للأسف غالبية المهاجرين السودانيين وطنيتهم (مضروبة) جدا!!

Quote: هشام أخوي إنتا قريت كلامي دا كيف، أنا بقول ليك ما في تخطيط وخطط استراتيجية عشان تستوعب الناس دي في أجهزة مؤسسيسية تقدر تنظمهم وتوفر قنوات تستقطب بيها دعمهم وتكون شفافة وخاضعة للمحاسبة أنا بقول ليك الكلام دا ولمن كانت المعارضة في أوج قوتها والنظام محاصرن المعارضة فشلت حتى في مناقشة تنظيم الناس وتفعيلهم، اللحظة ديك الناس البرة ديل راغبين في العمل وما لاقيين مواعييين. في النهاية الزول اللسه عنده حماس ومفتكر أدواته دي بتؤدي لنتيجة أهو مستمر. لكن تنظيم أي ثورة ما بيعتمد على المبادرات الفردية ولا على الرغبات، بيعتمد على التخطيط وتحضير المواعييين البتستوعب الناس دي وتوظفهم كأفضل عمل. أنا مشيت أدعو الناس للخروج في المظاهرة ولم سألوني الهدف شنو والنتيجة شنو الحتعملها المظاهرةة دي، ما كان عندي إجابة مدروسة ومعروفة سلفاً؟ بقيت اقول كلام عاطفي وأهو طلعنا وأنا من المنظمين ما كان عندي كلام مقنع. ببقى بعد دا لو ما قادرة تكون منظم وعندك مخطط وأوعية بتستوعب الناس دي حيكون الحال الإنتا شايفو دا، ودا الخلى نظام متهالك زي دا يقعد 26 سنة وربما ستة وعشرين قادمة. يبقى كلامك دا تقريري وعاطفي ساكت؟ لأنه السؤال الأساسي: ليه الأقلية دي بتشتغل والباقين ما بشتغلوا؟ الإجابة ممكن نناقشها في المحاور الأنا قلتها ليك فوق دي أو ممكن بشوية كسل ذهني أقول ليك: الناس العايشة برة دي ناس ما وطنيين، وناس قشرات ساكت عملوا فيها معارضة عشان يلقوا لجوء ويطلعوا يشتغلوا برة؟ ودا بيجاوب على سؤالك يبقى البيمنعهم إنهم ما وطنيين وانتهازين. أو البيمنعهم إنه ما حتاجين (عيزومة) لكن ما لاقين مواعيين متحركة ومنظمة وشفافة وواضحة الأهداف وبتشتغل وبتصلهم وتشركهم في قضية الوطن وهو رافضين دعمها. لمن كنا في التحالف الوطني وقوات التحالف وصلنا الناس وجو وحاربوا ودفعوا آلاف الدولارات، الهدف واضح والمواعين التنظيمية شغالة ولمن الموضوع فرتق نفس الناس ديل قاعدين ومعارضين لكن ما فاعلين لأنه ما عندهم الماعون والتنظيم والشفافية البيقدروا من خلالها يتحركوا.