نعى اليم ...... سودانيز اون لاين دوت كم تحتسب الزميل فتحي البحيري فى رحمه الله
وداعاً فتحي البحيري
|
|
 Re: طاحونة العجب (Re: درديري كباشي)
|
طاحونة العجب
18
جلست للمذاكرة قدر ما حاولت أركز لكن كل الأوراق أمامي أصبحت مليئة بحكاية العجب العجيبة والهواجس تتراقص أمامي .. إذا أعتبرت أن كل ما عرفته الآن يعتبر سرا حسب فهم جدي وحرصه عليه . لكن أين الحوجة لجعل كل هذا الحكي يعتبر سرا الا أذا أرتبط بأمر أخطر يجعل كل ما يحيط بالقصة يدرج في ملف السرية .. أنا في سرحتي جاء شقيقي الأصغر عماد وقال لي محمود منتظرك جمب الباب .
قلت له : ليه ما دخل .
قال الصغير :أبا يدخل .
خرجت لأعرف ما لمحمود ..
وأنا خارج قابلتني أمي : أها متين قريت جريت تحوم تاني .
قلت لها : محمود منتظرني في الشارع .
قالت : ومحمود عايز مننا شنو تاني مش أمته وصته ما يباريك .
وضعت سبابتي على فمي .. خفت أن يصل صوتها لمحمود وأنا أعلم أنه شخص حساس جدا كلمة بسيطة ممكن تؤذيه وتجرحه .
تأففت أمي وعادت الى مطبخها .
في الباب سلمت على محمود وحاولت أن أجره للداخل رفض .. وقال لي أمي واقفة بعيد وعايزاك .
فعلا لاحظت شبح امرأة في الظلام واقفة بعيد من بيتنا رحت ناحيتها ووجدتها عمتي نفيسة والدة محمود .
أول ما وصلت مسكت حضنتني وبكت .. وهي تقول معقولة يا أحمد أنت زعلت من كلامي وقاطعتنا ؟.
قلت : أبدا يا عمتي والله بس أنشغلت بعدين الموضوع ياداب تم يومين .. يعني لسع ما وصل لدرجة المقاطعة وأنا أصلا ما أقدر أقاطعكم حتى لو طردتوني أنتو حاليا أهم جزء في حياتي .
عادت وعانقتني من جديد .. قالت انا قلت كدا لمحمود وقلت ليه أحمد يستحيل يقاطع عمته من هو صغير يحبو يتعلق بي عندما أزروهم في البيت . لكن هو ما صدق قال أنت بقيت تجي جمب باب المدرسة وما بتدخل عندنا .
قلت : أبدا يا عمتي أمس كنت رائح الطاحونة وبعد جيت انشغلت مع جدي .. كان عنده مراجعة حساب وكدا بس لكن ما خليتكم والله .
قالت موجهة الكلام لولدها : شايف يا محمود قلت ليك أحمد يستحيل يقاطع عمته .. عادت الابتسامة لمحمود .
قالت : يلا أرح أتعشى معانا ما أشتقت للكسرة بالسخينة بتاعة عمتك ؟
قلت : معليش يا عمتي والله عندي مذاكرة كثيرة لكن بكرة أكيد الغدا معاكم .. الا اذا في طارئ جديد .
قالت : خلاص يا محمود يلا مش سمعت بأضانك أحمد مستحيل يقاطع عمته .. وقالت موجهه لي الحديث .. تعرف يا أحمد محمود من أمس لا بيذاكر ولا بياكل قال زعلان مني لأني زعلتك .
قلت : لا يا حودة معقولة أنا ما في حد في الدنيا دي يزعلني منك أنت الا أنت براك تكرهني .
قالت : شكرا يا أحمد الله لا يجيب زعل بيناتكم .
وذهبا الى دارهم وعدت لنوبة تحقيق جديدة مع أمي .
- أها محمود ماله كمان ؟.
- محمود جات معه عمتي أعتذرت لي عن كلام أول أمس بعد جلدة المظاهرة .
- أعتذار شنو كمان البينفع كان تكلمني عشان أطلع أوريها الشمس بالليل كمان .
- يا أمي أنت كمان ما تكوني شريرة للدرجة دي . ديل ناس مساكين وعايزين يمشوا جمب الحيطة ويربوا عيالهم بدون مشاكل.. ما نحملهم فوق طاقتهم عليك الله .
سكتت أمي و أخذت تنهيدة طويلة هزت رأسها مؤمنة على كلامي ثم استغفرت وعادت الى مطبخها من جديد .
عدت الى المذاكرة أحاول أن أوجه تركيزي على الكتب .. حتى غلبني النعاس في العاشرة مساءا عدت الى النوم .
لصباح يوم جديد
مدرسة ودروس
تسميع ورياضيات
واجبات وحلول
تجمدت ساعات يومي في الروتين أصبحت ساعات المدرسة والوجبات والواجبات كأنها مواد مالئة تعبئ الفراغ فقط لتعطي حياتي سماكتها وتماسكها .. جل تركيزي محصورا بين شفتي جدي .. ماذا سيقول اليوم ... قبل ذلك هل سأجد فرصة .. هل سيناديني .. أم أذهب له من نفسي .. كيف سأقنع والدي .أنا يمكن حاليا لا أحتاج أكثر من ثلاثة ساعات على ما أعتقد ستكون كافية لسبر غور العجب وفك طلاسمه ..
قرع جرس نهاية اليوم الدراسي الحمد لله وعدنا الى بيوتنا ..
أول ما وصلت البيت شغلت مخي فكرت في حيلة تتيح لي الذهاب الى جدي ..
دخلت المطبخ كشفت الحلة ( الطنجرة الضخمة ) وجدت أمي طابخة بامية مفروكة .. وخرجت متسللا من جديد . .رسمت الخطة يا ريت تنجح .
وجدت أمي في الصالة تمشط في شعر أخواتي الصغار .
قلت : يا أمي أنا جوعان غدانا شنو اليوم .
قالت : غدانا الليلة بامية مفروكة بالكسرة .
قلت : يا سلام أكثر طبيخ أحبه وأحلى شي بالكسرة كمان.. الظاهر أنا طالع شبه جدي .
قالت : كيف يعني شبه جدك ؟.
قلت : جدي يقول أكثر أكلة يفضلها هي البامية المفروكة مع الكسرة .. وكمان قال ما في مرة في الحيشان دي كلها تقدر تظبطها زي شادية مرة عبد الله ولدي .
ابتسمت أمي بفرح وقالت صحي قال كدا ؟.. كان كدا أنا أملح ليك صحن كبير شيله وأمشي أتغدا معاه .. خلينا نحن ننتظر أبوك .
ياه كدت أنطط من الفرح .
يلا نتلاقى في الغدا
نواصل
|
|
 
|
|
|
|
|
| العنوان |
الكاتب |
Date |
| طاحونة العجب | درديري كباشي | 02-19-16, 04:26 PM |
| Re: طاحونة العجب | درديري كباشي | 02-19-16, 04:30 PM |
| Re: طاحونة العجب | درديري كباشي | 02-19-16, 04:45 PM |
| Re: طاحونة العجب | درديري كباشي | 02-19-16, 06:05 PM |
| Re: طاحونة العجب | درديري كباشي | 02-19-16, 06:58 PM |
| Re: طاحونة العجب | درديري كباشي | 02-19-16, 08:35 PM |
| Re: طاحونة العجب | درديري كباشي | 02-19-16, 09:38 PM |
| Re: طاحونة العجب | درديري كباشي | 02-20-16, 06:10 AM |
| Re: طاحونة العجب | درديري كباشي | 02-20-16, 10:16 AM |
| Re: طاحونة العجب | الجنيد حمد | 02-20-16, 11:36 AM |
| Re: طاحونة العجب | درديري كباشي | 02-20-16, 04:13 PM |
| Re: طاحونة العجب | درديري كباشي | 02-20-16, 05:12 PM |
| Re: طاحونة العجب | درديري كباشي | 02-20-16, 10:13 PM |
| Re: طاحونة العجب | Saifaldin Fadlala | 02-21-16, 08:13 AM |
| Re: طاحونة العجب | درديري كباشي | 02-21-16, 09:14 AM |
| Re: طاحونة العجب | درديري كباشي | 02-21-16, 10:31 AM |
| Re: طاحونة العجب | درديري كباشي | 02-21-16, 04:18 PM |
| Re: طاحونة العجب | Salah Zubeir | 02-21-16, 05:22 PM |
| Re: طاحونة العجب | درديري كباشي | 02-22-16, 05:56 AM |
| Re: طاحونة العجب | درديري كباشي | 02-22-16, 06:27 AM |
| Re: طاحونة العجب | درديري كباشي | 02-22-16, 05:10 PM |
| Re: طاحونة العجب | درديري كباشي | 02-23-16, 06:14 AM |
| Re: طاحونة العجب | درديري كباشي | 02-23-16, 10:26 AM |
| Re: طاحونة العجب | درديري كباشي | 02-23-16, 05:04 PM |
| Re: طاحونة العجب | درديري كباشي | 02-24-16, 06:33 AM |
 Re: طاحونة العجب | Shueib Medani | 02-24-16, 06:49 AM |
| Re: طاحونة العجب | درديري كباشي | 02-24-16, 10:00 AM |
| Re: طاحونة العجب | درديري كباشي | 02-24-16, 10:01 AM |
| Re: طاحونة العجب | AL-Qassim | 02-24-16, 02:44 PM |
| Re: طاحونة العجب | درديري كباشي | 02-24-16, 03:38 PM |
| Re: طاحونة العجب | Salah Zubeir | 02-24-16, 04:04 PM |
| Re: طاحونة العجب | درديري كباشي | 02-24-16, 04:59 PM |
| Re: طاحونة العجب | درديري كباشي | 02-24-16, 05:00 PM |
| Re: طاحونة العجب | درديري كباشي | 02-25-16, 10:01 AM |
| Re: طاحونة العجب | AL-Qassim | 02-25-16, 10:24 AM |
| Re: طاحونة العجب | درديري كباشي | 02-25-16, 10:36 AM |
| Re: طاحونة العجب | AL-Qassim | 02-25-16, 10:48 AM |
| Re: طاحونة العجب | درديري كباشي | 02-25-16, 11:04 AM |
| Re: طاحونة العجب | درديري كباشي | 02-25-16, 05:09 PM |
| Re: طاحونة العجب | درديري كباشي | 02-26-16, 09:51 AM |
| Re: طاحونة العجب | درديري كباشي | 02-26-16, 12:59 PM |
| Re: طاحونة العجب | درديري كباشي | 02-26-16, 04:03 PM |
| Re: طاحونة العجب | درديري كباشي | 02-26-16, 05:56 PM |
| Re: طاحونة العجب | درديري كباشي | 02-26-16, 08:18 PM |
| Re: طاحونة العجب | درديري كباشي | 02-27-16, 10:58 AM |
| Re: طاحونة العجب | درديري كباشي | 04-09-16, 09:07 AM |
|
| |
فيس بوك
تويتر
انستقرام
يوتيوب
بنتيريست