صدقني كلام وضاح ، وعلى بوب..في الصميم.. مش لأنهم اتفقوا مع بريمة..لكن اعتبرها قراية محايدة ولازم تخلي بالك منها..(بالطبع التحية لوضاح وعلي بوب..والأخير ده حاتيها معانا قرض لكن زول عندو القدرة على التمييز بين الحاجات..سلامات يا ول ابا علي بوب..وكل سنة وانت طيب يااااااااااااااااخ..!!) بريمة زول كويس يا محمد.. ولو مغالطني ارجع شوف ارث المزيكا السودانية الوثقت ضربة قردود ام ردمي (دي كانت فرقان ناس بريمة يا محمد ) و جواب الزريقة محمد..وعلي سلام.. والمندوب ميرغني..(الناس ديل بريمة عارفهم زي جوع بطنو)..!!
صديقنا كمال عباس (السد العالي بعرفنا ، وما يعادل دفاع الهلال ناس تنقا والثعلب ويور ذاتو..ناهيك عن طارق احمد ادم..ياخي ضبانة ما تعدي بينهم..!!).. سجل ليهو توثيق..عجيب فيهو سيرة ول ابا فضيلي جماع..!
عارف يا كمال ، نحن العطاوة ، ذاتنا عارفين انو فضيلي زول قومي ووطني ..عشان كده ما قاعدين نقحمو في حاجاتنا المحلية.. لأنو زول ضو.. الضو ده النخبة السودانية بتسميهو وطني وقومي وشنو كده ما عارف..وراجع المنبر..حصل مرة قابلك انو بريمة قاعد يتلداح مع فضيلي..؟؟؟!! لست بالضرورة ان نعرف وطنية فضيلي جماع ، لأنو وقف مع الحركة الشعبية أو تضامن مع قريبو دينق الور أوالبينو أو حت ياسر عرمان ، وانما وطنية فضيلي نراها في مجالي ابعد واعمق ، قد تكون غايبة عن فضيلي في ذات نفسه..!!
فضيلي الذي يغني في اواخر ايام ديكتاتورية جعفر نميري ، فيكتب من مدينة الأبيض (الغناء زمن الخوف) ليدشن مفهوم ثقافة الخوف التي اكتشفها نشطاء وناشطات شيلي في امريكا اللاتنية ليغنوا رغم خوفهم ضد ديكتاتورية بينوشيه..!!..فضيلي الذي يكتب (الغناء زمن الخوف ) ثم يكتب بعده ، الياس فتح الرحمن (صوت الطائف اخر الليل) او محمد محي الدين (الرحيل على صوت فاطمة)..!!..هذى هي وطنية فضيلي التي نعرفها ، ونحن نضحك حينما نراها يباصر الوطنية في دعم حركات مسلحة مثل الحركة الشعبية..!!
وتظل للرجل وطنيته التي يفضلها ، ولكنا نحن ، جماهير المعجبين بشعره وتجربته الأدبية من (دموع القرية ) ، (المهدي في ضواحي الخرطوم ) ، (الغناء في زمن الخوف) ، (شارع في حي القبة) ، نحن من نرى أن افضل ما قدمه لنا من تجربة الوطنية ..اغنيات من شاكلة (كلم قمارينا)..حينما غناها الليجند عبد القادر سالم ، فكان صداها تجربة الشابة اميرة خير..وهي مواطنة ايطالية من اصول سودانية .. عندنا هذه هي الوطنية والقومية حينما تدخل اعتاب اوربا بجراة..ياخي ان شاء الله من باب الغزو الحضاري المضاد..!!
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة