|
Re: فريـــــــــق زامــبل (حكاية) (Re: درديري كباشي)
|
خلصت الحصة وقرع الجرس .. ولكن قبل ما يتحرك الاستاذ تحرك خضر جزيرة بشلاقته المعهوده :: خضر : هوي يالبلوله قله التمرين الساعة كم قبل ما يطلع الخواجه ... البلوله سريع يا البلوله ... وقبل ما يتجاوب معه البلوله ..تحدث خضر مع الاستاذ خضر : هيا تيتشر التراين التراين تايم وات الاستاذ : What do you say? خضر : ياخي الواطه التملا خشمك قتلك الترين فوت بول فريق زامبل فريق زامبل ... البلوله يادوب شعر بالورطة خاصة بعد ان انفجرت ضحكة عالية من عصام لم يستطيع كتمها في هذه المره .. بدا يهمس لخضر البلوله : خضر ما تحشى خشمك دا وتنطم الله يقطع يومك ورطتنا . الاستاذ شعر بالبلوله يتحدث واخيرا قال ان بلوله هو من سينقذ الموقف وتحدث معه الاستاذ : Balola can you visit my office during breakfast please? البلوله من كلمة بريك فاست واوفيس فهم انه الاستاذ يريده ان يعدي عليه في فسحة الفطور واوما مؤكدا ذلك شكره الاستاذ وخرج .... هنا الفصل وبطبيعة حال وبصورة متوقعة يلتفت ناحية عصام الذي ظل طيلة الحصة ميت بالضحك المكتوم .... وبلوله يعرف تماما ان عصام هو مكمن الفضيحة التي ستتفجر اليوم وتغرقه ... وسال خالد مستعجلا عصام ومبادرا وهو يجلس جوار عصام خالد : ما تقلنا يا عصام الحاصل شنو نحن اليوم دا كله ما فهمنا منه شئ غير انه الخواجه عاوز يعمل لنا فريق كوره يسميه فريق زامبل والبلوله هو الكابتن ... وقبل ما يبدا عصام يشرح يتدخل البلوله مقاطعا البلوله : قول انت ياعصام غيران مني ومتغاظ عشان ما عملوك كابتن ولا هببوه ليك ماك عامل فيها شاطر ما لك ما تكلمت مع الخواجه .. هنا انفجر عصام ضاحكا مره ثانيه .. وقال يا اخوان اساسا الشئ المضحكني هو حكاية الفريق دي بالذات .. ياشباب الاستاذ قالكم عاوز اكون صديق ليكم وحابدا اليوم من اول شخص وحيكون مثلا هو البلولة ... وفريق زامبل دي بالانجليزي تعني مثلا وسمعتوها مليون مره واستاذ صلاح بيقولها بين كل جملتين وهي .. وراح كاتبها في السبوره for example .. عم سكوت لحظة وانفجر باقي الفصل فجاه في ضحك هستيري ... عدا سعادة المترجم البلولة شعر كانه صبت في راسه مياه بارده وعكره .. سنعود لما حدث للاستاذ الخواجه مع استاذ صلاح في المكتب .
|
|
|
|
|
|
|
|
|