي حنحدد مكانها، فلو انتا متعلم وطبقة وسطى حتشوفها هبوط من مقامك التعليمي والطبقى وأنا الأمي والعامل البسيط حتعجبني أغنية هي وحتعجبني برضه أغنية (مغص يا مغص يالعزابة) لو شغلت أي موسيقى ما بتعجبك لمدة اسبوع حتنتهي بأنها تعجبك