أها قدر ما فكرت في توفير مصدر رزق عند الرجعة شان نستقر نهائي في بلاد السجم دي لقيت كل السكك مقفلة لانو سكك الرزق بقت محتكرة من قبل اولاد الحنوت الكيزان وربائبهم من الطفيليات الجديدة وكل السوق محتكرينو وكل الخدمة المدنية محتكرنها....يعني ما في طريقة غير تمارس المهن الهامشية البسيطة....طبعا ممكن افرش ابيع طماطم ومساويك وبصل قدام البيت القصر....لكن ما عارف هل القانون بسمح بده في الحي الراقي ده....يعني ما في كشه وحتي لو ما في كشه لا يجوز قدام الوليدات الواحد اشتغل شغلة زي دي والله حنعمل ليهم نفسيات...اها قلت اسوق تكسي ولا ركشة....برضو ده ما بجوز قدام ناس الحي القنادفة وقدام العيال برضو حنعمل ليهم نفسيات مع مجتمع البوبار....وبرضو ممكن اكون حلاق او طهار او جزار في الحي والحاجة كمان ممكن تكون برضو طهارة او داية او تنضف بيوت....برضو لا يجوز ناس البيت القصر الامريكي ده اشتغلوا شغل زي ده.....وبرضو حنعمل نفسيات للوليدات... واخيرا اتذكرت انو ممكن اشتغل ( مراق فلايت) لانو عندي هواية قديمة في الموضوع ده مع اخواني واخواتي من كنا صغار لمن الواحد تلم فيهو فليتة كنت متخصص في معالجتها وايضا ( المفهوق) فيهم كنت علي حسب طريقة حبوبتي الله ارحمها مستعد استعدل ليهو رقبتو بعد ( الانفهاق) والمهنة دي بتنفع في الحي الراقي المليان ناس تماسيح غلاد وكمان ليهم عناقر وبكونوا عاوزين مسيد عناقر ومريق فلايت ومن هنا ممكن تلقي سوق من غير منافس بس لكن لازم ندي المهنة اسم انقليزي رنان لزوم تجميل المهنة وتسويقها وتكون مقبولة قدام ناس الحي والمهم العيال لازم اكونوا مرتاحين ليها يعني لزوم التغطية نعمل ليها ويب سايت (فلايتست دوت كوم) ونعمل محل زي عيادة لمريق الفلايت في الحي الراقي...ونلبس ليها زي لبس الدكاترة ومعاها لقب دكتور لزوم تجميل المهنة بس بشرط ما اعرف بيها واحد من اهلنا في البلد لانو لو عرف قطع شك حيشيل بيها حالي قدام الخلوق في البلد واقول ليهم اخيرا ودهباني جانا من امريكا بعد تزعين سنة وبقي مراق فلايت في الحي الراقي ... لكن برضو في الحساب لازال لدي الفكرة القديمة بتاعة شركة (فراج الكرب الاسلامية) وهي افضل مشروع وما عندو منافس ابدا...وهو موضوع شركة حمامات متحركة نأجرها بدون مؤاخذه لبيوت الافراح والاتراح السودانية ولشركات الانشاء اي ( ادبخانات) متحركة ومجهزة بكل سبل الترويح البيولوجي في قضاء الحاجة علي ارقي الطرق العالمية ومجهزة بوضايات وايضا حجار جمار مجلوبة للمتأسلمين الجدد من جبل احد ومياه وضوء من بير زمزم... وبتكنولوجيا امريكية لن تسمح لك بدخول المرحاض الا برجلك اليسري وبعد الدخول ينبعث صوت يقول :( اللهم انا نعوذ بك من الخبث والخبائث بصوت ندي القلعة............ وعند الخروج ينبعث صوت اخر بصوت القلع عبد الحفيظ ( الحمد لله الذي اذهب عنا الاذي وعافانا)... وبدون مؤاخذة ستذهب الفضلات الي مصانع خاصة بالبزنس لمعالجتها كيميائيا لاستخراج السماد الطبيعي السوداني منها والذي يصلح في تطوير الانتاج الزراعي السوداني وما فاض باذن الله سيكون للتصدير وسيصنف السماد تجاريا في السوق علي حسب طبيعة مخرجيه ان كانوا ( جلابة او مهمشين) فسماد المهمشين ربما سيكون من الدرجة الثانية لانه يحتوي علي مكونات فقيرة من طبيعة الثقافة الغذائية للمهمشين واما سماد ( الجلابة) سيكون المفضل بسبب طبيعة تغذية مخرجيه.... ولكن اتوقع ان تصدر فتوي تحرم استخدام سماد الجلابة في الانتاج الزراعي والذي سيكون غذاء للناس لانه سماد ات من كروش تعتاش بالربا ومال السحت والحرام ولا نرضي لشعبنا ان ياكل طعاما ات من كروش الربا والحرام....من هنا سيكون سماد ( المهمشين) هو افضل الاسمدة السودانية بس المصيبة محتاجين نأكل الناس هناك وتحديدا اهلنا الفي المعسكرات ومخيمات التشرد ومناطق احزمة الفقر ان شاء الله عصايد فتريتة عشان ننتج السماد الطبيعي! عليه اعتقد ان مشروعي يمكن اكون ( المراقة) الوحيدة لاخوكم هباني للتعيش في هذا الوسط المليء بالتعقيدات......بس واحد زمان قال لي ما دام فيهو قروش مارقة من قنانيط الناس برضو حيسرقوا منك الكيزان اولاد الحرام... وحيضايقوك بضريبة جديدة اسمها ( قنيطية) لحد ما تفوت وتكره المشروع عشان احتكروهو لانفسهم!
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة