اطلقو سراح الوطن ....اطلقو سراح عبد الغنى كرم الله ..

Quote: ملخص لزيارة منزل أستاذ عبدالغني كرم الله .. قبل أيام اتفقنا نعمل زيارة لمنزل الاديب والروائي القاص عبدالغني كرم الله ، اللي هو معتقل لمايقارب الشهرين وحتى الآن بعد الاعتقال التعسفي اللي حصل ليهو في يناير 2018 مع الآخرين أثناء المشاركة في الاحتجاجات السلمية على زيادة الأسعار وتراجع الاقتصاد السوداني ... الدعوة لزيارة اسرته كانت عامة يوم أمس السبت ، من الساعة 4 عصرا وحتى الساعة 10 مساء بمنزله الازهري - جنوب الخرطوم . عدد الزوار تجاوزوا المائة شخص من أصدقاء واقارب وزملاء وتلاميذ.. إضافة لعدد الأطفال ... دا غير الناس اللي جو من خارج السودان ، زي صديقنا الزاكي يعقوب اللي زامن حضوره مع برنامج الزيارة ... البرنامج بدا بضيافة محترمة جدا وكانت الأسرة قد أعدت وجبة غداء للحاضرين .. ثم الشاي والقهوة ... كلمة ترحيب الأسرة قدمتها امنة عبدالغني كرم الله "12 سنة " شكرت فيها الحاضرين على زيارتهم واتمنت لو كان ابوها موجود وقالت انو حيفرح وينبسط لما يطلع ونحكي ليهو ، وقالت لازم نجي تاني عشان نحتفل يوم إطلاق سراحه وأنها مشتاقة ليهو جدا .. بعد داك اتكلم استاذنا الاديب الفنان نادر السماني باسم اصدقائه وتحدث عن علاقته باستاذ عبدالغني وعن عبدالغني الفنان المختلف ، والذي يشبه كثيرا الاطفال في صفائه وذكائه وقدرته على الإبداع ... الشاب الفنان بكري العمدة غنى بالعود .. غنى ودندن .. غنينا معاهو واطربنا شديد .... مي محجوب شريف قالت كلام سمح شديد عن أستاذ عبدالغني ، وغنت اجمل غنا وفي اللحظة ديك نقطة ضو كبيرة كانت . .. غنت لمحمود كرم الله وآمنة كرم الله ... ضحى عادل "14سنة " قدمت قراءات و مقتطفات من رواية آلام ظهر حادة .. وبرضو حكت عن بابا غني باعتباره أحد مدربي مبادرة تدريب الأطفال لصناعة الفيلم وزول مؤثر جدا .. قراءات شعرية رائعة جدا من مغيرة حسين حربية وأجمل اختيار كان .. بالإضافة لوئام شوقي اللي قرت نصوص وحكت كلام عظيم عن استاذنا عبدالغني في الوكت دا بدا الفنان اشرف فتح الرحمن في رسم بورتريه للأستاذ عبدالغني، أبدع في تفاصيله لدرجة كبيرة جدا ، إضافة إلى الفنانين التشكيليين امير صالح " فلاي" ويس شمس ، رسموا وكتبوا على حائط المنزل في زمن وجيز جدا ... بعد كدا اتعرض فيلم " لِمَ لَم يَسِـر" قصة وسيناريو وإخراج امنة كرم الله .. فيلم يحكي عن القطارات في السودان وحب امنة ليها وقصة جميلة مع الموضوع دا .. وفيلم تاني من بطولة محمود كرم الله "11 سنة " وإخراج طه عثمان "8سنوات " الجميل في الأمر انو حائط المنزل مصمة عليهو شاشة سينمائة كجزء اساسي مطل على الحوش الداخلي ،، حاجة جميلة جدا وفيها الف رسالة ، استاذنا عبدالغني كان نفسو يحضر اول عرض فيها بس ماتم.. وافتتحناها قبليهو الكاتبة ايماض بدوي اتكلمت وحكت عن عبدالغني كرم الله وأجمل المواقف البيصنعها وأهمية وجوده وسط اهله واسرته وبلده ... ايضا تم عرض فيلم عن أهمية الكتاب في حياتنا وماتصنعه القراءة في شخصياتنا ، مشاركة من ناظم كمال الدين.. الأستاذ عثمان في ختام البرنامج شكر الحضور على الزيارة وكان مبسوط بجية الناس واللمة السمحة ... قدم الامسية الصديق ياسر فائز بطريقة بسيطة ولطيفة .. •الزيارة دي بالذات كان ليها أثر كبير جدا عند كل الحضور والمتابعين للبث الحي رغم انو كان متقطع .. حتى وانت في معتقلك بس كل يوم انت الاقرب الينا .. الحرية للأستاذ عبدالغني الحرية لجميع المعتقلين ...