تبارك ترحّم على الفقيد وبـلّ الحزب فقالوا مخبول، ولكن للمنبر ذاكرة!

Quote: تبارك - للأسف - ما عندو ولي أمر ... ومالك زمام امرو بالكامل ... لاكين في حاجات اسمها الخاطر والعشم والاحترام ... شكلها ما مرت عليك ... ياخي قبل كدا جيت السودان شايل واين ومسكوهو منّي في المطار ... العقيد لى التعتّرو قال ليّ "الشريعة الاسلامية" ... مرقت ليهو الفتوى بتاعة ابوحنيفة النعمان التي تحلل النبيذ وتحرّم الخمر ... نكر ... قال ليّ "نحن ما شغالين بالشريعة؛ نحن شغالين بى قوانين الدولة!" ... قلت ليهو طيب بى قوانين الدولة العمل شنو؟ قال ليّ نبدد الخمر ونخليك تمشي ... قلت ليهو انا ما بديكم الواين بتاعي بى اخوي واخوك ... دا واين محترم وغالي وجاني هدية ولو ما كدا انا ما النوع البيشرب واين زاتو ... لو صادرتوهو تدّوني إيصال بى انكم صادرتو منّي قزازة واين عشان انا اتابع الموضوع بالطرق القانونية ... قال ليّ بالطرق القانونية نحن ما عندنا إيصال مصادرة ... نحن عندنا بلاغ حيازة ... قلت ليهو جداً افتح بلاغ حيازة ... انا الواين دا عارفو جا من دكان مملوك ويدار بواسطة حكومة ولاية فرجينيا ... وممكن اجيب إيصال الشراء انو تمت "حيازتو" بطريقة مشروعة وقانونية ... قال ليّ لو فتحنا ليك البلاغ مفروض نلقي القبض عليك ... قلت ليهو ليه؟ مش بى البلاغ بمشي محكمة وبقيف قدام قاضي؟ انا لا منكر لا هارب لا خطر على الأمن والسلامة تقبضوني ليه؟ قال ليّ الإجراءات الجنائية كدا ... عندك زول يستقبلك؟ قلت ليهو آآآي .. مشيت جبت همرور دا ظاااطو - ولي أمري - كان راجيني في الصالة ... لامن فهم الموضوع قال ليّ انسى القصة دي شيل عفشك وورح ... العقيد قال ليّ "نحن قبيل قلنا ليك الكلام دا" ... قلت ليهو "لاكين انت ما اخوي! ... انت البوليس!" ... قعد يضحك ... راجل لطيف خالص قال ليّ أصلاً البلاغ كان حا يكون اجرائي لأنو قابضنك في منفذ دخول ... يعني تهمة الحيازة حا تسقط لاكين القاضي حا يحكم بالمصادرة بأي حال من الأحوال ... الأمور الرسمية رسمية يا أساسي ... والخوة خوة ... مرقنا من المطار اول حاجة لقيت النادي الكاثوليكي فيهو جامع اخدر ... سألت همرور طوالي: "ودا المسجد الكاثوليكي؟" ... طلع دا دار المؤتمر الوطني ... طوالي عرفت انو قرار انسى واتخارج دا كان قرار حكيم جداً جداً ... خصوصاً لامن اكتشفت لاحقاً انو الجوامع كلها بقت خدرا ... واتحسرت على الجوامع الاتبنت دانقيل ....أها باقي الطبّيظ الفي المداخلة ما بسألك منو .... ليهم حق يقولوا عليّ بتاع بنقو يا أساسي؟ اصلو الحق دا كم هو؟