يا كافي البلا!

Quote: Quote: المرضي ود ستنا كان زول شاطر خلاص, بس كان بيحب السفاهة زي عيونو ... و كان طالب معانا في الجامعة ... و كانت امكانياتو المادية محدودة زيو و زي باقي الطلبة المعانا ... بس دايما كان بيربط اللهو بالجد و دا الكان بيميزو .... تصدقو كان بيعمل شنو ... كان لمن تكون معاهو طرادة هي المبلغ المقطوع الكافي – حينذاك - لقضاء ليلة سمر لطيفة علي حسب ما كان يسمي هذه الاشياء, كان بيفتح أي مرجع من المراجع البيذاكر منها و يقوم بوضع الطرادة في نهاية الجزء الذي يود قراءته او مذاكرته ثم يبدأ القراية من بداية هذا الجزء و يمني النفس بسرعة الوصول لصفحة الطرادة و يستمر في الكسر بالمعدل الذي يمكنه من الوصول للطرادة باقصي سرعة ... و عندما يصل للطرادة يكون قد انتهي بالتالي من ما ( غايتو انا ما استاذ عربي لكن البعرفو من و ما لما يكونو مع بعض بتتكتب مما ) اراد قراءته و استذكاره فينهض من فوره مهما كانت الساعة و ينطلق الي حيث مصارف المال ... غادر المرضي ود ستنا البركس وركب البرنسة حتي وصل لغايته ... و هناك راي منزلا معلقة علي بابه لافتة مكتوب عليها بخط غير جميل الا انه واضح " منزل احرار " .... خيل للمرضي و علي حسب هواءه (هواءه دي زول الجن ما بقراها ليك يا ملاسي بما انك داقي صدرك وكاتب قصة مفروض تكون بتفرق بين الهواء و الهوى ) الباطني ان احرار هذه تعني ان يفعل سكان هذا المنزل ما يحلو لهم, يعني زي ما يقول ليك الواحد انا حر اعمل الدايرو انت مالك .... و لم يعلم المسكين ان احرار هذة تعني نفس المعني الوارد في المقولة المشهورة بان تجوع الحرة و لا تأكل ب .... الي اخره ..... اها اخونا المرضي لقي الباب متاكى ... قام دفرو و دخل ....... لقي الجماعة راقدين في الحوش ... فقال لهم بلهجة الواثق من نفسه و هو يتحسس جيبه حيث ترقد الطرادة في اطمئنان: - الراقدين ليها شنو ... انا جيت انزعجت علوية و سحبت الطرحة لتغطي بها راسها و صرخت بصوت منحبس سجمي بينما رفع صباح الخير راسه من العنقريب نصف رفعة و نظر الي المرضي بعين شبه مغمضة و قال ليهو: - مرحب .... تعال .... ابقي داخل ارتسمت ابتسامة انتصار علي الطرف الشمال لفم المرضي ..... و دخل ... تاني يوم صحو الجماعة الصباح في الداخلية لقو اخونا المرضي نايم و مغطي راسو ببشكير علي غير العادة ... صحوهو ... قال ليهم: - انا صاحي - طيب لو صاحي ما تقوم راقد مالك رد من وراء بشكيره - امشو انتو انا ما ماشي - الامتحان يا المرضي - ما مشكلة بجيب لي ميديكال ريبورت - يا زول صلي علي النبي و قوم - انتو مالكم انا داير املحق ... في زول فيكم عندو عندي حاجة ... يلا طشو من هنا - يا اخينا ما تشيل البشكير دا و تتكلم معانا زي الناس لكين ما في فايدة لا المرضي داير يقوم و لا داير يشيل البشكير من وشو .... خلوهو جماعتو في الغرفة و هم في اشد حالات الاستغراب .... ما ان خف وقع اقدامهم و تاكد المرضي من ابتعادهم حتي نهض و رفع البشكير من وجهه و جاب مرايتو المشقوقة و نظر فيها متحسرا و تحسس مكان شنبه الذي فقده الليلة الماضية.... و ردد بصوت حسير ... انا كان مالي و مال الاحرار

انا لما كنت في الصف السابع اساس بعرف اكتب قصة احسن من دي
قلت لي هواءه الباطني
الزول ده عنده هبوب ولا نفاخ في بطنه مثلا انصحو بالسنمكة والحلبة مفيدة للحالات دي كااااااااااااااك

(عدل بواسطة Mohammed Sedeq on 01-31-2013, 01:13 PM)
(عدل بواسطة Mohammed Sedeq on 01-31-2013, 01:15 PM)